1. Kaia e manakogina i ei ke fakatoka tatou mō fakasauaga?

I TE po mai mua o mate a te ‵tou Aliki ko Iesu, ne fai atu a ia me i a latou katoa kolā e filifili ke fai mo ana soko ka takalia‵lia ki ei te lalolagi. (Ioa. 17:14) Ke oko mai foki ki te taimi nei, ko oti ne fakasauagina a Molimau a Ieova fakamaoni ne tino kolā e ‵teke ki te tapuakiga tonu. (2 Timo. 3:12) Ona ko te pili mai o te gataga o te olaga tenei, e fakamoe‵moe tatou me ka ‵teke malosi mai a ‵tou fili ki a tatou.—Mata. 24:9.

2-3. (a) Se a te mea e ‵tau o iloa ne tatou e uiga ki te mataku? (e) Ne a mea ka sau‵tala tatou ki ei i te mataupu tenei?

² E mafai pefea o fakatoka nei tatou ke fakafesagai atu ki fakasauaga? E se ‵tau o fakaataata ne tatou a mea katoa e mafai o ‵tupu ki a tatou. Kafai e fai tatou penā, e mafai eiloa o fakafesagai atu tatou ki te mataku mo te manavase. E mafai o talia ne tatou a fakamatakutakuga kolā e fakaataata ne tatou ke fai ei ke takavale tatou a koi tuai o oko mai so se tofotofoga tonu. (Faata. 12:25; 17:22) A te mataku se meatau malosi telā e taumafai te ‵tou “fili ko te Tiapolo,” o fakaaoga ke taua mai ki a tatou. (1 Pe. 5:8, 9) Ne a mea e mafai nei ne tatou o fai ke fakamalosi aka ei tatou?

³ I te mataupu tenei, ka sau‵tala tatou ki te auala e mafai o fakamalosi aka ei ‵tou fesokotakiga mo Ieova mo te pogai e tāua ei ke na fai nei ne tatou. Ka sau‵tala foki tatou ki mea e mafai ne tatou o fai ke ati aka ei ‵tou loto ma‵losi. Kae ko te ‵toe mea, ka suke‵suke tatou ki te auala e mafai ei o kufaki tatou i takalia‵liaga mai ‵tou fili.

4. E ‵tusa mo pati i te Epelu 13:5, 6, se a te mea e ‵tau o tali‵tonu tatou ki ei, kae kaia?

⁴ Ke loto talitonu me i a Ieova e alofa ki a koe kae ka se tuku tiaki ne ia koe. (Faitau te Epelu 13:5, 6.) I se fia tausaga ko  ‵teka, ne fai mai The Watchtower, penei: “A te tino telā e iloa ‵lei ne ia te Atua ka talitonu malosi ki a ia i taimi o tofotofoga.” Ko oko loa te ‵tonu o pati konā! Ke fakafesagai atu ki fakasauaga mo te manuia, e ‵tau mo tatou o a‵lofa ki a Ieova kae tali‵tonu katoatoa ki a ia, kae ke mo a ma fakalotolotolua me ka atafai mai eiloa a ia ki a tatou.—Mata. 22:36-38; Iako. 5:11.

5. Se a te mea ka fesoasoani atu ke lagona ne koe te alofa o Ieova?

⁵ Faitau te Tusi Tapu i aso katoa mo te fakamoemoega ke fakapilipili atu ki a Ieova. (Iako. 4:8) I te taimi e faitau ei, saga tonu atu ki uiga ‵gali o Ieova. Ke lagona ne koe tena alofa mo tena atafai i ana pati mo ana faifaiga. (Eso. 34:6) E faigata ki nisi tino ke tali‵tonu me i te Atua e alofa ki a latou me ne seki alofagina aka eiloa latou ne tino. Kafai e penei ou lagonaga, taumafai o fakamau ki lalo i aso takitasi a auala kolā ne fakaasi mai ne Ieova a te alofa fakamagalo mo te atafai ki a koe. (Sala. 78:38, 39; Loma 8:32) I te taimi e mafaufau koe ki mea e ‵tupu ki a koe kae mafaufau ‵loto ki mea e faitau ne koe i te Muna a te Atua, ka mafai eiloa o fakamau ne koe ki lalo a mea e uke ne fai ne Ieova mō koe. Ko te lasi o tou loto fakafetai ki mea e fai ne Ieova, ko te malosi foki o tou fesokotakiga mo ia.—Sala. 116:1, 2. 

6. E ‵tusa mo pati i te Salamo 94:17-19, e mafai pefea o fesoasoani ki a koe a te ‵talo atu mo te loto kātoa?

⁶ ‵Talo faeloa. Fakaataata aka se tamaliki tagata foliki e ‵sai ne tena tamana mo te alofa. E fiafia eiloa te tamaliki tagata kae sē mataku ma faipati atu ki tena tamana e uiga ki mea ‵lei mo mea ma‵sei kolā ne ‵tupu ki a ia i te aso tenā. E mafai foki o maua ne koe te vaegā fesokotakiga tenā māfai e fakapilipili atu koe ki a Ieova e auala i se ‵talo e fai mo te loto kātoa i aso takitasi. (Faitau te Salamo 94:17-19.) Kafai e ‵talo atu koe ki a Ieova, “‵ligi atu ki tua a mea i tou loto e pelā me ne vai” kae fai atu ki tou Tamana alofa a ou manavasega mo mea e mataku i ei koe. (Tagi. 2:19) Se a te mea ka iku mai i ei? Ka maua ne koe a te mea telā e taku mai i te Tusi Tapu ko te “filemu o te Atua telā e sili fakafia atu i mea katoa kolā e malamalama i ei a tino.” (Fili. 4:6, 7) Ko te uke o taimi e ‵talo ei koe, ko te pili o koe ki a Ieova.—Loma 8:38, 39.

7. Kaia e ‵tau ei o tali‵tonu tatou me ka fakataunu eiloa a folafolaga a te Atua e uiga ki tena Malo?

⁷ Ke loto talitonu me ka fakataunu eiloa a fakamanuiaga o te Malo o te Atua. (Nume. 23:19) Kafai e vāivāi tou fakatuanaki i vaegā folafolaga penā, ka faigofie eiloa ki a Satani mo tino mai lalo i tena pulega o fakamatakutaku koe. (Faata. 24:10; Epe. 2:15) E mafai pefea ne koe o ati aka te loto talitonu ki te Malo o te Atua i te taimi nei? Ke fai au sukesukega ki folafolaga a te Atua e uiga ki tena Malo mo pogai e mafai ei o talitonu koe me ka fakataunu eiloa. Ka fesoasoani mai pefea te mea tenā? Mafaufau ki te fakaakoakoga o Stanley Jones, telā ne falepuipui mō se fitu tausaga ona ko tena fakatuanaki. * Se a te mea ne fesoasoani atu ki a ia ke kufaki mo te fakamaoni? Ne fai mai a ia: “Ne malosi toku  fakatuanaki me ne iloa ‵lei ne au te Malo o te Atua mo mea ka fakataunu ne ia, kae ne seki fakalotolotolua au i ei. Tela la, seai se tino ne mafai o fai ne ia ke tiakina ne au a Ieova.” Kafai e malosi tou fakatuanaki e uiga ki folafolaga a te Atua, ka pili malosi atu koe ki a Ieova kae ka sē mafai eiloa koe o mataku.—Faata. 3:25, 26.

8. Se a te fakaasiga ‵lei e uiga ki a tatou mai te ‵tou kilokiloga ki fakatasiga? Fakamatala mai.

⁸ ‵Kau faeloa ki fakatasiga Kelisiano. A fakatasiga e fesoasoani mai ke fakapili‵pili atu tatou ki a Ieova. A ‵tou kilokiloga e uiga ki te ‵kau ki fakatasiga se fakaasiga ‵lei me ka manuia eiloa tatou i te fakafesagai atu ki fakasauaga i aso mai mua. (Epe. 10:24, 25) Kaia? Kafai e talia ne tatou a tamā fakalavelave ke taofi ei tatou mai te ‵kau atu ki fakatasiga i te taimi nei, se a te mea ka tupu i aso mai mua māfai ko kamata o fakamataku ke ‵kau fakatasi tatou mo taina tali‵tonu? I te suā feitu, kafai e fai ne tatou se fakaikuga mautinoa ke ‵kau faeloa ki fakatasiga, ka se ma‵taku tatou māfai ko taumafai a tino ‵teke o taofi tatou mai te ‵kau fakatasi. Tenei te taimi ke na fakamalosi aka ne tatou te fia‵fia ki ‵tou fakatasiga. Kafai e fia‵fia tatou o ‵kau ki fakatasiga, ka se mafai ne ‵tekemaiga, ke oko foki ki fakataputapuga mai te malo o taofi tatou mai te faka‵logo ki a Ieova i lō tāgata.—Galu. 5:29.

9. Kaia e fai ei a te tauloto o tusi fai‵tau e pelā me se auala ‵lei ke fakatoka mō fakasauaga?

⁹ Ke tauloto a tusi fai‵tau e ‵gali ki a koe. (Mata. 13:52) E mafai o se ‵lei katoatoa tou mafaufau, kae e mafai o fakaaoga ne Ieova tena agaga tapu malosi ke fesoasoani atu ke masaua ne koe a tusi fai‵tau konā. (Ioa. 14:26) Mafaufau ki pati a se taina telā ne falepuipui i Siamani ki saegala: “Se fakamanuiaga eiloa me talu mai te taimi tenei ne tauloto ne au se selau tusi fai‵tau! Ne mafai o faka‵fonu ne au toku mafaufau i aso konā ki mataupu faka-te-Tusi Tapu e uke.” Ne fesoasoani atu a tusi fai‵tau konā ke fakapilipili atu a te ‵tou taina ki a Ieova—kae ke kufaki mo te fakamaoni.

10. Kaia e ‵tau ei o tauloto ne tatou a pese?

¹⁰ Ke tauloto kae usu a pese kolā e tavae ei Ieova. I te taimi ne falepuipui ei i Filipi, ne usu ne Paulo mo Sila a pese faka-te-agaga kolā ne masaua ne lāua. (Galu. 16:25) I se auala tai ‵pau, i te taimi ne ave fakapagota ei ‵tou taina i Lusia ki Siberia, i te auala fea ne maua ei ne latou a fakamalosiga? Ne fai mai te tuagane ko Mariya Fedun, penei: “Ne usu ne matou a pese katoa ne iloa ne matou, mai te tusi pese.” Ne fai mai tou fafine me i pese konā ne fakamalosi ki a latou katoa kae ne fesoasoani atu ke ‵pili malosi latou ki a Ieova. E mata, e maua ne koe te malosi māfai e usu ne  koe a pese faka-te-agaga kolā e ‵gali ki a koe? Ke na tauloto ki pese konā i te taimi nei!—Ke onoono ki te pokisi “ Tuku Mai te Loto Malosi.”

11-12. (a) E ‵tusa mo pati i te 1 Samuelu 17:37, 45-47, kaia ne loto malosi ei a Tavita? (e) Se a te akoakoga tāua e tauloto ne tatou mai te fakaakoakoga a Tavita?

¹¹ Ke fakafesagai atu ki fakasauaga, e manakogina te loto malosi. Kafai e mafaufau koe me e vāivāi tou loto malosi, se a te mea e mafai ne koe o fai? Masaua me i te loto malosi tonu e se faka‵na ki te lasi, malosi, mo te atamai. Mafaufau ki te tamataene ko Tavita i te taimi ne fakafesagai atu ki a Koliata. Kafai e fakatusa ne koe mo te mafi tenā, a Tavita e foliki ‵ki, vāivāi kae se toka ‵lei ke taua atu. Ne seki ai foki se pelu a Tavita. Ka ne loto malosi a ia. Ne tele atu a Tavita mo te loto toa o taua atu ki te mafi fakamataku tenā.

¹² Kaia ne loto malosi ei a Tavita? Ne talitonu katoatoa a ia me i a Ieova ne fakatasi atu ki a ia. (Faitau te 1 Samuelu 17:37, 45-47.) Ne seki saga atu a Tavita ki te lasi o Koliata māfai e fakatusa ki a ia. I lō te fai penā, ne saga tonu atu a ia ki te foliki o Koliata māfai e faka‵pau ki a Ieova. Se a te mea e tauloto ne tatou mai te tala tenei? Ka loto ma‵losi eiloa tatou māfai e loto tali‵tonu me i a Ieova e fakatasi mai ki a tatou kae māfai foki e mautinoa i a tatou me i ‵tou fili e fo‵liki māfai e faka‵pau ki te Atua Malosi Katoatoa. (2 Nofo. 20:15; Sala. 16:8) E mafai pefea o ati aka ne tatou a te loto malosi i te taimi nei—a koi tuai o oko mai a fakasauaga?

13. E mafai pefea o ati aka ne tatou a te loto malosi? Fakamatala mai.

¹³ E mafai o ati aka ne tatou a te loto malosi i te taimi nei mai te talai atu ki tino katoa a te tala ‵lei e uiga ki te Malo o te Atua. Kaia? Me i te galuega talai e akoako ei tatou ke tali‵tonu ki a Ieova kae ke manumalo i te mataku ki tāgata. (Faata. 29:25) E pelā eiloa māfai ko gasolo o malosi ‵tou taganoa māfai ko fakamalosi‵losi ‵tou foitino, ka fakamalosigina ‵tou loto malosi māfai ko talai atu mai fale ki fale, i koga e tokouke i ei a tino, i taimi seki fuafuagina, mo koga ga‵lue. Kafai e ati aka ne tatou a te loto malosi ke talai atu i te taimi nei, ka toka ‵lei eiloa tatou ke tumau i te talai atu faitalia foki loa e fakataputapu a ‵tou galuega.—1 Tesa. 2:1, 2.

14-15. Ne a akoakoga e mafai o tauloto ne tatou mai i a Nancy Yuen mo Valentina Garnovskaya?

¹⁴ E mafai o tauloto ne tatou a mea e uke mai te fakaakoakoga o tuagane fakamaoni e tokolua kolā ne fakaasi mai ne lāua te loto malosi. A Nancy Yuen telā e nofo tena maluga ki se lima futu (1.5 m) te loa, kae faigata o  mataku. * Ne ita ma fakagata te talai atu o te tala ‵lei o te Malo o te Atua. Tela la, ne ‵pei a ia ki te falepuipui mō se 20 tausaga i Saina Kominisi. Ne fai atu a ofisa kolā ne sukesuke ne latou a ia me i a ia ko “te ‵toe tino faitonu eiloa” i te lotou fenua!

¹⁵ I se auala tai ‵pau, a Valentina Garnovskaya ne ‵pei ki te falepuipui i Lusia i taimi kese‵kese e tolu mō se aofaki o tausaga e nofo ki te 21. * Kaia? Ne fakaiku aka eiloa ne ia ke tumau i te talai atu, tela la, ne taku ne ofisa ga‵lue a ia e pelā me “se tino ofa tulafono fakamataku.” Se a te mea ne fakamalosi atu ki fāfine fakamaoni konei e tokolua ke loto ma‵losi? Ne loto tali‵tonu lāua me ne fakatasi atu a Ieova ki a lāua.

16. Se a te kī ki te loto malosi tonu?

¹⁶ E pelā mo te mea ne sau‵tala tatou ki ei, ke ati aka te loto malosi, e se ‵tau o ‵saga atu tatou ki ‵tou malosi mo ‵tou ata‵mai. I lō te fai penā, e ‵tau o tali‵tonu tatou me e fakatasi mai a Ieova kae ko ia e taua mō tatou. (Teu. 1:29, 30; Saka. 4:6) Tenā te kī ki te loto malosi tonu.

17-18. E pelā mo te mea ne fakamau i te Ioane 15:18-21, se a te faka‵pulaga ne tuku mai ne Iesu ki a tatou? Fakamatala mai.

¹⁷ E fia‵fia tatou māfai e āva mai a tino, kae e se ‵tau o mafau‵fau tatou me i a tatou ko sē aoga māfai e se fia‵fia mai a tino ki a tatou. Ne fai mai a Iesu: “E fia‵fia koutou māfai e takalia‵lia a tino ki a koutou, kae ‵tuli ne latou a koutou, e fakatauemu atu ki a koutou kae taku fakamasei otou igoa ona ko te Tama a te tagata.” (Luka 6:22) Se a te mea ne fakauiga ki ei a Iesu?

¹⁸ Ne seki fai mai a Iesu me ka fia‵fia a Kelisiano māfai ko fakatakalialiagina latou. I lō te fai penā, ne tuku mai ne ia se fakailoaga ke fakaeteete. A tatou e se ne vaega o te lalolagi. E ola tatou e ‵tusa mo akoakoga a Iesu kae talai te fekau telā ne talai ne ia. Ona ko te mea tenā, ko takalia‵lia mai te lalolagi ki a tatou. (Faitau te Ioane 15:18-21.) E ma‵nako tatou o fakafiafia a Ieova. Kafai a tāgata e takalia‵lia  mai ona ko tatou e a‵lofa ki te ‵tou Tamana, i o latou loa te fakalavelave.

19. E mafai pefea o tau‵tali tatou i te fakaakoakoga a te kau apositolo?

¹⁹ Ke mo a ma talia so se mea sē aoga kolā e fai‵pati io me fai ne tino ke fai ei ke ‵mā tatou mā fai pelā me se tokotasi o Molimau a Ieova. (Mika 4:5) E mafai o tauloto tatou ke kufaki i te ma‵taku ki tāgata mai te mafaufau ‵loto ki te fakaakoakoga ne tuku mai ne apositolo i Ielusalema mai tua o te tamatega a Iesu. Ne iloa ne latou a te lasi o te takalia‵lia o takitaki lotu Iutaia ki a latou. (Galu. 5:17, 18, 27, 28) Kae i aso katoa ne tumau eiloa latou i te olo atu ki te faletapu mo koga e tokouke i ei a tino kae fakaasi atu i a latou ko soko o Iesu. (Galu. 5:42) Ne seki talia ke taofi aka latou ne te mataku. E mafai foki ne tatou o fakatakavale a te mataku ki tāgata mai te fakaasi atu faeloa ne tatou ki tino me i a tatou ne Molimau a Ieova—i koga ga‵lue, i te akoga, mo ‵tou tuakoi.—Galu. 4:29; Loma 1:16.

20. Kaia ne fia‵fia ei a te kau apositolo faitalia me ne takalia‵lia a tino ki a latou?

²⁰ Kaia ne fia‵fia ei a te kau apositolo? Ne iloa ne latou te pogai ne takalia‵lia ei a tino ki a latou, kae ne ‵kilo atu latou ki ei e pelā me se tauliaga ke fai fakamasei latou ona ko te faiga o te loto o Ieova. (Luka 6:23; Galu. 5:41) Ne tusi mai fakamuli te apositolo ko Petelu: “Kafai foki loa e ‵tau o logo‵mae koutou ona ko te amiotonu, e fia‵fia koutou.” (1 Pe. 2:19-21; 3:14) Kafai e malamalama tatou me takalia‵lia mai a tino ona ko te faiga ne tatou te mea tonu, ka se talia lele ne tatou a te takalialia mai o tino ke fai ei ke ma‵taku tatou.

21-22. (a) Se a te mea ne fakaiku aka ne koe ke fai ke fakatoka ei koe mō fakasauaga? (e) Ne a mea ka sau‵tala tatou ki ei i te suā mataupu?

²¹ E se iloa ne tatou te taimi ka pokotia ei tatou i fakasauaga io me fakataputapu a te ‵tou tapuakiga ki a Ieova. E ui i ei, e iloa ne tatou me e mafai o fakatoka nei tatou mai te fakamalosi ‵tou fesokotakiga mo Ieova, mai te atiakaga o te loto malosi, mo te tauloto ke kufaki i tino kolā e takalia‵lia mai. A fakatokaga kolā e fai nei ne tatou ka fesoasoani mai ke ‵tu ‵mautakitaki tatou i aso mai mua.

²² Kae e a māfai ko fakataputapu a te ‵tou tapuakiga? I te suā mataupu, ka sau‵tala eiloa tatou ki fakatakitakiga mai te Tusi Tapu kolā ka fesoasoani mai ke tumau tatou i te tavini atu ki a Ieova faitalia a fakataputapuga.