1. Ngenyi tinodikana kuva vakanasiririka kuitira kuzoteverehwa?

PA USIKU acito afa, Mambo wedu Jesu, wakananga kuti vese vakasana kuva vateveri vake vanozonyenywa. (Johani 17:14) Kuvhira pa nguva yondhoyo mbhera wari, Makristu akagondeka ari kuteverehwa ngo vandhu vacikanamati Jehovha. (2 Timoti 3:12) Zvecivoneka kuti tiri phedo kamare no kupera ko nyika, tinovetera kuteverehwa no vavengi vedu.—Mateu 24:9.

2-3. (a) Tinodikana kuzivenyi ngo pamusoro po kuthya? (b) Zvicinyi zvatinozojija pa musoro uno?

² Tingajinasiririsa kudini wari kuitira kuti tihwisane no kuteverehwa? Kugara tecirangarira zviro zvinozotiitikira azvitibeseri. Ngokuti tinozothya zve tothimwa-thimwa. Kudari tikarangarira zviro zvese zvakashata zvinozotiitikira, tinozothya zvotiita kuti tisiye kushandira Jehovha ticito tasongana no zvineso. (Mazwi Akangwara 12:25; 17:22) Kuthya, ndi murau umweni unoshandiswa ndi ‘Sathana mukorore wedu.’ (1 Pedru 5:8, 9) Tinodikana kuitenyi kuti tijinasirire kuitira kucungirira kuteverehwa?

³ Pa musoro uno, tinozojija kuti tingaitisa kudini kuti ushamwari hwedu na Jehovha uve wakavanga zve ngenyi zvinosisira kuzviita wari. Tinozojijazve kuti tingaitisa kudini kuti tiengejere cicunge cedu. Pakupejisira, tinozojija manera atingaita patinonga tecinyenywa ngo vandhu.

4. Mukuzwirana no Vaheberi 13:5, 6, tingava no cokwadi cenyi zve ngenyi?

⁴ Ngative no cokwadi co kuti Jehovha anotida zve aazotisii tega. (Verenganyi Vaheberi 13:5, 6.) Pa makore akakhirira, Murindiri umweni wakati: “Mundhu anoziva ushoni Mwari, anomugonda paanosonganga no muejo.” Ici i cokwadi! Kuti  ticungirire kuteverehwa, tinodikana kuda Jehovha no kumuthemba zve totama kukanganwa manera aanotiembejera.—Mateu 22:36-38; Jakobo 5:11.

5. Zvicinyi zvinozomubesera kuzwisisa rudo hwa Jehovha?

⁵ Verenganyi Bhaibheri nguva jese no cinangwa co kukwedera phedo na Jehovha. (Jakobo 4:8) Pamunonga meciverenga, sotesesanyi mugariro ja Jehovha. Ejanyi kuzwisisa makhombijire aanotiita rudo hwake pa zviro zvaanonanga no kuita. (Exodo 34:6) Vamweni vanozvivona zvecinesa maningi kutenda kuti Mwari anovada, ngokuti avato vakadiwa ngo ariwese. Kudari muri kusongana no zvineso zvakadari, ejanyi kuita rista njiku jese yo zviro zvakanaka zvamunoitihwa ndi Jehovha. (Nduyo 78:38, 39; VaRoma 8:32) Pamunorangarira ngo zviro zvinomuitikira zve morangarijisisa zvamunonga maverenga mu Bhaibheri, munozokwanisa kuita rista yo zviro zvizinji zvakamuitira Jehovha. Kudari munobongesera ngo zvese zvinomuitira Jehovha, ushamwari hwenyu naye unozovanga.—Nduyo 116:1, 2.

6. Mukuzwirana na Nduyo 94:17-19, kuita mukumbiro ngo mwoyo wese kungamubeseresa kudini?

⁶ Itanyi mukumbiro nguva jese. Amborangariranyi basi mwana mudoko ari kukumbatihwa ndi babake. Mwanewo anojizwa akajiviririka zvokuti anovhunja babake zvese zvamuitikira pa njikuyo, zvakashata no zvakanaka. Mungava no mukhaindi wondhowo wo ushamwari na Jehovha kudari mukaita mukumbiro ngo mwoyo wese njiku jese. (Verenganyi Nduyo 94:17-19.) Pamunonga meciita mukumbiro ‘dururanyi mwoyo wenyu inga kumwa.’ Zve vhunjanyi Jehovha ngo pamusoro po mazwiro enyu no kuthimwa-thimwa kwenyu. (Macumbiro 2:19, Biblia Mazwi Akacena aMwari) Ngowapi unozova muviyo wakona? Munozowana zvinodanijwaya ngo Bhaibheri kuti: “Rugarisiko hwa Mwari hunopinda uzivi hwese.” (VaFilipi 4:6, 7) Pamunoita mukumbiro ngo mwoyo wese, munodojizwa muri phedo kamare na Jehovha.—VaRoma 8:38, 39.

7. Ngenyi munodikana kuthemba kuti zvigondiso zva Mwari ngo pamusoro po Umambo hwake zvinozokwanirisika?

⁷ Ivanyi no cokwadi co kuti makomborero anogondiswa ngo Umambo hwa Mwari anozokwanirisika. (Bzviverengo 23:19) Kudari amukhohwi kuti zvigondiso zva Mwari zvinokwanirisika, azvizoneseri Sathana no vandhu vake kuti vamuthyisijire. (Mazwi Akangwara 24:10; Vaheberi 2:15) Mungavangisa kudini kutenda kwenyu Umambo hwa Mwari wari uno? Pejanyi nguva mecijija ngo pamusoro po Umambo hwa Mwari no kunasa kuziva cinotiitisa kuti tithembe kuti unozokwanirisika. Zvinozotibeseresa kudini? Vonanyi muezaniso wa hama Stanley Jones avo vainga vakasungwa ko makore manomwe ngo ndava yo rutendo hwavo. * Zvicinyi zvakabesera hama iyi kuti icungirire no yakagondeka? Iyona yakati:  “Ndakavangiswa ngo zivo yo Umambo hwa Mwari, ndakaithemba kamare, narini andizivi kumbokana-kana ngo pamusoro payo, andicaida kusiya Jehovha.” Kudari mukava no rutendo hwakavanga ku zvigondiso zva Mwari, munozogara phedo naye zve amuzotenderi kuti kuthya kwenyu kumuite kuti musiye Jehovha.—Mazwi Akangwara 3:25, 26.

8. Mavonero atinoita musongano jedu, anotibesera kuti tivonenyi? Sanaguranyi.

⁸ Kwenda ku musongano jo ciKristu nguva jese. Musongano jinotibesera kuti tikwedere phedo na Jehovha. Mavonero atinoita musongano jedu, anotibesera kuvona kuti dangani tinozokwanisa kuhwisana no kuteverehwa kumbejiyo kana kuti haiwa. (Vaheberi 10:24, 25) Ngenyi tinonanga kudaro? Vonanyi basi, kudari tinotendera kuti zviro zvishomani zvititamise kwenda ku musongano wari, kureva kuti tinozokwanisa kudira pa ngozi upenyu hwedu, kuti tisonganire no vatendi doni vedu here? Ngo divi rimweni, kudari tikava no cirovejeso co kwenda ku musongano jese wari uno, kumbejiyo atizosii kwenda patinonga teciteverehwa ngo vavengi vedu. Wari i nguva kwayo kamare yo kukhombija kuti tinoda musongano. Patinodakarira kamare kwenda ku musongano, apana ciri cese cingatirambisa kuzwira Mwari, nee kuteverehwa, nee utongi aungakwanisi kuita zvondhozvo.—Maitiro o Vapostori 5:29.

9. Ngenyi kudira vhesi nganani mu musoro zvinozotibeserera patinonga teciteverehwa?

⁹ Diranyi mu musoro vhesi jamunodakariraya maningi. (Mateu 13:52) Zvingatoita kuti atikwanisi hedu kudira zviri zvese mu musoro, asi Jehovha anoshandisa simba ro mujimu mucena kuti tikwanise kuva no vhesi nganani mu musoro. (Johani 14:26) Vonanyi basi zvakananga imwe hama yakambosungihwa kumavhazuva ko Aremanha, iyona yakati: “Akava makomborero kamare ngokuti ndakakwanisa kuva no zana no mazana o vhesi mu musoro mangu! Pikija hazvo ndainga ndega, ndakakwanisa kurangarijisisa shwiro jakasiyana-siyana jo mu Bhaibheri.” Vhesi jondhojo, jakabesera hama yedu kuti irambe iri phedo na Jehovha, icungirire no yakagondeka.

10. Ngenyi tinodikana kudira mu musoro ndumbo jinowanika mu bhuku redu ro ndumbo?

¹⁰ Diranyi mu musoro ndumbo jinokuja Jehovha zve jiimbenyi. Pauro na Sira pavainga vakasungwa ku Firipo, ivona vakaimba ndumbo jo kukuja Jehovha, jovainga najo mu musoro. (Maitiro o Vapostori 16:25) Mukufananavo,  hama jedu pojainga ku União Soviética yokare ku Siberia, jakaitisa kudini kuti jivangise rutendo hwajo? Hambzaji Mariya Fedun vanoceukija izvi: “Taiimba ndumbo jese jotaiziva, ndumbo jo mu bhuku redu ro ndumbo.” Ivona vakananga kuti ndumbo jondhojo jakavavangisa zve jakavabesera kuti vajizwe vari phedo na Jehovha. Kureva kuti munojizwa kuvangiswa pamunoimba ndumbo yenyu yamunodakarira here? Ngokudaro, itanyi zvese zvamunokwanisa kuti mujidire mu musoro wari uno!—Vonanyi bhokiso rinoti: “ Ndipenyi Cicunge.”

11-12. (a) Mukuzwirana na 1 Samueli 17:37, 45-47, ngenyi Dhavhidhi wainga no cicunge? (b) Tinojijenyi ngo muezaniso wa Dhavhidhi?

¹¹ Pamunohwisana no kuteverehwa, munodikana kuva no cicunge. Waro kudari mukajizwa kuti amuna mugariro uu unosisira, mungaitenyi? Ceukijanyi kuti cicunge co kadi acifiri pa mupira wenyu, simba kana kukwanisa kwenyu kuita ciri cese. Vonanyi muezaniso wo mujaha Dhavhidhi paakahwisana na Goriati. Tikaezanisa no gakanyara iri, Dhavhidhi wainga mudoko kamare, wakarembejeka zve acikazivi kunasiririka kuti ahwisane. Dhavhidhi aacainga nee no banga haro. Hina, iyena wainga mundhu ano cicunge. Acingathyi wakakwanisa kuhwisana no gakanyara riya.

¹² Ngenyi Dhavhidhi wainga no cicunge cakadaro? Waithemba kuti Jehovha wainga naye. (Verenganyi 1 Samueli 17:37, 45-47.) Dhavhidhi aazivi kubatikana maningi ngo makurire akaita Goriati. Kusiyapo zvondhozvo, iyena wakavona kuti Goriati asipi ciro mukuezanisa na Jehovha. Tinojijenyi ngo ciitiko ici? Tinozova no cicunge kudari tikathemba kuti Jehovha anesu zve tovona kuti vavengi vedu asipi ciro mukuezanisa na Mwari wo Masimbaese. (2 Kronike 20:15; Nduyo 16:8) Waro, tingaengejeresa kudini cicunge cedu wari uno ticito tateverehwa?

13. Tingaengejeresa kudini cicunge cedu? Sanaguranyi.

¹³ Tingaengejera cicunge cedu wari uno, ngo kucumaera masoko akanaka o Umambo hwa Mwari. Ngenyi? Ngokuti kucumaera kunotibesera kuti tithembe Jehovha no kutama kuthya vandhu. (Mazwi Akangwara 29:25) Kudari inga mujira jinovanga ngo kudamura-damura, cicunge cedu cinovanga patinocumaera muzi ngo muzi, pa ndau jakawanda vandhu, ucapupu ucizivi kurongwa pomwe no ndima jinotengeswa zviro. Kudari tikakwanisa kucumaera no cicunge wari, tinozova takanasiririka kuti  ticumaere pikija basa redu rikarambijwa. —1 VaTesalònika 2:1, 2.

14-15. Tingajijenyi ngo muezaniso wa hambzaji Nancy Yuen na Valentina Garnovskaya?

¹⁴ Tingajija zvizinji kuvhira ku muezaniso jo hambzaji mbiri jainga no cicunge. Hambzaji Nancy Yuen, pikija vaifupika no mametro anokwana kuita 1.5, ivona vainga no cicunge. * Ivona avazivi kutenda kuimiswa kucumaera masoko akanaka o Umambo hwa Mwari. Inga muviyo, hambzaji iyi yakafungihwa ko makore anokwana kuita 20, ku nyika yo China. Vatungamiriri vo maporisiya vakaguma pa kunanga kuti “iyona yainga no hasha maningi” mu nyika yese yo China.

¹⁵ Muezaniso umweni ngo wo hambzaji Valentina Garnovskaya, yakafungihwa ku União Soviética yo kare ko vhaza ndhatu ko makore anokwana kuita 21. * Asi ngenyi? Iyona yakasana kucumaera zvoita kuti vatungamiriri vo maporisiya vaivone inga “mundhu anothisa maningi.” Zvicinyi zvakaita kuti hambzaji mbiri iji jive no cicunge? Ijona jaithemba kuti Jehovha wainga najo.

16. Ngo api manera atingawana ndiwona cicunge?

¹⁶ Inga zvotakajija, kuti tive no cicunge atidikani kujithemba pacedu. Kusiyapo izvo, tinodikana kuthemba kuti Jehovha anesu zve iyena ari kutihwira. (Deuteronòmio 1:29, 30; Zakaria 4:6) Aya i manera atingawana ndiwona cicunge.

17-18. Inga zvakatahwa pana Johani 15:18-21, Jesu wakatipa ngwajo yapi? Sananguranyi.

¹⁷ Tese tinoda kureremejwa, asi atidikani kurangarira kuti atina mutengo, kudari vandhu avatireremeji. Jesu wakati: “Muno mucena kudari vandhu vakazomunyenya ngo thima, kudari vakazomumbhirimbija, vakazomutuka no kuramba zina renyu inga rakaxata, ngo njio yo Mwana wo mundhu.” (Luka 6:22) Jesu waida kunangenyi?

¹⁸ Jesu aacaida kunanga kuti Makristu aizodakara paaizonyenyua. Kusiyapo zvondhozvo,  waitingwaja pa zviro zvaizoitika. Itusu atiiti divi ro nyika. Tinopona mukuzwirana no jijiso ja Jesu no kucumaera masoko aaicumaeravo. Ngo iyo ndava, nyika inotinyenya. (Verenganyi Johani 15:18-21.) Tinoda kudakajisa Jehovha. Ngo kudaro, vandhu vakatinyenya ngokuti tinoda Baba wedu, izvo ngo zvavo.

19. Tingatevejeresa kudini muezaniso wo vapostori?

¹⁹ Mucatendera ciricese cinonangwa kana cinoitwa ngo vandhu, cimuite kuti muve no nyowa yo kuzvikhombija kuti muri umwe wo Zvapupu zva Jehovha. (MIKEYA 4:5) Tingajijira kuhwisana no kuthyisijihwa ngo vandhu ngo kuvona muezaniso wo vapostori ku Jerusarema pakupera kufa ka Jesu. Ivona vaizviziva kuti vakuru vo ciara co vaJudha vaivanyenya. (Maitiro o Vapostori 5:17, 18, 27, 28) Pikija zvakadaro, dhiya jese ivona vaindoenda mu temberi zve vaijikhombija pambhene kuva vateveri va Jesu. (Maitiro o Vapostori 5:42) Ivona avazivi kutendera kuti kuthya, kuvaite kuti vaime kuita basa ravo. Mukuezanavo, itusu tinganyisa kuthyisijihwa ngo vandhu, ngo kujikhombija pambhene kuti tiri Zvapupu zva Jehovha, kubasa, kucikora zve pa vocigarisano.—Maitiro o Vapostori 4:29; VaRoma 1:16.

20. Ngenyi vapostori vainga vakadakara pikija povainyenywa?

²⁰ Ngenyi vapostori vainga vakadakara? Ngokuti vaizviziva kuti ngenyi ivona vainyenywa zve vaivona kuva cidakajiso kushaishwa kutajwa ngo kuita kuda ka Jehovha. (Luka 6:23; Maitiro o Vapostori 5:41) Mupostori Pedhru pa kufamba ko nguva wakatara kuti: “Muno mucena mukateverehwa ngo ndava yo ururami.” (1 Pedru 2:19-21; 3:14) Patinozwisisa kuti tiri kunyenywa ngo kuita zvakanaka, na kamwe atizosiyi kushandira Jehovha.

21-22. (a) Masana kuitenyi kuti muzvinasirire kuitira kuzoteverehwa? (b) Pa musoro unotevera tinozobhuya ngenyi?

²¹ Atiizivi dhiya yatinozotanga kuteverehwa ngo vandhu kana utongi paunorambisa basa redu ro kucumaera. Asi tinozviziva kuti tinodikana kunasirira wari ngo kuvangisa ushamwari hwedu na Jehovha, ngo kuva no cicunge cakavanga zve ngo kujijira kuhwisana no kunyenywa ngo vandhu. Nasiriro yatinoita wari, inozotibesera kuti tirambe tecishandira Jehovha kumbejiyo.

²² Asi kudari basa redu rakarambiswa keni? Musoro unotevera, unozobhuya ngo pamusoro po vhesi jinozotibesera kuti tienderere mberi tecishandira Jehovha pikija basa redu parinorambiswa.