1. ¿Tleka moneki timoyektlaliskej?

SE YOAK ijkuak yikimiktiskiaj Jesús okijto miakej techkokoliskiaj akinmej tikchiuaskiaj ken ye (Juan 17:14). Ijkuakon opejki techtlajyouiltiaj akinmej amo kinekij ma tikueyichiuakan toTajtsin Dios (2 Tim. 3:12). Noijki tikmatokej satepan okachi techtlajyouiltiskej (Mat. 24:9).

2, 3. (1) ¿Tleka amo kuali ma timomojtikan? (2) ¿Tlen timomachtiskej?

² ¿Tlen moneki tikchiuaskej axkan tla tiknekij titlaxikoskej ijkuak techtlajyouiltiskej? Amo ma timokuayejyekokan nochi tlen uelis techpanos. Porque non xamo kichiuas ma timomojtikan uan ayakmo ma tiktekichiuilikan Jehová maski ayamo itlaj techpanoa (Prov. 12:25; 17:22). Satanás sapanoa techkokolia uan kineki ma timomojtikan (1 Ped. 5:8, 9). Ik non, moneki itlaj tikchiuaskej tla tiknekij titlaxikoskej.

³ Itech nin tlamachtil tikitaskej tlen moneki tikchiuaskej tla tiknekij kuali timouikaskej iuan Jehová uan tleka axkan moneki ijkon ma tikchiuakan. Noijki tikitaskej tlen moneki tikchiuaskej tla tiknekij tiyetoskej tiyolchikauakej ijkuak techkokoliskej.

4. Ijkon ken kijtoa Hebreos 13:5, 6, ¿tlen moneki ma tikmatokan uan tleka miak ipati?

⁴ Ma tikmatokan Jehová techtlasojtla uan amo keman techkauas (xiktlajtolti Hebreos 13:5, 6). Yikipia seki xiuitl revista Akin Tetlapouijtok okijto: “Akin kuali kixmati Jehová, okachi itech tlaneltokas ijkuak tlajyouis”. Melauak tlen okijto. Moneki tiktlasojtlaskej Jehová uan itech titlaneltokaskej tla  tiknekij titlaxikoskej ijkuak techtlajyouiltiskej (Mat. 22:36-38; Sant. 5:11).

5. ¿Ken tikmatiskej Jehová techtlasojtla?

⁵ Mojmostla ma tiktlajtoltikan Biblia uan ijkon okachi timouikaskej iuan Jehová (Sant. 4:8). Ijkuak tiktlajtoltiaj Biblia, ma timokuayejyekokan ken kipia iyelis toTajtsin Dios. Noijki ma tikajsikamatikan Jehová sapanoa techtlasojtla (Éx. 34:6). Sekimej mokuayejyekoaj amikaj kintlasojtla, ik non, amo kineltokaj toTajtsin Dios kintlasojtla. Tla ijkon techpanoa, uelis mojmostla tikijkuiloskej ken techiknomati Jehová uan techtlasojtla (Sal. 78:38, 39; Rom. 8:32). Tla timokuayejyekoskej tlen otechpanok uan tlen yotiktlajtoltijkej itech Biblia, uelis tikijkuiloskej ken yotechpaleui Jehová. Ijkon okachi kuali iuan timouikaskej uan tikteititiskej tikpatioitaj tlen kichiua (Sal. 116:1, 2).

6. Ijkon ken kijtoa Salmo 94:17-19, ¿ken techpaleuia tla timotlatlaujtiaj ika nochi toyolo?

⁶ Nochipa ma timotlatlaujtikan. Ma timokuayejyekokan se chokotsin kinapaloa noso kinauateki itajtsin. Chokotsin sapanoa kuali mouika iuan itajtsin uan kitlapouia tlen kuali okipanok uan tlen amo kuali. Tejuan noijki uelis ijkon timouikaskej iuan Jehová tla nochipa tiktlapouiaj ika nochi toyolo (xiktlajtolti Salmo 94:17-19). Ma tikiluikan toTajtsin Dios nochi tlen techmomojtia uan tlen techtekipachoa porque ye sapanoa techtlasojtla (Lam. 2:19). Ijkon tikpiaskej tlen Biblia kitokayotia “iyolsewilis Dios, non amaka weleti kajsikamati” (Filip. 4:6, 7). Okachi timouikaskej iuan Jehová tla nochipa tiktlatlaujtiaj (Rom. 8:38, 39).

7. ¿Tleka moneki ma tikneltokakan iTekiuajkayo Jehová kichiuas nochi tlen yomoijto?

⁷ Ma tikneltokakan iTekiuajkayo toTajtsin Dios melauak techteochiuas (Núm. 23:19). Tla amo okachi tikneltokaj mochiuas tlen toTajtsin Dios yokijto, okachi techmomojtis Satanás uan akinmej kinyekana (Prov. 24:10; Heb. 2:15). ¿Tlen moneki tikchiuaskej axkan tla tiknekij tikneltokaskej nochi tlen kichiuas iTekiuajkayo toTajtsin Dios? Ma timomachtikan nochi tlen Jehová yokijto kichiuas uan tleka uelis tikneltokaskej. Tla tiknekij tikajsikamatiskej tleka sapanoa miak ipati, ma tikitakan tlen okipanok Stanley Jones. Ye otsaktoka chikome xiuitl porque otlaneltokaya itech toTajtsin Dios. ¿Tlen okipaleui ma kipia chikauak itlaneltokilis? Ye okijto: “Onikpiaya chikauak notlaneltokilis porque onikmatiaya tlen kijtosneki iTekiuajkayo toTajtsin Dios uan tlen kichiuas. Nochipa onikneltokak. Ik non, amikaj uelis nechchiualtiskia ma nikkaua Jehová”. Tla melauak tikneltokaj tlen kichiuas iTekiuajkayo Jehová, okachi iuan timouikaskej uan amikaj techmomojtis (Prov. 3:25, 26).

8. Xikijto tleka moneki ma tikpatioitakan timonechikoskej.

⁸ Nochipa ma timonechikokan. Ijkuak timonechikoaj  techpaleuia okachi ma timouikakan iuan Jehová. Tla axkan tikpatioitaj timonechikoskej, techpaleuis ijkuak techtlajyouiltiskej (Heb. 10:24, 25). Ma tikitakan tleka ijkon tikijtoaj. Tla axkan itlaj tlen amo ipati amo techkauilia ma tiakan ma timonechikotij, ¿tlen techpanos ijkuak ayakmo techkauiliskej ma timonechikokan iuan tokniuan? Pero tla nochipa timonechikoskej, amo techmomojtiskej akinmej amo kinekij ma tikueyichiuakan Jehová. Ik non, moneki axkan ma tikpatioitakan timonechikoskej. Tla ijkon tikchiuaskej, okachi tiktlakamatiskej Jehová uan amo tikintlakamatiskej tekiuajkej noso akinmej techkokoliaj ijkuak techiluiskej ayakmo ma tiktekichiuilikan Jehová (Hech. 5:29).

9. ¿Tleka miak ipati axkan ma timomachtikan textos?

⁹ Ma timomachtikan textos tlen okachi techpaktiaj (Mat. 13:52). Ualeua san niman tikilkauaj se texto pero Jehová uelis kichiuas ma tikilnamikikan ika iespíritu santo (Juan 14:26). Se tokni tlen iselti okitsakej ompa Alemania oriental, okijto: “Sapanoa onechpaleui onimomachti kanaj doscientos textos porque intech onimokuayejyeko ijkuak onitsaktoka”. Nonmej textos okipaleuijkej ma mouika iuan Jehová uan nochipa ma yeto yolmelajki.

10. ¿Tleka moneki ma timomachtikan tlakuikalmej tlen ika tikueyichiuaj Jehová?

¹⁰ Ma timomachtikan tlakuikalmej tlen ika tikueyichiuaj Jehová. Tlatitlanil Pablo uan Silas omomachtijkej tlakuikalmej, ik non, okitlakuikilijkej Jehová ijkuak otsaktokaj (Hech. 16:25). Noijki ijkon okichijkej tokniuan tlen ochantiayaj kanin okatka Unión Soviética uan okinuikakej Siberia. Omomachtijkej tlakuikalmej uan ijkon okipixkej chikauak intlaneltokilis. Tokni Mariya Fedun okijto: “Otitlakuikakej nochi tlakuikalmej tlen otikinmilnamikiayaj. Nonmej tlakuikalmej sapanoa otechyolchikauayaj uan otechpaleuiayaj okachi ma timouikakan iuan Jehová”. Tejuan noijki techpaktia uan timoyolchikauaj ijkuak titlakuikaj. Ik non, axkan ma timomachtikan tlakuikalmej (xikita recuadro “ Techyolchikaua”).

11, 12. (1) Ijkon ken kijtoa 1 Samuel 17:37, 45-47, ¿tleka David okatka yolchikauak? (2) ¿Tlen techmachtia tlen okipanok David?

¹¹ Moneki tiyetoskej tiyolchikauakej ijkuak techtlajyouiltiskej. ¿Tlen tikchiuaskej tla amo okachi tiyolchikauakej? Ma tikilnamiktokan  amo tiyetoskej tiyolchikauakej porque tiuejkapantikej, tichijchikauakej noso tikmatij tikchiuaskej miak tlamantli. Ma tikitakan tlen okichi David. Ijkuak okatka ok tsikitsin okixnamik se tlakatl uejkapantik tlen itoka Goliat. David okatka tsikitsin uan amo okatka chikauak ken non tlakatl. Noijki amo okimatiaya moteuis nion okipiaya se espada. Pero ye okatka yolchikauak uan omoteuito iuan non tlakatl tlen sapanoa omoueyinekiaya.

¹² ¿Tleka David okatka yolchikauak? Porque ye okimatiaya Jehová okipaleuiaya (xiktlajtolti 1 Samuel 17:37, 45-47). David amo omokuayejyeko ye amitlaj ipati ixpan Goliat. Ye omokuayejyeko Goliat amitlaj ipati ixpan Jehová. Tlen okipanok David techmachtia itlaj miak ipati. Tiyetoskej tiyolchikauakej tla tikneltokaj Jehová techpaleuis uan tla tikmatokej akinmej techkokoliaj amitlaj inpati ixpan toTajtsin Dios (2 Crón. 20:15; Sal. 16:8). ¿Tlen tikchiuaskej axkan tla tiknekij tiyetoskej tiyolchikauakej ijkuak techtlajyouiltiskej?

13. Xikijto tlen moneki tikchiuaskej tla tiknekij tiyetoskej tiyolchikauakej.

¹³ Techpaleuis ma tiyetokan tiyolchikauakej tla tiktematiltiaj iTekiuajkayo toTajtsin Dios. ¿Tleka? Porque non techpaleuia ma titlaneltokakan itech Jehová uan noijki techpaleuis amo techmomojtiskej oksekimej (Prov. 29:25). Ijkon ken techpaleuia ijkuak tikchiuaj ejercicio, noijki techpaleuia ma tiyetokan tiyolchikauakej ijkuak titetlapouiaj tekalijtik, kanin miakej panoaj uan kanin tlanemakaj ijkon yetoskia ken tikchiuaj ejercicio. Tla axkan amo timomojtiaj titetlapouiskej, tiyetoskej tiyolchikauakej ijkuak ayakmo techkauiliskej ma titetlapouikan nion ma timonechikokan (1 Tes. 2:1, 2).

14, 15. ¿Tlen techmachtia tlen okipanok Nancy Yuen uan Valentina Garnovskaya?

¹⁴ Ome tokniuan tlen okatkaj yolmelajkej techmachtiaj miak ipati ma tiyetokan tiyolchikauakej. Se tokni itoka Nancy Yuen. Amo omomojtiaya maski san okipiaya se metro uan tlajko ik uejkapantik. * Okiluijkej ayakmo ma tetlapoui pero ye amo keman okika, ik non, okitsakej veinte xiuitl ompa China. Tekiuajkej tlen okixkomakakej okijtojkej itech non altepetl san “ye amo tetlakamati”.

 ¹⁵ Okse tokni itoka Valentina Garnovskaya. Ye okitsakej eyi uelta uan okajxiti kanaj veintiún xiuitl ompa Rusia. * Ye okijto amo keman kikauaskia tetlapouis, ik non, tekiuajkej okijtojkej non “siuatl sapanoa amo kuali tlen okichiuaya”. ¿Tleka ninmej tokniuan sapanoa okatkaj yolchikauakej? Porque okimatiayaj Jehová okinpaleuiaya.

16. ¿Tlen moneki tikilnamiktoskej tla tiknekij tiyetoskej tiyolchikauakej?

¹⁶ Axkan yotikitakej amo san moneki tikitaskej kox tichijchikauakej noso kox tikmatij tikchiuaskej miak tlamantli tla tiknekij tiyetoskej tiyolchikauakej. Moneki tikneltokaskej Jehová techpaleuia uan topatka moteuia (Deut. 1:29, 30; Zac. 4:6). Ijkon moneki tikchiuaskej tla tiknekij tiyetoskej tiyolchikauakej.

17, 18. Ijkon ken kijtoa Juan 15:18-21, ¿tlen okijto Jesús techpanoskia uan tleka?

¹⁷ Kualtsin timomachiliaj ijkuak oksekimej techtlakaitaj. Pero amo ma timokuayejyekokan amitlaj topati tla oksekimej amo kinpaktia touan mouikaskej. Jesús okijto: “Miak yolpakílistli nonkipiaskeh ijkuak nomechkokoliskeh, ijkuak [namechtlajyouiltiskej], ijkuak nomechwijwikaltiskeh iwa ijkuak nomechtlawelitaskeh por nonnechneltokah Ne Non onimochi ni tlakatl” (Luc. 6:22). ¿Tlen kijtosneki tlen okijto Jesús?

¹⁸ Jesús amo okijto techpaktiskia ma techkokolikan. Ye san okinekiaya technejmachtis. Miakej techkokoliaj porque amo tikchiuaj tlen yejuan kichiuaj. Porque tejuan tikchiuaj tlen otlamachti Jesús uan tiktematiltiaj tlen ye otlamachti (xiktlajtolti Juan 15:18-21). Tiknekij tikyolpaktiskej Jehová. Amo totlajtlakol tla techkokoliaj porque tiktlasojtlaj toTajtsin Dios.

19. ¿Ken uelis tikchiuaskej ken tlatitlanilmej?

¹⁹ Maski san tlen tlamantli kijtoskej noso kichiuaskej oksekimej, amo keman ma tipinauakan porque tiiTlaixpantijkauan Jehová (Miq. 4:5). Noijki techpaleuis amo ma timomojtikan tla tikilnamiktoskej tlen okichijkej tlatitlanilmej tlen okatkaj Jerusalén satepan ijkuak Jesús okimiktijkej. Yejuan okimatiayaj  teopixkej judíos sapanoa okinkokoliayaj (Hech. 5:17, 18, 27, 28). Pero tlatitlanilmej mojmostla oyayaj teokali uan inmixpan miakej okijtoayaj yejuan okatkaj imachtijkauan Jesús (Hech. 5:42). Amo okikajkej oksekimej ma kinmomojtikan. Tejuan noijki amo timomojtiskej tla nochipa tikinmiluiskej oksekimej tiiTlaixpantijkauan Jehová kanin titekipanoaj, kanin timomachtiaj noso kanin tichantij (Hech. 4:29; Rom. 1:16).

20. ¿Tleka oyolpakiayaj tlatitlanilmej maski okinkokoliayaj?

²⁰ Tlatitlanilmej okimatiayaj tleka okinkokoliayaj, ik non, oyolpakiayaj. Okitayaj se tlateochiualistli tlajyouiskej porque okichiuayaj tlen okinekiaya Jehová (Luc. 6:23; Hech. 5:41). Satepan Pedro okijkuilo: “Nomechtlaijyowiltiah por nonkichijtinemih tlan kuali, ¡xipakikah!” (1 Ped. 2:19-21; 3:14). Amo keman tikkauaskej Jehová tla tikmatij oksekimej techkokoliaj porque tikchiuaj tlen kuali.

21, 22. (1) ¿Tlen moneki tikchiuas axkan tla tikneki titlaxikos ijkuak techtlajyouiltiskej? (2) ¿Tlen tikitaskej itech okse tlamachtil?

²¹ Amo tikmatij keman techtlajyouiltiskej nion tikmatij keman techiluiskej tekiuajkej ayakmo ma titetlapouikan uan ayakmo ma timonechikokan. Ik non, axkan okachi ma timouikakan iuan Jehová, axkan ma tikitakan ken uelis okachi tiyetoskej tiyolchikauakej uan tlen tikchiuaskej ijkuak peuas techtlajyouiltiskej. Axkan ma tikitakan tlen moneki tikchiuaskej uan ijkon nochipa tiktekichiuiliskej Jehová.

²² Pero ¿tlen tikchiuaskej tla se tonal tekiuajkej ayakmo techkauiliskej ma titetlapouikan nion ma timonechikokan? Itech okse tlamachtil, tikitaskej seki principios tlen techpaleuiskej ma tiktekichiuilikan Jehová maski tekiuajkej amo techkauiliskej.