1. ¿Armagedón chayamucujpica millaicunaca imatataj ruranga?

JESUSCA huañunapaj shuj tuta faltajpimi paita catijcunamanca cancunataca ñucata catishcamantami shujtajcunaca pꞌiñangacuna nirca (Juan 17:14). Chai punllacunamantami Diosta catijcunataca llaquichingapaj catirashcacuna (2 Timoteo 3:12). Armagedón chayamucujpimi millaicunaca ashtahuan catirashpa llaquichingacuna (Mateo 24:9).

2, 3. a) ¿Llaquicunamantaca imamantataj mana yallitaj mancharina canchij? b) ¿Cai yachaipica imatataj yachashun?

² ¿Llaqui punllacunapajca ima shinataj allichirishun? Jatun llaquicunami tiyanga nishpaca mana yuyacunallachu canchij. Chashna yuyacushpallaca dimastijmi sustarishun. Manaraj llaquicuna shamujpipish manchaimantami Jehová Diosta sirvinata saquishun (Proverbios 12:25; 17:22). Ñucanchij chashna mancharishca cajpica ‘pꞌiñaj Diabloca’ pandachi tucunmi (1 Pedro 5:8, 9). Pero ¿ama manchangapajca imatataj rurana canchij?

³ Cai yachaipimi Jehová Dioshuan alli amigo cangapaj, shujtajcuna pꞌiñajpipish paita sirvishpa catingapaj imata rurana cashcata yachashun.

4. a) ¿Hebreos 13:5, 6-pi nishca shinaca imatataj tucui shunguhuan crina canchij? b) ¿Jehová Dios cꞌuyaj cashcata crishpaca imatataj rurashun?

⁴ Jehová Dios cꞌuyaj cashcata, ñucanchijta manataj cungarinata tucui shunguhuan crishunchij (Hebreos 13:5, 6-ta liyipai). Achca huatacuna ñaupaman La Atalaya revistapica: “Diosta alli rijsijcunaca llaqui punllacuna shamujpica tucui shunguhuanmi paipi confiangacuna” nircami. Yayitu Diostami cꞌuyana canchij. Shinallataj pai cꞌuyaj cashcatapish tucui shunguhuanmi  crina canchij. Chashnami llaqui punllacunata chꞌimbapurashun (Mateo 22:36-38; Santiago 5:11).

5. ¿Jehová Dios ñucanchijta cꞌuyashcata yachangapajca imatataj rurana canchij?

⁵ Jehová Diospajman ashtahuan cꞌuchuyangapaj Bibliata cada punlla liyishunchij (Santiago 4:8). Bibliata liyicushpami Yaya Dios ima nishcata, imata rurashcata yachanchij. Chashna rurashpami pai cꞌuyaj, llaquij cashcata cuenta japishun (Éxodo 34:6). Huaquincunaca pi paicunata mana cꞌuyajpimi Yaya Diospish ñucataca mana cꞌuyanchu nishpa yuyancuna. Ñucanchijpish chashna sintirishpaca ¿imatataj rurana canchij? Jehová Dios ima shina ñucanchijman cꞌuyaita ricuchishcatami cada punlla quillcai tucunchij (Salmo 78:38, 39; Romanos 8:32). Chaipajca Bibliapi imata liyishcatami cutin cutin yuyarina canchij. Ñucanchijta Yayitu Dios ima shina ayudashcatapish yuyarinami canchij. Chashnami paipajman ashtahuan cꞌuchuyashun (Salmo 116:1, 2).

6. Salmo 94:17 al 19-pi nishca shinaca Diosta mañashpaca ¿ima shinataj sintirishun?

⁶ Diosta mañarashunchij. Caipi yuyashun. Shuj yaya paipaj huahuata cꞌuyaihuan ugllajpica paica tranquilomi sintirin. Huahuaca punllapi ima shina cainashcatami paipaj yayamanca tucuita huillan. Ñucanchijpish Jehová Diosta punllanta mañashpaca chai huahua shinami tranquilo sintirishun (Salmo 94:17-19-ta liyipai). Ima shina sintirishcata, imata manchashcata Yayitu Diosman tucuita huillashunchij (Lamentaciones 2:19). Chaita rurajpica ‘Diospaj sumaj causaimi’ ñucanchij shunguta, ñucanchij yuyaita huaquichinga (Filipenses 4:6, 7). Diosta mañanata manataj saquishpaca paipajmanmi ashtahuan cꞌuchuyashun (Romanos 8:38, 39).

7. ¿Dios cusha nishca bendicioncuna pajtarinataca imamantataj crina canchij?

⁷ Dios cusha nishca bendicioncuna pajtarinataj cashcata crishunchij (Números 23:19). Ñucanchij crishcacuna mana sinchi cajpica Diablopish, paita catijcunapish jahuallami pandachingacuna (Proverbios 24:10; Hebreos 2:15). Dios cusha nishcacuna pajtarinataj cashcata cringapajca ¿imatataj rurana canchij? Chaicunamanta estudiangapajmi tiempota surcuna canchij. Caimanta ashtahuan yachangapajca huauqui Stanley Jonespaj causaimanta yachashun. * Paica 7 huatacunatami carcelpi carca. Cai huauquica: “Dios cusha nishcacuna pajtarina yuyaillami causarcani. Chaimi llaquichijcuna Diosta sirvichun jarcasha nijpipish paita sirvinataca manataj saquircani” ninmi. Ñucanchijpish Dios cusha nishcapi tucui shunguhuan crishpaca paipajmanmi ashtahuan cꞌuchuyashun. Shinallataj imatapish mana manchashunchu (Proverbios 3:25, 26).

8. ¿Tandanacuicunamanca imamantataj mana faltana canchij?

⁸ Tandanacuicunaman rinata amataj saquishunchij. Chashna rurashpaca Jehová  Diospajmanmi ashtahuan cꞌuchuyashun. Tandanacuicunaman ringapaj imapish jarcachunca mana saquinachu canchij. Chashnami shamuj punllacunapi gobiernocuna jarcajpipish tandanacuicunaman rinataca manataj saquishun (Hebreos 10:24, 25). Shinallataj gentecunata cazunapaj randica Diostami cazushun (Hechos 5:29).

9. ¿Llaqui punllacunapajca imamantataj huaquin textocunata de memoria yachana canchij?

⁹ Huaquin versocunata de memoria yachashunchij (Mateo 13:52). Huaquincunaca imata liyishcataca ratomi cungarinchij. Pero Jehová Diosmi paipaj espíritu santohuan imata liyishcata yuyarichun ayudanga (Juan 14:26). Shuj huauquica Alemania llajtapimi carcelpi carca. Paica: “Manaraj carcelpi cashpami 200 yalli versocunata de memoria yacharcani. Cai versocunata yuyarishpami ñucalla cashpapish cushilla sintirircani” ninmi. Cai huauquica achca textocunata de memoria yachashcamantami llaquicunahuan cashpapish Diosmanta manataj caruyarca.

10. ¿Huaquin cantocunataca imamantataj de memoria yachana canchij?

¹⁰ Cantana libromanta, jw.org paginapi tiyaj cantocunatapish de memoria yachashunchij. Apóstol Pablo, Silaspish huaquin cantocunatami de memoria yachashcacuna carca. Chaimantami carcelpi cashpaca Jehová Diosta cantarcacuna (Hechos 16:25). Huaquin huatacuna huashamanpish Unión Soviética nishca llajtamanta huauqui panicunataca Siberia llajtamanmi cacharcacuna. Chaipimi paicunapish feta sinchiyachingapaj Diosta cantarcacuna. Pani Mariya Fedunca: ‘Ñucanchij cantana libromanta yachashca cantocunatami cantarcanchij. Cai cantocunata cantashpaca tucuicunami animarircanchij. Shinallataj Jehová Diospaj cꞌuchullapi cashcatapishmi sintircanchij’ nircami. Ñucanchij munashca cantocunata cantashpaca achcatami animarishun. Cashna cantocunata de memoria yachashunchij (“ Ama manchangapaj fuerzata cuhuai” nishca recuadrota ricui).

11, 12. a) 1 Samuel 17:37 y 45 al 47-pi nishca shinaca Davidca ¿imamantataj mana mancharca? b) ¿Davidmantaca imatataj yachanchij?

¹¹ Llaqui punllacunata chꞌimbapurangapajca mana manchajcunami cana canchij. ¿Manchaihuan shina sintirishpaca imatataj rurana canchij? Mana manchaj cangapajca jatun  cana, sinchi cana, yachaj canaca mana minishtirinchu. Davidpaj ejemplota ricushun. Paica jovenraj cashpaca Goliat runahuanmi macanacurca. Goliatca manchanai jatun runami carca. Davidca gentecunahuan macanacungapajpish mana preparadochu carca. Shuj lanzallatapish mana charircachu. Pero mana manchaj cashcamantami chai jatun tucushca runahuan macanacungapaj callpashpa rirca.

¹² ¿Davidca imamantataj mana manchaj carca? Paica tucui shunguhuanmi Jehová Dios ayudanata crirca (1 Samuel 17:37, 45-47-ta liyipai). Davidca, Goliatca dimastij jatun runami can. Paitaca mana mishai tucushachu nishpaca mana yuyarcachu. Ashtahuanpish Jehovapaj ñaupajpi Goliat uchilla cashcatami yuyarca. Ñucanchijpish Jehová Dios ayudanatami crina canchij. Shinallataj ñucanchijta jarcajcunaca Diospaj ñaupajpi imapaj mana valishca cashcatami yuyana canchij. Chashna yuyashpaca mana manchashunchu (2 Crónicas 20:15; Salmo 16:8). Manaraj llaqui punllacuna shamujpi ama manchangapajca ¿imatataj rurana canchij?

13. ¿Mana manchaj cangapajca imallatataj rurana canchij?

¹³ Ama manchangapajca Diosmantami huillana canchij. Chashnami Diospi confianata yachashun. Pitapish mana manchashunchu (Proverbios 29:25). Yuyashun. Fuerzata charingapajca ejerciciocunata ruranataca mana saquinachu canchij. Shinallataj mana manchaj cangapajca maipi cashpapish huillanataca manataj saquinachu canchij. Cunan punllacunapi mana manchaihuan huillashpaca, shamuj punllacunapipish Diosmanta huillachun jarcajpica manataj manchashunchu (1 Tesalonicenses 2:1, 2).

14, 15. ¿Pani Nancy, pani Valentinamantaca imatataj yachanchij?

¹⁴ Diosta sirvij ishqui panicunapaj ejemplomanta yachashun. Pani Nancy Yuenca China llajtamantami carca. Paica shuj metro y mediotami midirca. Pero uchilla cashpapish pitapish mana mancharcachu. * Diospaj gobiernomanta huillanata manataj saquijpimi 20 huatata carcelpi churarcacuna. Autoridadcuna chai panita juzgacushpaca, “cai huarmipaj crishcacunataca mana pi cambiai tucuncunaca” nircacunami.

¹⁵ Caishuj panica Valentina Garnovskaya shutimi carca. Paica Unión Soviética llajtapimi casi 21 huatacunata carcelpi carca. * Quimsa cutinmi paitaca carcelpi churarcacuna. Shinapish Diosmanta huillanataca manataj saquisha nircachu. Chaimi autoridadcunaca, “cai huarmica dimastij peligrosami can” nijcuna carca. Cai ishqui panicunaca ¿imamantataj mana manchajcuna carca? Paicunaca Jehová Diospi tucui shunguhuan crishcamantami imata mana manchajcuna carca.

16. ¿Mana manchaj cangapajca imatataj rurana canchij?

¹⁶ Mana manchaj cangapajca ñucanchij fuerzapi, o ñucanchij rurai pudishcacunapica mana confianachu canchij. Chaipaj randica Yayitu Diospimi tucui shunguhuan confiana canchij. Paimi ñucanchijta ayudanga (Deuteronomio 1:29, 30; Zacarías 4:6). Diospi confiashpami imata mana manchashun.

17, 18. Juan 15:18 al 21-pi nishca shinaca ¿Jesusca ñucanchijcunahuan ima tucunatataj nirca?

¹⁷ Tucuicunami ñucanchijta respetachun munanchij. Pero gentecuna ñucanchijta mana respetajpica imapaj mana valinichu nishpaca mana yuyanachu canchij. Jesusca: “Runa Aichayujta caticushcamanta runacuna pꞌiñajpi, mana ricunachishpa paicunapuramanta anchuchijpi, cancunapaj shutitaca millaita rurajta shina yangata rurashpa cꞌamijpipish cushichishcami canguichij” nircami (Lucas 6:22).

¹⁸ Ñucanchijta pꞌiñachunca mana munanchijchu. Pero Jesús mandashcacunata pajtachishcamanta, Diosmantapish huillashpa causashcamantami ñucanchijta pꞌiñancuna. Jesusca chashna tucuna cashcatami huillarca (Juan 15:18-21-ta liyipai). Diosta cꞌuyashcamanta, gentecuna pꞌiñajpica mana llaquilla sintirinachu canchij. Gentecunata cushichinapaj randica Yayitu Diostami cushichina canchij.

19. ¿Apostolcuna shinaca imatataj rurana canchij?

¹⁹ Testigocuna cashcamanta shujtaj gentecuna rimajpipish mana manchanachu canchij (Miqueas 4:5). Gentecunata ama manchangapajca apostolcunapaj ejemplotami catina canchij. Panda yachachijcunaca paicunataca achcatami pꞌiñajcuna carca (Hechos 5:17, 18, 27, 28). Chashnapish Jesús huañushca qꞌuipaca apostolcunaca Diospaj huasiman rinataca manataj saquircacunachu. Shinallataj Diosmanta huillashpami Jesusta catijcuna cashcataca tucui gentecunaman ricuchircacuna (Hechos 5:42). Ñucanchijpish escuelapi, colegiopi, trabajopimi testigo de Jehovacuna cashcata huillana canchij. Chashnami mana manchaj cashcata ricuchishun (Hechos 4:29; Romanos 1:16).

20. ¿Shujtajcuna pꞌiñajpipish apostolcunaca imamantataj cushilla sintirircacuna?

²⁰ Apostolcunaca Diospaj munaita pajtachijpi shujtajcuna pꞌiñashcataca allimi yacharcacuna. Chaimantami llaquilla sintirinapaj randica cushilla sintirircacuna (Lucas 6:23; Hechos 5:41). Achca huatacuna qꞌuipami apóstol Pedroca: “Llaquita apashpaca cushichishcami canguichij” nishpa escribirca (1 Pedro 2:19-21; 3:14). Ñucanchijcuna allita rurangapaj esforzarijpi shujtajcuna pꞌiñanataca allimi yachanchij. Pero paicuna pꞌiñajpipish Jehová Diosta sirvinataca manataj saquinachu canchij.

21, 22. a) ¿Sinchi punllacunapi ahuantangapajca imatataj rurana canchij? b) ¿Catij yachaipica imatataj yachashun?

²¹ Diosmanta huillachun ima hora jarcanataca mana yachanchijchu. Pero cunan punllacunami Jehová Diosmanta ashtahuan yachashpa catina canchij. Shinallataj mana manchaj cangapajmi esforzarina canchij. Shujtajcuna pꞌiñajpipish imata rurana cashcatami yuyarina canchij. Cunanmanta chaita rurashpaca shamuj punllacunapipish Jehová Diosta sirvinataca manataj saquishunchu.

²² Pero shuj punlla autoridadcuna Diosmanta huillachun ña mana saquijpica ¿imatataj rurashun? Catij yachaipimi mana manchashpa Diosta sirvishpa catingapaj imata rurana cashcata yachashun.