1. Ngera uchul me ngkired el kutmeklid el kirel a odechelakl?

SEL kesus er a uchei er a kodellel a Rubak el Jesus, e ngmilsaod el kmo tirke el rokui el melilt el mo disaiplo er ngii a mo muketui. (Jn. 17:14) Me seikid el taem el mei, e tirke el blak a rengrir el Kristiano el Sioning er a Jehovah a luleldechelakl er tir tirke el chad lomtok er a mera el omengull. (2 Ti. 3:12) Me chelecha el lorael el olekedang a ulebongel er tia el mekngit el blekeradel, e kede dirrek el medengei el kmo a recherroued a mengal mo blak a rengrir lomtok er kid.​—Mt. 24:9.

2-3. (a) Ngera el tekoi a kired el mo medengei el kirel a dakt? (b) Ngera kede mo mesaod er tia el suobel?

² Ngkired el mekerang er chelechang me bo lsebeched el mo kltmokl el kirel a odechelakl? Ngdiak lebelkul a kmo ngmocha kired el di melatk a rokui el mekngit el sebechel mo duubech el mei er kid. E le bo deuaisei, e a klengar er kid a di mo mui er a dakt me a sebekreng. Tiang a mo uchul e kede mechei aika el mekngit el uldesued me ngchoitechetur a rengud er a uchei er a bo dechelebangel a odechelakl. (Osi. 12:25; 17:22) A dakt a ta er a mesisiich el dongu el lousbech er ngii ngika el ‘cherroued, el Diabelong,’ el melasem el omtok er kid. (1 Pe. 5:8, 9) Me ngera sebeched el meruul er chelechang me bo dekltmokl el kirel a odechelakl el merael mei?

³ Ngar tia el suobel e kede mo mesuub el kirel aike el tekoi el sebeched el remuul el lmuut lokesengii a deleuill er kid lobengkel a Jehovah, me sel uchul me ngklou a ultutelel el doruul er tiang er chelecha el taem. Kede dirrek el mo mesaod aike el tekoi el sebeched el remuul el lmuut el smisichii a blekeurreng er kid. E a ulebongel er ngii, e kede mo mesuub aike el sebeched el meruul er sel taem el rechad a mo ouketui er kid.

4. A doltirakl er a bades er a Hebru 13:5, 6, e ngkirel mo ulterekokl a rengud er a ngerang, e ngera uchul?

⁴ Bo lulterekokl a rengum el kmo a Jehovah a betik a rengul er kau, e dirrek el kmal diak bo lecheroid er kau. (Monguiu er a Hebru 13: 5, 6.) Betok el rak er a uchei, e a The Watchtower a milsaod el kmo: “Ngike el chad lungil medengelii a Dios a oumerang er ngii er a oumesingd el taem el bo lechelebangel a odechelakl.” E tiang a kmal klemerang! Ngkmal kirel mo cherrungel a bltkil a rengud me a klaumerang er kid er a Jehovah, e dirrek el mo ulterekokl a rengud el kmo ngbetik a rengul er kid er sel taem el bo demodechelakl.​—Mt. 22:36-38; Jak. 5:11.

5. Ngera sebechel ngosukau el mo melechesuar a bltkil a rengul a Jehovah el bedulkau?

⁵ Monguiu er a Biblia er a bek el sils me mluut el mo kmeed er a Jehovah. (Jak. 4:8) E sel monguiu, e bo mungil melatk aike el ungil blekerdelel a Jehovah. Molasem el mo mesa sel klungel a bltkil a rengul er sel taem el monguiu a tekingel. (Exo. 34:6) A rebebil a locha mo meringel er tir el mo oumerang el kmo a Dios a betik a rengul er tir, e le tir el dimlak a chad lochotii a bltikerreng el bedultir. Me a lsekum nguaisei a uldesuem, e mluches er a babier er a bek el sils aike el tekoi el Jehovah meruul el olecholt er a klechubechub me a blekokuii el bedulkau. (Psa. 78:38, 39; Rom 8:32) Me sel molatk aike el tekoi el duubech er a klengar er kau, e dirrek el molebedebek aike el tekoi el mchuiu er a Tekingel a Dios, e ngmo sebechem el lmatk a betok el tekoi el Jehovah a mla remuul el kirem. Me a cherengel a taem el bo moba omereng el saul el kirel aike el loruul a Jehovah, e ngmengal olekes er a deleuill er kau lobengkel.​—Psa. 116:1, 2.

6. A doltirakl er a Psalm 94:17-19, e ngmekera nglunguuch el mera el ngar a rengum e ngosukau?

⁶ Bo blechoel meluluuch. Ka molatk er a kekerei el buik el lomechull er ngii a demal. Ngika el buik a kmal melechesuar a ulekerreu el rullii me ngdiak lemedakt el mengedecheduch er a demal el kirel aike el ungil me a mekngit el tekoi el dilubech el mo er ngii er sel sils. Kau me ngdirrek el sebechem el mo melechesuar chouaitia el ungil deleuill a lsekum ke olekeed er kau er a Jehovah lokiu sel moluluuch el mera el ngar a rengum er a bek el sils. (Monguiu er a Psalm 94:17-19.) Me sel moluluuch el mora Jehovah, e “moitelii a rengum el ua ralm” e mouchais er ngika el betik a rengul el Demam er aike el rokui el dakt me a sebekreng er a rengum. (Kle. 2:19) Ngera mo duubech sel moruul uaisei? Ke mo medengelii a belkul a tekoi el losaod er ngii a Biblia el kmo, “a budech er a Dios, el diak el sebechel a chad el mo cherrungel el medengelii.” (Fil. 4:6, 7) A cherengel a taem el moluluuch el uaisei, e nglmuut lokesengii a deleuill er kau lobengkel a Jehovah.​—Rom 8:38, 39.

7. Ngera uchul me ngkirem el mo oumerang el kmo aike el telbilel a Dios el kirel a Rengedel a mo tmaut?

⁷ Bo lulterekokl a rengum el kmo a klengeltengat er a Rengedel a Dios a mo tmaut. (Ule. 23:19) A lsekum ngdiak msal oumerang el kmo a telbilel a Dios a mo tmaut, e ngkmal mo beot er a Satan me a rechedal el omekdakt er kau. (Osi. 24:10; Heb. 2:15) Me ngmekerang e sebechem el smisichii a klaumerang er kau er a Rengedel a Dios er chelechang? Mongoit a temem el mesuub el kirel a telbilel a Dios el kirel a Rengedel me aike el uchul me ngsebechel mo ulterekokl a rengum el kmo ngmo tmaut aika el telbiil. Ngmekera ika el tekoi e ngosukau? Ka molatk er a klaumerang er a Stanley Jones, el ngii a mlo kelebus el euid el rak el klaumerang er ngii a uchul. * Ngera ngilsuir el mo blak a  rengul loutekangel? Ngdmu el kmo: “A klaumerang er ngak a mle mesisiich e le ngak luluumerang er a Rengedel a Dios, me aike el tekoi el bo longetmokl, e dimlak a ta el bo lak kuumerang aika el tekoi. E dimlak a chad el sebechel rullak el mo cheroid er a Jehovah.” Me a lsekum e ngmesisiich a klaumerang er kau er a telbilel a Dios, e ke mo olekeed er kau er a Jehovah e diak becherei a dakt me bo luchul e bo lak mosiou er ngii.​—Osi. 3:25, 26.

8. Ngolechotel a ngerang a osenged el bedul aike el miting er kid? Mosaod.

⁸ Bora ike el bek el miting er a Rekristiano. A miting a ngosukid el olekeed er kid er a Jehovah. Me sel debo er a miting e ngolechotel a kmo ngsebeched el mo outekangel sel bo dechelebangel odechelakl er a ngar medad el klebesei. (Heb. 10:24, 25) Ngera uchul me kede melekoi el uaisei? E le lsekum kede mechei a mekekerei el tekoi me ngmo uchul e ngmo diak debo er a miting er chelechang, e ngmekera e mo sebeched loutekangel el mo teloi er a rekldemed er a klaumerang er sel taem el bocha le kdekudel a blekeradel? Engdi a lsekum kede tibir el mora bek el miting, e ngdiak debechititerir a rumtok er kid me leterebengid me bo lak deteloi er a rudam er kid. Me chelechang, e ngtaem el kired lomekeroul er a bltkil a rengud el mora ika el miting er kid. Ngmo diak lsebechel a ngii di el ultok, el mo lmuut er a ultok er a kabelment el sebechel torebengid me lak debong a lsekum ngmera el betik a rengud er aika el miting er kid. Kede kongei el oltirakl er a Dios er a bai doltirakl er a rechad.​—Rel. 5:29.

9. Ngera uchul me ngungil tekoi a lsekum kede sichedekl er a uldesued a bades me bo dekltmokl el kirel a odechelakl?

⁹ Msichedekl er a uldesuem aike el kot el soam el bades. (Mt. 13:52) Alta e ngdiak lecherrungel a uldesuem, engdi a Jehovah a sebechel lousbech er sel mesisiich el chedaol reng er ngii el rullau el mo melatk aika el bades. (Jn. 14:26) Ka molatk a tekingel a ta el odam el mlo kelebus er a East Germany e te ngiluu el osisebii er aike el ileakl el delmerab el di ngii el tang. Ngdilu el kmo: “Ngmera el klou el klengeltengat, e le sel taem e ak mla sichedekl er a uldesuek a betok el dart el bades! Me ngmle sebechek el kiei el longelt aike el sils loeak sel kulatk a betok el kakerous el tekoi el ngar a Biblia.” Ngii el bades a ngilsuir ngika el odam me ngmillemolem el kmeed er a Jehovah, e dirrek el mle blak a rengul loutekangel.

10. Ngera uchul me ngkired el sichedekl er a uldesued a chelitakl?

¹⁰ Msichedekl er a uldesuem e mongitakl aike el chelitakl loldanges er a Jehovah. Sel taem el Paulus me a Silas a mlo kelebus er a Filipi, e te milengitakl aike el ble lodengei el chelitakl er a odanges el mora Jehovah. (Rel. 16:25) Me ngdi osisiu, te milekera e mlo sebechir el di tir el melisiich er tir a rudam er kid el mla er sel mle Soviet Union el lengilititerir el mora Siberia? A odos er kid el Mariya Fedun a kmo:  “Aki milengitakl a rokui el chelitakl el ngar a blil a chelitekled el ki modengei.” Ngmesaod el kmo aika el chelitakl a millisiich er tir el rokui e dirrek el ngilsuterir el lmuut el mo kmeed er a Jehovah. Me kau, ngmo mesisiich a rengum sel mongitakl aike el kot el soam el chelitakl? Mada msichedekl er a uldesuem ngii el chelitakl er chelechang!​—Momes er a baks el “ Beskak a Blekengek.”

11-12. (a) A doltirakl er a 1 Samuel 17:37, 45-47, e ngera uchul me a David a uleba blekeu? (b) Ngera klou a ultutelel suobel el desuubii er a kerebil a David?

¹¹ Kede ousbech er a blekeurreng sel bo demodechelakl. Me a lsekum ke omdasu el kmo ngdiak a blekeurreng er kau, e ke mo mekerang? Lak mobes, a mera el blekeu a mo er ngii el diak lultuil er a meklungel a bedengem, me a klisichem, me a lechub a duch er kau. Ka molatk er a kekerei el buik el David er sera bo lechebengelii a Goliath. Sel domekesiu er ngika el mekoar el chad el mora David, e a David a kmal kekerei e mechitechut, e dirrek el dimlak a klekedellel er a mekemad. Ngdirrek el dimlak a saider er a David. Me nguaisei, engdi ngkmal uleba blekeu. Ngii el David a uleba klou el blekeurreng er sera lerurt el mo okoad er ngika el mekoar e kedidai a rengul el chad.

¹² Ngera uchul me a David a kmal mle bekeu a rengul? Ngkmal uluumerang el kmo a Jehovah a obengkel. (Monguiu er a 1 Samuel 17:37, 45-47.) A David a dimlak lomekesiu er a meklungel a bedengel a Goliath el mo er ngii. Ngbai ulemes er a Goliath el kmal kekerei sel lomekesiu er ngii el mora Jehovah. Me ngera kede suubii er tia el cheldecheduch? Kede mo oba blekeu a lsekum ngmo ulterekokl a rengud el kmo a Jehovah obengked, e dirrek a lsekum ngmo ulterekokl a rengud el kmo ngar a osengel a Dios el Olab a Bek el Klisiich e a rumtok er kid a kmal mekekerei. (2 Kr. 20:15; Psa. 16:8) Me ngokiu a ngera el rolel e ngsebeched el smisichii a blekeurreng er kid er chelechang, er uchei er a bo demodechelakl?

13. Ngoeak a ngera el rolel e kede melisiich er a blekeurreng er kid? Mosaod.

¹³ Ngsebeched el lmuut el smisichii a blekeurreng er kid er chelechang, lokiu sel domerk er a klumech el kirel a ungil chais er a Rengedel a Dios el mora rechad. E ngera uchul? E le sel domerk e ngmengal melisiich er a klaumerang er kid el mora Jehovah, e dirrek el rullid el mo diak demedakt er a rechad. (Osi. 29:25) A blekeurreng er kid a mengal mo mesisiich sel domerk er a klumech er a bek el obliil, me a basio er a buai, me a bek el techall me a dirrek el basio er a siobai, el di ua muscle er kid el mengal mo mesisiich sel de exercise. Me a lsekum kede mo oba blekeu lomerk er chelechang, e kede mo ungil kltmokl e melemolem lomerk el mo lmuut er a taem el kabelment er a beluu a mo merrob er a urered.​—1 Th. 2:1, 2.

14-15. Ngera el tekoi a sebeched el suub er a blekerdelel a Nancy Yuen me a Valentina Garnovskaya?

 ¹⁴ Ngsebeched el suub a betok er a kerebai er a reteru el kmal blak a rengrir el odos er kid el kirel a blekeurreng. A Nancy Yuen el di mle eim el fit a klemengetel, a kmal diak a dektel. * Ngdimlak lekengei el mo diak lomerk er a ungil chais el kirel a Rengedel a Dios. Me tiang a mlo uchul e ngmlo kelebus el kuk betok er a 20 el rak er a Communist China. A rebulis er tia el beluu a mesaod er ngika el odos el kmo “ngkot el mesisiich a uldesuel el redil” er a chelsel tia el beluu.

¹⁵ Ngdi osisiu el blekeradel a lulechotii a Valentina Garnovskaya. Ngikang a mlo kelebus er a beluu er a Russia, el edei el taem el ildisel a rak el lekelebus a mle bekord el 21 el rak. * E ngera uchul? Ngmle telbiil er a rengul el melemolem el omerk er a klumech el uchul me a rebulis er tia el beluu a milsaod er ngii el kmo “ngta er a kmal kdekudel el redil.” Ngera rirelleterir tirka el teru el blak a rengrir el redil el mo olecholt er a blekeurreng? Ngmle ulterekokl a rengrir el kmo a Jehovah a obengterir.

16. Ngoeak a ngera el rolel e kede mo oba mera el blekeu?

¹⁶ Me ngua bla desaod er a uchei, a lsoad el mekurulii a blekeurreng er kid, e ngkmal diak el kired el di ultuil er a di klisiched me a duch er kid. Ngbai kmal kired el oumerang el kmo a Jehovah a obengked e ngii ngike el oumekemad el kired. (Dut. 1:29, 30; Sek. 4:6) Tiaikid a rolel e kede mo oba mera el blekeu.

17-18. Ngera lomengelechel er a Jesus el mei er kid a lluches er a Johanes 15:18-21? Mosaod.

¹⁷ Ngmo ungil a rengud sel denguu a omengull er a rebebil, engdi ngkmal diak el kired el mo omdasu el kmo ngdiak a ultuteled el chad a lsekum a rebebil a ouketui er kid. A Jesus a dilu el kmo: “Ngdmeu a rengmiu sel louketui er kemiu, e loldik er kemiu, e loltuub er kemiu, e lolemall a chisiu el Ngelekel a chad a uchul!” (Lk. 6:22, NW) Ngera mle belkul a tekingel a Jesus?

¹⁸ A Jesus a dimlak lolekoi el kmo a Rekristiano a sorir a louketui er tir a rechad. Ngbai milengelechel er kid el kirel a tekoi el mo duubech el mei er kid. Kid a diak dechedal tia el beluulechad. Kede  kiei el oltirakl a osisecheklel a Jesus, e dirrek lomerk er a klumech el lulemerk er ngii. Tiaikid a uchul me a beluulechad a ouketui er kid. (Monguiu er a Johanes 15:18-21.) Me kid a soad loldeu er a rengul a Jehovah. Me a lsekum a rechad a mo ouketui er kid e le kid el betik a rengud er a Demad, e ngdiak el kirel mo mekngit a rengud.

19. Ngmekera e mo sebeched loukerebai er a rechapostol?

¹⁹ Lako bechei a ngii di el tekingir me a omerellir a rechad me lerellau el mo merur el ta er a Sioning er a Jehovah. (Mik. 4:5) Ngsebechel el mo diak demedakt er a rechad sel dolatk a blekerdelir a rechapostol el mla er a Jerusalem er a uriul er a lokodir a Jesus. Te mle ungil medengelii a klungel a kltui er a rengrir a remengeteklel a klechelid er a Judea el bedultir. (Rel. 5:17, 18, 27, 28) Me nguaisei, engdi ngmle bek el sils el lolemolem el mora templo, e dirrek el ulemerk er a klumech el mileketeklii el mora rechad el kmo te disaiplo er a Jesus. (Rel. 5:42) Ngdimlak lebecherei a dakt el mora rechad me lorrob er tir. Me kid me ngdirrek el sebeched el mo diak demedakt er a rechad lokiu sel dolemolem el omerk er a klumech lochotii el kmo kede ta er a Sioning er a Jehovah, sel dengar a urered me a skuul me a dirrek el beluad.​—Rel. 4:29; Rom 1:16.

20. Ngera uchul me a rechapostol a mle dmeu a rengrir alta e a rechad a uluuketui er tir?

²⁰ Ngera uchul me a rechapostol a mle dmeu a rengrir? Te mle ungil medengelii a uchul me te mluketui, e dirrek el ulemes er ngii el ua chetengakl e le tir el mirruul a soal a Jehovah. (Lk. 6:23; Rel. 5:41) A uriul e a apostol Petrus a milluches el kmo: “Ngdi lsekum e ko mo chuarm el kirel a llemalt, e ngdmeu a rengmiu.” (1 Pe. 2:19-21; 3:14, NW) Me sel dodengelii a uchul me kede muketui e le kid el meruul er a llemalt, e ngkmal diak debechei a kltui er a rechad me lerellid el mo medakt.

21-22. (a) Ke mla tibir el mo mekerang sel bo mchelebangel a odechelakl? (b) Ngera kede mo mesaod er a ongingil suobel?

²¹ Ngkmal diak dodengei el kmo ngoingerang e kede mo modechelakl me a lechub e a kabelment a mo merrob er a urered. Me nguaisei, engdi kede ungil medengei el kmo ngsebeched el kutmeklid er chelechang lokiu sel dolisiich er a deleuill er kid lobengkel a Jehovah, lokiu sel domekeroul er a blekeurreng er kid me a dirrek el sel dosuub el mo outekangel a kltui er a rechad. Me a ungil omengetmekled er chelechang a sebechel mo ngosukid me kede melemolem el mesiou er a Jehovah er a ngar medad el klebesei.

²² Engdi kede mo mekerang a lsekum a kabelment a mo merrob er kid me lak dongull er a Jehovah? A ongingil suobel a mo mesaod a omellach el sebechel ngosukid me kede melemolem el mesiou er a Jehovah er a taem el kabelment a merrob er kid.