1. მუშენ ოკო მივემზადათ თხოზინშო?

ღურაშ წოხოლენ სერს, ჩქინ უფალ იესო ქრისტექ თქუ, ნამდა არძას, მით გინოჭყვიდუნდჷ გინირთკო თიშ მოწაფეთ, გიჯოგუანდეს (იოან. 17:14). თი დროშე მოჸუნაფილ იეჰოვაშ მოწმეეფს თხოზნა ჭეშმარიტ თაყვანიშმცემლობაშ მოწინააღმდგეეფ (2 ტიმ. 3:12). მიჩქნა, ნამდა მუთ უმოსო მივანჭუაფუთ ქვეყნიერებაშ აღსასრულშა, თით უმოსო ქიმეწინააღმდეგებნა ჩქინ ნტერეფ (მათ. 24:9).

2, 3. ა) მუ ოკო მიჩქუდან შიშიშ გურშენ? ბ) მუს გუვარჩიენთ თე სტატიას?

² მუჭო შემლებნა ასეშე მივემზადათ თხოზინშო? თეშო საჭირო ვა რე წერმიბდგინათ ირფელ, მუდგაქ შილებე ქუმოხვადას, მუშენდა თაშ ქიმიფქცით-და, შილებე თეშ დოფშკურდათ, მივოტუათ ღორონთიშ მსახურება, სოიშახ თეცალ გამოცდაშ წოხოლე გებდირთუთ (იგავ. 12:25; 17:22). შიშ ართ-ართ ძლიერ იარაღ რე, ნამუსით ჩქინ ნტერ, ეშმაკი, ჩქინ წინააღმდეგ გიმირინუანს (1 პეტ. 5:8, 9). მუშ კეთება შემლებნა ასე, ნამდა მზათ ვორდათ თხოზინშო?

³ თე სტატიას გუვარჩიენთ, მუშ კეთება შემლებნა, ნამდა უმოსო დევეახლოვათ იეჰოვას დო მუშენ რე თეშ კეთება განსაკუთრებულო მნიშვნელოვან ამდღა. თეწკუმა ართო, ქობძირუნთ, მუჭო შემლებნა უმოსო გუვავითარათ გაბედულება. დო ბოლოს გუვარჩიენთ, მუჭო შემლებნა მიფქცუათ, მუჟამსით ფთხოზნა.

4. მუჭოთ ებრაელეფიშ 13:5, 6-ის ჭარუნ, მუშა ოკო ვორდათ დარწმუნებულ დო მუშენ?

⁴ დარწმუნებულ რდათ, იეჰოვას უჸორთ დო თინა დღას ვემგოტენა (წეკითხით ებრაელები 13:5, 6). „გინაჯინალ კოშკიშ“ ართ ჯვეშ გიშაშკუმალას ჭარუდ: „პიროვნება, ნამუთ ღორონც  ჯგირო იჩინენს, განსაცდელეფიშ დროს თის მიენდებ“. თენა ნამდვილო თაშ რე! თხოზინიშ დროს ართგურეფქ ქუდოფსკიდათინ, მიჸორდან დო სრულაშე ოკო ვონდუდათ იეჰოვას დო დღას ვედმეეჭვან, ნამდა მიმეხვარებნა (მათ. 22:36—38; იაკ. 5:11).

5. მუ მიგეხვარებნა, ქიგინათ იეჰოვაშ ჸოროფა?

⁵ მიზანო გიღდან, ირდღას წეკითხათ ბიბლია, ნამდა დეახლოვათ იეჰოვას (იაკ. 4:8). კითხირიშ დროს, ყურადღება ქიმიაქცით იეჰოვაშ თვისებეფს. ქიდეკვირით მუჭო იძირე თიშ სიტყვეფშე დო საქმეეფშე, ნამდა უჸორთ (გამ. 34:6). ნამთინეს შილებე ვა ჯერდას, ნამდა ღორონც უჸორს თინა, მუშენდა მუშ მიმართ დღას ვაგმურჩქინუ მითინს ჸოროფა. თქვა ხოლო თაშ ქორეთ-და, ქეცადით ირდღას დოჭარათ, მუჭო გიმირჩქინ იეჰოვაქ ჭყოლოფა დო ჯგირობუა თქვანწკუმა დღაშ განმავლობას (ფსალმ. 78:38, 39; რომ. 8:32). მუჟამსით ჯგირო ქიდეკვირებუთ თქვან ცხოვრებას დო ქიფიქრენთ ნაკითხერშე, უმოსო შეგალებენა ქოძირათ, მუზმა მუდგარენს ორთჷ იეჰოვა თქვანო. თე ირფელშე მარდულ ქიჸუაფუთ-და, თენა უმოსო დუგაახლოვენა იეჰოვას (ფსალმ. 116:1, 2).

6. ფსალმუნიშ 94:17—19-შ თანახმათ, მუჭო შეულებ მთელ გურით ლოცვას თქვან მოხვარა?

⁶ რეგულარულო ილოცით. წერმიდგინით ახალგაზრდა ბოშ, ნამუთ მუშ მოჸოროფე მუმას გურშა აფჷ ხუტოლაფირ. თინა გინაფლენს მუმაშ ჸოროფას დო ონდჷ თის, ათეშენ თავისფალო ეჩიებ მუმას დღაშ დინახალე მოხვალამირ მუჭოთ ჯგირ, თეშ გლახა ამბეეფს. თქვა ხოლო შეილებნა თეცალ ურთიერთობა გიღუდან იეჰოვაწკუმა, მუჟამსით ირდღას მთელ გურით რაგადებულ ლოცვაშ საშვალებათ დეახლოებუთ თის (წეკითხით ფსალმუნი 94:17—19). ლოცვას გურ გეგნუფაჩით დო ქეჩით თქვან მოჸოროფე მუმას არძა თქვან ოწუხებელ დო თინა ხოლო, მუშ შიშ გიღნა (გოდ. 2:19). შედეგო, მიღენთ ღორონთიშ მშვიდობას, „ნამუთ ირნერ აზრიშე უმოს რე“ (ფილ. 4:6, 7). მუჟამსით რეგულარულო ქილოცენთ, უმოს ხოლოს იგინანთ დუც იეჰოვაწკუმა (რომ. 8:38, 39).

7. მუშენ ოკო დერწმუნე, ნამდა თი დუნაპირებუეფს, ნამდგას ღორონთ მუშ სამეფოშ საშვალებათ მოპირნა, ნამდვილო შეასრულენს?

⁷ დარწმუნებულ რდათ, ღორონთიშ სამეფო კურთხევეფს მოიღანა (რიცხ. 23:19). მუჟამსით თეშა დარწმუნებულ ვეჸით, სატანა დო თიშ მიმაჸუნალეფ ადვილო დუგოშკურნუანა (იგავ. 24:10; ებრ. 2:15). მუჭო შეილებნა ასეშე გემანგარათ ღორონთიშ სამეფოშ რწმენა? დრო გეგმურთით თიშ გიმორკვიებას, მუს მოპირნა ღორონთ მუშ სამეფოშ საშვალებათ დო მუშენ შეილებნა დარწმუნებულ რდათ, ნამდა ღორონთიშ სამეფო ნამდვილო ქუმურს. მუჭო მიმეხვარებნა თენა? გუვარჩუათ ართ ჯიმაშ, სტენლი ჯოუნზიშ მაგალით, ნამუთ რწმენაშ გურშენ 7 წანას ხედჷ ციხეს. * მუქ მეხვარ თის, ბოლოშა ართგურ ჸოფედკო? თინა იჩიებ: „მა ძლიერ რწმენა მიღუდ, მუშენდა მიჩქუდ, მუ რდუ ღორონთიშ სამეფო დო მუს მოუღანს თინა კაცობრიობას. თენა დღას ვა მოეჭვუდ,  ათეშენ მითინს ვეშიალებუ, მიმოტებაფუკო იეჰოვაშ მსახურება“. მუჟამსით ღორონთიშ დუნაპირებუეფიშ ძლიერ რწმენა გაღვენუნა, თენა უმოსო დუგაახლოვენა იეჰოვაწკუმა დო ვართ მუთუნნერ შიშ მიგერიებნა (იგავ. 3:25, 26).

8. მუ იძირე კრებაშ შეხვალამეფიშ მიმართ ჩქინ დამოკიდებულებაშე? გენწყით.

⁸ რეგულარულო ქიდესწრით ქრისტიანულ შეხვალამეფს. შეხვალამეფ მოხვარნა, დევეახლოვათ იეჰოვას. თეწკუმა ართო, კრებაშ შეხვალამეფიშ მიმართ ჩქინ დამოკიდებულებაშე იძირე, მუჭო შეფხვადუთ თი წინააღმდეგობეფს, ნამუთ მომავალს მელნა (ებრ. 10:24, 25). მუშენ შემლებნა თეშ რაგად? ამდღა კრებაშ შეხვალამას უბრალო მიზეზეფიშ გურშენ ქუვოჩილითუანთ-და, მუჭო მიფქციებუთ, მუჟამსით კრებაშ დასწრებელო შილებე ჩქინ დუდქ საფრთხეშა მაჸუან ინაჸათამალქ? მტკიცაშო ქუმაფნა გინოჭყვიდილ კრებეფ ვაგვოჩილითუათ-და, ვემვოტენთ დასწრებას თიმწკუმა ხოლო, მუჟამსით მოწინააღმდეგეეფ ქეცადებნა, ქიმეცილან ართო აკოშაყარუას. ამდღა რე თიშ დრო, ქიპჸოროფუათ კრებაშ შეხვალამეფ. მუჟამსით მიჸორა კრებაშ შეხვალამეფშა დასწრება, ვართ წინააღმდეგობას დო ვართ მთავრობაშ აკრძალვას ვეშიალებე მიმოტებაფუან ღორონთიშ მსახურება (საქ. 5:29).

9. მუშენ რე ბიბლიურ მუხლეფიშ დამახსოვრება ჯგირ საშვალება, ნამდა მივემზადათ წინააღმდეგობეფშო?

⁹ ქიდემახსოვრით თი ბიბლიურ მუხლეფ, ნამუთ არძაშ უმოსო მორწონა (მათ. 13:52). მართალ რე, სრულყოფილ მეხსიერება ვა მიღნა, მარა იეჰოვა მუშ წმინდა შურიშ საშვალებათ მიმეხვარებნა, საჭირო დროს ქუგმოშინან დამახსოვრებულ ბიბლიურ მუხლეფ (იოან. 14:26). ართ ჯიმა, ნამუთ აღმოსავლეთ გერმანიას ციხეს, კარცერს ხედჷ, იჩიებ: „მუ ჯგირქ იჸუ ჩქიმო, ნამდა ბრელ ბიბლიურ მუხლი მიჩქუდ ზეპირო. მართალ რე, საკანს ხვალე ვორდჷ, მარა ბრელ დრო მიღუდ, იფიფქრიკო ბიბლიურ თემეფშე“. ბიბლიურ მუხლეფიშ ზეპირო რჩქინაქ მეხვარ თე ჯიმას, უმოსო დეახლოვკო იეჰოვას დო თიშ ართგურქ ქუდოსკიდკო.

10. მუშენ ოკო დიბგურუათ იეჰოვაშ ოდიდებელ ობირეშეფი?

¹⁰ ქიდემახსოვრით დო ქიბირით იეჰოვაშ ოდიდებელ ობირეშეფი. მუჟამსით პავლე დო სილა ციხეს ხედეს, იეჰოვაშ ოდიდებელ ობირეშეფს იბირდეს, ნამუთ ზეპირო უჩქდეს (საქ. 16:25). თეშნერო, საბჭოთა კავშირიშ დროს ციმბირშა გინოხორაფილ ჩქინ და დო ჯიმალეფ ხოლო ობირეშეფით იმანგარენდეს რწმენას. ართ და, მარია ფედუნ იშინანს: „ჩქი არძა თი ობირეშის იბიბრდით, ნამუთ  ზეპირო ფშუდეს ობირეშეფიშ წიგნშე“. თინა იჩიებ, ნამდა თე ობირეშეფქ გურშა ელუკინ თინეფს დო მეხვარ უმოსო დეახლოვესკო იეჰოვას. თქვა ხოლო ქოგინაფლენთო თეშნერო დუც, მუჟამსით თქვან საჸოროფო ობირეშის იბირთ? ქეცადით, ასეშე ქიდიგურუათ მუსხირენ ობირეშ ზეპირო! (ქოძირით ჩარჩო „ გაბედულო გინმორთინე“.).

11, 12. ა) 1 სამუელიშ 17:37, 45—47-იშ თანახმათ, მუქ მეხვარ დავითის ჸოფედკო გაბედულ? ბ) მუ მნიშვნელოვან გაკვეთილს ბგურაფლენთ დავითიშ მაგალითშე?

¹¹ თხოზინიშ დროს გაბედულება დეგესაჭირებნა. მუშ კეთება შეილებნა, მუჟამსით ფიქრენთ, ნამდა გაბედულება გორკნა? ირიათო რშუდან, ნამდა ნამდვილ გაბედულება დამოკიდებულ ვა რე თქვან ძალა დო შესაძლებლობეფშა. მორთ გუვარჩუათ ახალგაზრდა დავითიშ მაგალით, ნამუქით გოლიათიშ წინააღმდეგ გიშართჷ. გოლიათიშ გინაწონს, დავით მეჯინელო ჭიჭე დო სუსტ რდუ დო ვართ მუთუნნერ იარაღ უღუდ. მართალ რე, თის ყამა ხოლო ვა უღუდ, მარა მანგარ გაბედულ რდუ. დავითის ვაშკურნებ დო გიშელ ამაყ გოლიათიშ წინააღმდეგ.

¹² მუშენ რდუ დავით თეცალ გაბედულ? თის ჯერდჷ, ნამდა იეჰოვა რდუ თიწკუმა (წეკითხით 1 სამუელი 17:37, 45—47). დავითის თიშა ვაფუდ ყურადღება გინოღალირ, ნამდა მუშმადიდა რდუ გოლიათ მუშ გინაწონს; თეშ მანგიორო, ფიქრენდჷ, მუ აკაბურხცა რდუ თინა იეჰოვაშ კარს. მუშ გურაფა შემლებნა დავითიშ მაგალითშე? გაბედულო იბგინანთ დუც, მუჟამსით დარწმუნებულ იპჸით, ნამდა იეჰოვა ჩქინწკუმა რე დო ჩქინ ნტერეფ ირფელიშშემალებე ღორონთიშ გინაწონს აკაბურცხეფ რენა (2 მატ. 20:15; ფსალმ. 16:8). მუჭო შემლებნა ასეშე გუვავითარათ გაბედულება?

13. მუშ კეთება შემლებნა, ვორდათ უმოს გაბედულეფ? გენწყით.

¹³ ღორონთიშ სამეფოშ გურშენ სახიოლო ამბეშ ქადაგება მიმეხვარებნა, ვორდათ უმოს გაბედულ, მუშენდა ქადაგება მოგურუანა, მივენდათ იეჰოვას დო გივორჯგინათ კოჩიშ შიშის (იგავ. 29:25). მუჭოთ კუნთეფ იმანგარებ ბრელ ვარჯიშიშ შედეგო, თეშნერო, ჩქინ გაბედულება ხოლო იმანგარებ, მუჟამსით კარდოკარ, საზოგადოებრივ ადგილეფს, არაფორმალურო დო ვარ საქმიან უბანეფს ფქადაგენთ. გაბედულებას ამდღარშე ქუვავითარენთ-და, მომავალს მზათ იპჸუაფუთ აკრძალვეფიშ უმკუჯინუო, ვემვოტუათ ქადაგება (1 თეს. 2:1, 2).

14, 15. მუს ბგურაფლენთ ნენსი იუენი დო ვალენტინა გარნოვასკაიაშ მაგალითეფშე?

¹⁴ ჩქი გაბედულებაშ გიმორჩქინაშ ჯგირ  მაგალით მუჩეს ჟირ ართგურ დაქ. თინეფიშ შემთხვევეფშე მნიშვნელოვან გაკვეთილს ბგურაფლენთ. ნენსი იუენი სიმაღლეთ გვალო მეტრა დო გვერდ რდუ, მარა ადვილო ვა შკურდუდ. * აკრძალვეფიშ უმკუჯინუო, თიქ ვემიოტუ სახიოლო ამბეშ ქადაგება. ათეშგურშენ თინა ოჭოფეს დო ჩინეთის კომუნისტურ რეჟიმიშ დროს 20 წანაშე მეტ ხანს ხედჷ ციხეს. ხელისუფლებაშ წარმომადგენლეფქ, მიდგას თე და დაკითხვაშა გეურდეს, თქუეს, ნამდა თინა „არძაშ უმოს ჯიუტ პიროვნება“ რდუ თინეფიშ ქიანას.

¹⁵ ვალენტინა გარნოვსკაია ხოლო ყოფილ საბჭოთა კავშირს სუმშა ჭოფეს დო გვალო სოდგარენ 21 წანას ხედჷ ციხეს. * მუ რდუ თეშ მიზეზ? თის გინოჭყვიდილ აფუდ, დღას ვემიოტუკო სახიოლო ამბეშ ქადაგება, ათეშენ ხელისუფლებაშ წარმომადგენელეფ თის „განსაკუთრებულო საშიშ დამნაშავეთ“ მიშინუანდეს. მუშენ რდეს თე ართგურ დალეფ თეცალ გაბედულეფ? თინეფ დარწმუნებულ რდეს, ნამდა იეჰოვა რდუ თინეფწკუმა.

16. მუ მიმეხვარებნა ნამდვილ გაბედულებაშ გავითარებას?

¹⁶ მუჭოთ ჟიშე მიფშინეთ, გაბედულეფქ ქიპჸუათინ, ჩქინ ძალა დო უნარს ოკო ვემვენდათ. თეშ მანგიორო, ოკო ბჯერდან, ნამდა იეჰოვა ჩქინწკუმა რე დო თინა იბრძოლენს ჩქინ გურშენ (კან. 1:29, 30; ზაქ. 4:6). თენა ნამდვილ გაბედულებას ქომჩანა.

17, 18. მუ გაფრთხილებას მარზენა იესო იოანეშ 15:18—21-ის? გენწყით.

¹⁷ მუშო ოკო რაგად, მობწონა, მუჟამსით შხვეფ პატიცემათ მოქცუნა, მარა ირკოჩის ვა მობწონთ-და, დუდ უღირსო ოკო ვებგინათ. იესოქ თქუ: „ბედნერეფ რეთ, მუჟამსით ხალხის ჯოგუთ, ვემკოინჭანა, რლანძღუნა დო თქვან სახელს უბადოთ მირჩქინანა კოჩიშ სქუაშ გურშენ“ (ლუკ. 6:22). მუს გულისხმენდჷ იესო?

¹⁸ იესოს ვა უთქუალ, ნამდა ქრისტიანეფს მეწონებდეს, მუჟამსით თინეფს გოლანძღუნდეს. მარა თიქ გუმაფრთხილეს თიშო, მუდგაქ შილებედ რეალურო ქუმოხვადკო. ჩქი ვა ვორეთ ქვეყნიერებაშ ნაწილ, მუშენდა მეპჸუნთ ქრისტეშ მითითებეფს დო  ხალხის სახიოლო ამბეს გინოფჩანთ, ნამდგაშ გურშენ იესო ქადაგენდჷ. ზუსტას ათეშენ ბჯოგუთ ქვეყნიერებას (წეკითხით იოანე 15:18—21). ჩქი მოკონა, გურ გუხარათ იეჰოვას, მუშენდა მიჸორა ჩქინ ზეციერ მუმა დო ხალხის თეშ გურშენ ქობჯოგუთ-და, თენა თინეფიშ პრობლემა რე.

19. მუჭო შემლებნა მივაჸუნათ მოციქულეფიშ მაგალითის?

¹⁹ დღას ვა დუშვათ, შხვეფიშ ნარაგადიშ ვარდა საქციელიშ გურშენ ონჯღორექ დუგაგურან თიშ რაგადშა, ნამდა იეჰოვაშ მოწმე რეთ (მიქ. 4:5). თი მოციქულეფიშ მაგალითეფშე დაფიქრება, მიდგაქ იესოშ ღურაშ უკულ იერუსალიმს გაგრძელეს მსახურება, მიმეხვარებნა გივორჯგინათ კოჩიშ შიშის. მოციქულეფს უჩქდეს, მუშმანწარათ ჯოგდეს იუდეველ რელიგიურ ლიდერეფს თინეფ (საქ. 5:17, 18, 27, 28). მარა იშენით ირდღას გილეშეს ტაძარშა დო სახალხოთ აცხადენდეს, ნამდა იესოშ მოწაფეეფ რდეს (საქ. 5:42). თინეფქ შიშის ვენოლეს. ჩქი ხოლო შემლებნა გივორჯგინათ შიშის, მუჟამსით ირდიხას — სამუშას, სკოლას ვარდა სამეზობლოს გუვაცხადენთ, ნამდა იეჰოვაშ მოწმეეფ ვორეთ (საქ. 4:29; რომ. 1:16).

20. მუშენ რდეს მოციქულეფ ბედნერეფ, თიშ უმკუჯინუო, ნამდა შხვეფს ჯოგდეს?

²⁰ მუშენ რდეს მოციქულეფ ბედნერეფ? თინეფს უჩქდეს, ნამდა იეჰოვაშ ნებაშ შესრულებაშ გურშენ ჯოგდეს შხვეფს დო თეს დიდ პატით მირჩქინანდეს (ლუკ. 6:23; საქ. 5:41). მოციქულ პეტრექ უმოს გვიანო ჭარჷ: „სიმართლეშ გურშენ ქიტანჯებუთ-და, იშენით ბედნერეფ რეთ“ (1 პეტ. 2:19—21; 3:14). მუჟამსით მარჩქილენა, ნამდა შხვეფს სწორას მოქციებაშ გურშენ ბჯოგუთ, დღას ვენობლუთ შიშის დო ვემვოტენთ იეჰოვაშ მსახურებას.

21, 22. ა) მუჭო გაფნა გინოჭყვიდილ, მემზადათ წინააღმდეგობეფშო? ბ) მუს გუვარჩიენთ თეშ უკულიან სტატიას?

²¹ ჩქი ვამჩქუნა, მუჟამ დოდირთუ თი დრო, მუჟამსით ხალხ გამმათხოზუნა ვარდა მთავრობა ამკრძალენა იეჰოვაშ თაყვანიშცემას. მარა ზუსტას მიჩქნა, ნამდა ასეშე ოკო გუვავითარათ გაბედულება, იეჰოვაწკუმა ხოლოშიან ურთიერთობა დო ქიდიბგურუათ, მუჭო გივორჯგინათ კოჩიშ შიშის. თე ირფელ მიმეხვარებნა, ამდღარშე ვორდათ მზათ დო გაბედულო ქეშეფხვადათ თი სირთულეეფს, ნამუთ წოხოლე მელნა.

²² მუჭო ოკო მიფქცუათ, მუჟამსით იეჰოვაშ თაყვანიშცემას ამკრძალენა? თეშ უკულიან სტატიას გუვარჩიენთ თი პრინციპეფს, ნამუთ მიმეხვარებნა, ვემსახურათ იეჰოვას აკრძალვაშ დროს ხოლო.