LONGO DIA 27
Dilondege ha Gulua nu Umbalagaji Sendese Mangino
‘Athu agasue ana gutumagela Nzambi mu gudibungisa guawo nu Yesu Klisto mbaamonesewa nji lamba.’—2 TIM. 3:12.
LUNGIMBO 129 Mbatulandula Gukolesela
NDAGA JIDI MU LONGO EDI *
1. Mukunda natshi tudi naye gudilondega gutuama mukunda nu umbalagaji?
MU PHIPHA yenji ya gisugishilo gutuama egi ashiyiwe, Yesu wazuelele egi athu agasue ana gutomba ha gukhala alandudi enji mbaatunyiwa. (Yone 17:14) Uu nu mangino, Aklisto a gujinginyina ana gutagana nu umbalagaji gudi athu anago gukombelela Yehowa. (2 Tim. 3:12) Luholo tudi mujinga gu gisugishilo gia mavu awa, tudi naye gujiya egi mbalagaji jietu mbajitumonesa lamba diavula diago.—Mat. 24:9.
2-3. (a) Itshi tudi naye gujiya gu ndaga yatadila woma? (b) Itshi tuza mumona mu longo edi?
2 Luholo lutshi tuajiya gudilondega sendese mangino ha gulua nu umbalagaji? Ishigo nu ndando egi tutangize gutuama ndaga jiagasue jiabola mbajitubuila. Gula tuatshita ngenyi, tuajiya gusendesa guvua woma nu gudisagesa muavula. Ngenyi, ndaga jiene tudi mutangiza jiajiya gutuhana woma ha gubemba gukombelela Yehowa gutuama egi lamba diene dize. (Ish. 12:25; 17:22) Woma wakhala muheto wakoma ‘mbalagaji wetu, Diabulu,’ wana gukalegela ha gutuluisa. (1 Phet. 5:8, 9) Itshi tuajiya gutshita ha gukolesela mu tangua dia umbalagaji?
3 Mu longo edi, tuza mumona luholo tuajiya gukolesa ufuta wetu nu Yehowa, nu mukunda natshi idi nu ndando ha guwukolesa mangino. Tuza nji muzuelela ndaga tuajiya gutshita ha guheta gikhesa giavula (ngolo). Tuza mumona luko, ndaga tuajiya gutshita gula athu adi gututuna.
ITSHI UDI NAYE GUTSHITA HA GUKOLESA UFUTA WAYE NU YEHOWA
4. Hebelu 13:5, 6 idi gututoga ha gutshita Itshi, nu mukunda natshi tudi naye gutshigina ndaga yene?
4 Jiya egi Yehowa wana guguzumba nu mbagashigo gugubemba nga hazonda. (Tanga Hebelu 13:5, 6.) Ivo yavula yabalega gale, Inzo Yaleha ya Mutaledi yazuelele egi: “Muthu wana gujiya Nzambi muabonga wana gumushila mutshima muavula mu tangua adi mutagana nu malamba.” Idi diago ngenyi! Ha gukolesela mu malamba, tudi naye guzumba Yehowa nu gumushila mutshima, nu tushigo naye gukhala nu badute nga hazonda egi wana gutuzumba.—Mat. 22:36-38; Yak. 5:11.
5. Itshi yajiya gugukuatesa ha gujiya egi Yehowa wana guguzumba?
5 Tanga Biblia lusugu nu lusugu ha gusuena hehi nu Yehowa. (Yak. 4:8) Tangua udi mutanga, kamba gujiya makalegelo abonga a Yehowa. Luko, kamba gukotelesa luholo Yehowa wana guguzumba mu ndaga jiana guzuela muene nu jiana gutshita muene. (Guz. 34:6) Yajiya gukhala lamba gudi athu ako ha gutshigina egi Nzambi wana guazumba, handaga athu ana gujinga nawo anago guazumba. Gula wana gutangiza ngenyi, khala musonega lusugu nu lusugu maluholo Yehowa wana gugumonesela khenda nu guzumba. (Ngi. 78:38, 39; Lomo 8:32) Gutadila ndaga udi mutagana najio nu gutangigiza ndaga watangi mu Biblia, guajiya gugukuatesa ha gujiya ndaga jiavula Yehowa wagukalegele gale. Gula udi muhana Yehowa mersi mu ndaga jiagasue jiagukalegele muene, mbawubua futa diaye wakola.—Ngi. 116:1, 2.
6. Ha gutadila Ngimbo 94:17-19, luholo lutshi gutshita gisambu nu mutshima umoshi guajiya gugukuatesa?
6 Khala musamba tangua diagasue. Tangiza mona wazonda ha mago a sh’enji. Mona muene wana gudivua mu ubambi, hene, ganago guvua woma ha guwambela sh’enji ndaga jiagasue jiabonga nga jiabola gatagana najio mu lusugu. Aye nji wajiya gukhala nu ufuta wa luholo lumoshi nu Yehowa, gula masugu agasue udi gumuwambela ndaga jiagasue jidi mu mutshima waye mu gisambu. (Tanga Ngimbo 94:17-19.) Tangua udi musamba Yehowa, “lusa milonga ya mu mutshima waye gifua meya” nu wambela Shaye wa guzumba ndaga jiagasue jidi guguhana woma nu gikenene. (Is. 2:19) Mbuto tshi mbawuheta? Mbawuheta gubonga Biblia yana gutamega egi: “Guhuima gua Nzambi gudi mubalega ndunge jiagasue.” (Fili. 4:6, 7) Gula udi musamba muavula, mbawusuene hehi nu Yehowa.—Lomo 8:38, 39.
Tuana guheta gikhesa gula tudi nu gutshigina guakola gudi Yehowa nu gu lukuma luabonga lua Ufumu
Stanley Jones wakolesele gutshigina guenji luholo watshiginyile egi Ufumu wa Nzambi udi diago ndaga ya giamatshidia
7. Mukunda natshi udi naye gutshigina egi mafelela a Nzambi mukunda nu Ufumu wenji mbaatagana?
7 Jiya egi mafelela abonga a Ufumu wa Nzambi mbaatagana. (Lutang. 23:19) Gula ushigo mutshigina egi Nzambi mbawutagenesa mafelela enji, Satana nu athu enji ajiya guguhana woma. (Ish. 24:10; Heb. 2:15) Luholo lutshi wajiya gukolesa gutshigina guaye mu Ufumu wa Nzambi mangino? Tshita ba recherche atadila mafelela a Nzambi mukunda nu Ufumu nu gibawu kamba gujiya mukunda natshi wajiya gutshigina diago egi mbaatagana. Luholo lutshi gutshita ngenyi guajiya gugukuatesa? Tuzuelele gifezegeselo gia phangi Stanley Jones, yago wambiwe mu bologo ivo 7 mukunda nu gutshigina guenji. * Itshi yamukuatesele ha gukolesela nu gujinginyina guagasue? wazuelele egi: “Gujiya ndaga jiavula jiatadila Ufumu wa Nzambi nu gusha gutshigina mu ndaga jiene, nu gutuna gusha ba dute guanguhanele gikhesa.” Gula udi nu gutshigina guakola mu mafelela a Nzambi, mbawusuena hehi nu Yehowa nu mbawubembigo egi woma ugukange njila ha gumukombelela.—Ish. 3:25, 26.
8. Khadilo dietu dia guya mu gudibungisa diana gumonesa itshi? Kotelesa.
8 Ubembigo khadilo dia guya mu gudibungisa gua mu hungu. Guya mu gudibungisa guana gutukuatesa ha gusuena hehi nu Yehowa. Khadilo dietu dia guya mu gudibungisa diana gumonesa diago gula mbatukolesela mu malamba mbaatubuila mu masugu adi muza. (Heb. 10:24, 25) Mukunda natshi tuazuela ngenyi? Gula tudi mubemba egi ndaga jiazonda jitukange njila ha guya mu gudibungisa mangino, na itshi mbatutshita masugu adi muza tangua mbayikhala lamba ha gudibungisa nu aphangi? Luko, gula tudi nu khadilo dia guya mu gudibungisa, mbatushigo mudibemba tangua mbalagaji jietu mbajilola ha gutukanga njila ha guya mu gudibungisa. Sendese mangino tukudise khadilo dia guya mu gudibungisa. Gula tuana guzumba guya mu gudibungisa, gushigo nu gima, nga mukhuala wa leta wajiya gututunyisa ha gutumagela Yehowa ha fundo egi tutumagele athu.—Makal. 5:29.
Gukuata verse jia Biblia nu ngimbo jia Ufumu mu muto guajiya gugukuatesa tangua watagana nu umbalagaji (Tala paragrafe 9) *
9. Mukunda natshi gukuata verse jia Biblia mu muto gudi luholo luabonga lua gudilondega gu malamba mbaatubuila?
9 Kuata verse jia Biblia jiana gugusuanguluisa mu muto. (Mat. 13:52) Wajiyilego gukuata ndaga jiagasue mu muto, uvi nyuma ya Yehowa yajiya guguwunguluisa verse jiene. (Yone 14:26) Phangi mumoshi wakhalele mu bologo gu Allemagne de l’Est udi muzuela egi: “Ngakhalele nu gusuanguluga handaga ngakuatele verse jiavula mu muto! Masugu agasue ngakhalelego nu gima gia gutshita, ngakhalele mutangiza verse jiavula jia Biblia ngakuatele mu muto.” Verse jiene jiakuatesele phangi muene ha gusuena hehi nu Yehowa nu ha gusala yagujinginyina.
(Tala paragrafe 10) *
10. Mukunda natshi tudi naye gukuata ngimbo mu muto?
10 Kuata ngimbo mu muto, nu khala gujiyimba ha gutumbuisa Yehowa. Tangua Phaula nu Silase ambiwe mu bologo gu dimbo dia Filiphi, ayimbile ngimbo jinyi akhalele mujiya mu muto. (Makal. 16:25) Luholo lutshi aphangi etu a gu ex-Union soviétique akolesele gutshigina guawo tangua ambiwe mu bologo gu Sibérie? Phangi Mariya Fedun wazuelele egi: “Tuakhalele muyimba ngimbo jiagasue tuakhalele mujiya, jia mu mukanda wetu wa ngimbo.” Wazuelele luko egi ngimbo jiene jiaahanele gikhesa nu jiaakuatesele ha gusuena hehi nu Yehowa. Wana guheta gikhesa tangua wana guyimba ngimbo jia mu nyuma jinyi wana gutshigina ba? Sendese mangino kuata ngimbo jiene mu muto!—Tala galuanda “ Nguhane Gikhesa.”
LUHOLO WAJIYA GUKOLESA GIKHESA GIAYE
11-12. (a) Ha gutadila 1 Samuele 17:37, 45-47, itshi yakuatesele Davidi ha gukhala nu gikhesa? (b) Gifezegeselo gia Davidi gidi gutulongesa itshi?
11 Ha gubinga malamba, tudi naye gukhala nu gikhesa. Itshi wajiya gukalagala gula wamona egi ushigo nu gikhesa? Jiya egi gikhesa gia giamatshidia gianago gutoga egi ukhale nu gitala gialeha, nu manyinyi nga ngolo. Tuzuelele gifezegeselo gia Davidi, hakhalele muene muvuala; wakhalele naye gulua nu Goliyata. Gutuama dia Goliyata, Davidi wakhalele wazonda diago, waleba nu gakhalelego nu mata atagana nga phogo ha gulua ita. Uvi, wakhalele nu gikhesa giavula. Davidi wayile phushi ha guluisa gingunji gia muthu.
12 Itshi yakuatesele Davidi ha gukhala nu gikhesa? Wakhalele nu gutshigina guakola egi Yehowa wakhalele nenji. (Tanga 1 Samuele 17:37, 45-47.) Davidi gakhalelego mutala gitala nu gukoma gua Goliyata. Uvi wakhalele mujiya egi, Yehowa udi wakoma gubalega Goliyata. Longo ditshi tuajiya guzula mu lumene elu? Mbatukhala nu gikhesa gula tudi musha gutshigina egi Yehowa udi nu esue nu gula tudi mujiya egi Yehowa udi wakoma gubalega mbalagaji jietu. (2 Gudi. 20:15; Ngi. 16:8) Luholo lutshi tuajiya gukolesa gikhesa gietu mangino—gutuama egi umbalagaji utujile?
13. Luholo lutshi tuajiya gukolesa gikhesa gietu? Kotelesa.
13 Tuajiya gukolesa gikhesa gietu mangino gula tudi mulongesa lukuma luabonga lua Ufumu wa Nzambi. Mukunda natshi? Handaga gulongesa guana gutukuatesa ha gushila Yehowa mutshima nu ha gukatula woma wa athu. (Ish. 29:25) Misunyi yetu ya mu muila yana gukola gula tudi mutshita ba exercice, luholo lumoshi nji gikhesa gietu giana gukola gula tudi mulongesa inzo nu inzo, mu mafundo a athu avula, gula tuaheta okazio nga gulongesa gu mazando (isalo). Gula tuakudisa gikhesa gia gulongesa mangino, mbatukhala ya gudilondega ha gulongesa masugu adi muza gula mudimo wetu watunyishiwa.—1 Tes. 2:1, 2.
Nancy Yuen watunyile egi gajiyilego gubemba nga hazonda gulongesa lukuma luabonga (Tala paragrafe 14)
14-15. Malongo atshi tuajiya guzula mu gifezegeselo gia Nancy Yuen nu Valentina Garnovskaya?
14 Tuajiya guzula malongo avula mu gifezegeselo gia aphangi akhetu mbadi amonesele gikhesa giavula. Nancy Yuen wakhalele nu gitala gia 1,5 m, uvi wakhalele muenya gikhesa giavula. * Watunyile egi gajiyilego gubemba gulongesa lukuma luabonga lua Ufumu wa Nzambi. Hene, amumbile mu bologo ivo gubalega 20 gu Chine. Mafumu akhalele gumusambesa azuelele egi phangi muene wakhalele “muenya muto wakola gubalega” mu gifutshi giawo giagasue!
Valentina Garnovskaya washile gutshigina egi Yehowa wakhalele nenji (Tala paragrafe 15)
15 Luholo lumoshi nji, Valentina Garnovskaya wambiwe mu bologo gu ex-Union soviétique mahugo thathu, nu watagenesele ivo hehi nu 21 mu mahugo ene thathu. * Mukunda natshi? Handaga wazudile desizio dia gulongesa, hene mafumu amutamegele egi “mbalagaji wakoma.” Itshi yakuatesele aphangi awa a akhetu ha gukhala nu gikhesa? Akhalele musha gutshigina egi Yehowa wakhalele nawo.
16. Itshi tudi naye gutshita ha gukhala nu gikhesa gia giamatshidia?
16 Luholo tuayimonyi gutuama, ha gukudisa gikhesa tushigo naye gusha mutshima mu ngolo jietu hakhetu. Uvi tudi naye gujiya egi Yehowa udi nu esue nu muene wana gutuluila. (Mikh. 1:29, 30; Zak. 4:6) Gujiya ngenyi guene guana gutuhana gikhesa gia giamatshidia.
NDAGA WAJIYA GUTSHITA GULA ATHU ADI GUGUTUNA
17-18. Ha gutadila Yone 15:18-21 itshi Yesu wazuelele ha gututemesa? Kotelesa.
17 Tuana gusuanguluga gula athu ako adi gutunemesa, uvi tuajiyilego gudimona gifua tushigo nu funu gula athu ashigo gututshigina. Yesu wazuelele egi: ‘Suangulugenu gula athu adi nenu umbalagaji, gula amikaya mukatshi diawo, nu gula amishinga nu adi mubolesa jina dienu mukunda nu Mun’a muthu.’ (Luka 6:22) Itshi Yesu watshiginyile guzuela?
18 Yesu gazuelelego egi Aklisto mbaasuanguluga gula athu adi guatuna. Uvi, watutemesele gu ndaga mbajitubuila. Tuanago gudinginyisa mu ndaga jia ha mavu awa. Tuana gujinga mu gudivua nu malongo a Yesu nu tuana gulongesa lukuma lua longesele muene. Hene, athu ana gututuna. (Tanga Yone 15:18-21.) Tuana gutshigina gusuanguluisa Yehowa. Gula athu atutuna handaga tuana gutshigina Tata wetu wa guzumba, idi guatalela ene.
19. Luholo lutshi tuajiya gulandula gifezegeselo gia apostolo?
19 Tubembigo egi nga gima gimoshi muthu wajiya guzuela nga gutshita gituhane musonyi ha gukhala Temue wa Yehowa. (Mika 4:5) Tuajiya gukatula woma wa athu gula tualandula gifezegeselo giabembele apostolo gu Yelusalema gungima dia gufua gua Yesu. Akhalele mujiya muabonga egi enya mangumba a enya Yuda akhalelego guatshigina. (Makal. 5:17, 18, 27, 28) Uvi, lusugu nu lusugu alandudile guya mu tempelo nu akhalele gudijiyisa gudi athu agasue egi akhalele alandudi a Yesu. (Makal. 5:42) Woma waavutuilego gungima. Esue nji tuajiya gukatula woma wa athu gula tudi gudijiyisa egi tudi Matemue a Yehowa—ikhale gu mudimo, gu khalasa, nga gudi athu tuana gujinga nawo.—Makal. 4:29; Lomo 1:16.
20. Mukunda natshi apostolo akhalele musuanguluga ngatshima athu akhalele guatuna?
20 Mukunda natshi apostolo akhalele musuanguluga? Akhalele mujiya mukunda natshi athu akhalele guatuna, ajiyile nji egi idi lutumbu gula athu adi guamonesa lamba handaga akhalele mutshita gutshigina gua Yehowa. (Luka 6:23; Makal. 5:41) Mupostolo Phetelo wasonegele egi: ‘Ngatshima mudi musagesewa handaga mudi mutshita ndaga jiabonga, mbamukhala nu gusuanguluga.’ (1 Phet. 2:19-21; 3:14) Gula tuakotelesa egi tudi mumonesewa lamba mukunda nu ndaga jiabonga tudi mutshita, mbatushigo mubemba gukombelela Yehowa handaga athu adi gututuna.
MBAWUHETA GUBONGA GULA UDI GUDILONDEGA
21-22. (a) Desizio ditshi wazudi ha gudilondega gutuama mukunda nu umbalagaji? (b) Itshi mbatuzuelela mu longo dialandula?
21 Tushigo mujiya tangua athu mbatumonesa lamba nga tangua mafumu a leta mbatunyisa mudimo wetu. Uvi, esue mujiya egi sendese mangino tuajiya gudilondega ha gukolesa ufuta wetu nu Yehowa, gula tudi mukudisa gikhesa gietu nu tudi mukamba gujiya luholo tuajiya gulua nu umbalagaji. Gudilondega sendese mangino mbagutukuatesa ha gulandula gukombelela Yehowa.
22 Itshi tuajiya gutshita gula athu atutunyisa ha gukombelela Yehowa? Mu longo dialandula mbatuzuelela malongo a Biblia ajiya gutukuatesa ha gulandula gukombelela Yehowa ngatshima atutunyisa.
LUNGIMBO 118 “Tuhane Gutshigina Guavula”
^ par. 5 Tuanago gutshigina egi athu atutune. Uvi mu masugu adi muza, mukut’etu agasue mbatutagana nu umbalagaji. Longo edi diza gutukuatesa ha gulua nu umbalagaji nu gikhesa giagasue.
^ par. 7 Tala Inzo Yaleha ya Mutaledi ya 1 Avril 1966 diyiji 212-224 ya français.
^ par. 14 Tala Inzo Yaleha ya Mutaledi ya 15 Octobre 1979 diyiji 4-7 ya français. Tala nji video idi muzuela egi Le nom de Jéhovah sera connu mu JW Télédiffusion®. Ha guyizula ngina ha INTERVIEWS ET TÉMOIGNAGES.
