1. Малы ми уйылон-уллянъёслы дасяськыны кулэ?

 КУЛОН азяз уе Иисус Христос вераз, ваньзэс, кинъёс мылкыд каро солэн дышетскисез луыны, адӟемпотостэм карозы шуыса (Иоанн 17:14). Асьме нуналъёс дырозь зэмлыклэн тушмонъёсыз оскымон христианъёсты уйыло-улляло (2 Тим. 3:12). Шайтан дуннелэн пумыз матэктэмъя, тушмонъёсмы эшшо но зол пумитъяськозы (Матф. 24:9).

2, 3. а) Мае ми тодӥськомы кышкан сярысь? б) Мае ми эскеромы та статьяын?

² Кызьы уйылон-уллянъёслы дасяськоно? Син азямы пуктоно ӧвӧл ваньзэ, мар милемын луыны быгатоз, малы ке шуоно кышкан но сюлмаськонъёс милемыз китэм-пыдтэм карозы. Кышкытлыкъёс, кудъёссэ ми син азямы пуктӥмы, милемыз лябӟытыны быгато, зэмос шуг-секытъёс кутскытозь (Мад. 12:25; 17:22). Кышкан — со кужмо тӥрлык, кудзэ Шайтан милемлы пумит кутэ (1 Пётр 5:8, 9). Кызьы ми вуоно уйылон-уллянъёслы дасяськыны кулэ?

³ Та статьяын ми эскеромы, кызьы Иеговаен кусыпъёсмес юнматоно но малы сое али ик ини лэсьтоно. Озьы ик ми тодомы, мар юрттоз милемлы эшшо но кышкасьтэм луыны. Со сяна, ми эскеромы, мар ми карыны быгатӥськомы, куке адямиос милемыз адӟемпотостэм каро.

4. Мае ми тодӥськомы, Еврейёслы 13:5, 6 лыдӟыса, но малы ми солы оскыны кулэ?

⁴ Оске: Иегова тӥледыз яратэ но ноку уз кельты. (Лыдӟе Еврейёслы 13:5, 6.) Трос аръёс талэсь азьло «Возьмаськон башняын» гожтэмын вал: «Со, кин Инмарез умой тодэ, бадӟым шуг-секытъёс дыръя Инмар вылэ быдэсак оскиськоз». Макем шонересь та кылъёс! Уйылон-уллянъёсты чидан понна, милемлы Иеговаез яратоно но быдэсак со вылэ оскиськоно,  озьы ик вунэтоно ӧвӧл, со милемыз яратэ шуыса (Матф. 22:36—38; Иак. 5:11).

5. Мар юрттоз милемлы Иеговалэсь яратэмзэ ас выламы шӧдыны?

⁵ Котькуд нунал Библиез лыдӟе но тодады возе: тӥляд ужпумды — Иеговалы матэ кариськыны (Иак. 4:8). Лыдӟиськыкуды висъялэ саклыктэс Иеговалэн сямъёсызлы: макем со яратӥсь, гажась-жалясь но ӟечлыко. Куке тӥ Библиысь лыдӟиськоды Инмарлэн верамъёсыз но ужъёсыз сярысь, тырше шӧдыны, кызьы со тӥледыз яратэ но тӥ сярысь сюлмаське (Пот. 34:6). Куд-огъёсызлы секыт оскыны, Инмар соосты яратэ шуыса, малы ке шуоно соосты ноку нокин ӧз яраты. Тӥ сярысь но озьы вераны луэ ке, тырше котькуд нунал гожъяны сое, кызьы Инмар тӥледлы гажан-жалянзэ но ӟечлыксэ возьматӥз (Пс. 77:38, 39; Рим. 8:32). Куке тӥ ӵошатоды асьтэлэсь улондэс но Библиысь лыдӟемдэс, тӥ адӟоды, дыр, макем трос ӟеч ужъёс Иегова тӥ понна лэсьтӥз. Но макем золгес тӥ соосты дунъялоды, сокем юнгес луоз Инмарен эшъяськонды (Пс. 114:1, 2).

6. Малы милемлы туж кулэ сюлмысь вӧсяськыны, Псалтирез 93:17—19 лыдэ басьтыса?

⁶ Ялан вӧсяське. Пуктэ син азяды пичи пиез, кудзэ атаез ӟыгыртэ. Со номырлэсь уг кышка но шумпотыса вера атаезлы ваньзэ, мар соин нунал куспын луиз,— умойзэ но, уродзэ но. Тӥляд но Иеговаен сыӵе ик матысь кусыпъёсты луозы, тӥ котькуд нунал солы сюлмысь вӧсяськиды ке. (Лыдӟе Псалтирез 93:17—19.) Вӧсяськыкуды, вуэз кадь, сюлэмдэс кисьтэ но яратӥсь инмысь Атаймылы котькыӵе кышканъёсты но сюлмаськонъёсты сярысь вералэ (Бӧрд. 2:19). Соку сюлмады тӥ шӧдоды сое, мар Библиын нимаське «Инмарлэн каньыллыкез» шуыса, кудӥз «котькыӵе визьлэсь но вылӥын» (Флп. 4:6, 7). Макем ӵем тӥ Иеговалы сюлэмдэс усьтоды, сокем юнгес тӥляд соин кусыпъёсты луозы (Рим. 8:38, 39).

7. Малы милемлы юн осконо, Эксэйлыкен герӟаськем кыл сётонъёссэ Инмар быдэстоз шуыса?

⁷ Оске, Инмарлэн Эксэйлыкез бакель каронъёс зэм но ваёз шуыса (Лыд. 23:19). Тӥ уд ке оскиське, Инмарлэн кыл сётонъёсыз быдэсмозы шуыса, соку Шайтанлы но солэн ки улаз возиськисьёслы тӥледыз кышкатыны капчигес луоз (Мад. 24:10; Евр. 2:15). Кызьы юнматоно осконэз, та кыл сётонъёс быдэсмозы шуыса? Ас поннады Библиез дышетыкуды, эскере Инмарлэсь кыл сётонъёссэ, кудъёсыз Эксэйлыкен герӟаськемын, но шедьтэ малпанъёсты, кудъёсыз возьмато, малы соослы оскыны луэ. Кызьы со тӥледлы юрттоз? Эскеромы Стэнли Джоунз агайлэсь примерзэ, кудӥз осконэз понна сизьым ар пытсэтын пукиз. Малы луыса со Инмарлы оскымон кылиз? Со вера: «Монэ юнматӥзы Инмарлэн Эксэйлыкез сярысь тодон-валанъёс, мон оски, со зэмзэ но вань шуыса, но солы осконэ мынам чик но ӧз лябӟы. Соин ик нокин но ӧз быгаты монэ Иеговалэсь  палэнтыны». Тӥ юн оскиськоды ке, Инмарлэн кыл сётонъёсыз быдэсмозы шуыса, тӥляд Иеговаен кусыпъёсты юнмалозы но тӥ кышканлы уд сётске (Мад. 3:25, 26).

8. Мае возьматэ со, кызьы ми христиан пумиськонъёс шоры учкиськомы? Валэктэ.

⁸ Христиан пумиськонъёсы ялан ветлэ. Пумиськонъёс юртто милемлы Иеговалы матэ кариськыны. Со, кызьы ми учкиськомы пумиськонъёс шоры, возьматэ, чидаломы-а ми уйылон-уллянъёсты (Евр. 10:24, 25). Ми али ик ини огшоры мугъёсын сэрен пумиськонъёсты кельтылӥськомы ке, соку мар ми каромы, куке кивалтӥсьёс огъя оскисьёсынымы пумиськылыны уз лэзе? Мукет ласянь учкыса, милям туннэ ик ини пумиськонъёсы ветлыны юн мылкыдмы вань ке, соку ми ум сётске, куке тушмонъёсмы милемлы ӵош пумиськылыны люкетозы. Туннэ тужгес но тупась дыр, куке христиан пумиськонъёсты яратонэз будэтоно. Ми соосты яратӥськомы ке, соку уйылон-уллянъёс шоры но кивалтӥсьёслэн пумитъяськемзы шоры учкытэк, ми Инмарлэсь кылзӥськомы (Ап. уж. 5:29).

9. Малы Библиысь кылбуръёсты дышетоно, уйылон-уллянъёслы дасяськон понна?

⁹ Библиысь яратоно кылбуръёстэс дышетэ (Матф. 13:52). Тӥ мае ке вунэтӥськоды ке, Иегова святой духез пыр юрттоз тӥледлы соосты тодады вайыны (Иоанн 14:26). Тани мар вераз одӥг агай, кудӥз Шундыӝужанпал Германиын пытсэтын одӥгназ пукиз: «Макем умой, со дырлы мон Библиысь 200-лэсь тросгес кылбуръёсты дышетӥ шуыса! Вань со дыр ӵоже мон малпаськи пӧртэм юанъёс сярысь, кудъёсыз Библиын эскерисько». Библиысь кылбуръёс вылын малпаськон агаймылы юрттӥз Иеговаен матысь кусыпъёссэ утьыны но солы оскымон кыльыны.

10. Малы милемлы кырӟанъёсты дышетоно?

¹⁰ Иеговаез данъясь кырӟанъёсты дышетэ но кырӟалэ. Куке Павел но Сӥла Филиппы карын пытсэтэ сюризы, соос, Иеговаез данъяса, кырӟанъёсты кырӟазы (Ап. уж. 16:25). Нош мар юнматэ вал Совето Союзысь вын-агайёсмес но сузэр-апайёсмес, куке соосты Сибире келязы? Мария Федунь сузэр тодаз вайылӥз: «Кырӟанъёсын книгаысь ми кырӟамы вань кырӟанъёсты, кудъёссэ тодамы вайыны быгатӥмы». Со вераз, та кырӟанъёс соослэсь мылкыдзэс туж ӝутӥзы но Иеговаен матысь кусыпъёс возьыны юрттӥзы шуыса. Тӥляд но вань, дыр, яратоно кырӟанъёсты, кудъёсыз тӥледлы кужым сёто.  Быгатӥськоды-а тӥ соосты дышетыны? (Учке « Вай мыным кужым кышкасьтэм луыны» рамкаез.)

11, 12. а) Малы Давид туж кышкасьтэм вал, 1 Эксэйлыкъёслэсь 17:37, 45—47 лыдэ басьтыса? б) Малы дышетэ милемыз Давидлэн учырез?

¹¹ Уйылон-уллянъёс дыръя туж кулэ кышкасьтэм луыны. Нош мар кароно, тӥ шӧдӥськоды ке, кышкасьтэм сям тӥледлы уг тырмы шуыса? Эн вунэтэ: кышкасьтэм сям герӟаськемын ӧвӧл соин, кыӵе тӥляд ӝуждалады, быгатонлыкъёсты но кужымды. Малпаське егит Давид сярысь, кудӥз Голиафен ожмаськыны потӥз. Та батырен ӵошатыса, Давид пичи, ляб но умой ожмаськон тӥрлыктэк адямиен адскиз! Солэн мечез гинэ но ӧй вал. Озьы ке но со туж кышкасьтэм вал. Давид кышкатэк ожмаськыны кутскиз ас вылаз оскиськись тушмонэн.

¹² Малы Давид сокем кышкасьтэм вал? Со юн оскиз, Иегова соин ӵош шуыса. (Лыдӟе 1 Эксэйлыкъёслэсь 17:37, 45—47.) Давид ӧз малпа со сярысь, макем бадӟым вал Голиаф, соин ӵошатыса, нош малпаз со сярысь, макем пичи вал та батыр, Иеговаен ӵошатыса. Малы дышетэ милемыз та учыр? Ми оскиськомы ке, Иегова милемын ӵош шуыса но, Иеговаен ӵошатыса, тушмонъёсмы ӧвӧлтэм макелы пӧрмо шуыса, ми кышканлы ум сётске (2 Пар. 20:15; Пс. 15:8). Нош кызьы эшшо но кышкасьтэм луоно али, куке уйылон-уллянъёс ӧз кутске на?

13. Мар юрттоз милемлы эшшо но кышкасьтэмесь луыны? Валэктэ.

¹³ Эшшо но кышкасьтэм луон понна, Инмарлэн Эксэйлыкез сярысь ӟеч иворез тросгес тодытоно. Малы? Куке ми тодытӥськомы, ми дышетскиськомы Иегова вылэ оскиськыны но адямиослэсь кышканмес вормыны (Мад. 29:25). Мугормес кыдатыса, ми кужмогес луиськомы. Озьы ик куке ми тодытӥськомы, коркась корка ветлыса, трос калыко интыосын, адямиослэн ужан интыосазы но мар ке карыкумы, ми эшшо но кышкасьтэмесь луиськомы. Солы луыса ми ужмес азьланьтомы, кивалтӥсьёс тодытыны ӧз лэзе ке но (1 Фес. 2:1, 2).

14, 15. Малы дышето милемыз Нанси Юэн но Валентина Гарновская сузэръёслэн учыръёссы?

¹⁴ Милемыз юнматыны быгато кык сузэръёсмылэн учыръёссы, кудъёсызлэн туж юн осконзы вал. Нанси Юэн сузэр, кудӥз улӥз Китайын, коммунистъёс кивалтыку, одӥг но ӝыны метрлэсь ӝужыт ӧй вал, озьы ке но со  туж кышкасьтэм вал b. Кивалтӥсьёс ӧз лэзе солы Эксэйлык сярысь ӟеч иворез вераны, нош со ӧз сётскы. Соин сэрен пытсэтын со ог 20 ар ортчытӥз. Кивалтӥсьёс, кудъёсыз Юэн сузэрлэсь ужзэ чаклазы-эскеризы, веразы, быдэс шаерын солэсь но ваменэс адями ӧвӧл шуыса.

¹⁵ Валентина Гарновская сузэрез Совето Союзын куинь пол пытсэтэ пуктылӥзы. Отын со 21 ар ортчытӥз c. Мар пумысен сое янгыше уськытъязы? Солэн юн мылкыдыз вал тодытон ужез азьланьтыны, соин ик суд лыдъяз, со «туж кышкыт йыруж лэсьтӥсь» луэ шуыса. Мар юрттӥз та сузэръёслы кышкасьтэм луыны? Соос юн оскизы, Иегова соосын ӵош шуыса.

16. Мар юрттоз милемлы зэмзэ но кышкасьтэмесь луыны?

¹⁶ Кызьы возьмато эскерем учыръёс, милемлы ас кужыммы но быгатонлыкъёсмы вылэ оскиськоно ӧвӧл. Оскыны кулэ, Иегова милемын ӵош но ми понна ожмаське шуыса (К. Зак. 1:29, 30; Зах. 4:6). Озьы гинэ ми зэмзэ но кышкасьтэмесь луомы.

17, 18. Мар сярысь алӥз милемыз Иисус, Иоаннлэсь 15:18—21 лыдэ басьтыса? Валэктэ.

¹⁷ Милемлы кельше, куке адямиос милемыз гажало. Нош куке соос милемыз уг ярато, малпано ӧвӧл, ми номырлы ярасьтэмесь шуыса. Иисус шуиз: «Шудоесь тӥ, куке тӥледыз Адями Пи понна адямиос адӟонтэм каризы ке, куке тӥледыз люкизы ке, курлазы ке, нимдэс саптаса куштӥзы ке» (Лука 6:22). Мар сярысь со вераз?

¹⁸ Иисус ӧз вера, христианъёслы кельше шуыса, куке соосты адӟемпотостэм каро. Со интые, Иисус вераз со сярысь, мар луыны быгатэ. Ми «та дуннелэн адямиосыз» ум луиське. Ми Иисуслэн дышетэмезъя улӥськомы но Инмарлэн Эксэйлыкез сярысь тодытӥськомы. Паймонэз ӧвӧл, дунне милемыз адӟемпотостэм каре шуыса. (Лыдӟе Иоаннлэсь 15:18—21.) Ми понна валтӥсез — Иеговаез  шумпоттон. Нош адямиослы уг кельшы ке, ми инмысь Атаймес яратӥськомы шуыса, ми со понна укыр зол ум сюлмаськиське.

19. Кыӵе адӟем карон кельтӥзы милемлы апостолъёс?

¹⁹ Мар гинэ адямиос медаз вералэ, мар гинэ соос медаз лэсьтэ, оскондылэсь ноку но эн возьдаське (Мих. 4:5). Адямиослэсь кышканэз вормыны юрттоз малпаськон со сярысь, мар каризы апостолъёс Иерусалимын Иисусэз кортӵогам бере. Соос тодӥзы, макем зол соосты адӟемпотостэм каризы иудейёслэн религиозной кивалтӥсьёссы (Ап. уж. 5:17, 18, 27, 28). Та шоры учкытэк, соос котькуд нунал храме ветлӥзы но, Христослэн дышетскисьёсыз луо шуыса, ватытэк тодытӥзы (Ап. уж. 5:42). Соос кышканлы ӧз сётске. Ми но адямиослэсь кышканмес вормыны быгатомы, ватытэк верамы ке ӵош ужасьёсмылы, огъя дышетскисьёсмылы но бускельёсмылы, ми Иеговалэн Адӟись-Ивортӥсьёсыз луиськомы шуыса (Ап. уж. 4:29; Рим. 1:16).

20. Мар юрттӥз апостолъёслы шумпотонзэс ыштытэк улыны, соосты адӟемпотостэм каризы ке но?

²⁰ Апостолъёсты адӟемпотостэм каризы ке но, соос шумпотонзэс ӧз ыштэ. Соос тодӥзы, малы адямиос асьсэды озьы возё, но данъяськизы, Иеговалэсь эриксэ быдэстон понна курадӟо шуыса (Лука 6:23; Ап. уж. 5:41). Апостол Пётр берлогес гожтӥз: «Шонерлык понна курадӟоно луиды ке но, тӥ шудоесь» (1 Пётр 2:19—21; 3:14). Милемыз но адӟемпотостэм каро, шонер ужъёс лэсьтэммы понна. Ми со сярысь тодамы возиськомы ке, соку ум лэзе адямиослэсь кышканлы милемыз вормыны.

21, 22. а) Мар тӥ кароды, уйылон-уллянъёслы дасяськон понна? б) Мае ми эскеромы вуоно статьяын?

²¹ Ми ум тодӥське, ку адямиос милемыз уйылыны-улляны кутскозы яке кивалтӥсьёс Иеговалы йыбыртъяны уз лэзе. Но ми тодӥськомы, солы али ик ини дасяськоно шуыса. Со понна милемлы Иеговаен кусыпъёсмес юнматоно, кышкасьтэм сям будэтоно но дышетсконо шумпотыса улыны, милемыз адӟемпотостэм каро ке но. Таӵе дасяськон юрттоз милемлы вуоно шуг-секытъёс дыръя.

²² Нош мар кароно, тӥляд улосады кивалтӥсьёс Иеговалы йыбыртъяны уг лэзё ке ини? Вуоно статьяын ми эскеромы Библиысь возетъёсты, кудъёсыз сыӵе югдуре но Иеговалы ужаны-тыршыны юрттозы.