1. Σόσκε πρέπει τι προετοιμάνας-αμέν ι ντιβεσένγκε σο κα τζαν αμέντζαρ κόντρα;

Ι ΙΡΑΤ πριν τι μουνταρέν-λες, αμαρό Κύριος ο Ιησούς βακερντάς ότι ο τζενέ κα μισίνεν σαρέ οντουλέν σο κα τραμπίνεν τι αβέν λέσκε μαθητές. (Ιωάν. 17:​14) Οτθάρ μπερί, ο τζενέ σο να πακιάνα κο Ιεχωβά τζάνα κόντρα κο πιστοί Χριστιανοί. (2 Τιμ. 3:​12) Καζόμ ερεσάσα κο τέλος ανταλέ ντουνιάσκο, μπεκλεντίνασα ότι αμαρέ ντουσμάνια κα τζαν αμέντζαρ ατζέ πιο μπουτ κόντρα.​—Ματθ. 24:9.

2, 3. (α) Σο πρέπει τι τζανάς ι νταριάκε; (β) Σο κα ντικχάς ανταλέ μαθημάστε;

² Σαρ κα προετοιμάνας-αμέν ακανά για τι νταϊντίνας κάνα κα τζαν αμέντζαρ κόντρα; Να χρειαζίντιβελα τι σκεφτίνας σαρέ οντουλά σο μπορεί τι αβέν-πες αμένγκε. Άμα κα κεράας-λες ανταβά, κα τασαβέλας-αμέν η νταρ ντα η ανησυχία. Κα νταράας αζόμ μπουτ σο κα τσσιναβάας τι υπηρετίνας ι Ιεχωβάς πριν τι αβένας αμένγκε ο δοκιμασίες. (Παρ. 12:​25· 17:​22) Η νταρ ισί εκ μπουτ ζουρανό όπλος σο “αμαρό ντουσμάνι, ο Μπενγκ”, χρησιμοποιήνελα για τι τσσιναβέλ-αμέν. (1 Πέτρ. 5:8, 9) Σο μπορίνασα τι κεράς ακανά για τι αβάς πιο ζουρανέ;

³ Ανταλέ μαθημάστε, κα σικλιάς σαρ τι κεράς πιο ζουρανί αμαρί φιλία ι Ιεχωβάσαρ ντα σόσκε ισί σημαντικός τι κεράς-λες ανταβά ακανά. Κα ντικχάς σο τι κεράς για τι αβάς ατζέ πιο μπίνταρανε. Ντα κα σικλιάς σο τι κεράς κάνα μισίνενα-αμέν.

4. Καλέ πραγμάσκε πρέπει τι αβάς σίγουροι σαρ βακερένα ο εδάφια Εβραίους 13:5, 6, ντα σόσκε;

⁴ Τι αβέν σίγουροι ότι ο Ιεχωβά μανγκέλα-τουμέν ντα να κα μουκχέλ-τουμέν ποτές. (Διαβάνεν Εβραίους 13:5, 6) Μπουτ  μπρεσά πιο τζανγκλέ, Η Σκοπιά βακερντάς: «Οντουβά σο τζανέλα ι Ντεβλές πιο λατσσές κα τθερέλ λέσκε πιο μπαρί εμπιστοσύνη κάνα κα αβέλ η δοκιμασία». Καζόμ μπαγιά ισί ανταβά! Για τι νταϊντίνας κάνα κα τζαν αμέντζαρ κόντρα, πρέπει τι μανγκάς ι Ιεχωβάς, τι τθεράς σαρί αμαρί εμπιστοσύνη λέστε ντα μα τι νακχέλ ιτς αμαρέ γκοντιάταρ ότι να μανγκέλα-αμέν.​—Ματθ. 22:​36-38· Ιακ. 5:11.

5. Σο κα βοηθίνελ-τουμέν τι νιωθίνεν ότι ο Ιεχωβά μανγκέλα-τουμέν;

⁵ Τι διαβάνεν ι Γραφή κάθε ντιβές για τι τζαν πιο πασέ κο Ιεχωβά. (Ιακ. 4:8) Καζόμ διαβάνενα, τι ντικχέν ο λατσσέ ιδιότητες ι Ιεχωβάσκε. Τι νιωθίνεν λέσκι αγάπη σο σικάντιβελα οντουλένταρ σο βακερέλα ντα κερέλα. (Έξοδ. 34:6) Ισί τζενέ σο ναστί πακιάνα ότι ο Ντεβέλ μανγκέλα-λεν επειδή ποτές να μανγκλάς-λεν καέκ τζενό. Άμα ανταβά αβέλα-πες τουμένγκε-ντα, τι γραφίνεν κάθε ντιβές εκχέ χαρτίστε σαρ τζιτζισάλο τουμένγκε ο Ιεχωβά ντα σαρ σικαντάς τουμένγκε λατσσιπέ. (Ψαλμ. 78:​38, 39· Ρωμ. 8:​32) Καζόμ κα ανέν τουμαρέ γκοντιάτε οντουλά σο αβιλέ-πες τουμαρέ ζωγιάτε ντα οντουλά σο διαβαντέν κο Λάφι κι Ντεβλέσκο, κα τθερέν τι γραφίνεν μπουτ πράγματα σο κερντάς τουμένγκε ο Ιεχωβά. Καζόμ πιο μπουτ εκτιμίνενα οντουλά σο κερέλα ο Ιεχωβά, αζόμ πιο ζουρανί κα αβέλ τουμαρί φιλία λέσαρ.​—Ψαλμ. 116:1, 2.

6. Σαρ κα βοηθίνελ-τουμέν η προσευχή σο κερένα αντράλ τουμαρέ γκίσταρ σαρ βακερένα ο εδάφια Ψαλμός 94:​17-19;

⁶ Μα τσσιναβέν τι προσευχίντιβεν. Ανέν τουμαρέ γκοντιάτε εκχέ χουρντές σο ισί κι τατί αγκάλι πι νταντέσκι. Νιωθίνελα αζόμ σιγουριά σο να νταρέλα τι βακερέλ λέσκε εμ ο λατσσέ εμ ο μπέτι πράγματα σο αβιλέ-πες οντουβά ντιβές. Κα τθερέν εκ ασακί φιλία ι Ιεχωβάσαρ άμα προσευχίντιβενα λέστε αντράλ τουμαρέ γκίσταρ κάθε ντιβές. (Διαβάνεν Ψαλμός 94:​17-19) Κάνα προσευχίντιβενα κο Ιεχωβά, “τι τσσορέν σαρ πανί τουμαρό γκι” ντα τι βακερέν τουμαρέ λατσσέ Νταντέσκε σο-ντα νταρ ή ανησυχία τθερένα. (Θρ. 2:​19) Σο κα αβέλ-πες άμα κα κερέν-λες ανταβά; Σαρ βακερέλα η Γραφή, κα τθερέν ι «ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα». (Φιλιπ. 4:6, 7) Καζόμ πιο μπουτ κα προσευχίντιβεν ανταλέ τροπόσαρ, αζόμ πιο πασέ κα νιωθίνεν κο Ιεχωβά.​—Ρωμ. 8:​38, 39.

7. Σόσκε πρέπει τι αβέν σίγουροι οντουλένγκε σο βακερέλα ο Ντεβέλ ότι κα κερέλ κι Βασιλεία;

⁷ Τι αβέν σίγουροι ότι η Βασιλεία ι Ντεβλέσκι κα ανέλ ευλογίες. (Αριθ. 23:​19) Άμα να ισινέν σίγουροι ότι ο Ντεβέλ κα κερέλ οντουλά σο βακερντάς, κα αβέλ πιο εύκολος ι Μπενγκέσκε ντα οντουλένγκε σο τθερέλα-λεν πι βαστέστε τι νταραβέν-τουμέν. (Παρ. 24:​10· Εβρ. 2:​15) Σο ισί λατσσό τι κερέν ακανά για τι αβέλ πιο ζουρανί τουμαρί πίστη οντουλέντε σο κα κερέλ η Βασιλεία ι Ντεβλέσκι; Κάνα σικλιαρένα-τουμέν κατά Γραφή, ρόντεν σο βακερέλα ο Ντεβέλ ότι κα κερέλ κι Βασιλεία ντα σικλιόν σόσκε μπορίνενα τι αβέν σίγουροι ότι κα αβέν-πες μπαγιά. Σαρ κα βοηθίνελ-τουμέν ανταβά; Ανέν τουμαρέ γκοντιάτε ι πφραλές Στάνλεϊ Τζόουνς σο ατσσιλό εφτά μπρες κι φυλακή μάξους ι  Ιεχωβάσκε ναβέσκε. * Σο βοηθιντάς-λες τι νταϊντίνελ ντα τι ατσσικιαρέλ πι πίστη; Βοβ βακερντάς: «Λιντόμ ζορ κατά πράγματα σο τζανάβας ι Ντεβλέσκε Βασιλειάκε ντα ισινόμας σίγουρος ότι κα αβέλ, ποτές να νακχλό μι γκοντιάταρ ότι να ισινέ μπαγιά, οτθάρ ατσσιλόμ σταθερός». Άμα τθερένα ζουρανί πίστη οντουλέντε σο βακερντάς ο Ντεβέλ ότι κα κερέλ, κα τζαν πιο πασέ κο Ιεχωβά ντα να κα μουκχέν ι νταρ τι τσσιναβέλ-τουμέν.​—Παρ. 3:​25, 26.

8. Σο σικλιάσα αμαρέ νεαυτόσκε κατά τρόπος σο ντικχάσα ο συναθροίσεις; Εξηγίνεν.

⁸ Μα χασαρέν ο συναθροίσεις. Ο συναθροίσεις βοηθίνενα-αμέν τι τζας πιο πασέ κο Ιεχωβά. Ο τρόπος σο ντικχάσα ο συναθροίσεις σικαβέλα αμένγκε σο κα κεράς κάνα κα τζαν αμέντζαρ κόντρα. (Εβρ. 10:​24, 25) Σόσκε βακεράσα-λες ανταβά; Άμα μουκχάσα χουρντέ πράγματα τι κερέν-αμέν τι χασαράς συναθροίσεις ακανά, σο κα αβέλ-πες άμα ανγκλ’ αμέντε κα χρειαζίντιβελ τι τσσουβάς αμαρό νεαυτός σε κίνδυνος για τι αβάς κο συναθροίσεις αμαρέ πφραλέντζαρ ντα πφενίντζαρ; Άμα ακανά να χασαράσα ο συναθροίσεις σο-ντα τι αβέλ-πες, να κα ντας καν οντουλέντε σο κα προσπαθίνεν τι τσσιναβέν-αμέν τι τζας κο συναθροίσεις. Ακανά ισί ο σαάτι τι μπαριαράς αμαρί αγάπη ι συναθροισιένγκε. Άμα μανγκάσα αμαρέ συναθροίσεις, καέκ τζενό σο κα τζαλ αμέντζαρ κόντρα ντα καέκ νόμος κατά κυβερνήσεις να κα κερέλ-αμέν τι τσσιναβάς τι ασουνάς ι Ντεβλές.​—Πράξ. 5:29.

9. Σόσκε ισί λατσσό τι σικλιάς αβριάλ εδάφια για τι προετοιμάντιβας ι ντιβεσένγκε σο κα τζαν αμέντζαρ κόντρα;

⁹ Σικλιόν αβριάλ τουμαρέ αγαπημέ εδάφια. (Ματθ. 13:​52) Μπορεί μα τι ατσσικιαρένα μπουτ πράγματα τουμαρέ γκοντιάτε, αλλά ο Ιεχωβά, αντράλ πι ζουρανέ άγιε πνευμάσταρ, μπορίνελα τι ανέλ πάλι τουμαρέ γκοντιάτε ανταλά εδάφια. (Ιωάν. 14:​26) Ντικχέν σο βακερντάς εκ πφραλ σο ισινέ φυλακή κι Ανατολική Γερμανία ντα τθερένας-λες κορκορό εκχέ τθανέστε: «Σο σουκάρ ισινέ σο μέχρι αζομάν σικλιλόμας αβριάλ πιο μπουτ από 200 εδάφια! Ανάβας μι γκοντιάτε μπουτ πράγματα κατά Γραφή ντα αντικάς πφεράβας οντουλά τσουτσέ ντιβεσά». Οντουλά εδάφια βοηθιντέ αμαρέ πφραλές τι ατσσόλ πασέ κο Ιεχωβά, τι νταϊντίνελ ντα τι ατσσικιαρέλ πι πίστη.

10. Σόσκε πρέπει τι σικλιάς αβριάλ ο ύμνοι ντα ο γκιλιά σο ισί αμαρέ ιστοτοπόστε;

¹⁰ Τι σικλιόν αβριάλ ντα τι γκιλιαβέν ύμνοι ντα γκιλιά αμαρέ ιστοτοπόσταρ σο ισαρένα ι Ιεχωβάς. Κάνα ο Παύλος ντα ο Σίλας ισινέ φυλακισμέ κο Φίλιπποι, γκιλιαβένας ύμνοι  σο τζανένας-λεν αβριάλ. (Πράξ. 16:​25) Σαρ λένας ζορ αμαρέ πφραλά-ντα κι πρώην Σοβιετική Ένωση κάνα πάλντενας-λεν λένγκε κχερένταρ ντα γκερένας-λεν κι Σιβηρία; Η πφεν Μαρίγια Φεντούν βακερντάς: «Γκιλιαβάας σαρέ ο ύμνοι σο τζανάας, ο ύμνοι κατά υμνολόγιος». Βακερντάς ότι οντουλά ύμνοι ντινέ σαριλέντε ζορ ντα βοηθιντέ-λεν τι νιωθίνεν πιο πασέ κο Ιεχωβά. Τουμέν, αγαβένα ότι λένα ζορ κάνα γκιλιαβένα τουμαρέ αγαπημέ ύμνοι ντα γκιλιά σο ισί αμαρέ ιστοτοπόστε; Οντουλέσκε σικλιόν-λεν αβριάλ ακανά!​—Ντικχ ο πλαίσιος « Ντε-μαν Θάρρος».

11, 12. (α) Σόσκε ισινέ μπίνταρανο ο Δαβίδ σαρ βακερένα ο εδάφια 1 Σαμουήλ 17:​37, 45-47; (β) Καβά σημαντικός πράγμας σικλιάσα κατά Δαβίδ;

¹¹ Για τι νταϊντίνεν κάνα κα τζαν τουμέντζαρ κόντρα, πρέπει τι αβέν μπίνταρανε. Άμα πακιάνα ότι να ισινέν μπίνταρανε, σο ισί λατσσό τι κερέν; Μα μπιστρέν ότι για τι αβέν μπαγιά μπίνταρανε να χρειαζίντιβελα τι αβέν μπουτ βουτσσέ ή ζουρανέ. Ντεν-τουμέν γκοντί ι τερνέ Δαβιδίς σο τσσουντάς-λεν με το Γολιάθ. Ανγκλάλ οντουλέ γιγαντάστε, ο Δαβίδ ισινέ χουρντό, μπίζουρανο ντα να τθερέλας ούτε σπαθίς. Αλλά να νταρέλας ιτς. Τθαβντισάλο μπίνταρανες τι πολεμίνελ οντουλέ μπαρικανέ γιγαντάς.

¹² Σόσκε ισινέ ο Δαβίδ αζόμ μπίνταρανο; Πακιάλας σαρέ πι γκίσαρ ότι ο Ιεχωβά ισινέ λέσαρ. (Διαβάνεν 1 Σαμουήλ 17:​37, 45-47) Ο Δαβίδ να ντικχλάς καζόμ μπαρό ισινέ ο Γολιάθ ανγκλά-λέστε, αλλά καζόμ χουρντό ισινέ ο Γολιάθ ανγκλάλ κο Ιεχωβά. Σο σικλιάσα ανταλέ ιστοριάταρ; Κα αβάς μπίνταρανε άμα πακιάσα σαρέ αμαρέ γκίσαρ ότι ο Ιεχωβά ισί αμέντζαρ ντα άμα ισινάμ σίγουροι ότι αμαρέ ντουσμάνια ισί μπουτ χουρντέ ανγκλάλ κο Ντεβέλ σο ισί ο πιο Ζουρανό σαριλένταρ. (2 Χρον. 20:​15· Ψαλμ. 16:8) Σο κα κεράς ακανά για τι αβάς ατζέ πιο μπίνταρανε πριν τι τζαν αμέντζαρ κόντρα;

13. Σαρ κα αβάς ατζέ πιο μπίνταρανε; Εξηγίνεν.

¹³ Κα αβάς ατζέ πιο μπίνταρανε ακανά άμα βακεράσα κο τζενέ ο λατσσέ αμπέρια ι Ντεβλέσκε Βασιλειάκε. Σόσκε; Κάνα βακεράσα ο λατσσέ αμπέρια σικλιάσα τι τθεράς εμπιστοσύνη κο Ιεχωβά ντα μα τι νταράς κατά τζενέ. (Παρ. 29:​25) Σαρ αμαρό σώμας αβέλα πιο ζουρανό κάνα γυμνάντιβασα, αντικάς αμέν-ντα αβάσα πιο μπίνταρανε κάνα βακεράσα ο λατσσέ αμπέρια κχερ κχερέστε, κο τθανά σο γκιντίντιβενα μπουτ τζενέ, κο μαγαζιά, ατζέ-ντα κάνα να ισινάμ κο έργος. Άμα κεράσα ο πιο λατσσό ακανά για τι βακεράς ο λατσσέ αμπέρια μπίνταρανες, κα αβάς λατσσές προετοιμασμέ για μα τι τσσιναβάς τι κεράς-λες ανταβά  ατζέ-ντα κάνα ο κυβερνήσεις να κα μουκχέν-αμέν τι κεράς ο έργος.​—1 Θεσ. 2:1, 2.

14, 15. Σο σικλιάσα κατά Νάνσι Γιουέν ντα κατά Βαλεντίνα Γκαρνόφσκαγια;

¹⁴ Σικλιάσα μπουτ πράγματα ντουέ πιστέ πφενίνταρ σο ισινέ μπίνταρανε. Η Νάνσι Γιουέν παρόλο σο να ερεσέλας εκ επκάς μέτρος κο βουτσσιπέ, να νταρέλας. * Να τσσιναντάς τι βακερέλ ο λατσσέ αμπέρια ι Ντεβλέσκε Βασιλειάκε. Οντουλέσκε, ατσσιλί κι φυλακή πιο μπουτ από 20 μπρεσά κι κομμουνιστική Κίνα. Οντουλά σο κερντέ-λα ανάκριση βακερντέ ότι τθερέλας «μπουτ πφαρό σορό», πιο μπουτ σαριλένταρ οντουλέ τθεμέστε!

¹⁵ Η Βαλεντίνα Γκαρνόφσκαγια τσσουβντιλί βόι-ντα φυλακή τριν φαρ κι πρώην Σοβιετική Ένωση ντα νακχλάς 21 μπρεσά κι φυλακή. * Σόσκε; Σο-ντα τι αβέλας-πες να τσσιναβέλας τι κερέλ έργος, οτθάρ βακερντέ ότι ισινέ «μπουτ επικίνδυνη εγκληματίας». Σο κερντάς ανταλέ ντουέ πιστέ πφενίν τι αβέν αζόμ μπίνταρανε; Ισινέ σίγουρες ότι ο Ιεχωβά ισινέ λέντζαρ.

16. Σο πρέπει τι κεράς για τι αβάς μπαγιά μπίνταρανε;

¹⁶ Σαρ ντικχλάμ, για τι αβάς ατζέ πιο μπίνταρανε δεν πρέπει τι ντας μπέσα αμαρέ ζοριάτε. Πρέπει τι πακιάς ότι ο Ιεχωβά ισί αμέντζαρ ντα ότι πολεμίνελα αμένγκε. (Δευτ. 1:​29, 30· Ζαχ. 4:6) Αντικάς κα αβάς μπαγιά μπίνταρανε.

17, 18. Σο βακερντάς ο Ιησούς ότι κα αβέλας-πες αμένγκε σαρ ντικχάσα κο εδάφια Ιωάννης 15:​18-21; Εξηγίνεν.

¹⁷ Μπεϊντίνασα τι σεβάνεν-αμέν ο γιαβερά, αλλά δεν πρέπει τι πακιάς ότι να τθεράσα αξία άμα να μανγκένα-αμέν ο τζενέ. Ο Ιησούς βακερντάς: «Ευτυχισμέ ισινέν κάνα ο τζενέ μισίνενα-τουμέν ντα κάνα να μανγκένα-τουμέν σαρ αμαλά ντα πρασάνα-τουμέν ντα χαλαβένα τουμαρό ναβ ιτιρί κατά τζενέσκο Τσσαβό». (Λουκ. 6:​22) Σο μανγκέλας τι βακερέλ;

¹⁸ Ο Ιησούς να μανγκέλας τι βακερέλ ότι ο Χριστιανοί κα μπεϊντίνενας τι μισίνεν-λεν. Αλλά βακερντάς σο κα αβέλας-πες αμένγκε. Αμέν να τθεράσα σχέση ανταλέ ντουνιάσαρ. Κεράσα αμαρέ ζωγιάτε οντουλά σο σικλιαρντάς  ο Ιησούς ντα βακεράσα κο τζενέ ο λάφια σο βακερέλας. Οντουλέσκε, ο ντουνιάς μισίνελα-αμέν. (Διαβάνεν Ιωάννης 15:​18-21) Αμέν μανγκάσα τι κεράς ι Ιεχωβάσκο γκι. Άμα ο τζενέ μισίνενα-αμέν επειδή μανγκάσα αμαρέ Νταντές, ανταβά ισί λένγκο πρόβλημας.

19. Σαρ κα μοιάζας κο απόστολοι;

¹⁹ Μα μουκχέν ποτές οντουλά σο βακερένα ή κερένα ο τζενέ τι κερέν-τουμέν τι λατζάν σο ισινέν Μάρτυρες ι Ιεχωβάσκε. (Μιχ. 4:5) Κα σικλιάς τι νασκιαράς ι νταρ σο τθεράσα κατά τζενέ άμα ντάσα-αμέν γκοντί οντουλά σο κερντέ ο απόστολοι κι Ιερουσαλήμ σοράν κατά μεριπέ ι Ιησούσκο. Ο απόστολοι τζανένας καζόμ μπουτ μισίνενας-λεν ο Ιουδαίοι αρχηγοί ι θρησκειάκε. (Πράξ. 5:​17, 18, 27, 28) Αλλά να τσσιναντέ τι τζαν κάθε ντιβές κο ναός ντα τι βακερέν σαριλένγκε ότι ισινέ μαθητές ι Ιησούσκε. (Πράξ. 5:​42) Να μουκχλέ ι νταρ τι τσσιναβέλ-λεν. Αμέν-ντα κα νασκιαράς ι νταρ σο τθεράσα κατά τζενέ κάνα βακεράσα σαριλένγκε ότι ισινάμ Μάρτυρες ι Ιεχωβάσκε​—κι μπουτί, κο σχολείος ή οτθέ σο μπεσάσα.​—Πράξ. 4:​29· Ρωμ. 1:16.

20. Σόσκε ισινέ ευτυχισμέ ο απόστολοι παρόλο σο μισίνενας-λεν ο γιαβερά;

²⁰ Σόσκε ισινέ ευτυχισμέ ο απόστολοι; Τζανένας σόσκε μισίνενας-λεν, ντα ισινέ μπαρί χαρά λένγκε τι τσσίντεν ταλαιπωρία επειδή κερένας οντουβά σο μανγκέλας ο Ιεχωβά. (Λουκ. 6:​23· Πράξ. 5:​41) Ο απόστολος Πέτρος πιο σοράν γραφιντάς: «Ατζέ-ντα άμα νακχένα δυσκολίες για τη δικαιοσύνη, ισινέν ευτυχισμέ». (1 Πέτρ. 2:​19-21· 3:​14) Κάνα αγαβάσα ότι μισίνενα-αμέν επειδή κεράσα ο σωστός, ποτές να κα μουκχάς ο μίσος ι τζενένγκο τι πφερέλ-αμέν νταρ.

21, 22. (α) Σο αποφασιντέν τι κερέν ακανά για τι προετοιμάνεν-τουμέν ι ντιβεσένγκε σο κα τζαν αμέντζαρ κόντρα; (β) Σο κα ντικχάς κο γιαβέρ μάθημας;

²¹ Να τζανάσα κάνα ο τζενέ κα τζαν κόντρα αμέντζαρ ή κάνα ο κυβερνήσεις κα νικαβέν νόμος για τι τσσιναβάς τι κεράς ο έργος. Αλλά τζανάσα ότι μπορίνασα τι προετοιμάντιβας από ακανά άμα κεράσα πιο ζουρανί αμαρί φιλία ι Ιεχωβάσαρ, αβάσα ατζέ πιο μπίνταρανε ντα σικλιάσα σο τι κεράς κάνα ο τζενέ μισίνενα-αμέν. Οντουλά σο κεράσα ακανά για τι προετοιμάντιβας κα βοηθίνεν-αμέν μα τι τσσιναβάς τι υπηρετίνας ι Ιεχωβάς κο ντιβεσά σο κα αβέν.

²² Αλλά σο κα κεράς άμα ο κυβερνήσεις κα βακερέν τι τσσιναβάς τι ντας λατρεία ι Ιεχωβάς; Κο γιαβέρ μάθημας, κα ντικχάς αρχές κατά Γραφή σο κα βοηθίνεν-αμέν μα τι τσσιναβάς τι υπηρετίνας ι Ιεχωβάς ατζέ-ντα κάνα κα αβέλ-πες ανταβά.