NKHANI YAKUSAMBIRA YA NAMBALA 27
Munozgekiyengi Kutombozgeka Kweche Sonu
“Ŵanthu wosi wo akhumba kuja ndi umoyu wakujipereka kwaku Chiuta mwakukoliyana ndi Khristu Yesu, nawu azamutombozgeka.”—2 TIMO. 3:12.
SUMU 129 Tilutirizengi Kukunthiyapu
VO TISAMBIRENGI MU NKHANI IYI *
1. Ntchifukwa wuli tikhumbika kunozgeke kutombozgeka?
USIKU wakuti mawa laki wafwengi, Yesu wangukamba kuti akusambira ŵaki wosi atinkhikengi. (Yoha. 17:14) Mpaka sonu, Akhristu akugomezgeka atombozgeka ndi ŵanthu wo aleka kusopa Yehova. (2 Timo. 3:12) Po umaliru wa mugonezi wunu uŵandika, arwani ŵidu atitinkhengi ukongwa kuphara kali.—Mate. 24:9.
2-3. (a) Ntchifukwa wuli mantha ngaheni? (b) Kumbi tisambirengenji mu nkhani iyi?
2 Kumbi tingachita wuli sonu kuti tizikunthiyepu asani taziyamba kutombozgeka? Tikhumbika cha kuŵanaŵaniya vinthu vosi vo vazakutichitikiya. Asani tingachita viyo, tingayamba kuja ndi mantha. Venivi vingachitiska kuti tileki kuteŵete Yehova techendayambi kukumana ndi masuzgu. (Nthanthi 12:25; 17:22) Mantha ntchidya chanthazi ukongwa cho ‘murwani widu Dyaboli’ wagwiriskiya ntchitu. (1 Petu. 5:8, 9) Kumbi tingachitanji kuti tinozgeke kutombozgeka?
3 Mu nkhani iyi, tiwonengi vo tingachita kuti tije pa ubwezi ndi Yehova kweniso chifukwa cho titenere kuchitiya viyo sonu. Tikambiskanengi so vo tingachita kuti tije ndi chiganga. Ndipu pakumaliya tiwonengi vo tingachita asani ŵanthu atititinkha.
VO MUNGACHITA KUTI MUJE PA UBWEZI NDI YEHOVA
4. Mwakukoliyana ndi Aheberi 13:5, 6, kumbi ndi vinthu wuli vo titenere cha kukayika? Ndipu ntchifukwa wuli kuchita viyo nkhwakukhumbika?
4 Mungakayikanga cha kuti Yehova watikuyanjani ndipuso kuti wazakukujowoni cha. (Ŵerengani Aheberi 13:5, 6.) Chigongwi cha Alinda chinyaki kuvuli uku chingukamba kuti: “Munthu yo watimuziŵa umampha Chiuta watimuthemba ukongwa asani watombozgeka.” Fundu yeniyi njauneneska nadi! Kuti tikunthiyepu asani titombozgeka, titenere kumuyanja ukongwa Yehova kweniso kumuthemba ndi mtima widu wosi. Ndipuso tingakayikanga cha kuti watitiyanja ukongwa.—Mate. 22:36-38; Yako. 5:11.
5. Kumbi mungaziŵa wuli kuti Yehova watikuyanjani?
5 Muŵerengengi Bayibolu zuŵa lelosi kuti muje pa ubwezi ndi Yehova. (Yako. 4:8) Penipo muŵerenga, muŵanaŵaniyengi mijalidu yamampha yaku Yehova nge chanju ndipuso lisungu. Mutenere kuziŵa kuti watikuyanjani kuziya mu vo wakamba ndi kuchita. (Chitu. 34:6) Anyaki angasuzgika kugomezga kuti Chiuta watiŵayanja chifukwa ŵechendayanjikepu pa umoyu wawu. Asani ndimu namwi muvwiya, zuŵa lelosi muyesesengi kulemba nthowa zo Yehova walongore kuti watikuyanjani. (Sumu 78:38, 39; Aro. 8:32) Asani muŵanaŵaniya vinthu vo vikukuchitikiyanipu kweniso vo muŵerenga mu Mazu ngaku Chiuta, mungalemba vinthu vinandi vo Yehova wakuchitiyani pa umoyu winu. Ndipu asani muwonga vo Yehova wakuchitiyanipu, ubwezi winu ndi iyu ujengi wakukho ukongwa.—Sumu 116:1, 2.
6. Nge mo pakambiya pa Sumu 94:17-19, kumbi pempheru lakutuliya pasi pa mtima lingakuwovyani wuli?
6 Mupempherengi nyengu zosi. Yeruzgiyani kuti ada avumbatiya mwana wawu munamana. Mwana uyu wawona kuti awisi atimuyanja ukongwa ndipu watiŵagomezga. Iyu wafwatuka kuŵakambiya vinthu vamampha kweniso viheni vo vamuchitikiya pa zuŵa lo. Namwi mungaja pa ubwezi wenuwu ndi Yehova asani zuŵa lelosi mukambiskana nayu mu pempheru kutuliya pasi pa mtima. (Ŵerengani Sumu 94:17-19.) Penipo mupemphera kwaku Yehova, ‘mupunguwengi mtima winu nge maji’ ndipu mumukambiyengi vosi vo vitikufipiskani mtima. (Chitenje 2:19) Kumbi muyanduwengi wuli asani muchitengi viyo? Mujengi ndi “chimangu chaku Chiuta cho chiluska kuziŵa vinthu kosi.” (Afi. 4:6, 7) Kweniso mujivwengi kuti Yehova mwe nayu pafupi ukongwa.—Aro. 8:38, 39.
Tija ndi chiganga asani tigomezga Yehova ndi Ufumu waki
Stanley Jones wenga ndi chivwanu chakukho chifukwa wagomezganga Ufumu waku Chiuta (Wonani ndimi 7)
7. Ntchifukwa wuli mutenere kugomezga kuti vo Chiuta wakulayizga mu Ufumu waki vazamuchitika nadi?
7 Mungakayikanga cha kuti vinthu vo Chiuta wakulayizga mu Ufumu waki vazamuchitika. (Maŵe. 23:19) Asani mungayamba kukayika, chingaŵa chipusu kuti Satana ndi ŵanthu ŵaki akuwofyeni. (Nthanthi 24:10; Ahe. 2:15) Kumbi mungachita wuli kuti muwugomezgengi ukongwa Ufumu waku Chiuta? Mupatuwengi nyengu yakusambiriya vo Chiuta wakulayizga mu Ufumu waki kweniso chifukwa cho mungagomezge kuti vazamufiskika nadi. Kumbi venivi vingakuwovyani wuli? Wonani chakuyeruzgiyapu chaku Stanley Jones. Iyu wangumangika kwa vyaka 7 chifukwa cha vo wagomezganga. * Kumbi ntchinthu wuli cho chingumuwovya kuti wakunthiyepu? Stanley wangukamba kuti: “Ndenga ndi chivwanu chakukho chifukwa ndawuziŵanga umampha Ufumu waku Chiuta kweniso vo wazamuchita asani waziyamba kulamuliya. Ndakayikanga cha venivi chinanga nkhamanavi.” Asani namwi mugomezgengi ukongwa malayizgu ngaku Chiuta, mujengi nayu pa ubwezi wapamtima ndipu mwazamuleka cha kumuteŵete chifukwa cha mantha.—Nthanthi 3:25, 26.
8. Kumbi mo tiwone maunganu vilongonji? Konkhoskani.
8 Muwunganengi nyengu zosi. Maunganu ngatitiwovya kuti tije pa ubwezi ndi Yehova. Mo tiwone maunganu sonu vingatiwovya kuti tiziŵi mo tazamuchitiya asani taziyamba kutombozgeka kunthazi. (Ahe. 10:24, 25) Ntchifukwa wuli tikamba viyo? Asani sonu titondeka kuwungana chifukwa cha tivifukwa timanatimana, kwe wuli kunthazi po tazamukhumbika kuŵika umoyu widu pangozi kuti tikawungani ndi Akhristu anyidu? Kweni asani sonu titesesa kuwungana, tazamuthera cha pa nyengu yo arwani ŵidu azakutikaniza kuwungana. Sonu ndiyu nyengu yakuti tiyanjengi ukongwa kuwungana. Asani sonu titanja kuwungana, palivi yo wazakutikaniza kuvwiya Chiuta, chinanga lingaŵa boma.—Machi. 5:29.
Kuloŵeza malemba ndi sumu za Ufumu kwazakukuwovyani asani mwaziyamba kutombozgeka (Wonani ndimi 9) *
9. Ntchifukwa wuli kuloŵeza malemba ndi nthowa yamampha yakunozgeke kutombozgeka?
9 Muloŵezengi malemba ngo mutanja. (Mate. 13:52) Panyaki muswera cha kuluwa vinthu kweni Yehova wangagwiriskiya ntchitu mzimu waki wakupaturika kuti ukukumbuseni malemba ngo mukuloŵeza. (Yoha. 14:26) Mubali munyaki yo angumujaliya mujeri lakuyija ku East Germany wangukamba kuti: “Ndingukondwa ukongwa chifukwa ndinguloŵeza malemba ngakujumpha 200 pa nyengu iyi! Mujeri ndaŵanaŵaniyanga malemba ngenanga.” Malemba yanga ngangumuwovya kuti wamuyanjengi ukongwa Yehova kweniso kuti wakunthiyepu.
(Wonani ndimi 10) *
10. Ntchifukwa wuli titenere kuloŵeza sumu?
10 Muloŵezengi sumu zo zithamika Yehova. Paulo ndi Sila ŵati amangika ku Filipi, ambanga sumu zakuthamika Yehova zo anguloŵeza pamtima. (Machi. 16:25) Mwakuyanana ŵaka, kumbi abali anguchita wuli kuti aje ndi chivwanu chakukho boma lakali la Soviet Union lati laŵadikisiya ku Siberia? Mzichi Mariya Fedun wangukamba kuti: “Tambanga sumu zosi zo taziŵanga za mu buku lidu la sumu.” Iyu wangukamba kuti sumu izi zinguŵawovya kujivwa kuti Yehova wenawu. Kumbi muchiskika asani mutumba sumu zauzimu zo mutanja? Asani ndi viyo, yambanipu kuloŵeza sumu zenizi sonu!—Wonani bokosi lakuti “ Ndiwovyeni Kuja ndi Chiganga.”
VO MUNGACHITA KUTI MUJE NDI CHIGANGA
11-12. (a) Mwakukoliyana ndi 1 Samuele 17:37, 45-47, ntchifukwa wuli Davidi wenga ndi chiganga? (b) Kumbi vo Davidi wanguchita vititisambizanji?
11 Mukhumbika chiganga asani mutombozgeka. Kumbi mungachita wuli asani muwona kuti mulivi chiganga? Kuti munthu waje wachiganga vithemba nthazi, ukhomi pamwenga lusu cha. Chakuyeruzgiyapu ndi Davidi. Pakuyeruzgiya ndi Goliati, iyu wenga mumana ukongwa, wengavi nthazi kweniso vidya vakukwana. Iyu wengavi ndi lipanga viyo. Kweni wenga ndi chiganga ndipu wangutchimbiya kuchipumana ndi Goliati, yo wenga chinkhara chakujikuzga.
12 Ntchifukwa wuli Davidi wenga ndi chiganga viyo? Iyu wagomezganga kuti Yehova we nayu. (Ŵerengani 1 Samuele 17:37, 45-47.) Davidi waŵanaŵaniyanga umana waki cha pakuyeruzgiya ndi ukhomi ndipuso utali waku Goliati. Mumalu mwaki, waŵanaŵaniyanga umana waku Goliati pakuyeruzgiya ndi Yehova. Kumbi tisambiranji pa nkhani iyi? Tingaja ndi chiganga asani tigomezga kuti Yehova we nasi kweniso asani tisimikiza kuti arwani ŵidu ŵenge nyere pakuyeruzgiya ndi Chiuta Wanthazizosi. (2 Miko. 20:15; Sumu 16:8) Kumbi tingachita wuli kuti tije ndi chiganga sonu techendayambi kutombozgeka?
13. Kumbi tingachita wuli kuti tije ndi chiganga? Konkhoskani.
13 Tingaja ndi chiganga sonu asani tipharazga uthenga wamampha wa Ufumu waku Chiuta. Ntchifukwa wuli tikamba viyo? Chifukwa kupharazga kutitisambiza kuti tigomezgengi Yehova ndipuso kuti tileki kopa ŵanthu. (Nthanthi 29:25) Minofu yija yanthazi asani tichita masaza. Mwakuyanana ŵaka, tituŵa ndi chiganga asani tipharazga ku nyumba ndi nyumba, ko kusanirika ŵanthu anandi kweniso peposi po tasaniya mpata. Asani tichita chiganga kuti tipharazgengi sonu, tazamulutirizga kupharazga chinanga kuti boma lingazikaniza ntchitu yidu.—1 Ate. 2:1, 2.
Nancy Yuen wangukana kuleka kupharazga uthenga wamampha (Wonani ndimi 14)
14-15. Kumbi tingasambiranji kwaku Nancy Yuen ndi Valentina Garnovskaya?
14 Tingasambira vinandi kwa azichi ŵaŵi akugomezgeka wo ŵenga ndi chiganga. Nancy Yuen wenga mutali wanu mita pe ndi hafu kweni wengavi mantha. * Iyu wanguleka cha kupharazga uthenga wamampha wa Ufumu waku Chiuta ŵati amukaniza. Ivi vinguchitiska kuti boma la China limumangi kwa vyaka vakujumpha 20. Arara a boma wo amufumbanga angukamba kuti wenga “munthu wamtafu ukongwa” mucharu chawu chosi.
Valentina Garnovskaya wagomezganga kuti Yehova wenga nayu (Wonani ndimi 15)
15 Mwakuyanana ŵaka, Valentina Garnovskaya nayu wangumangika katatu ndi boma la Soviet Union. Mujeri wangujamu vyaka 21. * Chifukwa wuli? Chifukwa chakuti wakananga kuleka kupharazga mwakuti arara a boma angukamba kuti wenga “chigeŵenga chakofya ukongwa.” Ntchinthu wuli cho chinguwovya azichi yaŵa kuti aje ndi chiganga chaviyo? Yiwu akayikiyanga cha kuti Yehova wenga nawu.
16. Kumbi ntchinthu wuli cho chingatiwovya kuti tije ndi chiganga?
16 Nge mo takambiyapu kali, tingathembanga nthazi pamwenga malusu ngidu cha. Mumalu mwaki, tigomezgengi kuti Yehova we nasi ndipuso kuti watitirwiya nkhondu. (Mara. 1:29, 30; Zeka. 4:6) Chenichi ndichu chingatiwovya kuti tije ndi chiganga.
VO MUNGACHITA ASANI ŴANTHU ATIKUTINKHANI
17-18. Kumbi Yesu wangutitcheŵesanji pa Yohane 15:18-21? Konkhoskani.
17 Tituvwa umampha asani ŵanthu atititumbika. Kweni tikhumbika cha kujiwona kuti te ambula kwenere asani ŵanthu atititinkha. Yesu wanguti: “Mwe akutumbikika asani ŵanthu atikutinkhani, atikupatuwani, atikunyozani ndipuso atikunangiyani mbiri chifukwa cha Mwana wa munthu.” (Luka 6:22) Kumbi Yesu wang’anamuwanganji?
18 Kumbi Yesu wang’anamuwanga kuti Akhristu azamukondwa asani asuzgika? Awa. Kweni wakambanga ŵaka vo vichitika asani munthu waja Mkhristu. Isi te a charu cha. Tichita vo Yesu wasambizanga ndipu tipharazga uthenga wo wapharazganga. Lekani charu chitititinkha. (Ŵerengani Yohane 15:18-21.) Tikhumba kukondwesa Yehova. Asani ŵanthu atititinkha chifukwa chakuti titanja Awusefwi, lo ndi suzgu lawu.
19. Kumbi tingachita wuli nge mo akutumika anguchitiya?
19 Tingachitanga soni cha kuti te Akaboni aku Yehova chifukwa cha vo ŵanthu akamba pamwenga kuchita. (Mika 4:5) Tingaleka kopa ŵanthu asani tingasambira vo akutumika anguchita ku Yerusalemu Yesu wati wabayika. Yiwu aziŵanga kuti alongozgi achisopa cha Chiyuda aŵatinkhanga ukongwa. (Machi. 5:17, 18, 27, 28) Kweni zuŵa lelosi alutanga ku nyumba yakusopiyamu ndipu ajibisanga cha kuti mbakusambira aku Yesu. (Machi. 5:42) Akutumika achitanga mantha cha. Nasi tingaleka kopa ŵanthu asani tileka kujibisa kuti te Akaboni aku Yehova ku sukulu, kuntchitu ndipuso muchigaŵa chidu.—Machi. 4:29; Aro. 1:16.
20. Ntchifukwa wuli akutumika akondwanga chinanga kuti atinkhikanga?
20 Ntchifukwa wuli akutumika akondwanga? Aziŵanga chifukwa cho ŵanthu aŵatinkhiyanga ndipu awonanga kuti ndi mwaŵi kutombozgeka chifukwa chakuchita khumbu laku Yehova. (Luka 6:23; Machi. 5:41) Wakutumika Peturo wakulemba kuti: “Chinanga kuti musuzgiki chifukwa cha urunji, mwe akutumbikika” pamwenga kuti mwe akukondwa. (1 Petu. 2:19-21; 3:14) Asani taziŵa kuti ŵanthu atititinkha chifukwa chakuti tichita vamampha, tilekengi cha kuteŵete Yehova chifukwa chakopa ŵanthu.
MUTUMBIKIKENGI ASANI MUNOZGEKE
21-22. (a) Kumbi muchitengenji kuti munozgeke kutombozgeka? (b) Kumbi tazamukambiskananji mu nkhani ya sabata yamawa?
21 Tiziŵa cha kuti ŵanthu ayambengi zuŵanji kutitombozga pamwenga nyengu yo boma litikanizgiyengi kusopa Yehova. Kweni cho tiziŵa ntchakuti tingayamba sonu kunozgeke. Tingachita viyo mwakuja pa ubwezi wapamtima ndi Yehova, kuja achiganga ndipuso kukunthiyapu asani ŵanthu atititinkha. Kunozgeke limu kungazitiwovya kuti tizilutirizgi kuteŵete Yehova kunthazi.
22 Wuli asani boma latikaniza kusopa? Mu nkhani ya sabata yamawa, tazamukambiskana fundu za mu Bayibolu zo zingatiwovya kuti tilutirizgi kuteŵete Yehova asani boma latikaniza kusopa.
SUMU 118 “Tisazgiyeniku Chivwanu”
^ ndimi 5 Palivi munthu yo wakhumba kutinkhika. Kweni nyengu yeyosi tingatombozgeka. Nkhani iyi, yitiwovyengi kuti tizije ndi chiganga asani taziyamba kutombozgeka.
^ ndimi 7 Wonani Chigongwi cha Alinda cha Chingelezi cha December 15, 1965, papeji 756-767.
^ ndimi 14 Wonani Chigongwi cha Alinda cha Chingelezi cha July 15, 1979, papeji 4-7. Wonani so vidiyo yakuti Jehovah’s Name Will Be Made Known pa JW Broadcasting®. Lutani po palembeka kuti INTERVIEWS AND EXPERIENCES.
^ ndimi 15 Wonani Buku Lapachaka la Mboni za Yehova la 2008 papeji 191-192 ndi Chigongwi cha Alinda cha Chichewa cha April 15, 2009, papeji 9-10 ndimi 10-11.
^ ndimi 67 CHITHUZI: Pakusopa kwa pabanja, apapi agwiriskiya ntchitu makadi kuti awovyi ŵana ŵawu kuloŵeza malemba.
^ ndimi 70 CHITHUZI: Apapi ndi ŵana ŵawu atumba sumu za Ufumu pakuluta ku maunganu.
