1. Sose valjani te pripremine tut aso progonstvo?

I POSLEDNJO rat ando po dživdipe ki phuv, o Isus mothovdža so o sveto ka mrzini sa okoljen kola mangena te oven oljese učenikija (Jov. 17:14). Kotar tegani, pa sa dži avdije, okola kola na mangena e Jehova progoninena oljese verno slugen (2. Tim. 3:12). Sar avela popaše o kraj ando akava sveto, šaj te adžičera sa pobare progonstvija (Mat. 24:9).

2-3. (a) So valjani te džana andi dar? (b) Sostar ka vačera ko akava članko?

² Sar šaj pana akana te pripremina amen aso progonstvo? Na valjani te zamislina sa o lošna buča so šaj te desinen pe amendže, sose i dar hem i sikiracija šaj te mudaren amen. Ako razmislinaja odoljestar, i dar šaj te ovel odobor bari so šaj te čhinavi amen te služina e Jehovase, čak angljeder te ovel amen bilo save problemija (Posl. 12:25; 17:22). I dar tani moćno oružje kova amaro „protivniko, o Beng“ koristini protiv amende (1. Petr. 5:8, 9). So šaj akana te čera te pripremina amen te istrajina ko progonstvo?

³ Ko akava članko ka dikha sar šaj te ovel pozoralo amaro amaljipe e Jehovaja hem sose tano but važno akana te čera odova. Ka vačera hem sar šaj pana pobuter te ova hrabra. Ko krajo, ka dikha so šaj te čera ked o manuša mrzinena amen.

4. Premalo Jevrejima 13:5, 6, ko so valjani te ova uverime hem sose?

⁴ Ov uverimo so o Jehova mangela tut hem so niked na ka mukhel tut. (Čitinen Jevrejima 13:5, 6.) Ki Stražarsko kula angljeder but berša pisindža: „Okova kova šukar pendžari e Devlje ka ovel lje baro poverenje koro ljeste ked ka avel  o progonstvo.“ Kobor tano akava čače! Te šaj te istrajina ko progonstvo mora te manga e Jehova, potpuno te uzdajina amen koro ljeste hem ni hari te na sumnjina ko odova so ov mangela amen (Mat. 22:36-38; Jak. 5:11).

5. So ka pomožini tut te haljove kozom o Jehova mangela tut?

⁵ Čhiv tuče cilj svako dive te čitine i Biblija te šaj te ove popaše e Jehovaja (Jak. 4:8). Dži čitineja i Biblija, razmislin ando e Jehovase šuže osobine. Trudin tut te haljove kozom mangela tut dži čitineja odova so phendža hem so čerdža (Izl. 34:6). Disave manušendže tano pharo te verujinen so o Devel mangela ljen, sebepi so niked ko po dživdipe na osetindže sar tano ked neko mangela ljen. Ako hem tu adžahar osetineja tut, trudin tut svako dive te razmisline odoljestar sar o Jehova mothovdža mangipe hem šukaripe premalo tute (Ps. 78:38, 39; Rimlj. 8:32). Dži razmislineja ando teklje iskustvija hem ando odova so čitindžan ko e Devljeso Lafi, šaj ka dikhe but buča so o Jehova čerdža tuče. So poviše hijan zahvalno oljese, toklo amaljipe oljeja ka ovel pana pozoralo (Ps. 116:1, 2).

6. Premalo Psalam 94:17-19, sar šaj i molitva ando vilo te pomožini tut?

⁶ Svako dive molin tut. Zamislin jekhe čhavore sar bešela ko pe dadesi angalja. Ov osetini pe odobor sigurno so slobodno vačeri ljese sa so hine odova dive, hem o šukar hem o lošno. Hem tu šaj te ovel tut asavko odnos e Jehovaja ako svako dive ando vilo molineja tut. (Čitinen Psalam 94:17-19.) Dži molineja tut „sar pani čhor toklo vilo“ anglo Jehova hem phen ljese so mučini tut hem so daravi tut (Tužb. 2:19). So ka ovel palo odova? Ka osetine „e Devljeso mir, kova tano upreder i svako misao“ (Fil. 4:6, 7). Ked svako dive adžahar molineja tut, ka ove ljese popaše (Rimlj. 8:38, 39).

7. Sose valjani te ove uverimo so e Devljese obećanja ando oljeso Kraljevstvo ka ispuninen pe?

⁷ Ov uverimo so e Devljeso Kraljevstvo ka avel hem so ka ispuninen pe e Devljese lafija (Br. 23:19). Ako ti vera ko e Devljese obećanja nane zoralji, tegani e Bengese hem okoljendže kas ov koristini ka ovel polokho te daraven tut (Posl. 24:10; Jevr. 2:15). Sar šaj ti vera te ovel pozoralji ko e Devljeso Kraljevstvo? Odvojin vreme te istražine so o Devel obećindža ando po Kraljevstvo hem sose šaj te ove sigurno so o Devel ka ispunini sa so phendža. Sar odova ka pomožini tut? Te dikha o primer kotar amaro phral, o Stenli Džouns, kova sebepi pi vera efta berš hine ko phanljipe. * So pomožindža lje te ačhol verno e Jehovase? Ov phendža: „Mi vera hine zoralji odoljese so džandžum soj tano e Devljeso Kraljevstvo hem so ka čerel odova  Kraljevstvo hem niked na sumnjindžum ko odova. Odoljese, niko naštindža te čhivel man te mukhav e Jehova.“ Ako hijan uverimo so o Devel ka ispunini sa so phendža, ka ove popaše e Jehovaja hem na ka mukhe i dar te čhinavi tut te služine oljese (Posl. 3:25, 26).

8. Objasnin so šaj te mothovi amaro stav premalo sastankija.

⁸ Ov redovno ko sastankija. O sastankija pomožinena amen te ova popaše e Jehovaja. Amaro stav premalo odova kozom tano važno redovno te ava ko sastankija, šaj te mothovi da li ka istrajina ked ka avel o progonstvo (Jevr. 10:24, 25). Sose šaj te phena odova? Ako već akana sebepi o tikne pharipa na avaja ko sastankija, so ka ovel ako valjani te rizikujina amaro dživdipe te šaj te čeda amen amare phraljencar hem phenjencar? Ki aver strana, ako hor ko amaro vilo odlučindžam redovno te dža ko sastankija, tegani na ka čhinava ni ked o protivnikija ka zabraninen odova. Akana tano o vreme te manga te dža ko sastankija. Tegani, nisavo protivljenje, čak nisavi zabrana na ka čhinavi amen te šuna pobuter e Devlje, nego e manušen (Dela 5:29).

9. Sar odova so sikljovaja napamet o stihija šaj te pomožini amen te pripremina amen aso progonstvo?

⁹ Sikljov napamet o stihija kola najviše mangeja (Mat. 13:52). Iako amaro pamćenje nane savršeno, o Jehova šaj peklje sveto duhoja te pomožini amen te pamtina odola stihija (Jov. 14:26). Te dikha so phendža jekh phral kova hine ko phanljipe, ki samica, ki Istočno Nemačka: „But bahtalo hijum lje so dži tegani sikljiljum nekobor stotina stihija! Odola dive šaj hine hor te razmislinav kotar but e biblijake teme.“ O stihija pomožindže amare phraljese te ačhol verno hem paše e Jehovaja.

10. Sose valjani napamet te sikljova o džilja?

¹⁰ Sikljov napamet hem džilab o džilja koljencar hvalinaja e Jehova. Ked hine phanlje ko Filipi, o Pavle hem o Sila džilabdže džilja koljencar hvalindže e Jehova, a kola angljeder sikljilje (Dela 16:25). Isto adžahar, ked amare phralja hem phenja andi Rusija hine paldime ko Sibir, sar on kokri pes zorjačerdže? Amari phen, i Marija Fedun, setindoj ko odova vreme phenela: „Džilabdžam o džilja kola džandžam, džilja kotar i pesmarica.“ Oj phendža so odola džilja zorjačerdže sarinen hem pomožindže  ljen te oven popaše e Jehovaja. Da li hem tu osetineja tut ohrabrimo ked džilabeja teklje omiljena džilja? Odoljese, akana sikljov napamet odola džilja! (Dikh o okvir „ De man hrabrost“.)

11-12. (a) Premalo 1. Samuilova 17:37, 45-47, sose o David hine hrabro? (b) So sikljovaja kotar e Davideso primer?

¹¹ Te šaj te izdržine o progonstvo tuče valjani hrabrost. Ako osetineja so na hijan hrabro manuš, so šaj te čere? Ma te bistre so i pravo hrabrost na zavisini odoljestar kobor hijan baro, zoralo ja sposobno. Razmislin kotar o terno David ked suočindža pe e Golijateja. Ked uporedinaja e Davide odolje but bare manušeja, ov hine but tikno hem but slabo hem na hine opremimo te borini pe. O David, čak na hine lje ni mač. Ama, ov hine but hrabro. Ov hrabro prastandilo te borini pe odolje bare hem ponosno manušeja.

¹² Sose o David hine odobor hrabro? Ov hine uverimo so o Jehova tano oljeja. (Čitinen 1. Samuilova 17:37, 45-47.) O David na dikhlja kobor o Golijat hine pobaro oljestar. Ov dikhlja kobor o Golijat tano tikno ked uporedini pe e Jehovaja. So sikljovaja oljestar? Hem amen ka ova hrabra ako hijam uverime so o Jehova tano amencar hem so amare protivnikija nane ništa ked uporedinaja ljen e Najzoralje Devljeja (2. Let. 20:15; Ps. 16:8). Sar šaj akana te ova pana pohrabra, angljeder so ka avel o progonstvo?

13. Objasnin sar šaj te barjačera i hrabrost.

¹³ Ked vačeraja o šukar haberi kotar e Devljeso Kraljevstvo, amen barjačeraja amari hrabrost već akana. Sose tano odova adžahar? Odoljese so, ked propovedinaja amen sikljovaja te ovel amen poverenje ko Jehova hem te na dara e manušendar (Posl. 29:25). Sar so amare mišićija ovena pozoralje ked vežbinaja, hem amari hrabrost ka ovel pobari ked amen propovedinaja kotar čher ko čher, ko javna thana, neformalno hem ko poslovna thana. Ako akana hijam hrabra te propovedina, ka ova spremna te propovedina hem ked o vlastija ka zabraninen amaro delo (1. Sol. 2:1, 2).

14-15. So sikljovaja kotar amare phenja i Nensi Juen hem i Valentina Garnovskaja?

¹⁴ But šaj te sikljova kotar duj phenja kola hine but hrabra. Iako amari phen i  Nensi Juen hine uči samo metar tekvaš, ola našti hine lokho te darave. * Oj na manglja te čhinavi te propovedini o šukar haberi kotar e Devljeso Kraljevstvo. Odoljese, hine ko phanljipe pobuter ando 20 berš ki Kina. O policajcija kola ispitujindže la phendže so na dikhlje nikas ki oljengi phuv koj tano odobor „zoralje šereso“ sar oj.

¹⁵ Isto adžahar, hem amari phen i Valentina Garnovskaja, hine ko phanljipe trin putija ki Rusija okolo 21 berš. * Sose? Oj odobor hine odlučno te propovedini, so o policajcija phendže olače soj tani „but opasno kriminalco“. Sose akala duj phenja hine odobor hrabra? On hine uverime so o Jehova tano oljencar.

16. So valjani amendže te šaj čače te ova hrabra?

¹⁶ Sar so dikhljam, te šaj te barjačera i hrabrost, na isminaja te oslonina amen ki amari snaga hem ko amare sposobnostija. Valjani te ova uverime so o Jehova tano amencar hem so ov borini pe amendže (Pon. zak. 1:29, 30; Zah. 4:6). Adžahar, šaj čače te ova hrabra.

17-18. Premalo Jovan 15:18-21, ko so upozorindža amen o Isus? Objasnin.

¹⁷ Amen mangaja ked o manuša poštujinena amen, ama na valjani te mislina so ništa na vredinaja ako on na mangena amen. O Isus phendža: „Bahtalje hijen ked o manuša mrzinena tumen hem ked cidena pe tumendar hem ked asana tumendže hem ked lošno vačerena kotar tumaro nav sebepi o manušikano Čhavo“ (Luka 6:22). So značinena odola lafija?

¹⁸ O Isus na manglja te phenel so o hrišćanja valjani te uživinen ked o manuša mrzinena ljen. Ov upozorindža ko odova so šaj te desini pe amendže, sose na hijam deo akalje svetoso. Živinaja premalo odova so o Isus sikavdža amen hem propovedinaja o haberi kova hem ov propovedindža. Sebepi odova o sveto mrzini amen. (Čitinen Jovan 15:18-21.) Amen mangaja  te čera odova so o Jehova mangela. Ako o manuša mrzinena amen odoljese so amen mangaja amare Dade, tegani odova tano oljengo problemi.

19. Sar šaj te oponašina e apostolengo primer?

¹⁹ So god o manuša te čeren ja te phenen niked ma dozvolin sebepi odova te ovel tuče ladž so hijan e Jehovaso svedoko (Mih. 4:5). Amen šaj te sikljova sar te na dara ando manuša ako razmislinaja so čerdže o apostolija ko Jerusalim, palo e Isuseso meriba. On džandže kobor o judejska verska vođe mrzindže ljen (Dela 5:17, 18, 27, 28). Ipak, svako dive nastavindže te džan ko hram hem odoljeja so propovedindže mothovdže soj tane e Isusese učenikija (Dela 5:42). On na mukhlje i dar te čhinavi ljen. Hem amen šaj te pobedina amari dar ando manuša, ked vačeraja averendže so hijam e Jehovase svedokija, bilo on te oven amare amala ki buti ja ki škola ja amare komšije (Dela 4:29; Rimlj. 1:16).

20. Sose o apostolija hine bahtalje iako avera mrzindže ljen?

²⁰ Sose o apostolija hine bahtalje? On džandže sose avera mrzindže ljen hem oljendže hine čast te phiraven i ladž odoljese so čerdže odova so o Jehova mangela (Luka 6:23; Dela 5:41). Palo odova, o apostol Petar pisindža: „Ama ako hem valjani te patinen odoljese so hijen pravedna, bahtalje hijen“ (1. Petr. 2:19-21; 3:14). Ked amen haljovaja so avera mrzinena amen odoljese so amen čeraja odova soj tano ispravno, tegani niked na ka čhinava te služina e Jehovase sebepi so o manuša mrzinena amen.

21-22. (a) So tu odlučindžan te čere te pripremine tut aso progonstvo? (b) So ka dikha ko aver članko?

²¹ Amen na džanaja ked ka počmini o progonstvo ja ked o vlastija ka zabraninen amaro delo. Ama, džanaja so već akana šaj te pripremina amen adžahar so ka čera amaro amaljipe e Jehovaja te ovel pozoralo, ka barjačera i hrabrost hem ka sikljova te borina amen ked o manuša mrzinena amen. Sa so čeraja akana, ka pomožini amen te služina e Jehovase ked ka avel o progonstvo.

²² Ama, so te čera ako zabraninena amaro delo? Ko aver članko ka dikha kola načelija ka pomožinen amen te služina e Jehovase, čak hem ked ka ova zabranime.