1. Ahabw’enki twine kwetebeekanisiza okuhiiganisibwa?

EKIRO ekyahereerukireyo Mukama waitu Yesu arikuza kwitwa, akagira ngu abarikucwamu kuba abeegi be nibaija kwangwa. (Yoh. 17:14) Na hati, Abakristaayo abeesigwa Abajurizi ba Yehova batwire nibahiiganisibwa abarikuhakanisa amazima. (2 Tim. 3:12) Obu emperu y’ensi egi embi erikweyongyera kwirira haihi, nitumanya ngu abazigu baitu nibaija kwongyera kutuhiiganisa munonga.—Mat. 24:9.

2-3. (a) Niki eki twine kumanya aha kutiina? (b) Nituza kugaaniira ahari ki omu kicweka eki?

² Nitubaasa kwetebeekanisa tuta hati kwija kuraba omu kuhiiganisibwa? Tikirikutwetengyesa kuteebereza aha bintu byona ebirikubaasa kutubaho. Twaguma nituteebereza, nitubaasa kurengwa okutiina n’amaganya. Okuteebereza aha kabi akarikuza kubaho nikubaasa kutusingura nangwa n’okugyezibwa kwenyine kutakabaireho. (Enf. 12:25; 17:22) Okutiina n’ekirwaniso ky’amaani eki “Sitaane omuzigu” arikuteeraho kukoresa kuturwanisa. (1 Pet. 5:8, 9) Nitubaasa kukora ki kwetebeekanisa hati?

³ Omu kicweka eki, nituza kureeba oku turikubaasa kuhamya omukago gwaitu na Yehova, n’enshonga ahabw’enki kiri kikuru kukikora hati. Nituza n’okureeba oku turikubaasa kwongyera kugira obumanzi. Kandi aha muheru, nituza kureeba eki turikubaasa kukora twaba nituhakanisibwa.

4. Kurugiirira aha Abaheburaayo 13:5, 6, twine kuba twine buhame ki, kandi ahabw’enki?

⁴ Gira obuhame ngu Yehova naakukunda kandi ngu tarikwija kukutsigaho. (Shoma Abaheburaayo 13:5, 6.) Emyaka mingi enyima, Omunaara gw’Omurinzi gukagira guti: “Omuntu orikumanya gye Ruhanga naija kumwesiga munonga omu bwire bw’okugyezibwa.”  Ekyo ka kihikire! Kubaasa kusingura omu bwire bw’okugyezibwa, twine kukunda Yehova, kandi tumwesigire kimwe tutarikubangaanisa ngu naatufaho.—Mat. 22:36-38; Yak. 5:11.

5. Niki ekiraakuhwere kumanya ngu Yehova naakukunda?

⁵ Shoma Baibuli buri izooba oine ekigyendererwa ky’okwirira haihi Yehova. (Yak. 4:8) Waaba nooshoma Baibuli, ta omutima aha mitwarize mirungi ya Yehova. Teeraho kwetegyereza ngu buzima naakukunda waaba nooshoma aha bi arikugamba n’ebi arikukora. (Kur. 34:6) Abamwe nikibaasa kubagumira kwikiriza ngu Ruhanga naabakunda ahabw’okugira ngu tihaine orayorekire ngu naabakunda. Ku oraabe nikwo orikwehurira otyo, teeraho buri izooba kuhandiika emiringo ei Yehova ayorekire ngu akwiniire embabazi n’esaasi. (Zab. 78:38, 39; Rom. 8:32) Waateekateeka aha bi Yehova akurabizemu n’ebi orikushoma omu Kigambo kye, nikibaasa kukuhwera kuhandiika ebintu bingi ebi Yehova akukoreire. Ku orikweyongyera kusiima ebi Yehova arikukora, omukago gwawe nawe nigweyongyera kuhama.—Zab. 116:1, 2.

6. Kurugiirira ahari Zaaburi 94:17-19, okushaba kuruga aha mutima nikubaasa kukuhwera kuta?

⁶ Shaba butoosha. Teekateeka aha mwojo muto abumbatiirwe ishe. Omwojo ogwo naahurira aine oburinzi, kandi naagambira ishe butunu ebintu ebirungi n’ebibi ebyamuhikaho eizooba eryo. Naiwe noobaasa kugira omukago nk’ogwo wairira haihi Yehova orikushaba kuruga aha mutima buri izooba. (Shoma Zaaburi 94:17-19.) Waaba nooshaba Yehova, ‘shuka ebiri omu mutima gwawe nk’amaizi,’ kandi omugambire byona ebirikukutiinisa n’ebirikukwerarikiriza. (Tonz. 2:19) Nihaija kurugamu ki? Noija kutunga eki Baibuli erikweta “obusingye bwa Ruhanga oburengire okwetegyereza kw’omuntu weena.” (Fil. 4:6, 7) Oku oraayeyongyere kushaba oti, nikwo oraayeyongyere kwirira haihi na Yehova.—Rom. 8:38, 39.

7. Ahabw’enki oine kuba noohamiza kimwe ngu ebi Ruhanga arikuraganisa ebirikukwata aha Bukama bwe nibiija kuhikiirira?

⁷ Gira obuhame ngu Obukama bwa Ruhanga nibwija kureeta emigisha. (Kub. 23:19) Waaba otaine kwikiriza kuhami ngu emigisha y’Obukama neija kuhikiirira, nikyorobera Sitaane n’abarikumushagika kukutiinisa. (Enf. 24:10; Heb. 2:15) Noobaasa kwongyera ota kwikiririza omu Bukama bwa Ruhanga hati? Teeraho kushwijuma ebi Ruhanga arikuraganisa ebirikukwata aha Bukama bwe n’enshonga ahabw’enki noobaasa kuhamya ngu nibiija kuhikiirira. Ekyo nikiija kukuhwera kita? Teekateeka ahari Stanley Jones, owaakomirwe emyaka mushanju ahabw’okwikiriza kwe. * Niki ekyamuhwereire kugumisiriza omu bwesigwa? Akagira ati: “Okwikiriza kwangye kukaba kuhami ahabw’okumanya gye Obukama bwa Ruhanga, ahabw’okugira obuhame ngu nibwija kwija, n’ahabw’okutabangaanisa na kakye, kandi tihaine owaabaire naabaasa kunyiha ahari Yehova.” Waaba oine  okwikiriza kuhami omu bi Yehova arikuraganisa, noija kumwirira haihi, kandi tiharikwija kugira ekyakutiinisa.—Enf. 3:25, 26.

8. Emiteekateekyere ei twine aha nteerane n’akamanyiso karungi akarikworeka ki? Shoboorora.

⁸ Za omu nteerane z’Ekikristaayo otarikwosha. Enteerane nizituhwera kwirira haihi Yehova. Emiteekateekyere ei twine aha nteerane n’akamanyiso karungi akarikworeka oku turikwija kugumisiriza okuhiiganisibwa omu biro by’omumaisho. (Heb. 10:24, 25) Ahabw’enki nitugira tutyo? Twikiriza ebintu bikye kuturemesa kuza omu nteerane hati, niki ekirikwija kubaho obu turaabe twine kwoga amagara gaitu kuza kuteeranira hamwe n’ab’eishe-emwe? Kwonka twamariirira hati kuguma nituza omu nteerane, abarikutuhiiganisa n’obu baakuteeraho kutuzibira tibarikwija kuturemesa. Hati nibwo bwire bw’okugirira enteerane rukundo. Twaba nitukunda kuza omu nteerane, tihaine ekirikubaasa kuturemesa kworobera Ruhanga omu mwanya gw’abantu, n’obu kwakuba okuhiiganisibwa, nangwa n’obu gavumenti zaakutuzibira.—Byak. 5:29.

9. Ahabw’enki okukwata ebyahandiikirwe omu mutwe kiri kirungi omu kwetebeekanisiza okuhiiganisibwa?

⁹ Kwata omu mutwe ebyahandiikirwe ebi orikukunda. (Mat. 13:52) Ebiteekateeko byawe tibihikiriire, kwonka Yehova naija kukoresa omwoyo gurikwera ogw’amaani kukwijutsya ebyahandiikirwe ebyo. (Yoh. 14:26) Yetegyereze eki ow’eishe-emwe omwe omu East Germany owaabaire akomirwe wenka yaagambire: “Ka gwabaire guri omugisha ahabw’okugira ngu omu bwire obwo nkaba niinyijuka ebyahandiikirwe bingi kuruga aha mutima! N’obu ndaabe naabaire ndi nyenka, nkakoresa obwire obwo kuteekateeka aha nshonga za Baibuli ezitari zimwe na zimwe.” Ebyahandiikirwe ebyo bikahwera ow’eishe-emwe ogwo kuguma haihi na Yehova n’okugumisiriza omu bwesigwa.

10. Ahabw’enki twine kukwata ebyeshongoro omu mutwe?

¹⁰ Kwata omu mutwe ebyeshongoro by’okuhimbisa Yehova kandi byeshongore. Obu Paulo na Siila baakomerwa omuri Filipi, bakeeshongora ebyeshongoro by’okuhimbisa Yehova ebi baabaire nibamanya. (Byak. 16:25) Kandi shi, obu ab’eishe-emwe omuri Soviet Union eya ira baatwarwa omu nkambi omuri Siberia, bakeegumya bata? Munyaanyazi-itwe Mariya Fedun naagira ati: “Tukaba nitweshongora ebyeshongoro ebi twabaire nitumanya omu mutwe, ebiri omu kitabo ky’ebyeshongoro.” Akagira ngu ebyeshongoro ebyo bikabagumya boona, kandi byabahwera kwirira haihi na Yehova. Mbwenu shi noogumibwa ku orikweshongora ekyeshongoro ky’Obukama  eki orikukunda munonga? Kwata ebyeshongoro ebyo omu mutwe hati!—Reeba akabokusi “ Mpa Obumanzi.”

11-12. (a) Kurugiirira ahari 1 Samueli 17:37, 45-47, ahabw’enki Daudi yaabaire ari emanzi? (b) N’eishomo ki erikuru eri turikwegyera ahari Daudi?

¹¹ Kubaasa kuraba omu kuhiiganisibwa, oine kugira obumanzi. Ku oraabe noohurira ngu toine omutwarize ogwo, oine kukora ki? Ijuka ngu obumanzi obwabuzima tiburikurugiirira aha buhango bwawe, amaani gaawe, nari okubaasa kwawe. Teekateeka aha ky’okureeberaho kya Daudi obu yaarwana Goliasi. Daudi waamugyeragyeranisa na Goliasi ekikaaka, akaba ari mukye munonga, aine amaani makye, kandi aine eby’okurwanisa bitari by’amaani. Akaba ataine na rurara. Kwonka, akaba aine obumanzi bwingi. Daudi omu bumanzi akairuka kurwanisa omushaija ekikaaka kandi ekihanda.

¹² Ahabw’enki Daudi yaabaire ari emanzi munonga? Akaba naahamiza kimwe ngu Yehova ari nawe. (Shoma 1 Samueli 17:37, 45-47.) Daudi tarataire omutima aha buhango bwa Goliasi reero akeegyeragyeranisa nawe. Omu mwanya gw’ekyo, akata omutima aha ku Goliasi yaabaire ari mukye munonga waamugyeragyeranisa na Yehova. Eki nitukyegyeraho ki? Nitwija kuhurira twine obumanzi twaba nituhamya ngu Yehova ari naitwe, kandi turikuhamya ngu abazigu baitu ni bakye nk’eitontori waabagyeragyenisa na Yehova ow’Obushoboorozi Bwona. (2 Bus. 20:15; Zab. 16:8) Nitubaasa kwongyera tuta kuba emanzi hati okuhiiganisibwa kutakabaireho?

13. Nitubaasa kweyongyera tuta kuba emanzi? Shoboorora.

¹³ Nitubaasa kwombeka obumanzi bwaitu hati turikubuurira abandi amakuru marungi g’Obukama bwa Ruhanga. Ahabw’enki? Ahakuba okubuurira nikutubaasisa kwesiga Yehova, kandi nikutuhwera kusingura okutiina abantu. (Enf. 29:25) Nk’oku okumanyiiza omubiri kurikuhwera enyama z’omubiri kuhama, nitweyongyera kuba emanzi twabuurira enju aha nju, omu myanya y’orweteeraine, kitaraariire, n’omu myanya y’eby’obushuubuzi. Twagira obumanzi bw’okubuurira hati, nitwija kuba tweteekateekire kubuurira n’obu omurimo gwaitu gwakuzibirwa.—1 Tes. 2:1, 2.

14-15. Nitubaasa kwegyera ki ahari Nancy Yuen na Valentina Garnovskaya?

¹⁴ Nitubaasa kwegyera ahari banyaanyazi-itwe babiri abeesigwa abaayorekire obumanzi bw’omutaano. Nancy Yuen akaba aine oburaingwa bwa fuuti nk’itaano zonka, kwonka  akaba atarikurahuka kutiinatiinisibwa. * Akanga kurekyera aho kubuurira amakuru marungi g’Obukama bwa Ruhanga. N’ekyarugiremu, akakomwa emyaka erengire 20 omuri China. Abaserukare abaabaire nibamubuuza bakagira ngu “niwe yaabaire naakirayo kugira orubwa” omu ihanga ryabo.

¹⁵ Nikyo kimwe, Valentina Garnovskaya akakomerwa omuri Soviet Union eya ira emirundi eshatu kumara emyaka nka 21 yoona hamwe. * Ahabw’enki? Akaba amaririire kugumizamu naabuurira abaserukare, reero baamukubya “omukozi w’emishango ow’akabi.” Niki ekyareeteire abakazi babiri aba kugira obumanzi bw’amaani? Bakaba nibahamiza kimwe ngu Yehova ari hamwe nabo.

16. Ekishumuruzo ky’okutunga obumanzi obwabuzima ni kiiha?

¹⁶ Nk’oku twaheza kureeba, kubaasa kwongyera kugira obumanzi, titwine kwesiga amaani gaitu n’okubaasa kwaitu. Omu mwanya gw’ekyo, twine kwikiriza ngu Yehova ari naitwe, kandi ngu niwe arikuturwanirira. (Bir. 1:29, 30; Zek. 4:6) Ekyo nikyo kishumuruzo ky’okutunga obumanzi obwabuzima.

17-18. Nk’oku kiri omuri Yohaana 15:18-21, Yesu akatuha kurabura ki? Shoboorora.

¹⁷ Nituba nitwenda ngu abandi batuhe ekitiinisa, kwonka titushemereire kukora enshobe kuteekateeka ngu titwine mugasho, abantu baaba nibatwanga. Yesu akagira ati: “Mwine [okushemererwa] abantu ku baraabangye, baababinga, baabajuma, baacamura eiziina ryanyu ngu ni ribi, nibabatura Omwana w’omuntu.” (Luk. 6:22) Yesu akaba naamanyisa ki?

¹⁸ Yesu akaba atarikumanyisa ngu Abakristaayo nibaija kushemererwa ahabw’okwangwa. Kureka, akaba naagamba kyenyine ekirikuza kubaho. Tituri b’ensi egi. Nitugyendera aha nyegyesa za Yesu, kandi nitubuurira obutumwa obu yaabuuriire. Ekirikurugamu, ensi neetwanga. (Shoma Yohaana 15:18-21.) Nitwenda kushemeza Yehova. Abantu baatwanga ahabw’okugira ngu nitukunda Tataitwe, obwo n’oburemeezi bwabo.

19. Nitubaasa kutooreza tuta entumwa?

 ¹⁹ Otariikiriza ekintu kyona eki abantu-buntu barikugamba nari eki barikukora kukureetera kuhemuka ahabw’okuba omwe aha Bajurizi ba Yehova. (Mik. 4:5) Nitubaasa kwega kusingura okutiina abantu turikushwijuma eky’okureeberaho eki entumwa baatuteereireho omuri Yerusaalemu bwanyima ya Yesu kwitwa. Bakaba nibamanya ngu abeebembezi b’ediini y’Ekiyudaaya nibabanga. (Byak. 5:17, 18, 27, 28) Kwonka, buri izooba bakagumizamu nibaza aha hekalu, kandi omu rweteeraine bakaba nibeeyoreka ku bari abeegi ba Yesu barikubuurira. (Byak. 5:42) Okutiina tikurabaremeise. Naitwe nitubaasa kusingura omutego gw’okutiina abantu, butoosha turikwemanyisa omu rweteeraine, aha murimo, aha ishomero, n’omu bataahi, ku turi Abajurizi ba Yehova.—Byak. 4:29; Rom. 1:16.

20. Ahabw’enki entumwa baabaire baine okushemererwa n’obu baraabe baabaire nibangwa?

²⁰ Niki ekyareeteire entumwa okushemererwa? Bakaba nibamanya ahabw’enki baabaire nibangwa, kandi bakaba nibakireeba nk’ekitiinisa kutwarizibwa kubi ahabw’okukora ebi Yehova arikukunda. (Luk. 6:23; Byak. 5:41) Entumwa Petero bwanyima akahandiika ati: “Ku muraabe nimuhiigwa ahabw’okuhikiirira,” mwine okushemererwa. (1 Pet. 2:19-21; 3:14) Twamanya ngu nitwangwa ahabw’okukora ekihikire, titurikwija kutiina kuheereza Ruhanga ahabw’okugira ngu abantu nibatwanga.

21-22. (a) Noija kucwamu ki kubaasa kwetebeekanisiza okuhiiganisibwa? (b) Nituza kwega ki omu kicweka ekirikukurataho?

²¹ Titurikumanya obu haraabeho okuhiiganisibwa nari obu gavumenti ziraazibire omurimo gwaitu. Kwonka nitumanya ngu nitubaasa kwetebeekanisa hati kuhamya omukago gwaitu na Yehova, turikwombeka obumanzi bwaitu, kandi turikwega kwemera rwango y’abantu. Twayetebeekanisa hati nikiija kutuhwera kuguma tuhami turikuheereza Yehova omu biro by’omumaisho.

²² Kandi shi okuramya kwaitu ku kwakuzibirwa? Omu kicweka ekirikukurataho, nituza kugaaniira aha misingye erikwija kutuhwera kugumizamu nituheereza Yehova n’obu twakuba nituzibirwa.