1. Ӕфхуӕрд ке ӕййафдзиан, уомӕ нӕхе цӕмӕн гъӕуама цӕттӕ кӕнӕн?

Ӕ МӔЛӔТИ размӕ, еци изӕр нӕ Хецау Йесо Киристе балӕдӕрун кодта, ӕ фӕдбӕлдзӕуӕг исун ке фӕндӕуа, уонӕй адӕн се ’сӕфт ке уиндзӕнцӕ (Иоан. 17:14). Ӕма абони дӕр Йегови еузӕрдон лӕггадгӕнгутӕ ӕфхуӕрд ӕййафунцӕ, рӕстдзийнади нихмӕ ка цӕуй, уонӕй (2 Тим. 3:12). Аци дуйней кӕрон куд хӕстӕгдӕр кӕна, уотӕ не знӕгтӕ никки карздӕр кӕндзӕнцӕ (Матф. 24:9).

2, 3. а) Тӕрсун тӕссаг цӕмӕн ӕй? б) Аци статьяй цӕмӕ ӕркӕсдзиан?

² Цума нӕ бон ци ӕй кӕнун, цӕмӕй федӕни фӕлварӕнтӕмӕ цӕттӕ уӕн? Раст н’ адтайдӕ, лӕгъузӕй нӕбӕл ци ’рцӕудзӕй, уобӕл сагъӕс кӕнун. Уӕхӕн хабӕрттӕ нӕ цӕститӕбӕл ку уайун кӕнӕн, уӕд тӕрсгӕ дӕр ӕма тухсгӕ дӕр фулдӕр кӕндзиан. Ӕма цалинмӕ еци фӕлварӕнтӕ ӕрхъӕртонцӕ, уӕдмӕти гӕнӕн ес, ӕма Йеговӕй дӕр раидард уӕн (Ӕмб. 12:25; 17:22). Сайтан дӕр уобӕл архайуй, цӕмӕй тӕрсун райдайӕн (1 Пет. 5:8, 9). Мадта нӕ абони ци кӕнун гъӕуй, цӕмӕй фӕлварӕнтӕмӕ цӕттӕ уӕн?

³ Аци статьяй базондзиан, нӕ бон куд ӕй Йеговӕмӕ хӕстӕгдӕр кӕнун ӕма уобӕл абони архайун цӕмӕн гъӕуй, уой. Удта ма радзубанди кӕндзиан, нӕ бон ци ӕй кӕнун, цӕмӕй никки нифсхастдӕр исуӕн. Фӕстагмӕ ба базондзиан, адӕн ни се ’сӕфт ке уинунцӕ, уомӕ нин цӕхуӕн цӕстӕй кӕсгӕ ’й, уой.

4. Дзиуиттӕгтӕмӕ 13:5, 6 куд финст ӕй, уомӕ гӕсгӕ федарӕй цӕбӕл гъӕуама ӕууӕндӕн ӕма цӕмӕн?

⁴ Федарӕй ӕууӕндӕ, Йеговӕ дӕ берӕ ке уарзуй ӕма дӕ ке некӕд ниууадздзӕй, уобӕл. (Бакӕсӕ Дзиуиттӕгтӕмӕ 13:5, 6.)  Кӕддӕр «Гъӕуайгӕнӕн мӕсуги» финст адтӕй: «Хуцауи хуарз ка зонуй, еци адӕймагӕн ӕнцондӕр уодзӕй фӕлварӕнти рӕстӕг Хуцаубӕл ӕ зӕрдӕ дарун». Ӕма е ӕцӕгӕйдӕр уотӕ ’й! Цӕмӕй фӕлварӕнти федар фӕллӕууӕн, уой туххӕй гъӕуама Йегови уарзӕн, не ’гас зӕрдӕ ибӕл дарӕн ӕма нӕ ке уарзуй, уобӕл макӕд дузӕрдуг кӕнӕн (Матф. 22:36–38; Иак. 5:11).

5. Йегови уарзт балӕдӕрунмӕ дин ци банхус кӕндзӕй?

⁵ Алли бон дӕр Библи кӕсӕ ӕма дӕ нисан уӕд Йеговӕмӕ хӕстӕгдӕр кӕнун (Иак. 4:8). Кӕсгӕ-кӕсгӕй дӕ гъос дарӕ, Йеговӕ цӕхуӕн менеугутӕ ӕвдиста, уомӕ. Дӕу куд хъӕбӕр уарзуй, е ӕ дзурдтӕй ӕма ӕ гъуддӕгтӕй куд зиннуй, уой балӕдӕрунбӕл байархайӕ (Рац. 34:6). Кӕмӕндӕрти зин баууӕндӕн фӕууй, Хуцау сӕ ке уарзуй, уобӕл, уомӕн ӕма уарзтӕй цох адтӕнцӕ. Кӕд дӕуӕй дӕр уотӕ зӕгъӕн ес, уӕд расагъӕс кӕнӕ, Йеговӕ фӕлмӕнзӕрдӕ ӕма хӕларзӕрдӕ ке ӕй, уой дин цӕхуӕн гъуддӕгтӕй бавдиста, уобӕл, ӕма еци гъуддӕгтӕ гӕгъӕдибӕл ниффинсӕ (Пс. 78:38, 39; Ром. 8:32). Дӕхе цардмӕ ку ракӕсай ӕма Библий ци бакастӕ, уобӕл ку сагъӕс кӕнай, уӕд, ӕвӕдзи, ӕргъуди кӕндзӕнӕ, Йеговӕ дин цӕйбӕрцӕ хуарздзийнӕдтӕ искодта, уой. Ӕма еци хуарздзийнӕдтӕн куд фулдӕр аргъ кӕнай, уотӕ Йеговӕмӕ хӕстӕгӕй-хӕстӕгдӕр кӕндзӕнӕ (Пс. 116:1, 2).

6. Псалом 94:17–19 куд финст ӕй, уомӕ гӕсгӕ нин зӕрдиаг кувд куд банхус кӕндзӕй?

⁶ Ӕдзох ковӕ. Дӕ цӕститӕбӕл рауайун кӕнӕ: фидӕ ӕ минкъий биццеуи ӕ гъӕбесмӕ исиста, ӕма ин биццеу дзоруй, еци бон ибӕл хуарзӕй дӕр ӕма лӕгъузӕй дӕр ци ’рцудӕй, уони. Зонуй ӕй, ӕ фидӕ ’й ке балӕдӕрдзӕй. Ду дӕр Йеговӕмӕ алли бон дӕр зӕрдибунӕй ку ковай, уӕд имӕ гъе уотӕ хӕстӕг уодзӕнӕ. (Бакӕсӕ Псалом 94:17–19.) «Дӕ цӕстисуг калгӕй» дӕр имӕ ковӕ ӕма ин дзорӕ, цидӕриддӕр дӕ тухсун кӕнуй, уой (Йер. гъ. 2:19). Уӕд ӕй дӕхуӕдӕг балӕдӕрдзӕнцӕ, «Хуцауи фарнӕ, зунд кӕбӕл нӕ хъӕртуй, еци фарнӕ» ци ӕй, уой (Фил. 4:6, 7). Йеговӕмӕ куд фулдӕр ковай, уотӕ ’й хъӕбӕрдӕр лӕдӕрдзӕнӕ, хӕстӕгдӕр имӕ ке кӕнис, уой (Ром. 8:38, 39).

7. Хуцау ӕ Паддзахади туххӕй зӕрдӕ цӕмӕй байвардта, уобӕл федарӕй ӕууӕндун нӕ бон цӕмӕн ӕй?

⁷ Хуцауи Паддзахади арфӕдзийнӕдтӕ ке ’рцӕудзӕнцӕ, уобӕл ма дузӕрдуг кӕнӕ (Ним. 23:19). Хуцауи зӕрдӕвӕрдтӕ ке исӕнхӕст уодзӕнцӕ, уобӕл кӕронмӕ ку не ’ууӕндай, уӕд дӕ Сайтан ӕма ӕ дӕлбарӕ ка ӕй, етӕ ӕнцонтӕй фӕттӕрсун кӕндзӕнцӕ (Ӕмб. 24:10; Дзиуит. 2:15). Мадта нур дӕ бон ци ӕй кӕнун, цӕмӕй Хуцауи зӕрдӕвӕрдтӕбӕл федарӕй ӕууӕндай. Рӕстӕг рахецӕн кӕнӕ, Хуцауи Паддзахадӕ цӕхуӕн арфӕдзийнӕдтӕ ӕрхӕсдзӕй ӕма сӕбӕл дӕ бон федарӕй ӕууӕндун цӕмӕн ӕй, уой рартасунмӕ. Цума дин е куд банхус кӕндзӕй? Еу ӕнсувӕр, Стэнли Джонз, ӕ дини туххӕй авд анзи ахӕстдони фӕббадтӕй *. Еузӕрдонӕй байзайунмӕ ин ци банхус кодта? Стэнли зӕгъуй: «Ме ’ууӕндундзийнадӕ федар  адтӕй, уомӕн ӕма ’й зудтон, Хуцауи Паддзахадӕ ци ӕй ӕма ци искӕндзӕй, уой, ӕма уобӕл некӕд дузӕрдуг кодтон. Уомӕ гӕсгӕ мӕ неке бон адтӕй Йеговӕй раидард кӕнун». Ду дӕр Йегови зӕрдӕвӕрдтӕбӕл федарӕй ку ’ууӕндай, уӕд имӕ никки хӕстӕгдӕр исуодзӕнӕ ӕма нецӕмӕй тӕрсдзӕнӕ (Ӕмб. 3:25, 26).

8. Абони ӕмбурдтӕмӕ куд цӕуӕн, е цӕбӕл дзорӕг ӕй? Ба ’й лӕдӕрун кӕнӕ.

⁸ Ӕмбурдтӕмӕ алкӕддӕр цо. Не ’мбурдти фӕрци Йеговӕмӕ хӕстӕгдӕр кӕнӕн. Абони ӕмбурдтӕмӕ куд цӕуӕн, уомӕй кӕнгӕ ’й, федӕни фӕлварӕнтӕмӕ цӕттӕ разиндзиан ӕви нӕ, е (Дзиуит. 10:24, 25). Цӕмӕн ес уотӕ зӕгъӕн? Ӕмбурдтӕ минкъий нецӕй туххӕй дӕр ку цох кӕнӕн, уӕд федӕни ба куд уодзиан, тӕссаг уавӕрти дӕр нӕ нӕ хуӕртӕ ӕма ӕнсувӕрти хӕццӕ ӕмбурд кӕнун ку гъӕуа, уӕд? Фал ӕмбурдтӕ ку нӕ цох кӕнӕн, уӕд федар фӕллӕудзиан, не знӕгтӕ нӕ еумӕ ӕмбурд кӕнун ку нӕ уадзонцӕ, уӕддӕр. Нӕ фембӕлдтӕн аргъ кӕнунбӕл гъӕуама абони исахур уӕн, ӕма гъе уӕд фиццагидӕр Хуцаумӕ игъосдзиан, адӕнмӕ нӕ, фал. Ӕма нӕ нӕдӕр не ’знӕгтӕ бауорамдзӕнцӕ, нӕдӕр хецауадӕ (Гъуд. 5:29).

9. Библий стихтӕ нигъгъуди кӕнунбӕл ку архайӕн, уӕд нин е фӕлварӕнти рӕстӕг куд банхус кӕндзӕй?

⁹ Дӕ зӕрдӕмӕ хъӕбӕрдӕр ка цӕуй, еци стихтӕ нигъгъуди кӕнӕ (Матф. 13:52). Ӕнӕнхӕст ке ан, уомӕ гӕсгӕ алци нӕ нигъгъуди кӕнӕн, фал сугъдӕг хъаури фӕрци Йегови бон ӕй уотӕ бакӕнун, цӕмӕй багъӕуаги еци стихтӕ ӕргъуди кӕнӕн (Иоан. 14:26). Еу ӕнсувӕр Искӕсӕн Германий ахӕстдони бадтӕй, еугӕйттӕй кӕми фӕббадунцӕ, уӕхӕн камери, ӕма загъта: «Хуарз ӕма уӕдмӕти Библийӕй цалдӕр сӕдӕ стихи нигъгъуди кодтон! Кӕд еунӕгӕй бадтӕн, уӕддӕр мӕ бон адтӕй Библийӕй аллихузи темитӕбӕл сагъӕс кӕнун». Еци ӕнсувӕр Библий стихтӕбӕл ке сагъӕс кодта, уой фӕрци Йеговӕбӕл еузӕрдонӕй байзадӕй.

10. Зартӕ ахур кӕнун хуарз цӕмӕн ӕй?

¹⁰ Йеговӕн кади зартӕ ахур кӕнӕ ӕма сӕ зарӕ. Павел ӕма Силӕ Филиппти ахӕстдони ку бадтӕнцӕ, уӕд ке нигъгъуди кодтонцӕ, еци зартӕ зардтонцӕ (Гъуд. 16:25). Советон Цӕдеси рӕстӕг ба не ’нсувӕртӕ сӕхе куд федар кодтонцӕ, Сибирмӕ сӕ ку ’рвистонцӕ, уӕд? Хуӕрӕ Марийӕ Федунь зӕгъуй: «Зарти киунугӕй цидӕриддӕр гъуди кодтан, гъе уони зардтан». Еци зарти фӕрци, дан, еугурӕйдӕр бафедар ӕнцӕ ӕма, Йеговӕ сӕ хӕццӕ ке ӕй, уой лӕдӕрдтӕнцӕ. Ӕвӕдзи, дӕуӕн дӕр ес, дӕ зӕрдӕмӕ хъӕбӕрдӕр ка цӕуй, уӕхӕн зартӕ ӕма сӕ дӕ бон ӕй ахур кӕнун. (Кӕсӕ рамкӕ « Раттӕ мин нифсхастдзийнадӕ».)

11, 12. а) 1 Самуили 17:37, 45–47 куд финст ӕй, уомӕ гӕсгӕ Давид нифсгун цӕй фӕрци адтӕй? б) Давиди хабарӕй цӕбӕл ахур кӕнӕн?

¹¹ Цӕмӕй фӕлварӕнти бафӕразӕн, уой туххӕй гъӕуама уӕн нифсгун. Фал дин еци менеуӕг ке нӕ фагӕ кӕнуй, уой ку балӕдӕрай, уӕд дӕ бон ци ӕй кӕнун? Иронх ди ма уӕд, нифсгун уодзӕнӕ ӕви нӕ, е цӕййасӕ дӕ кенӕ дӕмӕ цӕйбӕрцӕ хъаурӕ ес, уомӕй кӕнгӕ нӕй. Ӕргъуди кӕнӕн, Давид ӕма Голиафи хабар. Голиафи рази Давид минкъий ӕма ӕнӕхъаурӕ зиндтӕй, удта тохӕндзаумӕуттӕй дӕр ӕ хӕццӕ неци адтӕй, хъӕма дӕр ма имӕ н’ адтӕй. Фал Давид хъӕбӕр нифсгунӕй рацудӕй еци ӕнахъӕл уӕйуги нихмӕ.

¹² Цума Давид уӕхӕн нифсгун цӕй фӕрци адтӕй? Е федарӕй ӕууӕндтӕй, Йеговӕ ӕ хӕццӕ ке ӕй, уобӕл. (Бакӕсӕ 1 Самуили 17:37, 45–47.) Давид нӕ кастӕй, Голиаф ӕ рази цӕййасӕ адтӕй, уомӕ, фал еци уӕйуг Йегови рази цӕййасӕ адтӕй, уомӕ кастӕй. Цума Давиди хабарӕй цӕбӕл ахур кӕнӕн? Йеговӕ нӕ хӕццӕ ке ӕй, уобӕл федарӕй ку ’ууӕндӕн, удта нӕ нихмӕ ка цӕуй, етӕ Алцигъон Хуцауи рази ци минкъий ӕнцӕ, уой ку нӕ иронх кӕнӕн, уӕд нецӕмӕй тӕрсдзиан (2 Анз. 20:15; Пс. 16:8). Мадта нӕ бон ци ӕй кӕнун, цӕмӕй нифсгундӕр кӕнӕн, цалинмӕ нӕ нихмӕ цӕун нӕма райдӕдтонцӕ, уӕдмӕ?

13. Цӕмӕй нифсгундӕр кӕнӕн, уой туххӕй нӕ ци кӕнун гъӕуй? Ба ’й лӕдӕрун кӕнӕ.

¹³ Абони Хуцауи Паддзахади хабар игъосун кӕнгӕй нифсгундӕр кӕнӕн. Цӕмӕн ес уотӕ зӕгъӕн? Уомӕн ӕма игъосун кӕнгӕй нӕхе ахур кӕнӕн нӕ зӕрдӕ Йеговӕбӕл дарун ӕма адӕнӕй ма тӕрсун (Ӕмб. 29:25). Змӕлунӕй адӕймаги иуӕнгтӕ куд федардӕр кӕнунцӕ, уотӕ мах дӕр нифсгундӕр фӕккӕнӕн, хӕдзарӕй-хӕдзарӕмӕ, кустуӕтти, фадуат ку фӕззиннуй, уӕд, удта берӕ адӕн кӕми фӕууй, уоми ку фегъосун кӕнӕн, уӕд. Игъосун кӕнуни гъуддаги абони ку архайӕн, уӕд зин уавӕрти игъосун кӕнунмӕ дӕр цӕттӕ уодзиан, зӕгъӕн, хецауадӕ нӕ нихмӕ ку цӕуонцӕ, уӕд (1 Фес. 2:1, 2).

14, 15. Нанси Юэн ӕма Валентинӕ Гарновская нин ци цӕветтон ниууагътонцӕ, уомӕй цӕбӕл ахур кӕнӕн?

¹⁴ Ӕркӕсӕн, федар ӕууӕндундзийнадӕ кӕмӕн адтӕй, дууӕ уӕхӕн хуӕрей хабармӕ. Нанси Юэн цардӕй коммунистон Китаййи *. Кӕд метр ӕма ӕрдӕгӕй бӕрзонддӕр н’ адтӕй, уӕддӕр хъӕбӕр нифсгун хуӕрӕ адтӕй.  Хецауадӕ ин игъосун кӕнуни барӕ нӕ лӕвардтонцӕ, фал уӕддӕр ӕ къохтӕ нӕ уагъта. Уой туххӕй ахӕстдони ӕдеугурӕй фӕббадтӕй еу 20 анзей бӕрцӕ. Нансий фӕрсгӕ ка кодта, етӕ дзурдтонцӕ, ай хузӕн ӕнӕбасӕтгӕ адӕймаги, дан, некӕд фӕууидтан.

¹⁵ Валентинӕ Гарновская Советон Цӕдеси рӕстӕг ахӕстдони ӕртӕ хатти бадтӕй. Ӕдеугурӕй фӕббадтӕй 21 анзи *. Цума имӕ ци фау ӕрхастонцӕ? Тӕрхон ин ка рахаста, етӕ ’й банимадтонцӕ «уӕлдай тӕссаг фудгӕнӕгбӕл», уомӕн ӕма син федарӕй загъта, игъосун кӕнуни гъуддаг ке некӕд ниууадздзӕй, уой. Цума аци дууӕ хуӕри уӕхӕн федар цӕмӕн разиндтӕнцӕ? Уомӕн ӕма ’й федарӕй зудтонцӕ, Йеговӕ сӕ хӕццӕ ке ӕй.

16. Ӕцӕг нифсхастдзийнадӕ нӕмӕ кӕд уодзӕй?

¹⁶ Куд ӕй фӕууидтан, уомӕ гӕсгӕ, цӕмӕй нифсгун уӕн, уой туххӕй гъӕуама нӕ зӕрдӕ нӕхебӕл ма дарӕн, фал гъӕуама федарӕй ӕууӕндӕн, Йеговӕ нӕ хӕццӕ ке ӕй ӕма нӕ бӕсти ке тохдзӕй, уобӕл (Дук. з. 1:29, 30; Зах. 4:6). Ӕцӕг нифсхастдзийнадӕ нӕмӕ ӕрмӕстдӕр гъе уӕд уодзӕй.

17, 18. Иоанни 15:18–21 куд финст ӕй, уомӕ гӕсгӕ нин Киристе рагацау ци загъта? Ба ’й лӕдӕрун кӕнӕ.

¹⁷ Алке дӕр ни фӕндуй, цӕмӕй ӕй нимайонцӕ. Фал нӕ аргъ, иннети цӕсти нин цӕхуӕн кадӕ ес, уомӕй кӕнгӕ нӕй. Йесо загъта: «Амондгун уодзиайтӕ, адӕн уи се ’сӕфт ку уинонцӕ, хъоди уӕбӕл ку бакӕнонцӕ, федистӕ уин ку кӕнонцӕ ӕма уӕ фудгӕнгутӕ ку хононцӕ Адӕймаги Фурти туххӕй» (Лук. 6:22). Цума уомӕй ци зӕгъунмӕ гъавта?

¹⁸ Йесо уой кой нӕ кодта, ӕма ни адӕн се ’сӕфт ке уинунцӕ, уобӕл гъӕуама цийнӕ кӕнӕн. Е нин ӕй рагацау загъта, ци нӕмӕ ӕнгъӕлмӕ кӕсуй, уой. Мах аци дуйнейӕй нӕ ан, ӕма Киристе куд ахур кодта, уотӕ цӕрӕн ӕма е ци хабар игъосун кодта, уой игъосун кӕнӕн. Адӕн ба ни уой туххӕй се ’сӕфт уинунцӕ. (Бакӕсӕ Иоанни 15:18–21.) Мах фӕндуй Йегови зӕрдӕ рохс кӕнун. Ӕма Хуцауи ке уарзӕн, е адӕни зӕрдӕмӕ ку нӕ цӕуа, уӕд нӕ уобӕл тухсун нӕ гъӕуй.

19. Апостолтӕ нин цӕхуӕн цӕветтон ниууагътонцӕ?

¹⁹ Адӕн цийфӕнди ма дзоронцӕ ӕма цийфӕнди ма кӕнонцӕ, уӕддӕр Йегови Ӕвдесӕн ке дӕ, уомӕй макӕд ӕфсӕрми кӕнӕ (Мих.  4:5). Цӕмӕй адӕнӕй мабал тӕрсӕн, уой туххӕй нӕ бон ӕй расагъӕс кӕнун, Киристей мӕлӕти фӕсте апостолтӕ Йерусалими куд архайдтонцӕ, уобӕл. Етӕ ’й зудтонцӕ, дзиуиттаг дини разамонгутӕ си се ’сӕфт ке уинунцӕ, уой (Гъуд. 5:17, 18, 27, 28). Фал уӕддӕр алли бон дӕр ковӕндонӕмӕ игъосун кӕнунмӕ цудӕнцӕ, ӕма Киристей фӕдбӕлдзӕугутӕ ке ’нцӕ, уой нӕ римахстонцӕ (Гъуд. 5:42). Етӕ нӕ фӕттарстӕнцӕ ӕма сӕ гъуддаг идарддӕр хастонцӕ. Мах дӕр Йегови Ӕвдесӕнтӕ ке ан, уой ӕргом ку дзорӕн, зӕгъӕн, скъолай, кусти кенӕ синхи медӕг, уӕд нӕ тарстӕй фӕд дӕр нӕбал байзайдзӕй (Гъуд. 4:29; Ром. 1:16).

20. Апостолтӕ цӕбӕл цийнӕ кодтонцӕ, кӕд си адӕн се ’сӕфт уидтонцӕ, уӕддӕр?

²⁰ Цума апостолтӕ цӕбӕл цийнӕ кодтонцӕ? Етӕ ’й зудтонцӕ, адӕн си се ’сӕфт цӕй туххӕй уинунцӕ, уой. Ӕма Йегови фӕндон ӕнхӕст кӕнгӕй ӕфхуӕрд ке ӕййафтонцӕ, уой сӕхецӕн кадӕбӕл нимадтонцӕ (Лук. 6:23; Гъуд. 5:41). Апостол Петур фӕстӕдӕр финста: «Фал уӕ кӕд рӕстдзийнади туххӕй гъезӕмарӕ кӕнун дӕр багъӕуа, уӕддӕр амондгун уодзиайтӕ» (1 Пет. 2:19–21; 3:14). Мах дӕр, раст ци ӕй, уой ке кӕнӕн, уой туххӕй ни адӕн се ’сӕфт уинунцӕ. Уой нӕ зӕрдӕбӕл ку дарӕн, уӕд адӕнӕй нӕ тӕрсдзиан.

21, 22. а) Федӕни нӕмӕ ци фӕлварӕнтӕ ӕнгъӕлмӕ кӕсуй, уонӕмӕ дӕхе куд цӕттӕ кӕндзӕнӕ? б) Иннӕ статьяй дзурд цӕбӕл цӕудзӕй?

²¹ Мах ӕй нӕ зонӕн, нӕ фӕдбӕл зелун кӕд райдайдзӕнцӕ кенӕ ба нин Йеговӕн лӕггадӕ кӕнуни барӕ ӕппундӕр кӕд нӕбал дӕтдзӕнцӕ, уой. Фал еци хабӕрттӕмӕ нӕхе рагацау цӕттӕ кӕнун ке гъӕуй, уой ба зонӕн. Гъӕуй нӕ Йеговӕмӕ хӕстӕгдӕр кӕнун, нифсгундӕр кӕнун, ӕма ни кӕд адӕн се ’сӕфт уинунцӕ, уӕддӕр нӕ цийнӕ ма исафун. Уотӕ ку архайӕн, уӕд цӕттӕ уодзиан, федӕни нӕмӕ ци фӕлварӕнтӕ ӕнгъӕлмӕ кӕсуй, уонӕмӕ.

²² Фал, зӕгъӕн, кӕми цӕрис, уоми нур дӕр уӕхӕн уавӕртӕ ес. Иннӕ статьяй дзурд цӕудзӕй, идарддӕр лӕггадӕ кӕнунмӕ нин Библийӕй цӕхуӕн уагӕвӕрдтӕ банхус кӕндзӕнцӕ, уобӕл.