1. Соске ваљани те спремина амен башо прогонство?

И РАТ англедер те мударен ле, амаро Господари о Исус вакерѓа кај о мануша ка мрзинен са околен со ка овен лескере ученикија (Јован 17:14). Оттегани па са џи авдиве, окола со на служинена е Јеховаске прогонинена е верна христијанен (2. Тим. 3:12). Сар со аваја са попаше џи ко крајо акале светоскоро, џанаја кај амаре душмања панда повише ка противинен пе аменге (Мат. 24:9).

2-3. а) Соске и дар шај те овел опасно? б) Со ка дикха ки акаја статија?

² Сар шај панда акана те спремина амен башо прогонство? На ваљани те замислина аменге саве лошна буќа шај те случинен пе аменге. Ако кераја адава, шај добором бут те дара хем те секирина амен со шај ка чхинава те служина е Јеховаске чак панда англедер те авен о испитија (Изр. 12:25; 17:22). И дар тани силно оружје ко васта амаре душманеске, е Бенгеске (1. Пет. 5:8, 9). Со шај те кера панда авдиве те шај те спремина амен башо прогонство со ка авел ки иднина?

³ Ки акаја статија ка дикха сар шај те кера позорало амаро амалипе е Јеховаја хем соске тано бут важно те кера адава панда акана. Исто аѓаар, ка дикха сар шај те ова похрабра, хем со шај те кера кеда о мануша мрзинена амен.

4. Спрема Евреите 13:5, 6, ко со мора те ова увериме, хем соске тано важно адава?

⁴ Ов уверимо кај о Јехова мангела тут хем кај никогаш нане те мукхел тут. (Читин Евреите 13:5, 6.)  Ко јекх попурано број тари Стражарско кула пишинела сине: „Кобор пошукар пенџараја е Девле добором побари доверба ка овел амен ки лесте кеда ка овел амен прогонство“. Кобор точна тане акала лафија! Те шај те истрајна кеда ка овен амен прогонствија, мора те манга е Јехова, те овел амен целосно доверба ки лесте хем ни најхари те на сумнина амен ко лескоро мангипе спрема аменде (Мат. 22:36-38; Јак. 5:11).

5. Со ка поможинел туке те уверине тут кај о Јехова мангела тут?

⁵ Џикоте читинеа и Библија секова диве тли цел нека овел те ове панда попаше е Јеховаја (Јак. 4:8). Џикоте читинеа, размислин башо е Јеховаскере шуже особине сар сој о мангипе, и милост хем о шукарипе. Трудин тут те хаљове кобор бут мангела тут џикоте читинеа башо буќа со вакерѓа хем керѓа (2. Мој. 34:6). Несаве манушенге тано пхаро те верујнен кај о Девел мангела лен, соске никој ко живото на сикавѓа ленге мангипе. Ако ту да осетинеа тут аѓаар, шај секова диве те пишине туке ко саве начинија о Јехова сикавѓа туке милост хем шукарипе (Пс. 78:38, 39; Рим. 8:32). Џикоте размислинеа башо лична искуствија со доживинѓан лен хем башо адава со читинеа ко е Девлескоро Лафи, веројатно ка шај те сетине тут ко бут буќа со керѓа туке о Јехова. Кобор повише ценинеа са адава со керела о Јехова добором попаше ка ове леа (Пс. 116:1, 2).

6. Спрема Псалм 94:17-19, сар адава со ка молине тут таро вило шај те поможинел туке?

⁶ Молин тут редовно. Замислин јекхе тикне чхаве ки пле дадескири ангали. Адалеске со осетинела пе сигурно хем слободно, о чхаво вакерела пле дадеске башо са о шукар хем лошна буќа со случинѓе пе леске адава диве. Ту да шај аѓаар те ове паше е Јеховаја ако таро вило молинеа тут леске секова диве. (Читин Псалм 94:17-19.) Кеда молинеа тут, „асвенцар вакер е Јеховаске са со иси тут ко вило“. Вакер тле мангле Дадеске кола буќа керена те дара хем те секирине тут (Плач 2:19). Саво ка овел о резултати? Ка овел тут „о мир таро Девел, кова сој упредер секоја мисла“ (Фил. 4:6, 7). Ако молинеа тут ко асавко начин, ка ове са попаше е Јеховаја (Рим. 8:38, 39).

7. Соске тано важно чаче те верујне кај е Девлескере ветувања башо Царство ка исполнинен пе?

⁷ Ов уверимо кај е Девлескоро Царство чаче ка анел о берекетија со ветинѓа лен (4. Мој. 23:19). Ако на сиан уверимо ко адава, о Сатана хем окола со контролиринела лен ка шај бут локхе те даравкерен тут (Изр. 24:10; Евр. 2:15). Сар шај те бајраре тли доверба ко е Девлескоро Царство панда акана? Чхив туке цел хор те проучине о ветувања со керена лафи башо Царство хем о причине соске шај те ове сигурно кај ка исполнинен пе. Сар ка поможинел туке адава? Размислин башо пример е пхралескоро Стенли Џонс, кова со сине ко затвор ефта берш баши пли вера. Со поможинѓа леске те ачховел верно? Ов вакерѓа: „Мли вера сине зорали адалеске со џанава сине со са  ка керел е Девлескоро Царство, никогаш на сумнинѓум ман ко адава. Никој нашти сине те чхивел ман те откажинав ман таро Јехова“. Ако иси тут силно вера ко адава со ветинѓа о Девел, ка ове попаше е Јеховаја, хем и дар нане те чхинавел тут те служине леске (Изр. 3:25, 26).

8. Со сикавела амаро стави башо состанокија? Објаснин.

⁸ Ов редовно ко состанокија. О состанокија поможинена аменге те ова попаше е Јеховаја. Амаро стави башо состанокија сикавела дали ка успејна те издржина о прогонствија со ка овен амен ки иднина (Евр. 10:24, 25). Соске шај те вакера акава? Ако мукхаја тикне буќа те чхинавен амен те џа ко состанокија авдиве, сар ка овел ки иднина кеда шај ка ваљанел те ризикујна амаро живото или слобода те шај те кхеда амен амаре пхраленцар хем пхењенцар? Тари јавер страна, ако сием одлучна те џа редовно ко амаре состанокија, нане те чхинава те кхеда амен кеда о противникија ка манген те чхинавен амен ко адава. Акана тано о време кеда ваљани те развина мангипе башо состанокија. Ако иси амен желба те џа ко состанокија, тегани нисаво противибе хем нисави забрана нане те чхинавел амен таро адава „повише те шуна е Девле, него е манушен“ (Дела 5:29).

9. Соске о сикљојбе стихија ки годи тано шукар начин те спремина амен башо прогонство?

⁹ Сикљов ки годи тле омилена стихија (Мат. 13:52). Шај на памтинеа шукар, ама о Јехова шај те користинел пло силно свети дух те поможинел туке те сетине тут ко адала стихија (Јован 14:26). Приметин со вакерѓа јекх пхрал со сине чхивдо ки самица ко јекх затвор ки Источно Германија: „Сиум сине бут бахтало со џи тегани сиклиљум ки годи повише таро 200 стихија! Иако сиум сине коркори, сиум сине зафатимо соске размислинава сине башо бут библиска теме“. Адала стихија поможинѓе амаре пхралеске те ачховел паше е Јеховаја хем верно те истрајнел.

10. Соске ваљани те сикљова ки годи о теократска гиља?

¹⁰ Гиљав хем сикљов ки годи о теократска гиља. Кеда сине ко затвор ко Филипи, о Павле хем о Сила фалинѓе е Јехова гиленцар кола со џанена лен сине ки годи. (Дела 16:25). Ко слично начин ачхиле зорале амаре пхраља таро пурано Советско Сојуз кеда сине ингарде ко Сибир. Јекх пхен со викинела пе Марија Федуњ вакерѓа: „Гиљаваја сине са о гиља тари амари песнарка со џанаја лен сине ки годи“. Исто аѓаар, ој вакерѓа кај адала гиља охрабринѓе лен саринен хем поможинѓе ленге те осетинен пе попаше е Јеховаја.  Дали овела позорали тли вера кеда ту да гиљавеа тле омилена теократска гиља? Бут тано важно те сикљове лен ки годи панда акана. (Дикх и рамка „ Де ман храброст“.)

11-12. а) Спрема 1. Самоилова 17:37, 45-47, соске о Давид сине добором храбро? б) Која важно бути шај те сикљова таро Давид?

¹¹ Те шај те соочине тут прогонствоја, ваљанела туке храброст. Со шај те кере ако мислинеа кај на сиан храбро? И чачутни храброст на зависинела таро адава кобор сиан баро хем силно или саве способностија иси тут. Размислин башо пример е терне Давидескоро кеда соочинѓа пе е Голијатеа. Ако спорединаја е Давиде акале баре манушеа, ов сине потикно, послабо хем скоро на сине ле оружје. Чак на сине ле ни мачи. Ама, о Давид храбро прастандило те боринел пе акале гордо џинеа.

¹² Соске о Давид сине добором храбро? Ов сине уверимо кај о Јехова тано леа. (Читин 1. Самоилова 17:37, 45-47.) О Давид на мислинѓа ко адава кобор сине побаро лестар о Голијат. Ов мислинѓа ко адава кобор о Голијат сине тикно спрема о Јехова. Со сикљоваја таро акава извештај? Ка ова храбра ако сием увериме кај о Јехова тано аменцар хем ако на бистраја кај амаре противникија тане бут потикне таро Семоќно Девел (2. Лет. 20:15; Пс. 16:8). Сар шај те ова похрабра панда акана, англедер те авел о прогонство?

13. Сар шај те овел амен побари храброст? Објаснин.

¹³ Шај те ова похрабра панда авдиве аѓаар со ка проповедина е манушенге о шукар хабери башо е Девлескоро Царство. Кеда проповединаја, сикљоваја те овел амен доверба ко Јехова хем те на овел амен дар таро мануша (Изр. 29:25). Исто сар со амаре мускулија овена позорале кеда вежбинаја, аѓаар амари храброст овела побари кеда проповединаја таро кхер ко кхер, ко прометна тхана, неформално хем ко деловна подрачја. Ако трудинаја амен храбро те проповедина авдиве, ка ова спремна те проповедина чак ако о властија забранинена амаре активностија (1. Сол. 2:1, 2).

14-15. Со шај те сикљова тари Ненси Јуен хем тари Валентина Гарновскаја?

¹⁴ Бут шај те сикљова таро пример е дује верна пхењенгоро кола со сикавѓе бари храброст. И Ненси Јуен на сине учи ни јекх метро текваш, ама на мукхља о јавера локхесте те даравен ла. * Ој на мангља те  чхинавел те проповединел о шукар хабери башо е Девлескоро Царство. Адалеске сине пханли повише таро 20 берш ки комунистичко Кина. О службеникија со испрашинѓе ла вакерѓе кај ој тани и „најбари инатчика“ ки цело ленгири пхув.

¹⁵ Нешто слично случинѓа пе е пхењаја Валентина Гарновскаја. Ој сине пханли трин пути ко пурано Советско Сојуз хем вкупно накхља 21 берш ко затвор. * Соске? Ој сине одлучно понадари да те проповединел со чак прогласинѓе ла сар „бут опасно криминалцо“. Со поможинѓа акале дује верна пхењенге те овен добором храбра? Ола сине увериме кај о Јехова тано ленцар.

16. Со ваљани аменге те шај те ова чаче храбра?

¹⁶ Сар со дикхлем џи акана, те шај те овел амен побари храброст, на смејнаја те овел амен доверба ки аменде. Наместо адава, ваљани те овел амен доверба кај о Јехова тано аменцар хем кај ов ка боринел пе баши аменде (5. Мој. 1:29, 30; Зах. 4:6). Само аѓаар шај те ова чаче храбра.

17-18. Спрема Јован 15:18-21, саво предупредување денѓа амен о Исус? Објаснин.

¹⁷ Сарине осетинаја амен бут шукар кеда о јавера поштујнена амен. Ама, ако о мануша на мангена амен, на смејнаја те мислина кај на врединаја. О Исус вакерѓа: „Бахтале сиен кеда о мануша мрзинена тумен хем кеда палдена тумен таро пло тхан хем вреџинена тумен хем каљарена тумаро анав башо манушикано Чхаво“ (Лука 6:22). Со мангља те вакерел акале лафенцар?

¹⁸ О Исус на мангља те вакерел кај е чачутне христијаненге ка овел шукар кеда о мануша ка мрзинен лен. Наместо адава, ов мангља те предупрединел амен башо нешто со ка случинел пе аменге. Амен на сием дело таро акава свето. Освен адава, живинаја спрема е Исусескере сикљојба хем проповединаја о исто хабери кова со проповединѓа ле ов. Адалеске, о свето мрзинела амен. (Читин Јован 15:18-21.) Амен мангаја те кера бахтало е Јехова. Ако о мануша мрзинена амен адалеске со мангаја амаре Даде, адава тано ленгоро проблеми.

19. Сар шај те џа пало пример е апостоленгоро?

 ¹⁹ Бизи разлика со ка вакерен или ка керен о мануша, никогаш на ваљани те лаџа со сиан е Јеховаскоро сведоко (Мих. 4:5). Те шај те победина и дар таро мануша, шај бут те поможинел аменге ако размислинаја башо адава со керѓе о апостолија ко Ерусалим кратко откеда сине мудардо о Исус. Ола џанена сине кобор бут мрзинена лен о еврејска верска водачија (Дела 5:17, 18, 27, 28). Иако џанена сине адава, ола на гаравѓе кај тане е Исусескере ученикија, него понадари да џана сине ко храми секова диве хем проповединена сине (Дела 5:42). О апостолија на мукхле и дар те чхинавел лен. Амен да шај те победина и дар таро мануша ако на гараваја кај сием е Јеховаскере сведокија — са јекх дали ки бути, ки школа или ко тхан коте со живинаја (Дела 4:29; Рим. 1:16).

20. Соске о апостолија сине бахтале иако о јавера мрзинена лен сине?

²⁰ Соске о апостолија сине бахтале? Ола џанена сине соске о јавера мрзинена лен хем ленге сине чест со сине малтретириме башо адава со керена сине е Јеховаскири волја (Лука 6:23; Дела 5:41). О апостол Петар покасно пишинѓа: „Чак ако трпинена баши праведност, бахтале сиен“ (1. Пет. 2:19-21; 3:14). Ако џанаја кај о јавера мрзинена амен адалеске со кераја адава сој исправно, нане те мукха адава те чхинавел амен те служина е Јеховаске.

21-22. а) Со сиан одлучно те кере те шај те спремине тут башо прогонство? б) Со ка дикха ки наредно статија?

²¹ Амен на џанаја кеда ка овел амен прогонство или кеда ка овен забраниме амаре активностија. Сепак џанаја кај шај те спремина амен панда акана, аѓаар со ка кера позорало амаро амалипе е Јеховаја, ка ова похрабра хем ка сикљова сар те издржина кеда о противникија ка мрзинен амен. Адава со ка спремина амен панда авдиве ка поможинел аменге те ачхова зорале ко време со авела.

²² Ама, со те кера ако забранинена амаре активностија? Ки наредно статија ка дикха некобор библиска начелија кола со ка поможинен аменге те служина е Јеховаске чак кеда ка овел забрана.