1. Tae-i ǃaroma i a ǂhâǂhâsa ǃâitsâgu amsi aiǂhomisensa?

ǃUIS HÎNAB ge Jesuba a ǃgam-es aib ge ge mî ǁîb ǁkhāǁkhāsaben ge nî saoǃgon-e di. (Jhn. 17:14) Nētsēs tsînan ge Jehovab di ǂgomǂgomsa ǃoaba-aona, khoen hîna ama ǂgomsa ra mâǃoan xa ra saoǃgon-e. (2Tim. 3:12) Nē ǃhūbaib ǀams ra ǀgū khamin ge sada mâǃoa-aona ǀgaisase nî mâǃoa da.—Mat. 24:9.

2-3. (a) Tae-e da ǃao tsâsib xa nî ǂan? (b) Tae-e da nē ǁkhāǁkhāǃâs ǃnâ nî ǃhoaǃgao?

² Mati da nēsi a aiǂhomisen ǁkhā ǃâitsâna mâǃoas ǃnâ? ǂHâǂhâsa tama i ge hâ sada ǀkha nî ī tsū xūn hoana ǂâiǃgâsa. Nēsa da ga dī o, o da ge ǃaob xa nî ǃkhōǃnami-e. Sada ǂâidi ge nî ǃaroma i da ǃâitsâgu noxoba hā tama hâ hîna ǃao tsoatsoa. (ǂKhm. 12:25; 17:22) Sada “mâǃoasabeb ǁGâuab” ge nē ǃaob tsâsiba sada ǃoa-ai ra sîsen-ū. (1Pet. 5:8, 9) Tae-e da nēsi nî dī ǀgaiǀgaisens ǃaroma?

³ Nē ǁkhāǁkhāǃâs ǃnâ da ge nî ǃhoaǃgao mati da sada ǀhōsagusisa Jehovab ǀkha a ǀgaiǀgai ǁkhā ǀgausa tsî nēs tae-i ǃaroma a ǂhâǂhâsasa. ǁKhoaǂgaosiba da mati nî omkhâi ǀgaus tsîna da ge nî ǃhoaǃgao. Tsî da ge ǀunis ai nî ǃhoaǃgao tae-e da a dī ǁkhāsa khoen ga saoǃgon da o.

4. Hebreǁîn 13:5, 6 ǃoagu da mâ ǂgomǃgâsiba nî ūhâ tsî tae-i ǃaroma?

⁴ ǂGomǃgâ re Jehovab a ǀnam du tsî xu ǃnâ du tidesa. (Khomai re Hebreǁîn 13:5, 6.) ǃKhē xu ǂgō-ommi ge kurin ǃnâ ge mûǂan: “ǃGâsan hîna Eloba ǃgâise ǂan an ge ǁîb ai ǃgom ǁaegu ǃnâ ra kō.” Nēs ge a ama. ǃÂitsâga mâǃoa hōs ǃaroma da ge Jehovaba ǀnam tsî nî ǂgomǃgâ tsî  ǂgomoǃnâsiba ǁîb sada ūba hâ ǀnammi xa tā nî ūhâ.—Mat. 22:36-38; Jak. 5:11.

5. Tae-e nî hui du Jehovab ūba du hâ ǀnamma hōǃâsa?

⁵ Elobmîsa tsēkorebe khomai tsî Jehovab ǀkha ǀgū ǀhōsagusisa omkhâi re. (Jak. 4:8) Khomai du ra khami Jehovab ǀnamxaǃnâ ǀgauga ǃoa kō re. ǁÎb di ǀnammi tsî tsâbaǁhaoxasiba, mî tsîb ra dī xūn ǃnâ hōǃâ re. (Eks. 34:6) ǀNîn ge Elob amabes ǃnâ a ǀnam nî ǃkhaisa ǂgom tama hâ nēsan ge noxoba hōǃâ tama hâ i amaga. Nēti du ga tsâ o, o tsēs hoasa Jehovab ra ǁgau du ǀkhomxaǂgaosib tsî ǀnamxaǃnâsib tsîna xoaǁnâ re. (Psa. 78:38, 39; Rom. 8:32) Sadu ǂanǂuis tsî Elobmîs ǃnâ du ra khomai xūn tsîn xa du ra ǂâiǃgâ hîna du ge Jehovab ge dība du ǂgui xūna nî xoamâi hō. Jehovab ge dība du xūn xa du ga ǂâiǃgâ o, o du ge sadu ǀhōsagusisa Jehovab ǀkha a ǀgaiǀgai ǁkhā.—Psa. 116:1, 2.

6. Psalmdi 94:17-19 ǃoagu di ǂgaoba xu hâ ǀgorede mati a huida ǁkhā?

⁶ Hoaǁae ǀgore re. ǂKham axarob ǁîb ǁgûb xa ǀnamma ra mā-eb xa ǂâi re. Nē axarob ge ǃnōrasase ra tsâ tsî ǁîb ǁgûba ǃgâi tsî tsū xūn ǁîb ǀkha ge īn xa ra mîba. Sada tsîn ge nē ǀgaub ǃnâ a tsâ ǁkhā tsēs hoasa da ga Jehovaba ǃoa ǀgore o. (Khomai re Psalmdi 94:17-19.) Jehovab ǃoa du ra ǀgore khami sadu “ǂgaoba ǁhōǂui ǃKhūb di ais aiǃâ ǁgam-i axase” tsî sadu ǀnamxaǃnâ ǁGûba sadu di ǃaob tsî ǂâiǂhansendi tsîna mîba re. (ǃG.am. 2:19) ǀAmǂoasa a tae? O du ge “Elob di ǂkhîb, ǁnâuǃāb hoaba ǃnā hâba” nî hōǃâ. (Fil. 4:6, 7) Hoaǁae da ga ǀgore o, o da ge Jehovab ǀgūse nî tsâ.—Rom. 8:38, 39.

7. Tae-i ǃaroma da ǀgaisa ǂgomsa Elob ge ǁîb Gaosib ǃnâ-ū a mîmâiba da ǀkhaegu ǃnâ nî ūhâ?

⁷ ǂGomǁapo re Elob Gaosib ǀkhaegu nî ama kai ǃkhaisa. (Num. 23:19) Sada di ǂâidi ga nē mîmâidi ǃnâ ǀgaisa tama io, ob ge ǁGâuab tsî ǁîb demongu tsîna a ǃâitsâ da ǁkhā. (ǂKhm. 24:10; Heb. 2:15) Mati da sada di ǂgomsa nēsi Elob Gaosib ǃnâ a ǀgaiǀgai ǁkhā? ǁAeba ǁamaǂui tsî Elob Gaosib mîmâi hâ ǀkhaegu tsî tae-i ǃaroma du nē mîmâidi ǃnâ ra ǂgoms tsîna ôaǃnâ re. Nēsa mati nî hui du? Stanley Jonsi di aiǁgausa ǃoa kō re, hîna ge hû kuriga ǃkhō-oms ǃnâ ǁîb ǂgoms ǃaroma ǂnôa îba. * Tae-e ge huibi ǂgomǂgomsase mâǀgaibesa? ǁÎb ge ra mî: “Gaosib di amaba ǃkhambas tsî nēs ǃnâ ǂgoms ge ge hui te.” ǀGaisa ǂgomsa da ga Jehovab ǃnâ ūhâ o, o da ge ǁîba ǃoa ǀgū tsî ǃao tsâsiga ūhâ tide.—ǂKhm. 3:25, 26.

8. Sada ǀhaodi ǃoa-ai ūhâ tanisen ǀgauba tae-e ra ǁgau? ǁGuiǃā re.

 ⁸ Hoaǁae ǀhaode ǁhaoǃnâ re. ǀHaodi ge Jehovaba ǃoa ǀgūs ǀkha ra huida. Sada ǀhaode ǁhaoǃnâsa ra mû ǀgaus ge nî huida sada ǃâitsâga ra sîsenǂam ǀgaus ǃnâ. (Heb. 10:24, 25) Tae-i ǃaroma? ǂKhari ǃgomsiron ga ǀhaode xu a hâbē kai da o nēsi, o i tae-e ǁaeb ra ī khami nî hā, kai ǃgomsina da ga hōǃâ o? Xawe da ga ǀhaode ǁhaoǃnâs ǃnâ mâǀgaibe o, o da ge ǃgomsina da ga hōǃâ o, o ǁîn ǃnâ māǁnâsen tide. Nēsi da ge ǀnamma ǀhaode ǁhaoǃnâsa nî omkhâiba. ǀHaode ǁhaoǃnâsa da ga ǀnam o, on ge ǃâitsân tamas ka io ǂhanub tsîna ǁkhae da tide Eloba khoen ǃgâ-ai ǁnâuǀnamsa.—ǃNǃkh. 5:29.

9. Xoade ǂâiǂâiǃnâsensa mati ǃgom ǁaegu ǃnâ a huida ǁkhā?

⁹ Mâǂoara xoade ǂâiǂâiǃnâsen re. (Mat. 13:52) Sada ǂâidi ge ǀoasa tama hâ xaweb ge Jehovaba ǁîb ǃanu gagab ǃnâ-ū nî huida xoade ǂâihō kai das ǃnâ. (Jhn. 14:26) ǀGui ǃgâsab hîna ge Duitsǃhūb ǃnâ ǃkhōsis ǃnâ ūhe hâ îb ge ge mî: “Kaise ta ge ge ǂkhî i ǃkhō-omsa ǃoa ta ge sîhe ǁaeb ai ta ge ǂgui xoade danasa xū ǂan i amaga. ǁNā tsēdi hîna ta ge ǀguri hâ i di ǃnâ ta ge nē xoade gere ǂâiǃgâ.” Nē xoadi ge sada ǃgâsaba ge hui îb Jehovab ǀgūse hâ ǁnā ǃgom ǁaegu ǃnâ tsî ǂgoms ǃnâ mâǁapo.

10. Tae-i ǃaroma da gagasi ǁnaetsanade nî ǁkhā- ǁkhāsen?

¹⁰ ǂÂiǃgâ tsî ǁnaetsanadi hîna Jehovaba ra koade ǁnae re. Filipis ǃnâ kha ge ǃkhōsis ǃnâ hâ i o, o kha ge Paulub tsî Silab tsîkha gagasi amdi hîna kha ge danasa xu ǂan îde gere ǁnae. (ǃNǃkh. 16:25) Sada ǃgâsan hîna ge Soviet Unionsa xu Siberiaba ǃoa a sîhena mati gagasise gere ǀgaiǀgaisen? ǃGâsas Mariya Feduns ge ra mî: “Sida ge ǁnaetsanadi ǂkhanisa xu da ge ǂan i amde gere ǁnae.” ǁÎs ge ra mî ǁnā ǁnaetsanadi ge hoana ǂkhâǃnâ tsî Jehovab ǀgūse gere tsâ kai di. Gagasi ǁnaetsanade da ga ǁnae o, o da gagasise ra ǂkhâǃnâ-e? ǁNās ga ama o, o ǁnā ǁnaetsanade nēsi ǁkhaǁkhāsen re.—“ ǁKhoaǂgaosiba mā te re” di hâ boksisa mû re.

11-12. (a) 1 Samueli 17:37, 45-47 ǃoagub Daviba tae-i ǃaroma ǁkhoaǂgaosiba ge ūhâ i? (b) Mâ ǂhâǂhâsa xū-e da Davib aiǁgausa xu ra ǁkhāǁkhā- sen?

¹¹ ǃGomsina mâǃoa hōs ǃaroma da ge ǁkhoaǂgaosiba ǂhâ hâ. Mûǂan du ga o ǁkhoaǂgaosiba du ūhâ tama hâsa, o du tae-e nî dī? ǂÂis ǃnâ ūhâ re ǁkhoaǂgaosiba ūhâs ge sadu kaisib tamas ka io ǀgaib tsîna xu hâ tama hâ. Davib hîna ge Goliata gere ǃkhami aiǁgaus xa ǂâi re. Goliati hîna kaimâ hâb ǀkha da ga Daviba a ǀgopeǀnō o, ob ge Daviba ǂkhariro tsî ǂhanu ǃkham saran tsîna ge ana tama hâ i. Davib ge ǃkhams amsi gôa-i tsîna ge ūhâ tama hâ i. Xaweb ge ge ǁkhoaǂgao i. Davib ge ǁkhoaǂgaosib ǀkha ǁnā kaimâ hâ khoeba ge ǃkham ǃoa.

¹² Tae-i ǃaromab Daviba ǁnāti ge ǁkhoaǂgaoxa i? ǁÎb ge ǂgomǃgâsiba ge ūhâ i Jehovab ǁîb ǀkha hâsa. (Khomai re 1 Samueli 17:37, 45-47.) Davib ge Goliati kaimâsib ai ge kō tama hâ i. Xaweb ge Goliati Jehovab ǃoa-ai mati kōse a ǂkhariros xa gere ǂâi. Tae-e da nēsa xu ra ǁkhāǁkhāsen? Jehovab sada ǀkha hâsa da ga a ǂan o, o da ge ǁkhoaǂgaosiba nî ūhâ tsîn sada mâǃoa-aona sada Hoaǀgaixa Elob ǃoa-ai kaise a ǂkhariros tsîna. (2Kro. 20:15; Psa. 16:8) Mati da nēsi ǁkhoaǂgaosiba a omkhâi ǁkhā ǃâitsâgu nî hās aiǃâ?

13. Mati da ǁkhoaǂgaosiba nî omkhâi? ǁGuiǃā re.

¹³ Sada ge Elob Gaosib ǃgâiǂhôasa aoǁnâs ǃnâ nēsi sada di ǁkhoaǂgaosiba a omkhâi ǁkhā. Tae-i ǃaroma da nēsa nî dī? Aoǁnâs, Jehovab ǃnâ ǂgomǃgâsiba omkhâis tsî sada ǃaoba ǀamsa hōbas ǀkhas tsîna ra huida amaga. (ǂKhm. 29:25) Sada ǂkhōn ǂgamǂgamsen ǀhuruna da ga dī o ra ǀgais ǁkhās khamis ge sada ǁkhoaǂgaosib tsîna omsa xu oms ,khoena da ra ǀhao-ū ǃkhain tawas tsîna da ga aoǁnâ o, o ra ǀgai. Aoǁnâs ǃaroma da ga ǁkhoaǂgaosiba nēsi omkhâi o, o da ge ǃgom ǁaegu ǃnâs tsîna nî aoǁnâ ǁkhā.—1Tes. 2:1, 2.

14-15. Nancy Yuens tsî Valentina Garnovskayas tsîra di aiǁgausa xu da tae-e ra ǁkhāǁkhāsen?

¹⁴ ǀGam ǃgâsara hîna ge ǂoaǂamsa ǁkhoaǂgaosiba a ǁgau ra di aiǁgausa xu da ge a ǁkhāǁkhāsen ǁkhā. Nancy Yuens  ge kaise ge ǃnūbu i xawes ge ge ǃaoǃnâ tama hâ i. * ǁÎs ge aoǁnâ sîsen-e dīs ǀkha ge aiǃgû. Nēs ǃaromas ge 20 kuriga Chinab ǃnâ ǃkhōsis ǃnâ ge ūhe. ǃKhōsis ǃnâ ge ūsi khoegu ge ge mî “ǁîs ge kaise ge ǁnâuǀnamoǃnâ i di” ǁîn ǃhūb ǃnâ.

¹⁵ Valentina Garnovskayas tsîn ge ǃnona ǃnāde Soviet Unions ǃnâ ǃkhōsis ǃnâ ge hâ i tsî 21 kuriga ǁnāba ge hâ. * Tae-i ǃaroma? ǁÎs ge ge aoǁnâ ǀû tama hâ i tsîgu ge ǀapaǃnamga ǁîsa “ǁkhōǁkhōsa khoes ase gere mû.” Tae-e nē ǀgam ǃgâsara nē ǃnôa ǁkhoaǂgaosiba ge mā? ǁÎra ge ǀgaisa ǂgomsa ge ūhâ i Jehovab ǁîra ǀkha hâsa.

16. Ama ǁkhoaǂgaosiba da mati a omkhâi ǁkhā?

¹⁶ ǁKhoaǂgaosiba omkhâis xa da go ǁkhāǁkhāsen amaga da ge sada di ǀgaib ai ǃgâsen ǂgao tama hâ. Tsî da ge Jehovab sada ǀkha hâ tsî nî ǃkhamba da ǃkhaisa nî ǂgom. (Deu. 1:29, 30; Sax. 4:6) Nēs ge ama ǁkhoaǂgaosiba nî ǁgau.

17-18. Johaneb 15:18-21 ǃnâ i a xoasa khamib ge Jesuba mâ ǃkhâikhomsa mā da? ǁGuiǃā re.

¹⁷ Khoena xu da ra hō ǃgôasiba da ge ra ǃgôaǃgâ xawen ga khoena ǃgôasiba ǁgau da tama i o, o da ge tā tsūse nî tsâ. Jesub ge ge mî: “ǃGâiǃō hâ du ge sado, khoen ga ǁkhan, tsî ǀgoraxū tsî mîǁgaiǁgai duo, tsî sadu ǀonsan ga ǂkhabas ase aoxūo Khoen Ôab ǃaroma.” (Luk. 6:22) Jesuba nēs ǀkha tae-e gere ǂâibasen?

¹⁸ Jesub ge ge mî tama hâ i în Xristeǁîna ǃhuihen hâ ǃkhais xa ǃgâibahe. Xawe gere ǃkhâikhom da tae-i a īǁkhā ǃkhais xa. Sada ge nē ǃhūbaib di ǃâ tama hâ. Sada ge Jesub di ǁkhāǁkhāde sada ûib ǃnâ ûiǂui tsî ǁîb gere dī aoǁnâ sîsen-e ra dī. Nēs ǃaromab ge ǃhūbaiba ǃhui da hâ. (Khomai re Johaneb 15:18-21.) Sada  ge Jehovaba ra ǂkhîǂkhî ǂgao. Khoen ga Jehovaba da a ǀnam ǃkhais ǃaroma a ǃhui da o, os ge ǁnāsa a ǁîn ǃgomsi.

19. Mati da apostelgu aiǁgaude a ǁgae ǁkhā?

¹⁹ Tā mā-am re in khoen ra dī tsî mî xūna Jehovab ǀHûǀguitimî-ao da a ǃkhais xa tao kai da. (Mix. 4:5) Khoen ǃaob ǃgomsiba sîsenǂam hōs ǃaroma da ge Jesub apostelgu aiǁgausa ǃoa nî kō Jerusalems ǃnâ Jesub ǁōb aiǃâ. ǁÎn ge ge ǂan i Jodeǁîn xan ge kaise ǃhui-e hâ i ǃkhaisa. (ǃNǃkh. 5:17, 18, 27, 28) Xawen ge tsēs hoasa tempela ǃoa gere ī tsî aoǁnâs ǃnâ-ū gere ǁgau ǁîn a Jesub ǁkhāǁkhāsabesa. (ǃNǃkh. 5:42) ǁÎn ge ǃaob ǃnâ ge māǁnâsen tama hâ i. Sida tsîn ge ǃaoba a mâǃoa ǁkhā, hoaǁae Jehovab di ǀHûǀguitimî-aon ase ǁgausens ǃnâ-ū, sîsenni, skoli tsî sida ǀhûhâsib ǃnâs tsîna.—ǃNǃkh. 4:29; Rom. 1:16.

20. Apostelga tae-i ǃaroma gere ǃgâiaǂgao ǃhui-e gu ge hâ i xawe?

²⁰ Apostelga tae-i ǃaroma gere ǃgâiaǂgao? ǁÎgu ge ge ǂan i tae-i ǃaroma gu ge ǃhui-e hâ īsa tsî Jehovab ǀons ǃgao mâǃoahesa gere ǃgôaǃgâ. (Luk. 6:23; ǃNǃkh. 5:41) Apostel Petrub ge ega ge xoa: “Tsî ǂhanu-aisib ǃaroma du ga tsâ xawe du ge a ǃgâiǃō.” (1Pet. 2:19-21; 3:14) ǃGâi xū-e da ra dī ǃkhais ǃgao da ǃhui-e hâsa da ga ǂan o, o da ge Jehovaba ǃoaba ǀû tide khoen ǃhui da hâ amaga.

21-22. (a) Tae-e da nî dī sida sîsengu mâǃoadi ǃgao aiǂhomisens ǃaroma? (b) Tae-e da sao ra ǁkhāǁkhāǃâs ǃnâ nî ǃhoaǃgao?

²¹ ǀŪ da ge a mâǁae da nî mâǃoa-e ǃkhaisa tamas ka io i sida ǃoabasa mâǁae nî ǀam kaihesa. Xawe da ge nēsi sida ǀhōsagusis Jehovab ǀkha da ūhâsa ǀgaiǀgais, ǁkhoaǂgaosiba omkhâis tsî khoena xu ra hā ǃhuiba sîsenǂams ǃnâ-ū a aiǂhomisen ǁkhā. Nēsi da ra dī aiǂhomisendi ge nî huida hānîǁaeb ǃnâ mâǀgaisa.

²² Xawe i ga sida sîsenga nēsi ǂkhā-e os? Sao ra ǁkhāǁkhāǃâs ǃnâ da ge Elobmîs tsoatsoadi hîna Jehovaba ǃoabas ǃnâ nî huida de nî ǃhoaǃgao sida sîsengu ga ǂkhā-e xawe.