1. Nuuni yedetaassi giigettana koshshiyoy aybissee?

NU GODAA Yesuusi hayqqanaappe kasetiya qammi, I erissiyo ashkkara gidanawu koyiya ubbaa, asay ixxanaagaa Yesuusi yootiis. (Yoh. 17:14) He wodeppe doommidi ha wodiyaa gakkanaashin, ammanettida Kiristtaaneta Yihoowayyo goynnenna asay yedettiiddi takkiis. (2 Xim. 3:12) Ha wodiyaa wurssettay mati mati biyo wode, nu morkketi nuna kaseegaappe aaruwan eqettana giidi qoppoos.—Maa. 24:9.

2-3. (a) Yashshaa xeelliyaagan nuuni ay erana koshshii? (b) Ha huuphe yohuwan nuuni ay tamaaranee?

² Nuuni yedetaa genccanawu haˈˈi waani giigettana danddayiyoo? Nuna gakkana danddayiya ubbabaa nuuni qoppana koshshenna. Hegaa qoppikko, nuuni yashshaaninne hirggan maashana danddayoos. Nuuni nuna gakkana danddayiya iitaba ubbaa qoppikko, nuna ayba metoynne gakkanaappe kase Yihoowayyo haggaaziyoogaa agganawu qoppana danddayoos. (Lee. 12:25; 17:22) Nu “morkkee” Dabloosi wolqqaama miishsha gidida yashshaa goˈettidi nuna qohanawu baaxetees. (1 PHe. 5:8, 9) Nuna kaseegaappe aaruwan minttanawu haˈˈi ay oottana danddayiyoo?

³ Ha huuphe yohuwan, nuuni Yihoowaara dabbotido dabbotaa waati minttana danddayiyaakko, qassi nuuni haˈˈi hegaadan oottiyoogee keehi koshshiyoy aybissakko beˈana. Nuuni kaseegaappe aaruwan xala gidanawu ay oottana danddayiyaakkokka beˈana. Wurssettan, asay nuna ixxiyo wode nuuni ay oottana danddayiyaakko pilggana.

4. Ibraawe 13:5, 6y yootiyoogaadan, nuuni ay ammanettana koshshii, qassi aybissi?

⁴ Yihooway nena siiqiyoogaanne I nena mule aggennaagaa ammanetta. (Ibraawe 13:5, 6 nabbaba.) Daro layttaappe kase, Wochiyo Keelay hagaadan giis: “Xoossaa loytti eriya uri paaciyaa  wode kaseegaappe aaruwan aani ammanettana.” Hegee tuma! Yedetaa genccanawu, nuuni Yihoowa siiqananne aani wozanappe ammanettana koshshees; qassi I nuna siiqiyoogaa mule sirokko.—Maa. 22:36-38; Yaaq. 5:11.

5. Yihooway nena siiqiyoogaa akeekanaadan nena aybi maaddanee?

⁵ Yihoowakko shiiqanawu halchchada ubba gallassi Geeshsha Maxaafaa nabbaba. (Yaaq. 4:8) Neeni nabbabiyo wode, Yihoowa eeshshata qoppa. Neeni I yootidobaanne oottidobaa nabbabiyo wode, I nena keehi siiqiyoogaa akeekanawu mala. (Kes. 34:6) Issoti issoti asi eta siiqin mule beˈi erenna gishshawu, Xoossay eta siiqiyoogaa ammananawu metootana danddayoosona. Neeyyo hegaadan siyettiyaaba gidikko, gallassan gallassan Yihooway neessi kehatettaanne maarotettaa bessido ogeta xaafanawu mala. (Maz. 78:38, 39; Roo. 8:32) Neeni ne deˈuwan hanidabaa qoppiyo wodenne Xoossaa Qaalaappe nabbabidobaa wotta dentta qoppiyo wode, Yihooway neeyyo oottido darobaa qoppana danddayaasa. Yihooway oottidobaa neeni keehi nashshikko, aara ne dabbotay kaseegaappe aaruwan minnana.—Maz. 116:1, 2.

6. Mazamure 94:17-19y yootiyoogaadan, wozanappe woossiyoogee nena waati maaddana danddayii?

⁶ Ubbatoo woossa. Aaway siiquwan idimmido issi guutta naˈaa qoppa. He naˈay he gallassi bana gakkida loˈˈobaanne iitabaa ba aawaayyo keehi woppu giidi yayyennan yootees. Neeni galla galla woossiyoogan Yihoowakko shiiqikko, neenikka hegaadan dabbotana danddayaasa. (Mazamure 94:17-19 nabbaba.) Neeni Yihoowa woossiyo wode, “ne wozanaa haattaadan gussa,” qassi nena yashshiyaanne hirggissiya ubbabaa nena siiqiya Aawawu yoota. (Zil. 2:19) Hegee ay demissanee? Geeshsha Maxaafay ‘asa eratettaa ubbaappe aadhdhiya Xoossaa sarotettaa’ giyoobaa neeni demmana. (Pili. 4:6, 7) Neeni hegaadan loytta woossikko, Yihoowakko shiiqidabadan neeyyo siyettana.—Roo. 8:38, 39.

7. Xoossay ba Kawotettaa xeelliyaagan qaalaa gelidobay polettanaagaa neeni ammanettana bessiyoy aybissee?

⁷ Xoossaa Kawotettay anjjuwaa ehaanaagaa ammanetta. (Qoo. 23:19) Xoossay qaalaa gelidobay polettanaagaa neeni tumuppe ammanennaba gidikko, Seexaanaynne ayyo haarettiyaageeti nena yashissanaagee metenna. (Lee. 24:10; Ibr. 2:15) Neeni Xoossaa Kawotettan ammaniyo ammanuwaa haˈˈi waata minttana danddayay? Xoossay ba Kawotettaa xeelliyaagan qaalaa gelidobaanne hegee polettanaagaa neeni aybissi ammanettana danddayiyaakko gaasuwaa wodiyaa bazzada xannaˈa. Hegee nena waati maaddanee? Ba ammanuwaa gaasuwan laappun layttawu qasho keettan qashettida Istenili Jonza hanotaa qoppa. * I ammanettidi genccanaadan aybi maaddidee? I hagaadan giis: “Taani Xoossaa Kawotettaabaanne he Kawotettay oottanabaa eriyo gishshawu,  qassi A mule sirenna gishshawu, ta ammanoy mino. Ubba qassi ooninne taani Yihoowa agganaadan oottana danddayenna.” Neeni Xoossay qaalaa gelidobaa mintta ammanikko, Yihoowakko shiiqana, qassi neeni ayyo haggaaziyoogaa yashshay digganaadan oottakka.—Lee. 3:25, 26.

8. Nuuni shiiqota shiiqiyoogaa xeelliyo hanotaa pilggiyo wode nubaa ay tamaarana danddayiyoo? Qonccissa.

⁸ Gubaaˈe shiiqota ubbatoo shiiqa. Gubaaˈe shiiqoti nuuni Yihoowakko shiiqanaadan maaddoosona. Nuuni shiiqota shiiqiyoogaa xeelliyo hanotay sinttappe gakkana yedetaa nuuni loytti genccanaagaa bessees. (Ibr. 10:24, 25) Nuuni hegaadan gaana danddayiyoy aybissee? Ha wodiyan nuuni shiiquwaa shiiqiyoogaa guuttabay xubbiyaaba gidikko, nu shemppuwawu yashshiyaabay merettiyo wode sinttappe ishanttuuranne michchonttuura waani shiiqanee? Hara baggaara qassi, nuuni shiiqota shiiqanawu murttikko, eqettiyaageeti nuuni shiiqiyoogaa digganawu maliyo wode aggokko. Nuuni nu shiiqota kaseegaappe aaruwan siiqana bessiyoy ha wodiyaana. Kawotettay nuuni shiiqota shiiqennaadan digganawu kessido higgee deˈishinkka nuuni shiiqota siiqikko, asawu azazettiyoogaa aggidi Xoossawu azazettana.—Oos. 5:29.

9. Yedetawu giigettanawu xiqiseta hassayiyoogee loˈˈo gidiyoy aybissee?

⁹ Neeni dosiyo xiqiseta hassaya. (Maa. 13:52) Neeni ubbabaa hassayana xayikkonne, neeni he xiqiseta hassayanaadan maaddanawu Yihooway ba geeshsha ayyaanaa goˈettana danddayees. (Yoh. 14:26) Arshsho Jarmanen qasho keettan barkka qashettida issi ishay yootido kaallidi deˈiyaabaa akeeka: “Taani he wode xeetan qoodettiya xiqiseta ta wozanan hassayidoogan keehi ufayttaas! Taani he wode tarkka deˈikkonne, ubbatoo Geeshsha Maxaafaa qofata darota wotta denttada qoppays.” He xiqiseti nu ishantti ammanettidi genccanawunne Yihoowakko shiiqidi deˈanawu maaddidosona.

10. Nuuni mazamureta hassayana koshshiyoy aybissee?

¹⁰ Yihoowa sabbiyo mazamureta hassayada yexxa. PHawuloosinne Sillaasi Piliphphisiyuusan qashettido wode, eti eriyo mazamureta hassayidi Yihoowa sabbanawu yexxidosona. (Oos. 16:25) Hegaadan, kase sooviyeete kawotettay nu ishantta saybeeriyaa giyo sohuwaa efiido wode, eti banttana waatidi minttidonaa? Maariya Fedun giyo michchiyaa hagaadan gaasu: “Nuuni eriyo ubba mazamureta yexxida, hegeeti mazamuriyaa maxaafan deˈiyaageeta.” He mazamureti eta ubbaa minttettidoogaanne eti Yihoowakko shiiqanaadan maaddidoogaa A  yootaasu. Neeni dosiyo mazamureta yexxiyo wode minettiyaabadan neeyyo siyettii? Yaatikko he mazamureta haˈˈi hassaya!—“ Tana Xalissa” giya saaxiniyaa xeella.

11-12. (a) Koyro Sameela 17:37, 45-47y yootiyoogaadan, Daawiti xala gididoy aybissee? (b) Daawita hanotaappe nuuni keehi koshshiyaabaa ay tamaariyoo?

¹¹ Yedetaa genccanawu, neeyyo xalatettaa koshshees. Neeni xala asa gidennabadan neeyyo siyettikko, ay oottana danddayay? Neeni xala gidiyoogee ne qottaara, ne minotettaara woy ne abbiyaara gayttidaba gidennaagaa hassaya. Yelaga Daawitee Gooliyaadaara gayttido wodiyaabaa qoppa. He wolqqaamaara geeddarssiyo wode Daawiti keehi guutta, laafanne olettanawu loytti gixxibeenna. Haray atto Daawitassi issi bisoykka baawa. Gidikkokka, I keehi xala. Daawiti he wolqqaama otoranchchaara olettanawu xalidi akko woxxidi biis.

¹² Daawiti keehi xalidoy aybissee? I Yihooway banaara deˈiyoogaa minttidi ammanido gishshataassa. (Koyro Sameela 17:37, 45-47 nabbaba.) Daawiti banaara geeddarssiyo wode Gooliyaadi keehi gita gidiyoogan qofaa wottibeenna. Yihoowaara geeddarssiyo wode Gooliyaadi keehi laafa gidiyoogaa I qoppiis. Ha taarikiyaappe nuuni ay tamaariyoo? Nuuni Yihooway nunaara deˈiyoogaa ammanettikkonne Ubbaa Danddayiya Xoossaara geeddarssiyo wode nuna eqettiyaageeti keehi laafa gidiyoogaa erikko nuuni xalana. (2 Odi. 20:15; Maz. 16:8) Yedetay gakkanaappe kase, kaseegaappe aaruwan waani xala gidana danddayiyoo?

13. Nuuni kaseegaappe aaruwan waani xalana danddayiyoo? Qonccissa.

¹³ Nuuni Xoossaa Kawotettaa mishiraachchuwaa haratuyyo sabbakiyoogan haˈˈi kaseegaappe aaruwan xala gidana danddayoos. Aybissi? Sabbakiyoogee nuuni Yihoowan ammanettanaadan tamaarissees, qassi asaa yayyiyoogaa agganaadan oottees. (Lee. 29:25) Nuuni ispporttiyaa oottiyo wode nu dibbay minniyoogaadan, nuuni sooppe soo biidi, dabaaban, haggaazuwaa kiyennaaninne zalˈˈe heeratun sabbakiyo wode kaseegaappe aaruwan xala gidoos. Nuuni haˈˈi sabbakanawu xalikko, kawotettay nu oosuwaa teqqiyo wodekka ubbatoo sabbakanawu giigi uttidaageeta gidoos.—1 Tas. 2:1, 2.

14-15. Nansi Yuˈaanippenne Vaalentiina Garnovskayippe nuuni ay tamaarana danddayiyoo?

¹⁴ Keehi xalida ammanettida naaˈˈu michchonttuppe nuuni darobaa tamaarana danddayoos.  Nansi Yuˈaaniyyo geesay 1.5 meetire heera gidikkonne, A yayyukku. * Xoossaa Kawotettaa mishiraachchuwaa sabbakiyoogaa A aggennan ixxaasu. Hegaappe denddidaagan, A CHayna biittan 20 layttaappe daruwaa qashettaasu. O oychchida sunttati A bantta biittan “ooppenne aaruwan zozza asa” gidiyoogaa yootidosona.

¹⁵ Hegaadan, Vaalentiina Garnovskaya beni sooviyeete kawotettan heezzutoo qashettaasu; hegee muleera 21 laytta. * Aybissi? Sunttati O “danobaa oottiya keehi iita asa” giikkonne A aggennan sabbakanawu yaa murttaasu. Ammanettida ha naaˈˈu michchontti keehi xalanaadan oottidabay aybee? Yihooway banttanaara deˈiyoogaa eti ammanettidosona.

16. Nuuni xala gidanawu tumuppe aybi koshshii?

¹⁶ Nuuni qommoora beˈidoogaadan, xala gidanawu nu minotettan ammanettana bessenna. Nuuni Yihooway nunaara deˈiyoogaanne I nu gishshawu olettiyoogaa ammanettana bessees. (Zaa. 1:29, 30; Zak. 4:6) Tumu xalatettawu hegee waannaba.

17-18. Yohaannisa 15:18-21 yootiyoogaadan, Yesuusi nuussi ay yootidee? Qonccissa.

¹⁷ Hara asay nuna bonchchiyo wode nuuni ufayttoos, shin asay nuna dosana xayikko nuuni nuna pattenna asadan xeellana koshshenna. Yesuusi hagaadan giis: “Intte tana Asa Na7aa kaalliyo gishshau, asi inttena ixxiyo wode, asappe shaakkiyo wode, boriyo wode, inttena iita sunttan xeegiyo wodekka intte anjjettidaageeta.” (Luq. 6:22) Yesuusi woygana koyidee?

¹⁸ Yesuusi Kiristtaaneti banttana asay ixxiyoogan ufayttana gibeenna. I nu bolli aybi gakkanaakko nuuyyo yootiis. Nuuni alamiyaa bagga gidokko. Nuuni Yesuusi tamaarissido timirttiyaadan deˈoos; qassi I sabbakido mishiraachchuwaa sabbakoos. Hegaappe denddidaagan, alamee nuna ixxees. (Yohaannisa 15:18-21 nabbaba.) Nuuni Yihoowa ufayssanawu  koyoos. Nuuni Yihoowa siiqiyo gishshawu, nuna asay ixxikko, yiillotokko.

19. Nuuni kiitettidaageetu leemisuwaa waati kaallana danddayiyoo?

¹⁹ Asay haasayiyoobay woy oottiyoobay neeni Yihoowa Markka gidiyoogan yeellatanaadan oottana mala mule eeno gooppa. (Mik. 4:5) Kiitettidaageeti Yesuusi hayqqi simmin Yerusalaamen oottidobaa qoppiyoogan nuuni asaa yayyiyoogaa aggiyoogaa tamaarana danddayoos. Eti Ayhuda haymaanootiyaa kaalettiyaageeti banttana keehi ixxiyoogaa eroosona. (Oos. 5:17, 18, 27, 28) Gidikkokka, eti ubba gallassi beeta maqidasiyaa aggennan biidosona; qassi eti sabbakiyoogan Yesuusi erissiyo ashkkarata gidiyoogaa bessidosona. (Oos. 5:42) Eti sabbakiyoogaa yayyidi aggibookkona. Ooso sohuwan, timirtte keettan woy nuuni deˈiyo heeran, nu Yihoowa Markka gidiyoogaa asay eranaadan oottiyoogan asaa yayyiyoogaa nuunikka aggana danddayoos.—Oos. 4:29; Roo. 1:16.

20. Kiitettidaageeti banttana asay ixxikkonne, eti ufayttidoy aybissee?

²⁰ Kiitettidaageeti ufayttidoy aybissee? Eti asay eta ayssi ixxidaakko eroosona; qassi eti Yihoowa sheniyaa oottiyoogaa gaasuwan asay eta qohidoogaa bonchchodan xeellidosona. (Luq. 6:23; Oos. 5:41) Kiitettida PHeexiroosi guyyeppe hagaadan giis: “Harai atto, xillotettaa gishshau intte waayettikkokka, anjjettidaageeta” woy ufayttiyaageeta. (1 PHe. 2:19-21; 3:14) Nuuni likke gididabaa oottiyoogaa gaasuwan asay nuna ixxiyoogaa akeekikko, nuuni Yihoowayyo haggaaziyoogaa asay nuna ixxiyo gishshawu mule aggokko.

21-22. (a) Yedetawu giigettanawu neeni ay oottanawu murttadii? (b) Kaalliya huuphe yohuwan nuuni ay beˈanee?

²¹ Asay nuna yedettiyoogaa doommana wodiyaa woy kawotettati nu oosuwaa teqqana danddayiyo wodiyaa nuuni erokko. SHin, Yihoowaara dabbotido dabbotaa minttiyoogan, kaseegaappe aaruwan xala gidiyoogaaninne asay nuna ixxiyo wode gencciyoogaa tamaariyoogan nu haˈˈi giigettana danddayiyoogaa eroos. Nuuni ha wodiyan giigettiyoogee aggennan Yihoowayyo oottanaadan nuna maaddana.

²² Nu goynoy teqettikko shin? Kaalliya huuphe yohuwan, nuuni nu goynoy teqettiyo wodekka Yihoowayyo aggennan haggaazanawu nuna maaddiya Geeshsha Maxaafaa maarata beˈana.