1. Xeeni vanireerela aya wiilokiherya mwaha wa olupatthiwa?

OHIYU wookiserya Pwiya ahu Yesu aarowa awe wiiviwa, owo aahihimya wira otheene ale aniphavela okhala atthareli awe anoonyokhiwaka. (Yoh. 17:14) Tthiri eyo ti etthu eniiraneya. Maana okhuma okathi ole mpakha olelo-va, maKristau oororomeleya annilupatthiwa ni atthu ale aniwanana okokhorela wekeekhai. (2 Tim. 3:12) Nto, vaavo nintepa ahu waattamela wanikisa wa olumwenku ola, nihaana wiilokiherya saana, mwaha woowi awanani ahu anrowa otepaka onlupattha.​—Math. 24:9.

2-3. (a) Exeeni nikhanle ahu oowuupuwela voohimya sa woova? (b) Mwaha ola, ninrowa othokorerya exeeni?

² Exeeni nikhanle ahu oopaka niinaano-va wira nivilele olupatthiwa? Nihaana wiimananiha osyaka wuupuwela itthu soohiloka sikhanle oonikhumelela muhoolo. Niira siiso, khaninrowa otepaka woova aahiiso oxanka. Nto akhala wira nnimuupuwela itthu iyo soohiloka, pooti otepa oniiriha oxanka ni woova mpakha ohiya omurumeela Yehova, hata nihilupatthiwaka. (Mir. 12:25; 17:22) Nihaana wuupuwela eyo, mwaha woowi, woova kapwitthi muulupale onirumeeliwa ni ‘nwanan’ihu Satana’. (1 Ped. 5:8, 9) Nto nihaana opaka exeeni wira niilokiherye mwaha wa olupatthiwa muhoolo?

³ Mwaha ola, ninrowa woona etthu nikhanle ahu oopaka wira nlipihe waataana wahu ni Yehova ni nthowa naya ori aya vooloka opaka eyo niinaano-va. Nave ninrowa woona ele nikhanle ahu oopaka wira nincererye olipa wahu murima. Wanikisa waya, ninrowa wiixutta moota nikhanle ahu oovilela onyokhiwa ni awanani ahu.

4. Moovarihana ni aHéberi 13:5, 6, nihaana ohiliyala exeeni? Xeeni ninreerela ahu okupali eyo?

⁴ Muhiliyale wira Yehova onnoophentani ni khonikhala-khala oonyanyalakani.  (Mmusome aHéberi 13:5, 6.) Iyaakha sinceene sivinre, erevista Owehaweha yaahimmye so: “Mutthu onimusuwela oratteene Muluku, owo onootepa omuroromela okathi woolupatthiwa”. Tthiri eyo ekeekhai! Wira niwerye oxintta olupatthiwa, nihaana omphenta ni omuroromela Yehova ni murima ahu wotheene. Nave nihikhala-khale nliyalaka wira Yehova onniniphenta vanceene.​—Math. 22:36-38; Yak. 5:11.

5. Muhaana opaka exeeni wira moone wira Yehova onnoophentani?

⁵ Mmusomeke Biibiliya khula nihiku wira mukhalane waataana wooloka ni Yehova. (Yak. 4:8) Vaavo munimusoma anyu Biibiliya, mwiimananiheke oweha mikhalelo sa Yehova. Moone moota Yehova ori awe oophenta ni oothokorerya, mwa enamuna onihimya awe ni opaka itthu. (Okhum. 34:6) Atthu akina khanaphentiwe, nto pooti waavila okupali wira Muluku onnaaphenta. Akhala wira nyuwo munuupuwela siiso, khula nihiku mpakeke elista ya itthu Yehova oopakenlyaaweni sinooniherya ophenta ni omoriwa wawe ikharari. (Esal. 78:38, 39; aRom. 8:32) Nto vaavo munuupuwela anyu itthu sooloka sookhumelenleni ni wuupuwelela ele musomme anyu mBiibiliyani, woonasa wene munoowerya opaka elista ya itthu sooloka Yehova oopakenlyaaweni. Tthiri, vaavo munrowa anyu omuxukhurelaka Yehova, waataana wanyu ni yena onrowa olipaka.​—Esal. 116:1, 2.

6. Moovarihana ni Esalimo 94:17-19, ovekela ni murima wotheene onrowa wookhaliheryani sai?

⁶ Nvekeleke okathi wotheene. Nkahaya mmuupuwele mmiravo onimakela okhupaareliwa ni paapa awe. Owo onnikhala ootaphuwa omuleela paapa awe itthu sotheene sinimukhumelela, sikhale itthu sooloka wala soohiloka. Etthu emosaru pooti owiiraneelani nyuwo ni Tiithi inyu Yehova, akhala wira munonvekelaka khula nihiku. (Musome Esalimo 94:17-19.) Nto “mutthukule murim’anyu” mmuleelaka Yehova itthu sotheene munoova anyu ni sinooxankihani. (Wikh. 2:19) Munnisuwela etthu enrowa okhumelela? Nyuwo munoophwanya “murettele wa Muluku, onvikana osuwela wa mutthu”. (aFil. 4:6, 7) Tthiri vaavo munrowa anyu otepaka ovekela ni murima wotheene, nyuwo munrowa otepaka omwaattamela Yehova.​—aRom. 8:38, 39.

7. Xeeni vanireerela aya ohaanyiherya wira anatiri a Omwene wa Muluku animwiiraneya tthiri?

⁷ Mukupaliki wira anatiri a Omwene wa Muluku animwiiraneya tthiri. (Moth. 23:19) Akhala wira owaamini wanyu anatiri a Yehova onnitteettheya, vanoomukhweela Satana ni atthu awe owiirihani woova vanceene. (Mir. 24:10; aHéb. 2:15) Exeeni mukhanle anyu oopaka niinaano-va wira muncererye ororomela wanyu Omwene wa Muluku? Muhaana ompaka palano a osoma sooleiherya sa Omwene wa Muluku. Nuumala-vo, muthokorerye itthu sinookupalihani wira sooleiherya iyo sinimwiiraneya tthiri. Opaka eyo enrowa wookhaliheryani sai? Nwehe ntakiheryo na munna Stanley Jones yoowo aavirinhe iyaakha 7 otthukweliwe ene mwaha wa waamini wawe. * Exeeni yaamukhalihenrye ovilela moororomeleya okathi ole wooxankiha? Owo onihimya so: “Kaanilipa mwaha  wookupali wira Omwene wa Muluku ti wekeekhai, okupali iwo waahikiiriha ohaanyiherya nnakhala okathi vakhaani, nto khuuvo mutthu aawenrye okiiriha oturuka muupuwelo aka”. Akhala wira munoowaamini anatiri a Muluku, nyuwo munookhalana waataana wooloka ni Yehova ni khuuvo mutthu onrowa owiirihani woova etthu.​—Mir. 3:25, 26.

8. Ohicompela mithukumano ethoonyeryo ya xeeni? Mutthokiherye.

⁸ Muhicompeleke mithukumano. Mithukumano sinninikhaliherya okhalana waataana wooloka ni Yehova. Tthiri ohicompela mithukumano ethoonyeryo yoowi nnoowerya ovilela olupatthiwa muhoolo. (aHéb. 10:24, 25) Xeeni ninhimya ahu siiso? Akhala wira ninneemererya mixankiho saamukhaani siniirihaka ocompa mithukumano, exeeni enrowa onikhumelela muhoolo akhala wira nnookhoottiheriwa othukumana? Masi akhala wira noolakela ohicompela mithukumano, khaninrowa woova vaavo ale annilupattha anrowa aya onikhoottiheryaka othukumana. Tthiri ola okathi wira nisiveliweke orowela mithukumano sotheene. Akhala wira ninnisiveliwa mithukumano, khiivo etthu enrowa oniiriha ohiya omwiiwelela Muluku, hata nilupatthiwaka aahiiso okhoottiheriwa ni guvernu.​—Mit. 5:29.

9. Xeeni ohela mmuru soolepa sa mBiibiliyani eri aya enamuna yooloka ya wiilokiherya mwaha wa olupatthiwa muhoolo?

⁹ Muheleke mmuru soolepa sinoosivelani. (Math. 13:52) Hata muupuwelaka wira khamunwerya ohela mmuru soolepa, Yehova onimookhaliheryani orumeelaka munepa awe wootteela wira muupuweleke soolepa sa mBiibiliyani. (Yoh. 14:26) Nkahaya nwehe ele munna mmosa aatthukweliwe mukhatteya wAlemanha Oriental ohimmye awe oriki: “Tthiri kinnihakalala vanceene mwaha woosuwela ni ohela mmuru soolepa sinceene sa mBiibiliyani! Mahiku ale ooxanka kaanuupuwelela myaha sinceene ni soovirikana sa mBiibiliyani”. Moohaanyiherya, soolepa iyo soomukhaliherya munna ole okhalana waataana wooloka ni Yehova ni ovilela moororomeleya okathi ole wooxankiha.

10. Xeeni vari aya vooloka ohela mmuru isipo sa Omwene?

¹⁰ Muhele mmuru ni mwiipeke isipo sonvuwiha Yehova. Okathi yaatthukweliwe aya oFilipi, Paulo ni Sila yiipa isipo sonvuwiha Yehova seiyo yaasuwela aya saana. (Mit. 16:25) Moolikanasa ni Paulo ni Sila, União Soviética aahaaroiha anna mapuro ookhanyereriwa ovara miteko oSibéria. Nto awo yaalimpe sai momunepani? Murokora Mariya Fedun onihimya so: “Naaniipa isipo sotheene nuupuwela ahu, isipo seiyo saari eliivuru ahu ya isipo”. Murokora ole, ohimmye wira isipo iye sanaalipiha  otheene aya ni saanaakhaliherya okhalana waataana wooloka ni Yehova. Ankhi nyuwo? Niireke onnoosivelani ni munnilipa vaavo muniipa anyu isipo sa Omwene sinoosivelani? Akhala wira ti siiso, ola okathi woohela mmuru isipo iyo!​—Nwehe ekaaxa eni: “ Mukivahe Olipa Murima”.

11-12. (a) Moovarihana ni 1 Samuweli 17:37, 45-47, xeeni Davidi ahaareere awe olipa murima? (b) Yowiiraneya ya Davidi, enniixuttiha exeeni?

¹¹ Wira nwerye ovilela olupatthiwa, muhaana olipa murima. Akhala wira munoona wira khamulimpe murima, muhaana opaka exeeni? Muupuweleke wira olipa murima weekeekhai, khonivarihana ni orakama, ikuru nnakhala osuwela wanyu. Nkahaya mmuupuwele Davidi. Owo aari mmiravo okathi aaronwe awe owana ni Goliyathi. Vaavo ari awe ni nakhotto ole oowoopiha, Davidi aari mwaamukhaani, ookhuveya, ootteettheya ni khailokihenrye wira awane ekhotto. Nave Davidi khaarina ekatana ya ekhotto. Masi etthu yooreera, okhala wira Davidi aari mutthu oolipa murima, ni khoova orowa owana ni nakhotto ole ootupa ni owiixinnuwiha.

¹² Xeeni Davidi ahaareere awe olipa murima? Mwaha woowi aanikupali ni murima wotheene wira aamukhaliheriwa ni Yehova. (Mmusome 1 Samuweli 17:37, 45-47.) Davidi khaamakela wuupuwela wira Goliyathi nakuru okivikana miyo. Ohiya-vo, owo aanisuwela wira Goliyathi aari mwaamukhaani vamaithoni va Yehova. Yowiiraneya ela, enniixuttiha exeeni? Nniixutta wira hiyo-tho nnoowerya okhala atthu oolipa murima. Masi wira nikhale atthu oolipa murima nihaana omuroromela Yehova ni murima wotheene ni okupali wira ori ni hiyo. Nave awanani ahu kharina owerya onvikana Muluku oowerya sotheene. (2 Wah. 20:15; Esal. 16:8) Nto ninrowa wuncererya sai olipa wahu murima niinaano-va ohinatthi ophiya okathi ninrowa ahu olupatthiwa?

13. Etthu xeeni ennikhaliherya wuncererya olipa wahu murima? Mutthokiherye.

¹³ Nnoowerya wuncererya olipa wahu murima, naalaleeryaka atthu akina ihapari sooreera sa Omwene wa Muluku. Mwaha wa xeeni? Mwaha woowi, olaleerya onninikhaliherya omuroromela Yehova ni oxintta owoova atthu. (Mir. 29:25) Ntoko siisaale mitika sinlipa aya akhala wira sinniinihiwa nikuruta, olipa wahu murima onnincerereya vaavo ninlaleerya ahu khula opuro okhale mmawaani, mapuro oowaatta atthu, aneettiwa nakoso aahiiso olaleerya moohiilokiherya. Akhala wira nnimuncererya olipa wahu murima nlaleeryaka niinaano-va, nnimwiilokiherya saana wira nivikanihe olaleerya hata nikhoottiheriwaka ni guvernu.​—1 aTes. 2:1, 2.

14-15. Ntakiheryo na murokora Nancy ni Valentina, ninniixuttiha exeeni?

 ¹⁴ Ntakiheryo na arokora anli oororomeleya, ninniniixuttiha etthu yuulupale voohimya sa olipa murima. Mmosa a arokora awo aari Nancy Yuen, * nnaamwi aarina emeeturu emosa nnimeya (1.5), owo aari mutthu ohoova. Moolipa murima, okathi aalupatthiwa awe, owo aahikhootta ohiya olaleya ihapari sooreera sa Omwene wa Muluku. Nto mwaha woopaka eyo, owo aahitthukweliwa mukhatteya iyaakha 20 oChina. Makhulupale yaamukoha, yaahimmye wira murokora ole aari “mutthu ootepa onyesererya” elapo yotheene ya oChina.

¹⁵ Nave, murokora Valentina Garnovskaya * aahitthukweliwa ikwaha tthaaru soovirikana ni União Soviética, ikwaha iyo sotheene ooviriha iyaakha 21 ori ene mukhatteya. Mwaha wa xeeni? Mwaha woowi aahilakela ovikaniha olaleerya, nto makhulupale yaanimoona okhala “nakrime ootepa otakhala”. Exeeni yaakhalihenrye arokora ala anli oororomeleya ovikaniha olipa murima? Oowanli aya yaanikupali wira Yehova aari ni yaawo ni aanaakhaliherya.

16. Nihaana opaka exeeni wira nikhalane olipa murima wekeekhai?

¹⁶ Ntoko niwenhe ahu, olipa murima khonlipa ni ikuru sahu aahiiso mikhalelo sahu. Masi wira nilipe murima, nihaana okupali wira Yehova ori ni hiyo ni oniphavela onikhaliherya owanana olupatthiwa. (Otum. 1:29, 30; Zak. 4:6b) Tthiri opaka eyo enoonikhaliherya okhalana olipa murima wekeekhai.

17-18. Ntoko onihimya awe Yohani 15:18-21, nlopolo xeeni Yesu onivanhe awe? Mutthokiherye.

¹⁷ Otheene ahu ninniphavela ottittimihiwa, masi nihaana osyaka omorela muraakho woophavela wooniwa saana ni atthu akina. Yesu aahimmye so: “Moreriwa nyuwo, mwanyokhiwaka n’atthu, mwaruniwaka, mwaruwaniwaka, mwathanyiwaka ntoko atthu òtakhala, mwireliwaka mwaha wa Mwana a mutthu”. (Luka 6:22) Ni moolumo ala Yesu aaphavela ohimya exeeni?

¹⁸ Yesu khaaphavela ohimya wira maKristau waasivela onyokhiwa aahiiso olupatthiwa. Ohiya-vo, aahimya etthu yaarowa onikhumelela. Tthiri hiyo khanniirela mpantta olumwenku ola. Maana ninkhala moovarihana ni soowiixuttiha sa Yesu  ni ninlaleya muhupi Yesu aalaleya awe. Mwaha woopaka eyo, olumwenku ola onnininyokha. (Mmusome Yohani 15:18-21.) Hiyo nimphavela omusiveliha Yehova. Nave khanintepa oxanka akhala wira atthu annininyokha mwaha womphenta Yehova.

19. Ninrowa otthara sai ntakiheryo na arummwa?

¹⁹ Muhikhala-khale mweemereryaka itthu apinaatamu anihimya aya aahiiso anipaka aya siwiirihakani wuuleliwa muru ohimya wira mwa Namoona a Yehova. (Mik. 4:5) Akhala wira okathi mukina munniwoova atthu, muupuweleke ntakiheryo na arummwa a Yesu. Nuumala Yesu wiiviwa, awo yaaninyokhiwa vanceene ni makhulupale a etiini ya aYuda. Nave arummwa ale yaanisuwela saana wira yaamunyokhiwa. (Mit. 5:17, 18, 27, 28) Hata yaanyokhiwa, khula nihiku yaanirowa otemplo oYerusalemu. Nto mwaha woohihiya olaleerya awo yaanaasuweliha atthu wira yaari arummwa a Yesu. (Mit. 5:42) Awo khiyeemerenrye woova owiirihaka ohiya olaleerya. Hiyo nave, nnoowerya oxintta woova wahu. Moota xeeni? Nihaana owooniherya atthu otheene wira na Anamoona a Yehova nlaleeryaka, akhale mapuro oowaatta atthu, omutekoni, oxikola ni muttetthe ninkhala ahu.​—Mit. 4:29; aRom. 1:16.

20. Xeeni arummwa ale yaahakalanle aya hata yaanyokhiwa?

²⁰ Xeeni arummwa ale yaahakalanle aya? Mwaha woowi yaanisuwela etthu yaawiiriha olupatthiwa ni yaaniphwanelelihiwa ohaawa mwaha woopaka yootthuna ya Yehova. (Luka 6:23; Mit. 5:41) Muhoolo mwaya, murummwa Pedru aalempe so: “Mwahawaka mwaha wo wettela exariya, munoreriwa”. (1 Pedru 2:19-21; 3:14) Nasuwela wira ninnyokhiwa mwaha woopaka itthu sooloka, owoova atthu khonrowa oniiriha ohiya omurumeela Yehova.

21-22. (a) Exeeni mulakenle anyu opaka wira mwiilokiherye niinaano-va? (b) Mwaha onittharelana, ninrowa othokorerya exeeni?

²¹ Hiyo khaninsuwela okathi atthu anrowa aya opacerya onilupattha aahiiso onikhoottiherya omukokhorela Yehova mootaphuwa. Masi yookhala etthu ninsuwela ahu. Etthu ene tiila: Nihaana wiilokiherya niinaano-va. Wira nipake eyo, nihaana olipiha waataana wahu ni Yehova, wuncererya olipa wahu murima ni osuwela moota woovilela olupatthiwa. Akhala wira nnimwiilokiherya niinaano-va, nnoowerya ovilela okathi ninrowa ahu olupatthiwaka muhoolo.

²² Ankhi akhala wira ninnikhoottiheriwa omukokhorela Yehova mootaphuwa? Mwaha onittharelana, ninrowa othokorerya malakiheryo a mBiibiliyani anrowa onikhaliherya ovikaniha omurumeela Yehova hata nikhoottiheriwaka.