1. ¿Tlenon kinekiskej kinchiuiliskej itekipanojkauan toTajtsin ika tlayekapan?

IJKUAK sa achijtsin poliuiya ika mikiskia, toTeko Jesús okijto ika tlaltikpakchanejkej kintlauelitaskiaj akin kinekiskiaj nochiuaskej inomachtijkauan (Juan 17:14). Ika yejon, akin xkitekichiuiliaj Jehová melak yokintlaueltokakej itekipanojkauan toTajtsin (2 Tim. 3:12). Niman tikmatstokej ika itlamiyan tonaltin techtlaueltokaskej xsan ijkon ken aman (Mat. 24:9).

2, 3. a) ¿Tlenon uelis panos tla tomojtiaj? b) ¿Tlenon tikitaskej ipan yejuin tlamachtijli?

² ¿Tlenon uelis tikchiujtoskej tlen techpaleuis ijkuak techtlaueltokaskej? Xkipiya ika tiknemiliskej nochi tlen ueliskia topan nochiuas, pampa tla ijkon tikchiuaj, uelis timojkamikiskej niman xok tiknekiskej tiktekichiuiliskej Jehová maski kanaj nion xitlaj tikixnamikij (Prov. 12:25; 17:22). Totlauelikniuj “on Diablo” kineki matomojtikan, niman yejon tlen ika techtlajkalisneki (1 Ped. 5:8, 9). Kuakon, ¿tlenon uelis techpaleuis matitlaxikokan?

³ Ipan yejuin tlamachtijli, tikitaskej kenon uelis más kuajli touikaskej iuan Jehová niman tleka noneki ijkon matikchiuakan aman. Noijki tikitaskej tlenon techpaleuis más matiyolchikaujkej niman tlenon tikchiuaskej ijkuak techtlauelitaskej.

4. Ken kijtoua Hebreos 13:5, 6, ¿tlenon noneki kuajli tikmatstoskej, niman tleka?

⁴ Matikmatstokan ika Jehová techtlasojtla niman ika xkeman techkauas (xpoua Hebreos 13:5, 6). Yeuejkaui, Amatl Tekakistilijketl okijto: “Akin kuajli kixmatis toTajtsin yejua akin melak itech tlaneltokas ijkuak kitlaueltokaskej”. Yejon itlaj tlen melauak.  Tla tiknekij titlaxikoskej ijkuak techtlaueltokaskej, noneki tiktlasojtlaskej Jehová niman itech titlaneltokaskej ika nochi toyojlo, kipiya ika kuajli tikmatstoskej ika yejua yemelak techtlasojtla (Mat. 22:36-38; Sant. 5:11).

5. ¿Tlenon techpaleuis matikitakan ika Jehová techtlasojtla?

⁵ Mojmostla matikpouakan Biblia pampa tiknekij tiknisiuiskej Jehová (Sant. 4:8). Ijkuak tikpouaskej Biblia, matitlanemilikan itech ikualneskayouan toTajtsin. Matikitakan kenon techtlasojtla ika tlen kijtoua niman tlen kichiua (Éx. 34:6). Sekimej kanaj ouijtika kimachiliaj kineltokaskej ika toTajtsin kintlasojtla pampa xakaj kimititia ika kintlasojtla. Tla ijkon tomachiliaj, ¿tleka xtikijkuilouaj mojmostla ipan se amatl kenon toTajtsin yotechititi ika techiknelia niman techtlasojtla? (Sal. 78:38, 39; Rom. 8:32). Kanaj uelis miyek onias tlen tikijkuiloskej tla titlanemiliaj itech tlen topan yonochiuj yeuejkaui niman tla titlanemiliaj itech tlen yotikpoujkej ipan Biblia. Ijkuak más tikpatiojkaitaskej tlen Jehová kichiua, más kuajli iuan touikaskej (Sal. 116:1, 2).

6. Ken kijtoua Salmo 94:17-19, ¿kenon techpaleuiya tla tikijliaj toTajtsin tlen onka ipan toyojlo?

⁶ Miyekpa matikchiuakan teoyotl. Matitlanemilikan itech se konetl akin itaj kinapaloua. Konetl kuajli nomachilia niman noijki kijlia itaj nochi tlen kuajli niman tlen xkuajli ipan onochiuj yejon tonajli. Tejuamej noijki uelis ijkon touikaskej iuan Jehová tla mojmostla tiknotsaj (xpoua Salmo 94:17-19). Ijkuak tiknotsaskej toTajtsin akin techtlasojtla, matikijlikan tlen onka ipan toyojlo, matikijlikan nochi tlen techajmana (Lam. 2:19). Tla ijkon tikchiuaj, toTajtsin techmakas “yolseuilistli más ueyi yejuan xakaj uelis kajsikamatis” (Filip. 4:6, 7). Tla miyekpa ijkon tikchiuiliaj teoyotl, melak nisiuj tinemiskej itech Jehová (Rom. 8:38, 39).

7. ¿Tleka noneki kuajli tikmatstoskej ika yemelak nochiuas tlen toTajtsin yokijto itech iTekiuajyo?

⁷ Kuajli matikmatstokan ika nochiuas tlen toTajtsin yokijto itech iTekiuajyo (Núm. 23:19). Tla xkuajli titlaneltokaj itech tlen toTajtsin yokijto kichiuas, Satanás niman akin iuan nemij nimantsin ueliskej kichiuaskej matomojtikan (Prov. 24:10; Heb. 2:15). ¿Tlenon uelis tikchiuaskej aman niman ijkon machikaui totlaneltokil itech iTekiuajyo toTajtsin? Matikxelokan tiempo niman ijkon matomachtikan itech tlen Jehová yokijto kichiuas itech iTekiuajyo niman matikitakan tleka uelis kuajli tikmatstoskej ika yejuin yemelak nochiuas. Yejuin melak noneki matikchiuakan. ¿Tleka? Matikitakan tlenon ipan onochiuj Stanley Jones, yejuin tokniuj ouejkauj chikome xiuitl tsauktoya ipampa itlaneltokil. * Yejua okijto tlenon okipaleui mamelajkanemi: “Kuajli nikmatstoya tlen Jehová yokijtoka itech Tekiuajyotl, nion achijtsin xoniometlamat, niman yejon melak onechyolchikauj. Xouel  onechtlankej”. Tla tejuamej noijki kuajli titlaneltokaj itech tlen toTajtsin yokijto kichiuas, melak tiknisiuiskej niman xtomojtiskej (Prov. 3:25, 26).

8. Xkijto tleka noneki nochipa matiuiyan tlanechikoltin.

⁸ Nochipa matiuiyan tlanechikoltin. Yejuin techpaleuiya melak matiknisiuikan Jehová. ¿Nochipa tiauej tlanechikoltin? Yejon techititis tla titlaxikoskej noso xtitlaxikoskej ijkuak techtlaueltokaskej (Heb. 10:24, 25). Matikitakan tleka ijkon tikijtouaj. Tla aman xtiauej tlanechikoltin pampa topan nochiua itlaj tlen xueyi kijtosneki, ¿tlenon panos ijkuak xok techkauiliskej matosentlalikan imiuan tokniuan? Aman matiknemilikan yejuin, tla aman tokojtiliaj nochipa tiaskej tlanechikoltin, akin techixnamikiskej xuelis kichiuaskej maka sa matosentlalikan. Yejua ika, noneki aman matikinpatiojkaitakan totlanechikoluan. Kuakon, maski techtlaueltokaskej niman maski tekiuajkej techixnamikiskej, nochipa tiktlakamatiskej toTajtsin (Hech. 5:29).

9. ¿Tleka techpaleuis tla tikintsontekontlaliaj tlaxeloltin itech Biblia?

⁹ Matikintsontekontlalikan tlaxeloltin tlen tikinuelitaj (Mat. 13:52). Melauak, kanaj xnochi tiuelij tiktsontekontlaliaj, san ika, Jehová uelis kikuis iespíritu niman kichiuas matikimilnamikikan tlaxeloltin (Juan 14:26). Se tokniuj akin tsauktoya Alemania niman xakaj ueliya iuan nonotsaya okijto: “Melak onechpaleui ika onikintsontekontlali miyek tlaxeloltin, ijkon, maski san noselti ninemiya, ueliya nitlanemiliaya itech tlen temachtia Biblia”. Yejon tlaxeloltin okipaleuijkej mamelajkanemi niman manemi nisiuj itech Jehová.

10. ¿Tleka kipiya ika tikintsontekontlaliskej tlakuikaltin tlen ika tikueyichiuaj Jehová?

¹⁰ Matikintsontekontlalikan tlakuikaltin tlen ika tikueyichiuaj Jehová niman matokuikatikan. Ijkuak Pablo niman Silas tsauktoyaj Filipos, okikuikatilijkej Jehová tlakuikaltin tlen yokintsontekontlalijkaj (Hech. 16:25). Tokniuan akin ualeuayaj antigua Unión Soviética niman akin okinuikakaj Siberia okichiujkej ken Pablo niman Silas niman ijkon noyolchikauaskej. Tokniuj Mariya Fedun okilnamik: “Opeuj tokuikatiaj nochi tlakuikaltin tlen yotikintsontekontlalijkaj tlen uajnestiayaj ipan tocancionero”. Okijto ika yejon tlakuikaltin nochimej kinyolchikauaya niman kinpaleuiaya makimachilikan ika más nisiuj nemiyaj itech Jehová. ¿Xtiyolchikauij ijkuak tokuikatiaj tlakuikaltin tlen tikinuelitaj? Kuakon, matipeuakan  matikintsontekontlalikan ( xkita recuadro “Xnechkojtili”).

11, 12. a) Ken kijtoua 1 Samuel 17:37, 45-47, ¿tleka David yolchikauak katka? b) ¿Tlenon tiuelij itech David?

¹¹ Tla tiknekij titlaxikoskej ijkuak techtlaueltokaskej, noneki tiyolchikaujkej yeskej. ¿Tlenon uelis tikchiuaskej tla tikmachiliaj ika xtiyolchikaujkej? Maka matiknemilikan ika san tiyolchikaujkej yeskej tla tiueuejkapamej noso tla tikojtikej. Matikitakan tlen ipan onochiuj David. Ijkuak yejua telpochtli katka, okixnamik Goliat, se tlakatl akin melak uejkapan katka. David pitentsin katka niman xmás kojtik katka ken yejon filisteo. Noijki xueliya tlauisokiya ipan guerra niman nion xkipiaya se espada. San ika, melak yolchikauak katka niman xonomojti kixnamikis yejon tlakatl akin uejkapan katka.

¹² ¿Tleka David melak yolchikauak katka? Pampa kuajli kimatstoya ika Jehová iuan nemiya (xpoua 1 Samuel 17:37, 45-47). David xokinemili ika yejua xueyixtoya ixpan Goliat, David okinemili ika Goliat nion achijtsin xueyixtoya ixpan Jehová. Itech yejuin tiuelij itlaj: tiyolchikaujkej yeskej tla tikneltokaj ika Jehová techpaleuiya niman tla kuajli tikmatstokej ika akin techixnamikij xuejueyixtokej xijkon ken toTajtsin akin nochi ueli kichiua (2 Crón. 20:15; Sal. 16:8). ¿Tlenon uelis tikchiuaskej aman ika xitechtlaueltokaj niman ijkon más tiyolchikaujkej yeskej?

13. ¿Tlenon uelis tikchiuaskej niman ijkon más tiyolchikaujkej yeskej? Xkijto tleka ijkon titlanankilia.

¹³ Tla titenojnotsaj itech iTekiuajyo toTajtsin, techpaleuis tikpiyaskej más yolchikaualistli. ¿Tleka? Pampa ijkuak titenojnotsaj techpaleuiya matitlaneltokakan itech Jehová niman maka matitemakasikan (Prov. 29:25). Matiknemilikan yejuin, tejuamej más tikojtiaj ijkuak tikchiuaj ejercicio. Noijki ijkon, tejuamej más tiyolchikauij ijkuak titenojnotsaj techajchan, kampa tojlan, kampa tlanemakalo niman nochiuiyan. Tla aman titenojnotsaj ika yolchikaualistli, yejon techpaleuis ijkuak xok techkauiliskej matitenojnotsakan (1 Tes. 2:1, 2).

14, 15. ¿Tlenon tiuelij itech Nancy Yuen niman Valentina Garnovskaya?

¹⁴ Miyek tlen tiuelij itech omemej tokniuan akin omelajkanenkej niman akin okiteititijkej ika melak yolchikaujkej katkaj. Se itoka Nancy Yuen. Yejua san se metro iuan tlajko  ika uejkapan katka, san ika, xnimantsin nomojtiaya. * Pampa xokinek kikajkauas tlajtos itech iTekiuajyo toTajtsin, okitsajkej China 20 xiuitl. Tekiuajkej akin okitlajtlajtoltijkej okijtokej ika san yejua katka akin “nion achijtsin xtlakaki” itech nochi país.

¹⁵ Okse tokniuj itoka Valentina Garnovskaya. Yejua yexpa okitsajkej ipan antigua Unión Soviética, niman ika nochi tsauktoya 21 xiuitl. * Tokniuj yokijtoka ika nochipa tenojnotsaskia, ika yejon, tekiuajkej okijtokej ika yejua katka se “siuatl akin xkintlakamati tlanauatiltin”. ¿Tleka yejuin tokniuan siuamej yolchikaujkej katkaj? Pampa yejuamej kimatstoyaj ika Jehová imiuan nemiya.

16. ¿Kenon uelis yemelak tiyolchikaujkej yeskej?

¹⁶ Ken yotikitakej, maka matiknemilikan ika tiyolchikaujkej yeskej san pampa miyek tiuelij tikchiuaj. Noneki tikneltokaskej ika Jehová touan nemi niman ika tlaixnamiki topampa (Deut. 1:29, 30; Zac. 4:6). San yejon kichiuas yemelak matiyolchikaujkej.

17, 18. Ken kijtoua Juan 15:18-21, ¿tlenon okijto Jesús ika topan nochiuaskia, niman tleka?

¹⁷ Tinochimej tiknekij matechtlakaitakan, san ika, maka matiknemilikan ika xkuajli tinemij san pampa xtikinyolpaktiaj oksekimej. Jesús okijto: “Dios mechtiochiuas nemejuamej ijkuak on tlakamej mechtlauelitaskej, ijkuak xmechseliskej, ijkuak mechuijuikaltiskej, niman ijkuak mechtejteneuaskej san pampa nennechneltokaj nejua yejuan oninochiu Tlakatl” (Luc. 6:22). ¿Tlenon kijtosnekij yejuin tlajtoltin?

¹⁸ Jesús xokiteasikamachilti tla akin tikchiuaj ken Cristo tikuelitaskiaj matechtlauelitakan, yejua san okijto tlen panoskia. Techtlauelitaj pampa xtikchiuaj ken miyekej tlaltikpakchanejkej, tejuamej tiktlakamatij tlen Jesús otechmachti niman tikteijliaj tlen yejua yotechijli (xpoua Juan 15:18-21). Tiknekij  tikyolpaktiskej Jehová. Tla tlaltikpakchanejkej techtlauelitaj pampa tiktlasojtlaj toTajtsin, no yejuamej ompa makitakan.

19. ¿Kenon uelis tikchiuaskej ken iapóstoles Jesús?

¹⁹ Maka keman matipinauikan ika tiiteixpantijkauan Jehová san ipampa tlen kijtouaj tlaltikpakchanejkej (Miq. 4:5). Tla tikitaj tlenon okichiujkej apóstoles ne Jerusalén ijkuak yokimiktijkaj Jesús, yejon techpaleuis maka matitemakasikan. Akin tlayekanayaj ipan tlaneltokijli melak kintlauelitayaj apóstoles, niman yejuamej kimatstoyaj (Hech. 5:17, 18, 27, 28). Maski ijkon, apóstoles mojmostla yayaj teopan niman noteititiayaj ken inomachtijkauan Jesús (Hech. 5:42). Yejuamej xonoteltijkej niman xonomojtijkej. Tejuamej noijki xtomojtiskej tla nochipa toteititiaj ken iteixpantijkauan Jehová: kampa titekitij, kampa tomachtiaj noso kampa tichantij (Hech. 4:29; Rom. 1:16).

20. ¿Tleka apóstoles pakiyaj maski kintlauelitayaj?

²⁰ Apóstoles pakiyaj pampa kimatstoyaj tleka kintlauelitayaj. Niman kitayaj ika se tlateochiualistli katka tlajyouiskej pampa kitlakamatstoyaj Jehová (Luc. 6:23; Hech. 5:41). Sakin, apóstol Pedro okijkuilo: “Pero tla nentlajyouiyaj pampa nenkichiuaj on tlen kuajli, nenkiseliskej itlatiochiualis Dios” (1 Ped. 2:19-21; 3:14). Tla kuajli tikmatstokej ika techtlauelitaj pampa tikchiuaj tlen kuajli, nochipa tiktekichiuiliskej toTajtsin maski ijkon texchiuiliaj.

21, 22. a) ¿Tlenon yotikijto tikchiuas niman ijkon titlaxikos ijkuak techtlaueltokaskej? b) ¿Tlenon tikitaskej ipan okse tlamachtijli?

²¹ Xtikmatij kemanon techtlaueltokaskej noso kemanon tekiuajkej xok techkauiliskej matikueyichiuakan Jehová. San ika, kema tikmatij ika aman uelis toyektlalijtiaskej tla más kuajli touikaj iuan Jehová, tla tokojtiliaj más tiyolchikaujkej yeskej niman tla tomachtiaj tlenon tikchiuaskej ijkuak techtlauelitaskej. Tla aman toyektlaliaj, techpaleuis matimelajkanemikan ika tlayekapan.

²² San ika ¿tlenon tikchiuaskej tla kemantika tekiuajkej xok techkauiliaj matikueyichiuakan Jehová? Ipan okse tlamachtijli tikitaskej katlejua tlaxeloltin itech Biblia techpaleuiskej nochipa matiktekichiuilikan Jehová maski xok techkauiliskej.