1. ¿Kenke moneki tijmajtosej nojua tlauel techtlatsakuiltisej?

KEMA nechka mikiskia, Jesús kiijtok maseualmej kinkualankaitaskiaj nochi katli kinekiskiaj kitokilisej (Juan 17:14). Maseualmej pejkej kintlatsakuiltiaj Cristo itokilijkauaj kema nojua itstoya (2 Tim. 3:12). Uan kej monechkauijtias nopa tonali kema kintsontlamiltisej katli amo kualmej, nojua tlauel techtlatsakuiltisej (Mat. 24:9).

2, 3. 1) ¿Tlake panos tlaj timajmauij? 2) ¿Tlake tikitasej ipan ni tlamachtili?

² ¿Kenijkatsa uelis timokualchijchiuasej uan kiampa tikixnamikisej nopa tlaouijkayotl? Amo kinamiki timoiljuisej nochi tlen ueliskia techpanos, pampa tlaj kiampa tijchiuasej, tlen timoiljuisej uelis techmajmatis uan techtekipachos uan nopa kichiuas ma tijkauakaj Jehová maske ayamo techpano se ueyi tlaouijkayotl (Prov. 12:25; 17:22). Tokualankaitaka Satanás kineki techmajmatis uan kiampa techtlanis (1 Ped. 5:8, 9). Uajka, ¿tlake uelis tijchiuasej nama uan kiampa amo timajmauisej?

³ Ipan ni tlamachtili tikitasej kenijkatsa uelis nojua tlauel kuali timouampojchiuasej iuaya Jehová uan nojkia kenke tlauel moneki kiampa ma tijchiuakaj ipan ni tonali. Nojkia tikitasej tlake techpaleuis amo ma timajmauikaj uan tlake kinamiki tijchiuasej kema maseualmej techkualankaitasej.

4. Kej kiijtoua Hebreos 13:5, 6, ¿tlake moneki tijneltokasej, uan kenke tlauel ipati tijchiuasej nopa?

⁴ Ma tijneltokakaj Jehová nelia techiknelia uan amo kema techtlauelkauas (xijpoua Hebreos 13:5, 6). Uejkajkia, pilamochtsi Tlen Tematiltia kiijtok: “San nopa maseuali katli nelia kuali kiixmajtos Jehová motemachis ipan ya kema kiixnamikis  tlaouijkayotl”. Ni nelia melauak. Tlaj tijnekij tikijiyouisej kema sekinok techtlatsakuiltisej, moneki tikiknelisej Jehová uan timotemachisej ipan ya ika nochi toyolo, uan amo kema ma timoiljuikaj ya amo techiknelia (Mat. 22:36-38; Sant. 5:11).

5. ¿Tlake techpaleuis ma tikitakaj kenijkatsa toTeotsij tlauel techiknelia?

⁵ Mojmostla ma tijpouakaj Biblia tlaj tijnekij kuali timouikasej iuaya Jehová (Sant. 4:8). Kema tijpojtiasej, ma timosentlalikaj ipan nopa yejyektsitsij kuajkuali tlamantli tlen kinextia. Ma tikitakaj kenijkatsa tlauel teiknelia ika tlen kiijtoua uan kichiua (Éx. 34:6). Uelis sekij moiljuiaj toTeotsij amo kiniknelia pampa yon se maseuali kinextijtok kiniknelia. Tlaj ta kiampa mitspano, kualtiaskia sejse tonali tikijkuilos se keski tlamantli kampa tikitak kenijkatsa Jehová kinextik mitsiknelia uan mitstlasojtla (Sal. 78:38, 39; Rom. 8:32). Uelis tlauel miak tlamantli tikijkuilosej tlaj timoyoliljuisej ipan tlen techpanotok uan ipan tlen tijpojtokej ipan Biblia. Tlaj nojua tlauel tijpatiitasej tlen Jehová kichiua, techpaleuis nojua tlauel kuali ma timouampojchiuakaj iuaya (Sal. 116:1, 2).

6. Kej kiijtoua Salmo 94:17-19, ¿kenijkatsa tlauel techpaleuia kema timomaijtouaj ika nochi toyolo?

⁶ Nochipa ma timomaijtokaj. Ma timoiljuikaj ipan se okichpil katli itata kinajnaua ika miak tlaiknelili. Ya amo majmaui kema itstok iuaya uan kiiljuia nochi tlen kipanok ipan nopa tonali, tlen kuali uan tlen amo kuali. Tojuantij nojkia uelis kiampa timouikasej iuaya Jehová tlaj nochipa timomaijtosej ika nochi toyolo (xijpoua Salmo 94:17-19). Ma tikiljuikaj toTata Jehová nochi tlen tijpiaj toyolijtik, tlen techtekipachoua uan tlen techmajmatia (Lam. 2:19). Tlaj kiampa tijchiuasej, tijpiasej tlaseuilistli kej Biblia kiijtoua, “uan nopa tlaseuilistli kiyaualtsakuas” toyolo uan totlalnamikilis (Filip. 4:6, 7). Tlaj nochipa kiampa timomaijtosej, nojua tlauel timonechkauisej ika Jehová (Rom. 8:38, 39).

7. ¿Kenke moneki tijneltokasej nelia moaxitis tlen toTeotsij kitenkajtok kichiuas ika iTlanauatijkayo?

⁷ Ma tijneltokakaj nelia tijselisej miak tlateochiualistli kema tekichijtos toTeotsij iTlanauatijkayo (Núm. 23:19). Tlaj amo kuali titlaneltokaj ipan tlen toTeotsij techtenkauilijtok, Satanás uan katli kipaleuiaj uelis nimantsi techmajmatisej (Prov. 24:10; Heb. 2:15). ¿Tlake uelis tijchiuasej nama uan kiampa nelia timotemachisej ipan toTeotsij iTlanauatijkayo? Ma tijkixtikaj tonali uan ma timomachtikaj tlen Jehová kitenkajtok kichiuas ika iTlanauatijkayo uan ma tikitakaj kenke uelis timotemachisej nelia moaxitis. Tlaj tijnekij tijmatisej kenke tlauel moneki tijchiuasej ni, ma tikitakaj tlen kipanok Stanley Jones, katli kitsajkej chikome xiuitl pampa tlaneltokayaya ipan toTeotsij. * Ya kiijtok tlake kipaleuik amo ma kiixpano Jehová: “Kuali nikixmatiyaya nopa tlamachtili tlen toTeotsij iTlanauatijkayo, uan nelnelia nimotemachiyaya ipan nopa tlanauatijkayotl,  nopa nechpaleuik ma nikijiyoui. Amo uelkej nechtlankej”. Tlaj kuali titlaneltokaj ipan tlen toTeotsij kitenkajtok, techpaleuis ma timonechkauikaj iuaya uan amo timajmauisej (Prov. 3:25, 26).

8. Xikixtoma tlake panos tlaj kena o amo timosentiliaj ipan tlanechikoli.

⁸ Nochipa ma timosentilikaj ipan tlanechikoli. Ni techpaleuia ma tijnechkauikaj Jehová. Tlaj nochipa tiasej tlanechikoli techpaleuis teipa ma tikijiyouikaj kema techtlatsakuiltisej, uan tlaj amo tiauij, amo tikijiyouisej (Heb. 10:24, 25). Ma tikitakaj kenke tikijtouaj ni. Tlaj ipan ni tonali amo tiauij tlanechikoli pampa techtsakuilia se keski tlamantli, ¿tlake tijchiuasej kema amo techkauasej ma timosentilikaj? Uan tlaj ipan ni tonali timosentlaliaj nochipa tiasej tlanechikoli, katli techtlatsakuiltisej amo uelis techtsakuilisej. Uajka, kinamiki ipan ni tonali peuas tijpatiitasej timosentilisej. Tlaj kiampa tijchiuasej, nochipa tijneltokasej toTeotsij, uan maske techtlatsakuiltisej o tekichiuanij amo techkauasej, tojuantij nochipa timosentilisej (Hech. 5:29).

9. ¿Kenke tlauel techpaleuis tlaj tijtsontekontlalisej miak textos?

⁹ Ma tijtsontekontlalikaj textos katli tlauel techpaktia (Mat. 13:52). Maske uelis totsonteko amo tlauel techpaleuia, Jehová uelis kitekiuis itonal uan techpaleuis ma tikilnamikikaj (Juan 14:26). Se toikni katli kitsaktoyaj Alemania oriental uan amo uelki monojnotsa ininuaya sekinok, kiijtok: “Tlauel nechpaleuik pampa nijtsontekontlalijtoya kipano 200 textos. Pampa amo niueliyaya nijchiua miak tlamantli, nimoyoliljuiyaya ipan miak tlamachtili tlen Biblia”. Nopa textos kipaleuik toikni ma monechkaui ika Jehová uan amo ma kitlauelkaua.

10. ¿Kenke moneki tijtsontekontlalisej uikatl tlen ika tijueyichiuaj Jehová?

¹⁰ Ma tijtsontekontlalikaj uikatl tlen ika tijueyichiuaj Jehová uan ma tiuikakaj. Kema Pablo uan Silas kintsaktoyaj ipan Filipos, kiuikatijkej Jehová ika uikatl tlen kitsontekontlalijtoyaj (Hech. 16:25). Toikniuaj tlen Unión Soviética katli kinuikakej Siberia nojkia kiampa kichijkej pampa kinekiyayaj nojua kuali tlaneltokasej. Tosiuaikni Mariya Fedun kiilnamijki ni: “Pejki tiuikaj nochi uikatl tlen tijtsontekontlalijtoyaj”. Ya kiijtok nochi nopa uikatl kinyolchikauayaya uan kinpaleuiyaya ma itstokaj inechka Jehová. ¿Timoyolchikauaj kema tiuikaj nopa uikatl tlen tlauel techpaktia? Uajka, nama ma tijtsontekontlalikaj  (xikita nopa recuadro “ Ta tijchiuas amo ma nimajmaui”).

11, 12. 1) Kej kiijtoua 1 Samuel 17:37, 45-47, ¿kenke David amo majmajki? 2) ¿Tlake tlamantli tlen tlauel ipati techmachtia tlen kichijki David?

¹¹ Tlaj tijnekij tikijiyouisej kema techtlatsakuiltisej, moneki amo timajmauisej. ¿Tlake uelis tijchiuasej tlaj nojua timajmauij maske san se kentsi? Moneki tikilnamikisej amo tijnextiaj amo timajmauij san pampa tiuejueyij, tijpiaj chikaualistli o tiuelij tijchiuaj miak tlamantli. Ma tikitakaj tlen kipanok David. Kema eliyaya telpokatl, moteuik iuaya Goliat. David amo ueyi eliyaya uan amo kipiayaya miak chikaualistli kema kiixnamijki nopa tlakatl. Maske amo kema tlateuijtoya uan yon se espada kipixtoya, ya amo majmauiyaya uan nimantsi yajki moteuia iuaya nopa tlakatl.

¹² ¿Kenke David amo majmajki yon se kentsi? Pampa temachtli kimajtoya Jehová kipaleuiskia (xijpoua 1 Samuel 17:37, 45-47). Amo mosentlalik kenijkatsa iixpa Goliat ya amo ueyi eliyaya, ya mosentlalik kenijkatsa Goliat amo ueyi eliyaya iixpa Jehová. Tlen David kichijki, techmachtia se tlamantli tlen tlauel ipati: amo timajmauisej tlaj timotemachisej Jehová techpaleuis uan tlaj temachtli tijmatij tokualankaitakauaj amo tleno ininpati iixpa toTeotsij, katli tlauel kipia miak chikaualistli (2 Crón. 20:15; Sal. 16:8). ¿Tlake uelis tijchiuasej nama kema ayamo techtlatsakuiltiaj uan kiampa amo kema timajmauisej?

13. ¿Tlake uelis tijchiuasej tlaj tijnekij amo timajmauisej? Xikixtoma.

¹³ Kema titematiltiaj tlen kichiuas toTeotsij iTlanauatijkayo tlauel techpaleuia amo ma timajmauikaj, pampa kichiua ma timotemachikaj ipan Jehová uan amo ma tikinmakasikaj maseualmej (Prov. 29:25). Sanse kej totlakayo mokualtlalia kema tijchiuaj ejercicio, nojkia ayokmo tlauel timajmauij kema titlajtolmoyauaj kajkalpa, kampa nemij miakej, kampa tlanamakaj uan kampa ueli. Tlaj nama amo timajmauij tijchiuaj ni tekitl, uajka amo timajmauisej tijchiuasej nopa kema amo techkauasej ma titlajtolmoyauakaj (1 Tes. 2:1, 2).

14, 15. ¿Tlake tijyekouaj kema tikitaj tlen kichijkej Nancy Yuen uan Valentina Garnovskaya?

¹⁴ Tlen kichijkej omej tosiuaikniuaj tlauel techpaleuia pampa inijuantij kinextijkej amo majmauiyayaj yon se kentsi. Se motokaxtia Nancy Yuen. Maske iuejkapanka san se  metro uan tlajko, amo aka kimajmatiyaya. * Ya amo kinejki kikauas tlajtolmoyauas, yeka kitsajkej 20 xiuitl ipan China. Nopa tekichiuanij katli kamanaltikej iuaya kiijtojkej san ya eliyaya “tlauel tochontik katli itstoya” ipan ininaltepe.

¹⁵ Seyok toikni motokaxtia Valentina Garnovskaya. Ya expa kitsajkej ipan Unión Soviética, tlaj tijsansejkotilisej, tikitasej kitsaktoyaj 21 xiuitl. * Tlauel mosentlalijtoya tlajtolmoyauas, yeka tekichiuanij kiitakej kej se akajya “katli nelnelia kichiuayaya tlen amo kuali”. ¿Kenke nopa omej toikniuaj amo majmajkej? Pampa temachtli kimajtoyaj Jehová kinpaleuiyaya.

16. ¿Tlake nelia techpaleuia amo ma timajmauikaj?

¹⁶ Kej tikitstokej, tlaj amo tijnekij timajmauisej, amo kinamiki timosentlalisej ipan tochikaualis o ipan tlamantli tlen tiuelij tijchiuaj. San moneki timotemachisej Jehová nelia techpaleuia uan yaya tlaixnamiki kema techteuiaj (Deut. 1:29, 30; Zac. 4:6). San ni tlamantli tlauel techpaleuia amo ma timajmauikaj.

17, 18. Kej kiijtoua Juan 15:18-21, ¿tlake kiijtok Jesús techpanoskia, uan kenke?

¹⁷ Maske kuali tijyolmatij kema sekinok techtlepanitaj, amo timoiljuiaj amo tleno topati tlaj sekinok amo techixmatij. Jesús kiijtok: “Xipakikaj kema tlakamej inmechkokoliaj uan inmechtojtokaj. Xipakikaj kema inmechtelchiuaj uan inmechtokaxtiaj axinkuajkualmej, pampa innechtokiliaj na tlen nimokuepki tlakatl” (Luc. 6:22). ¿Tlake kiijtosneki tlen kiijtok?

¹⁸ Jesús amo kinejki kiijtos techpaktiskia ma techkualankaitakaj, pampa ya kuali kimajtoya tlake panoskia. Maseualmej techkualankaitaj pampa amo tielij kej inijuantij uan pampa tijchiuaj tlen Jesús tlamachtik uan tijmoyauaj itlamachtil (xijpoua Juan 15:18-21). Tijnekij tijyolpakiltisej toTeotsij. Uan tlaj maseualmej techkualankaitaj pampa tikikneliaj  toTata Jehová, uajka ma techkualankaitakaj.

19. ¿Kenijkatsa uelis tijchiuasej kej kichijkej apóstoles?

¹⁹ Amo kema ma tipinauakaj pampa tielij Jehová itlajtoltemakauaj maske tlen ueli maseualmej san tlemach kiijtosej o kichiuasej (Miq. 4:5). Tlen kichijkej apóstoles ipan Jerusalén se kentsi teipa kema ya kimiktijtoyaj Jesús, techpaleuis amo ma tikinmakasikaj maseualmej. Apóstoles kimajtoyaj katli tlayakanayayaj ipan religión tlauel kinkualankaitayayaj (Hech. 5:17, 18, 27, 28). Maske kinkualankaitayayaj, inijuantij mojmostla yauiyayaj ipan teokali uan kiniljuiyayaj sekinok inijuantij eliyayaj Jesús itokilijkauaj (Hech. 5:42). Amo majmajkej, yeka amo tleno kintsakuilik. Tojuantij nojkia amo timajmauisej tlaj nochipa tijnextiaj tielij Jehová itlajtoltemakauaj: ipan toteki, kampa timomachtiaj o kampa tiitstokej (Hech. 4:29; Rom. 1:16).

20. ¿Kenke apóstoles yolpakiyayaj maske kinkualankaitayayaj?

²⁰ Apóstoles yolpakiyayaj pampa kimajtoyaj kenke kinkualankaitayayaj. Uan kiitayayaj kej se tlateochiualistli kema sekinok kintlatsakuiltiyayaj pampa kimajtoyaj kichiuayayaj tlen Jehová kineki (Luc. 6:23; Hech. 5:41). Teipa, apóstol Pedro kiijtok maske ‘kintlaijiyouiltiskiaj pampa kichiuaj tlen kuali’, inijuantij yolpakiskiaj (1 Ped. 2:19-21; 3:14). Uajka, kema tijmatij maseualmej techkualankaitaj pampa tijchiuaj tlen kuali, techyololinia nojua ma tijtekipanojtokaj toTeotsij.

21, 22. 1) ¿Tlake timosentlalijtok tijchiuas uan kiampa uelis tikijiyouis kema mitstlatsakuiltisej? 2) ¿Tlake tikixtomasej ipan nopa seyok tlamachtili?

²¹ Maske amo tijmatij kema techtlatsakuiltisej o kema tekichiuanij ayokmo techkauasej ma tijtekipanokaj toTeotsij, kena tijmatij namantsi kinamiki timokualchijchiuasej. Uelis tijchiuasej ni tlaj tijchiuaj kampeka nojua kuali timouampojchiuasej iuaya Jehová, tlaj tijchiuaj kampeka amo timajmauisej yon se kentsi uan tlaj tijmatisej tlake tijchiuasej kema sekinok techkualankaitasej. Tlaj nama timokualchijchiuaj, techpaleuis teipa amo ma tijtlauelkauakaj Jehová.

²² Uajka, ¿tlake tijchiuasej kema tekichiuanij ayokmo techkauasej ma tijtekipanokaj toTeotsij? Ipan nopa seyok tlamachtili tikitasej se keski textos tlen techpaleuis nojua ma tijtekipanojtokaj Jehová maske amo techkauasej.