1. Why nao iumi mas redi for persecution?

LO NAET bifor olketa killim dae Jesus, hem sei hao evriwan wea chus for kamap disaepol blo hem, bae pipol heitim olketa. (John 17:14) Kam kasem distaem, olketa faithful Witness blo Jehovah kasem persecution from pipol wea againstim worship blo Jehovah. (2 Tim. 3:12) Taem end hem kakam klosap, iumi bae expectim wei wea olketa enemy againstim iumi bae hem kamap moa big.—Matt. 24:9.

2-3. (a) Wanem nao iumi need for luksavve abaotem wei for fraet? (b) Wanem nao iumi bae storyim lo disfala study?

² Wanem nao iumi savve duim distaem mekem iumi redi for feisim persecution? Iumi no need for tingim evri samting wea maet bae happen lo iumi. Sapos iumi duim olsem, datwan maet mekem iumi fraet and wari. Maet olketa kaen tingting olsem mekem iumi for fraet nating nomoa, then lo taem wea test kasem iumi, bae iumi no strong nao for feisim datwan. (Provebs 12:25; 17:22) “Devil, wea hem enemy” blo iumi, hem iusim wei for fraet olsem wanfala weapon for againstim iumi. (1 Pet. 5:8, 9) Wanem nao iumi savve duim distaem for strongim iumiseleva?

³ Lo disfala study, iumi bae lane for strongim wei wea iumi fren witim Jehovah and why hem important for duim datwan distaem. Iumi bae storyim tu wanem iumi savve duim for strongim wei for no fraet. And iumi bae lane hao for deal witim wei wea pipol heitim iumi.

4. Olsem Hebrew 13:5, 6 storyim, wanem nao iumi mas barava sure lo hem, and why nao olsem?

⁴ Iu mas barava sure hao Jehovah lovem iu and hem bae nating lusim iu. (Readim Hebrew 13:5, 6.) Lo 1963, datfala magasin The Watchtower hem sei: “Man wea barava savve gud  lo God bae barava trustim hem lo taem blo test.” Datwan hem tru! For iumi no givap lo taem blo persecution, iumi mas lovem Jehovah and barava trustim hem, and no daotem hao hem lovem iumi.—Matt. 22:36-38; Jas. 5:11.

5. Wanem nao savve helpem iu for feelim love blo Jehovah?

⁵ Readim Bible evriday witim goal for strongim wei wea iu fren witim Jehovah. (Jas. 4:8) Taem iu gohed read, luk for olketa nambawan wei blo Jehovah. Taem iu readim toktok blo hem and samting wea hem duim, iu savve feelim love blo Jehovah and hao hem tingim iu. (Eksodas 34:6) Samfala faendem hem hard for bilivim hao God lovem olketa, bikos no eniwan showimaot love lo olketa. Sapos iu feel olsem tu, trae raetem daon olketa difren wei wea Jehovah showimaot mercy and kaen lo iu. (Sams 78:38, 39; Rome 8:32) Taem iu tingim samting wea kasem iu and ting raonem wanem iu readim lo Bible, iu bae tingim staka samting wea Jehovah duim finis for iu. Sapos iu tinghae go moa lo olketa samting wea Jehovah duim for iu, datwan bae strongim go moa wei wea iu fren witim Jehovah.—Sams 116:1, 2.

6. Olsem Sams 94:17-19 hem storyim, hao nao wei for prea from heart savve helpem iu?

⁶ Prea evritaem. Tingim taem wanfala smol boy sidaon witim dadi blo hem, and dadi putim hand raonem hem. Datfala boy feel sef, so hem gohed for story witim dadi abaotem olketa gud and nogud samting wea happen lo hem lo datfala day. Sapos iu prea from heart evriday, iu tu savve enjoyim klos wei for fren olsem witim Jehovah. (Readim Sams 94:17-19.) Taem iu prea lo Jehovah, talemaot evri samting lo heart blo iu lo hem and storyim evri samting wea mekem iu fraet and wari. (Lamentesin 2:19) Wanem gud samting nao iu bae kasem from datwan? Iu bae kasem “peace bilong God wea winim nao wanem man savve minim.” (Phil. 4:6, 7) Evritaem wea iu gohed for prea olsem, bae iu kamap moa klos lo Jehovah.—Rome 8:38, 39.

7. Why nao iu mas barava sure olketa promis abaotem Kingdom blo God bae kamap tru?

⁷ Iu mas barava sure olketa blessing from Kingdom blo God bae kamap tru. (Nambas 23:19) Sapos faith blo iu lo olketa promis hia hem no strong, bae hem isi for Satan and olketa wea followim hem for mekem iu fraet. (Provebs 24:10; Heb. 2:15) Wanem nao savve strongim faith blo iu distaem lo Kingdom blo God? Iu savve duim research and studyim olketa promis blo God abaotem Kingdom blo hem, and olketa reason why iu barava bilivim olketa samting hia bae kamap tru. Hao nao datwan savve helpem iu? Tingim example blo Stanley Jones, wea stap lo prison for sevenfala year bikos lo faith blo hem. * Wanem nao helpem hem for faithful and no givap? Hem sei: “Wei wea mi savve gud abaotem Kingdom blo  God hem strongim faith blo mi and mi no daotem datwan, so no eniwan savve mekem mi for lusim Jehovah.” Sapos iu garem strong faith lo olketa promis blo God, iu bae fren moa klos lo Jehovah and wei for fraet bae no savve winim iu.—Provebs 3:25, 26.

8. Wei blo iumi for attendim olketa meeting distaem hem showimaot wanem samting? Explainim datwan.

⁸ Attendim olketa meeting evritaem. Olketa meeting helpem iumi for kam moa klos lo Jehovah. Wei blo iumi for attendim olketa meeting distaem hem showimaot hao iumi bae deal witim persecution lo future. (Heb. 10:24, 25) Why nao olsem? Sapos iumi letem olketa smol samting nomoa for mekem iumi no attendim meeting distaem, wanem nao bae happen lo future sapos hem danger for iumi hipap witim olketa brata and sista blo iumi? Bat lo narasaed, sapos iumi barava disaed strong for attendim olketa meeting distaem, iumi bae no givap nomata olketa wea againstim iumi trae for stopem iumi for hipap tugeta. Distaem nao hem taem for iumi mekem grow love wea iumi garem for olketa meeting. Taem iumi lovem wei for attendim olketa meeting, nomata sapos olketa againstim iumi, or gavman banim waka blo iumi, bae iumi obeyim God olsem ruler and no olketa man.—Acts 5:29.

9. Why nao wei for memorizim olketa scripture hem gud samting wea savve redyim iumi for persecution?

⁹ Memorizim olketa favorite scripture blo iu. (Matt. 13:52) From man no perfect, hem no isi for rememberim evri samting. Nomata olsem, Jehovah savve iusim holy spirit for mekem iu tingim bak olketa favorite scripture blo iu. (John 14:26) Tingim wanfala brata wea stap lo prison lo East Germany, olketa putim hem for stap seleva lo wanfala prison cell. Hem sei: “Lo datfala taem, mi hapi nomoa, bikos mi memorizim staka handred scripture! So nomata mi stap seleva mi savve sidaon and ting raonem staka Bible subject.” Olketa scripture hia helpem datfala brata blo iumi for strong for gohed faithful lo Jehovah and for no givap.

10. Why nao iumi shud memorizim olketa song?

¹⁰ Memorizim and singim olketa song for praisem Jehovah. Taem Paul and Silas stap lo prison lo Philippi, tufala singim olketa song for praisem Jehovah wea tufala memorizim. (Acts 16:25) Olsem tu, taem olketa brata blo iumi lo Soviet Union bifor go prison lo Siberia, wanem nao helpem olketa for gohed strong? Sista Mariya Fedun hem sei: “Mifala singim evri singsing from song buk blo iumi wea mifala savve.” Hem sei olketa song hia encouragem and helpem olketa for strongim wei  wea olketa fren witim Jehovah. Waswe, olketa favorite song blo iu for praisem Jehovah savve strongim iu? Sapos olsem, memorizim olketa song hia distaem!—Lukim box “ Helpem Mi for No Fraet.”

11-12. (a) Olsem Fas Samuel 17:37, 45-47 hem storyim, why nao David no fraet? (b) Wanem important leson nao iumi savve lanem from example blo David?

¹¹ For feisim persecution, iu mas strong and no fraet. Sapos iu feel olsem iu man for fraet, wanem nao iu savve duim? Tingim, hao trufala wei for no fraet hem no depend lo size, strong, or wanem man hem fit for duim. Tingim example blo David taem hem feisim Goliath. Goliath hem wanfala big giant, bat David hem smol tumas, hem no strong olsem Goliath, and hem no garem eni samting for faet. For garem sword bat nomoa tu. Nomata olsem, David no fraet and ran go for faetem datfala praod giant Goliath.

¹² Why nao David strong and no fraet? Hem barava bilivim Jehovah stap witim hem. (Readim Fas Samuel 17:37, 45-47.) David no comparem size blo hemseleva witim hao big nao Goliath. Bat, hem comparem size blo Goliath witim Jehovah. Wanem nao iumi savve lanem from disfala story? Iumi bae strong and no fraet sapos iumi barava bilivim hao Jehovah hem stap witim iumi. And sapos iumi bilivim hao olketa wea againstim iumi olketa smol tumas taem iumi comparem witim Jehovah. (Mektu Kronikols 20:15; Sams 16:8) So bifor iumi kasem persecution, wanem nao iumi savve duim distaem for strongim go moa wei wea iumi no fraet?

13. Hao nao iumi savve strongim go moa wei for no fraet? Explainim kam.

¹³ Taem iumi talemaot lo pipol gud nius abaotem Kingdom blo God, datwan strongim wei wea iumi no fraet. Why nao olsem? Bikos preaching waka savve teachim iumi for trustim Jehovah and winim wei for fraetem olketa man. (Provebs 29:25) For man garem strongfala masol hem mas duim exercise evritaem. Olsem tu, iumi savve strongim wei for no fraet taem iumi preach lo pablik, from haos tu haos, lo enitaem witnessing, and lo olketa bisnis territory. Sapos iumi no fraet for preach distaem, datwan bae redyim iumi for gohed preach lo future nomata sapos gavman banim waka blo iumi.—1 Thess. 2:1, 2.

14-15. Wanem nao iumi savve lanem from example blo Nancy Yuen and Valentina Garnovskaya?

¹⁴ Iumi savve lanem staka samting from example blo tufala faithful sista wea showimaot  tufala no fraet. Wanfala hem Nancy Yuen, wea tol blo hem 1.5 meter nomoa *. Bat nomata hem wanfala short woman nomoa, hem nating fraet. Hem no laek stop for preachim gud nius abaotem Kingdom blo God. From datwan, olketa putim hem lo prison lo Communist China for winim 20 year. Olketa police wea kwestinim hem sei lo full kantri blo olketa, hem nomoa “wanfala woman wea garem strongfala tingting” wea no eniwan fit for changem!

¹⁵ Nara example, hem Valentina Garnovskaya, hem stap lo prison lo Soviet Union bifor, and thrifala taem nao hem mas go lo prison. Total blo olketa year wea hem stap lo prison hem kasem 21 year. * Why nao olsem? Bikos hem strong for gohed preach. From datwan, olketa police kolem hem “wanfala criminal wea danger tumas.” Wanem nao mekem tufala faithful sista hia for strong and no fraet? Tufala barava bilivim hao Jehovah hem stap witim olketa.

16. Wanem nao main samting wea bae mekem iumi for no fraet?

¹⁶ Olsem iumi storyim finis, for iumi gohed for strongim wei for no fraet, iumi mas no depend lo strong blo iumiseleva and wanem iumi savve duim. Bat, iumi mas bilivim hao Jehovah hem stap witim iumi and hem nao bae faet for iumi. (Diutronomi 1:29, 30; Sekaraea 4:6) Datwan nao main samting wea bae mekem iumi for no fraet.

17-18. Olsem John 15:18-21 storyim, wanem warning nao Jesus talem iumi? Explainim kam.

¹⁷ Iumi laekem pipol for respectim iumi, bat iumi shud no tingse wei wea pipol ting lo iumi nao hem important. Jesus sei: “Iufala bae hapi nomata pipol heitim iufala, aotem iufala from grup bilong olketa, tok daonem iufala and talem samting wea mekem pipol ting nogud long iufala. Olketa bae duim diswan bikos iufala olketa disaepol bilong Son bilong man.” (Luke 6:22) Wanem nao Jesus hem minim?

¹⁸ Jesus no minim olketa Christian bae laekem for pipol heitim olketa, bat hem talem  nomoa tru samting wea bae happen. Iumi difren from pipol lo world. Iumi followim olketa samting wea Jesus teachim and iumi preachim message wea hem preach abaotem. From datwan, pipol lo world bae heitim iumi. (Readim John 15:18-21.) Iumi laek for mekem Jehovah hapi. So sapos pipol heitim iumi bikos iumi lovem Dadi blo iumi Jehovah, datwan hem saed blo olketa.

19. Hao nao iumi savve followim example blo olketa aposol?

¹⁹ Iu mas no letem wanem olketa man talem or duim for mekem iu shame for showimaot iu wanfala Jehovah’s Witness. (Maeka 4:5) Iumi savve lane for deal witim wei for fraetem man, taem iumi lane abaotem example blo olketa aposol lo Jerusalem no longtaem bihaen olketa killim dae Jesus. Olketa savve finis dat olketa leader blo Jew religion barava heitim olketa. (Acts 5:17, 18, 27, 28) Nomata olsem, olketa gohed for go lo temple and showimaot hao olketa disaepol blo Jesus. (Acts 5:42) Olketa no letem wei for fraetem man for stopem olketa. Iumi tu savve winim wei for fraetem man, sapos iumi evritaem showimaot iumi Jehovah’s Witness. Iumi duim diswan lo waka ples, lo skul, and lo pipol wea stap raonem iumi.—Acts 4:29; Rome 1:16.

20. Why nao olketa aposol hapi nomata pipol heitim olketa?

²⁰ Why nao olketa aposol hapi? Bikos olketa savve why pipol heitim olketa, and olketa ting hem privilege for kasem persecution bikos lo Jehovah. (Luke 6:23; Acts 5:41) Aposol Peter raet olsem: “Nomata sapos iufala safa bikos iufala duim samting wea stret, bae iufala hapi.” (1 Pet. 2:19-21; 3:14) Taem iumi luksavve pipol heitim iumi bikos iumi duim stret samting, iumi bae no letem feeling for fraetem man for stopem iumi for gohed worshipim Jehovah.

21-22. (a) Wanem nao iu disaed for duim mekem iu redi for persecution? (b) Wanem nao bae iumi storyim lo nextfala study?

²¹ Iumi no savve wanem taem nao bae iumi kasem persecution or gavman banim waka blo iumi. Bat, iumi savve redi distaem. For duim diswan, iumi mas strongim wei wea iumi fren witim Jehovah, strongim wei wea iumi no fraet, and lane for deal witim wei wea pipol heitim iumi. Sapos iumi redi distaem, datwan bae helpem iumi for gohed stand strong lo future.

²² Bat hao sapos gavman banim waka blo iumi? Lo nextfala study, iumi bae storyim olketa principle wea savve helpem iumi for gohed worshipim Jehovah nomata sapos olketa banim waka blo iumi.