1. ¿Andichisï jatsi para listu jarhani engachi no sési kánhaaka?

IMA chúrikua ante de uarhini, Tata Jesukristu uandaspti eskaksï kʼuiripuecha kurhunhiapiringa iámindu imechani engaksï uékapiringa imeri chúxapatiini (Juanu 17:14). Jiáni uératini, imecha engaksï no kómarhijka Jeobani, no sésiksï kaasïndi ambakiti kristianuechani (2 Tim. 3:12). Ka niáraati jurhiatikua engachi sánderu no sési kánhaaka enga sánderu axuterku jauakia para i parhakpini kʼamajkunhani (Mat. 24:9).

2, 3. a) ¿Andisï xáni no sési jaki chéni? b) ¿Ambechi exea ini artikulurhu?

² Parachi listu jarhani jiáni engachi no sési kánhaaka, ¿ambechi jatsiski para úni iásï? Nóchi jatsiska para iámindu ambe eranhaskani ambe engachi xáni uáka nitamakuarhini. Engachi inde ambe eratsipiringa, jamberichi niárapiringa nóteru marhuakunia Jeobani, asta antesi dechi meru tsʼéjkukua ma jatsini, jimbokachi niárapiringa xáni chéni ka uandanhiani (Prov. 12:25; 17:22). “Ikiatspiti enga jindeka Noambakiti”, jánguarhintasïndi parajtsïni chérani, jimboka i ambe kánikua marhuakusïnga (1 Ped. 5:8, 9). Jimajkani, ¿ambechi jatsiski para úni iásï parachi uinhapiti jarhani?

³ Ini artikulu jimbochi exeaka ambechi uá úni parachi sánderu ambakiti pájperakua ma jatsini Tata Diosï jingoni ka andisï xáni jukaparhakue eskachi desde iásï ísï uáka. Ístuchi exeaka ambechi uá úni para sánderu balori jukani ka ambe úni engajtsïni kʼuiripuecha no sési kámaaka jimbokajtsïni kurhunhisïnga.

4. Eska na arhijka Ebreu 13:5, 6, ¿amberichi jatsiski para seguru jarhani ka andisï uétarhijki eskachi ísï uáka?

⁴ Ju je seguru jarhani eskajtsïni Jeoba xénchasïnga ka eskajtsïni no méni jurajkuaka (arhinta je Ebreu 13:5, 6). Iónistia  enga rebista Aianhpiri uandapka: “Ima enga sánderu sési mítiaka Jeobani, ima jindeuati enga sánderu mintsikaaka Tata Diosïni jiáni enga tsʼéjkukua ambe jatsiaka”. Ka i ambe ísïsti. Parachi úni tekaantani engachi no sési kánhaaka, jatsiskachi para xénchani Jeobani ka iámu mintsita jingoni mintsikani, seguru jarhani eskajtsïni ima uékasïnga (Mat. 22:36-38; Sant. 5:11).

5. ¿Ambejtsïni jarhuataa kuenta íntskukuarhini na enga xáni uékpijka Jeoba?

⁵ Ju je pauani pauani arhintani Bibliani parachi sánderu andarhierani Jeobani (Sant. 4:8). Engachi arhintani jauaka, ju je exeni na enga jásï Tata Diosï máeka. Ju je kuenta íntskukuarhini na enga xáni uékpijka imani ambe jimbo enga uandajka ka úni (Éx. 34:6). Máruksï úkua jukanchajti eratsini eska Jeoba uékaasïnga jimboka no nema xarhatakuasïnga uékperakua. Engachi jucha ísï eratsijka, ¿andichisï no karajki pauani pauani na engajtsïni Jeoba xarhatachika pʼamojperakua ka ambakiti ambejtsïni íntskuni? (Sal. 78:38, 39; Rom. 8:32). Jamberichi niáraaka uánikua ambe karani engachi eratsintaska ambe engachi xáni nitamakuarhikia ka ambe engachi arhintaka Bibliarhu. Engachi sánderu jukaparharaska ambe enga Jeoba újka, sánderuchi jatsiaka ambakiti pájperakua ma imani jingoni (Sal. 116:1, 2).

6. Seguni ambe enga Salmo 94:17-19 arhijka, ¿nénajtsïni jarhuatasïni mintsita jingoni kómarhini?

⁶ Ju je méntkisï kómarhini. Ju je eranhaskani sapini ma enga táti jemba uékperakua jingoni kamanharhijka. Sapi xáni seguru pʼikuarherasïndi enga aiangukuarhijka táti jembani ambe enga xáni nitamakuarhika ma jurhiatikua sési ambe ka ístu no sési ambe. Engachi pauani pauani kómarhiska mintsita jingoni juchajtuchi májkueni sési pájperaaka Jeoba jingoni (arhinta je Salmo 94:17-19). Ju je iámindu ambe aianguni na engachi pʼikuarherajka, ísï komueska itsï ambe tsïtani, aianguni juchari Táti uékpitini ambe engachi jimbo chéjka ka uandanhiani (Lam. 2:19). Engachi ísï úska, pʼikuarheraakachi “Diosïri pínandikua enga no nema újka jánhaskani”, ísï eska Biblia na arhijka (Filip. 4:6, 7). Engachi sánderu ísï kómarhiska Jeobani, sánderuchi andarhieraaka (Rom. 8:38, 39).

7. ¿Andisï uétarhijki seguru jarhani eska ambe enga Jeoba aiatspijka imeri Reinueri ambe ísï úkuarhiaka?

⁷ Ju je seguru jarhani eska ambe enga uáka Tata Diosïri Reinu, meru ísï úkuarhiaka (Núm. 23:19). Engachi no xáni seguru jaka eska ísï úkuarhiaka ambe enga Tata Diosï aiatspika, sánderujtsïni fásili chéraati Noambakiti ka iámindu imecha engaksï imani jingonika (Prov. 24:10; Ebr. 2:15). ¿Ambechi uá úni iásï parachi sánderu mintsikani Tata Diosïri Reinuni? Ju je arhutani tiempu para sánderu jorhenguarhini ambe enga Jeoba aiatspika imeri Reinueri ambe ka andisïchi uá seguru jarhani eska ísï úkuarhiaka. Parachi kurhanguni na enga xáni jukaparhakueka i ambe, ju je exeni ambe enga nitamakuarhipka erachi Stanley Jones enga siete uéxurhini japka ónhakata imeri jakajkukua jimbo. *  Erachi uandantasïndi ambe enga jarhuatapka no jurajkuni Jeobani: “Ambe engani xáni mítipka Reinueri, seguru jarhani inderi ambe ka engani no méni eratsipka sini ísïua o nómbe, jarhuatasptirini uinhapiti jarhani. Nójtsïni úspti andani”. Engachi meru seguru jauaka eska ísï úkuarhiaka ambe enga Tata Diosï aiatspijka, sánderuchi andarhieraaka imani ka nóchi chéaka (Prov. 3:25, 26).

8. Uandanta je ambe xarhatasïni na engachi exeajka tánguarhikuechani.

⁸ Ju je no kueratani tánguarhikuecharhu. Tánguarhikuechajtsïni jarhuatasïndi sánderu andarhierani Jeobani. Na engachi exeajka tánguarhikuechani, xarhatasïndi sinchi tekantaa o nómbe jiáni engachi no sési kánhaaka (Ebr. 10:24, 25). Ju je exeni andi. Engachi iásï jurajkujka eskajtsïni sapichitu ambe ójkutaaka parachi no nirani tánguarhikua ma jimbo, ¿ambe úkuarhia jiáni enga kánikua úkua jukaaka parachi erachicha jingoni tánguarhini? Peru engachi eratsitini jaka no kueratani tánguarhikuecharhu, imecha engajtsïni no sési kámajka, nóksï uáti úni eskachi no tánguarhiaka. Ísï jimbo, iásïsti engachi jatsika para tsitini tánguarhini. Engachi ísï úska, sánderuchi kurhajchaaka Tata Diosïni ka eska kʼuiripuechani nájkirukajtsïni no sési kámaaka ka ístu engajtsïni juramuticha nóteru jurajkuakia tánguarhini (Uku. 5:29).

9. ¿Andisï xáni sési jaki jorhenguarhiani karakatechani para listu jarhani engachi niáraaka no sési kánhani?

⁹ Ju je memoria jimbo jorhenguarhiani Bibliaeri karakatechani engachi sánderu tsitiajka (Mat. 13:52). Jamberichi no újka méntku iámindu ambe miáni jarhani, peru Jeoba uáti úrani imeri espirituni enga xáni uinhapitiika parajtsïni jarhuatani miáuantani (Juanu 14:26). Erachi ma enga no nema jingoni uénga uandontskuarhini, jimboka kárselirhu jarhaspka jini Alemania orientali, uandaspti: “Kánikuarini marhuachispti jorhenguarhiani jukari dosientu karakatechani jimbokani úspka eratsintani jarhani Bibliaeri ambe imani jurhiatikuecha jimbo engani no ma ambe uénga úni”. Ima karakatechaksï jarhuataspti no mirikurhini Jeobani ni jurajkuni.

10. ¿Andichisï jatsi para jorhenguarhiani pirekuechani para kʼéri ambe arhini Jeobani?

¹⁰ Ju je memoria jimbo jorhenguarhiani ka pireani pirekuechani para kʼéri ambe arhini Jeobani. Engaksï Pablu ka Silasi Filipusi ónhakata japka, pirekusptiksï Jeobani pirekuechani engaksï jorhenguarhiapka (Uku. 16:25). Jima anapu erachicha enga antesi jindepka Unión Soviética, sáno májkueni jásï ambeksï úspti para uinhaperantani imecheri jakajkukuani engaksï Siberia pánhapka. Pirenchi Mariya Fedun miántaspti: “Uénaspkachi pireani iámindu pirekuechani engachi xáni miáuani japka”. Uandaspti  eskaksï ima pirekuecha iáminduechani uinhaperantaaspka ka jarhuataani sánderu andarhierani Jeobani. ¿Uinhaperantasïndijtsïni pireani pirekuechani engaksï libru pirekuecheri jimbo jaka engachi sánderu tsitiajka ka ístu imechani engaksï pájina Internetirirhu jaka? Jiájkani, ju je memoria jimbo jorhenguarhiani (exe je rekuadruni “ Jeoba, íntskurini balori”).

11, 12. a) Eska na uandajka 1 Samuel 17:37, 45-47, ¿andisï Dabidi xáni balori jukapi? b) ¿Ambechi ambakiti ambe jorhenguarhisïni Dabidiri ejemplueri?

¹¹ Parachi úni orhepani uérani, jatsiskachi para balori jukani. ¿Ambechi uá úni engachi exejka eskachi no xáni balori jukaska? Ju je miáni eska para balori jukani no imani jimboesïnga na engachi xáni iójtarhaka, uinhapini o ambe engachi újka úni. Ju je exeni Dabidiri ambe. Enga ima tumbi máepka Goliati jingoni uarhiperaspti enga kánikua iójtarhapka. Dabidi no xáni iójtarhaspti ka uinhapini eska ima filisteu. Ístu, no ma ambe kámaxapti para uarhipeni ni espada ma. Peru kánikua balori jukaspti ka niraspti uarhipeni imani xáni iójtarha jingoni enga xáni kʼéramakuarhienga.

¹² ¿Andisï Dabidi xáni balori jukapi? Jimboka meru seguru jarhaspka eska Jeoba jarhuatapiringa (arhinta je 1 Samuel 17:37, 45-47). Dabidi no exespti na enga xáni kʼéripka Goliati imani jingoni, sino na enga xáni kʼéripka Jeoba Goliati jingoni. Ma ambechi jorhenguarhisïnga iri ambe: nóchi chéaka engachi mintsikaska eskajtsïni Jeoba jarhuatasïnga ka engachi seguru jarhaska eska imecha engajtsïni ikiachijka, méntku no ma ambeska juchari Tata Diosï jingoni enga iámindu ambe újka úni (2 Crón. 20:15; Sal. 16:8). ¿Ambechi uá úni iásï parachi sánderu balori jukani ante dechi uénani sánderu no sési kánhani?

13. Uanda je ambechi jatsiski para úni para sánderu balori jukani.

¹³ Nirani uandantani ambakiti ambe Tata Diosïri Reinueri, jarhuataatijtsïni sánderu balori jukani. ¿Andi? Jimboka nirani aianhpini, uáka eskachi mintsikaaka Jeobani ka no chérhini kʼuiripuni (Prov. 29:25). Májkueni eska juchari kuerpu na uinhapiti jarhajka engachi ejersisiu újka, sánderuchi balori jatsisïnga engachi kʼumanchikuecharhu aianhpijka, xanharu jimbo, nani uéjkisï ka jimesïsï enga ataranhantajka ambe ma. Engachi balori jingoni aianhpiska iásï, listuchi jauaka para seguirini jarhani ísï úni, nájkirukachi nóteru jurajkunhaakia úni juchari ánchikuarhitani (1 Tes. 2:1, 2).

14, 15. ¿Ambechi jorhenguarhisïni arini pirenchicheri ambe, Nancy Yuen ka Valentina Garnovskaya?

¹⁴ Uánikua ambechi jorhenguarhisïnga tsimani  ambakiti pirenchicheri engaksï kánikua balori xarhatapka. Ma jindesti Nancy Yuen. Ima ma metru ka terujkaniskusï (5 pies) iójtarhapti, peru no fásili chésïrendi. * Jimboka no uékaspka jurajkuni aianhpini Reinueri ambe, beinte uéxurhinisï ónhakata jarhaspti jini China. Gobiernueri ánchikuarhiricha engaksï kurhamarhikuechani úkuapka, uandasptiksï eska paisirhu no nema jarhaspka enga sánderu inchandimienga eska pirenchi.

¹⁵ Máteru pirenchi jindesti Valentina Garnovskaya. Tanimu xanhari ónhanhaspti jini enga antesi jindepka Unión Soviética, bientiunu uéxurhini jarhaspti káselirhu. * Meru eratsitixapti no jurajkuni aianhpini engaksï jamberi juramuticha uandapka eska “meru kʼéri no sési úri máespka”. ¿Andiksïsï xáni balori jukapi i ambakiti pirenchicha? Jimbokaksï seguru jarhaspka eska Jeoba jarhuataaxapka.

16. ¿Ambe uétarhisïni para meru balori jukani?

¹⁶ Eskachi na exekia, parachi balori jatsini no uétarhisïndi exeni na engachi xáni uinhapika o ambe engachi újka úni. Ambe engachi jatsika para úni, jindesti mintsikani eskajtsïni Jeoba jarhuatasïnga ka eska uarhipesïnga juchantsïni jimbo (Deut. 1:29, 30; Zac. 4:6). Inde ambesï uétarhijti parachi balori jukani.

17, 18. Eska na arhijka Juanu 15:18-21, ¿ambe uandaspi Jesusi eskachi nitamakuarhipiringa ka andi?

¹⁷ Sésichi pʼikuarherasïnga engachi janhanharhinhajka, peru nóchi jatsiska para eratsini eskachi no ma ambe jukaparhaska engachi no mítikateuaka. Jesusi uandaspti: “Tsípiakajtsï cha engaksïni kʼuiripuecha no xénchaaka ka késtatanksïni Uájpa Acheetirini jimbo, ka nóksïni sési arhini ka nójtuksï kurhandinchani chári nombrini komusieka no sési jásï ambepiringa” (Luk. 6:22). ¿Ambeksï arhikuekasïni i uandakuecha?

¹⁸ Jesusi no arhikuekaxapti eskachi imeri chúxapaticha tsitisïnga no sési kánhani, sino imani ambesï uandendi enga ísïpka. Kʼuiripujtsïni kurhunhisïndi jimbokachi no úsïnga imani ambe engaksï parhakpini anapuecha  újka, imani ambechi úsïnga enga Jesusi jorhentpika ka nirasïngachi aianhpini ambe enga ima uandantapka (arhinta je Juanu 15:18-21). Uékasïngachi Jeobani sési pʼikuastani. Engajtsïni kʼuiripu ikiachijka jimbokachi xénchasïnga juchari Tátini, imecheri problemesti.

19. ¿Nénachi uá májkueni úni eskaksï apostulicha?

¹⁹ Ju je no méni kʼuratseni engachi Jeobaeri testigueka ambe uéjki uandani o úni kʼuiripu (Miq. 4:5). Ambe engajtsïni jarhuataaka no chérhini kʼuiripuni, jindesti jorhenguarhini ambe engaksï xarhatapka apostulicha jini Jerusaleni ísï no ióni jimbo enga kʼuiripu na uandikupkia Jesusi. Mítisptiksï na engaksï relijioniri orhejtsïkuticha xáni kurhunhiauenga (Uku. 5:17, 18, 27, 28). Peruksï pauani pauani nirasïrendi templurhu ka arhiasïrendiksï kʼuiripuechani eskaksï Jesusiri chúxapatispka (Uku. 5:42). Nóksï pʼíngukuarhispti chétapu jimbo. Juchajtuchi no chéaka engachi méntkisï uandantaska eskachi Jeobaeri testigueska, ia sea ánchikuarhitarhu, eskuela o nani engachi irekani jaka (Uku. 4:29; Rom. 1:16).

20. ¿Andiksïsï apostulicha tsípieni nájkirukaksï máteruecha kurhunhiauenga?

²⁰ Apostulichaksï tsípixapti jimbokaksï mítispka andiksïsï kʼuiripuecha kurhunhiaueni. Ístu, kʼéri kóntperata máespti para imecha engaksï ísï no sési kánhenga jimbokaksï úsïrenga ambe enga Jeoba uéjka (Luk. 6:23; Uku. 5:41). Ísï tátsekua, apostuli Pedru karaspti: “Engajtsï no sési úminhaaka chári sési jángua jimbo, tsípiakajtsï” (1 Ped. 2:19-21; 3:14). Engachi sési mítetini jaka eskajtsïni kʼuiripu ikiachisïnga jimbokachi imani ambe úsïnga enga sési jaka, inde ambe no úsïndi úni eskachi nóteru marhuakuakia Jeobani.

21, 22. a) ¿Cha ambe eratsiskia úni parajtsï listu jarhani jiáni engachi no sési kánhaaka? b) ¿Ambechi exea máteru artikulurhu?

²¹ Nóchi mítiska na jatinchi no sési kánhaa o juramutichaksï káni uandaa eskachi nóteru uákia juchari ánchikuarhitani. Ambe engachi kʼóru míteka, jindesti eskachi uáka iásï uénani prepararikuarhini engachi jánguarhintaska sánderu ambakiti pájperakua ma jatsini Jeoba jingoni, jánguarhintaska sánderu balori jukani ka míteni ambe úni engachi no sési kánhaaka. Prepararikuarhini iásï, jarhuatatijtsïni parachi no chéni sánderu orhepani.

²² Peru ¿ambechi uá engaksï ma jurhiani juramuticha uandaaka eskachi nóteru uákia úni juchari ánchikuarhitani? Máteru artikulu jimbochi exeauaka máru karakatechani engajtsïni jarhuataaka seguirini marhuakuni Jeobani nájkirukachi nóteru jatsiakia sésikua para ísï úni.