MWISAMBO WA KULONGA 27
Banga kwilumbuula binobino ku kubingwabingwa
“Na baaba booso abakyebe kwikala na muwa wa bwin’Efile Mukulu mu Kidishitu Yesu, abakabingwabingwa.”—2 TIM. 3:12, Kilombeeno kipya 2014.
LOONO 129 Tushaleyi banyingye
MYANDA I MWANKA *
1. Bwakinyi abitungu twikale belumbuule ku kubingwabingwa?
BUFUKU bwa muladilo wa lufu lwaye, Nfumwetu Yesu baadi mulunge boso abakumiina kwikala bu balongi baye’shi ebakebashikwa. (Yo. 17:14) Kubanga aa mafuku mpa na lelo uno, ba Temwe ba Yehowa basha lulamato bakwete kwibabingabinga kwi bantu bash’abalangwila Yehowa. (2 Tim. 3:12) Bu bitabidi nfudiilo a uno ndumbulwilo peepi, atuuku shi abakyebe kunyisha kwitulwiisha.—Mat. 24:9.
2-3. (a) Nkinyi akitungu shi tuukye pabitale moo? (b) Nkinyi kyatukyebe kutaluula mu uno mwisambo?
2 Nkinyi akitungu shi tukite kubanga binobino bwa kukambila kubingwabingwa? Tabi na muulo kunangushene ku myanda ibubi ayiketukitshikila nya. Su twanangushena byabya, atukwatshibwa na moo na twinyongoshi. Twi kwimika kulangwila Yehowa mpa na kumpala kwa’shi kubingwabingwa kufikye. (Nki. 12:25; 17:22) Moo nyi nkina ngoshi kikata kyabakwete kufuba nakyo kwi ‘mwishikwanyi neetu, Kafilefile’ bwa kwitulwiisha. (1 Mp. 5:8, 9) Nkinyi kyatudya kukita binobino bwa kunyingisha kitshibilo kyetu kya kunyingiila kubingwabingwa?
3 Mu uno mwisambo, atukyebe kutaluula byatudi balombene kunyingisha kipwano kyetu na Yehowa na bwakinyi bi na muulo ukata bwashi twibikite nka binobino. Atutaluula dingi kyatudya kukita bwa kunyisha kwikala n’eshimba dinyingye. Akupu, atutaluula kyatudya kukita bwa kunyingiila bulwishi bwa beshikwanyi.
MUSHINDO WA KUNYINGISHA KIPWANO KYOBE NA YEHOWA
4. Muyile Beena-Ebelu 13:5, 6, nkinyi akitungu’shi twikale bashinkamishe, na bwakinyi?
4 Ikala mushinkamishe shi Yehowa mmukufule na takakusumbushena. (Badika Beena-Ebelu 13:5, 6.) Takudi bipwa bibungi, Kitenta kya Mulami kibalesheshe’shi: “Muntu auku Efile Mukulu kalolo, akamukulupila ngofu mu kipungo kya kubingwabingwa.” Nkyeyendo! Bwa kukambila kubingwabingwa, abitungu tufule Yehowa na kukulupila ngofu mwadi na kupela kwikala na mpaka shi Yehowa mmwitufule.—Mat. 22:36-38; Shak. 5:11.
5. Nkinyi kilombene nkukwasha bwa kumona shi Yehowa mmukufule?
5 Badika Bible efuku dyoso na kepatshila ka kwifubwila peepi na Yehowa. (Shak. 4:8) Nsaa yobadika, tuula binangu ku ngikashi ibuwa ya Yehowa. Nsaa yobadika pabitale myanda yakwete kwakula na kukita, tompa kupusha byadi mukufule. (Efi. 34:6) Bangi be kumona’shi bi bukopo bwabadya kukumiina shi Efile Mukulu mmwibafule, mwanda takwi muntu mubande kwibalesha kifulo. Su opusha byabya, tompa kufunda myanda itale kipaso kyabakwete nkulesha lusa na kalolo kwi Yehowa. (Mis. 78:38, 39; Lom. 8:32) Nsaa yotaluula myanda yodi mumone na kunangushena ku myanda ibobadika Mwiyi dy’Efile Mukulu, omono bya kufunda myanda ibungi yabadi bakukitshine kwi Yehowa. Su wekala na lutumbu bwa byabakwete nkukitshina kwi Yehowa, kipwano kyobe n’aye akinyingi.—Mis. 116:1, 2.
6. Muyile Misambo 94:17-19, mbikunyi bilombene kwitukwasha luteko lwatwele n’eshimba dyoso?
6 Teka nsaa yoso. Banda kunangushena ka nsongwalume ke mu maboko a nshako. Akepusha mu kukalwilwa mu kipaso kyakadi kalombene kwisamba na nshako pabitale myanda ibubi na ibuwa ibekafikila dyadya efuku kushi kutshina. Su wefubwila peepi na Yehowa nsaa yoso mu luteko n’eshimba dyoso, we kwipusha nka bu kaka ka nsongwalume. (Badika Misambo 94:17-19.) Nsaa yotekye Yehowa, mulungule “myanda yooso ii mwishimba dyoobe” na olungule Nshobe sha kifulo pabitale moo na twinyongoshi tobe. (Kwi. 2:19) Okapete kinyi? Okapete kyakya kyabetamina mu Bible’shi: “Butaale bw’Efile Mukulu, abo butabukile binangu byoso.” (Fid. 4:6, 7) Nsaa yotekye byabya, wefubwila peepi ngofu na Yehowa.—Lom. 8:38, 39.
Bwa kupeta eshimba dinyingye abitungu kukulupila mwi Yehowa na Bufumu bwaye
Stanley Jones baadi munyingishe lukumiino lwaye pa kwikala mushinkamishe’shi Bufumu bw’Efile Mukulu mbw’eyendo (Tala kikoso 7)
7. Bwakinyi abitungu oshinkamishe’shi milayilo y’Efile Mukulu pabitale Bufumu bwaye ayikalombana?
7 Ikala mushinkamishe shi myabi ya mu Bufumu bwa Yehowa ayikalombana. (Mb. 23:19) Su twena lukumiino’shi milayilo y’Efile Mukulu ayikalombana, mbibofule bodya kwikala kubukitshishi bwa Satana na bademo baye. (Nki. 24:10; Eb. 2:15) Mushindo kinyi odi mulombene kunyigisha lukumiino lobe mu Bufumu bw’Efile Mukulu kubanga binobino? Ata kitshibilo kya kulonga milayilo y’Efile Mukulu pabitale Bufumu bwaye na kabingilo akakushinkamisha’shi milayilo yaye ayikalombana. Bino bi nkukwasha naminyi? Taluula kileshesho kya Stanley Jones, ababadi bakwate mu lukano munda mwa bipwa musambo pa mwanda wa lukumiino lwaye. * Nkinyi kibadi kimukwashe bwadya kunyingiila na lulamato loso? Amba’shi: “Lukumiino lwande lubadi lunyingye mwanda nadi na kiwukilo pabitale Bufumu bw’Efile Mukulu na myanda yabukakitshi, ntshina mpaka’mi. Byabya, takwi muntu e kunkatusha kwi Yehowa.” Su onyingisha lukumiimo lobe mu milayilo y’Efile Mukulu, okefubwila peepi na Yehowa na t’okatshinyi kintu.—Nki. 3:25, 26.
8. Nsaa yatutaluula mweneno eetu pabitale bisangilo, abitulongyesha kinyi pabitutale? Patuula.
8 Ikala na kyubishi kya kutwela mu bisangilo bya mu kakongye. Bisangilo abitukwashaa bwa kwifubwila peepi na Yehowa. Mweneno atudi naye pabitale kutwela mu bisangilo, alesha’shi atukekala na ngobesha ya kunyingiila kubingwabingwa mu mafuku aafiki. (Eb. 10:24, 25) Bwakinyi atwamba byabya? Su lelo uno, tu myanda tupeela atwitukutshishwa kutwela mu bisangilo, nkinyi akikakitshika mu mafuku aafiki, apakekala kutwela mu bisangilo akutuulu muuwa wetu mu masaku? Kadi, su twekala bate kitshibilo kya kutwelanga mu bisangilo, tatukalekye kwibitwela sunga beshikwanyi batompa kwitwimika pa bukopo. Ino ndjo nsaa ya kutamisha kifulo kyetu bwa bisangilo. Su twekala bafule kutwela mu bisangilo, sunga mbulamatadi etukandjika kwibitwela, atukakokyela Efile Mukulu pe kukokyela bantu.—Bik. 5:29.
Kulamiina bifundwe na ngono ya Bufumu kubanga binobino, akukakukwasha ku kubingwabingwa (Tala kikoso 9) *
9. Bwakinyi kulamiina ma verse nyi kipaso kibuwa kya kwilumbuula ku kubingwabingwa?
9 Lamiina ma verse odi mufule. (Mat. 13:52) Binangu byobe ta mbipwidikye nya, kadi Yehowa e nkukwasha na bukome bwa kikudi kyaye bwa’shi kikutentekyeshe aa ma verse. (Yo. 14:26) Ungi mukwetu ababadi bele mu lukano lwa mu Allemagne a kutunduka, mu kashibo ka bupenka amba’shi: “Naadi na muloo wi kashaa mwanda naadi mulamiine ma verse nkama! Sunga mbinaadi bupenka, natungunukile na kunangushena ku myanda ya mu Bible.” Byabya bifundwe bibadi bikwashe uno mukwetu bwa kushaala peepi na Yehowa—na kunyingiila na lulamato.
(Tala kikoso 10) *
10. Bwakinyi abitungu tulamiine ngono?
10 Lamiina na kuyimba ngono ayitumbisha Yehowa. Pababadi mu lukano mu Fidipe, Mpoolo na Silase abadi abayimbi ngono ibabadi balamiine bwa kutumbisha Yehowa. (Bik. 16:25) Dingi, pababadi babingye bakwetu ba mu Union Sauviétique benda mu Siberie, mbikunyi bibabadi abenyingishene? Mukwetu mukashi Mariya Fedun amba’shi: “Tubadi atuyimbi ngono ya mu mukanda wa ngono ibatudi atwiuku.” Akula’shi yaya ngono ibadi ibanyigishe na kwibakwasha bwabadya kwifubwila peepi na Yehowa. Onyingishibwaa nsaa yoyimbi ngono ya mu kikudi yodi mufule su? Lamiina yaya ngono binobino!—Tala kashibo akamba’shi: “ Mpe namu eshimba dinyingye.”
BYA KUNYISHA KWIKALA N’ESHIMBA DINYINGYE
11-12. (a) Muyile 1 Samwele 17:37, 45-47, bwakinyi Daavide badi n’eshimba dinyingye? (b) Ndilongyesha kinyi dina muulo dibatulongo pabitale kileshesho kya Daavide?
11 Bwashi oyingile kubingwabingwa, abintugu wekale n’eshimba dinyingye. Su omono’shi twena eshimba dinyingye, nkinyi kyodi mulombene kukita? Uka’shi kwikala n’eshimba dinyigye takutala bula, bukome sunga ngobesha yobe. Tala kileshesho kya Daavide balwile na Golyate pabaadi ka nsongwalume. Patumupwandjikisha na kyakya kipambe, Daavide baadi peela, shii bukome, na tabaadi na bina ngoshi. Daavide tabadi sunga na lupete nya. Anka, Badi n’eshimba dinyingye. Daavide bayile lubilo bwa kulwa na kyakya kipambe.
12 Bwakinyi Daavide baadi n’eshimba dinyingye? Badi mushinkamishe’shi Yehowa e naye. (Badika 1 Samwele 17:37, 45-47.) Daavide tabaadi mutule binangu byaye bwa kwipwandikisha na kino kipambe nya. Kadi, badi anangushena bi bupeela bwa Golyate p’akumupwandikisha na Yehowa. Nkinyi kyatulongyela ku uno mwanda? We kunyinga eshimba su we mukulupile’shi Yehowa e nobe na su we mushinkamishe’shi beshikwanyi netu mbapela pa kwibapwandikisha n’Efile Mukulu sha bukome boso. (2 Mya. 20:15; Mis. 16:8) Mbikunyi byatudi balombene kwikala n’eshimba dinyingye kumpala kwa’shi kubingwabingwa kubangye?
13. Mbikunyi byatudya kupeta eshimba dinyingye? Patuula.
13 Twikunyisha kwikala n’eshimba dinyingye binobino, pa kulungula mukandu wibuwa wa Bufumu bw’Efile Mukulu. Bwakinyi? Mwanda kulungula mukandu wibuwa akwitulongyesha bya kukulupila mwi Yehowa na kunyingiila moo wa bantu. (Nki. 29:25) Nka bu abinyigaa misamba yetu nsaa yatukitshi kalashishi, atupete mashimba anyingye nsaa yatulungula ku nshibo na nshibo, pa ma mbalo e bantu bebugi, mu mpukampuka, na mu bisalwe. Su twekala n’eshimba dinyingye dya kulungula mukandu wibuwa kubanga binobino, atwikala beluumbule bwa kutungunuka na kulungula sunga mudimo wetu wakandikibwa.—1 Tes. 2:1, 2.
Nancy Yuen bapelele kwimika kulungula mukandu wibuwa (See Tala kikoso 14)
14-15. Ndilongyesha kinyi dyatupetela ku kileshesho kya Nancy Yuen na Valentina Garnovskaya?
14 Twikulonga bibungi pa bileshesho bya bakwetu bakashi babidi abadi baleshe eshimba dinyingye. Nancy Yuen baadi penda bula bwa 1.5 m, kadi tabaadi atshinyi kintu. * Bapelele kwimika kulungula mukandu wibuwa wa Bufumu bw’Efile Mukulu. Nyi bwakinyi abamwelele mu lukano munda mwa bipwa bikile pa 20 mu Chine. Mwina mbulamatadi badi mu musambishe amba’shi: “Badi muntu e na mutwe wi bukopo bukile” mwiumbo dyabo!
Valentina Garnovskaya baadi mushinkamishe’shi Yehowa e naye (Tala kikoso 15)
15 Mu mushindo umune, abadi bele Valentina Garnovskaya mu lukano mu Union soviétique misusa isatu, munda mwa bipwa 21. * Bwakinyi? Mwanda badi nakitshibilo kya kutungunuka na kulungula mukandu wibuwa, pa mwanda wa byabya, mwina mbulamatadi baadi mumwitamine bu “ntomboshi e masaku akile.” Nkinyi kibadi kipe bano bakashi basha lulamato eshimba dinyingye byabya? Abaadi bashinkamishe’shi Yehowa e nabo.
16. Nkinyi kyatudya kukita bwa’shi tunyishe kwikala n’eshimba dinyingye?
16 Nka bu bibatukatuka mukumona, bwa kwikala n’eshimba dinyingye, tabintungu twikulupile nya. Anka, abitungu tukulupile shi Yehowa e netu na etulwila ngoshi. (Miy. 1:29, 30; Sek. 4:6) Bino nyi byatudya kukita bwa kwikala n’eshimba dinyingye.
MUSHINDO WA KUNYINGIILA MUSHIKWA WA BANTU
17-18. Muyile Yowano 15:18-21, Yesu etudimusha bwakinyi? Patuula.
17 Atukumiina’shi bangi bantu betunemekye, kadi tatunangushenanga’shi tatwina muulo su bantu tambetufule. Yesu bakwile’shi: “Nwi baa-sha-mwabi paabeenushikwa kwi bantu, paabeenusumbusheena, kwinuka na kwinusaabuula pa mwanda wa mwan’a muntu.” (Luk. 6:22) Nkinyi kibadi akikyebe kwamba Yesu?
18 Yesu tabaadi akyebe kwamba’shi bena Kidishitu abakasanka pabebashikwa nya. Kadi baadi etudimusha pabitale abiketufikila. Tatwibapano pa nsenga nya, mwanda tukwetu kutumikila malongyesha a Yesu mu muwa wetu na kulungula mukandu ubaadi alungula. Nyi bwakinyi, bantu ba pa nsenga mbetushikwe. (Badika Yowano 15:18-21.) Atukumiina kusankisha Yehowa. Su bantu betushikwa mwanda wa’shi twibafule Nshetu, wawa mmwanda wabo.
19. Twi kwambula kileshesho kya batumibwa naminyi?
19 Tatutadiilanga myanda ishi na muulo ayakula bantu sunga yabakitshi itupushishe buufu bwakwikala Temwe a Yehowa. (Mik. 4:5) Twibalombene kulonga bya kukabila moo wa bantu, pa kwambula kileshesho kya batumibwa pabaabadi mu Yeelusaleme mafuku apeela kunyima kwa lufu lwa Yesu. Abadi abauku bibabadi bebashikwe kwi bakata ba bipwilo bya bena Yuuda. (Bik. 5:17, 18, 27, 28) Kadi, abatungunukile na kwenda ku ntempelo efuku dyoso na kulesha patoka’shi mbalongi ba Yesu pa kulungula mukandu wibuwa. (Bik. 5:42) Tabaabadi batadiile moo bwaudya kwibemika. Atwe namu twibalombene kukambila moo wa bantu pa kwilesha kwi bantu boso’shi twi ba Temwe ba Yehowa—ku mudimo, ku kalasa, na kwi bekungishanyi netu.—Bik. 4:29; Lom. 1:16.
20. Bwakinyi batumibwa abadi na muloo sunga bibabadi bebashikwe?
20 Bwakinyi batumibwa abadi na muloo? Abadi abauku bwakinyi mbebashikwe, na babadi abamono kukengyeshibwa mwanda wa kukita kikyebe ky’eshimba dya Yehowa bu kineemo kikata. (Luk. 6:23; Bik. 5:41) Kunyima, Mpyeele mutumibwa bafundile’shi: “Su nwekala naa kya kufwambuka ku mwanda wa bululame . . . nwi baa-mwabi.” (1 Mp. 2:19-21; 3:14) Nsaa yabetushikwa pa mwanda wa bibuwa byatukitshi, ta twibalombene kuleka kufubila Yehowa mwanda wa mushikwa wa bantu.
KWILUMBUULA KOBE AKUKAKUKWASHA
21-22. (a) We mwate kitshibilo kya kukita kinyi bwa kwilumbuula ku kubingwabingwa? (b) Nkinyi kyatukataluula mu mwisambo aulondo?
21 Ta twiuku nsaa ayikabanga kubingwabingwa sunga kukandikibwa kwa lulangwilo lwetu bwa Yehowa nya. Anka, atwiuku’shi twi kubanga kwilumbuula binobino pa kunyingisha kipwano kyetu na Yehowa, kunyinga eshimba, na pa kulonga bya kunyingiila mushikwa wa bantu. Su twelumbuula kubanga binobino, abiketukwasha bwa kutungunuka na kufubila Yehowa mu mafuku aafiki.
22 Kadi twikukita kinyi su bakandika mudimo wetu? Mu mwisambo aulondo, atukataluula mayi a kulonda a mu Bible alombene nketukwasha bwa kutungunuka na kufubila Yehowa sunga bekala bakandjikye mudimo wetu.
LOONO 118 “Tamisha namu lukumiino lwetu”
^ par. 5 Tatukumiinaa’shi betushikwe nya. sunga ku ba kala, atwe boso atukafumankana na kubingwabingwa. Uno mwisambo na aulondo ayitukwasha bwa kunyingiila n’eshimba dinyingye.
^ par. 7 Tala Kitenta kya Mulami kya 1/4/1966, esak. 212-224 mu Fwalanse.
^ par. 14 Tala Kitenta kya Mulami, kya 15/10/1979, esak. 4-7, mu Fwalanse. Tala dingi video amba’shi: Le nom de Jéhovah sera connu mu Televizion a jw®, pa mbalo ifunde’shi NKONKO NA MYANDA IMONE MUNTU.
