1. Atínihidiʼdoolníiłgo haʼátʼíísh biniinaa hashtʼeʼádíínílzin doo?

YISKĄ́ĄGO bidiʼyoolyéełgo, Jesus ání, tʼáá ałtso shídahoołʼaahii éí nihokááʼ dineʼé dabijoołáa doo. (John 17:14) Dííshjı̨́įdi ałdóʼ, diné doo tʼáá aaníí oodląʼ danilínígíí éí Jiihóvah bidineʼé atídeiłʼı̨́. (2 Tim. 3:12) Nihoolzhiizh bichʼįʼ yoołkááł, nihiʼanaʼí doo yáʼátʼéehii yaa danihidiiʼaah dooleeł.—Matt. 24:9.

2-3. (a) Nił yéʼígíí haʼátʼíísh baa ákonínízin? (b) Haʼátʼíísh éí baa nídadíitʼįįł?

² Atínihidiʼdoolníiłgo haitʼéego hashtʼeʼádíínílzin doo? Haash deeshnííł niidzingo, tʼáadoo ayóó baa nitsíikeesí. Ákóniitʼéego tʼáá íiyisíí yééʼ dóó yínííł niidlı̨́į doo. Néiildzidgo nitsíikeesgo éí Jiihóvah bá neilʼaʼ yę́ę yitsʼá nihiʼdoolóós. (Prov. 12:25; 17:22) ‘Devil, nihiʼanaʼí nilíinii,’ éí náhádzidgo nitsáhákeesii choyoołʼı̨́. Díí bitsxeʼgo atínidoolíłígíí biniinaa. (1 Pet. 5:​8, 9) Haitʼéego nihidziil ádidíílnííł?

³ Díí baa nídadíitʼįįł: Jiihóvah bił kʼé ahidiiʼníigi bidziilgo índa haʼátʼíí biniyé ayóó ílı̨́įgo ííníilzin doo. Áádóó haitʼéego bee nihidziilgo doo ninádahinilyées da doo. Índa, dineʼé danihijoołáago haitʼéego haʼíínílníi doo.

4. Hebrews 13:​5, 6 góneʼ haʼátʼíísh yee nihił halneʼ, dóó haʼátʼíí biniinaa ílı̨́?

⁴ Nił bééhózin, Jiihóvah ayóóʼánóʼní índa doo yóóʼanididooʼáał da. (Hebrews 13:​5, 6 yíníłtaʼ.) Ląʼí nááhai yę́ędą́ą́ʼ,  The Watchtower ání: “Diné nabóhoʼdinitaah éí God yééhósingo éí niłdzilgo yee sézı̨́į doo.” Díí tʼáá aaníí! Atídanihiʼdilʼı̨́įgo bee hadaʼííníilníi doo, éí Jiihóvah ayóóʼííníiʼní dóó baʼííníidlíi dooleeł. Tʼáadoo naaki nilínígóó Jiihóvah ayóóʼánóʼní.—Matt. 22:​36-38; Jas. 5:11.

5. Jiihóvah ayóóʼánóʼnínígíí baa ákonínízin haʼátʼíísh yee níká adoolwoł?

⁵ Tʼáá ákwíí jı̨́ Diyin Bizaad yíníłtaʼ dóó Jiihóvah bił ahą́dí ádíínílzin doo. (Jas. 4:8) Ííníłtaʼgo, Jiihóvah beʼayóóʼóʼóʼniʼ, nihaa joobaʼ, dóó nihaa aʼááh nízin baa nitsíníkees. Jiihóvah yee hahadziihígíí baa ííníłtaʼgo, hazhóʼó bikʼidiitįįhgo éí binahjįʼ ayóóʼánóʼní. (Ex. 34:6) Łaʼ éí God ayóóʼábóʼníigi bił ndanitłʼah háálá ayóóʼóʼóʼniʼ doo bichʼįʼ ííshjání ádaalyaa da. Ákótʼéego nitsíníkees, tʼáá ákwíí jı̨́ Jiihóvah yee naa joobaʼii dóó yee naa aʼááh nízinii naaltsoos bikááʼ ádanileʼ. (Ps. 78:​38, 39; Rom. 8:32) Diyin Bizaad yíníłtaʼ dóó bee ádaa nitsíníkeesgo, éí binahjįʼ Jiihóvah níká eelwodígíí baa ákonínízin. Jiihóvah níká análwoʼgi baa ahééh nínízin, éí bił kʼé ahidiʼníigi bee bitsxeʼgo íinisin.—Ps. 116:​1, 2.

6. Psalm 86:17 bitsʼą́ą́dę́ę́ʼ, haitʼéego nihijéí biyiʼdóó sodilzingo nihíká adoolwoł?

⁶ Tʼáá áłahjįʼ sodílzin. Azhéʼé éí biyeʼ ayóóʼáyóʼníigo yinázhchidgo baa nitsíníkees. Ashkii éí bizhéʼé doo náldzidgóó yáʼádaatʼéhígíí índa doo yáʼádaatʼéhígíí yee yichʼįʼ yáłtiʼ. Ni ałdóʼ tʼáá ákótʼéego Jiihóvah bił ahą́dí ádííníilzingo, tʼáá ákwíí jı̨́ Jiihóvah bichʼįʼ sodilzin. (Psalm 86:17 yíníłtaʼ.) Jiihóvah bichʼįʼ sodilzingo “tó háálı̨́ nahalingo nijéí biyiʼdóó.” Tʼáá átʼé nił yéeʼii dóó nide átʼéhígíí éí Nizhéʼé ayóóʼánóʼnínígíí bił hólneʼ. (Lam. 2:19) Haa hodoonííł? “Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii” nił bééhodoozįįł. (Phil. 4:​6, 7) Kótʼéego sodilzingo, Jiihóvah bił ahą́dí ádííníilzin doo.—Rom. 8:​38, 39.

7. Haʼátʼíí biniyé God biNahatʼaʼ yee haadzíʼígíí yiiniidlą́ągo tʼáá aaníí bikʼí hodoolzhish?

⁷ Nił bééhózin, God biNahatʼaʼ nihikʼihozhdoodliiłígíí tʼáá aaníí bikʼí hodoolzhish. (Num. 23:19) Neʼoodląʼ doo bidziilgóó éí Séítan doo bichʼįʼ niłdzilgóó nihił yééʼ áhósin doo. (Prov. 24:10; Heb. 2:15) Haitʼéego God biNahatʼaʼ neʼoodląʼ bidziilgo íinisin doo? God biNahatʼaʼ yee haadzíʼígíí dóó haitʼéego tʼáá aaníí bikʼí hodoolzhishgo hazhóʼó naniłkaah. Haitʼéego éí nihíká adoolwoł? Stanley Jones hweʼoodląʼ biniinaa tsostsʼid nááhai awáalya góneʼ sidá baa nitsíníkees. * Haʼátʼíí háká eelwodgo bee haʼjólní? Éí  ájíní: “God biNahatʼaʼ dóó áyiilaaígíí éí doo shił naaki nilı̨́ı̨́góó bee shidziil. Náánáłahdę́ę́ʼ doo yitsʼá shidoolóos da.” God yee haadzíʼígíí neʼoodląʼ bidziil doo éí Jiihóvah bił ahą́dí ádíínílzingo, doo yééʼ nihidínóołtłʼah da.—Prov. 3:​25, 26.

8. Áłah náʼádleehígíí haitʼéego baa nitsíikeesgi, éí haʼátʼíísh bee ádaa ákoniidzin? Łaʼ baa chʼíhoníʼaah.

⁸ Tʼáá áłahjįʼ Kingdom Hallgóó áłah náʼádleehdi ałnáánídááh. Jiihóvah bił ahą́dí ádíníilzingo, áłah néidleehígíí nihíká análwoʼ. Haitʼéego áłah náʼádleehígíí baa nitsíikees ííshjání ííníilzingo atínihidiʼdoolníiłgi éí náásgóó biniyé hashtʼeʼádííníilzin doo. (Heb. 10:​24, 25) Haʼátʼíísh biniyé hashtʼeʼádííníilzin doo? Haʼátʼíhída niníłtłʼahgo biniinaa áłah náʼádleehgo doo néiidááhgóó, náasdi nahóhodiʼnitaahgo baa hoolzhiizhgo éísh haa díínííł? Ákondi, áłah náʼádleehgi yéigo bidinilkaalgo, éí náasdi nihikʼijįʼ danilíinii doo danihidínóołtłʼah da éí bitsʼą́ąjįʼ kóniitʼée doo. Kʼad áłah náʼádleehígíí ayóóʼííníʼníigo íinisin. Nihikʼijįʼ danilínígíí doodaiiʼ diné binahatʼaʼ doo tʼą́ą́ʼ kónihidoolíił da. Diyin God tsʼídá bikʼeh dahoniilʼı̨́į dooleeł.—Acts 5:29.

9. Diyin Bizaad biiʼdę́ę́ʼ saad dah naazhjaaʼígíí béédeilniihgo, haitʼéego nihíká adoolwoł?

⁹ Diyin Bizaad biiʼdę́ę́ʼ saad dah naazhjaaʼ nił yáʼátʼéhígíí béénílniih. (Matt. 13:52) Azhą́ doo éénílniih da ndi, Jiihóvah biníłchʼi diyinii yee níká adoolwoł Diyin Bizaad biiʼdę́ę́ʼ saad dah naazhjaaʼ yę́ę bééhílníih doo. (John 14:26) Nihibrother East Germanydi awáalyaa góneʼ tʼáá sáhí sidá. Éí ání: “200 ánéelą́ąʼgo saad dah naazhjaaʼígíí bíhoołʼą́ą́ʼ éí baa shił hózhǫ́! Azhą́ tʼáá sahdii sidáa ndi, tʼáá áłahjįʼ Diyin Bizaad baa nitséskeesgo shinaanish íinisin.” Nihibrother éí saad dah naazhjaaʼígíí bee Jiihóvah áhą́dígo áyósin dóó hweʼoodląʼ niłdzilgo ájósin.

10. Haʼátʼíí biniyé sin bénéiilniih doo?

¹⁰ Sin bee Jiihóvah baa hóniihgo bee hótaał dóó béénílniih. Fílipaidi awáalyaa góneʼ jizkéego, Paul dóó Sáílas éí God bichʼįʼ hojitaał. (Acts 16:25) Éí nahalingo, nihibrothers former Soviet Uniondi éí Siberiagóó yisnááh daazlı̨́ı̨́ʼ, haitʼéego dahadziil ńtʼééʼ? Sister Mariya Fedun ájíní: “Songbook biyiʼdóó, sin tʼáá béédahoniilzinígíí bee dahwiitaał.” Hadaʼólníigo  Jiihóvah bił ahą́dí ádadííníilzin díí sin nihíká eelwod. Sin éí Jiihóvah baa dahwiiʼniihgo bee dahwiitaał, díísh bidziilgo ánósin? Kʼad sin béénílniih!—“ Doo Náhinisyéésgóó Áshíínísin” níníłʼı̨́.

11-12. (a) 1 Samuel 17:37 bitsʼą́ą́dóó, David doo náhinílyéésgóó haʼátʼíísh bíká eelwod? (b) David áátʼįįdígíí yę́ę haʼátʼíísh bitsʼą́ą́dóó bídahwiilʼą́ą́ʼ?

¹¹ Atídanihidiʼdoolnííł bichʼįʼ hadaʼííníilníigo, doo náhinilyées da doo. Díí tʼáá biʼoh neeshʼą́ nínízingo, haash díínííł? Béénílniih, áníłtsááz, nidziil, dóó ánítʼéhígíí éí doo náhinilyésígíí bee baʼíínílíi da. David tʼah ániid naaghá yę́ędą́ą́ʼ Goláíyath yichʼįʼ niníyá baa nitsíníkees. Díí ałhąąh naninil, David éí ájíłtsʼíísí, doo hadziil da, dóó diltłish hwee ádin. Ákondi, David doo náhinilyées da. David doo nánílyéésgóó yéʼiitsoh Goláíyath ayóó ábóodziilii yiyiisxı̨́.

¹² David doo náhinílyéésgóó haʼátʼíísh bíká eelwod? Jiihóvah bił hólǫ́ǫgo yoodlą́. (1 Samuel 17:37 yíníłtaʼ.) David éí Goláíyath ayóó áníłnézígíí doo yee yaa nitsékees da. Goláíyath éí hózhníshéhígo, Jiihóvah éí biláahdi átʼé. (1 Sam. 17:​45-47) Díí haʼátʼíí bitsʼą́ą́dóó bíhwiilʼą́ą́ʼ? Jiihóvah nihił hólǫ́ǫgi dóó nihikʼijįʼ yádaałtiʼígíí éí God bił ahąąh naaʼnilgo hódaníshéhígo baa nitsíikeesgo, éí doo nináhinilyées da doo. (2 Chron. 20:15; Ps. 16:8) Kʼad éí haitʼéego doo náhinilyéesgi bidziilgo ádiilnííł, tʼahdoo atínihiʼdilʼı̨́ baa hoolzhiishdą́ą́ʼ?

13. Haitʼéego doo náhinílyéésgóó nidziilgo ádílnééh? Łaʼ baa chʼíhoníʼaah.

¹³ Haneʼ yáʼátʼéhígíí baa nahólneʼgo éí doo náhinílyéésgóó nidziilgo ádílnééh. Haʼátʼíísh biniinaa? Háálá nahwiilneʼgo, Jiihóvah baʼííníidlíigi dóó bílaʼashdlaʼii doo nihił yééʼ áhósingi da doo, éí yee nanihinitin. (Prov. 29:25) Naʼázhdíltsʼǫǫdgo éí hatah hółdzil yileeh. Tʼáá ákótʼéego, dahooghangóó, dahasłą́ą́góó, hidínááhgóó, dóó ndaʼanishgo nahojilneʼ éí bee niłdzilgo, doo náhinilyées da doo. Kʼad nahwiilneʼgo bidziilgo ííníilzingo, azhą́ nidahwiilneʼ neʼ kólyaa ndi, tʼáá náás doo náhinilyéésgóó nidahwiilneʼ.—1 Thess. 2:​1, 2.

14-15. Nancy Yuen dóó Valentina Garnovskaya, haʼátʼíísh bitsʼą́ą́dóó bídahwiilʼą́ą́ʼ?

 ¹⁴ Nihisisters doo náhinilyéésgóó ląʼí bitsʼą́ą́dóó baa ídahodiilʼááł. Nancy Yuen kʼasdą́ą́ʼ 5 feet (1.5 m) áníłtso, doo haʼátʼíhída yináldzid da. * God biNahatʼaʼ yaa halneʼígíí doo nahjįʼ kóyósin da. Díí biniinaa, 20dóó baʼaan nááhai Communist Chinadi awáalyaa góneʼé jizdá. Hakéyah biyiʼ naatʼáanii nidaʼídíłkidígíí éí “díí ayóó bízhą́ʼílı̨́,” dahałní!

¹⁵ Russiadi, Valentina Garnovskaya, 21 nááhaigo awáalyaa góneʼ jizdá. * Haʼátʼíísh biniinaa? Nahojilneʼ doo neʼ kójílééhgóó éí naatʼáanii “tʼáá íiyisíí báhádzidgo” hakʼijįʼ yizoh. Haʼátʼíísh biniinaa díí sáanii doo náhinílyées da? Jiihóvah bił hólǫ́ǫgo yoodlą́.

16. Haitʼéego doo ninádahinilyéésgóó ádiilnííł?

¹⁶ Áko, doo nináhinilyéés ádaʼdiilníiłgo éí niheʼadziil doo baʼííníidlíi da. Jiihóvah nihił hólǫ́ dóó nihíká análwoʼgo deiniidlą́. (Deut. 1:​29, 30; Zech. 4:6) Díigi átʼéego tʼáá íiyisíí doo ninádahinilyées da doo.

17-18. John 15:​18-21, éísh haʼátʼíí Jesus nihichʼįʼ ííshjání áyiilaa? Łaʼ baa chʼíhoníʼaah.

¹⁷ Diné yáʼátʼéehgo nihichʼįʼ ádaaníiłgo éí nihił yáʼádaatʼééh, ndi diné doo yáʼátʼééhgóó nihichʼįʼ ádaaníiłgo éí tʼáadoo biniyéhí da nínízingo nitsíníkeesí. Jesus ání: “Diné Silı̨́įʼii biniinaa diné nihikʼee dadiniihgo, áádóó tʼáá sahdii nidanihinilgo áádóó danihódziihgo, índa danihízhiʼ baaʼihgo yaa yádaałtiʼgo nihikʼidahojidlí!” (Luke 6:22) Haʼátʼíísh áhyiłní?

¹⁸ Diné danihijoołáago nihił yáʼátʼééh doo áhyiłníi da. Tʼáá íídą́ą́ʼ ákóhodoonííł nihiłní. Nihokááʼ bił nidahaztʼiʼii doo bídadíníitʼiʼ da. Jesus bibee naʼnitinii bikʼehgo niheʼiinaʼ ádeilʼı̨́ dóó yee naʼnitinígíí bee nidaʼniitin. Díí biniinaa diné  danihijoołá. (John 15:​18-21 yíníłtaʼ.) Jiihóvah bił hózhǫ́ ííníilzin doo. Jiihóvah ayóóʼádeíníiʼníigo biniinaa diné danihijoołáago éí tʼáá bí bídadéétʼiʼ.

19. Daalʼaadii ádaatʼįįd yę́ę haitʼéego bedaʼiilʼı̨́į doo?

¹⁹ Jiihóvah Yá Dahalneʼé nilı̨́įgo diné nihikʼijįʼ yádaałtiʼ ndi, tʼáadoo baa yáníziní. (Mic. 4:5) Jesus ádindóó bikʼijįʼ, Jerúsalemdi daalʼaadii ił yéeʼii haʼahóníí ńtʼééʼ yę́ę bitsʼą́ą́dóó ídahwiidiilʼááł. Jew dineʼé hastóí ánaazíinii dahojoołáá ńtʼéeʼgo éí bił béédahózin. (Acts 5:​17, 18, 27, 28) Jesus bídahoołʼaahii tʼáá ákwíí jı̨́ kin biiʼ sohodizingóó ałnáádaakah dóó nidahojilneʼgo bee ííshjání ádazhdólzin ńtʼééʼ. (Acts 5:42) Doo náhádzid neʼ kódabósin da. Naʼanishdi, óltaʼgi, dóó kééhonítʼínígi éí Jiihóvah Yá Dahalneʼé tʼáá áłahjįʼ ííshjání ííníilzingo doo yééʼ níhíí nádáah da doo.—Acts 4:29; Rom. 1:16.

20. Azhą́ diné danihijoołáa ndi, haʼátʼíísh biniyé daalʼaadii bił dahózhǫ́?

²⁰ Haʼátʼíísh biniyé daalʼaadii bił dahózhǫ́? Dabiʼjoodláagi éí bił béédahózin. Jiihóvah yá ndaalʼaʼígíí biniinaa tiʼdahodzoozniiʼígi baa hoł dahóózhǫǫd. (Luke 6:23; Acts 5:41) Yilʼaadii Peter éí náasdi yee akʼeʼashchı̨́: “Azhą́ tsʼídá tʼáá ákogi ádaahtʼínígíí biniinaa tiʼdahoohníih nidi, nihikʼidahojidlíigo átʼé.” (1 Pet. 2:​19-21; 3:14) Díí nihił bééhózingo éí yáʼátʼéehgo íʼiilʼínígíí biniinaa danihijoołá, ndi Jiihóvah bá neiilʼaʼígíí doo neʼ kódiilníił da.

21-22. (a) Haitʼéego atínihidiʼdoolníiłgi biniyé hashtʼeʼádílnééh? (b) Haʼátʼíí baa nínáádadíitʼįįł?

²¹ Atíʼálʼįįh doodaiiʼ Jiihóvah bá nideilʼaʼ yę́ę nihitsʼą́ą́ʼ neʼ kódooníiłgo éí doo bééhózin da. Ákondi, Jiihóvah bił kʼé ahidiiʼníigi bidziilgo, doo ninádahinilyées daaígi bidziilgo, dóó dineʼé danihijoołáago bichʼįʼ haʼíínílníigo éí kʼad biniyé hashtʼeʼádílnééh doo. Díí bee hashtʼediiʼnéhígíí éí nihíká adoolwołgo náasdi bee nihidziil doo.

²² Jiihóvah bá nideilʼaʼ nihitsʼą́ą́ʼ nahjįʼ kólyaago haash díínííł? Náá ákóneʼ baa haneʼígíí, éí haitʼéego Diyin Bizaad binahjįʼ naʼnitinígíí tʼáá náásgóó bidiilkaal dooígíí bíhodiilʼááł.