1. Kontha isiyani nihaana niitthenkacaka wiira nalipe ukati woolupattiya?

UHIYU mmoca Yesu hinatthi wiiviya, uyo ahohimya wiira otheene ale ampheela ukhala attharyaawe anaahala uthanyiya. (Joau 17:14) Iyo khweeliini ihokhumelela. Mpaka ilelo, makristau ookhuluvelya anaalupatthiya ni ale unaarusa uswali weekhweeli. (2 Tim. 3:12) Ni nna va utepaleehu waattamela umala wo ila ituninyeela, nihaana niitthenkacaka, kontha alupatthiihu anaahala utepa unilupattha. —Mat. 24:9.

2-3. a) Isiyani ninlamuliyeehu uhiliyala nhina woova? b) Isiyani ninhaleehu wiitthuca nhina ula mwahoola?

² Manannani ninlamuliyeehu wiitthenkaca wiira nalipe ukati woolupatthiya? Uhoonihe toko wiira wuupuwela nenna co citthu cotheene cinhala unikhumelela unaahala unikavihera. Khweeliini, ukhala nuupuwelaka citthu cihinaaya unikhumelela pooti uniphwanyiha woova ni unikhaliha ni masukhuli. Commo, unawoopiha hiiva uhiya unswalela Yehova hataa ahinaaya unikhumelela masakha. (Miru. 12:25; 17:22) Unaareera cinene uhiliyala iyo, kontha woova ikhanle ikaruma yuulupale ‘nwananiihu Sotwani’ invarelaawe nteko wiira anikhitiri. (1 Pet. 5:8, 9) Vano, isiyani ninlamuliyeehu upanka nenna co wiira niitthenkace?

³ Nhina ula mwahoola, ninaahala wiitthuca manannani ninlamuliyeehu ulipihaca upatthaniihu ni Yehova ni kontha isiyani unaareera cinene upanka iyo nenna co. Ciicammo ninaahala ucuwela isiyani ninlamuliyeehu upanka wiira nitepe ukhala oolipa nrima. Wuumaleloni, ninaahala wiitthuca mananna oovilela nathanyiyaka naalupatthi.

4. Toko cinthoonyeraaya Maberewu 13:5, 6, isiyani ninlamuliyeehu ukupali? Kontha isiyani ukupali iyo unaareera cinene?

⁴ Ukupali wiira Yehova nawuufenta ni uyo khanhala wuuhiya. (Usome Maberewu 13:5, 6.) Myaakha civinre uttuli, irevista Ukhalenla yaheera: “Ntthu noncuwela ratta Nluku naahala unkhuluvela cinene ukati wo masankiho.” Iyo ikhale ikhweeli yuulupale! Nihaana unfenta ni unkhuluvela cinene uyova, woohiliyala mananna cinnifentaawe. Ukupali iyo unaahala unikavihera uvilela khula inanna yoolupatthiya.—Mat. 22:36-38; Tiya. 5:11.

5. Isiyani weeva inlamuliyaa upanka yoohala wuukavihera woona wiira Yehova nawuufenta?

⁵ Usome Ibiiblya khula nihuku upheelaka ulipihaca upatthannyaa ni Yehova. (Tiya. 4:8) Ukati weeva unsomaa, umananihe uweheeha makhalelo omaana a Yehova. Woone nifento, unamaana ni uthunku nothoonyeraawe nhina citthu cotheene cinoolumaawe ni cimpankaawe. (Nkw. 34:6) Atthu akiina khanatoko thanku ufentiya, phimaana unawaarika cinene ukupali wiira Nluku nawaafenta. Weeva wakhala wiira phineecoonaa commo, umananihe khula nihuku wantikha citthu comaana Yehova cinoopankelaawe. (Isaa. 78:38, 39; Aroo. 8:32) Weeva woopuwelaka citthu comaana cinookhumelela ni woopuwelaka itthu insomaa Nnuulumoni na Nluku, atthunaka unaahala ukhitiri wantikha citthu cinci Yehova cuupankenlyaawe ni nanlelo cinoopankelaawe. Wansukhuruku Yehova nlattu wo citthu cotheene cimpankaawe, upatthannyaa ni uyo unaahala utepa ukhala woolipa.—Isaa. 116:1, 2.

6. Toko cinthoonyeraaya Isaalimu 94:17-19, isiyani inhala wuukhumelela waahihiyeke ulompa ni nrima wotheene?

⁶ Uhihiye ulompa. Umuupuwele mwanhima nokapattiya sana-saana naathumwaane. Uyo mwanhimooyo nawiicoona ratta ni mpaka khanoova wahimyera athumwaane citthu cotheene cinkhumelenle nno nihukunno, cikhale citthu comaana awula cootakhala. Iyo ciicammo pooti wuukhumelela weeva ni Yehova wanlompaka ni nrimaa wotheene khula nihuku. (Usome Isaalimu 94:17-19.) Ukati wonlompa, “ukumihe irinaa wanrimani toko maaci” ni waahimyeere Athumwana o nifento citthu weeva cinoovaa ni cinookhaliha ni masukhuli. (Ucuk. 2:19) Unaacuwela itthu inhala wuukhumelela? Weeva unaahala ukhalana ile Ibiiblya ineehanaaya “ineema ya Nluku, invikana moopuwelelo otheene.” (Afili. 4:6, 7) Weeva walompaka ni nrima wotheene, unaahala utepa wiicoona umphiyeera Yehova.—Aroo. 8:38, 39.

7. Kontha isiyani weeva uhaana ukupali wiira inatiri co Umwene wa Nluku cinaahala wiirannya?

⁷ Ukupali wiira iparakha cinhalaaya uwaana Umwene wa Nluku cinaahala wiirannya. (Manu. 23:19) Waahikupaliki wiira khweeliini inatiri ca Nluku cinaahala wiirannya, Sotwani ni atthwaawe khunhala waarikela uwoopopiha weeva. (Miru. 24:10; Mabere. 2:15) Isiyani weeva inlamuliyaa upanka wiira utepe ukhuluvela Umwene wa Nluku nenna co? Ukumihe ukati wiira usome inatiri co Umwene wa Nluku. Utothe ucuwela nlattuni weeva unlamuliyaa ukhuluvela wiira cinaahala wiirannya. Masi nlattuni unreeraaya  upanka iyo? Woone itthu yankhumelenle Stanley Jones, aakhanle myaakha 7 natthukiye nlattu wo waamini wawe. * Isiyani yankavihenre uvilela uyo ukati woorikooyo? Uyo aheera: “Kaanaacuwela Umwene wa Nluku ni citthu cinhalaaya upanka, ni kaahokupali nnyo citthunnyo. Phimaana khaavo aakhitinri urukunusa moopuwelelwaaka.” Weeva waaminiki cinene inatiri ca Yehova, upatthannyaa ni uyo unaahala utepa ukhala woolipa ni khunhala uhiya unswalela nlattu wo woova.—Miru. 3:25, 26.

8. Uhilova umikutthaano unaanikavihera ucuwela isiyani? Utaphulele.

⁸ Uhilove umikutthaanoni. Mikutthaano cinaanikavihera ulipihaca upatthaniihu ni Yehova. Uhilova umikutthaanoni unaanikavihera ucuwela wakhala wiira ninaahala ukhitiri uvilela awula mena nalupatthiyaka wahoolo. (Mabere. 10:24, 25) Manannani? Wakhala wiira ilelo ninaalova umikutthaano nlattu wo citthu cankaani, ninhala ukhala cani wahoolo ukati unhaleehu wiileva wiira nirwee unkutthaanoni? Mphantte nkiina, hiiva nalakelaka uhilova nanka nkutthaano mmoca, wahoolo khaninhala woova ukati alupatthi unhalaaya umananiha unikhottiha urwaa umikutthaanoni. Nna va phiri ukati wo wiitthuca unicivela mikutthaano. Hiiva canicivelaka mikutthaano cihu, khaninhala unhiya umwiiwelela Nluku wiira niwiiwelele apinaatamu, hataa nilupatthiyaka, ni hataa kuvernu anikhottihaka upanka mikutthaano.—Mite. 5:29.

9. Kontha isiyani uhela mmuru wihu iveerusu co mbiiblyani ankhala mananna owiitthenkaca wiira nalipe ukati woolupatthiya?

⁹ Uhele mmuru iveerusu co mbiiblyani cinoocivela. (Mat. 13:52) Pooti ukhala wiira weeva unawuurikela usunka itthu mmuru waa woohiliyala, masi Yehova pooti uvarela nteko nnepaawe wootteela wiira ookavihere wuupuwela nnyo iveerusunnyo. (Joau 14:26) Munneehu mmoca aatthukeliye nkhatteya u Alemanha Oriental yokhalayi heera: “Caakhanlyaaka ootteeliya, kontha mpaka ule ukatyuule kahaana mmuru iveerusu iminya cene! Akeecoona ukhala veekha kontha kaanawuupuwelaka myaha cinci co mbiiblyani.” Iveerusu munneehu caahenlyaawe mmuru cahonkavihera utepa umphiyeera Yehova—ni uhihiya uvilela.

10. Kontha isiyani unaareera uhela mmuru wihu icipo conttottopela Yehova?

¹⁰ Uhele mmuru ni wiipe icipo cinonttottopela Yehova. Ukati apostolu Paulu ni Silas waatthukiyaaya uFilipu, ayo yahiipa icipo conttottopela Nluku caahenlyaaya mmuru. (Mite. 16:25) Ni mayamunneehu u União Soviética yo khalayi yaarwaaniye  u Sibéria yahopanka itthu imocaaru wiira yiilipihe. Arokorihu Mariya Fedun anawuupuwela yeeraka: “Otheene cihu nahiipa icipo coopuweleehu, icipo co nlivuruni yocipo.” Ayo aheera wiira icipo cahaakavihera otheene caya ukhala oolipa ni umphiyeera Yehova. Vano weeva? Ciicammo unawiicona ulipihiya nrima weepaka icipo co nlivuruni yocipo awula icipo co TV JW? Phimaana, wiikurumice nenna co uhela mmuru nnyo iciponnyo!—Uwehe ikwaaturu “Ukilipihe nrima.”

11-12. a) Toko cinthoonyeraaya 1 Samuweli 17:37, 45-47, kontha isiyani Davidi aanaalipa nrima cinene? b) Itthuni yuulupale ineetthuceehu ni ntakihero na Davidi?

¹¹ Wiira uvilele ulupatthiya, weeva uhaana ukhalaka oolipa nrima. Wakhala wiira khuneecoona ulipa nrima, isiyani inlamuliyaa upanka wiira ukhitiri ulipa nrima? Wuupuwele wiira ulipa nrima khunakhala urekama, ukhomaala irutthu awula ucuwelaca. Umuupuwele Davidi. Uyo aari mmirawo ukati waattakannyaawe ni Koliyasi. Nanlattanihaka ni Koliyasi, Davidi aari ookhuvya, oohikhomaala ni khaarina ikaruma cokhotto coolikana wiira aattakane ni Koliyasi. Uyo khaarina nanka soowa awula ikatana. Masi Davidi aanaalipa nrima cinene, ni khoovale urwaa umwaattakanana ule ntthu oorekamoole ni owiicoonoole.

¹² Kontha isiyani Davidi aanaalipa nrima cinene? Kontha aanaakupali khweeliini wiira Yehova aari ni uyova. (Usome 1 Samuweli 17:37, 45-47.) Davidi khoopuwenle co: ‘Koliyasi muulupale ukivikana miiva.’ Uhiya commo, uyo oopuwenle co: ‘Koliyasi khanakhala itthu uhoolo wa Yehova.’ Iyo ihantisiiyo inniitthuciha isiyani? Hiiva ciicammo pooti ukhala oolipa nrima. Wiira nilipe nrima, nihaana nikhuluvelaka wiira Yehova ri ni hiivano ni alupatthiihu khanakhala itthu uhoolo wa Nluku nakuru-cotheene. (2 Ikor. 20:15; Isaa. 16:8) Isiyani ninlamuliyeehu upanka wiira nitepe ukhala oolipa nrima nenna co—nihinancera ulupatthiya?

13. Isiyani innikavihera utepa ukhala oolipa nrima? Utaphulele.

¹³ Itthu imoca innikavihera nenna co ukhala oolipa nrima ukhanle ulalyeera ihapari comaana co Umwene. Masi ulalyeera unoncerera cani ulipa nrima? Kontha ulalyeera unaaniitthuciha unkhuluvela Yehova ni uhiwoova atthu. (Miru. 29:25) Toko mitinka cihu cinkhomaalaaya navarelaka nteko, ulipa nrima wihu unaalipihaciya nalalyeeraka khula nipuro—mmapuwani, waatthuni, mapuro anthumihaciya ni mapuro makiina. Hiiva nalipihacaka ulipa nrima wihu nenna co wiira nilalyeere ihapari comaana, ninaahala ukhala owiitthenkaceene wiira nihihiye ulalyeera, hataa ahooleli  ookuvernu yakhottihaka ntekweehu.—1 Atesal. 2:1, 2.

14-15. Isiyani anniitthucihaaya matakihero aasirokorihu Nancy ni Valentina?

¹⁴ Hiiva pooti wiitthuca cinene ni ntakihero naasirokorihu eeli yaathoonyenre ulipa nrima cinene. Nrokorihu mmoca khanle Nancy Yuen. * Hataa irekamelwaawe yakhalaka paasi yo meeturu mamoca ni nuusu, uyo khaakuva woova. Ukati waakhanyererihiyaawe Nancy wiira ahiye ulalyeera, uyo ahokhotta ni ahokhala myaakha coopwaha 20 natthukiye u China. Akhulupale ookuvernu yankohakohale mpaka yaheera wiira uyo aari ‘ntthu ootepa uhunya maaru nlaponi motheene yoo China’!

¹⁵ Ntakihero nikiina nikhanle na nrokorihu Valentina Garnovskaya. * Naalikelaka myaakha cotheene ikwaha cootthaaru caatthukiyaawe u União Soviética, cinkhala myaakha 21. Nlattuni waatthukiyaawe? Kontha uyo anoolakela uhihiya ulalyeera, mpaka akhulupale ookuvernu yahomwiihana “nakhirini owoopiha cinene.” Isiyani yaakavihenre asirokorihu ookhuluvelya ooyeeli ukhala oolipa nrima cinene? Nancy ni hataa ciicammo Valentina yaanaakupali wiira Yehova aari ni ayova.

16. Isiyani ikhanle isiiri yoolipa nrima weekhweeli?

¹⁶ Toko coonaleehu, ulipa nrima khunakhala hiiva ukhomaala irutthu awula ucuwelaca. Wiira nilipe nrima, nihaana ukupali wiira Yehova ri ni hiivano ni wiira uyo phinnaakiha. (Deut. 1:29, 30; Zakar. 4:6) Iyo phi isiiri yoolipa nrima weekhweeli.

17-18. Isiyani Yesu inihimenryaawe nhina Joau 15:18-21? Utaphulele.

¹⁷ Otheene cihu unaanicivela uhisimwiya naakhwiihu. Masi khaninlamuliya wiithepya nuupuwelaka wiira mananna atthu cinniweheraaya phinthoonyera wiira nihaana ifayita. Yesu aheera: “Ootteeliya nnohala ukhala nyuuva khula ukati unhaleenyu uthanyiya ni apinaatamu, ni khula ukati unhalaaya wuukhottani, wuuruwanani ni wuuluma pusya ncina ninyu, nlattu wa Mwaana a Pinaatamu.” (Luka 6:22) Yesu aapheela uhimya isiyani?

 ¹⁸ Yesu khaapenle uhimya wiira makristau unawaacivela uthanyiya. Uyo aapheela uhimya ikhweeli paasi. Hiiva khanimpanka mphantte wotuninya. Nintthara citthu ciitthucihalyaawe Yesu ni ninlalya ihapari uyo cilalenryaawe. Phimaana, atthu o ntuninyani anaanithanya. (Usome Joau 15:18-21.) Masi itthu impheeleehu hiiva ukhanle unswalela Yehova. Atthu yanithanyaka nlattu hiiva wo waafenta Apaapeehu, iyo yawaya.

19. Ninlamuliya waatakiha cani mapostolu?

¹⁹ Uhihiye citthu cinoolumaaya ni cimpankaaya atthu ciwiirihaka woona ihaaya nlattu wookhala Saahiti a Yehova. (Mik. 4:5) Wakhala wiira ukati nkiina unaawoova atthu, wuupuwele ntakihero no maapostolu. Wiiviya wawe Yesu, ayo yahooneeha wiira yaanaathanyiya cinene naahooleli anattiini ayuuta. (Mite. 5:17, 18, 27, 28) Hataa ukhalaka commo, mapostolu khayaahiile urwaa utempulu uYerusalemu ni yahaathoonyera atthu otheene wiira ayo yaari atthari a Yesu. (Mite. 5:42) Ayo khayaahiile ulalyeera nlattu wo woova. Weeva ciicammo pooti ukhitiri umaliha woova. Manannani? Waahimyere atthu otheene wiira weeva Saahiti a Yehova—untekoni, ucikolani ni ncoko unkhalaa.—Mite. 4:29; Aroo. 1:16.

20. Nlattuni mapostolu waakhanlyaaya ootteeliya hataa yathanyiyaka?

²⁰ Nlattuni mapostolu waakhanlyaaya ootteeliya? Kontha ayo yaanaacuwela nlattuni waalupatthiyaaya ni yiicoona uttitthimihiya yalupatthiyaka nlattu woopanka impheelaawe Nluku. (Luka 6:23; Mite. 5:41) Apostolu Peturu wahoolo ahantikha co: “Hataa nhuvaka nlattu wosariya, nyuuva nnohala ukhala ootteeliya.” (1 Pet. 2:19-21; 3:14) Nacuwelaka wiira ninlupatthiya nlattu woopanka itthu yomaana, khaninhala uhiya unswalela Yehova nlattu woowoova atthu.

21-22. a) Isiyani weeva ilakenlyaa upanka upheelaka wiitthenkaca wiira walipe ukati woolupatthiya? b) Isiyani inhaleehu wiitthuca nhina mwaha nkiina unkeleehu usoma?

²¹ Hiiva khanincuwela yaakhani ninhaleehu ulupatthiya awula akhulupale okuvernu unikhottiha uvara ntekweehu. Masi ninaacuwela itthu imoca: hiiva pooti wiittenkaca nenna co. Wiira niitthenkace, nihaana nilipihacaka upatthaniihu ni Yehova, nihaana nitepaka ukhala oolipa nrima ni ucuwela coopanka alupatthi yanithanyaka. Neetthenkacaka nenna co, ninaahala ukhitiri ukhala oolipa wahoolo.

²² Masi wakhala wiira ntekweehu uhokhottihiya? Nhina mwaha nkiina unkeleehu usoma, ninaahala wiitthuca mattharelelo o mbiiblyani anhala unikavihera uhihiya unswalela Yehova, hataa ntekweehu ukhottihiyaka.