1. Биз немә үчүн зиянкәшликкә тәйяр болушимиз керәк?

 ҺӘЗРИТИ ӘЙСА өз шагиртлирини адәмләрниң өч көридиғанлиғини билип, өлүми алдидики ахирқи күни шу тоғрилиқ агаһландурған (Йоһ. 17:14). Йәһва Худаға ибадәт қилмайдиған кишиләр та бүгүнки күнгичә Худаниң садиқ хизмәтчилиригә зиянкәшлик қилип келиватиду (Тим. 2-х. 3:12). Бу дуния түзүминиң ахири йеқинлашқансири, дүшмәнлиримизниң қаршилиғи техиму күчийиду (Мәт. 24:9).

2, 3. a) Қорқунучниң қандақ зийини бар? ә) Бу мақалә немә һәққидә?

² Алдимизда келиватқан қийинчилиқларға қандақ тәйярлиқ қилсақ болиду? Қорқунучлуқ вәзийәтләрни көз алдимизға кәлтүрүп, яман ой-хиял қилишниң һаҗити йоқ. Сәвәви «қорққанға қош көрүнәр» дейилгәндәк, әгәр қийинчилиқларни тәсәввур қилсақ, бизни қорқунуч чирмавелиши һәмдә техи бешимизға синақ кәлмәй туруп, бәл қойиветип, Йәһваға хизмәт қилишни тохтитишимиз мүмкин (Пәнд н. 12:25; 17:22). Қорқунуч — дүшминимиз Иблисниң күчлүк қурали (Пет. 1-х. 5:8, 9). Зиянкәшликкә тәйяр болуш үчүн һазирниң өзидә немә қилалаймиз?

³ Бу мақалидә Йәһва Худа билән достлуғимизни күчәйтишкә вә һазирниң өзидә шундақ қилиш керәклигигә диққәт ағдуримиз. Шундақла биз техиму җасарәтлик болуш үчүн немә қилиш керәклигини көрүп чиқимиз. Шундақла башқилар бизни өч көргәндә, қандақ һәрикәт қилишқа болидиғанлиғи һәққидә мулаһизә қилимиз.

4. Ибранийларға 13:5, 6гә асасән, немигә ишинишимиз керәк вә немә үчүн бу муһим?

⁴ Йәһва сизни яхши көридиғанлиғиға вә һечқачан ташлимайдиғанлиғиға ишиниң (Ибранийларға 13:5, 6ни оқуң). Көп жиллар бурун «Күзитиш мунарида»: «Худани  яхши билгән адәм синақ вақтида Униңға тайиниду»,— дәп йезилған. Бу сөзләрниң җени бар! Дүшмәнләрниң қаршилиғиға тәқабил туруш үчүн Йәһвани яхши көрүшимиз, Униңға пүтүнләй тайинишимиз вә Униң меһир-муһәббитигә гуман қилмаслиғимиз керәк (Мәт. 22:36—38; Яқуп 5:11).

5. Йәһва Худа сизни яхши көридиғанлиғини чүшинишкә немә ярдәм бериду?

⁵ Йәһваға йеқинирақ болуш үчүн Муқәддәс китапни һәр күни оқуң (Яқуп 4:8). Оқуған чағда Йәһва Худаниң меһир-муһәббәт, рәһим-шәпқәт вә меһрибанлиқтәк хисләтлиригә диққәт ағдуруң. Йәһва Худаниң ейтқан сөзлири билән иш-һәрикәтлиридин сизни қанчилик яхши көридиғанлиғини чүшинишкә тиришиң (Чиқ. 34:6). Бәзи адәмләр үчүн Худа уларни яхши көридиғанлиғиға ишиниш қийин, чүнки улар меһир-муһәббәт көрмәй чоң болған. Сизму шундақ һис-туйғида болсиңиз, һәр күни Йәһва сизгә меһрибанлиғини қандақ көрсәткәнлигини йезип туруң (Зәб. 78:38, 39; Рим. 8:32). Худа Сөзидин оқуғанлириңиз һәққидә мулаһизә қилғанда вә өз тәҗрибиңиз тоғрилиқ ойлиғанда Йәһваниң сизгә көп яхшилиқ қилғанлиғини чүшинисиз. Униң сизгә қилған яхшилиғини қанчә қәдирлигәнсири, Йәһва билән болған достлуғиңиз шунчә мәһкәм болиду (Зәб. 116:1, 2).

6. Зәбур 94:17—19ға асасән, чин жүрәктин дуа қилиш сизгә қандақ ярдәм бериду?

⁶ Дайим дуа қилиң. Дадисиниң қучиғида олтарған балини тәсәввур қилип көрүң. У өзини бехәтәр һис қилиду. Бешидин өткән яхши-яман нәрсиләрниң һәммисини дадисиға әркин ейтип берәләйду. Сизму Йәһва Худа билән шундақ мунасивәттә болалайсиз. Буниң үчүн Униңға һәр күни чин жүрәктин дуа қилиң (Зәбур 94:17—19ни оқуң). Көйүмчан Атиңизға ич-бағриңизни төкүп, ғәм-әндишилириңизни очуқ ейтиң (Йәр. ж. 2:19). Шу чағда Муқәддәс китапта ейтилғандәк, «ой-пикирдин үстүн туридиған Тәңриниң течлиғиға» егә болисиз (Флп. 4:6, 7). Йәһваға қанчә көп дуа қилсиңиз, Униңға шунчә йеқин болисиз (Рим. 8:38, 39).

7. Немә үчүн Худаниң Падишалиғи тоғрилиқ вәдиләр әмәлгә ашидиғанлиғиға ишинишиңиз керәк?

⁷ Худаниң Падишалиғи бәрикәтләрни елип келидиғанлиғиға ишәнч қилиң (Сан. 23:19). Әгәр ишәнчиңиз аҗиз болса, Шәйтан вә уни яқлиғучилар сизни оңай қорқуталайду (Пәнд н. 24:10; Ибр. 2:15). Худаниң Падишалиғиға болған ишәнчиңизни һазирниң өзидә қандақ күчәйтәләйсиз? Падишалиқ һәққидики вәдиләр вә уларниң немә сәвәптин чоқум әмәлгә ашидиғанлиғи тоғрилиқ тәтқиқ қилиш үчүн вақит чиқириң. Бу қандақ ярдәм бериду? Етиқади үчүн йәттә жил қамақта олтарған Стэнли Джонс бурадәрниң мисалини көрәйли. Униңға садиқ болуп қелишқа немә ярдәм бәргән? У мундақ дәйду: «Мән Худа Падишалиғи вә униң немә қилидиғанлиғи тоғрилиқ көпирәк билим алғансири,  етиқадим мустәһкәмләнди, шуңа һеч гуманим болмиған еди. Һечким мени Йәһвани ташлап кетишкә мәҗбурлалмиған». Худаниң вәдилиригә қәтъий ишәнсиңиз, Йәһваға техиму йеқин болисиз вә қорқунучқа чүшмәйсиз (Пәнд н. 3:25, 26).

8. Учришишларға қатнишишқа қандақ қарайдиғанлиғимиз немини көрситиду? Чүшәндүрүп бериң.

⁸ Учришишларни ташлимаң. Учришишлар арқилиқ Йәһваға йеқин болалайсиз. Бизниң бүгүнки күндә учришишларға қатнишишқа қандақ көзқарашта болушимиз, кәлгүсидә зиянкәшликкә қанчилик тәйяр екәнлигимизни ениқ көрситиду (Ибр. 10:24, 25). Чүнки әгәр биз бүгүн кичик ишлар сәвәплик учришишларға бармисақ, келәчәктә етиқатдашлар билән учришиш үчүн һаятимизни тәвәккәл қилишқа тоғра кәлсә немә қилимиз? Әксинчә, учришишларни ташлимисақ, дүшмәнлиримиз җәм болуп ибадәт қилишимизға тосқунлуқ қилса, бизни һечнемә тохтиталмайду. Учришишларға қатнишишни яхши көрүшни һазир үгинишимиз керәк. Учришишларни яхши көрсәк, һечқандақ қаршилиқлар, һәтта һөкүмәтниң паалийитимизни мәнъий қилишиму адәмгә әмәс, Худаға бойсунушимизға тосалғу болмайду (Әлч. 5:29).

9. Айәтләрни ядқа билиш синақларға тәйяр болушимизға қандақ ярдәм бериду?

⁹ Өзүңизгә яқидиған айәтләрни ядлавелиң (Мәт. 13:52). Бәлким, сиз айәтләрни әстә сақлап қалалмаймән дәйдиғансиз. Лекин Йәһва Худа муқәддәс роһ арқилиқ шу айәтләрни есиңизгә елишқа ярдәм бериду (Йоһ. 14:26). Шәрқий Германиядә ялғуз кишилик камерида олтарған бурадәр мундақ дегән: «Мениң 200дин ошуқ айәтләрни ядқа билгиним бәкму яхши болди. Ялғуз болсамму, оюм һәрқачан роһий мавзулар билән толған еди». Шу айәтләр бурадиримизгә Йәһва Худа билән йеқин мунасивәттә болушқа вә садиқ болуп қелишқа ярдәм бәргән.

10. Немишкә нахшиларни ядлавелишимиз керәк?

¹⁰ Йәһвани мәдһийиләйдиған нахшиларни ядлавелип, ейтип жүрүң. Филипи шәһиридә қамақта болғанда Паул билән Силас ядқа билгән нахшиларни ейтип, Йәһвани мәдһийилигән (Әлч. 16:25). Совет һөкүмити вақтида Сибирьға сүргүн қилинған қериндашлар бир-биригә яр-йөләк болған. Мария Федунь қериндаш әсләп мундақ дәйду: «Нахша китавидин үгинивалған һәммә нахшиларни ейттуқ». Шу нахшилар уларға илһам берип, Йәһваға йеқин болушқа ярдәм бәргән. Сиз нахша  китави вә торбетидики яхши көргән нахшиңизни ейтқанда ғәйрәткә толидиғанлиғиңизни байқидиңизму? Ундақта, нахшиларни ядлавелиң. « Маңа күч-мәдәт бәргин» дегән рамкиға қараң.

11, 12. a) Самуилниң 1-язмиси 17:37, 45—47гә асасән, Давут немишкә батур болған? ә) Давутниң мисалидин қандақ муһим савақ алалаймиз?

¹¹ Қаршилиққа қарши туруш үчүн батурлуқ керәк. Әгәр сиздә җасурлуқ йетишмисә немә қилсиңиз болиду? Һәқиқий батурлуқ чоң-кичиклигиңизгә, күчиңизгә вә қабилийитиңизгә бағлиқ әмәс. Ғолиятқа қарши турған Давутниң мисалини көрүп бақайли. Бой-бәсти бәкму йоған Ғолиятқа қариғанда Давут кичиккинә, аҗиз болуп, у җәңчиләрдәк қуралланмиған еди. Давутниң һәтта қиличиму болмиған. Амма у ғәйрәткә толуп, һакавур Ғолиятқа қарши җәңгә чиққан.

¹² Давутни немә шунчилик батур қилған? Йәһва униң билән биллә болидиғанлиғиға қәтъий ишәнч қилған (Самуилниң 1-язмиси 17:37, 45—47ни оқуң). Давут Ғолиятниң өзидин қанчилик һәйвәтлик болғанлиғиға әмәс, Ғолият Йәһваға қариғанда қурттәк кичик болғанлиғиға көпирәк диққәт қилған. Биз бу мисалдин қандақ савақ алимиз? Әгәр Йәһваниң биз тәрәптә екәнлигигә ишәнсәк вә дүшмәнлиримизниң Аләм егисигә қариғанда қанчилик кичик екәнлигини ядимизда тутсақ, җасарәтлик болимиз (Тар. 2-яз. 20:15; Зәб. 16:8). Һазирниң өзидә, синақлар башланмай турғанда, җасарәткә қандақ егә болалаймиз?

13. Техиму җасарәтлик болуш үчүн немә қилалаймиз? Чүшәндүрүп бериң.

¹³ Биз Падишалиқ һәққидики хуш хәвәрни вәз қилсақ, техиму җасарәтлик болалаймиз. Немә үчүн шундақ ейталаймиз? Чүнки вәз қилғанда, Йәһваға тайинишни вә адәмләрдин қорқмаслиқни үгинимиз (Пәнд н. 29:25). Мәшиқ қилип бәдинимизни чиниқтуридиғандәк, өйму өй, адәм көп җайларда, сода-сетиқ қилидиған җайларда яки нарәсмий вәз қилиш бизни техиму җасарәтлик қилиду. Вәз қилип, батурлуқни һазирниң өзидә риваҗландурсақ, паалийитимиз мәнъий қилинғандиму, вәз қилишқа тәйяр болумиз (Сал. 1-х. 2:1, 2).

14, 15. Нэнси Юэн билән Валентина Гарновская қериндашларниң мисалидин немини үгинәләймиз?

¹⁴ Әҗайип батурлуқни көрсәткән икки қериндашниң үлгисини көрүп чиқайли. Нэнси Юэн қериндишимизниң бойи  1,5 метр болсиму, уни қорқутуш асан болмиған b. У вәз қилишни тохтатмиғанлиқтин, Хитай коммунист һөкүмити уни 20 жилдин ошуқ түрмигә ташлиған еди. Сорақ қилғанлар Нэнси қериндашни шу дөләттики «әң тәрса адәм» дегән еди.

¹⁵ Шуниңға охшаш Совет вақтида Валентина Гарновская қериндишимиз үч қетим қамаққа елинип, җәми 21 жил түрмидә олтарған c. Немә үчүн? У вәз қилишни тохтатмаслиққа қәтъий бәл бағлиғанлиқтин, һөкүмәт әмәлдарлири уни «алаһидә хәтәрлик җинайәтчи» дәп атиған. Бу икки қериндишимиз немә үчүн шунчә батур еди? Чүнки Йәһва Худаниң улар тәрәптә екәнлигигә ишәнчи камил болған.

16. Һәқиқий батурлуқниң сири немә?

¹⁶ Җуқурида ейтилғандәк, җасарәтлик болуш үчүн биз күчимизгә вә қабилийитимизгә таянмаслиғимиз керәк. Униң орниға Йәһва биз билән биллә болидиғанлиғиға вә биз үчүн күрәш қилидиғанлиғиға ишинишимиз лазим (Қ. шәр. 1:29, 30; Зәк. 4:6). Бу — батурлуқниң сири.

17, 18. Йоһан 15:18—21дә Әйса бизни немә дәп агаһландурған? Чүшәндүрүп бериң.

¹⁷ Биз башқиларниң һөрмитигә егә болушни халаймиз, амма қәдир-қиммитимиз адәмләрниң көзқаришиға бағлиқ болмаслиғи керәк. Әйса: «Инсан Оғли үчүн адәмләр силәрни өч көрүп, тәқипләп [зиянкәшлик қилип], һақарәтләп һәм силәрниң исмиңларни шәрмәндә қиливатқан чағда бәхитликсиләр»,— дегән (Луқа 6:22). Әйса бу сөзләр арқилиқ немә демәкчи болған?

¹⁸ Әйса башқилар бизни өч көргәнлигигә хошал болушимиз керәклигини ейтмиған. Әксичә, у бизни келәчәктә болидиған вақиәләр тоғрилиқ агаһландурған. Биз бу дуниядин әмәс. Биз Әйсаниң тәлимлиригә мас һаят кәчүримиз вә хуш хәвәрни ейтимиз. Шу сәвәптин бу дуния  бизни өч көриду (Йоһан 15:18—21ни оқуң). Биз Йәһвани хошал қилишни халаймиз. Йәһвани яхши көргәнлигимиз үчүн адәмләр бизни өч көрсә, биз буниң үчүн көңлүмизни йерим қилмаймиз.

19. Әлчиләрдин қандақ үлгә алалаймиз?

¹⁹ Йәһва гувачиси болғанлиғиңиз үчүн адәмләр гәп-сөзлири яки иш-һәрикәтлиридә сизни номусқа қалдурушқа тиришиши мүмкин. Лекин бундақ һис-туйғуларға йол бәрмәң (Мика 4:5). Әйса өлтүрүлгәндин кейин, Йерусалимдики әлчиләрниң қандақ үлгә қалдурғанлиғи һәққидә мулаһизә қилиш бизгә инсан алдидики қорқунучни йеңишкә ярдәм бериду. Әлчиләр йәһудий дин рәһбәрлириниң уларни қанчилик өч көргәнлигини яхши билгән (Әлч. 5:17, 18, 27, 28). Буниңға қаримастин, улар һәр күни ибадәтханиға берип, хәлиқ алдида Әйсаниң шагиртлири екәнлигини очуқ ейтқан (Әлч. 5:42). Әлчиләр қорқунуч уларни чирмавелишиға йол қоймиған. Хизмәтдашлиримиз, синипдашлиримиз яки холум-хошнилиримизға өзүмизниң Йәһва гувачиси екәнлигимизни очуқ ейтсақ, бизму адәмләрдин қорқмайдиған болумиз (Әлч. 4:29; Рим. 1:16).

20. Адәмләр әлчиләрни өч көрсиму, улар немә үчүн хошал болған?

²⁰ Әлчиләр немә үчүн хошал болған? Чүнки әлчиләр адәмләр уларни немә үчүн өч көргәнлигини билгән вә Йәһва Худаниң ирадисини орунлиғанлиғи үчүн азап чекишни шан-шәрәп дәп қариған (Луқа 6:23; Әлч. 5:41). Әлчи Петрус: «Һәтта һәққанийлиқ үчүн азап чәксәңларму, бәхитликсиләр»,— дәп язған (Пет. 1-х. 2:19—21; 3:14). Биз тоғра иш қиливатқанлиқтин, адәмләр бизни өч көриду. Буни чүшәнсәк, улар бизни өч көрсиму, Йәһваға хизмәт қилишни тохтатмаймиз.

21, 22. a) Синақларға тәйярлиниш үчүн немә қилишқа бәл бағлидиңиз? ә) Кейинки мақалидә немини көрүп чиқимиз?

²¹ Биз зиянкәшликкә қачан учрайдиғанлиғимизни яки һөкүмәт паалийитимизни қачан мәнъий қилидиғанлиғини билмәймиз. Амма келәчәктики синақларға қандақ тәйярлиқ қилалаймиз? Буниң үчүн һазирдин башлап Йәһва билән достлуқни мустәһкәмләш, батурлуқни йетилдүрүш вә адәмләр бизни өч көргәндә қандақ һәрикәт қилишни үгинишимиз муһим. Бу бизгә Йәһваға хизмәт қилишни давамлаштурушқа ярдәм бериду.

²² Лекин паалийитимиз мәнъий қилинсичу? Кейинки мақалидә һөкүмәт бизгә қарши чиққанда Йәһваға хизмәт қилишни давамлаштурушқа ярдәм беридиған мәслиһәтләрни көрүп чиқимиз.