1. ¿Tuku xlakata kilikatsitkan tuku natlawayaw akxni nakinkaputsastalanikanan?

KATSISNI akxni Jesús nina xniy, lichuwinalh pi kakilhtamaku xʼama kasitsini tiku kstalaninanin xlitaxtuputunkgolh (Juan 17:14). Lata ama kilhtamaku, putum tiku ni tatayakgo xaxlikana takanajla kaputsastalanikgonit xaxlikana kstalaninanin Cristo (2 Tim. 3:12). Chu chuna la talakatsuwima xlisputni uma kakilhtamaku tlakg nataliwaka la nakinkaputsastalanikanan (Mat. 24:9).

2, 3. 1) ¿Tuku xlakata tapekua lu nitlan? 2) ¿Tuku naʼakxilhaw kʼuma artículo?

² ¿Tuku kilitlawatkan la uku xlakata nakatsiyaw tuku natlawayaw akxni nakinkaputsastalanikanan? Ni talakaskin nalilakpuwanaw putum tuku max nakinkatlawanikanan. Komo chuna xtlawaw, uma natlawa pi nialh naskujnaniyaw Jehová maski nitu titaxtumaw taputsastalanit xlakata max lu napekuanaw (Prov. 12:25; 17:22). Tapekua wa pulaktum tuku Akgskgawini maklakaskin xlakata namakgxtakgaw Jehová (1 Ped. 5:8, 9). Wa xlakata, ¿tuku natlawayaw la uku xlakata tliwakga nawanaw?

³ Kʼuma artículo naʼakxilhaw tuku kilitlawatkan xlakata namatliwakglhaw la talalinaw Jehová chu tuku xlakata la uku lu xlakaskinka. Nachuna, naʼakxilhaw tuku natlawayaw xlakata ni napekuanaw chu tuku natlawayaw akxni latamanin nakinkasitsinikgoyan.

4. Chuna la wan Hebreos 13:5, 6, ¿tuku liwana kilikatsitkan chu tuku xlakata?

⁴ Liwana kakatsiw pi Jehová kinkapaxkiyan chu nikxni kintikamakgxtakgni (kalikgalhtawakga Hebreos 13:5, 6). Akglhuwata kata Makatsinina lichuwinalh: «Tiku tlakg liwana lakgapasa  Dios wa tiku tlakg nalipawan akxni natitaxtu taputsastalanit». Uma lu xlikana. Xlakata tlan natayaniyaw taputsastalanit, talakaskin napaxkiyaw Jehová chu xliputum kinakujkan nalipawanaw, chu nikxni nalakpuwanaw pi ni kinkapaxkiyan (Mat. 22:36-38; Sant. 5:11).

5. ¿Tuku nakinkamakgtayayan naʼakxilhaw xtapaxkit Jehová?

⁵ Ankgalhin kalikgalhtawakgaw Biblia xlakata nalakgtalakatsuwiyaw Jehová (Sant. 4:8). Akxni nalikgalhtawakgayaw, liwana kaʼakxilhwi xtayat. Kaʼakxilhwi xtapaxkit akxni chuwinan chu tuku tlawa (Éx. 34:6). Max wi tiku ni kanajla pi Dios kapaxki xlakata ni kalimasiyanikanit tapaxkit. Komo chuna titaxtumaw, katlawaw akgtum lista chali chali chu katsokgwiliw la kinkalimasiyaniyan Jehová xtalakgalhaman chu xtapaxkit (Sal. 78:38, 39; Rom. 8:32). Max lhuwa tuku natsokgwiliyaw komo nalilakpuwanaw tuku titaxtunitaw makgasa chu tuku likgalhtawakganitaw kBiblia. Komo tlakg lanka xtapalh naʼakxilhaw tuku Jehová tlawa kimpalakatakan tlakg natatliwakglha la talalinaw (Sal. 116:1, 2).

6. Chuna la wan Salmo 94:17-19, ¿la kinkamakgtayayan oración nema tlawayaw xliputum kinakujkan?

⁶ Ankgalhin katlawaw oración. Kalilakpuwaw chatum aktsu kgawasa tiku xtlat akgpixtiya. Lu tlan makgkatsi chu asta wani putum tuku titaxtu uma kilhtamaku, tuku tlan chu tuku nitlan titaxtulh. Akinin nachuna natalalinaw Jehová komo ankgalhin xliputum kinakujkan natlawaniyaw oración (kalikgalhtawakga Salmo 94:17-19). Biblia wan: «Kawili kxlakatin Jehová putum tuku wi kminaku xtachuna la komo kxtakgamakganti chuchut» (Lam. 2:19). Komo chuna natlawayaw nakgalhiyaw tuku Biblia limapakuwi «xtakaksni Dios nema nila akgatekgskgo latamanin» (Filip. 4:6, 7). Komo ankgalhin natlawaniyaw oración Jehová, tlakg natalakatsuwiniyaw (Rom. 8:38, 39).

7. ¿Tuku xlakata liwana kilikatsitkan pi xlikana nakgantaxtu tasikulunalin nema nalimin xTamapakgsin Dios?

⁷ Liwana kakatsiw pi xlikana nakgantaxtu tasikulunalin nema nalimin xTamapakgsin Dios (Núm. 23:19). Komo ni liwana kanajlayaw pi uma xlikana nakgantaxtu, Satanás ni tuwa katimakgkatsilh nakinkamakgapekuanan (Prov. 24:10; Heb. 2:15). ¿Tuku tlan natlawayaw xlakata namatliwakglhaw kintakanajlakan? Kalimaxtuw kilhtamaku xlakata nalikgalhtawakgayaw xtamalaknun Jehová chu tuku xlakata liwana katsiyaw pi xlikana nakgantaxtu. Xlakata liwana nakatsiyaw tuku xlakata lu xlakaskinka, kaʼakxilhwi xliʼakxilhtit Stanley Jones, tiku liwaka akgtujun kata xtanuma kpulachin xlakata xtakanajla. * Xla lichuwinalh tuku makgtayalh ni namakgxtakga Dios: «Tuku xakkatsini xlakata xTamapakgsin Dios chu xlakata nikxni klakpuwa pi ni xaxlikana xwanit, wa tuku kimakgtayalh. Ni kimakgatlajakgolh». Komo tliwakga kgalhiniyaw takanajla xtamalaknun Dios tlakg natalakatsuwiniyaw  chu tapekua ni kintikamakgatlajan (Prov. 3:25, 26).

8. Kalichuwinanti tuku nakitaxtu komo ni namakgxtakgaw tamakxtumit.

⁸ Ankgalhin kaʼaw ktamakxtumit. Uma nakinkamakgtayayan tlakg natalakatsuwiniyaw Jehová. Chuna la akxilhaw, tamakxtumit nalimasiya komo natayaniyaw akxni nakinkaputsastalanikanan (Heb. 10:24, 25). Kaʼakxilhwi tuku xlakata. Komo la uku namastayaw talakaskin pi tuku ni lu xlakaskinka natlawa ni naʼanaw ktamakxtumit, ¿tuku natlawayaw akxni nialh namastakan talakaskin nakatatamakxtumiyaw kinatalankan? Nachuna, komo lakpuwanitaw nikxni namakgatsankgayaw tamakxtumit, tiku kinkaputsastalanimakgon ni katitlawakgolh pi namakgxtakgaw. Wa xlakata, la uku tlakg talakaskin nalismaniyaw ankgalhin naʼanaw ktamakxtumit. Komo chuna natlawayaw, taputsastalanit chu mapakgsinanin ni kintikamamakgxtakgnikgon la skujnaniyaw Dios (Hech. 5:29).

9. ¿Tuku xlakata katsinikan makgapitsi textos nakinkamakgtayayan akxni nakinkaputsastalanikanan?

⁹ Kakatsiniw makgapitsi textos xalak Biblia (Mat. 13:52). Xlikana pi max tuwa makgkatsiyaw nalakapastakaw textos, pero Jehová tlan nakinkalimakgtayayan xʼespíritu xlakata tlan nalakapastakaw (Juan 14:26). Chatum tala tiku xtamaknukanit kpulachin kʼAlemania lichuwinalh: «Lu kimakgtayalh xlakata xakkatsininit liwaka akgtiy ciento textos, xlakata umakgolh kilhtamaku wa xaklilakpuwan tuku masiya Biblia». Umakgolh textos makgtayalh xlakata ni namakgxtakga Jehová chu tlakg natalakatsuwini.

10. ¿Tuku xlakata talakaskin nakatsiniyaw makgapitsi takilhtlin?

¹⁰ Kakatsiw takilhtlin nema malanki Jehová chu kalikilhtliw. Akxni Pablo chu Silas xkatamaknukanit kpulachin anta kFilipos, kilhtlinikgolh Jehová takilhtlin nema xkatsinikgo (Hech. 16:25). Kinatalankan xalak makgan Unión Soviética nema kamalakgachaka kSiberia nachuna tlawakgolh xlakata namatliwakglhkgo xtakanajlakan. Tala Mariya Fedun lakapastaka: «Ktsukuw kalikilhtliyaw takilhtlin nema xakkatsininitaw». Lichuwinalh pi umakgolh takilhtlin xkamakgtaya xlakata ni nataxlajwanikgo chu xlakata xmakgkatsikgo pi lakatsu xwilanikgolh Jehová. ¿Kinkamatliwakglhan akxni likilhtliyaw takilhtlin nema tlakg lakgatiyaw klibro xla takilhtlin chu nema min ksitio xla Internet? Talakaskin pi la uku nakatsiniyaw makgapitsi takilhtlin (kaʼakxilhti recuadro « Ni kaktipekualh, wix naklipawanan»).

11, 12. 1) Chuna la wan 1 Samuel 17:37, 45-47, ¿tuku xlakata David ni pekualh? 2) ¿Tuku kinkamasiyaniyan xliʼakxilhtit David?

¹¹ Xlakata tlan natayaniyaw taputsastalanit, talakaskin ni napekuanaw. ¿Tuku natlawayaw komo pekuanaw? Kalakapastakwi pi xlakata ni pekuankan ni wa xlakata tlakg lanka akinin, tliwakga o lu skgalala litaxtuyaw. Kaʼakxilhwi tuku titaxtulh David. Akxni kgawasaku xwanit, talatlawalh Goliat. David tlakg aktsu chu ni tliwakga xwanit nixawa uma filisteo. Nachuna, nitu xlin xlakata natalatlawanan, ni xkgalhi nipara akgtum espada. Pero ni xpekuan chu lakapala alh talatlawa uma tlankajwa chixku.

¹² ¿Tuku xlakata David ni pekualh? Xlakata liwana xkatsi pi Jehová xʼama makgtaya (kalikgalhtawakga 1 Samuel 17:37, 45-47). Ni wa lakapastakli pi nitu xlitaxtu kxlakatin Goliat, wata wa lakapastakli pi Goliat nitu xlitaxtu kxlakatin Jehová. Uma lu xlakaskinka tuku kinkamasiyaniyan: ni katipekuaw komo ankgalhin nalakapastakaw pi Jehová ankgalhin nakinkamakgtayayan chu komo nalakapastakaw pi kintalatlawanakan nitu litaxtukgo kxlakatin xatliwakga Dios, Jehová (2 Crón. 20:15; Sal. 16:8). Xlakata nina min taputsastalanit, ¿tuku talakaskin natlawayaw la uku, xlakata ni napekuanaw?

13. ¿Tuku kilitlawatkan xlakata ni napekuanaw? Kalichuwinanti.

¹³ Ni napekuanaw komo nalichuwinanaw xTamapakgsin Dios. ¿Tuku xlakata? Xlakata akxni chuna natlawayaw tlakg nalipawanaw Jehová chu ni katikapekuaniw latamanin (Prov. 29:25). Xtachuna akxni tlawayaw ejercicio tatliwakglha kimaknikan, nachuna akxni anaw lichuwinaw Dios kʼakgatunu chiki, niku lhuwa titaxtukan o niku stanamaka; matliwakglhaw la lipawanaw Jehová. Komo la uku ni napekuanaw akxni nalichuwinanaw xtachuwin Dios na ni katipekuaw akxni nialh namastakan talakaskin nakakninaniyaw Dios (1 Tes. 2:1, 2).

14, 15. ¿Tuku kinkamasiyaniyan xliʼakxilhtitkan Nancy Yuen chu Valentina Garnovskaya?

¹⁴ Wi tuku lu xlakaskinka kinkamasiyaniyan xliʼakxilhtitkan chatiy natalan nema limasiyakgolh pi ni xpekuankgo. Chatum wanikan Nancy Yuen. Xla aktsu xwanit, kajwatiya xmakgatsi akgtum metro aitat (5 pies) la xliʼaktsu xwanit, pero nila xmakgapekuankan. * Maski wanika pi nialh xlichuwinalh Dios xla  ni kgalhakgaxmatnalh, chu wa xlakata tamaknuka kpulachin liwaka akgpuxam kata anta kChina. Jueces tiku lakputsananikgolh wankgolh pi xla «lu xatsakat xwanit».

¹⁵ Atanu tala wa Valentina Garnovskaya. Makgtutu tamaknuka kpulachin anta kxamakgan Unión Soviética chu liwaka puxamatum kata tanulh. * Liwana xlakkaxwilinit chuntiya nalichuwinan Dios chu asta mapakgsinanin wankgolh pi xla «xalipekuanit tiku lakatsala limapakgsin» xwanit. ¿Tuku xlakata umakgolh natalan ni pekuankgolh? Xlakata liwana xkatsikgo pi Jehová xkamakgtayama.

16. ¿Tuku nakinkamakgtayayan ni napekuanaw?

¹⁶ Chuna la akxilhnitaw, talakaskin ni wa nalipawanaw kilitliwakgakan chu tuku tlan tlawayaw xlakata ni napekuanaw. Tuku kilitlawatkan wa nalipawanaw pi Jehová nakinkamakgtayayan chu wa lakatin ya xlakata natalatlawa kintalamakgasitsinkan (Deut. 1:29, 30; Zac. 4:6). Wa uma tuku nakinkamakgtayayan ni napekuanaw.

17, 18. Chuna la wan Juan 15:18-21, ¿tuku lichuwinalh Jesús pi nakinkaʼakgspulayan, chu tuku xlakata?

¹⁷ Lakaskinaw pi amakgapitsin kakinkamaxkikgon kakni pero nikxni katilakpuwaw pi nitu litaxtuyaw xlakata latamanin ni kinkaʼakxilhputunkgoyan. Jesús lichuwinalh: «Paxuwayatit wixin akxni latamanin ni nakaʼakxilhputunkgoyan, chu akxni nakatamakxtukgoyan kxlakgstipankan chu nakalikgalhkgamanankgoyan chu lixkajni nalichuwinankgo mintukuwanikan xtachuna la tiku tlawa tuku nitlan kaj xpalakata xKgawasa chixku» (Luc. 6:22). ¿Tuku wamputun umakgolh tachuwin?

¹⁸ Jesús ni xwamputun pi kstalaninanin tlan nalimakgkatsiyaw akxni nakinkaputsastalanikanan, wata xlikana tuku xlichuwinama. Kinkasitsinikanan xlakata ni makgtanuyaw kʼuma kakilhtamaku, akinin lilatamayaw xtamasiy Jesús chu lichuwinanaw xtamakatsinin (kalikgalhtawakga Juan 15:18-21). Akinin makgapaxuwaputunaw Jehová. Komo latamanin kinkasitsinikgoyan xlakata paxkiyaw Jehová,  wa xtaʼakglhuwitkan, akinin chuntiya naskujnaniyaw Jehová.

19. ¿La nastalaniyaw xliʼakxilhtitkan apóstoles?

¹⁹ Nikxni katilimaxanaw pi akinin xtatayananin Jehová kaj xlakata tuku nawankgo o natlawakgo latamanin (Miq. 4:5). Tuku nakinkamakgtayayan xlakata ni nakapekuaniyaw latamanin wa pi nalilakpuwanaw tuku titaxtukgolh apóstoles anta kJerusalén akxni makgnika Jesús. Xlakan xkatsikgo pi judíos tiku xpulalinkgo takanajla lu xkasitsinikgo (Hech. 5:17, 18, 27, 28). Maski chuna, ankgalhin xʼankgo ktemplo chu xwankgo pi kstalaninanin Jesús xlitaxtukgo (Hech. 5:42). Ni mastakgolh talakaskin pi tapekua nakamakgatlaja. Akinin nachuna namakgatlajayaw tapekua komo ankgalhin nawanaw pi xtatayananin Jehová akinin akxni anaw skujaw, kʼescuela o niku wilaw (Hech. 4:29; Rom. 1:16).

20. ¿Tuku xlakata apóstoles xpaxuwakgo maski xkasitsinikan?

²⁰ Apóstoles xpaxuwakgo xlakata liwana xkatsikgo tuku xlakata xkalisitsinikan. Nachuna, xlipaxuwakgo akxni xkatlawanikan tuku nitlan xlakata xtlawakgo xtalakaskin Jehová (Luc. 6:23; Hech. 5:41). Titaxtulh kilhtamaku apóstol Pedro tsokgwililh: «Komo napatinanatit xlakata xaʼakgstitum likatsiyatit, napaxuwayatit» (1 Ped. 2:19-21; 3:14). Akxni liwana katsiyaw pi latamanin kinkasitsiniyan xlakata tlawamaw tuku xatlan, xtasitsikan ni katitlawalh pi nialh naskujnaniyaw Dios.

21, 22. 1) ¿Tuku lakpuwanita natlawaya wix xlakata nakatsiya tuku natlawaya akxni nakinkaputsastalanikanan? 2) ¿Tuku naʼakxilhaw kʼatanu artículo?

²¹ Ni katsiyaw tuku kilhtamaku nakinkaputsastalanikanan o akxni mapakgsinanin nialh katimastakgolh talakaskin nalichuwinanaw xtachuwin Dios. Tuku katsiyaw wa pi la uku kilimatliwakglhatkan la talalinaw Jehová, naliskujaw xlakata ni napekuanaw chu nakatsiniyaw tuku natlawayaw akxni nakinkaputsastalanikanan. Komo la uku natlawayaw uma, nakinkamakgtayayan natayaniyaw kkilhtamaku nema aku mima.

²² Pero, ¿tuku natlawayaw komo mapakgsinanin nialh namastakgo talakaskin nalichuwinanaw Dios? Kʼatanu artículo naʼakxilhaw makgapitsi tastakyaw xalak Biblia nema nakinkamakgtayayan chuntiya naskujnaniyaw Jehová akxni lama nawan taputsastalanit.