1. Thangwi yanji tisafunika kukhala akukhunganyika mbatidzati kutcingwa?

NAMASIKU Mbuyathu Yezu mbadzati kufa, iye alonga kuti onsene anasankhula kukhala anyakupfundzace anadzatcingwa. (Juw. 17:14) Mpaka lero, Akristu akukhulupirika asatcingwa na anthu akuti nee asalambira Yahova. (2 Tim. 3:12) Nakuti kumala kwa makhaliro ano a pinthu kuli dhuzi, ife tisadikhira kuti kutcingwa na anyamalwa athu kunathimizirika kakamwe.—Mat. 24:9.

2-3. (a) Thangwi yanji nee tisafunika kugopa? (b) Tinapfundzanji mu nsolo uno?

² Tinakhunganyika tani cincino toera tikwanise kupirira pakutcingwa? Nee tisafunika kunyerezera pinthu pyonsene pinafuna kuticitikira. Thangwi tinganyerezera pinthu pyonsene pyakuipa pinafuna kuticitikira, tinagopa mbatikhala akudzudzumika, ngakhale kunyerezera pya kusiya kutumikira Yahova mbatidzati kuthimbana na nyatwa. (Mis. 12:25; 17:22) Kugopa ndi nsampha ukulu wakuti ‘nyamalwa wathu Dyabo’ asayesera kuuphatisira. (1 Ped. 5:8, 9) Mphapo tisafunika kucitanji cincino toera kupirira pakutcingwa?

³ Mu nsolo uno, tinapfundza kuti tinawangisa tani uxamwali wathu na Yahova, pontho thangwi yanji mphyakufunika kucita pyenepi cincino. Ife tinapfundzambo kuti tisafunika kucitanji toera tikhale acipapo. Pakumalisa, tinadzaona kuti tisafunika kucitanji anthu angatiida.

4. Mwakubverana na Ahebheri 13:5, 6, ndi cinyindiro cipi cisafunika kukhala na ife, pontho thangwi yanji?

⁴ Khalani na cinyindiro cakuti Yahova asakufunani kakamwe, pontho cipo anadzakuthawani. (Lerini Ahebheri 13:5, 6.) Pyaka pizinji nduli, Ncenjezi walonga: “Munthu anadziwa mwadidi Mulungu anan’nyindira kakamwe angathimbana na nyatwa.” Unoyu ndi undimomwene! Toera kupirira pakutcingwa, tisafunika kufuna kakamwe Yahova na kun’nyindira, mbatikhonda penula kuti iye asatifuna.—Mat. 22:36-38; Tiya. 5:11.

5. Musafunika kucitanji toera kubvesesa kuti Yahova asakufunani?

⁵ Lerini Bhibhlya ntsiku zonsene na cifuno cakufendedzera cifupi Yahova. (Tiya. 4:8) Pakuleri, nyerezerani makhaliro adidi a Yahova. Yeserani kubvesesa kuti iye asakufunani kakamwe kubulukira mu pinthu pinalonga iye na pinacita iye. (Eks. 34:6) Kuna anango pisanentsa kukhulupira kuti Mulungu asaafuna thangwi iwo cipo afuniwa na anthu anango. Khala musapibvambo tenepo, yeserani kucita ndandanda ntsiku zonsene ya pinthu pyadidi pinakucitirani Yahova. (Masal. 78:38, 39; Aroma 8:32) Munganyerezera pinthu pinakucitikirani, pontho munganyerezera mwacidikhodikho pinaleri imwe m’Bhibhlya, munakwanisa kulemba pinthu pizinji pinakucitirani Yahova. Mungapereka takhuta thangwi ya pinthu pyonsene pinakucitirani Yahova, uxamwali wanu na iye unadzakhala wakuwanga kakamwe.—Masal. 116:1, 2.

6. Mwakubverana na Masalmo 94:18-19, kucita phembero yakubulukira muntima kunatiphedza tani?

⁶ Citani phembero ntsiku zonsene. Nyerezerani mwana wakuti akhumbatirwa mwaufuni na babace. Iye asapibva kuti ali wakutsidzikizika, pontho asakhala wakusudzuka toera kupanga babace pinthu pyadidi na pyakuipa pidancitikira ntsiku ineyi. Munjira ibodzi ene, imwe munakwanisa kufendedzera cifupi Yahova mungacita phembero yakubulukira muntima ntsiku zonsene. (Lerini Masalmo 94:18-19.) Pakuphembera kuna Yahova, ‘khutulani ntima wanu ninga madzi,’ pontho pangani Babanu waufuni pinthu pyonsene pinagopa imwe na pinakudzudzumisani. (Nyimbo ya Chiriro 2:19) Ninji pinafuna kucitika? Imwe munadzakhala na “ntendere wa Mulungu wakuti usapiringana kubvesesa konsene” ninga pinalonga Bhibhlya. (Afil. 4:6, 7) Mungacita phembero munjira ineyi, munakhala cifupi kakamwe na Yahova.—Aroma 8:38, 39.

7. Thangwi yanji musafunika kukhala na cinyindiro cakuti mapikiro a Mulungu thangwi ya Umambo wace anadzakwanirisika?

⁷ Khalani na cinyindiro cakuti pinthu pidapikira Mulungu pinadzacitika. (Num. 23:19) Khala nee musakhulupira kuti pinthu pidapikira Mulungu pinadzacitika, pinadzakhala pyakukhonda nentsa kuna Sathani na ale anam’phedzera toera kukugopesani. (Mis. 24:10; Aheb. 2:15) Munawangisa tani cikhulupiro canu cincino ku Umambo wa Mulungu? Khalani na ndzidzi wakupfundza mapikiro a Mulungu thangwi ya Umambo wace, pontho onani kuti thangwi yanji musanyindira kuti mapikiro anewa anadzakwanirisika. Thangwi yanji ndi pyakufunika kucita pyenepi? Onani citsandzo ca Stanley Jones, wakuti akhala  nkaidi pyaka pinomwe thangwi ya cikhulupiro cace. * Ninji pidam’phedza toera kupirira mwakukhulupirika? Iye alonga: “Cikhulupiro canga cikhali cakuwanga thangwi yakudziwa pya Umambo wa Mulungu na pinafuna kudzacita iwo, pontho cipo ndapenula pyenepi. Kusiyapo pyenepi, nee m’bodzi anafuna kundipingiza kutumikira Yahova.” Mungakhala na cikhulupiro cakuwanga ku mapikiro a Mulungu, imwe munadzakhala cifupi na Yahova, pontho nee munatawirisa kuti kugopa kukucimwaniseni kuntumikira.—Mis. 3:25, 26.

8. Kugumanika kwathu pa misonkhano kusapangizanji? Fokotozani.

⁸ Gumanikani pa misonkhano mwakukhonda phonya. Misonkhano isatiphedza toera kufendedzera cifupi Yahova. Pontho kugumanika kwathu pa misonkhano kusapangiza kuti tinakwanisa kupirira tingatcingwa ntsogolo. (Aheb. 10:24, 25) Thangwi yanji tikulonga tenepo? Tingatawirisa pinthu pyakucepa kutipingiza kugumanika pa misonkhano cincino, ninji pinafuna kudzacitika ntsogolo mu ndzidzi wakuti tisafunika kuikha umaso pangozwi toera kusonkhana na abale athu? Munjira inango, tingakhala akutonga toera kugumanika pa misonkhano, ife nee tinadzasiya kusonkhana anyamalwa athu angayesera kutikhondesa. Natenepa, uno ndi ndzidzi wa kukulisa cifuno cakugumanika pa misonkhano yathu. Tingakulisa cifuno ca kugumanika pa misonkhano, anyamalwa athu na utongi nee anadzakwanisa kutikhondesa kubvera Mulungu kupiringana anthu.—Mabasa 5:29.

9. Thangwi yanji kukoya mavesi m’manyerezero ndi kwakufunika toera kukhunganyika tingatcingwa?

⁹ Koyani m’manyerezero mavesi anakomerwa na imwe. (Mat. 13:52) Panango imwe nee munakwanisa kucita pyenepi mwakukwana, mbwenye Yahova anakwanisa kuphatisira mphambvu yace ya nzimu wakucena toera kukukumbusani mavesi adakoya imwe. (Juw. 14:26) M’bale m’bodzi wakuti akhadafungirwa nkaidi ku Alemanya wa Kumabulukiro a Dzuwa alonga: “Ndikhali wakutsandzaya kakamwe thangwi ndikhadakoya mavesi mazinji m’manyerezero mwanga. Ndakwanisa kumala ntsiku zenezi mbindikanyerezera mwacidikhodikho pinthu pidapfundza ine m’Bhibhlya.” Mavesi anewa aphedza m’bale wathu toera kukhala cifupi na Yahova, mbapirira mwakukhulupirika.

10. Thangwi yanji tisafunika kukoya m’manyerezero nyimbo zakusimba Yahova?

¹⁰ Imbani nyimbo zakusimba Yahova, pontho zikoyeni m’manyerezero. Pikhali Paulu na Sila nkaidi ku Filipi, iwo aimba nyimbo zakusimba Yahova zikhadakoya iwo m’manyerezero. (Mabasa 16:25) Pontho, abale athu a ku União Soviética adaendeswa  ku Sibéria ninga mabitcu, acitambo pibodzi pyene toera kuwangisana. Mulongo Mariya Fedun alonga: “Ife tikhaimba nyimbo zonsene zikhadziwa ife, zinagumanika m’bukhu ya nyimbo.” Iye alonga kuti nyimbo zenezi zawangisa iwo onsene, pontho zaaphedza toera kupibva kuti akhali cifupi na Yahova. Kodi imwe musapibvambo munjira ibodzi ene mungaimba nyimbo zauzimu zinakomerwa na imwe? Natenepa, koyani nyimbo zenezi m’manyerezero!—Onani bokosi yakuti “ Ndipaseni Cipapo.”

11-12. (a) Mwakubverana na 1 Samwele 17:37, 45-47, thangwi yanji Dhavidhi akhali wacipapo? (b) Ndi ntsonga ipi yakufunika kakamwe inapfundza ife kubulukira mu citsandzo ca Dhavidhi?

¹¹ Toera mupirire pakutcingwa, musafunika cipapo. Mphapo munacitanji mungapibva kuti nee muli na cipapo? Kumbukani kuti cipapo candimomwene nee cisanyindira thunga, mphambvu peno maluso. Nyerezerani citsandzo ca Dhavidhi mu ndzidzi udathimbana iye na Goliati. Tingamulandanisa na cimphona ceneci, Dhavidhi akhali mwana, wakusowa mphambvu na wakukhonda khunganyika toera kumenya nkhondo. Kusiyapo pyenepi, Dhavidhi nee akhali na supada. Mbwenye iye akhali wacipapo kakamwe. Natenepa iye aenda kamenyana na cimphona ceneci.

¹² Thangwi yanji Dhavidhi akhali wacipapo kakamwe? Iye akhakhulupira kuti Yahova akhali na iye. (Lerini 1 Samwele 17:37, 45-47.) Dhavidhi nee akhanyerezera kuti Goliati ndi wankulu kakamwe kupiringana iye. Mbwenye iye akhaona kuti Goliati ndi wang’ono kakamwe kuna Yahova. Kodi pyenepi pisatipfundzisanji? Ife tinakhala na cipapo tingakhulupira kuti Yahova ali na ife, pontho tingaona kuti anyamalwa athu ndi ang’ono kakamwe kuna Mulungu Wamphambvu Zonsene. (2 Pya dziko. 20:15; Masal. 16:8) Tinakwanisa tani kukhala acipapo kakamwe cincino mbatidzati kutcingwa?

13. Ninji pinafuna kutiphedza toera kukhala acipapo kakamwe? Fokotozani.

¹³ Ife tinakwanisa kuwangisa cikhulupiro cathu cincino mukumwaza mphangwa zadidi za Umambo wa Mulungu. Thangwi yanji? Thangwi kumwaza mphangwa kusatiphedza toera kunyindira Yahova mbatikhonda kugopa anthu. (Mis. 29:25) Ninga manungo athu asakhala akuwanga tingacita exercício, tinakhalambo na cipapo cakuwanga tingamwaza mphangwa nyumba na nyumba, kupereka umboni wapakweca, wantsusukano na m’mbuto zamalonda. Tingakhala na cipapo cakumwaza mphangwa cincino, tinakhala akukhunganyika mwadidi toera kumwaza mphangwa ngakhale basa yathu ikhondeswe.—1 Ates. 2:1, 2.

14-15. Tisapfundzanji kubulukira mu citsandzo ca Nancy Yuen na Valentina Garnovskaya?

 ¹⁴ Ife tinakwanisa kupfundza pizinji kubulukira mu citsandzo ca alongo awiri akukhulupirika akuti apangiza cipapo kakamwe. M’bodzi wa iwo ndi Nancy Yuen. * Maseze akhali na cimo ca metru 1.5, mbwenye iye nee akhagopa. Iye akhonda kusiya kumwaza mphangwa zadidi za Umambo wa Mulungu. Na thangwi ineyi, iye aikhwa nkaidi mbamala pyaka 20 ku Xina. Anyakutonga akhancita mibvundzo alonga kuti iye akhali “munthu wakukhonda bvera” mu dziko yonsene ya Xina!

¹⁵ Mulongo unango ndi Valentina Garnovskaya wakuti aikhwa nkaidi m’maulendo matatu ku União Soviética, pontho pyaka pyonsene pidamala iye nkaidi ndi pyakukwana 21. * Thangwi yanji? Thangwi iye akhali wakutonga kupitiriza kumwaza mphangwa, pyenepi pyacitisa anyakutonga “kumuona ninga phanga.” Ninji pidacitisa alongo anewa akukhulupirika kukhala na cipapo kakamwe? Iwo akhanyindira kuti Yahova akhali na iwo.

16. Tisafunika kucitanji toera tikhale na cipapo candimomwene?

¹⁶ Ninga pidaona ife, toera kukhala na cipapo nee pisanyindira mphambvu zathu peno maluso athu. Mbwenye, tisafunika kukhulupira kuti Yahova ali na ife, pontho ali kumenya nkhondo thangwi ya ife. (Deut. 1:29, 30; Zak. 4:6) Pyenepi ndipyo pinafuna kutiphedza toera kukhala na cipapo candimomwene.

17-18. Mwakubverana na Juwau 15:18-21, ndi cenjezo ipi idapereka Yezu kuna ife? Fokotozani.

¹⁷ Ife tisakomerwa anthu angatilemedza, mbwenye nee tisafunika kunyerezera kuti ndife akusowa basa anango angatiida. Yezu alonga: “Anyakutsandzaya ndimwe ndzidzi onsene anthu angakuidani, angakuthamangisani pakati pawo, angakutikanani mbalonga kuti dzina yanu ndi yakuipa thangwi ya Mwana wa munthu.” (Luka 6:22) Kodi Yezu akhafuna kulonganji?

¹⁸ Yezu nee akhafuna kulonga kuti Akristu asakomerwa angaidiwa. Iye akhaticenjeza thangwi ya pinthu pinafuna kuticitikira. Ife nkhabe kucita khundu ya dziko. Ife tisakhala maso mwakubverana  na pipfundziso pya Yezu, mbatimwaza mphangwa zidamwaza iye. Ndi thangwi yace dziko isatiida. (Lerini Juwau 15:18-21.) Ife tisafuna kukomeresa Yahova. Anthu angatiida, nee tisapibva kuti ndife akusowa basa thangwi tisafuna Yahova.

19. Tinatowezera tani citsandzo ca apostolo?

¹⁹ Lekani kutawirisa kuti pinthu pinalonga anthu na pinacita iwo pikucitiseni kukhala na manyadzo thangwi yakukhala Mboni za Yahova. (Mik. 4:5) Ife tinakwanisa kucalira kugopa anthu tinganyerezera pidacita apostolo mu Yerusalemu pakumala kuphiwa kwa Yezu. Iwo akhadziwa kuti atsogoleri auphemberi Waciyuda akhaaida kakamwe. (Mabasa 5:17, 18, 27, 28) Mbwenye ntsiku zonsene anyakupfundza akhaenda ku templo, pontho akhapangizika pakweca kuti akhali anyakupfundza a Yezu. (Mabasa 5:42) Iwo nee atawirisa kuti kugopa kuacimwanise kumwaza mphangwa. Ife tinakwanisa kucalira kugopa anthu tingapangizika kuna iwo kuti ndife Mboni za Yahova kubasa, kuxikola na mbuto zonsene zinakhala ife.—Mabasa 4:29; Aroma 1:16.

20. Thangwi yanji apostolo akhali akutsandzaya maseze akhaidiwa?

²⁰ Thangwi yanji apostolo akhali akutsandzaya? Iwo akhadziwa thangwi ikhaacitisa kuidiwa, pontho akhaona kuti ndi mwai kutsalakanwa mwakuipa thangwi yakucita cifuno ca Yahova. (Luka 6:23; Mabasa 5:41) Mukupita kwa ndzidzi mpostolo Pedhru alemba: “Maseze muone nyatwa thangwi yakukhala anthu akulungama, imwe munadzakhala akutsandzaya.” (1 Ped. 2:19-21; 3:14) Ife tingadzindikira kuti anthu asatiida thangwi yakucita pinthu pyadidi, cipo tinasiya kutumikira Yahova.

21-22. (a) Muli wakutonga kucitanji toera mukhale wakukhunganyika? (b) Tinadzapfundzanji mu nsolo unatowera?

²¹ Ife nkhabe kupidziwa kuti tinatoma lini kutcingwa peno mautongi anatoma lini kutikhondesa kulambira Yahova. Mbwenye pinadziwa ife ndi pyakuti tisafunika kukhala akukhunganyika cincino mukuwangisa uxamwali wathu na Yahova, kukhala acipapo kakamwe na kupfundza kuti tinapirira tani anthu angatiida. Kukhunganyika kunacita ife cincino kunatiphedza toera kupitiriza kutumikira Yahova ntsogolo.

²² Mphapo ndiye tani basa yathu ingakhondeswa? Mu nsolo unatowera, tinadzapfundza midida ya Bhibhlya yakuti inatiphedza toera kupitiriza kutumikira Yahova mu ndzidzi wakutcingwa.