1. Kifer nou bizin prepar nou pou fer fas ar persekision?

NOU Segner Zezi ti kone ki bann dimounn ti pou ena laenn pou tou bann ki swazir pou vinn so bann disip. Alor, lanwit avan ki ti touy li, li ti averti so bann disip lor la. (Zan 17:14) Depi sa lepok-la ziska zordi, bann Kretien fidel finn gagn persekision ar bann ki opoze ar vre ladorasion. (2 Tim. 3:12, NW) Amezir ki lafin sa sistem-la pe koste, nou atann ki nou bann lennmi pou plis persekit nou.​—Mat. 24:9.

2-3. (a) Ki nou bizin kone konsernan laper? (b) Ki nou pou examine dan sa lartik-la?

² Kouma nou kapav prepar nou depi asterla mem pou andir persekision? Li pa neseser ki nou esey pans tou bann move kitsoz ki kapav ariv nou. Si nou fer sa, sa kapav fer nou per ouswa trakase plis ki bizin. Ek finalman, sa kapav fer nou telman per ki nou aret servi Zeova avan mem ki nou gagn persekision. (Prov. 12:25; 17:22) Laper se enn zarm bien pwisan ki nou “lennmi” Satan Lediab pe esey servi kont nou. (1 Pier 5:8, 9) Ki nou kapav fer depi asterla mem pou prepar nou pou fer fas ar persekision?

³ Dan sa lartik-la, nou pou trouve seki nou kapav fer pou fortifie nou relasion avek Zeova ek kifer li bien inportan ki nou fer sa depi asterla mem. Nou pou get osi seki nou kapav fer pou ena plis kouraz. Ek finalman, nou pou examine seki nou kapav fer kan bann dimounn ena laenn anver nou.

4. Dapre Ebre 13:5, 6, ki nou bizin sir, ek kifer?

⁴ To bizin sir ki Zeova kontan twa ek ki zame Li pa pou abandonn  twa. (Lir Ebre 13:5, 6, NW. *) Finn gagn plizir lane, Latour Degard ti dir: “Plis enn dimounn konn Bondie plis li pou fer Li konfians kan pou ena bann persekision.” Sa li bien vre! Pou ki nou reisi andir persekision, nou bizin kontan Zeova, fer Li konfians avek tou nou leker ek zame pa doute ki Li ena lafeksion pou nou.​—Mat. 22:36-38; Zak 5:11.

5. Ki pou ed twa resanti lamour ki Zeova ena pou twa?

⁵ Lir Labib toulezour avek lobzektif pou vinn pli pros ar Zeova. (Zak 4:8) Kan to lir Labib, reflesi lor bann zoli kalite ki Zeova ena. Esey resanti so lamour ek so lafeksion kan to lir lor bann kitsoz ki Li’nn dir ek fer. (Ex. 34:6) Sertin kitfwa gagn difikilte pou krwar ki Bondie kontan zot parski zame personn pa finn manifeste lamour anver zot. Si to ena sa santiman-la, ki to kapav fer? Sak zour, esey fer enn lalis bann kitsoz ki Zeova inn fer pou twa pou montre twa so mizerikord ek so bonte. (Ps. 78:38, 39; Rom. 8:32) Kan to examinn to prop lexperyans ek to medit lor seki to finn lir dan Parol Bondie, pena dout ki to pou trouve kouma Zeova inn fer boukou kitsoz pou twa. Si to ena rekonesans pou tou seki Zeova pe fer, to pou ena enn relasion bien for avek Li.​—Ps. 116:1, 2.

6. Dapre Psom 94:17-19, kouma bann lapriyer sinser kapav ed twa?

⁶ Priye regilierman. Sey mazinn enn ti garson dan lebra so papa. Sa garson-la santi li telman an sekirite ki li pa per pou dir so papa tou bann bon ek bann move kitsoz ki’nn ariv li dan lazourne. To pou kapav ena sa mem relasion-la avek Zeova si sak zour to rapros twa avek Li kan to fer bann lapriyer sinser. (Lir Psom 94:17-19, NW. *) Kan to priye, “seki ena dan to leker, devid li devan Zeova kouma delo” ek dir to Papa ki kontan twa tou seki pe trakas twa ek fer twa per. (Lam. 2:19) Ki pou arive? To pou resanti seki Labib apel “lape Bondie ki depas tou konesans.” (Fil. 4:6, 7, NW) Plis to priye dan sa fason-la, plis to pou santi twa pros ar Zeova.​—Rom. 8:38, 39.

7. Kifer to bizin sir ki bann promes Bondie konsernan so Rwayom pou realize?

⁷ To bizin sir ki bann promes Rwayom Bondie pou realize. (Nonb 23:19) Si to pena enn lafwa for dan sa bann promes-la, li pou pli fasil pou Satan ek bann ki anba so kontrol fer twa per. (Prov. 24:10; Ebre 2:15) Kouma to kapav devlop enn lafwa for dan Rwayom Bondie depi asterla mem? Pran letan pou etidie lor bann promes Bondie konsernan so Rwayom, ek examine kifer to kapav sir ki zot  pou realize. Kouma sa pou ed twa? Anou get lexanp Stanley Jones, ki ti anprizone pandan set an akoz so lafwa. * Ki ti ed li pou andire avek fidelite? Li ti dir: “Konesans ki mo ti ena lor Rwayom Bondie ti ed mwa pou ena enn lafwa for. Mo ti kone seki sa Rwayom-la pou fer ek mo pa ti ena okenn dout lor la. Ek akoz sa personn pa ti pou kapav fer mwa kit Zeova.” Si to ena enn lafwa for dan bann promes Bondie, to pou vinn pli pros ar Zeova, ek to pa pou les laper anpes twa servi Li.​—Prov. 3:25, 26.

8. Fason ki nou konsider nou bann renion, montre ki kitsoz lor nou? Explike.

⁸ Asiste bann renion regilierman. Bann renion ed nou pou vinn pli pros ar Zeova. Fason ki nou konsider nou bann renion pou montre si nou pou kapav andir bann persekision dan lavenir. (Ebre 10:24, 25) Kifer nou dir sa? Si azordi nou les bann tipti difikilte anpes nou asiste nou bann renion, ki pou arive dan lavenir kan nou pou bizin riske nou lavi pou reini avek nou bann frer ek ser? Parkont, si nou bien deside pou asiste nou bann renion, nou pa pou aret al nou bann renion kan bann dimounn pou esey anpes nou reini avek nou bann frer ek ser. Se asterla ki nou bizin devlop lamour pou nou bann renion. Kan nou kontan asiste nou bann renion, okenn lopozision, ni okenn interdiksion gouvernman, pa pou kapav anpes nou “obeir Bondie plito ki obeir dimoun.”​—Zist. 5:29.

9. Kifer kan nou rapel bann verse Labib par-ker se enn bon fason pou prepar nou pou persekision?

⁹ Aprann to bann verse prefere par-ker. (Mat. 13:52) Li vre ki to memwar pa parfe, me Zeova kapav servi so lespri sin ki bien pwisan pou ed twa rapel sa bann verse-la. (Zan 14:26, NW) Enn frer ki ti anprizone dan l’Allemagne de l’Est ek ki plitar ti anferme tousel dan enn kaso, ti dir: “Mo ti bien kontan ki sa moman-la mo ti’nn fini aprann plizir santenn verse par-ker! Mem si mo ti tousel, mo lespri ti res bien okipe kan mo ti reflesi lor bann size Biblik.” Sa bann verse-la ti ed nou frer pou res pros ar Zeova, ek pou andire avek fidelite.

10. Kifer nou bizin aprann bann sante par-ker?

¹⁰ Sant ek aprann par-ker bann sante ki loue Zeova. Kan Pol ek Silas ti anprizone dan Filip, zot ti konn par-ker bann sante ki loue Zeova ek zot ti sant sa bann sante-la. (Zist. 16:25) Kan nou bann frer ki ti dan l’ex-Union soviétique  ti al an exil dan Sibérie, kouma eski zot osi zot ti fortifie zot lafwa? Ser Mariya Fedun rapel: “Nou ti sant tou bann kantik ki nou ti kone, bann ki ti ena dan nou liv kantik.” Li ti dir ki sa bann kantik-la ti ankouraz zot tou ek ti ed zot pou santi zot pli pros ar Zeova. Eski sa fortifie to lafwa kan to sant to bann sante prefere ki ena dan nou liv kantik ek lor Internet? Alor, aprann sa bann sante-la par-ker depi asterla mem!​—Get lankadre “ Donn Mwa Kouraz.”

11-12. (a) Dapre 1 Samiel 17:37, 45-47, kifer David ti ena kouraz? (b) Ki leson inportan nou aprann ar lexanp David?

¹¹ Pou andir persekision, to bizin ena kouraz. Ki to kapav fer si to trouve ki to mank kouraz? Rapel ki vre kouraz pa depann lor to groser, to lafors, ouswa to bann kapasite. Examinn lexanp zenn David kan li ti afront Goliat. Konpare ar sa zean-la, David ti pli tipti, pli feb, ek li pa ti ena bann zarm ki bizin. David pa ti mem ena enn lepe. Pourtan, li ti ena boukou kouraz. David san ezite, ti galoupe pou al lager kont sa zean arogan la.

¹² Kifer David ti ena sa kantite kouraz-la? Li ti sir ki Zeova ti avek li. (Lir 1 Samiel 17:37, 45-47. *) Goliat ti bien gran ek David ti paret tipti devan li. Me David pa ti konsantre li lor la. Okontrer, li ti konsantre li lor ki kantite tipti Goliat ti ete konpare ar Zeova. Ki nou aprann ar lexanp David? Nou pou ena kouraz si nou sir ki Zeova avek nou ek ki nou bann lennmi bien tipti konpare ar nou Bondie Tou-Pwisan. (2 Kro. 20:15; Ps. 16:8) Kouma nou kapav ena plis kouraz depi asterla mem, avan ki nou gagn bann persekision?

13. Kouma nou kapav ena plis kouraz? Explike.

¹³ Nou pou ena plis kouraz kan nou pres bon nouvel lor Rwayom Bondie avek lezot. Kifer? Parski kan nou prese, sa ansegn nou pou fer Zeova konfians ek pou pa per bann dimounn. (Prov. 29:25) Kan nou fer lexersis nou bann misk vinn pli for. Li parey, kan nou prese  lakaz-lakaz, an piblik, dan enn fason informel, ek dan bann teritwar komersial, sa fer nou ena plis kouraz. Si depi azordi, nou devlop kouraz pou prese, sa pou prepar nou pou kontign prese mem kan bann gouvernman interdi nou predikasion.​—1 Tes. 2:1, 2.

14-15. Ki bann leson nou aprann ar lexanp Nancy Yuen ek Valentina Garnovskaya?

¹⁴ Nou kapav aprann boukou ar lexanp de ser fidel ki ti montre enn gran kouraz. Nancy Yuen ti mezir anviron 1 met 50, me li pa ti les li intimide fasilman. * Li pa ti aret pres bon nouvel lor Rwayom Bondie. Akoz sa, ti anprizonn li pandan plis ki 20 an dan la Chine. Bann ofisie ki ti interoz li ti dir ki li ti “dimounn pli teti” dan zot pei!

¹⁵ Valentina Garnovskaya ti al fer prizon trwa fwa dan l’ex-Union soviétique. Antou, li ti fer anviron 21 an prizon. * Kifer? Li ti telman determine pou prese ki bann ofisie ti dekrir li kouma enn “kriminel bien danzere.” Ki ti ed sa de fam fidel la pou ena sa gran kouraz-la? Zot ti sir ki Zeova ti avek zot.

16. Kouma eski nou gagn vre kouraz?

¹⁶ Kouma nou finn examine, pou ki nou ena kouraz, fode pa nou kont lor nou prop lafors ek kapasite. Okontrer, nou bizin krwar ki Zeova avek nou ek se Li ki pe lager pou nou. (Det. 1:29, 30; Zaka. 4:6) Se koumsa ki nou gagn vre kouraz.

17-18. Dapre Zan 15:18-21, ki lavertisman Zezi ti donn nou? Explike.

¹⁷ Nou kontan kan lezot respekte nou, me ena enn erer ki fode pa nou fer. Fode pa nou panse ki nou pena valer kan bann dimounn pa kontan nou. Zezi ti dir: “Bienere kan dimoun air zot, e kan met zot deor, insilte zot, abes zot, mal parl zot akoz Garson Limanite.” (Lik 6:22) Ki Zezi ti pe rod dir?

¹⁸ Zezi pa ti pe rod dir ki bann Kretien ti pou kontan kan lezot ena laenn anver zot. Okontrer, li ti pe averti nou lor seki ti pou ariv nou.  Nou pa form parti dan lemond. Nou viv an-akor avek bann lansegnman Zezi ek nou pres mesaz ki li’nn prese. Akoz sa, lemond ena laenn anver nou. (Lir Zan 15:18-21.) Nou anvi fer Zeova plezir. Si bann dimounn ena laenn pou nou parski nou kontan nou Papa, sa se zot problem.

19. Kouma nou kapav imit lexanp bann zapot?

¹⁹ Fode zame nou onte ki nou enn Temwin Zeova akoz seki bann sinp imin dir ouswa fer. (Mish. 4:5) Nou kapav aprann pou sirmont laper ki nou ena pou bann dimounn kan nou examinn seki bann zapot dan Zerizalem ti fer zis apre lamor Zezi. Zot ti kone ki kantite bann sef relizie Zwif ti ena laenn pou zot. (Zist. 5:17, 18, 27, 28) Pourtan, toulezour zot ti kontign al dan tanp ek an piblik zot ti fer kone ki zot bann disip Zezi. (Zist. 5:42) Zot pa ti les laper anpes zot prese. Kouma nou osi nou kapav vink laper ki nou ena pou bann dimounn? Se kan regilierman ek an piblik, ki li dan travay, dan lekol, ouswa avek nou bann vwazin, nou fer kone ki nou bann Temwin Zeova.​—Zist. 4:29; Rom. 1:16, NW.

20. Kifer bann zapot ti ere mem si bann dimounn ti ena laenn anver zot?

²⁰ Kifer bann zapot ti ere? Zot ti kone kifer bann dimounn ti ena laenn anver zot, ek zot ti konsider sa kouma enn loner pou gagn maltrete parski zot ti pe fer volonte Zeova. (Lik 6:23; Zist. 5:41) Lapot Pier plitar ti ekrir: “Mem si zot bizin soufer akoz lazistis, zot ere.” (1 Pier 2:19-21; 3:14, NW) Kan nou konpran ki bann dimounn ena laenn pou nou parski nou pe fer seki drwat, zame nou pa pou les laenn sa bann dimounn-la fer nou aret servi Zeova.

21-22. (a) Ki to’nn desid pou fer pou prepar twa kan pou ena persekision? (b) Ki nou pou examine dan prosin lartik?

²¹ Nou pa kone kan nou pou koumans gagn persekision ouswa mem kan bann gouvernman pou interdi nou laktivite. Selman, nou kone ki nou kapav koumans prepar nou depi asterla mem. Nou fer sa kan nou fortifie nou relasion avek Zeova, nou ogmant nou kouraz, ek nou aprann seki nou kapav fer kan bann dimounn ena laenn anver nou. Kan nou prepar nou depi asterla mem, sa pou ed nou res fidel dan lavenir.

²² Me ki nou pou fer si gouvernman interdi nou laktivite? Dan prosin lartik, nou pou examinn bann prinsip ki pou ed nou kontign servi Zeova mem kan ena bann linterdiksion.