1. Wuarom mott wie ons opp Vefoljunk reedmoaken?

DÄN Owent ver sienen Doot räd Jesus doavon, daut de Menschen aul dee haussen wudden, waut am nofoljen wullen (Joh. 17:14). Un bat vondoag dän Dach woaren Jehova siene true Zeijen von soone vefolcht, waut Jehova nich deenen (2. Tim. 3:12). Wie motten ons doaropp reedmoaken, daut onse Jäajna ons emma dolla vefoljen woaren, je noda daut Enj von dise Welt kjemt (Mat. 24:9).

2-3. (a) Waut sell wie äwa Angst weeten? (b) Waut woa wie en disen Artikjel seenen?

² Woo kjenn wie ons nu aul opp Vefoljunk reedmoaken? Wie brucken ons nich aules väastalen, waut se ons aundoonen kunnen. Wan wie daut doonen wudden, dan kunn wie nu aul soo väl Angst kjrieen, daut wie opphieeden Jehova to deenen, ea doa verheipts Vefoljunk kjemt (Spr. 12:25; 17:22). Angst es waut, waut ons “Jäajna, de beesa Fient”, sea fein brucken kaun toom ons schwak moaken (1. Pet. 5:8-9). Waut kjenn wie nu aul doonen toom ons stoakjen?

³ En disen Artikjel woa wie seenen, woo wie jratre Frind met Jehova woaren kjennen un wuarom daut nu soo needich es. Wie woaren uk doavon räden, waut wie doonen kjennen toom Moot kjrieen un woo wie doamet foadich woaren kjennen, wan de Jäajna ons haussen.

4. (a) Äwa waut sell wie ons no Hebräa 13:5-6 no secha sennen? (b) Wuarom mott wie ons secha sennen?

⁴ Sie die gaunz secha, daut Jehova die leeft un daut hee die kjeenmol veloten woat (läs Hebräa 13:5-6). Väl Joaren trigj säd de Woaktorm: “Wäa Gott sea goot kjant, dee woat en schwoare Tieden dolla opp am vetruen.” Daut stemt werkjlich!  Wie motten Jehova leewen un ons gaunz opp am veloten, daut wie en Vefoljunk tru bliewen. Wie sellen doa kjeenmol aun twiewlen, daut hee ons väl räakjent (Mat. 22:36-38; Jak. 5:11).

5. Waut woat die halpen to seenen, daut Jehova die leeft?

⁵ Läs jieda Dach en de Schreft, om Jehova noda to komen (Jak. 4:8). Wan du läst, waut Jehova aules sajcht un deit, dan denkj äwa siene goode Ieejenschoften no un doaräwa, woo sea hee ons leeft (2. Mo. 34:6). Eenje jleewen daut veleicht nich, daut Jehova an leeft, wäajen an noch kjeenmol wäa Leew jewäsen haft. Wan daut bie die soo es, dan proow mol, daut jieda Dach opptoschriewen, woo Jehova die aun dän Dach Metleet un Leew jewäsen haft (Psa. 78:38-39; Reem. 8:32). Wan du äwa daut nodenkjst, waut du beläft un en Gott sien Wuat jeläst hast, dan woat die väl biefaulen, waut Jehova aul fa die jedonen haft. Je dankboara du fa daut best, waut Jehova deit, je dolla woascht du die met am vebungen feelen (Psa. 116:1-2).

6. Woo kaun ons daut halpen, von Hoaten to bäden, soo aus Psalm 94:17-19 sajcht?

⁶ Bäd pinkjlich. Stal die mol eenen jungen Jung väa, waut bie siene Pape oppem Oarm es. De Jung feelt sikj doa soo secha, daut hee siene Pape aul daut goode un schlajchte vetalt, waut hee dän Dach beläft haft. Krakjt soo no aun kjenn wie ons Jehova feelen, wan wie jieda Dach von Hoaten to am bäden (läs Psalm 94:17-19). Wan du bätst, dan saj Jehova “aules waut en dien Hoat es” un waut die Angst ooda Sorjen moakt (Klg. 2:19). Woo woat daut utkomen? Soo aus de Schreft sajcht, woascht du Gott sienen Fräd kjrieen, “dee wiet äwa aules jeit waut Menschen vestonen kjennen” (Filip. 4:6-7). Je dolla du soo aus dit bätst, je noda woascht du die Jehova feelen (Reem. 8:38-39).

7. Wuarom mott wie ons secha sennen, daut Gott daut erfellen woat, waut hee von daut Kjennichrikj vesproaken haft?

⁷ Sie die secha, daut daut Kjennichrikj aul de Säajnungen brinjen woat, waut Gott vesproaken haft (4. Mo. 23:19). Aus wan nich, woaren de Soton un siene Helpa die väl leichta kjennen engrulen (Spr. 24:10, NW; Heb. 2:15). Woo kaust du nu dienen Gloowen aun Gott sien Kjennichrikj stoakjen? Nemm die de Tiet, Gott siene Vespräakjungen von daut Kjennichrikj to studieren, un unjasto die, wuarom du die kaust secha sennen, daut dee sikj woaren erfellen. Woo woat die daut halpen? Daut es aun Stanley Jones sien Biespel to seenen, waut wäajen sienen Gloowen säwen Joa enjestopt wia. * Waut holp am tru uttohoolen? Hee säd: “Ekj wia stoakj, wäajen ekj om Gott sien Kjennichrikj omwist un om daut, waut daut doonen wudd, un doa kjeenmol aun twieweld. Doawäajen kunnen  se mie nich von Jehova aufbrinjen.” Wan du eenen stoakjen Gloowen aun Gott siene Vespräakjungen hast, dan woascht du am noda komen un nich ut Angst biejäwen (Spr. 3:25-26).

8. Waut kaun daut wiesen, woo wie nu äwa de Toopkomes denkjen? Laj daut ut.

⁸ Wank räajelmässich no de Toopkomes. Dee halpen ons Jehova noda to komen. Woo wie nu äwa de Toopkomes denkjen, kaun wiesen, woo wie lota met Vefoljunk omgonen woaren (Heb. 10:24-25). Wuahäa? Waut woa wie biejlikj doonen, wan wie ons motten enne Jefoa jäwen, om ons met onse Gloowesbreeda to vesaumlen, wan wie nu aul wäajen kjliene Trubbels utbliewen? Oba wan wie ons nu gaunz eenich sent, no de Toopkomes to wanken, dan woa wie nich biejäwen, wan de Jäajna ons doavon aufhoolen wellen. Wie motten nu lieren, onse Toopkomes väl to räakjnen. Wan wie daut doonen, dan woa wie doa wieda hanwanken, wan wie uk Jäajenstaunt haben ooda wan de Rejierunk ons daut aufsajcht. Wie woaren Gott mea jehorchen aus Menschen (Apj. 5:29).

9. Wuarom sell wie ons Bibelvarzh utwendich lieren, om ons opp Vefoljunk reedtomoaken?

⁹ Lia die diene baste Bibelvarzh utwendich (Mat. 13:52). Veleicht kaust du dee nich volkomen em Denkj hoolen, oba Jehova kaun die met sienen majchtjen heiljen Jeist halpen, daut die dee wada biefaulen (Joh. 14:26). Een Brooda, waut en Oost-Dietschlaunt auleen enjestopt wia, säd: “Woo goot daut nich wia, daut ekj mie ea miere hundat Bibelvarzh utwendich jelieet haud! Ekj kunn mie doa dän Dach äwa met drock hoolen, daut ekj äwa veschiedne Teemasch ut de Schreft nodocht.” Dee Bibelvarzh holpen onsen Brooda, dicht bie Jehova to bliewen un tru uttohoolen.

10. Wuarom sell wie ons Leeda utwendich lieren?

¹⁰ Lia die Leeda utwendich, waut Jehova lowen, un sinj dee. Aus Paulus un Silas en Filippi enjestopt wieren, sungen see Leeda toom Gott lowen, waut see utwendich kunnen (Apj. 16:25). Un waut deeden onse Breeda ieeschtemma en de Sowjetunion, aus se an no Sibirien brochten? Woo stoakjten dee sikj? Onse Sesta Marija Fedun vetald: “Wie sungen aul de Leeda von daut Leedabuak, waut wie kjanden.” See säd, daut dise Leeda an aula Moot jeewen un holpen, sikj Jehova noda to feelen. Jeft die daut Krauft, wan du diene baste Kjennichrikjsleeda sinjst? Dan lia die dise Leeda  nu utwendich! (See dän Kausten “ Lot mie Moot haben”.)

11-12. (a) Wuarom wia David no 1. Samuel 17:37, 45-47 no mootich? (b) Waut fa wichtjet lia wie von David sien Biespel?

¹¹ Eena brukt Moot, wan Vefoljunk kjemt. Waut kaun eena doonen, wan eenem daut aun Moot fält? Denkj doaraun, daut woara Moot nuscht doamet to doonen haft, woo groot ooda stoakj eena es ooda waut eena aules kaun. Daut wia to seenen, aus de junga David jäajen Goliat jinkj. Jäajen disen Ries wia David kjlien un schwak un haud nich feinet Kjrichsjereetschoft. David haud nich mol een Schwieet. Oba hee haud väl Moot un rand opptoo no dän stolten Ries, om met dän to kjamfen.

¹² Wuarom wia David soo äwanäment? Hee wia sikj gaunz secha, daut Jehova met am wia (läs 1. Samuel 17:37, 45-47). David kjikjt nich doano, woo väl jrata Goliat wia aus hee. Hee kjikjt leewa doano, woo väl kjlanda Goliat wia aus Jehova. Waut kjenn wie doavon lieren? Wie woaren äwanäment sennen, wan wie doaropp vetruen, daut Jehova met ons es un daut onse Jäajna mau gaunz kjlien sent jäajen dän aulmajchtjen Gott (2. Chr. 20:15; Psa. 16:8). Woo kjenn wie nu mea Moot kjrieen, ea doa Vefoljunk kjemt?

13. Woo kjenn wie mea Moot kjrieen? Laj daut ut.

¹³ Wie kjennen nu aul mea Moot kjrieen, wan wie aundre de goode Norecht von Gott sien Kjennichrikj prädjen. Wuahäa? Na, wan wie prädjen, dan lia wie opp Jehova to vetruen un nich Menschenforcht to haben (Spr. 29:25). Krakjt soo aus onse Musklen stoakja woaren, wan wie Ekserseis doonen, soo woat ons Moot stoakja, wan wie von Hus to Hus prädjen ooda effentlich, opp Jeläajenheit ooda bie de Jeschafta. Wan wie nu lieren äwanäment to prädjen, dan woa wie reed sennen, uk dan to prädjen, wan ons Woakj veboden es (1. Tess. 2:1-2).

14-15. Waut kjenn wie von Nancy Yuen un Walentina Garnowskaja lieren?

¹⁴ Wie kjennen väl von twee true Sestren lieren, waut sea äwanäment wieren. Nancy Yuen wia mau eentunhaulf Meeta (5 Schoo) huach, oba see leet sikj nich leicht engrulen. * See hieed nich opp, de  goode Norecht von Gott sien Kjennichrikj to prädjen. Un wäajen daut wia see soo bie 20 Joa en China enjestopt. De Beaumte, waut ar befruagen, säden, daut see “de ieejenkoppichsta Mensch” en äa Launt wia.

¹⁵ Un Walentina Garnowskaja wia ieeschtemma en de Sowjetunion dreemol enjestopt. Met aules toop wia see soo bie 21 Joa faust. * Wuarom? See wia sikj soo eenich, nich met daut prädjen opptohieren, daut de Beaumte ar fa “besonda jefäadlich” talden. Wuarom kunnen dise beid Frues tru bliewen un soo äwanäment sennen? Wiels dee sikj secha wieren, daut Jehova met an wia.

16. Waut woat ons halpen, woaren Moot to kjrieen?

¹⁶ Soo aus wie jeseenen haben, sell wie ons nich opp onse ieejne Krauft veloten ooda opp daut, waut wie aules kjennen. Wan wie ons secha sent, daut Jehova met ons es un fa ons kjamft, dan woa wie woaren Moot kjrieen (5. Mo. 1:29-30; Sach. 4:6).

17-18. Fa waut woarnd Jesus ons en Johanes 15:18-21? Laj daut ut.

¹⁷ Wie jleichen daut, wan aundre ons respakjten, oba wie derwen nich denkjen, daut et met ons nuscht enhelt, wan de Menschen ons nich jleichen. Jesus säd: “Seelich sent jie, wan de Menschen junt om dän Menschensän sient haulwen nich lieden kjennen, junt vesteeten, beleidjen un een schlajchten Nomen jäwen” (Luk. 6:22). Waut meend Jesus doamet?

¹⁸ Jesus meend nich, daut Christen daut scheen gonen wudd, wan se an nich wudden lieden kjennen. Oba hee wull ons reedmoaken opp daut, waut passieren wudd. Wie sent nich Poat von dise Welt. Wie hoolen ons aun Jesus siene Lieren un prädjen deeselwje Norecht, waut hee prädijd. Doawäajen kaun de Welt ons nich lieden (läs Johanes 15:18-21). Wie leewen Jehova un wellen am jefaulen. Un wan de Menschen ons wäajen daut nich lieden kjennen, dan es daut nich onse Schult.

19. Woo kjenn wie de Apostel äa Biespel nodoonen?

 ¹⁹ Lot die kjeenmol von irjentwaut, waut Menschen sajen ooda doonen, bat doa brinjen, daut du die schämst Jehova to deenen (Micha 4:5). Wie kjennen lieren met Menschenforcht foadich to woaren, wan wie aun daut denkjen, waut de Apostel en Jerusalem no Jesus sienen Doot deeden. Dee wisten, woo schlajcht de judische Gloowesleidasch an lieden kunnen (Apj. 5:17-18, 27-28). Un doch jinjen see aule Dach nom Tempel un leeten aulemaun weeten, daut see Jesus siene Jinja wieren (Apj. 5:42). Dee leeten sikj nich enschrakjen. Wie kjennen onse Menschenforcht uk äwakomen, wan wie aundre daut weeten loten, daut wie Jehova siene Zeijen sent, endoont aus wie bie de Oabeit sent ooda enne School ooda doa, wua wie wonen (Apj. 4:29; Reem. 1:16).

20. Wuarom freiden de Apostel sikj, wan se an uk nich lieden kunnen?

²⁰ De Apostel freiden sikj. Wuarom? Dee wisten, wuarom se an nich lieden kunnen, un fa an wia daut eene Iea, daut see schlajcht behaundelt worden, wäajen see Jehova sienen Wellen deeden (Luk. 6:23; Apj. 5:41). De Apostel Petrus schreef lota: “Wan jie uk om Jerajchtichkjeits haulwen wudden lieden motten, jie sent jesäajent”, ooda schaftich (1. Pet. 2:19-21; 3:14). Wan wie vestonen, daut de Menschen ons haussen, wäajen wie daut rajchte doonen, dan woa wie nich wäajen daut opphieren Jehova to deenen.

21-22. (a) Waut hast du die väajenomen, om die opp Vefoljunk reedtomoaken? (b) Waut woa wie en dän näakjsten Artikjel derchgonen?

²¹ Wie weeten nich, wanea doa Vefoljunk komen woat ooda wanea ons Woakj woomäajlich veboden woat. Oba wie weeten, woo wie ons nu doaropp reedmoaken kjennen: Wie motten jratre Frind met Jehova woaren, mea Moot kjrieen un lieren doamet foadich to woaren, daut aundre ons nich lieden kjennen. Wan wie ons nu opp Vefoljunk reedmoaken, dan woat ons daut halpen lota tru to bliewen.

²² Oba waut, wan ons Woakj veboden woat? En dän näakjsten Artikjel woa wie eenje Gruntsauzen derchgonen, waut ons halpen woaren, Jehova mau rajcht dan tru to deenen, wan doa nich Frieheit too es.