NGANI JAKULIJIGANYA 27
Ajino Jili Ndaŵi Jambone Jakosecela Kulagasidwa
“Nipo wosope ŵakusaka kuŵa ni umi wakumlumba Mlungu mwa Klistu Yesu tacisimana ni yisawusyo kapena kuti kulagasidwa.”—2 TIM. 3:12.
NYIMBO 129 Citujendelecele Kuŵa Ŵakupilila
YACITULIJIGANYE *
1. Ligongo cici tukusosekwa kosecela kulagasidwa?
PA CILO cakumalisya ca umi wa Ambuje ŵetu Yesu, jwalakwe jwasasile kuti ŵandu cacaŵenga ŵakumkuya ŵakwe. (Yoh. 17:14) Kutandila ndaŵi jelejo mpaka apano, Aklistu ŵakulupicika Ŵamboni sya Yehofa akusalagasidwa ni ŵandu ŵakusasisya kulambila kusyesyene. (2 Tim. 33:12) Pajikuŵandicila mbesi ja cilamboci, tujembeceyeje kuti acimmagongo ŵetu catusisyeje kupunda mwakutendela apano.—Mat. 24:9.
2-3. (a) Ana tukusosekwa kumanyilila cici pakwamba ya woga? (b) Ana mungani ajino citulijiganye cici?
2 Ana apano tukusosekwa kutenda cici kuti citukombole kupilila pandaŵi ja kulagasidwa? Nganiyiŵa yakusosekwa ganicisya ya yindu yosope yayicitutendecela. Kutenda yeleyi mpaka kugambe kututendekasya woga soni kulagasika nganisyo. Naga tukuganicisya ya yindu yakusakala yayicitutendecela, mpaka yitutendekasye kuleka kumtumicila Yehofa atamose yisawusyoyo mkaniyiŵe kwika. (Mis. 12:25; 17:22) Woga cili cida cekulungwa cakusakamulicisya masengo ‘m’magongo jwetu Satana,’ pakusaka kulimbana ni m’weji. (1 Pet. 5:8, 9) Ana apano tukusosekwa kutenda cici kuti citukombole kupilila kulagasidwa?
3 Mungani ajino, citulijiganye yampaka tutende kuti tulimbisye unasi wetu ni Yehofa, soni ligongo lyakwe kutenda yeleyi apano kuli kwakusosekwa mnope. Citukambilanesoni yampaka tutende kuti tuŵe ŵakulimba mtima mnope. Pambesi pakwe citulole yampaka tutende kuti tukombole kupilila ŵane pakutulagasya.
YAMPAKA TUTENDE KUTI TULIMBISYE UNASI WETU NI YEHOFA
4. Mwakamulana ni lilemba lya Ahebeli 13:5, 6, ana tukusosekwa kusimicisya ya cici, soni ligongo cici kutenda yeleyi kuli kwakusosekwa mnope?
4 Tusimicisyeje kuti Yehofa akusatunonyela soni kuti nganaŵa atulesile. (Aŵalanje Ahebeli 13:5, 6.) Yaka yejinji munyumamo, Sanja ja Mlonda jine jasasile kuti, “Mundu jwakusammanyilila cenene Mlungu, akusamkulupilila mnope jwalakwe pakulagasidwa.” Yeleyitu yili yisyene! Kuti tukombole kupilila patukulagasidwa, tukusosekwa kumnonyela soni kumdalila Yehofa ni mtima wetu wosope. Nambosoni tukakayicilaga kuti jwalakwe akusatunonyela.—Mat. 22:36-38; Yak. 5:11.
5. Ana cici campaka citukamucisye kuyiwona kuti Yehofa akusatunonyela?
5 Tuŵalanjeje Baibulo lisiku lililyose ni cakulinga cakuti tum’ŵandicile Yehofa. (Yak. 4:8) Patukuŵalanga Baibulo tuganicisyeje mnope ya ndamo syambone sya Yehofa. Patukuŵalanga yaŵaŵecete soni kutenda Yehofa tulinjeje kulola yakusati pakutunonyela. (Eks. 34:6) Yikusaŵa yakusawusya kwa ŵane kulupilila kuti Mlungu akusiŵanonyela ligongo lyakuti pangali juŵalosisyepo cinonyelo. Naga yeleyi yikusiyatendecela, alinjeje kulola lisiku lililyose matala gele Yehofa alosisye canasa soni umbone mtima kwa wawojo. (Sal. 78:38, 39; Alo. 8:32) Pakulola yindu yayiŵele mkutendekwa paumi wawo soni kuganicisya yaŵalasile m’Maloŵe ga Mlungu, cacikombola kulola yindu yejinji yaŵatendele Yehofa. Naga akuganicisya yindu yaŵatendele Yehofa, unasi wawo ni jwalakwe ukusalimba mnope.—Sal. 116:1, 2.
6. Mwakamulana ni lilemba lya Salimo 94:17-19, ana kupopela mwakutyocela pasi pa mtima kuli kwakamucisya camtuli?
6 Tupopeleje ndaŵi syosope. Aganicisye ya kamnyamata kele babagwe akakamwile mkono. Kamnyamataka kakusalipikana kuti kali pamalo gambone, soni kakusaŵa kagopoka kuŵeceta kwa babagwe yindu yosope yayimtendecele palisikulyo cinga yambone kapena yakusakala. Mpaka tuŵe paunasi wakulandanawu ni Yehofa naga tukusapopela kwa jwalakwe mwakutyocela pasi pamtima lisiku lililyose. (Aŵalanje Salimo 94:17-19.) Patukupopela kwa Yehofa, ‘tuŵeceteje yosope yene yakulukosi kwetu,’ nambosoni twasalileje Atati ŵetu ŵacinonyelo yindu yosope yayikusatutendekasya woga soni yayikusatulagasya nganisyo. (Mal. 2:19) Ana yakuyicisya yakwe mpaka yiŵe yamtuli? Kutenda yeleyi kucakamucisya kukola “mtendele wa Mlungu wele wuli wakupunda umanyilisi wosope wa ŵandu.” (Afil. 4:6, 7) Kupopela m’litala lyeleli, kucakamucisya kum’ŵandicila mnope Yehofa.—Alo. 8:38, 39.
Tukusaŵa ŵakulimba mtima naga tukwete cikulupi cakulimba pa Yehofa soni ngani syakwamba Ucimwene
Stanley Jones jwalimbisye cikulupi cakwe mwakulupilila soni kuwuwona Ucimwene wa Mlungu kuti uli usyesyene (Alole ndime 7)
7. Ligongo cici ngakusosekwa kukayicila kuti yindu yasimicisye Mlungu kuti cacitenda mu Ucimwene wakwe yicikwanilicikwa?
7 Tukakayicilaga kuti yaŵasasile Mlungu kuti cacitenda kupitila mu Ucimwene wakwe yicikwanilicikwa. (Num. 23:19) Naga tukukayicila yindu yasimicisye Mlungu kuti yicitendekwa, mpaka yiŵe yangasawusya kuti Satana soni ŵali kumbali jakwe atusokonasye. (Mis. 24:10; Aheb. 2:15) Ana mpaka tulimbisye camtuli cikulupi cetu pa Ucimwene wa Mlungu masiku agano? Awungunyeje yindu yasimicisye Mlungu kuti cacitenda mu Ucimwene wakwe, soni aloleje yampaka yatendekasye kusimicisya kuti yeleyi yicitendekwa. Ligongo cici kutenda yeleyi kuli kwakamucisya? Aganicisye ya cisyasyo ca Stanley Jones juŵawugalilidwe m’ndende kwa yaka 7 ligongo lya cikulupi cakwe. * Ana cici cacamkamucisye kupilila mwakulupicika? Jwalakwe jwasasile kuti, “Cikulupi cangu caliji cakulimba ligongo namanyililaga yakwamba Ucimwene wa Mlungu soni yawucikwanilisya. Nganingayicilaga kuti yeleyi yicitendekwa, nambosoni pangali jwakandendekasisye kumleka Yehofa.” Naga akusakulupilila mnope yasimicisye Mlungu kuti cacitenda, cacim’ŵandicila mnope Yehofa soni ngasakunda kuleka kumtumicila ligongo lya woga.—Mis. 3:25, 26.
8. Ana kusimanikwa kwetu pamisongano kukusalosya cici? Alondesye.
8 Tusimanikweje pamisongano ja Ciklistu mwakutamilicika. Misongano jikusatukamucisya kumŵandicila Yehofa. Kusimanikwa kwetu pamisongano kukusalosya yatucitenda pakupilila patucilagasidwaga msogolo. (Aheb. 10:24, 25) Ligongo cici tukusala yeleyi? Naga tukukunda kuti yindu yamwanamwana yitulepelekasyeje kusongana, ana yiciŵa wuli msogolo patucisosekwa kuŵika umi wetu pangosi kuti tusongane ni abale soni alongo ŵetu? M’malo mwakwe, naga tukusasongana mwakutamilicika, tucipitilisyape kusongana atamose ŵakusisya ali atulekasisye. Ajino jili ndaŵi jakuti tunonyeleje mnope misongano. Naga tukunonyela kusimanikwa pamisongano, ngasituleka kusongana atamose ŵakusisya kapena ŵaboma ali alekasisye. M’weji tucimpikanila Mlungu kupunda ŵandu.—Mase. 5:29.
Kwinjisya pamtima malemba soni nyimbo sya Ucimwene apano kucitukamucisya kuti citukumbucileje nambosoni kuŵa ŵakulimba pandaŵi jakutulagasya (Alole ndime 9) *
9. Ligongo cici kwinjisya malemba pamtima lili litala lyambone lyakosecela kulagasidwa?
9 Tujinjisyeje pamtima malemba gatukusaganonyela. (Mat. 13:52) Nganituŵa tukumbucile malemba gosope, nambo Yehofa mpaka akamulicisye masengo msimu wakwe weswela kutukumbusya. (Yoh. 14:26) Alole yaŵaŵecete m’bale jwine jwaŵaliji m’kacipinda kajikape ka kundende ja ku East Germany. Jwalakwe jwatite, “Nasangalele kuti naliji ndili njinjisye pamtima malemba gejinji. Atamose kuti naliji jika, nambope nakombolaga kuganicisya ngani sya m’Baibulo.” Malemba gaŵajinjisye pamtima m’baleju gamkamucisye kuti amŵandicile mnope Yehofa soni kupilila mwakulupicika.
(Alole ndime 10) *
10. Ligongo cici tukusosekwa kwinjisya pamtima nyimbo?
10 Tujinjisyeje pamtima soni kwimba nyimbo syakumlumba Yehofa. Paulo ni Sila paŵawugalile mu ndende ku Filipi, ŵajimbaga nyimbo syakumlumba Yehofa syaŵajinjisye pamtima. (Mase. 16:25) Mwakulandana ni yeleyi, mu ulamusi wa Soviet Union, abale ŵetu ŵaŵajigalidwe ukapolo kwawula ku Siberia ŵalimbile m’cikulupi mwakwimba nyimbo. Mlongo Mariya Fedun jwasasile kuti, “Twajimbaga nyimbo syosope syatwasimanyililaga kutyocela m’buku jetu ja nyimbo.” Jwalakwe jwasalile kuti nyimbosyo syalimbikasisye soni syakamucisye jemanjajo kumŵandicila Yehofa. Ana pakwimba nyimbo syakusasinonyela akusalipikana kuti sikwalimbikasya? Naga yili m’yoyo akusosekwa asijinjisye pamtima nyimbosyo apano.—Alole libokosi lyakuti “ Angamucisye Mbe Jwakulimba Mtima.”
YAMPAKA TUTENDE KUTI TUŴE ŴAKULIMBA MTIMA MNOPE
11-12. (a) Mwakamulana ni lilemba lya 1 Samuele 17:37, 45-47, ligongo cici Daudi jwaliji jwakulimba mtima? (b) Ana tukulijiganya cindu cakusosekwa capi kutyocela mu cisyasyo ca Daudici?
11 Pandaŵi jakulagasidwa, tucisosekwa kuŵa ŵakulimba mtima. Ana mpaka atende cici naga akusalipikana kuti ali ŵangalimba mtima? Akumbucileje kuti kulimba mtima kusyesyene kwangadalilaga msingu wawo, macili gawo kapena lunda lwawo. Aganicisye ya cisyasyo ca Daudi paŵaliji mwanace paŵalimbanaga ni Goliyati. Pakulandanya ni cimundu camacilici, Daudi jwaliji mwanace, jwangali macili soni jwangamanyilila kuputa ngondo. Daudi nganakola atamose upanga. Nambope jwalakwe jwaliji jwakulimba mtima mnope. Mwakulimba mtima Daudi jwawutwice kuja kuputana ni cimundu camacilici.
12 Ligongo cici Daudi jwaliji jwakulimba mtima mnope? Jwakulupililaga kuti Yehofa ali ni jwalakwe. (Aŵalanje 1 Samuele 17:37, 45-47.) Daudi nganasamala ya ukulu wa Goliyati. M’malo mwakwe pakumlandanya ni Yehofa, Daudi ŵamwonaga Goliyati kuti ali kamwanace. Ana tukulijiganya cici pangani jeleji? Naga tukuyiwona kuti Yehofa ali ni m’weji tuciŵa ŵakulimba mtima mnope, soni tucisimicisya kuti ŵandu ŵakusatusisya ali ŵanace pameso pa Mlungu Jwamaciligose. (2 Mbi. 20:15; Sal. 16:8) Ana mpaka tutende cici kuti tuŵe ŵakulimba mtima apano mkanitutande kulagasidwa?
13. Ana mpaka tulijiganye camtuli kuŵa ŵakulimba mtima? Alondesye.
13 Mpaka tulijiganye kuŵa ŵakulimba mtima apano mwakulalicila ngani syambone syakwamba Ucimwene wa Mlungu. Ligongo cici tukuŵeceta yeleyi? Ligongo lyakuti kulalicila kukusatujiganya kumdalila mnope Yehofa soni kuleka kwajogopa ŵandu. (Mis. 29:25) Mpela mwacikusalimbanganila cilu cetu patukutenda mawung’asi gakulimbisya cilu, nombesoni cikulupi cetu cikusalimba patukulalicila nyumba ni nyumba, pamalo gakusimanikwa ŵandu ŵajinji, kulalicila mwaupile, nambosoni pamalo gakutendela malonda. Naga apano tukusalalicila mwakulimba mtima, tuciŵa ŵakoseka kupitilisya kulalicila atamose boma jili jilekasisye masengo getu.—1 Ates. 2:1, 2.
Nancy Yuen jwakanile kuleka kulalicila ngani syambone (Alole ndime 14)
14-15. Ana mpaka tulijiganye cici kutyocela ku yisyasyo ya alongo ŵaŵiliŵa?
14 Mpaka tulijiganye kutyocela ku yisyasyo ya alongo ŵaŵili ŵakulupicika ŵaŵalosisye kulimba mtima mnope. Atamose kuti Nancy Yuen jwaliji jwamjipi (mamita 1.5), jwalakwe jwaliji jwakulimba mtima. * Jwakanile kuleka kulalicila ngani syambone syakwamba Ucimwene wa Mlungu. Yakuyicisya yakwe jwawugalilidwe mundende kwa yaka 20 ku China. Acakulungwakulungwa ŵa boma ŵaŵam’wusyaga yiwusyo ŵasasile kuti mlongoju jwaliji “mundu jwakusawusya mnope” m’cilamboco.
Valentina Garnovskaya jwakulupililaga kuti Yehofa ali kumbali jakwe (Alole ndime 15)
15 Yakulandanayi, yamtendecelesoni Mlongo Valentina Garnovskaya jwajwaŵicidwe mundende kwa mawulendo gatatu mu ulamusi wa Soviet Union. Kupwatikanya yaka yosope yaŵatemi ku ndende yakwanile yaka 21. * Jwalakwe ŵataŵidwe ligongo lyakuti ŵapitilisyagape kulalicila ali alekasisye masengogo, mwamti acakulungwakulungwa ŵa boma ŵamkolangaga kuti “jwakwimucila jwakogoya mnope.” Ana cici cacatendekasisye alongo ŵaŵili ŵakulupicikaŵa kuŵa ŵakulimba mtima mnope? Jemanjaji ŵaliji ŵakusimicisya kuti Yehofa ali kumbali jawo.
16. Ana cici campaka citukamucisye kuŵa ŵakulimba mtima yisyesyene?
16 Mpela mwatuyiwonele, kuti tuŵe ŵakulimba mtima ngatukusosekwa kudalila macili getu soni lunda lwetu. Mmalo mwakwe tukusosekwa tukulupilileje kuti Yehofa ali ni m’weji soni kuti ni jwakutuputila ngondo. (Det. 1:29, 30; Sak. 4:6) Yeleyitu ni yampaka yitukamucisye kuŵa ŵakulimba mtima yisyesyene.
YAMPAKA TUTENDE ŴANDU PAKUTUŴENGA
17-18. Mwakamulana ni lilemba lya Yohane 15:18-21, ana Yesu jwatukalamwisye ya cici? Alondesye.
17 Tukusasangalala ŵane pakutucimbicisya, nambo ngatukusosekwa kulipikana kuti tuli ŵangasosekwa naga ŵane ŵangatunonyelaga. Yesu jwasasile kuti, “Ŵana upile jemanja ŵandu ŵane pakumŵenga, kumkana, ni kumnyosya ni kuŵeceta yakusakala yakwamba m’mwejo ligongo lya mwanace jwa mundu.” (Luk. 6:22) Ana Yesu jwagopolelaga cici pelepa?
18 Yesu nganagopolelaga kuti Aklistu cacisangalalaga ŵane pakwaŵenga. M’malo mwakwe jwalakwe ŵatukalamusyaga yampaka yitutendecele. M’weji nganituŵa mbali ja cilamboci. Tukusakamulicisya masengo yaŵajiganyisye Yesu soni tukusalalicilaga ngani syaŵalalicilaga jwalakwe. Ligongo lya yeleyi, cilambo cikusatuŵengaga. (Aŵalanje Yohane 15:18-21.) Tukusasaka kumsangalasya Yehofa. Ligongo lyakuti tukusamnonyela Yehofa ngatukusadandawulaga ŵandu pakutuŵenga.
19. Ana mpaka tusyasye camtuli cisyasyo ca ŵandumetume?
19 Akasakunda ŵane kwatendekasya kutenda sooni ligongo lyakuti ali Jwamboni sya Yehofa. (Mik. 4:5) Mpaka tulijiganye kumalana ni kogopa ŵandu mwakuganicisya yaŵatesile ŵandumetume ku Yelusalemu Yesu ali awulajidwe. Jemanjaji ŵamanyililaga kuti acimlongola ŵa dini ŵa Ciyuda ŵaŵengaga. (Mase. 5:17, 18, 27, 28) Atamose kuti yaliji m’yoyo, jemanjaji ŵapitilisye kwawula ku nyumba jakulambilila soni nganalisisaga kuti ali ŵakumkuya ŵa Yesu. (Mase. 5:42) Nganakunda kuti woga ŵalepelekasye kutenda yeleyi. M’wejisoni mpaka tumalane ni kogopa ŵandu patukulimanyikasya kuti tuli Ŵamboni sya Yehofa. Mpaka tutende yeleyi cinga kumasengo, kusukulu kapena mu dela jatukusatamaga.—Mase. 4:29; Alo. 1:16.
20. Ligongo cici ŵandumetume ŵasangalalaga atamose kuti ŵandu ŵaŵengaga?
20 Ligongo cici ŵandumetume ŵaliji ŵakusangalala? Ŵamanyililaga ligongo lyakwe ŵandu ŵaŵengaga, soni ŵasangalalaga ŵandu pakwatendela yangali cilungamo ligongo lyakutenda lisosa lya Yehofa. (Luk. 6:23; Mase. 5:41) Kaneko ndumetume Petulo jwalembile kuti, “Nambo atamose mpikane yipwetesi ligongo lyakutenda cilungamo, timciŵa ŵana upile nditu.” (1 Pet. 2:19-21; 3:14) Naga tukusapikanicisya ligongo lyakwe ŵandu akusatuŵenga, nganituŵa tulesile kumtumicila Yehofa ligongo lyakuti ŵane akutuŵenga.
KOSECELA KUCITUKAMUCISYA MNOPE
21-22. (a) Ana asagwile kutenda cici pakosecela kulagasidwa? (b) Ana mungani jakuyicisya tucikambilana cici?
21 Nganituŵa tumanyilile ndaŵi jele ŵandu cacitanda kutulagasya, kapena pele boma jicilekasya kulambila kwetu. Atamose yili m’yoyo nambope yili yakomboleka kosecela mwakulimbisya unasi wetu ni Yehofa, mwakulijiganya kuŵa ŵakulimba mtima, soni kupilila ŵandu pakutuŵenga. Kosecela kwampaka tutende apano kucitukamucisya kuŵa ŵakulimba msogolo.
22 Nambi ana mpaka tutende cici naga boma jili jilekasisye kulambila kwetu? Mungani jakuyicisya, tucikambilana yiwundo ya m’Baibulo yampaka yitukamucisye kuti tupitilisyepe kumlambila Yehofa atamose boma jili jilekasisye kulambila kwetu.
NYIMBO 118 “Atupe Cikulupi Cejinji”
^ ndime 5 Ngatukusasaka kuti ŵane atuŵenjeje. Nambo pacangakaŵapa kapena kuti msogolomu wosopewe mpaka atulagasye. Ngani ajino cijitukamucisye kumanyilila yampaka tutende kuti tuŵe ŵakulimba mtima ŵane pakutulagasya.
^ ndime 7 Alole Sanja ja Mlonda ja Cisungu ja Disemba 15, 1965, pp. 756-767.
^ ndime 14 Alole Sanja ja Mlonda ja Cisungu ja Julayi 15, 1979, pp. 4-7. Alolelesoni fidiyo ja Cisungu jakuti Jehovah’s Name Will Be Made Known pa JW Broadcasting®. Ajawule palembile kuti INTERVIEWS AND EXPERIENCES.
^ ndime 15 Alole Sanja ja Mlonda jakulijiganya ja Ciceŵa ja Epulo 2009, p. 9, ¶10, 11.
[Maloŵe ga Mwiŵanda]
^ ndime 67 KULONDESYA YIWULILI: Acinangolo akukamulicisya masengo tumapepala twatukwete maloŵe ga palilemba mbali jine, nambosoni mbali jinejo kuli kwana lilemba lyakwe. Akutenda yeleyi pakwakamucisya ŵanacewo kwinjisya malemba pamtima pakutenda kulambila kwa peŵasa.
^ ndime 70 KULONDESYA YIWULILI: Liŵasa likwimba nyimbo sya Ucimwene pali m’galimoto, pakwawula kumisongano.
