1. Tanbasá ita presiza prepara an ba tempu neʼebé ema fó-terus ba ita?

KALAN antes ema oho Naʼi Jesus, nia hatete katak ema sei odi sira hotu neʼebé deside atu sai ninia dixípulu. (João 17:14) Husi tempu neʼebá toʼo agora, ema neʼebé kontra adorasaun loos fó-terus ba ema Kristaun neʼebé laran-metin. (2 Tim 3:12) Nuʼudar mundu nia rohan besik ba daudaun, ita hatene ita-nia inimigu sei kontra ita makaʼas liután.—Mt 24:9.

2-3. (a) Tanbasá sentimentu taʼuk mak perigu? (b) Saida deʼit mak ita sei aprende iha lisaun neʼe?

² Saida mak ita bele halo agora atu bele tahan bainhira ema fó-terus? La presiza imajina kona-ba buat aat hotu neʼebé bele akontese ba ita. Tanba karik neʼe bele halo ita sai taʼuk no para atu serbí Jeová antes ita hasoru problema ruma. (Prov 12:25; 17:22) Ita-nia “inimigu, Diabu” koko uza ita-nia sentimentu taʼuk atu kontra ita. (1 Ped 5:8, 9) Saida mak ita bele halo atu sai prontu bainhira ema fó-terus?

³ Iha lisaun neʼe, ita sei aprende oinsá ita bele hametin ita-nia relasaun ho Jeová no tanbasá importante atu halo nuneʼe agora. Ita mós sei aprende saida mak bele ajuda ita sai aten-brani liután no oinsá atu tahan bainhira ema odi ita.

4. Ebreu 13:5, 6 fó sai saida ba ita, no tanbasá mak ita tenke fiar ida-neʼe?

⁴ Fiar metin katak Jeová hadomi Ita no nunka husik Ita. (Lee Ebreu 13:5, 6.) Tinan barak liubá, Livru Haklaken dehan: “Ema neʼebé koñese didiʼak Maromak sei tau  fiar tomak ba nia bainhira hetan koko.” Neʼe loos duni. Atu bele tahan ho susesu bainhira ema fó-terus, ita tenke hadomi no tau fiar tomak ba Jeová no nunka duvida kona-ba ninia domin ba ita.—Mt 22:36-38; Tgo 5:11.

5. Saida mak bele ajuda Ita atu sente Jeová nia domin?

⁵ Lee Bíblia loroloron ho objetivu atu hakbesik liután ba Jeová. (Tgo 4:8) Bainhira lee Bíblia, tau fokus ba Jeová nia hahalok furak sira. Sente ninia domin liuhusi ninia liafuan no hahalok. (Éx 34:6) Karik susar ba ema balu atu fiar katak Maromak hadomi sira tanba sira nunka sente domin. Se Ita sente nuneʼe, loroloron koko atu hakerek lista kona-ba oinsá Jeová hatudu ona laran-sadiʼa no laran-diʼak ba Ita. (Sal 78:38, 39; Rom 8:32) Se Ita hanoin kona-ba Ita-nia esperiénsia rasik no medita kona-ba buat neʼebé Ita lee iha Maromak nia Liafuan, karik Ita bele hakerek buat oioin neʼebé Jeová halo ona ba Ita. Bainhira Ita hafolin buat neʼebé Jeová halo ona ba Ita, Ita-nia relasaun ho nia sei sai metin liután.—Sal 116:1, 2.

6. Tuir Salmo 94:17-19, oinsá mak halo orasaun bele ajuda Ita?

⁶ Halo orasaun beibeik. Imajina toʼok oan neʼebé ninia aman hakoʼak hela. Oan neʼe sente seguru no la sente taʼuk atu koʼalia ba ninia aman kona-ba buat diʼak no aat neʼebé akontese ba nia iha loron neʼe. Ita mós bele sente hanesan neʼe se loroloron Ita hakbesik ba Jeová liuhusi orasaun. (Lee Salmo 94:17-19.) Bainhira halo orasaun ba Jeová, fó sai Ita-nia sentimentu “hanesan fakar sai bee” no fó-hatene ba Ita-nia Aman domin nian kona-ba Ita-nia taʼuk no neon-susar hotu. (Lam 2:19) Rezultadu mak saida? Ita sei sente “Maromak nia dame neʼebé aas liu ema nia hanoin hotu”. (Flp 4:6, 7) Bainhira Ita halo beibeik orasaun hanesan neʼe, Ita sei hakbesik liután ba Jeová.—Rom 8:38, 39.

7. Tanbasá mak Ita tenke fiar metin katak Maromak sei haraik duni bensaun liuhusi ninia Ukun?

⁷ Fiar metin katak Maromak sei haraik duni bensaun liuhusi ninia Ukun. (Núm 23:19) Se Ita la fiar metin ba Maromak nia promesa sira, fasil liu ba Satanás no ninia ema sira atu halo Ita taʼuk. (Prov 24:10; Ebr 2:15) Oinsá mak Ita bele hametin Ita-nia fiar ba Maromak nia Ukun agora? Uza tempu atu estuda Maromak nia promesa neʼebé nia sei kumpre liuhusi ninia Ukun no tanbasá Ita bele fiar katak neʼe sei sai loos. Oinsá mak ida-neʼe bele ajuda Ita? Hanoin toʼok esperiénsia husi Stanley Jones. Nia tama komarka durante tinan hitu tanba ninia fiar. Saida mak ajuda nia atu tahan ho laran-metin? Nia hatete: “Haʼu-nia fiar  mak metin tanba haʼu hatene kona-ba Maromak nia Ukun no buat neʼebé Ukun neʼe sei halo, no haʼu nunka duvida kona-ba neʼe. Tan neʼe, la iha ema ida mak bele halo haʼu husik Jeová.” Se Ita fiar metin ba Maromak nia promesa sira, Ita sei hakbesik liután ba Jeová no la rende an tanba taʼuk.—Prov 3:25, 26.

8. Ita-nia hanoin kona-ba tuir reuniaun sira hatudu sai saida kona-ba ita? Esplika toʼok.

⁸ Tuir beibeik reuniaun sira. Reuniaun ajuda ita atu hakbesik liután ba Jeová. Ita-nia hanoin kona-ba tuir reuniaun beibeik mak sinál se ita bele tahan bainhira ema fó-terus ba ita iha futuru. (Ebr 10:24, 25) Tanbasá? Se agora deʼit ita husik buat kiʼik hanetik ita atu tuir reuniaun, saida mak sei akontese se iha futuru ita presiza tau ita-nia moris iha perigu laran hodi tuir reuniaun sira? Maibé, se agora ita hakaʼas an atu tuir reuniaun sira, ita sei la rende an bainhira inimigu sira koko atu hapara ita halibur hamutuk. Agora mak tempu atu haburas domin ba reuniaun sira. Se ita gosta tebes tuir reuniaun, maski ema kontra ka governu bandu, ita sei halo tuir Maromak duké halo tuir ema.—Após 5:29.

9. Tanbasá dekór eskritura sira mak dalan diʼak atu prepara an ba tempu neʼebé ema fó-terus ba ita?

⁹ Dekór eskritura neʼebé Ita gosta. (Mt 13:52) Ita-nia neon la perfeitu, maibé Jeová bele uza ninia espíritu santu neʼebé kbiit boot atu halo Ita hanoin-hetan fali eskritura sira neʼebé Ita dekór ona. (João 14:26) Haree toʼok esperiénsia husi irmaun ida neʼebé tama sela izoladu iha komarka iha Alemaña Leste, nia hatete: “Haʼu kontente tebes tanba iha tempu neʼebá haʼu dekór ona eskritura 200 liu. Maski haʼu mesak, haʼu sai okupadu hodi medita kona-ba tópiku oioin husi Bíblia.” Eskritura sira-neʼe ajuda ita-nia irmaun atu nafatin besik ba Jeová no tahan ho laran-metin.

10. Tanbasá ita tenke dekór knananuk?

¹⁰ Dekór no kanta knananuk husi ita-nia organizasaun. Bainhira Paulo no Silas tama komarka iha Filipe, sira kanta knananuk adorasaun nian neʼebé sira dekór ona. (Após 16:25) Nuneʼe mós, iha tempu uluk bainhira ita-nia irmaun-irmán sira iha Uniaun Soviétika sai dadur iha Sibéria, kanta knananuk mak hametin sira-nia fiar. Irmán Mariya Fedun hatete: “Ami kanta knananuk hotu neʼebé  ami dekór husi livru knananuk.” Irmán neʼe hatete katak knananuk sira-neʼe hametin sira hotu no ajuda sira atu hakbesik ba Jeová. Ita-nia fiar mós sai metin liután bainhira ita kanta knananuk neʼebé ita gosta husi ita-nia organizasaun. Entaun, dekór knananuk sira-neʼe agora!—Haree kaixa “ Fó haʼu aten-brani”.

11-12. (a) Tuir 1 Samuel 17:37, 45-47, tanbasá mak David aten-brani? (b) Lisaun importante saida mak ita aprende husi David nia ezemplu?

¹¹ Ita presiza aten-brani atu bele tahan kuandu ema haterus Ita. Se Ita sente katak Ita ladún aten-brani, Ita bele halo saida? Hanoin-hetan, aten-brani neʼebé loos la depende ba ita-nia isin, forsa, ka abilidade. Hanoin toʼok joven David nia ezemplu bainhira nia kontra hasoru Golias. Se kompara ho jigante neʼe, David mak kiʼik, fraku, no la iha armas kompletu. David mós la iha surik. Maski nuneʼe, nia aten-brani tebes. David ho aten-brani halai ba oin atu funu hasoru jigante foti an neʼe.

¹² Tanbasá mak David aten-brani tebes? Nia fiar metin katak Jeová hamutuk ho nia. (Lee 1 Samuel 17:37, 45-47.) David la tau fokus ba Golias nia isin neʼebé boot se kompara ho nia. Maibé, David tau fokus ba oinsá Golias mak kiʼik deʼit se kompara ho Jeová. Saida mak ita aprende husi istória neʼe? Ita sei sente aten-brani se ita fiar metin katak Jeová hamutuk ho ita, no mós ita-nia inimigu mak kiʼik deʼit se kompara ho Maromak neʼebé Kbiit Boot Liu Hotu. (2 Krón 20:15; Sal 16:8) Oinsá mak ita bele sai aten-brani liután agora antes ema fó-terus ba ita?

13. Oinsá mak ita bele sai aten-brani liután? Esplika toʼok.

¹³ Ita bele sai aten-brani liután hodi haklaken liafuan diʼak kona-ba Maromak nia Ukun ba ema seluk. Tanbasá? Tanba kuandu ita haklaken, ita aprende atu tau fiar ba Jeová no la taʼuk ba ema. (Prov 29:25) Hanesan ema nia uat sai forte liután bainhira treinu, ita mós sai aten-brani liután bainhira ita haklaken husi uma ba uma, iha fatin públiku, iha dalan la formál, no iha fatin negósiu. Se agora ita sai aten-brani liután atu haklaken, ita sei sai prontu atu kontinua haklaken maski governu bandu.—1 Tes 2:1, 2.

14-15. Lisaun saida mak ita bele aprende husi irmán Nancy Yuen no Valentina Garnovskaya?

 ¹⁴ Ita bele aprende husi irmán laran-metin naʼin-rua neʼebé hatudu aten-brani tebes. Maski irmán Nancy Yuen aas metru ida ho balu deʼit, maibé susar atu halo nia taʼuk. * Nia lakohi para atu haklaken kona-ba Maromak nia Ukun. Rezultadu mak nia tama komarka durante tinan 20 iha rai-Xina. No ema neʼebé halo interrogasaun ba nia dehan katak nia mak “ema ulun-toos liu hotu” iha nasaun neʼe.

¹⁵ Nuneʼe mós ho irmán Valentina Garnovskaya neʼebé uluk tama komarka dala tolu iha Uniaun Soviétika no sura hamutuk nia tama komarka durante tinan 21. * Tanbasá? Nia kontinua haklaken toʼo autoridade sira hanaran nia “kriminozu neʼebé perigozu tebes”. Tanbasá irmán naʼin-rua neʼe aten-brani tebes? Sira fiar metin katak Jeová hamutuk ho sira.

16. Saida mak xave ba aten-brani neʼebé loos?

¹⁶ Hanesan ita aprende ona, atu sai aten-brani, ita labele tau fiar ba ita-nia forsa no abilidade. Maibé, ita tenke fiar katak Jeová hamutuk ho ita no nia halo funu hodi defende ita. (Deut 1:29, 30; Zac 4:6) Neʼe mak xave ba aten-brani neʼebé loos.

17-18. Jesus fó avizu saida ba ita hanesan hakerek iha João 15:18-21? Esplika toʼok.

¹⁷ Ita hakarak ema respeitu ita, maibé keta hanoin katak ita la iha folin bainhira ema odi ita. Jesus hatete: “Ksolok ba imi kuandu ema odi imi, la simu imi, koʼalia aat imi no hafoʼer imi-nia naran tanba Oan-Mane husi Ema.” (Lc 6:22) Jesus nia liafuan sira-neʼe katak sá?

¹⁸ Jesus la dehan katak ema Kristaun kontente bainhira ema odi sira. Maibé, nia fó avizu kona-ba buat neʼebé bele akontese ba ita. Ita laʼós parte husi mundu neʼe. Ita moris tuir Jesus nia hanorin no haklaken mensajen neʼebé nia mós haklaken. Tan neʼe mundu odi ita.  (Lee João 15:18-21.) Ita hakarak halo kontente Jeová. Entaun keta sente la diʼak se ema odi ita tanba ita hadomi ita-nia Aman.

19. Oinsá mak ita bele banati-tuir apóstolu sira?

¹⁹ Keta husik ema nia liafuan ka hahalok halo Ita sente moe tanba Ita mak Testemuña ba Jeová. (Miq 4:5) Ita bele aprende atu la sai taʼuk ba ema hodi hanoin kona-ba ezemplu husi apóstolu sira iha Jeruzalein lakleur depois ema oho Jesus. Sira hatene katak ulun-naʼin relijiaun Judeu nian odi tebes sira. (Após 5:17, 18, 27, 28) Maski nuneʼe, loroloron sira kontinua bá templu no haklaken hodi hatudu katak sira mak Jesus nia dixípulu. (Após 5:42) Sira la husik sentimentu taʼuk atu hapara sira. Ita mós bele manán sentimentu taʼuk hodi fó sai ba kolega serbisu, kolega eskola, no viziñu sira katak Ita mak Testemuña ba Jeová.—Após 4:29; Rom 1:16.

20. Tanbasá apóstolu sira kontente maski ema odi sira?

²⁰ Tanbasá apóstolu sira kontente? Sira hatene tansá ema odi sira, no maski sira hetan terus, sira haree ida-neʼe nuʼudar priviléjiu tanba halo Jeová nia hakarak. (Lc 6:23; Após 5:41) Apóstolu Pedro hakerek: “Maibé se imi hetan duni terus tanba halo hahalok loos, imi sei haksolok.” (1 Ped 2:19-21; 3:14) Bainhira ita komprende katak ema odi ita tanba ita halo buat loos, ita sei nunka husik ida-neʼe hapara ita atu serbí Jeová.

21-22. (a) Saida mak Ita rasik sei halo atu prepara an ba tempu neʼebé ema fó-terus ba Ita? (b) Saida mak ita sei aprende iha lisaun tuirmai?

²¹ Ita la hatene bainhira mak ema sei fó-terus ba ita ka governu bandu ita-nia adorasaun ba Jeová. Maibé, ita bele prepara agora liuhusi hametin ita-nia relasaun ho Jeová, sai aten-brani liután, no aprende atu tahan bainhira ema odi ita. Preparasaun neʼebé ita halo agora sei ajuda ita atu hamriik metin iha futuru.

²² Maibé oinsá se governu bandu duni ita-nia adorasaun? Iha lisaun tuirmai, ita sei aprende kona-ba Bíblia nia prinsípiu neʼebé bele ajuda ita kontinua serbí Jeová maski governu bandu.