Nkhani Yakupfunza 27
Khalani Wakukonzeka Kulimbana na Mazunzo
‘Wense omwe afune kukhala na moyo wakubzipereka kwa Mulungu mwakubverana na Kristu Jezu, an’dzazunzidwambo.’—2 TIMOTIO 3:12.
NYIMBO 129 Ifepano Tin’dzapitiriza Kupirira
BZOMWE TIN’PFUNZA *
1. Thangwe ranyi tin’funika kukhala wakukonzeka kulimbana na mazunzo?
USIKU bomwe mangwana yace adadzaphedwa, Mbuya wathu Jezu adalewa kuti wense omwe an’dzasankhula kukhala ateweri wace, an’dzawengedwa. (Juwau 17:14) Bzimwebzi bzidacitikadi. Kuyambira nthawe imweire mpaka pano, Akristau wakukhulupirika wa Yahova akhala ankuzunzidwa na wanthu omwe ambanamata lini Yahovayo. (2 Timotio 3:12) Ndipo pakuti tiri kuphampha kwa mkonzedwe uno wa bzinthu, tin’funika kukhala wakukonzeka thangwe anyamadulanthaka wathu angatitsutse kwene-kwene.—Mateu 24:9.
2-3. (a) Kodi Dyabu ambaphatisa tani basa mantha? (b) Kodi tin’pfunza ciyani mu nkhani ino?
2 Kodi tingakhale tani wakukonzeka kulimbana na mazunzo? Tin’funika lini kumbandokumbukira bzinthu bzense bzakuipa bzomwe bzingaticitikire. Kulewa cadidi, kukumbukira bzomwe bzikanati kuticitikira bzingaticitise mantha na thupo, ndipo tingafike pakusiya kutumikira Yahova napo tikanati kugumana na bvuto liri-lense. Tenepo, tin’funika lini kuyebwa kuti mantha ni msampha ukulu omwe ‘nyamadulanthaka [wathu], Dyabu’ ambaphatisa basa kuti atizunze nawo. (1 Pedru 5:8, 9) Tsono kodi tingacite tani kuti tikhale wakukonzeka kupirira mazunzo?
3 Mu nkhani ino, tin’pfunza momwe tingalimbisire uxamwali bwathu na Yahova na thangwe lomwe tin’funikira kucita bzimwebzi madzi yakali m’mabondo. Tiniwonambo bzomwe tingacite kuti tikhale wakukhwimika. Pakumalizira, tiniwona bzomwe tingacite anyamadulanthaka wathu akambatizunza.
BZOMWE MUNGACITE KUTI MULIMBISE UXAMWALI BWANU NA YAHOVA
4. Mwakubverana na cinembo ca Wahebereu 13:5, 6, kodi tin’funika kutsimikiza kucita ciyani ndipo thangwe ranyi?
4 Tsimikizani kuti Yahova ambakufunani ndipo iye cipo acidzakusiyani. Nsanza ya Mulindiri inango ya m’magole ya mbuyomu, idalewa kuti: “Munthu omwe ambadziwa bwino Mulungu, an’dzamukhulupira pa nthawe ya mayezo.” Bzimwebzi n’cadidi! Kuti tikwanise kulimbana na mazunzo, ifepano tin’funika kufuna Yahova ticimbamukhulupira na mtima wathu wense, ticitsimikiza kuti iye an’dzatithandiza pa mazunzo yomwe tingagumane nayo.—Mateu 22:36-38; Tiyago 5:11;—Werengani Wahebereu 13:5, 6. *
5. Kodi mungadziwe tani kuti Yahova ambakufunani?
5 Kuwerenga Bibliya nsiku zense kun’dzalimbisa uxamwali bwanu na Yahova. (Tiyago 4:8) Mukambawerenga, mbayezezani kuwona makhalidwe yabwino ya Yahova. Ndipo mbabvesesani lufoyi lomwe iye analo kwa imwepo kucokera pa bzinthu bzomwe ambalewa na kucita. (Kufuluka 34:6) Wanthu winango bzingawanese kukhulupira kuti Mulungu ambawafuna thangwe palibe ne munthu m’bodzi ambawafuna. Penu imwepo mumbawonambo tenepoyo, mbanembani nsiku zense bzinthu bzabwino bzomwe Yahova ambakucitirani. (Psalymo 78:38, 39; Waroma 8:32) Ndipo mukambakumbukira bzinthu bzomwe bzimbakucitikirani na bzomwe mumbawerenga m’Fala la Mulungu, mun’dzakhala na bzinthu bzizinji bzakunemba pa bzomwe Yahova adakucitirani. Tenepo mukambatenda bzinthu bsense bzomwe Yahova ambakucitirani, uxamwali bwanu na iye bun’dzalimba kwene-kwene.—Psalymo 116:1, 2.
6. Mwakubverana na cinembo ca Psalymo 94:17-19, kodi n’ciyani cin’dzacitika mukambapemba na mtima wense?
6 Mbapembani nthawe zense. Kumbukirani bza mulumbwana omwe baba wace amukolombexa mwa lufoyi. Mulumbwanayo ambakhala wakutsudzuka kufotokozera baba wacewo bzinthu bzabwino na bzakuipa bzomwe bzamucitikira. Tenepo mwakubverana na ciratizoci, imwepo mungakhalembo pa uxamwali na Yahova mukambapemba nsiku zense kwa iye na mtima wanu wense. (Werengani Psalymo 94:17-19. *) Mukambapemba kwa Yahova, mbakhuthulani ‘mtima wanu ninga madzi’ mucimufotokozera bzomwe bzimbakucitisani mantha na thupo. (Maliro 2:19) Kodi mukudziwa n’ciyani cin’dzacitika? Ninga momwe Bibliya limbalewera, imwepo mun’dzakhala na ‘mtendere wa Mulungu, omwe umbaposa makumbukidwe yense.’ (Wafiripo 4:6, 7) Tenepo mukambapemba na mtima wense, mun’dzabzibva kukhala pafupi na Yahova.—Waroma 8:38, 39.
Kukumbukira bzinembo na nyimbo za Umambo kungakuthandizeni kukhala wakukhwimika mukambazunzidwa
Kukhulupira Yahova pabodzi na Umambo bwace kumbatithandiza kukhala wakukhwimika (Onani ndime 7)
7. Thangwe ranyi mun’funika kutsimikiza kuti mapiciro ya Mulungu yakulewa bza Umambo bwace yan’dzakwanirisidwa?
7 Tsimikizani kuti mapiciro yakulewa bza Umambo bwa Mulungu yan’dzakwanisikadi. (Mirewengo 23:19) Penu imwepo mumbakhulupira lini kuti mapiciro ya Mulungu yan’dzakwanirisidwa, bzin’dzakhala bzakusaya kunesa Sathani pabodzi na omwe ali kumbali yace kukugopswani. (Mimwani 24:10; Wahebereu 2:15) Tsono n’ciyani comwe mungacite kuti mulimbise cikhulupiro canu pa Umambo bwa Mulungu? Mbapambulani nthawe kuti mupfunze bza mapiciro ya Mulungu yakulewa bza Umambo bwace na cakulombolera, ndipo mbawonani bzomwe bzingakucitiseni kukhulupira kuti bzimwebzi bzin’dzacitikadi. Thangwe ranyi ni bwino kucita bzimwebzi? Ciratizo pa nkhaniyi ni Stanley Jones, omwe adamala magole manomwe ali m’kawoko thangwe ra cikhulupiro cace. * Kodi n’ciyani comwe cidamuthandiza kupirira mwakukhulupirika? Iye adati: “Cikhulupiro cangu cidakhala cakulimba thangwe ndikhadziwa bza Umambo bwa Mulungu na bzomwe Umambobo bun’dzakwanirisa, ndipo ndikhapenukira lini bzimwebzi. Tenepo palibe omwe anganditazise kutumikira Yahova.” Mukakhala na cikhulupiro cakulimba pa mapiciro ya Mulungu, mun’dzamufenderera Yahova ndipo mun’dzabvuma lini kuti mantha yakutaziseni kumutumikira.—Mimwani 3:25, 26.
8. Kodi kufika pa mitsonkhano kumbatithandiza tani? Fotokozani.
8 Mbafikani mwakukhazikika pa mitsonkhano. Mitsonkhano imbatithandiza kulimbisa uxamwali bwathu na Yahova. Kufika pa mitsonkhano, kumbatithandiza kuwona momwe tingadzapiririre mazunzo kutsogolo. (Wahebereu 10:24, 25) Thangwe ranyi tikulewa tenepo? Penu nsiku zino timbatazira kufika pa mitsonkhano na thangwe lakusaya kubveseseka, kodi n’ciyani cin’dzacitika kutsogolo tikadzafunikira kukhwimika kuti titsonkhane? Kulewa cadidi, penu nsiku zino timbafika kale mwakukhazikika pa mitsonkhano yensene, bzin’dzakhala bzakusaya kunesa kutsonkhana napo anyamadulanthaka wathu akadzatiletsa. Tenepo, ino ni nthawe yakuti timbafune mitsonkhano yathu. Ndipo tikambafuna mitsonkhano, palibe omwe an’dzatitazisa kubvera Mulungu, ne anyakutitsutsa, ne boma lin’dzakwanisa lini kutiletsa kutsonkhana.—Mabasa 5:29.
Kukumbukira bzinembo na nyimbo za Umambo kungakuthandizeni kukhala wakukhwimika mukambazunzidwa (Onani ndime 9) *
9. Thangwe ranyi kukumbukira bzinembo kungatithandize kukhala wakukonzeka kupirira mazunzo?
9 Mbakoyani mu msolo mavesi yomwe mumbayafuna. (Mateu 13:52) Pinango imwepo bzimbakunesani kukoya mavesiyo, koma Yahova angaphatise basa mzimu wace wakucena kuti akuthandizeni kumbayakumbukira. (Juwau 14:26) Kumbukirani bza m’bale omwe akhali m’kawoko yekha-yekha ku Alemanha Oriental, iye adalewa kuti: “Pomwe ndikhakumbukira bzinembo bza m’BibliyaNdikhakondwa kwene-kwene! Ndipo nsiku zense ndikhambakumbukira bzinthu bzizinji bzomwe bzimbabverana na bzinembo napo kuti ndikhali ndekha.” Bzinkuwoneka kuti bzinembo bzidathandiza m’bale wanthuyu kufendererana na Yahova.
(Onani ndime 10) *
10. Thangwe ranyi mpsakufunika kumbakoya nyimbo zakutumbiza Yahova?
10 Mbakoyani mu msolo ndipo mbaimbani nyimbo zomwe zimbatumbiza Yahova. Mwa ciratizo, pomwe Paulo na Sila akhali m’kawoko ku Firipo, iwo adaimba nyimbo zakutumbiza Yahova zomwe akhazidziwa na mu msolo. (Mabasa 16:25) Abale wathu wa ku União Soviética omwe akhali m’kawoko ku Sibéria, adacitambo bzibodzi-bodzibzi kuti abzilimbise. Mpfumakazi yakucemeredwa Mariya Fedun idalewa kuti: “Tidaimba nyimbo zense za m’bukhu la nyimbo zomwe tikhazikumbukira.” Mpfumakaziyo idalewa pomwe kuti nyimbozo zidalimbisa wense ndipo zidawathandiza kufendererana na Yahova. Kodi imwepo mumbalimbisidwambo mukambaimba nyimbo zauzimu zomwe zimbatumbiza Yahova? Penu bziri tenepo, zikoyeni mu msolo kuyambira tsapano!—Onani kwadru yakuti “Ndithandizeni Kukhala Wakukhwimika.”
BZOMWE MUNGACITE KUTI MUKHALE WAKUKHWIMIKA
11-12. (a) Mwakubverana na cinembo ca 1 Samuweri 17:37, 45-47, thangwe ranyi Davide akhali wakukhwimika? (b) Kodi tinkupfunza ciyani na ciratizo cace?
11 Kuti mukwanise kulimbana na mazunzo, imwepo mun’funika kukhala wakukhwimika. Penu imwepo mumbabziwona kuti ndimwe lini wakukhwimika, kodi mungacite ciyani kuti mukulise khalidweri? Kumbukirani kuti kukhala wakukhwimika kumbathemba lini msinkhu, mphanvu ayai luso lomwe munthu angakhale nalo. Ciratizo pa nkhaniyi ni Davide. Pomwe iye akhali tswaka adalimbana na Goliyati. Mwakusiyana na cinzonzomtalico, Davide akhali m’fupi, wakusaya mphanvu ndipo akhalibe kukonzekera kumenya nkhondo. Iye akhalibe ne mphanga. Napo bzikhali tenepo, Davide adakhwimika ndipo alibe kucita mantha kuyenda kukamenyana na cinzonzomtali cakubzikuza cire.
12 Thangwe ranyi Davide akhali wakukhwimika? Thangwe ndakuti iye akhatsimikizira kuti Yahova akhali ku mbali yace. Davide akhandokumbukira lini bza kusiyana kwa msinkhu wace na wa Goliyati. M’mbuto mwace, Davide akhawona kuti Yahova ni mkulu kwene-kwene kuposa Goliyati. Kodi tinkupfunza ciyani na cakucitikaci? Tinkupfunza kuti ifepano tingakhale wakukhwimika tikatsimikiza kuti Yahova ali ku mbali yathu, nakuti anyakutitsutsa wathu ni cinthu lini pamaso pa Mulungu Wamphanvu-zense. (2 Nkhani 20:15; Psalymo 16:8) Kodi tingacite tani kuti tikulise khalidweri tikanati tagumana na cizunzo?—Werengani 1 Samuweri 17:37, 45-47. *
13. Kodi tingakulise tani kukhwimika kwathu? Fotokozani.
13 Cinthu cibodzi comwe cingatithandize kukhala wakukhwimika nsiku zino, ni kupalizira bzipsa bzabwino bza Umambo bwa Mulungu. Thangwe ranyi? Thangwe ndakuti kupalizira kumbatithandiza kukhulupira Yahova na kuleka kugopa wathu. (Mimwani 29:25) Ninga momwe thupi lathu limbakhalira lamphanvu tikambacita masenzeka yakulimbisa thupi, kukhwimika kwathu kumbalimbambo tikambapalizira nyumba na nyumba, kucita upalizi bwa padeca, bwakusaya kulinganizidwa na mbuto za malonda. Tenepo, tikakulisa kukhwimika kwathu mwa kupalizira nsiku zino, tin’dzakhala wakukonzeka kupitiriza kupalizira napo maboma yacidzaletsa basa lathu lakupalizira.—1 Watesalonika 2:1, 2.
Nancy Yuen adalamba kusiya basa lakupalizira bzipsa bzabwino (Onani ndime 14)
14-15. Kodi tingapfunze ciyani na ciratizo ca mpfumakazi Nancy na Valentina?
14 Tingapfunze bzizinji na ciratizo ca mpfumakazi ziwiri zakukhulupirika zomwe zidalatiza kukhwimika. Mpfumakazi yakuyamba ni Nancy Yuen. * Napo mpfumakaziyi ikhana metro ibodzi na pakati, ikhabva lini mantha mwakamfulumize. Pomwe idauzidwa kuti ileke kupalizira bzipsa bzabwino, mpfumakaziyi idalamba ndipo idaikhidwa m’kawoko kwa magole yakupitirira 20 ku dziko la China. Ndipo nduna zomwe zikhamubvunza bza nkhaniyo zidalewa kuti mpfumakaziyo “ikhana mtimbo kuposa wanthu wense” wa ku China.
Valentina Garnovskaya akhakhulupira kuti Yahova akhanaye (Onani ndime 15)
15 Mpfumakazi yaciwiri ni Valentina Garnovskaya, yomwe idakhala m’kawoko ku União Soviética maulendo matatu, ndipo kuphatanidza magole yomwe idakhala m’kawokomo yadakwana 21. * Thangwe ranyi mpfumakaziyi idaikhidwa m’kawoko? Thangwe ndakuti ikhadatsimikiza kupitiriza kupalizira bzipsa bzabwino, tenepo omwe akhaibvunza adafika pakuwona mpfumakaziyi ninga “munthu waciwembo.” Kodi n’ciyani comwe cidathandiza mpfumakazi ziwirizi kukhala zakukhwimika? Izo zikhadatsimikiza na mtima wense kuti Yahova akhali kumbali yawo.
16. Kodi tingacite ciyani kuti tikhale wakukhwimika?
16 Ninga momwe tawonera, kuti tikhale wakukhwimika tin’funika lini kuthemba mphanvu ayai luso lathu. Mbuto mwace, tin’funika kukhulupira kuti Yahova ali ku mbali yathu ndipo iye ankutimenyera nkhondo. (Bzakutonga 1:29, 30; Zakariya 4:6) Bzimwebzi bzingaticitise kukhala wakukhwimika.
BZOMWE MUNGACITE WANTHU AKAMBAKUWENGANI
17-18. Mwakubverana na cinembo ca Juwau 15:18-21, kodi n’ciyani comwe Jezu ankuticenjeza? Fotokozani.
17 Tensenefe timbafuna kulemekezedwa, koma tin’funika lini kumbakumbuka kuti ndife wakusaya kufunika penu winango ambatifuna lini. Jezu adati: ‘Ndimwe wakukondwa wanthu akambakuwengani, kukusankhulani, kukutukwanani na kunyoza dzina lanu thangwe ra Mwana wa Munthu.’ (Luka 6:22) Kodi Jezu akhafuna kulewa ciyani na mafalaya?
18 Jezu akhalewa lini kuti Akristau angadakomedwa thangwe ra kuwengedwa. Koma iye akhaticenjeza bzinthu bzomwe bzingadaticitikira. Ifepano timbacita lini mbali ya dziko. Koma timbaphatisa basa mapfunziso ya Jezu pa moyo wathu ndipo timbapalizira bzipsa bzomwe iye adapalizirambo. Ndipopa dziko limbatiwenga. Koma ifepano timbafuna kucita bzinthu bzomwe bzimbatumbizisa Yahova. Tenepo, ifepano tiribe nabzo basa wanthu akambatiwenga thangwe ra kufuna Yahova.—Werengani Juwau 15:18-21. *
19. Kodi tingatewezere tani ciratizo ca apostolo?
19 Lekani kubvuma kuti mafala yali-yense yomwe wanthu ambalewa ayai bzomwe iwo ambacita, bzikucitiseni manyazi thangwe ra kukhala Mboni ya Yahova. (Mikeya 4:5) Penu imwepo nthawe zinango mumbabva mantha na bzomwe wanthu winango ambacita, kukumbukira bziratizo bza apostolo kungakuthandizeni. Pomwe Jezu adaphedwa, iwo adawona ciwengo comwe atsogoleri wa cipembedzo cacijuda adawacitira. (Mabasa 5:17, 18, 27, 28) Napo bzikhali tenepo, apostolowo alibe kulekeza kumbayenda ku templo ndipo iwo adalatiza padeca kuti akhali anyakupfunza wa Jezu thangwe akhapalizira. (Mabasa 5:42) Iwo alibe kubvuma kuti mantha yawatazise kupalizira. Tenepo, ifepanombo tingakunde mantha mwa kumbabzidziwikisa kuti ndife Mboni za Yahova, ku basa, ku xikola na komwe timbakhala.—Mabasa 4:29; Waroma 1:16.
20. Thangwe ranyi apostolo akhakomedwa napo akhawengedwa?
20 Thangwe ranyi apostolo akhakomedwa? Iwo akhadziwa thangwe race akhawengedwa, ndipo akhawona kuti ni cinthu cakufunika kwene-kwene kuwengedwa thangwe ra kucita kufuna kwa Yahova. (Luka 6:23; Mabasa 5:41) Patsogolo pace mpostolo Pedru adanemba kuti: ‘Napo mucibonera thangwe ra cirungamo, ndimwe wakukondwa basi.’ (1 Pedru 2:19-21; 3:14) Tenepo, tikazindikira kuti tikuwengedwa thangwe ra kucita bzinthu bzabwino, tin’funika lini kusiya kutumikira Yahova thangwe rakuti wanthu ankutiwenga.
PHINDU LAKUKONZEKERA
21-22. (a) Kodi mun’funika kucita ciyani kuti mukhale wakukonzeka mukanati mwazunzidwa? (b) Kodi tin’dzapfunza ciyani mu nkhani yakutewera?
21 Ifepano tikudziwa lini kuti ni lini tin’dzayamba kuzunzidwa ayai pomwe maboma yan’dzaletsa basa lathu lakupazira. Koma comwe tikudziwa n’cakuti tin’funika kukonzekera kuyambira lero kuti tilimbise uxamwali bwathu na Yahova mwakukhala wakukhwimika na kudziwa momwe tingakhalire na wanthu omwe ambatiwenga. Lekani kuyebwa kuti kukonzekera komwe tin’cita kuyambira tsapano, kun’dzatithandiza kupitiriza kutumikira Yahova.
22 Tsono tingacite tani penu basa lathu laletsewa? Mu nkhani yakutewera, tin’dzawona malango ya m’Bibliya yomwe yan’dzatithandiza kupitiriza kutumikira Yahova, napo basa lathu likaletsedwa.
NYIMBO 118 ‘Tinkutenda Cakulombelera’
^ ndi. 5 Ifepano timbafuna lini kuzunzidwa. Koma mwakusaya kucedwa ayai kutsogolo, tin’dzagumana na mazunzo yomwe tin’dzafunikira kupirira. Tenepo, nkhani ino in’tithandiza kukhala wakukhwimika na wakukonzeka kulimbana na mazunzo.
^ ndi. 4 Wahebereu 13:5 Moyo wanu ukhale wakusaya kufunisisa kobiri, koma mumbakomedwe na bzomwe munabzo kale pa nthaweyo. Pakuti Mulungu adati: “Ndin’dzakusiyani lini napang’onopo ne kukuthawani.” 6 Tenepo tin’funika kukhala wakulimba mtima ticilewa kuti: “Yahova ndiye mthandizi wangu, cipo ndicidzacita mantha. Munthu angandicitenyi?”
^ ndi. 6 Psalymo 94:17 Bzingadakhala kuti Yahova ni mthandizi lini wangu, inepano mu nthawe yakucepa ndingadafa. 18 Pomwe ndidalewa kuti: “Nzayo yangu inkupsedemuka,” lufoyi lanu, Imwe Yahova, lidandithandiza. 19 Pomwe makumbukidwe yakundiboneresa yadadzala mu mtima mwangu, mafala yanu yakunditsangalaza yadakondwesa moyo wangu.
^ ndi. 7 Onani Nsanza ya Mulindiri ya 1 Maio 1966, matsamba 275-286, Cipwitikizi.
^ ndi. 12 1 Samuweri 17:37 Ndipo Davide adathumizira kuti: “Yahova omwe adandipulumusa m’kamwa mwa mphondolo na mwa cimbalangondo, an’dzandipulumusambo m’manja mwa Mfiristiyu.” Tenepo Sauli adati kwa Davide: “Ndoko, ndipo Yahova akhale nawe.” 45 Pakutawira Davide adati kwa Mfilistiyo: Iwepo ukubwera kuna ine na mphanga pabodzi na dipa. Tsono inepano ndinkubwera kuna iwepo m’dzina la Yahova wa anyankhondo, Mulungu wa acikunda wa Jirayeri omwe iwepo wanyoza.
^ ndi. 14 Onani Nsanza ya Mulindiri ya 1 Março 1980, matsamba 4-7, Cipwitikizi. Onanimbo vidiyo yakuti Todos saberão quem é Jeová pa programa ya JW Broadcasting®. Pitani pomwe padanemba kuti ENTREVISTAS E CASOS REAIS.
^ ndi. 15 Onani Buku Lapachaka la Mboni za Yehova la 2008, matsamba 191-192, Chichewa.
^ ndi. 18 Juwau 15:18 Penu dziko limbakuwengani, imwepo mun’dziwa kuti lidayamba kuwenga ine linati kuwenga imwepo. 19 Bzingadakhala kuti mumbacita mbali ya dziko, iro lingadakufunani. Tsono pakuti mumbacita lini mbali ya dziko, thangwe ine ndidakusankhulani m’dzikoli, ndipopa dzikoli limbakuwengani. 20 Kumbukirani mafala yomwe ndidakuuzani kuti: Kapolo si mkulu kuposa mbuya wace. Penu adazunza ine, an’dzazunzambo imwepo; penu adabvera mafala yangu, an’dzabverambo mafala yanu. 21 Koma iwo an’dzakucitirani bzinthu bzensebzi thangwe ra dzina langu, pakuti iwo ambamudziwa lini Omwe adandituma.
