1. Kay ano nga kinahanglan naton mangandam para ha pagtimaraot?

HAN gab-i antes patayon an aton Ginoo nga hi Jesus, nagsiring hiya nga kangangalasan an ngatanan nga naruruyag magin iya mga disipulo. (Juan 17:14) Tubtob yana, an matinumanon nga Kristiano nga mga Saksi ni Jehova gintitimaraot han mga nakontra ha tinuod nga pagsingba. (2 Tim. 3:12) Samtang nagtitikahirani an kataposan hini nga sistema, naglalaom kita nga mas kukontrahon kita han aton mga kaaway.​—Mat. 24:9.

2-3. (a) Ano an sadang naton hibaroan mahitungod ha kahadlok? (b) Ano an aton hihisgotan hini nga artikulo?

² Paonan-o kita makakapangandam para ha pagtimaraot? Diri naton kinahanglan hunahunaon an ngatanan nga posible mahitabo ha aton nga maraot. Kay kon ito an aton bubuhaton, magduduro la an aton kahadlok ngan kabaraka. Kon ito an aton paghihinunahunaon, bangin umundang na kita pag-alagad antes pa mahitabo an aktuwal nga pagtimaraot. (Prob. 12:25; 17:22) An kahadlok usa nga makusog nga armas nga ginagamit ha aton han aton “kaaway nga amo an Yawa.” (1 Ped. 5:8, 9) Ano an mahimo naton buhaton yana basi magin andam para ha pagtimaraot?

³ Hini nga artikulo, hihisgotan naton kon paonan-o mapaparig-on an aton relasyon kan Jehova ngan kon kay ano nga importante nga buhaton naton ito yana. Hihisgotan liwat naton kon paonan-o makukultibar an dugang nga kaisog. Katapos, aton uusisahon kon ano an aton bubuhaton kon kangalasan kita han mga parakontra.

4. Sumala ha Hebreo 13:5, 6, ha ano kita kinahanglan magin kombinsido, ngan kay ano?

⁴ Magin kombinsido nga hinigugma ka ni Jehova ngan diri ka gud niya papabay-an. (Basaha an Hebreo 13:5, 6.) Damu ka tuig na  an naglabay, an The Watchtower nagsiring: “An tawo nga nakilala hin maopay ha Dios masarig gud ha iya ha panahon han pagsari.” Tinuod gud ito! Basi mailob an pagtimaraot, kinahanglan higugmaon naton hi Jehova ngan bug-os nga sumarig ha iya, nga diri gud nagruruhaduha nga hinigugma kita niya.​—Mat. 22:36-38; San. 5:11.

5. Ano an mabulig ha imo basi abaton an gugma ni Jehova?

⁵ Basaha an Biblia kada adlaw nga an tumong amo an pagin mas duok kan Jehova. (San. 4:8) Samtang nagbabasa ka, pagpokus ha magpakaruruyag nga kalidad ni Jehova. Abata an iya gugma ngan pagpalangga pinaagi ha iya ginsisiring ngan ginbubuhat. (Ex. 34:6) An pipira bangin nakukurian pagtuod nga hinigugma hira han Dios kay waray pa gud ha ira nagpakita hin gugma. Kon ito an imo inaabat, sarihi nga ilista kada adlaw kon paonan-o iginpapakita ha imo ni Jehova an iya kalooy ngan pagkabuotan. (Sal. 78:38, 39; Roma 8:32) Samtang imo ginhuhunahuna an imo mga eksperyensya ngan ginpapamalandong an imo nababasa ha Biblia, posible nga damu an imo maililista nga ginbuhat ni Jehova para ha imo. Samtang mas gin-aapresyar mo an ginbubuhat ni Jehova, mas magririg-on an imo relasyon ha iya.​—Sal. 116:1, 2.

6. Sumala ha Salmo 94:17-19, paonan-o makakabulig ha imo an kinasingkasing nga pag-ampo?

⁶ Regular nga mag-ampo. Hunahunaa an usa nga bata nga ginhahangkopan han iya mahigugmaon nga tatay. Inaabat han bata nga talwas hiya ngan diri hiya nag-aalang nga ig-istorya ha iya tatay an mag-opay ngan magraot nga nahitabo ha iya hito nga adlaw. Magkakaada ka liwat sugad hito nga relasyon kon mahirani ka kan Jehova kada adlaw pinaagi han kinasingkasing nga pag-ampo. (Basaha an Salmo 94:17-19.) Ha imo pag-ampo, “isumat kan Jehova . . . an ngatanan nga aada ha imo kasingkasing” ngan isumat ha imo mahigugmaon nga Amay an ngatanan mo nga ginkakahadlokan ngan ginkakabarak-an. (Pagta. 2:19) Ano an magigin resulta? Maieksperyensyahan mo an ginsisiring han Biblia nga “kamurayawan han Dios nga labaw ha ngatanan nga pagsabot.” (Fil. 4:6, 7) Samtang mas nag-aampo ka ha sugad nga paagi, aabaton mo nga mas duok ka kan Jehova.​—Roma 8:38, 39.

7. Kay ano nga kinahanglan magin kombinsido ka nga matutuman an mga saad han Dios mahitungod han iya Ginhadian?

⁷ Magin kombinsido nga matutuman an mga bendisyon han Ginhadian han Dios. (Num. 23:19) Kon maluya an imo pagtoo hito nga mga saad, magigin masayon para kan Satanas ngan ha iya mga sakop nga hadlukon ka. (Prob. 24:10; Heb. 2:15) Paonan-o mo mapaparig-on yana an imo pagtoo ha Ginhadian han Dios? Pag-admi an mga saad han Dios mahitungod han iya Ginhadian ngan kon kay ano nga makakasarig ka nga matutuman ito. Paonan-o ito makakabulig ha imo? Tagda an ehemplo ni Stanley Jones, nga napriso hin pito ka tuig tungod han iya pagtoo. * Ano an nakabulig ha iya nga makapabilin nga matinumanon? Hiya nagsiring: “Tungod kay naparig-on ako han kahibaro mahitungod han ginhadian han Dios ngan kombinsido ako hito, nga waray gud  ako magruhaduha hito bisan la madali, diri gud ako mababantad.” Kon marig-on an imo pagtoo ha mga saad han Dios, magigin mas duok ka kan Jehova ngan diri ka madadaog han kahadlok.​—Prob. 3:25, 26.

8. Ano an iginpapakita han aton pagtagad ha mga katirok? Isaysay.

⁸ Pirme tambong ha Kristiano nga mga katirok. An mga katirok nabulig ha aton nga magin mas duok kan Jehova. An aton pagtagad ha pagtambong ha mga katirok magpapakita kon maaatubang ba naton hin malampuson an tiarabot nga pagtimaraot. (Heb. 10:24, 25) Kay ano nga masisiring naton ito? Kon gintutugotan naton yana an gudtiay nga butang nga makaulang ha aton pagtambong ha mga katirok, ano an mahitatabo ha tiarabot kon kinahanglan na naton ibutang ha peligro an aton kinabuhi basi makaupod an aton mga igkasi-tumuroo? Ha luyo nga bahin, kon napatubo naton an marig-on nga determinasyon nga tumambong ha mga katirok, diri kita maundang kon pugngan kita han aton mga parakontra nga magkaada mga katirok. Yana na an panahon nga kultibaron naton an aton gugma ha aton mga katirok. Kon hinigugma naton an pagtambong ha mga katirok, waray pagkontra, bisan an pagdiri han gobyerno, nga makakapaundang ha aton nga sugton an Dios imbes nga an mga tawo.​—Buh. 5:29.

9. Kay ano nga an pagmemorya hin mga teksto usa nga maopay nga paagi ha pagpangandam para ha pagtimaraot?

⁹ Pagmemorya han imo paborito nga mga teksto. (Mat. 13:52) Bisan kon diri perpekto an imo memorya, mahimo gamiton ni Jehova an iya gamhanan nga baraan nga espiritu basi mahinumdoman mo ito nga mga teksto. (Juan 14:26) Tagda an ginsiring han usa nga bugto nga napriso ha East Germany ngan iginbartolina: “Nalipay gud ako nga hito nga panahon memoryado ko na an pipira ka gatos nga teksto! Hito nga mga adlaw nga waray ako ginbubuhat, ginpapamalandong ko an magkalain-lain nga topiko ha Biblia.” Ito nga mga teksto nakabulig ha aton bugto nga magpabilin nga duok kan Jehova ngan makapabilin nga matinumanon.

10. Kay ano nga sadang kita magmemorya hin mga kanta?

¹⁰ Pagmemorya ngan pagkanta hin mga kanta nga nagdadayaw kan Jehova. Han hira Pablo ngan Silas priso ha Filipos, nagkanta hira hin mga kanta nga nagdadayaw kan Jehova nga memoryado nira. (Buh. 16:25) Sugad man, han an aton kabugtoan ha gintatawag hadto nga Unyon Sobyet gindistyero ha Siberia, paonan-o nira ginparig-on an ira kalugaringon? An sister nga hi Mariya Fedun nagsiring: “Ginkakanta namon an ngatanan nga kanta nga maaram kami, an mga  kanta ha songbook.” Nagsiring hiya nga ito nga mga kanta nakadasig ha ira ngan nakabulig nga magin mas duok kan Jehova. Napaparig-on ka ba kon nagkakanta ka han imo paborito nga mga kanta nga nagdadayaw kan Jehova? Kon sugad, memoryaha yana ito nga mga kanta!​—Kitaa an kahon nga “ Tagi hin Kaisog.”

11-12. (a) Sumala ha 1 Samuel 17:37, 45-47, kay ano nga maisugon hi David? (b) Ano nga importante nga leksyon an aton mahibabaroan ha ehemplo ni David?

¹¹ Basi maatubang an pagtimaraot, kinahanglan mo an kaisog. Kon inaabat mo nga waray ka hito nga kalidad, ano an mahimo mo buhaton? Hinumdumi nga an tinuod nga kaisog diri nakadepende ha imo kadaku, kusog, o abilidad. Tagda an batan-on nga hi David han gin-atubang niya hi Goliat. Kon ikompara hito nga higante, hi David mas gutiay, mas maluya, ngan kulang hin armas. Waray ngani espada hi David. Pero, maisugon gud hiya. Maisugon nga gintapo ni David iton mapahitas-on nga higante basi makig-away.

¹² Kay ano nga maisugon gud hi David? Natoo gud hiya nga kaupod niya hi Jehova. (Basaha an 1 Samuel 17:37, 45-47.) Waray magpokus hi David kon ano kadaku hi Goliat kon ikompara ha iya. Lugod, nagpokus hiya kon ano kaguti hi Goliat kon ikompara kan Jehova. Ano an aton mahibabaroan hini nga asoy? Magigin maisugon kita kon nasarig kita nga kaupod naton hi Jehova ngan kon kombinsido kita nga an mga nakontra ha aton gutiay gud kon ikompara ha Dios nga Makagarahum-ha-ngatanan. (2 Cron. 20:15; Sal. 16:8) Paonan-o naton makukultibar yana an dugang nga kaisog antes pa umabot an pagtimaraot?

13. Paonan-o naton makukultibar an dugang nga kaisog? Isaysay.

¹³ Makukultibar mo yana an dugang nga kaisog pinaagi ha pagsangyaw ha iba han maopay nga sumat han Ginhadian han Dios. Kay ano? Tungod kay an pagsangyaw nagtututdo ha aton nga sumarig kan Jehova ngan maatohan an kahadlok ha tawo. (Prob. 29:25) Sugad la nga an aton mga muscle nagigin marig-on kon nag-iehersisyo kita, an aton kaisog nagririg-on o nadudugangan kon nagsasangyaw kita ha balay-balay, ha panpubliko nga mga lugar, ha diri-pormal nga paagi, ngan ha mga lugar han negosyo. Kon ginkukultibar naton yana an kaisog ha pagsangyaw, magigin andam gud kita nga padayon nga magsangyaw bisan kon igdiri an aton buruhaton.​—1 Tes. 2:1, 2.

14-15. Ano nga mga leksyon an aton mahibabaroan ha ehemplo nira Nancy Yuen ngan Valentina Garnovskaya?

¹⁴ May mahibabaroan kita ha ehemplo han duha nga matinumanon nga sister nga nagpakita  hin makatirigamnan nga kaisog. Hi Nancy Yuen diri malahos hin mga lima ka piye (1.5 m) an kahitaas, pero diri hiya basta-basta nga nahahadlok. * Nagdumiri hiya pag-undang ha pagsangyaw han maopay nga sumat han Ginhadian han Dios. Tungod hito, ginpriso hiya hin mga 20 ka tuig ha Komunista nga China. An mga opisyal nga nag-imbistigar ha iya nagsiring nga hiya an “pinakamatig-a an ulo nga tawo” ha ira nasud!

¹⁵ Hi Valentina Garnovskaya napriso liwat ha Unyon Sobyet hin tulo ka beses ngan inabot hin 21 ka tuig. * Kay ano? Kay determinado gud hiya nga padayon nga magsangyaw salit gintawag hiya han mga opisyal sugad nga “usa nga peligroso gud nga kriminal.” Kay ano nga nagin maisugon gud inin duha nga matinumanon nga sister? Kombinsido hira nga kaupod nira hi Jehova.

16. Ano an yawi han tinuod nga kaisog?

¹⁶ Sugad han nahisgotan na, basi makultibar an dugang nga kaisog, diri kita sadang magpokus ha aton kalugaringon nga kusog ngan abilidad. Lugod, kinahanglan tumoo kita nga kaupod naton hi Jehova ngan hiya an nakikig-away para ha aton. (Deut. 1:29, 30; Zac. 4:6) Ito an yawi han tinuod nga kaisog.

17-18. Sumala ha Juan 15:18-21, ano an iginpahamangno ha aton ni Jesus? Isaysay.

¹⁷ Nalilipay kita kon ginrirespeto kita han iba, pero diri naton angay hunahunaon nga an aton bili nakadepende kon mationan-o kita ka popular. Hi Jesus nagsiring: “Malipayon kamo kon an mga tawo nangangalas ha iyo, ngan kon iginsasalikway nira kamo ngan ginpapakaalohan kamo ngan iginpapahayag nga maraot an iyo ngaran tungod han Anak han tawo.” (Luc. 6:22) Ano an karuyag sidngon ni Jesus?

¹⁸ Diri iginpapasabot ni Jesus nga an mga Kristiano malilipay kon ginkakangalasan hira. Lugod, reyalistiko la hiya. Diri kita bahin han kalibotan. Nagkikinabuhi kita uyon han katutdoan ni Jesus ngan iginsasangyaw naton an mensahe nga iya iginsangyaw. Tungod hito, an kalibotan nangangalas ha aton. (Basaha an Juan 15:18-21.) Karuyag naton lipayon hi Jehova. Kon nangangalas  an mga tawo tungod kay hinigugma naton an aton Amay, problema na nira ito.

19. Paonan-o naton masusubad an ehemplo han mga apostol?

¹⁹ Ayaw gud tuguti nga ikaawod mo an pagin Saksi ni Jehova tungod han ginsisiring o ginbubuhat han mga tawo. (Mic. 4:5) Mahibabaro kita kon paonan-o dadaugon an kahadlok ha tawo pinaagi ha pagkonsiderar han ehemplo nga iginpakita han mga apostol ha Jerusalem katapos gud la patayon hi Jesus. Maaram hira nga nangangalas ha ira an mga lider han relihiyon han mga Judio. (Buh. 5:17, 18, 27, 28) Bisan pa hito, kada adlaw hira napakadto ha templo ngan iginpapakilala nira ha publiko nga mga disipulo hira ni Jesus. (Buh. 5:42) Waray hira magpadaog ha kahadlok. Madadaog liwat naton an kahadlok ha tawo pinaagi han aton pirme pagpakilala nga mga Saksi kita ni Jehova​—ha trabaho, ha eskwelahan, ngan ha aton mga amyaw.​—Buh. 4:29; Roma 1:16.

20. Kay ano nga malipayon an mga apostol bisan kon ginkakangalasan hira?

²⁰ Kay ano nga malipayon an mga apostol? Maaram hira kon kay ano nga ginkakangalasan hira, ngan ginhunahuna nira nga dungog nga maltratuhon hira tungod ha pagbuhat han kaburut-on ni Jehova. (Luc. 6:23; Buh. 5:41) Ha urhi, hi apostol Pedro nagsurat: “Bisan kon mag-antos kamo tungod han katadongan, malipayon kamo.” (1 Ped. 2:19-21; 3:14) Kon nasasabtan naton nga ginkakangalasan kita tungod ha pagbuhat han husto, diri gud naton tutugotan nga mapaundang an aton pag-alagad tungod han kangalas han mga tawo.

21-22. (a) Ano an imo bubuhaton sugad nga pagpangandam para ha pagtimaraot? (b) Ano an aton hihisgotan ha sunod nga artikulo?

²¹ Diri kita maaram kon san-o magtitikang an pagtimaraot o kon san-o igdidiri an aton pagsingba kan Jehova. Pero, maaram kita nga mahimo kita makapangandam yana pinaagi ha pagparig-on han aton relasyon kan Jehova, pagkultibar hin dugang nga kaisog, ngan paghibaro han aton bubuhaton kon ginkakangalasan kita han mga tawo. An aton pagpangandam yana mabulig ha aton nga makatindog hin marig-on ha tiarabot nga mga adlaw.

²² Pero ano man kon igdiri na an aton pagsingba? Ha sunod nga artikulo, hihisgotan naton an mga prinsipyo nga mabulig ha aton nga padayon nga makag-alagad kan Jehova bisan pa han pagdiri.