ZÃMSGÃ YĨNGA 27
D segl d menga, tɩ b sã n wa namsd-d tũudmã yĩng bɩ d tõog toogo
“Neb nins fãa sẽn dat n tũ Kirist Zeezi n vɩɩmd wẽn-sakr pʋgẽ wã me na n paama namsgo.”—2 TƖM. 3:12.
YƖƖLL 129 D na n kell n tõoga toogo
D SẼN NA N YÃ WÃ *
1. Bõe yĩng tɩ d segd n segl d meng namsgã yĩnga?
YƲNG ning b sẽn na n yõk d Zu-soab a Zeezi wã, a yeelame tɩ dũniyã na n kisga neb nins fãa sẽn na n sak n lebg yẽ karen-biisã. (Zã 17:14) Hal n tãag rũndã, sẽn pa nong-b tũudum hakɩɩkã namsda a Zeova Kaset rãmbã. (2 Tɩm. 3:12) Dũni-kãngã saabã sẽn tar kolgrã, d miime tɩ d bɛɛbã na n maneg n nams-d lame.—Mat. 24:9.
2-3. a) Bõe la d segd n bãng rabeemã wɛɛngẽ? b) Bõe yell la d na n gom sõs-kãngã pʋgẽ?
2 Wãn to la d tõe n segl d menga, tɩ b sã n wa namsd tõnd d tũudmã yĩng bɩ d tõog toogo? Pa tɩlɛ tɩ d tagsd bũmb nins fãa b sẽn tõe n maan tõndã, n mamsd rẽ d yamẽ ye. Sã n pa rẽ, rabeemã ne yɩɩrã tõe n wa loog-d lame. D sẽn mamsd d yamẽ wã tõe n wa komsa d raoodo, tɩ d bas a Zeova tũub tɩ namsgã meng nan pa wa ye. (Yel. 12:25; 17:22) Rabeemã yaa zab-teoog meng-meng tõnd “bɛyã sẽn yaa Sʋɩtãanã” sẽn tar n zabd ne-do. (1 Pɩy. 5:8, 9) Bõe la d tõe n maan n segl d menga?
3 Sõs-kãngã pʋgẽ, d na n yãa d sẽn tõe n maan tɩ paas tõnd ne a Zeova zoodã, la d sẽn tog n maan dẽ masã mengã võore. D na n yãa d sẽn tõe n maan me n paam raood n paase. Sẽn na n baase, d na n yãa d sẽn segd n maane, nebã sã n kis tõndo.
Y SẼN TÕE N MAAN TƖ PAAS YÃMB NE A ZEOVA ZOODÃ
4. Ebre-rãmb 13:5, 6 wilgdame tɩ d segd n kɩsa sɩd ne bõe, la bõe yĩng tɩ rẽ tar yõodo?
4 Kɩs-y sɩd t’a Zeova nong-y lame, la t’a pa na n tol n daag-y n bas ye. (Karm-y Ebre-rãmb 13:5, 6.) Hal sẽn kaoose, Gũusg Gasgã pʋgẽ b yeelame yaa: “Ned sẽn mi Wẽnnaam sõma sã n wa paam namsg a tũudmã yĩnga, a manegd n teega Wẽnnaam.” Hakɩɩka, yaa sɩda! B sã n wa namsd tõnd d tũudmã yĩnga, yɩl n tõog toogo, yaa tɩlɛ tɩ d nong a Zeova, n teeg-a zãng-zãnga, la d ra tol n maan sãmbs ne a sã n nonga tõnd ye.—Mat. 22:36-38; Zak 5:11.
5. Bõe n na n sõng-y tɩ y kɩs sɩd t’a Zeova nong-y lame?
5 Karemd-y Biiblã daar fãa, n maoodẽ tɩ rẽ paasd yãmb ne a Zeova zoodã. (Zak 4:8) Karengã sasa bɩ y gũusd n get a Zeova zʋgdã sẽn yaa sõma zãngã, n bʋgs rẽ zugu. Tags-y-yã a Zeova sẽn yeel bũmb ninsã, la a sẽn maan bũmb ninsã, n ges rẽ sẽn wilgd to-to t’a nonga yãmba. (Yik. 34:6) Tõe n yɩɩ toog ne nina t’a tẽ tɩ Wẽnnaam nong-a lame, bala a zɩ n paam tɩ nebã wilg-a nonglem ye. Sã n yaa woto yãmb nengẽ, yɩta sõma tɩ daar fãa bɩ y bao sebr n gʋls bũmb toor-toor a Zeova sẽn maane, tɩ wilgd a nimbãan-zoeerã la a nonglmã ne yãmba. (Yɩɩn. 78:38, 39; Rom. 8:32) Y sã n tagsd bũmb nins sẽn maan yãmb mengã vɩɩmã pʋgẽ wã, la y sẽn karemd Biiblã pʋgẽ wã yelle, y na n tõog n sõdga bũmb ka tɛk a Zeova sẽn maan n sõng yãmba. Y sũur sã n maneg n noom ne a Zeova sẽn maandã, y na n nong-a lame n yɩɩd pĩndã, tɩ yãmb ne yẽ zoodã tar paasgo.—Yɩɩn. 116:1, 2.
6. Wa Yɩɩn-sõamyã 94:17-19 sẽn yetã, y sã n pelgd y pʋg n pʋʋsd a Zeova, wãn to la na n sõng-yã?
6 Pʋʋsd-y wakat fãa. D rɩk makr ne rao sẽn mobg a biig a nusẽ. Biigã yam gãeeme, t’a gomd ne a ba wã, hal n togsd-a sẽn be a sũurẽ wã, n togsd-a bũmb nins sẽn maan daarã pʋgẽ wã, yel-noodã, la yɛl nins sẽn paam-a wã fãa. Yãmb sã n pelgd y pʋg n pʋʋsd a Zeova daar fãa, yãmb ne yẽ na n yɩɩ wa biigã ne a ba wã. (Karm-y Yɩɩn-sõamyã 94:17-19.) Y sã n wa pʋʋsd y Ba a Zeova sẽn nong-yã, bɩ y ‘togs y pʋgã fãa,’ rat n yeel tɩ y togs-a bũmb nins sẽn kẽesd-y rabeemã, la y yɩɩrã zãnga. (Wiis. 2:19) Wãn to la rẽ nafd yãmba? Y na n paama “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.” (Fili. 4:6, 7) Y sã n wɩngd ne pʋʋsg woto, yãmb ne a Zeova zoodã me na n tara paasg bala.—Rom. 8:38, 39.
Yaa d sã n kɩs a Zeova ne a Rĩungã sɩd la d na n tall raoodo
Yaa a Stanley Jones sẽn da mi Wẽnnaam Rĩungã sẽn na n wa maanã sõma wã n keng a pɛlga (Ges-y sull a 7)
7. Bõe yĩng tɩ y segd n kɩs sɩd tɩ bũmb nins Wẽnnaam sẽn pʋlem t’a na n maana ne a Rĩungã maasmã na n pidsame?
7 Kɩs-y sɩd t’a Zeova sẽn pʋlem t’a Rĩungã na n waa ne bark ninsã na n pidsame. (Sõd. 23:19) Y sã n pa kɩs sɩd zãng-zãng t’a Zeova sẽn pʋlmã na n pidsame, na n yɩɩ nana ne a Sʋɩtãan la a poorẽ dãmbã tɩ b kẽes-y rabeem. (Yel. 24:10; Ebre. 2:15) Bõe n na n sõng-y tɩ y bas y yam tɩ ne Wẽnnaam Rĩungã maasem, a pʋlemsã fãa na n pidsame? Zãms-y Biiblã n zulgi, n bãng bũmb nins Wẽnnaam sẽn pʋlem t’a na n wa maanã ne a Rĩungã maasmã, la bũmb nins sẽn kɩt tɩ d tõe n kɩs sɩd tɩ na n sɩd pidsame wã. Wãn to la rẽ na n sõng-yã? A Stanley Jones kibarã tõe n sõng-d lame tɩ d leok sokrã. * B kẽes-a-la bãens roog yʋʋm a yopoe, a tũudmã yĩnga. Bõe n sõng-a t’a tõog toogo, n kell n maan sɩda? Ad a sẽn yeele: “M da mii Wẽnnaam Rĩungã sẽn na n wa maanã sõma, n da kɩs sɩd tɩ na n pidsame, hal n da pa maand sãmbs baa bilf ye. Rẽ n sõng-m tɩ m tõog n yals kãn-kãe.” Y sã n tẽed bũmb nins Wẽnnaam sẽn pʋlmã ne y sũur fãa zãnga, yãmb ne yẽ zoodã na n talla pãnga, hal tɩ rabeem pa tõe tɩ y bas a tũub ye.—Yel. 3:25, 26.
8. Tõnd manesem sẽn yaa a soab tigissã kẽnd wɛɛngẽ wã wilgda bõe? Wilg-y y leoorã võore.
8 Kẽnd-y tigissã n pa vaandẽ ye. Tigissã sõngda tõnd tɩ d paasd d zoodã ne a Zeova. Ned manesem sẽn yaa a soab tigissã kẽnd wɛɛngẽ wã wilgda a sã n na n tõog n kell n yalsa kãn-kãe, b sã n wa namsd-a tũudmã yĩnga. (Ebre. 10:24, 25) Bõe tɩ d yet woto? Sã n mik tɩ d zoe n vaanda tigissã yel-bõones yĩnga, d manesem na n yɩɩ wãna, sã n wa yaa tɩlɛ tɩ d gẽneg d yõor n kẽng tigissã? La d sã n yãk yam n pa na n bas tɩ bũmb gɩdg-d tɩ d pa kẽng tigissã, baa bɛɛbã sã n wa rat n na n gɩdg tõnd tɩ d ra le tigim taaba, d pa na n zoe rabeem n bas ye. Yaa masã meng la d segd n modg n nong tigissã kẽnde. D sã n nong tigissã, baa b sẽn namsd tõnd to-to, la hal baa yaa goosneemã n gɩdg d tũudmã, d na n kell n saka Wẽnnaam, pa ninsaalbã ye.—Tʋʋ. 5:29.
Masã meng tɩ y sã n zãmsd Biiblã vɛrse kẽer ne zugu, la y zãmsd Rĩungã yɩɩlã, tõe n wa sõng-y lame, b sã n wa namsd-y tũudmã yĩnga (Ges-y sul 9) *
9. Bõe yĩng tɩ d yetẽ tɩ d sã n zãms Biiblã vɛrse kẽer ne zugu, sõngda tõnd tɩ d segl d meng namsgã yĩnga?
9 Zãms-y Biiblã vɛrse nins sẽn noom yãmb n yɩɩdã ne zugu. (Mat. 13:52) Tõe tɩ y pʋ-tẽerã pa vɩ ye. La ne vʋʋsem sõngã maasem, a Zeova tõe n kɩtame tɩ y tẽeg vɛrse-kãens goamã. (Zã 14:26) Saam-biig a ye b sẽn kẽes bãens roog Alemayndelɛste, n bak-a a ye tãa yeelame: “M sũur yɩɩ noog m sẽn da paam n zãms vɛrse-rãmb wʋsg ne zugã. M sẽn da yaa m yembrã pa nams-m ye. Bala, m da bʋgsda Biiblã goamã zug wʋsgo.” Biiblã vɛrse-kãensã sõnga d tẽed-n-taagã t’a kell n tall zood sõma ne a Zeova, n tõog n kell n maan sɩd ne-a.
(Ges-y sul 10) *
10. Bõe yĩng tɩ d segd n zãms Rĩungã yɩɩlã ne zugu?
10 Zãms-y Rĩungã yɩɩl kẽer ne zugu, n yɩɩnd n pẽgd a Zeova. B sẽn wa n yõk a Poll ne a Sɩlas n kẽes bãens roog Filip tẽngã, b yɩɩla yɩɩl b sẽn da mi ne zugu, n pẽg Wẽnnaam. (Tʋʋ. 16:25) B sẽn wa n yõg d tẽed-n-taas pĩnd Iniyõ Sovietik n tall n kẽng Siberi wã, bõe n keng bãmb me pelse? Ad saam-bi-poak a Mariya Fedun sẽn yeele: “D yɩɩla d yɩɩlã sebr yɩɩl nins d sẽn da mi wã fãa.” A yeelame tɩ yɩɩn-kãens kenga b fãa raoodo, la sõng-b tɩ b ra neẽ t’a Zeova bee ne-ba. Yãmb me sã n wa yɩɩnd Rĩungã yɩɩl nins y sẽn nong n yɩɩdã, pa kengd y raood sɩda? Sã n yaa rẽ, bɩ y zãms-b ne zugu.—Ges-y zĩ-gũbrã gom-zug sẽn yet tɩ: “ Kõ maam raoodo.”
D SẼN TÕE N MAAN N PAAM RAOOD N PAASE
11-12. a) Wa sẽn zems ne 1 Sãmwɛll 17:37, 45-47 wã sẽn yetã, bõe yĩng t’a Davɩɩd tall raoodo? b) Yam-bʋg la d tõe n dɩk a Davɩɩd kibarã pʋgẽ?
11 B sã n wa namsd tõnd d tũudmã yĩnga, yɩl n yals kãn-kãe, yaa tɩlɛ tɩ d tall raoodo. Yãmb sã n neẽ tɩ y pa tar raood woto, bõe la y tõe n maane? Tẽeg-y tɩ raood hakɩɩkã pa be ne y woglem wall y bedrem, y yãoog pãng wall y tõog ye. D tẽeg a Davɩɩd sẽn wa n na n zab ne a Golyatã. Nin-kãngã taoore, a Davɩɩd ra paooda wʋsgo, a ra pa baa fʋɩ, n leb n da pa tar zab-teed woto ye. A Davɩɩd ra pa zãad sʋʋg meng ye. Baa ne rẽ, a ra tara raood wʋsgo. A talla raoodo, n wudg tao-tao n na n tɩ zab ne nin-wobgã sẽn da wukd a mengã.
12 Bõe yĩng t’a Davɩɩd tall raood woto? A ra kɩsa sɩd ne a sũur fãa t’a Zeova bee ne-a. (Karm-y 1 Sãmwɛll 17:37, 45-47.) A Davɩɩd pa ges a Golyat bedrmã la a woglmã, n mak a meng ne-a ye. A sẽn da pʋd n tagsd n yɩɩdã yaa a Golyat sẽn pa baa fʋɩ a Zeova taoorã. Kiba-kãngã wilgda tõnd bõe? Tõnd me sã n kɩs sɩd t’a Zeova sẽn yaa pãng sẽn ka to soabã bee ne-do, la tɩ d bɛɛbã pa baa fʋɩ a taoore, d na n talla raoodo. (2 Kib. 20:15; Yɩɩn. 16:8) La bõe la d tõe n maan masã menga, n paam raood n paas tɩ namsgã nan pa wa?
13. Bõe la d tõe n maan n paam raood n paase? Wilg-y y leoorã võore.
13 Ad bũmb a ye sẽn na n sõng tɩ d raoodã paase: Yaa d sẽn na n moond koɛɛgã, n taasd nebã Wẽnnaam Rĩungã koe-noogã. Bõe yĩng tɩ d yet woto? Bala, koɛɛgã mooneg sõngda tõnd tɩ d teeg a Zeova, n pa le zoet ninsaal ye. (Yel. 29:25) Ned sã n wɩngd ne yĩn-wɩsgre, a gĩinã pãng paasdame. Woto me, tõnd sã n wɩngd ne koɛɛgã moonego, n moond zak-zaka, zãma wã zĩisẽ, tʋʋmã la koosmã zĩisẽ, la segb d sẽn paam fãa, d raoodã na n paasdame. D sã n tar raood n moond koɛɛgã rũndã-rũndã, na n sõngame tɩ d segl d meng tɩ b sã n wa gɩdg d tʋʋmdã bɩ d tall raood n ket n moondẽ.—1 Tes. 2:1, 2.
A Nancy Yuen zãgsa fasɩ t’a kõn bas koe-noogã mooneg ye (Ges-y sul 14)
14-15. A Nancy Yuen kibarã ne a Valentina Garnovskaya kibarã wilgda tõnd bõe?
14 Saam-bi-pogs a yiib n tall raood meng-menga, tɩ d tõe n dɩk yam b kibarã pʋgẽ. A yembr yʋʋr la a Nancy Yuen. * A woglem pa yɩɩd metr la pʋɩ-sʋk ye. La ned pa tõe n bugs-a nana-nana ye. A zãgsa fasɩ t’a kõn bas Wẽnnaam Rĩungã koɛɛg mooneg ye. B kẽes-a-la bãens roog Sin soolmẽ wã rẽ yĩnga, t’a maan sẽn yɩɩd yʋʋm 20. Polɩɩs-rãmb nins sẽn zĩndg-a n sok-a sogsgã yeelame tɩ soolmã tõr pʋgẽ, b zɩ n yã “ned sẽn ka wʋmd tʋbr” wa yẽ ye!
A Valentina Garnovskaya ra kɩsa sɩd t’a Zeova bee ne-a (Ges-y sul 15)
15 Saam-bi-poak a to wã yʋʋr la a Valentina Garnovskaya. * B kẽesa yẽ me bãens roog Iniyõ Sovietik soolmẽ wã hal naoor a tãabo. Naoor a tãabã fãa sã n naag taaba, yaa yʋʋm 21 la bala. Bõe yĩng la b sẽn kẽes-a bãens roogã? A pa sak n na n bas koɛɛgã mooneg baa ne b sẽn gɩdgã, hal tɩ polɩɩs-rãmbã yeel t’a yaa “bi-bɛɛg meng-menga.” Bõe n sõng d tẽed-n-taas a yiibã tɩ b tall raood woto? B ra kɩsa sɩd t’a Zeova bee ne-ba.
16. Bõe n kõt raood hakɩɩkã?
16 Wa d sẽn zoe n yeelã, yɩl n paam raood sõma, yaa tɩlɛ tɩ d ra teeg d meng pãng wall d minim ye. Pʋd n yaa a Zeova la d segd n teege, n kɩs sɩd t’a bee ne-do, la tɩ yaa yẽ n zabd n kõt tõndo. (Tõo. 1:29, 30; Zaka. 4:6) Yaa rẽnda n kõt raood hakɩɩkã.
Y SẼN SEGD N MAANE, NEBÃ SÃ N KIS YÃMBA
17-18. Zã 15:18-21 wã pʋgẽ, a Zeezi keooga tõnd ne bõe? Wilg-y y leoorã võore.
17 Ned fãa ratame t’a taabã nand-a, n waoogd-a. La d segd n gũusame n da wa tagsdẽ tɩ yaa neb wʋsg sã n nong-d la wilgd tɩ d yaa ned ye. A Zeezi ra yeelame yaa: “Sẽn wa n yaa wakat ning fãa la nebã kis yãmba, n bakd yãmb toore, n paoogd yãmb la b sãamd yãmb yʋʋr ninsaal Biigã yĩnga, yãmb yaa sũ-noog rãmba.” (Luk 6:22) A gomdã võor yaa bõe?
18 A Zeezi pa rat n yeel tɩ nebã sã n kis kiris-nebã, noom-b lame ye. A Gomdã yaa sẽn na n keoog-do, tɩ d bãng bũmb sẽn na n paam-do. Tõnd pa dũniyã rẽnd ye. Yaa a Zeezi sẽn zãms nebã bũmb ninsã la d tũuda, la d moond koɛɛg ning a sẽn moonã. Woto kɩtame tɩ dũniyã kis tõndo. (Karm-y Zã 15:18-21.) D raab yaa a Zeova sũur yɩ noog ne-do. Nebã sã n kis tõnd d sẽn nong d Ba wã yĩnga, rẽ paka bãmba.
19. Wãn to la d tõe n dɩk tʋm-tʋmdbã togs-n-taare?
19 Ra bas-y tɩ nebã sẽn yete, wall b sẽn maandã kɩt tɩ y getẽ tɩ y sẽn yaa a Zeova Kaset soabã yaa yãnd bũmb ye. (Mii. 4:5) D sã n bʋgs tʋm-tʋmdbã sẽn da be Zerizalɛmmã manesem sẽn yɩ a soab a Zeezi kũumã poorã, tõe n sõngame tɩ ninsaal zoeesã ra tõog-d ye. Tʋm-tʋmdbã ra mii zʋɩf-rãmbã tũudum taoor dãmb sẽn da kis-b to-to wã. (Tʋʋ. 5:17, 18, 27, 28) Baa ne rẽ, daar fãa, b ra ket n kẽnda wẽnd-doogẽ wã, n moond koɛɛgã zãma wã taoore, tɩ nebã neẽ tɩ b yaa a Zeezi karen-biisi. (Tʋʋ. 5:42) B pa bas tɩ rabeem tõog-b ye. Tõnd me sã n wae n wilgd nebã tɩ d yaa a Zeova Kaset rãmba, d tʋʋmã zĩisẽ, lekollẽ wã, la sakã pʋgẽ, tõe n sõngame tɩ d tall raoodo, n da zoe ninsaal ye.—Tʋʋ. 4:29; Rom. 1:16.
20. Bõe yĩng tɩ tʋm-tʋmdbã sũy ra yaa noogo, baa ne nebã sẽn da kis-bã?
20 Bõe n kɩt tɩ tʋm-tʋmdbã sũy ra yaa noogo? B ra mii nebã sẽn kis-bã võore, n da getẽ tɩ b sẽn namsd bãmb a Zeova raabã maaneg yĩngã yaa zu-zẽkre. (Luk 6:23; Tʋʋ. 5:41) Kaoosg zugẽ, tʋm-tʋmd a Pɩyɛɛr yeelame yaa: “Baa yãmb sã n wa namsd tɩrlmã yĩnga, yãmb yaa sũ-noog rãmba.” (1 Pɩy. 2:19-21; 3:14) D sã n miẽ tɩ yaa d sẽn maand sẽn yaa tɩrgã yĩng la b kis tõndo, d pa na n zoe sẽn kis-b tõndã, n bas a Zeova tũub ye.
Y SÃ N DENG N SEGL Y MENGA, NA N NAF-Y LAME
21-22. a) Bõe la y yãk yam n na n maane, n segl y meng namsgã yĩnga? b) Bõe yell la d na n gom sõsg ning sẽn pʋgdã pʋgẽ?
21 D pa tõe n bãng wakat ning nebã sẽn na n wa nams tõnd d tũudmã yĩnga, wall b pʋd n gɩdg d tũudmã ye. D sẽn mi bala, d tõe n segla d meng masã menga, n modg n paas tõnd ne a Zeova zoodã, n mao n paam raood n paase, la d bao n bãng d sẽn tõe n maane, nebã sã n kis tõndo. Bũmb nins d sẽn na n maan masã meng n segl d mengã na n wa sõng-d lame tɩ d tõog n yals kãn-kãe.
22 La sã n mik tɩ b gɩdga tõnd tũudmã? Sõsg ning sẽn pʋgdã pʋgẽ, d na n yãa sagls a wãn sẽn na n sõng-d tɩ d kell n tũ a Zeova baa b sã n gɩdga d tũudmã.
YƖƖLL 118 Bɩ f paas tõnd tẽebo
^ sull 5 Tõnd pa rat tɩ nebã kis tõnd ye. La d miime tɩ baa kaoosda, tõnd fãa na n paama namsg d tũudmã yĩnga. Sõs-kãngã na n sõng-d lame tɩ d paam raoodo, la d segl d meng tɩ namsgã sã n wa wa bɩ d tõog n yals kãn-kãe.
^ sull 7 Ges-y yʋʋmd 1966 tʋʋl-nif kiuug pipi daar Gũusg Gasgã, a seb-neng 212-224.
^ sull 14 Ges-y yʋʋmd 1979 zĩ-likr kiuug Gũusg Gasgã, a seb-neng a 4-7. Y leb n tõe n gesa video ning gom-zug sẽn yet tɩ Le nom de Jéhovah sera connu wã. Kẽ-y JW Télédiffusion® wã zĩigẽ, n ges INTERVIEWS ET TÉMOIGNAGES.
^ sull 15 Ges-y yʋʋmd 2008 aniyɛɛrã, a seb-neng 191-192.
