1. Why we need to prepare for suffer?

FOR the night before they kill our Lord Jesus, e talk say people go hate all e disciples. All e disciples choose to be e disciples by theirself. (John 17:14) From that time come reach our time, people don de suffer faithful Christians. This people dey against true worship. (2 Tim. 3:12) As we de near the end of this world, we expect say our enemies go de give us trouble more-more.​—Matt. 24:9.

2-3. (a) Wetin we suppose to know about fear? (b) Wetin we go learn for this topic?

² How we fit prepare ourself now to face suffer from people? We no need to try de think about all the bad things wey people fit do to us. If we do like that, the fear and worry-worry go too much for us. If we begin think about the bad things wey we fit face for future, this one fit make us fear sotey we fit stop to serve Jehovah even before the real suffer come. (Prov. 12:25; 17:22) Fear na powerful weapon wey our “enemy, the Devil” de try to use fight us. (1 Pet. 5:8, 9) Wetin we fit do now to make ourself dey strong?

³ For this topic, we go talk about how we fit make our friendship with Jehovah strong more-more. We go learn why e dey important make we do like that now. We go see wetin we fit do to make our heart strong more-more. And the last thing wey we go talk about na, the thing wey we go fit do when people hate us.

4. According to Hebrews 13:5, 6, wetin we need to believe, and why?

⁴ Make you really believe say Jehovah love you and say e no go ever abandon you. (Read Hebrews 13:5, 6.) Many years ago,  Watchtower talk say: “If person really know God well, e go really trust [God] when suffer come.” This one na true! If we want endure suffer from people, we need to love and get complete trust for Jehovah. And make we no ever doubt say Jehovah care about us.​—Matt. 22:36-38; Jas. 5:11.

5. Wetin go help you feel the love wey Jehovah de show you?

⁵ Read Bible everyday and make your reason be to make your friendship with Jehovah de strong. (Jas. 4:8) As you de read, try to learn about the fine-fine character wey Jehovah get. Try to understand the kind strong love wey God get for you, as you de read about the things wey e talk and do. (Ex. 34:6) Some people de find-am hard to believe say God love them. Na so because person never really show them love before. If you de feel like that, make you try write list of different-different way wey Jehovah don care for you and show you pity. Make you do this one everyday. (Ps. 78:38, 39; Rom. 8:32) As you think about your own experience and the things wey you read for Bible, this one fit make you get list of plenty things wey Jehovah don do for you. The more you de value the things wey Jehovah de do, the more wuna friendship go really strong.​—Ps. 116:1, 2. 

6. According to Psalm 94:17-19, when you de pray from your heart, how e fit help you?

⁶ Pray everytime. Think about one young boy wey e papa hug because e love the boy. The boy really feel safe as e dey with e papa. Because of this one, e no fear as e de tell e papa the way things happen that day, both good things and bad things. You fit still enjoy that kind of friendship with God when you de pray from your heart to God everyday. (Read Psalm 94:17-19.) As you de pray to Jehovah, “pour everything for your heart come out like water.” When things de make you fear or de worry you, make you tell your Papa Jehovah; e love you. (Lam. 2:19) Wetin go be the result? You go experience wetin Bible call “the peace wey God de give. . . . This peace pass anything wey person fit understand.” (Phil. 4:6, 7) The more you de pray like this, the more your friendship with Jehovah go de tight.​—Rom. 8:38, 39.

7. Why we need to really believe say the things wey God promise about e Kingdom go happen?

⁷ Make you really believe say the things wey God promise about e Kingdom go happen. (Num. 23:19) If your faith for this things no dey strong, na easy thing for Satan and e servants to make you fear. (Prov. 24:10; Heb. 2:15) How you fit make your faith for God’s Kingdom dey strong now? Make you study about the things wey God don promise about e Kingdom. Make you still study why you fit really dey sure say this things go happen. How that one go fit help you? Make we talk about the example of Stanley Jones. This brother be dey for prison for seven years because of e faith. *  Wetin help Brother Jones to endure and dey faithful? E talk say: “My faith strong because I know about God’s kingdom and I dey sure about the things wey [the kingdom] go do. I no doubt-am at all. And so nobody fit make me leave Jehovah.” If you get strong faith for the things wey God don promise, your friendship with God go de strong more-more. And you no go allow fear to make you stop to serve Jehovah.​—Prov. 3:25, 26.

8. Wetin we fit learn about ourself when we check how we de feel when time reach for meeting? Explain.

⁸ Always de attend Christian meeting. Our meeting de help us get tight friendship with Jehovah. The way we de feel when time reach to attend meeting go help us see whether we go fit really endure suffer for future. (Heb. 10:24, 25) Why we fit talk like that? If we allow small-small problem to make us stop to attend meeting now, wetin go happen for future if we need to put ourself for danger so that we go fit meet with other brothers and sisters? But, if we make up our mind to always attend meeting, we no go stop when people de try to stop us make we no meet with our brothers and sisters. Na now be the time for us to get love for our meeting more-more. If we really like to always attend meeting, nobody go fit stop us because na God we go obey, no be people. Even if government put law, we no go stop.​—Acts 5:29.

9. Why e be say if we de cram different-different Bible verse, na fine way to prepare for suffer from people?

⁹ Try to cram the Bible verse them wey you like. (Matt. 13:52) Na true say your brain no dey perfect. But Jehovah go fit use e powerful holy spirit to help you remember those Bible verse. (John 14:26) Make we see the example of one brother wey they put for prison for East Germany. They lock this brother for place wey nobody go dey. E talk say: “I really glad say before that time, I don cram hundreds of Bible verse for head! Even though say na only me dey, I dey busy de think about plenty Bible topic.” Those Bible verse help our brother continue to be friend of Jehovah, to endure the problem and dey faithful.

10. Why e good make we cram songs?

¹⁰ Cram our songs and sing them to praise Jehovah. When they put Paul and Silas for prison for Philippi, they sing songs wey they don already cram to praise Jehovah. (Acts 16:25) For the same way, when they carry our brothers for former Soviet Union go Siberia, wetin they do so that they fit dey strong? Sister Mariya Fedun remember how things happen that time. E  talk say: “We sing all the songs wey we know, the songs from inside the songbook.” The sister talk say the songs encourage all of them and help them dey tight with Jehovah. You no de feel strong when you sing the songs wey you like to praise Jehovah? If na so, cram the songs now!​—Check the box “ Make My Heart Strong.”

11-12. (a) According to 1 Samuel 17:37, 45-47, wetin give David strong heart? (b) Which important lesson we learn from the example of David?

¹¹ You need strong heart to fit endure suffer from people. If you feel say you no get strong heart, wetin you fit do? Remember say, no be the size of your body, the power wey you get, or the thing wey you fit do, go fit make your heart really strong. Make we talk about the example of young David when e face Goliath. If you compare David with that giant, you go see say David small for body, e no strong like the giant, and e no get better things to use fight. David no even get sword. Even with that one, e heart really dey strong. E run go attack that proud giant.

¹² Wetin give David that kind strong heart? Jehovah dey with David and David really believe this one. (Read 1 Samuel 17:37, 45-47.) Goliath big pass David if you compare the two of them; but no be that one David begin think about. Instead, e think about how tiny Goliath be, if you compare Goliath with Jehovah. Wetin we learn from this story? We go get strong heart if we trust say Jehovah dey with us. And our heart go dey strong if we really believe say our enemies no reach anything if we compare them with the Almighty God. (2 Chron. 20:15; Ps. 16:8) How we fit make our heart strong more-more now, even before suffer come?

13. How we fit make our heart strong more-more? Explain.

¹³ We fit make our heart strong more-more now if we de preach the good news of the Kingdom. Why we talk so? Na because when we de preach, we de learn how to trust Jehovah and how we no go de fear people. (Prov. 29:25) When we de do exercise, our muscles de strong more. For the same way, our heart de strong more when we de preach from house to house, for open place, for informal witnessing, and for business territory. If we make our heart strong to preach now, we go dey ready to preach even if government stop our work.​—1 Thess. 2:1, 2. 

14-15. Which lessons we fit learn from Nancy Yuen and Valentina Garnovskaya?

 ¹⁴ We fit learn plenty things from the example of two faithful sisters. This sisters show say they really get strong heart. One of them na Nancy Yuen. This sister just dey about five feet (1.5 m) for height, but person no go fit make fear catch this sister just like that. * The sister no gree stop to preach the good news about the Kingdom wey God get. Because of this one, they put the sister for prison for more than 20 years for Communist China. The government people question the sister and they talk say this sister na “the most stubborn person” for their country!

¹⁵ The name of the other sister na Valentina Garnovskaya. They put this sister for prison for former Soviet Union (Russia), for three different times. Altogether, Sister Garnovskaya spend 21 years for prison. * Why? The sister don make up e mind to always preach sotey government people describe our sister as “very bad criminal.” Wetin make this two faithful women get that kind strong heart? They really believe say Jehovah dey with them.

16. Wetin we need if we want really get strong heart?

¹⁶ As we don talk before, if we want get strong heart more-more, we no go trust our own power and the things wey we fit do. Instead, we go believe say Jehovah dey with us and e de fight for us. (Deut. 1:29, 30; Zech. 4:6) That one na wetin go make our heart really dey strong.

17-18. As e dey for John 15:18-21, which warning Jesus give us? Explain.

¹⁷ We like-am if people respect us, but make we no think say we dey useless if people no like us. Jesus talk say: “Wuna go dey happy when people hate wuna, when they drive wuna from their group, when they insult wuna, and when they talk wicked thing about wuna because of the Son of man.” (Luke 6:22) Wetin Jesus mean?

¹⁸ Jesus no de talk say Christians go enjoy-am  when people hate them. Instead, e de warn us about wetin fit happen to us. We no dey part of the world. We de do the things wey Jesus teach for Bible, and we de preach the message wey e preach. Na because of this one the world hate us. (Read John 15:18-21.) We want make Jehovah dey happy with us. If people hate us because we love our Papa Jehovah, that one na their problem.

19. How we fit imitate the example of the apostles?

¹⁹ No allow anything wey ordinary people talk or do to make you shame say you be Jehovah Witness. (Mic. 4:5) If we de fear people, we fit learn how to handle-am. Make we see the example of the apostles for Jerusalem just after people kill Jesus. The apostles know say the leaders for Jew religion really hate them. (Acts 5:17, 18, 27, 28) But everyday, they no stop to go the temple and they show say they be disciples of Jesus. They no hide-am. (Acts 5:42) They no allow fear make them stop. For the same way, if we de fear people, we fit fight the fear and win that fear. How? Make we de show people say we be Jehovah Witness, whether we dey for work, for school, or for the area wey we de live.​—Acts 4:29; Rom. 1:16.

20. Why the apostles de glad even though say people hate them?

²⁰ Why the apostles de glad that time? They know why they hate them, and they see-am as special thing for people to treat them anyhow because them de do wetin Jehovah want. (Luke 6:23; Acts 5:41) After some time, apostle Peter write say: “Even if wuna suffer because wuna de do wetin dey righteous, wuna dey happy.” (1 Pet. 2:19-21; 3:14) When we understand say people hate us because we de do the right thing, we no go ever stop to serve Jehovah because people hate us.

21-22. (a) Wetin you don decide say you go do to prepare for suffer from people? (b) Wetin we go talk about for the next topic?

²¹ We no know when people go begin suffer us, or even when government go try to stop our work. But, we know say we fit prepare now if we make our friendship with Jehovah dey strong, we make our heart strong more, and we learn how to handle hatred from people. The way we prepare now go help us stand strong for future.

²² But what if government stop our work? Some things for Bible fit guide us so that we go fit continue to serve Jehovah even for that condition. We go talk about this things for the next topic.