1. Kawe nụe i kitẹ harusẹ̌ mẹ̌sasadia těntal᷊ang bědang tawe nirarihang?

TUANG YESUS masingkạ taumata sarung mawěngsing su manga murite. Hakị u ene, su hěbi maraning papatene, i sie naul᷊ị soal u hal᷊ẹ̌ ene. (Yoh. 17:14) Sarang orasẹ̌ ini, Sahiding Yehuwa masatia seng nirarihangu taumata apang tawe měnẹ̌němbah si Yehuwa. (2 Tim. 3:12) Ual᷊ingu pěngěngsuengu dunia seng kakạranine, sědụ sarung limembong měndariha si kitẹ.​—Mat. 24:9.

2-3. (a) Kawe nụe pěndang matakụ ene makawahaya? (b) Apa sarung ěndungang i kitẹ su pěngangěndungang ini?

² Apa harusẹ̌ koateng i kitẹ orasẹ̌ ini tadeạu sadia su tempong darihang? I kitẹ tawe harusẹ̌ mẹ̌tiněna kěbị barang dal᷊akị sarung mariadi si kitẹ. Mạeng měkoạ ene, i kitẹ sauneng matakụ dingangu guměnggang. Kụ, ene makakoạ si kitẹ měngědo mẹ̌tahamawu si Yehuwa, sěmbal᷊ia i kitẹ bědang tawe nakahombang haghing sigěsạ ene. (Amsal 12:25; 17:22) Pěndang matakụ kai senjata matoghasẹ̌ pẹ̌paketangu sědụ i kitẹ, Iblis, gunang mělawang si kitẹ. (1 Ptr. 5:8, 9) Apa wotonge koateng i kitẹ orasẹ̌ ini tadeạu matoghasẹ̌?

³ Su pěngangěndungang ini, i kitẹ sarung měngěndung kerea měnoghasẹ̌ pẹ̌dal᷊ahapị dingangi Yehuwa kụ kawe nụe měkoạ ene penting orasẹ̌ ini. I kitẹ lai sarung měngěndung apa harusẹ̌ koateng tadeạu mawahani. Kụ su pěngěngsuenge, i kitẹ sarung měngěndung kerea i kitẹ botonge tumatěngo kawawěngsingu sědụ.

4. Tumuhụ Ibrani 13:5, 6, i kitẹ harusẹ̌ mangimang apa kụ kawe nụe?

⁴ Pangimangke Yehuwa makěndagẹ̌ si kau kụ i Sie lai tawe měněntang si kau. (Basa Ibrani 13:5, 6.) Pira taung tamai, Měhabarẹ̌ naul᷊ị, ”Mạeng sěngkatau kahěngang-hěngang masingkạ soal u Mawu, i sie sarung kahěngang-hěngang mangimang  su Mawu su tempong i sie nirarihang.” Nal᷊ahẹ, tadeạu tatapẹ̌ masatia su tempong dẹ̌darihang, i kitẹ harusẹ̌ makěndagẹ̌ si Yehuwa dingangu kahěngang-hěngang mangimang si Sie. Abe ragu, Yehuwa sěntiniạ makěndagẹ̌ si kitẹ.​—Mat. 22:36-38; Yak. 5:11.

5. Apa wotonge koatengu tadeạu makapěndang kakěndagi Yehuwa?

⁵ Pẹ̌basa Alkitapẹ̌ ěllo-ěllo kụ timonane gunang limembong marani dingangi Yehuwa. (Yak. 4:8) Su tempong mẹ̌basa, pẹ̌tiněna manga sipatẹ̌ mapia bọu i Yehuwa. Mạeng mẹ̌basa apa niwera dingangu nikoạ i Yehuwa, pẹ̌tawakal᷊ịe makaěna kerea i Sie makěndagẹ̌ si kau. (Kel. 34:6) Piạ u masigěsạ mangimang Mawu makěndagẹ̌ si sire, ual᷊ingu i sire tawe nakapěndang kakěndagẹ̌ bọu taumata wal᷊inẹ. Mạeng i kau nẹ̌pěndang kerene, ěllo-ěllo kěnang bohẹ kerea Yehuwa něnodẹ tatal᷊ěntụ dingangu kapia-Ne si kau. (Mz. 78:38, 39; Rm. 8:32) Mạeng turusẹ̌ mẹ̌tiněna pengalaman nikapěndangengu dingangu apa niwasanu su Hengetangu Mawu, i kau sarung makawohẹ lawọ hal᷊ẹ̌ seng nikoạ i Yehuwa gunang i kau. Mạeng i kau sauneng měngarěga apa seng nikoạ i Yehuwa, pẹ̌dal᷊ahapịu dingang’E sauneng matoghasẹ̌.​—Mz. 116:1, 2.

6. Tumuhụ Mazmur 94:17-19, kerea mẹ̌doa dingangu kaguwạu naung makatul᷊ung si kau?

⁶ Pakasau mẹ̌doa. Pẹ̌tiněna soal u anạ sẹ̌saruruang i papạe. Anạ ene nakapěndang aman, hakị u ene i sie tawe matakụ mẹ̌bisara si papạe soal u barang mapia dingangu dal᷊akị nikapěndangenge sahěllo ene. I kau lai botonge makapěndang marani dingangi Yehuwa mạeng ěllo-ěllo mẹ̌doa dingangu kaguwạu naung. (Basa Mazmur 94:17-19.) Su tempong mẹ̌doa si Yehuwa, i Amang i kitẹ makěndagẹ̌, ”bosoko lohongu naungu si Yehuwa kere akẹ” dingangu paul᷊ị si Sie apa nakatakụ dingangu nakaghěnggang si kau. (Ratapan 2:19) Apa hasile? I kau sarung makapěndang apa nisěbạu Alkitapẹ̌ ”karal᷊unsemahẹ̌ bọu Mawu, kụ botonge makawatạ haghing tiněna”. (Flp. 4:6, 7) Kakạsaune mẹ̌doa kerene, i kau sarung kakạranine dingangi Yehuwa.​—Rm. 8:38, 39.

7. Kawe nụe i kau harusẹ̌ mangimang kěbị dianding Mawu soal u Kararatuang’E sarung mariadi?

⁷ Pangimangke al᷊amatu Kararatuangu Mawu sarung mariadi. (Bil. 23:19) Mạeng i kau měnětạ tawe mangimang su dianding Mawu, Setang dingangu taumata apang lẹ̌atorange sarung gampang makakoạ si kau matakụ. (Amsal 24:10; Ibr. 2:15) Kerea tadeạu i kau limembong mangimang su Kararatuangu Mawu orasẹ̌ ini? Su tempong měngěndung Alkitapẹ̌ hala, pěngěndung pakal᷊awọ dianding Mawu soal u Kararatuang’E dingangu kawe nụe i kau botonge mangimang kěbị diandi ene sarung mariadi. Apa gunane? Pẹ̌tiněna pengalaman Stanley Jones, seng nipěnjara karěngụe pitu taung ual᷊ingu pangangimange. Apa nakatul᷊ung si sie tatapẹ̌ masatia? I sie naul᷊ị, ”Pangangimangku natoghasẹ̌ ual᷊ingu iạ masingkạ  soal u Kararatuangu Mawu dingangu apa sarung koatengu Kararatuang ene. Iạ tawe ragu soal u hal᷊ẹ̌ ene. Hakị u ene, tawẹ apa sarang sěngkatau botonge makakoạ si siạ měněntang si Yehuwa.” Mạeng i kau sěbạe mangimang su dianding Mawu, i kau sarung limembong marani dingangi Yehuwa, kụ tawe měmala pěndang matakụ makakoạ si kau tawe masatia.​—Amsal 3:25, 26.

8. Pěndang i kitẹ soal u pěngangibadang sarung makatodẹ apa? Lahẹko.

⁸ Pakarading duměnta su pěngangibadang. Pěngangibadang makatul᷊ung si kau marani dingangi Yehuwa. Pěndang i kitẹ soal u pěngangibadang sarung makatodẹ apa i kitẹ botonge mẹ̌tatahang mạeng darihang su tempo mahi. (Ibr. 10:24, 25) Kawe nụe kerene? Ual᷊ingu mạeng hal᷊ẹ̌ dararodọ makasahaghe si kitẹ duměnta su pěngangibadang orasẹ̌ ini, kerea mạeng su tempo mahi mẹ̌komol᷊ẹ̌ dingangu anạu sěmbaụ makawahaya pěbawiahi kitẹ? Katewe, mạeng i kitẹ mẹ̌tawakal᷊i duměnta su pěngangibadang, i kitẹ tawe měngědo maning sědụ mẹ̌sěding si kitẹ měngibadah sěngkasio. Měnětạ orasẹ̌ ini, i kitẹ harusẹ̌ puluang duměnta su pěngangibadang. Mạeng i kitẹ puluang měngibadah, i kitẹ sarung turusẹ̌ tumuhụ su Mawu sul᷊ungu su taumata tawẹ soale piạ hukungu pěměrenta mẹ̌sěding ibadang i kitẹ.​—Kis. 5:29.

9. Kawe nụe měhafalẹ̌ ayatẹ̌ makatul᷊ung si kitẹ sadia su tempong darihang?

⁹ Hafalẹ̌ko manga ayatẹ̌ ikẹ̌kapuluangu. (Mat. 13:52) Daya ingat i kitẹ tawe nasukụ, katewe Yehuwa botonge měpakẹ rohkẹ̌ masusi gunang makakoạ si kau saụ makatahěndung manga ayatẹ̌ ene. (Yoh. 14:26) Pěmanda pengalaman sěngkatau saudara bọu nipěnjara su Jerman Timur. I sie naul᷊ị, ”Iạ sěbạe mal᷊uasẹ̌ ual᷊ingu su tempo ene iạ seng nakahafalẹ̌ hasụe ayatẹ̌. Maning tawẹ apa hal᷊ẹ̌ koatengku ěllo-ěllo, iạ botonge mẹ̌tiněna lawọ topik Alkitapẹ̌.” Manga ayatẹ̌ ene nakatul᷊ung saudara ene tatapẹ̌ marani dingangi Yehuwa lai tatapẹ̌ masatia nẹ̌tatahang.

10. Kawe nụe i kitẹ harusẹ̌ měhafalẹ̌ kakantarị rohani?

¹⁰ Hafalẹ̌ dingangu pẹ̌kantarị manga kakantarị su bukẹ̌ kakantarị dingangu su situs web i kitẹ. Su tempong nipěnjara su Filipi, Paulus dingangi Silas nẹ̌kantarị manga kakantarị rohani seng nihafalẹ̌ i rẹ̌dua. (Kis. 16:25) Kerene lai, su tempong anạu sěmbaụ apang mětẹ̌tanạ su bekas Uni Soviet nial᷊ing sarang Siberia, kerea i sire natoghasẹ̌? Saudari Mariya Fedun nẹ̌běke,  ”I kami nẹ̌kantarị kěbị kakantarị seng nihafalẹ̌ i kami bọu bukẹ̌ u kakantarị.” I sie nẹ̌bera manga kakantarị ene nakatoghasẹ̌ dingangu nakatul᷊ung si sire nakapěndang limembong marani dingangi Yehuwa. Apa i kau lai natoghasẹ̌ su tempong nẹ̌kantarị kakantarị rohani ikẹ̌kapuluangu? Hafalẹ̌ko manga kakantarị ene dongkeng orasẹ̌ ini.​—Pěmanda kotak ” Buat Aku Berani”.

11-12. (a) Tumuhụ 1 Samuel 17:37, 45-47, kawe nụe i Daud sěbạe bahani? (b) Těntiro penting apa botonge kaěndungang i kitẹ bọu i Daud?

¹¹ Tadeạu tatapẹ̌ masatia su tempong darihang, i kau harusẹ̌ bahani. Mạeng i kau tawe tumanịu bahani, apa wotonge koatengu? Pẹ̌tahěndung, kawawahani tutune asal᷊e bal᷊inẹ bọu guwạu wadang, katatoghasẹ̌, arau kemampuan pẹ̌sěngkatau. Pẹ̌tahěndung si Daud mangudạ su tempong i sie limawang si Goliat. Mạeng ipẹ̌sul᷊ung dingangu angsuang ene, i Daud limembong kadodọ dingangu lome. Si Daud lai tawẹ apa aghidẹ̌. Katewe, i sie sěbạe bahani. I sie bahani timal᷊ang sarang angsuang maobotẹ̌ ene.

¹² Kawe nụe i Daud sěbạe bahani? I sie sěbạe mangimang Yehuwa ene dingange. (Basa 1 Samuel 17:37, 45-47.) Daud tawe němanda kerea kaguwạe i Goliat mạeng ipẹ̌sul᷊ung dingange. Katewe, i sie nẹ̌tahěndung i Goliat sěbạe kadodọ mạeng ipẹ̌sul᷊ung dingangi Yehuwa. Apa kaěndungang i kitẹ bọu běke ini? I kitẹ sarung mawahani mạeng mangimang Yehuwa rụděndingang si kitẹ dingangu mẹ̌tahěndung manga sědụ i kitẹ sěbạe kadodọ mạeng ipẹ̌sul᷊ung dingangu Mawu Makawasa. (2 Taw. 20:15; Mz. 16:8) Těntal᷊ang bědang tawe nirarihang, apa wotonge koateng i kitẹ orasẹ̌ ini tadeạu limembong mawahani?

13. Kerea carane tadeạu limembong bahani? Lahẹko.

¹³ I kitẹ botonge limembong mawahani orasẹ̌ ini mạeng i kitẹ měhabarẹ̌ soal u Kararatuangu Mawu. Kawe nụe? Ual᷊ingu su tempong měnginjilẹ̌, i kitẹ měngěndung carane mangimang si Yehuwa dingangu lumawang pěndang matakụ su taumata. (Amsal 29:25) Kere otot sarung matoghasẹ̌ mạeng i kitẹ měngolahraga, kawawahani sarung matambah mạeng i kitẹ měnginjilẹ̌ bọu wal᷊e sarang bal᷊e, su tampạ mal᷊awọ taumata, dingangu su daerah bisnis, arau měgělị kesaksian tawe resmi. Mạeng bahani měnginjilẹ̌ orasẹ̌ ini, i kitẹ sarung bahani měnginjilẹ̌ maning hal᷊ẹ̌ i kitẹ nisěding.​—1 Tes. 2:1, 2.

14-15. Apa kaěndungang i kitẹ bọu Nancy Yuen dingangi Valentina Garnovskaya?

 ¹⁴ I kitẹ makaěndung mal᷊awọ bọu duang katau saudari masatia kụ sěbạe bahani. Nancy Yuen dangẹe ěndịu kětạeng 1,5 meter, katewe i sie tawe gampang patakụtang. * I sie madiri měngědo měhabarẹ̌ habarẹ̌ mapia Kararatuangu Mawu. Hasile, i sie nipěnjara karěngụe ěndịu 20 su taunge su Cina. Manga pětugasu pěměrenta apang němarikěsa si sie naul᷊ị i sie ”kai taumata sěbạe katul᷊ikětịkange” su negeri ene!

¹⁵ Valentina Garnovskaya tělung sul᷊ẹ nipěnjara su bekas Uni Soviet. Mạeng ipẹ̌tatambah, i sie nipěnjara karěngụe 21 su taunge. * Kawe nụe? Tawẹ apa makaědo si sie měnginjilẹ̌, hakị u petugas nẹ̌sěbạ i sie ”penjahat sěbạe makawahaya”. Apa nakakoạ duang katau saudari masatia ini sěbạe bahani? I rẹ̌dua mangimang Yehuwa ene dingangi rẹ̌dua.

16. Apa kakungsịe tadeạu i kitẹ kahěngang-hěngang mawahani?

¹⁶ Kere seng niěndungang i kitẹ, tadeạu limembong bahani, i kitẹ tawe wotonge mangimang su katatoghasẹ̌ dingangu kemampuan i kitẹ. Katewe, i kitẹ harusẹ̌ mangimang Yehuwa rụděndingang si kitẹ dingangu sarung mẹ̌sekẹ gunang i kitẹ. (Ul. 1:29, 30; Za. 4:6) Ene kakungsịe tadeạu i kitẹ kahěngang-hěngang mawahani.

17-18. Tumuhụ Yohanes 15:18-21, laingatẹ̌ apa nighělị i Yesus si kitẹ? Lahẹko.

¹⁷ I kitẹ mal᷊uasẹ̌ mạeng taumata měngarěga si kitẹ. Katewe, i kitẹ tawe wotonge mẹ̌pikirẹ̌ i kitẹ tawe maarěga mạeng taumata mawěngsing si kitẹ. Yesus nẹ̌bera, ”Mal᷊uasẹ̌ i kamene mạeng taumata wal᷊inẹ mawěngsing si kamene, mạeng i sire mẹ̌těngkarau bọu i kamene, měhinakang si kamene, dingangu mapakawuhụ areng i kamene ual᷊ingu Ahusu Taumata.” (Luk. 6:22) Apa mangal᷊ene bawerang i Yesus?

¹⁸ Yesus tawe nẹ̌bera tau Kristen mal᷊uasẹ̌ maeng taumata mawěngsing si sire.  Sěběnarẹ̌e i sie něgělị laingatẹ̌ soal u apa sarung mariadi si kitẹ. I kitẹ bal᷊inẹ bageang bọu dunia ini. I kitẹ měbẹ̌biahẹ̌ tuhụ těntirong i Yesus dingangu mělẹ̌habarẹ̌ habarẹ̌ mapia lẹ̌habarenge. Ual᷊ingu ene, dunia mawěngsing si kitẹ. (Basa Yohanes 15:18-21.) I kitẹ mapulu makal᷊uasẹ̌ si Yehuwa. Mạeng taumata mawěngsing si kitẹ ual᷊ingu i kitẹ makěndagẹ̌ si Amang i kitẹ, ene tawe makoạ soalẹ̌ si kitẹ.

19. Kerea i kitẹ botonge mẹ̌těno su manga rasulẹ̌?

¹⁹ Abe wala kakanoạ arau bawerang taumata wal᷊inẹ makakoạ si kau mamea makoạ Sahiding Yehuwa. (Mi. 4:5) I kitẹ botonge lumawang pěndang matakụ su taumata mạeng měngěndung bọu contoh manga rasulẹ̌ su Yerusalem su apang i Yesus seng nipate. I sire masingkạ těmbonangu agama Yahudi sěbạe mawěngsing si sire. (Kis. 5:17, 18, 27, 28) Maning kerene, i sire ěllo-ěllo makoạ sarang bait kụ napakal᷊ahẹ su taumata i sire kai muriti Yesus. (Kis. 5:42) I sire tawe němala pěndang matakụ makaědo si sire. I kitẹ lai makal᷊awang pěndang matakụ su taumata mạeng měhabarẹ̌ su lampung arau su hapị su pělahal᷊ẹ̌kang dingangu su sikol᷊ah, i kitẹ kai Sahiding Yehuwa.​—Kis. 4:29; Rm. 1:16.

20. Kawe nụe manga rasulẹ̌ mal᷊uasẹ̌ maning taumata mawěngsing si sire?

²⁰ Kawe nụe manga rasulẹ̌ mal᷊uasẹ̌? I sire masingkạ kawe nụe taumata mawěngsing si sire, bọu ene lai darihang ual᷊ingu někoạ kapulung Yehuwa kai kehormatan si sire. (Luk. 6:23; Kis. 5:41) Rasul Petrus samurine němohẹ, ”Maning i kamene nasigěsạ ual᷊ingu barang nihino, i kamene sarung mal᷊uasẹ̌.” (1 Ptr. 2:19-21; 3:14) Su tempong makaěna taumata mawěngsing si kitẹ ual᷊ingu barang nihino, i kitẹ tawe měmala kawawěngsing i sire makakoạ si kitẹ matakụ kụ tawe masatia si Yehuwa.

21-22. (a) Apa koatengu tadeạu sadia su tempong darihang? (b) Apa sarung ěndungang i kitẹ su pěngangěndungang tuhụe?

²¹ I kitẹ běga kange taumata měndariha si kitẹ arau kange pěměrenta mẹ̌sěding hal᷊ẹ̌ i kitẹ. Katewe, i kitẹ masingkạ i kitẹ botonge mẹ̌sasadia dongkeng orasẹ̌ ini, carane ute měnoghasẹ̌ pẹ̌dal᷊ahapị dingangi Yehuwa, mẹ̌tawakal᷊i tadeạu limembong mawahani, dingangu měngěndung lumawang pěndang matakụ su taumata. Mạeng mẹ̌sasadia dongkeng orasẹ̌ ini, i kitẹ botonge tatapẹ̌ masatia si Yehuwa su tempo mahi.

²² Katewe, kerea mạeng su tempo mahi hal᷊ẹ̌ i kitẹ kahěngang-hěngang nisěding? Su pěngangěndungang tuhụe i kitẹ sarung měngěndung manga prinsipẹ̌ makatul᷊ung si kitẹ tadeạu tatapẹ̌ masatia si Yehuwa maning hal᷊ẹ̌ i kitẹ nisěding.