1. Ke ka baka la’ng re swanetše go itokišeletša go tlo tlaišwa?

BOŠEGONG bja pele ga ge Jesu a ka bolawa, o ile a bolela thapelong gore batho ka moka bao ba nyakago go ba barutiwa ba gagwe ba be ba tlo hloiwa. (Joh. 17:14) Ga e sa le go tloga ka nako yeo go fihla gona bjale, bahlanka ba Jehofa bao ba botegago ba sa tšwela pele ba tlaišwa goba ba ganetšwa ke batho bao ba sa hlankelego Jehofa. (2 Tim. 3:12) Ge bofelo bja lefase le bo dutše bo batamela, re letetše gore manaba a rena a re tlaiše le go feta.—Mat. 24:9.

2-3. (a) Letšhogo le ka re diriša phošo efe, gona Sathane o le diriša bjang? (b) Re tlo ithuta ka’ng sehlogong se?

² Re swanetše go dira’ng gona bjale gore re itokišeletše go tlo tlaišwa? Ga se ra swanela go nagana ka dilo ka moka tše mpe tšeo di ka tlago tša re diragalela, ka gobane ge e ba re ka dira bjalo re tlo tšhoga kudu. Ge e ba re ka dulelela go nagana ka dilo tše mpe tšeo di ka tlago tša re diragalela, re ka tšhoga kudu moo e lego gore re ka tlogela go hlankela Jehofa le pele re tlaišwa. (Die. 12:25; 17:22) ‘Lenaba la rena Diabolo’ o diriša letšhogo gore re se sa hlankela Jehofa. (1 Pet. 5:8, 9) Ka gona re ka dira’ng gona bjale gore re itokišeletše go tlo kgotlelela tlaišo?

³ Sehlogong se re tlo ithuta kamoo re ka matlafatšago tswalano ya rena le Jehofa, le gore ke ka baka la eng go le bohlokwa gore re dire seo gona bjale. Le gona re tlo ithuta gore re ka dira eng gore re be le sebete kutšwanyana. Ke moka mafelelong re tlo ithuta seo re ka se dirago ge batho ba re tlaiša.

4. Go ya ka Baheberu 13:5, 6, re swanetše go kgodišega ka’ng, gona ka baka la’ng?

⁴ Kgodišega gore Jehofa o a go rata le gore a ka se tsoge a go lahlile. (Bala Baheberu 13:5, 6.) Mengwageng e mentši e fetilego  Morokami o ile wa re: “Motho yo a tsebago Modimo gabotse, o tlo mmota kutšwanyana ge a welwa ke mathata.” Ruri seo ke nnete! E le gore o kgone go kgotlela ge o tlaišwa, o swanetše go rata Jehofa le go mmota ka mo go feletšego. Le gona, le ka mohla o se ke wa belaela gore Jehofa o a go rata!—Mat. 22:36-38; Jak. 5:11.

5. Ke’ng seo se tlago go go thuša go bona gore Jehofa o a go rata?

⁵ Bala Beibele letšatši le letšatši e le gore o be le tswalano e botse le Jehofa. (Jak. 4:8) Ge o dutše o bala Beibele, ithute ka dika tša Jehofa. Ge o dutše o ithuta ka yena, leka go bona kamoo a go ratago ka gona. (Ek. 34:6) Batho ba bangwe ba ka thatafalelwa ke go dumela gore Jehofa o a ba rata ka gobane ga se ba ka ba bontšhwa lerato. Ge e ba le wena o ikwa bjalo, letšatši le lengwe le le lengwe leka go ngwala fase dilo tše dibotse tšeo Jehofa a go direlago tšona. (Ps. 78:38, 39; Baroma 8:32) Ge o ka nagana ka dilo tšeo di ilego tša go diragalela bophelong e bile wa naganišiša ka seo o se balago ka Lentšung la Modimo, o tlo makatšwa ke go bona gore Jehofa o go diretše dilo tše dintši kudu. Ge e ba o tšeela godimo dilo tšeo Jehofa a go diretšego tšona, o tlo ba le tswalano e tiilego le yena.—Ps. 116:1, 2.

6. Go ya ka Psalme 94:17-19, go rapela go tšwa pelong go ka go thuša bjang?

⁶ Rapela ka mehla. Nagana ka mošemane yoo tatagwe a mo ratago. Mošemane yo ge a na le tatagwe o a lokologa moo e lego gore ga a tšhabe go mmotša selo se sengwe le se sengwe seo se mo diragalelago, e ka ba se sebotse goba se sebe. Le wena o ka ba le tswalano e bjalo le Jehofa ge e ba letšatši le letšatši o mo rapela go tšwa pelong. (Bala Psalme 94:17-19.) Ge o dutše o rapela Tatago yo lerato, ‘mo tšhollele tša pelong ya gago go etša meetse,’ gomme o mmotše mathata a gago le dilo tšeo o di boifago. (Dillo 2:19) Mafelelo e tlo ba afe? Beibele e re o tlo ba le “khutšo ya Modimo yeo e fetago kwešišo yohle.” (Bafil. 4:6, 7) Ge o dutše o rapela Jehofa ka tsela ye, o tlo ba le tswalano e botse kudu le yena.—Baroma 8:38, 39.

7. Ke ka baka la’ng o ka kgodišega gore dilo tšeo Jehofa a re tshepišago tšona di tlo direga?

⁷ Kgodišega gore dilo tšeo Jehofa a re tshepišago tšona di tlo direga. (Num. 23:19) Ge e ba o se na tumelo ya gore Jehofa o tlo phethagatša dilo tšeo a re tshepišago tšona, go tlo ba bonolo gore Sathane, batemona gotee le batho ba gagwe ba go tšhoše. (Die. 24:10; Baheb. 2:15) O ka matlafatša bjang tumelo ya gago ya gore Mmušo wa Modimo o tlo tla? Iphe nako ya go ithuta ka dilo tšeo Jehofa a tshepišago gore o tlo re direla tšona ka Mmušo wa gagwe le gore ke mabaka afe ao a dirago gore dumela gore dilo tšeo di tlo phethagala e le ka kgonthe. Seo se tla go thuša bjang? Nagana ka mohlala wa Stanley Jones yo a ilego a golegwa ka mengwaga e šupago ka baka la go emela tumelo ya gagwe. * Ke’ng seo se ilego sa mo thuša gore a kgotlelele ka go botega? O itše: “Tumelo ya ka e be e tiile kudu ka gobane ke be ke tseba gore Modimo o tlo diriša  Mmušo wa gagwe go phethagatša dilo tšeo a re holofeditšego tšona, gomme ga sa nka ka belaela seo.” Ge e ba o na le tumelo e tiilego ya gore Modimo o tlo phethagatša dikholofetšo tša gagwe, o tlo batamela kgauswi kudu le yena, gomme o ka se tlogele go mo hlankela ka baka la ge o boifa.—Die. 3:25, 26.

8. Ge e ba re eba gona dibokeng ka mehla, se se bontšha’ng? Hlalosa.

⁸ Eba gona dibokeng ka mehla. Diboka di re thuša gore re batamele kgauswi kudu le Jehofa. Ge e ba re eba gona dibokeng ka mehla, seo se bontšha gore re tlo kgona go kgotlelela ge re tlaišwa nakong e tlago. (Baheb. 10:24, 25) Ke ka baka la’ng re re’alo? Ka gobane ge e ba re dumelela dilo tše dinyenyane di re palediša go ya dibokeng gona bjale, nakong e tlago re ka tla ra tšhaba go bea maphelo a rena kotsing e le gore re bokane le bana babo rena le dikgaetšedi. Eupša ge e ba re eya dibokeng ka mehla, re ka se ineele ge batho bao ba re ganetšago ba leka go re thibela go bokana le bana babo rena. Ye ke nako ya gore re ithute go rata go ba gona dibokeng ka mehla. Ge e ba re rata go ba gona dibokeng, ga go na selo le ge e le sefe seo se ka re thibelago go kwa Modimo go e na le go kwa batho. Le gona ga go na mmušo goba batho bao ba ka re thibelago go hlankela Jehofa.—Dit. 5:29.

9. Ke ka baka la’ng go tseba mangwalo ka hlogo go tla re thuša go tlo kgotlela ge re tlaišwa?

⁹ Tseba ka hlogo mangwalo ao o a ratago. (Mat. 13:52) Ke therešo gore menagano ya rena ga se ya phethagala, eupša Jehofa a ka go thuša ka moya wa gagwe o mokgethwa gore o gopole mangwalo ao o ithutilego ona. (Joh. 14:26) Ka mohlala ngwanabo rena yo a bego a golegilwe a nnoši ka seleng kgolegong ya kua Bohlabela bja Jeremane o itše: “Ruri ke be ke thabile kudu gore ka nako yeo ke be ke šetše ke tseba mangwalo a fetago a 200 ka hlogo! Nakong yeo ya ge ke be ke le noši, ke be ke dula ke naganišiša ka mangwalo ao a Beibele.” Mangwalo ao a ile a thuša ngwanabo rena yo gore a dule a le kgauswi kudu le Jehofa le go kgotlelela ka go botega.

10. Ke ka baka la’ng re swanetše go tseba dikoša tša rena ka hlogo?

¹⁰ Ithute go tseba dikopelo tša rena ka hlogo gomme o dule o di opela. Ge Paulo le Silase ba be ba golegilwe kua Filipi, ba ile ba opelela Jehofa dikoša tša go mo tumiša tšeo ba bego ba di tseba ka hlogo. (Dit. 16:25) Ka mo go swanago, ge bana babo rena ba dinageng tšeo di bego di bušwa ke mmušo wa Soviet Union ba be ba golegilwe Siberia, ba be ba imatlafatša ka go opela. Ka mohlala kgaetšedi Mariya Fedun o re: “Re be re  opela dikoša ka moka tšeo re bego re di tseba ka hlogo tšeo di bego di le ka pukung ya rena ya dikopelo.” O re dikoša tšeo di ile tša ba matlafatša ka moka le go ba dira gore ba ikwe ba le kgauswi kudu le Jehofa. Na le wena o ikwa o matlafatšwa ke go opela tše dingwe tša dikoša tša rena tšeo o di ratago? Gona ithute go di tseba ka hlogo gona bjale.—Bona lepokisi leo le rego, “ Mphe Sebete.”

11-12. (a) Go ya ka Samuele wa Pele 17:37, 45-47, ke ka baka la’ng Dafida a ile a ba le sebete? (b) Ke selo sefe sa bohlokwa seo re ithutago sona mohlaleng wa Dafida?

¹¹ E le gore re kgone go lebeletšana le tlaišo, re swanetše go ba le sebete. O swanetše go dira’ng ge e ba o ikwa eka ga o na sebete? Gopola gore go ba le sebete ga se gwa ithekga ka gore o na le mengwaga e mekae, gore o na le matla a makaakang e bile ga se gwa ithekga ka bokgoni bja gago. Nagana ka mohlala wa Dafida yo e bego e le yo monyenyane ge a be a elwa le Goliata. Ge Dafida a be a bapetšwa le monna yoo wa senatla, e be e le yo monyenyane kudu, a se na matla e bile a se a itlhama ka selo. Dafida o be a se na le ka tšhoša. Eupša o be a na le sebete kudu. Ka sebete Dafida o ile a lwa le senatla seo sa go ikgogomoša.

¹² Ke ka baka la’ng Dafida a ile a bontšha sebete ka tsela ye? Ka gobane o be a tloga a kgodišegile gore Jehofa o na le yena. (Bala 1 Samuele 17:37, 45-47.) Dafida ga se a ka a no dulela go nagana ka gore Goliata ke senatla. Go e na le moo, o ile a dula a nagana kamoo Goliata e lego yo monyenyane ka gona ge a bapetšwa le Jehofa. Re ithuta’ng pegong ye? Re ithuta gore re tlo dula re na le sebete ge e ba re kgodišegile gore Jehofa o na le rena, e bile re kgodišegile gore batho bao ba re ganetšago ga se selo ge ba bapetšwa le Modimo Ramatlaohle. (2 Dikor. 20:15; Ps. 16:8) Re ka ithuta go ba le sebete bjang gona bjale pele re tlaišwa?

13. Re ka ithuta bjang go ba le sebete? Hlalosa.

¹³ Re ka ithuta go ba le sebete gona bjale ka go botša batho ditaba tše dibotse tša Mmušo wa Modimo. Ke ka baka la’ng re re’alo? Ka gobane go bolela ditaba tše dibotse go re ruta go bota Jehofa le go se boife batho. (Die. 29:25) Go no swana le ge mešifa ya rena e tia ge re itšhidulla, le rena re ba le sebete kudu ge re bolela ditaba tše dibotse ka ntlo le ntlo, mafelong a batho bohle, mafelong a kgwebo le ge re nea bohlatse bjo bo sa rulaganyetšwago. Ge e ba re ithuta go ba le sebete sa go bolela ditaba tše dibotse gona bjale, re tlo ba le sebete sa go tšwela pele re bolela ditaba tše dibotse gaešita le ge modiro wa rena o thibetšwe.—1 Bathes. 2:1, 2.

14-15. Ke dilo dife tšeo re ithutago tšona go Nancy Yuen le go Valentina Garnovskaya?

 ¹⁴ Re ka ithuta mo gontši mohlaleng wa dikgaetšedi tše pedi tšeo di ilego tša bontšha sebete. Gaešita le ge Nancy Yuen e be e le yo mokopana, o be a na le sebete. * O ile a gana go tlogela go bolela ditaba tše dibotse tša Mmušo wa Modimo. Se se ile sa dira gore a golegwe mengwaga ya ka godimo ga e 20 kua China. Batho ba molao bao ba bego ba mo sekiša ba ile ba bolela gore “ga go na motho yo a nago le kgang ya go swana le ya Nancy” nageng yeo.

¹⁵ Ka mo go swanago, Valentina Garnovskaya o ile a golegwa ka makga a mararo go e nngwe ya dinaga tšeo di bego di bušwa ke Soviet Union , ka mengwaga e ka bago e 21. * Ke ka baka la’ng a ile a golegwa? Ka gobane o be a ikemišeditše go tšwela pele a bolela ditaba tše dibotse moo e lego gore maphodisa a be a re ke “sekebekwa se kotsi.” Ke’ng seo se dirilego gore basadi ba babedi ba botegago ba bontšhe sebete kudu? Ba be ba kgodišegile gore Jehofa o be a na le bona.

16. Re ka dira’ng gore re bontšhe sebete sa kgonthe?

¹⁶ Ka ge re šetše re boletše, e le gore re ithute go ba le sebete, ga se ra swanela go ithekga ka matla a rena goba bokgoni bja rena. Go e na le moo, re swanetše go dumela gore Jehofa o na le rena le gore ke yena a re lwelago. (Doit. 1:29, 30; Sak. 4:6) Ge re ka dira bjalo, re tla bontšha sebete sa kgonthe.

17-18. Go ya ka Johane 15:18-21, Jesu o ile a re nea temošo efe? Hlalosa.

¹⁷ Ka moka ga rena re a thaba ge batho ba re rata, eupša ga se ra swanela go nagana gore ge batho ba sa re rate go ra gore ga re na mohola. Jesu o itše: “Go thaba lena neng le neng ge batho ba le hloya, le neng le neng ge ba le hlaola, ba le goboša gomme ba nyatša leina la lena bjalo ka ge eka ke le lebe ka baka la Morwa wa motho.” (Luka 6:22) Jesu o be a era go re’ng?

¹⁸ Jesu o be a sa re gore Bakriste ba be ba tla thabela gore batho ba ba hloye. Go e na le moo, o be a no re lemoša ka seo se tlago go re diragalela. Ga re karolo ya lefase. Re diriša dithuto tša  Jesu maphelong a rena, e bile re bolela molaetša wa Mmušo wa Modimo woo le yena a bego a o bolela. Ka go re’alo, lefase le re hloile. (Bala Johane 15:18-21.) Re nyaka go thabiša Jehofa. Ge e ba batho ba re hloya ka gobane re nyaka go thabiša Tatago rena, bjoo ke bothata bja bona.

19. Re ka ekiša bjang mohlala wa baapostola?

¹⁹ O se ke wa dumelela seo motho le ge e le ofe a se bolelago goba a se dirago se go dira gore o je ke dihlong tša go ba Hlatse ya Jehofa. (Mika 4:5) Re ka ithuta go lebeletšana le go boifa batho ka go naganišiša ka seo baapostola ba ilego ba se dira kua Jerusalema ka morago ga gore Jesu a bolawe. Ba be ba tseba gore baetapele ba bodumedi ba Bajuda ba ba hloile kudu. (Dit. 5:17, 18, 27, 28) Eupša letšatši le letšatši ba ile ba tšwela pele ba eya tempeleng gomme ba sa tšhabe go bontšha batho gore ke barutiwa ba Jesu. (Dit. 5:42) Ga se ba ka ba boifa batho. Le rena re ka fenya go boifa batho ka go dira gore ba tsebe gore re Dihlatse tša Jehofa, e ka ba mošomong, sekolong goba moo re dulago gona.—Dit. 4:29; Baroma 1:16.

20. Ke ka baka la’ng baapostola ba be ba thabile le ge ba be ba hloilwe?

²⁰ Le ge baapostola ba be ba hloilwe, ba be ba thabile. Ke ka baka la’ng ba be ba thabile? Ka gobane ba be ba tseba gore ke ka baka la eng ba be ba hloilwe, le gona ba ile ba bona e le tokelo go hloiwa ka baka la go dira thato ya Jehofa. (Luka 6:23; Dit. 5:41) Ka morago moapostola Petro o ile a ngwala gore: “Gaešita le ge e ba le tlaišetšwa toko, le a thaba.” (1 Pet. 2:19-21; 3:14) Ge e ba re kwešiša gore ke ka baka la eng re hloilwe, gona re ka se tlogele go hlankela Jehofa ka baka la ge batho ba re hloile.

21-22. (a) Ke’ng seo o nyakago go se dira gore o itokišeletše go tlo tlaišwa? (b) Re tlo ithuta ka’ng sehlogong se se latelago?

²¹ Ga re tsebe gore batho ba tlo thoma neng go re tlaiša goba gore mebušo e tlo thoma neng go thibela mošomo wa rena wa go bolela ditaba tše dibotse. Eupša seo re se tsebago ke gore re ka thoma gona bjale go itokišeletša go tlo tlaišwa ka go matlafatša tswalano ya rena le Jehofa, go ithuta go ba le sebete gotee le go ithuta go se tšhoge ge batho ba re hloile. Ge re itokišeletša gona bjale go tlo tlaišwa, se se tlo re thuša gore re dule re hlankela Jehofa ka sebete nakong e tlago.

²² Eupša re tla dira’ng ge e ba modiro wa rena o ka thibelwa? Sehlogong se se latelago, re tlo ithuta ka melao ya motheo ya Beibele yeo e tlago go re thuša gore re tšwele pele re hlankela Jehofa gaešita le ge modiro wa rena o thibetšwe.