1. ¿Keyej moneki maj tikchiuakan tein techpaleuis keman techtajyouiltiskej?

YOUAK achto ke momikiliskia, Jesús kijtoj ke akin mochiuaskiaj itatojtokakauan kintauelitaskiaj (Juan 17:14). Hasta axkan, akin amo kinekij maj se kiueyichiua Jiova kintajyouiltianij akin kichiuaj kemej Cristo (2 Tim. 3:12). Uan tikchiaj maj okachi techtajyouiltikan ijkon kemej okachi motokia itamian nejin tonalmej (Mat. 24:9).

2, 3. 1) ¿Toni uelis panos komo timouij? 2) ¿Toni tikitatij itech nejin tamachtilis?

² ¿Toni moneki maj tikchiuakan axkan tein techpaleuis maj titaxikokan keman techtajyouiltiskej? Maj amo tiknemilikan nochi tein uelis techpanos. Komo tikchiuaj, semi timouiskej uan timotekipachoskej, nejon uelis kichiuas maj amo tiktekitilikanok Jiova maski ayamo techtajyouiltiaj (Prov. 12:25; 17:22). Komo timouij, Satanás akin techtauelita kikuis nejon uan ika kitemos maj timosenkauakan (1 Ped. 5:8, 9). Yejua ika, ¿toni moneki tikchiuaskej axkan tein techpaleuis maj titaxikokan?

³ Itech nejin tamachtilis, tikitatij keniuj uelis tikchikauaskej tokuali uikalis iuan Jiova uan keyej moneki maj axkan tikchiuakan. No tikitatij toni tikchiuaskej tein techpaleuis maj okachi tiknextikan yolchikaualis uan toni tikchiuaskej keman techtajyouiltiskej.

4. Kemej kijtoua Hebreos 13:5, 6, ¿toni moneki senkis tikneltokaskej uan keyej?

⁴ Maj senkis tikneltokakan ke Jiova techtasojta uan ke amo keman techkauas (xikonixtajtolti Hebreos 13:5, 6). Miak xiujmej achto, itech amaix Tanejmachtijkej moijtoj:  “Akin okachi kuali kiixmati Dios, okachi iuan takuaujtamatis keman kitajyouiltiskej”. Nejon semi melauak. Sayoj komo tiktasojtaj Jiova, senkis itech titakuaujtamatij uan nochipa tikneltokaj ke yejuatsin techtasojta, titaxikoskej keman techtajyouiltiskej (Mat. 22:36-38; Sant. 5:11).

5. ¿Toni techpaleuis maj tikitakan ke Jiova techtasojta?

⁵ Keman mojmostaj tikixtajtoltiskej Biblia maj tiktemokan okachi timotokiskej iuan Jiova (Sant. 4:8). Keman tikixtajtoltiskej maj okachi tikitakan ikualneskayouan uan keniuj ika tein kijtoua uan ika tein kichiua technextilia ke techtasojta (Éx. 34:6). Sekin xa kinouijmaka kineltokaskej ke Dios kintasojta porin amo akin kinnextiliani ke kintasojta. Komo ijkon tikmachiliaj maj mojmostaj tikamatalikan keniuj Jiova technextiliani ke techtasojta uan ke techiknelia (Sal. 78:38, 39; Rom. 8:32). Xa uelis tikijkuiloskej miak taman komo titanemiliaj itech tein tikpanouanij uan itech tein tikixtajtoltianij itech Biblia. Ijkon kemej okachi timotasojkamatiskej iuan Jiova, okachi mochikauas tokuali uikalis iuan (Sal. 116:1, 2).

6. Kemej kijtoua Salmo 94:17-19, ¿keniuj techpaleuia maj nochi tiktapouikan Jiova?

⁶ Maj nochipa timotataujtikan. Maj titanemilikan itech se konetsin akin ipopaj kinaua porin kitasojta. Kemej kuali momachilia, kitapouia keman tami tonal nochi tein kipanouani. Tejuan no ijkon timouikaskej iuan Jiova komo mojmostaj tiktataujtiaj (xikonixtajtolti Salmo 94:17-19). Maj tikiluikan toTajtsin Dios akin semi techtasojta nochi tein tikmouiliaj uan tein techtekipachoua (Lam. 2:19). ¿Keniuj techpaleuis? Tikmachiliskej “yolseuilis ten kachi kuika uelilis”, tein Biblia ika tajtoua (Filip. 4:6, 7). Komo nochipa ijkon tiktataujtiaj Jiova okachi iuan timotokiskej (Rom. 8:38, 39).

7. ¿Keyej moneki senkis tikneltokaskej ke Dios kichiuas tein motenkaujtok itechkopa iTekiuajyo?

⁷ Maj senkis tikneltokakan ke Dios kichiuas tein motenkaujtok itechkopa iTekiuajyo (Núm. 23:19). Komo amo senkis tikneltokaj nejon, Satanás uan akin kipaleuiaj niman techmojmoujtiskej (Prov. 24:10; Heb. 2:15). ¿Toni uelis tikchiuaskej axkan tein techpaleuis maj okachi titakuaujtamatikan itech iTekiuajyo Dios? Maj timomachtikan tein yejuatsin motenkaua kichiuas uan keyej uelis tikneltokaskej ke yekmelauj mochiuas. ¿Keniuj techpaleuis nejon? Maj tikitakan ineskayo tokniuj Stanley Jones, akin tsaktoya chikome xiuit porin kitakamatik Jiova. * Yejua kijtoj tein kipaleuij maj taxiko: “Nikmatis tein kichiuas iTekiuajyo Dios uan senkis nikneltokas nechpaleuij maj  amo nimosenkauani. Amo uelik kichiujkej maj nikaua Jiova”. Komo senkis titakuaujtamatij ke Dios kichiuas tein motenkaua, okachi iuan timotokiskej uan amo timouiskej (Prov. 3:25, 26).

8. Xikonmelaua keyej axkan motelneki maj tiyakan nochi nechikolmej.

⁸ Maj nochipa tiyakan nechikolmej. Nejon techpaleuia maj okachi timotokikan iuan Jiova. Komo tiyouij nochi nechikolmej titaxikoskej keman techtajyouiltiskej (Heb. 10:24, 25). Maj tikitakan keyej. Komo axkan tikauaj maj tein yeski techtsakuili maj amo tiyakan nechikolmej, ¿toni panos keman yeski tamouilil timonechikoskej? Sayoj ke, komo tikixtaliaj nochipa tiyaskej nechikolmej, akin techixnamikij amo uelis techtsakuiliskej. Yejua ika, axkan moneki maj tikuelitakan tiyaskej nechikolmej. Komo ijkon tikchiuaj, maski techixnamikiskej oso tekiuanij kiixtaliskej maj amo timosentilikanok, okachi tiktakamatiskej Dios uan amo tekiuanij (Hech. 5:29).

9. ¿Keyej semi techpaleuis keman techtajyouiltiskej komo tiuelij oso tikmatij textos?

⁹ Maj tiuelikan oso maj tikmatikan textos tein okachi tikuelitaj (Mat. 13:52). Xa amo ueli nochi tikelnamikij, sayoj ke Jiova ika iyektikatsin espíritu uelis kichiuas maj tikelnamikikan textos (Juan 14:26). Se tokniuj akin tsaktoya ompa Alemania oriental uan amo kikauayaj maj tajto iuan aksa, kijtoj: “Semi nechpaleuij nikelnamikis panoua doscientos textos porin keman nitsaktoya uelik itech nitanemilij tataman tamachtilis tein Biblia ika tajtoua”. Nejon textos kipaleuijkej maj amo kikaua Jiova uan maj nochipa kitakamati.

10. ¿Keyej moneki maj tiuelikan nekuikatilmej?

¹⁰ Maj tiuelikan nekuikatilmej tein ika tikueyichiuaj Jiova uan maj timokuikatikan. Keman Pablo uan Silas tsaktoyaj Filipos, kiueyichiujkej Jiova ika nekuikatilmej tein kuali kimatiaj (Hech. 16:25). Nejon no kinpaleuij tokniuan akin kayomej antigua Unión Soviética akin kinuikakej Siberia maj taxikokan. Tokniuj Mariya Fedun kielnamikik: “Timokuikatiayaj nochi nekuikatilmej tein tikinelnamikiaj”. Kijtoj ke nejon kinyolchikauak nochin uan kinpaleuij maj okachi motokikan iuan Jiova. ¿Techyolchikaua keman timokuikatiaj nekuikatilmej tein okachi tikuelitaj? Yejua ika, axkan maj timomamachtikan  nekuikatilmej (xikonita recuadro “ Xinechmaka yolchikaualis”.)

11, 12. 1) Kemej kijtoua 1 Samuel 17:37, 45-47, ¿keyej David katka yolchikauak? 2) ¿Toni techmachtia tein kipanok David?

¹¹ Moneki tiyeskij tiyolchikaujkej, sayoj ijkon titaxikoskej keman techtajyouiltiskej. ¿Toni uelis tikchiuaskej komo tikmachiliaj ke amo semi tiyolchikaujkej? Maj tikelnamikikan ke aksa amo okachi yolchikauak porin uejkapan, chikauak oso ueli kichiua miak taman. Maj tikitakan tein kipanok David. Keman katka telpoch, kiixnamikik Goliat akin katka tel uejkapantik. David katka okachi tsikitsin uan okachi amo chikauak. Uan no, amo kimatia keniuj tateuis uan nion no kipiaya se espada. Sayoj ke semi katka yolchikauak, yejua ika motaloj kiixnamikito nejon takat uejkapantik akin moueyinekia.

¹² ¿Keyej David semi yolchikauak katka? Porin senkis kineltokaya ke Jiova kipaleuiaya (xikonixtajtolti 1 Samuel 17:37, 45-47). Yejua amo kiitak ke okachi tsikitsin katka ke Goliat, ta ke Jiova okachi chikauak ke Goliat. Tein kipanok David techmachtia ke sayoj tiyeskij tiyolchikaujkej komo titakuaujtamatij ke Jiova techpaleuia uan ke yejuatsin okachi chikauak ke akin techixnamikij (2 Crón. 20:15; Sal. 16:8). ¿Toni uelis tikchiuaskej axkan tein techpaleuis maj okachi tiyolchikaujkej keman techtajyouiltiskej?

13. ¿Toni techpaleuis maj okachi tiyolchikaujkej? Xikonmelaua.

¹³ Titanojnotsaskej ika iTekiuajyo Dios techpaleuis maj okachi tiyolchikaujkej. ¿Keyej? Porin techpaleuia maj titakuaujtamatikan iuan Jiova uan maj amo tikinmouilikan taltikpakneminij (Prov. 29:25). Ijkon kemej aksa kichikaua inakayo keman kichiua ejercicio, tejuan no okachi timoyolchikauaj keman titanojnotsaj kajkalpan, senteixtenoj, kampa yeski uan kampa tanamakaj. Komo axkan ika yolchikaualis titanojnotsaj, tiksentokaskej tikchiuaskej maski tekiuanij amo techkauaskejok (1 Tes. 2:1, 2).

14, 15. ¿Toni techmachtia tein kipanok Nancy Yuen uan Valentina Garnovskaya?

¹⁴ Semi techpaleuia ininneskayo ome tokniuan siuamej akin kinextijkej ueyi yolchikaualis. Semej yejua Nancy Yuen. Uejkapan katka kemej se metro uan tajko,  sayoj ke amo akin uelia kimojmoujtiaya. * Kemej kisentokak tanojnotsak, kitsakkej kemej veinte xiujmej ompa China. Tekiuanij akin kitatajtanijkej kijtojkej ke yejua katka “akin okachi amo tatakamatia” itech altepet.

¹⁵ Okse tokniuj siuat yejua Valentina Garnovskaya. Expa kitsakkaj ompa antigua Unión Soviética uan sennochia tsaktoya veintiún xiujmej. * Kemej kisentokak tanojnotsak tekiuanij kijtojkej ke “katka semi tamouilil”. ¿Keyej katkaj semi yolchikaujkej nejin ome tokniuan? Porin senkis kineltokayaj ke Jiova kinpaleuiaya.

16. ¿Toni techpaleuia maj yekmelauj tiyolchikaujkej?

¹⁶ Kemej tikitakej, amo tiyolchikaujkej porin tikpiaj chikaualis oso ueli tikchiuaj miak taman. Ta porin titakuaujtamatij ke Jiova techpaleuia uan ke yejuatsin toka kinixnamiki akin techtauelitaj (Deut. 1:29, 30; Zac. 4:6). Yejua nejon tein kichiua maj yekmelauj tiyolchikaujkej.

17, 18. Kemej kijtoua Juan 15:18-21, ¿toni kijtoj Jesús ke techpanoskia uan keyej?

¹⁷ Tikuelitaj maj oksekin techpoujkaitakan, sayoj ke maj amo tiknemilikan ke amo teyi tichiuanimej komo oksekin amo techseliaj. Jesús kijtoj: “Nantatiochiualme de Dios namejuan kuak in tagayot namechtauelitstinemiske uan mosekokauaske de namejuan. Uan [...] kuak namechtejteneuaske ke amo nankualime [...] porin nantakuautamatij itech notokay” (Luc. 6:22). ¿Toni kijtosnekij nejin tajtolmej?

¹⁸ Jesús amo kijtosnekik ke tiitatojtokakauan techyolpaktiskia maj techtauelitakan, ta technejmachtijtoya ke nejon ipa panoskia. Kemej amo tikchiuaj tein yejuan kichiuaj, timonejnemiltiaj kemej Jesús tamachtij uan tikteixmatiltiaj itamachtilis, taltikpakneminij techtauelitaj  (xikonixtajtolti Juan 15:18-21). Tiknekij tikyolpaktiskej Jiova. Maski taltikpakneminij techtauelitaskej porin tiktasojtaj toTajtsin Dios, nejon amo techtekipachoua.

19. ¿Keniuj uelis tikchiuaskej kemej tatitanilmej?

¹⁹ Maski taltikpakneminij techijtouiliskej oso techchiuiliskej miak taman, maj amo keman timopinaujmatikan tiyeskij tiitaixpantijkauan Jiova (Miq. 4:5). Techpaleuis maj amo tikinmouilikan taltikpakneminij komo timomachtiaj tein kichiujkej tatitanilmej ompa Jerusalén satepan ke Jesús kimiktijkej. Yejuan kimatiaj ke tayekananij judíos semi kintauelitayaj (Hech. 5:17, 18, 27, 28). Maski ijkon, mojmostaj yayaj templo uan ompa tanojnotsayaj (Hech. 5:42). Amo mokaujkej maj kinmojmoujtianij. Tejuan amo no techmojmoujtiskej komo nochipa timoteixmatiltiaj kemej tiitaixpantijkauan Jiova kampa titekitij, kampa timomachtiaj oso kampa tinemij (Hech. 4:29; Rom. 1:16).

20. ¿Keyej tatitanilmej yolpakiaj maski kintajyouiltiayaj?

²⁰ Tatitanilmej yolpakiaj porin kimatiaj keyej kintajyouiltiayaj. Kiitayaj kemej se tatiochiualis tajyouiskej porin kichiuayaj itanejnekilis Jiova (Luc. 6:23; Hech. 5:41). Satepan, tatitanil Pedro kijkuiloj: “Komo namejuan nankijyouijtinemiske [...] ika por namochipaukanemilis, ijkuakon Dios namechmaka ne ueyi yolpakilis” (1 Ped. 2:19-21; 3:14). Keman tikajsikamatij ke taltikpakneminij techtauelitaj porin tikchiuaj tein kuali, tein techchiuiliaj amo techtsakuilia maj tiksentokakan tiktekitilikan Dios.

21, 22. 1) ¿Toni tikonixtaliani tikonchiuas tein mitsonpaleuis keman techtajyouiltiskej? 2) ¿Toni tikitaskej itech okse tamachtilis?

²¹ Amo tikmatij kemanian techtajyouiltiskej oso kemanian tekiuanij kiixtaliskej maj amo titanojnotsakanok. Sayoj ke kemaj tikmatij ke axkan moneki okachi tikchikauaskej tokuali uikalis iuan Jiova, tikchiuaskej tein techpaleuis maj okachi tiyolchikaujkej uan tikmatiskej toni tikchiuaskej keman techtajyouiltiskej. Nochi nejon techpaleuis maj nochipa tiktekitilikan Jiova.

²² Sayoj ke ¿toni tikchiuaskej komo se tonal tekiuanij amo techkauajok maj tiktekitilikan Jiova? Itech okse tamachtilis, tikitaskej tein Biblia tayolmajxitia tein techpaleuis maj tiksentokakan tiktekitilikan Jiova maski tekiuanij amo techkauaskej.