1. Mang fan nib t’uf ni ngad fal’eged rogodad ko togopuluw ni bay yib ngodad?

FARE nep’ u m’on ni ngan li’ Jesus ni Somol rodad, me yog ni urngin e piin ni yad ra mel’eg ni ngar manged boch i gachalpen e yira fanenikayrad. (John 17:14) Mus ko ngiyal’ ney ni piin ni yad ma togopuluw ko bin riyul’ e liyor e yad be gafgownag e Pi Mich Rok Jehovah ni yad ba yul’yul’ ngak. (2 Tim. 3:12) Nap’an ni gad ra chugur i yan nga tungun e re m’ag ney, ma gad manang nra gel e togopuluw nra tay e pi toogor rodad ngodad.​—Matt. 24:9.

2-3. (a) Mang e susun ni ngad nanged u murung’agen e marus ni ma yib ngodad? (b) Mang e gad ra weliy ko re article ney?

² Uw rogon ni ngad fal’eged rogodad e chiney ni fan ko togopuluw ni bay yib ngodad? De t’uf ni ngad pared ngad lemnaged urngin ban’en nrayog ni nge buch rodad. Faan gad ra rin’ ni aray rogon, ma rayog ni ngad pared ni gad be rus ma be magafan’dad. Faan gad ra lemnag urngin ban’en nib kireb nrayog ni nge buch rodad, ma rayog ni nge gel e marus rodad ma gad tal ko pigpig ngak Jehovah ndawori yib e skeng ngodad. (Prov. 12:25; 17:22) Marus e aram reb e talin e cham nib gel gelngin ni be fanay ‘moonyan’ ni ir e toogor rodad’ ni nge togopuluw ngodad. (1 Pet. 5:8, 9) Mang e rayog ni ngad rin’ed e chiney ya nge yag nda fal’eged rogodad ni ngad athamgilgad u fithik’ e togopuluw nra yib ngodad?

³ Re article ney e gad ra weliy riy rogon ni ngad gelnaged e tha’ u thildad Jehovah nge fan nib t’uf ni ngad rin’ed e re n’ey ni ka chiney. Ku gad ra weliy rogon ni ngad gelnaged lanin’dad ya nge yag nda pared ndab da rusgad. Ma bin tomur e gad ra weliy e n’en nrayog ni ngad rin’ed ni faanra be fanenikaydad e girdi’.

4. Mang e thingari mich u wan’dad nrogon ni bay ko Hebrews 13:5, 6, ma mang fan?

⁴ Ngari mich u wan’um ni gab t’uf rok Jehovah ma dariy ba ngiyal’ nra pagem. (Mu beeg e Hebrews 13:5, 6.) Boor e duw kafram me yog Fare  Wulyang ko Damit ni gaar: “En nri manang Got nib fel’ rogon e rra taga’ ngak ko ngiyal’ ni ke yib e skeng ngak.” Rriyul’ e re thin ney! Faanra nge yag nda athamgilgad ko togopuluw nra yib ngodad, ma thingari t’uf Jehovah rodad me pagan’dad ngak, ma dariy ba ngiyal’ ni nge maruwaran’dad ko t’ufeg rok ngodad.​—Matt. 22:36-38; Jas. 5:11.

5. Mang e ra ayuwegem ni ngam nang gelngin fanam t’uf rok Jehovah?

⁵ Um beeg e Bible ni gubin e rran ni ga be nameg ni ngari chugur thilmew Jehovah. (Jas. 4:8) Nap’an ni ga be beeg e Bible rom, mag tiyan’um ko pi fel’ngin Jehovah nib manigil ni ga be beeg murung’agen. Mu guy rogon ni ngarim nang gelngin fanam t’uf rok u nap’an ni ga be beeg boch e thin ni ke yog nge boch ban’en ni ke rin’. (Ex. 34:6) Bay boch e girdi’ nsana ba mo’maw’ ni nge mich u wan’rad ni yad ba t’uf rok Got ni bochan e dariy ba ngiyal’ ni ke dag be’ e t’ufeg ngorad. Faanra ireray e magawon rom, mag guy rogon ni nge gubin e rran mag yoloy nga but’ boch e kanawo’ ni ke dag Jehovah e runguy nge gol riy ngom. (Ps. 78:38, 39; Rom. 8:32) Nap’an ni ga ra lemnag e pi n’en ni ke buch rom mag fal’eg i lemnag e n’en ni kam beeg ko Thin rok Got, ma dabisiy ni boor ban’en nrayog ni ngam yoloy nga but’ ni ke rin’ Jehovah ni fan ngom. Ra gel feni ga’ fan u wan’um e pi n’en ni ke rin’ Jehovah ni fan ngom, ma aram e ra gel e chugur ko tha’ u thilmew.​—Ps. 116:1, 2.

6. Faanra um meybil u polo’ i gum’irchaem, ma uw rogon nra ayuwegem e re n’ey nrogon ni bay ko Psalm 94:17-19?

⁶ Um meybil ni gubin ngiyal’. Mu susunnag bochi pagel ni bay e chitamangin u tooben ni ke longobiy pa’ ngak. Kari pagan’ e chi pagel nem ma aram me tabab ni nge weliy ko chitamangin urngin e tin nib fel’ nge tin nib kireb ni ke buch rok e rofen nem ndakuriy ban’en ni be magar ngay. Rayog ni ngki par e tha’ u thilmew Jehovah ni aray rogon ni faanra um meybil ngak u polo’ i gum’irchaem ni gubin e rran. (Mu beeg e Psalm 94:17-19.) Nap’an ni ga be meybil ngak Jehovah ni ir e Chitamangidad ni gad ba t’uf rok, mag “puog lanin’um nga but’,” ma gog ngak urngin ban’en ni be k’aring e marus nge magafan’ ngom. (Lam. 2:19, BT) Mang angin nra yib riy? Ga ra thamiy e “gapas rok Got ndabi chuchugur ni nge nang e girdi’ fan” ni be weliy e Bible murung’agen. (Fil. 4:6, 7) Faanra um meybil ni aray rogon, ma aram e ra gel e chugur u thilmew Jehovah.​—Rom. 8:38, 39.

7. Mang fan nthingari mich u wan’um nra riyul’ urngin ban’en ni ke micheg Got u murung’agen Gil’ilungun?

⁷ Ngari mich u wan’um nra riyul’ urngin e pi tow’ath ni kan micheg nra yibnag Gil’ilungun Got. (Num. 23:19) Faanra gathi rib mich u wan’um e pi n’ey ni kan micheg, ma ra mom ngak Satan nge piin ni yad bay u tan pa’ ni ngar k’aringed e marus ngom. (Prov. 24:10; Heb. 2:15) Ere uw rogon ni ngam gelnag rogon feni mich Gil’ilungun Got u wan’um e chiney? Mu tay e tayim ni ngam gay boch ban’en u murung’agen e pi n’en ni ke micheg Got u murung’agen Gil’ilungun nge fan nrayog ni nge pagan’um nra riyul’ e pi n’em. Uw rogon nra ayuwegem e re n’ey? Am lemnag e n’en ni buch rok Stanley Jones nni kalbusnag u lan medlip e duw ni bochan e michan’ rok. * Mang e ayuweg ni nge athamgil me par nib yul’yul’? I gaar: “Rib gel e michan’ rog ni bochan e gu manang murung’agen Gil’ilungun Got nge n’en nra lebguy, ma dariy ba ngiyal’ ni maruwar  e pi n’ey u wan’ug. Bochan e re n’ey, ma aram fan ndariy be’ ni yag rok ni nge k’aringeg ni nggu pag Jehovah.” Faanra rib mich u wan’um e pi n’en ni ke micheg Jehovah, ma aram e ra chugur thilmew ma dab mu pag e marus ni nge k’aringem ni ngam tal ko pigpig ni ga be tay ngak.​—Prov. 3:25, 26.

8. Mang e rayog ni ngad nanged u rarogodad ni faan gad ra lemnag rogon feni ga’ fan e muulung u wan’dad? Mu weliy rogon.

⁸ Mu un ko muulung ni gubin ngiyal’. Muulung e ma ayuwegdad ni nge chugur thildad Jehovah. Rogon feni ga’ fan e muulung u wan’dad e be dag ko gad ra athamgil ko togopuluw nra yib ngodad boch nga m’on fa danga’. (Heb. 10:24, 25) Mang fan ni gad be yog e re n’ey? Faan gad ra pag nochi magawon nib achig ni nga i talegdad ndab da uned ko muulung e chiney, ma mang e ra buch boch nga m’on ni faanra t’uf ni ngad ted e yafos rodad nga thatharen e riya’ ni bochan e nge yag nda mada’gad pi walagdad u taabang? Maku reb e, faan gad ra dugliy u wan’dad ni ngaud uned ko muulung, ma aram e dab da talgad u nap’an nra guy e piin ni yad be togopuluw rogon ni ngar taleged gadad ndab kud uned ko muulung. Ka chiney e ngad guyed rogon ni ngari ga’ fan e muulung u wan’dad. Faanra ri gad baadag ni gad ma un ko muulung, ma mus ni faan gad ra mada’nag e togopuluw, ara ke ngongliy e am e motochiyel ni be yog ndab kud uned ko muulung, ma aram e gad ra fol rok Got ko bin ni ngad folgad ko girdi’.​—Acts 5:29.

9. Mang fan ni faan gad ra guy rogon ni nge mit boch e thin nu Bible ngodad, ma aram reb e kanawo’ nib fel’ nrayog ni ngad fal’eged rogodad riy ni fan ko togopuluw?

⁹ Mu fil nge mit ngom e pi thin nu Bible nri ga baadag. (Matt. 13:52) Sana gathi rib mom ni nge mit boch ban’en ngom, machane rayog ni nge fanay Jehovah gelngin nib thothup ni nge ayuwegem ni nge yib e pi thin nu Bible nem ngan’um. (John 14:26) Mu tay fanam i yan ko n’en ni yog reb e walag ni pumoon nni kalbusnag ko Ngek u Chiyamen min tay nga lan ba singgil ni yigoo ir. I gaar: “Ri gub tow’ath ni yan i taw ko ngiyal’ nem ma ke mit in miriay e thin nu Bible ngog nrayog ni nggu beeg ndab gu sap nga Bible! Yugu aram rogon ni yigoo gag, machane ug par ni gu be fal’eg i lemnag boor ban’en ni be weliy e Bible murung’agen.” Pi thin nu Bible ney e ayuweg e re pumoon ni walagdad nem ni nge par nib chugur ngak Jehovah miki athamgil nge yag ni par nib yul’yul’.

10. Mang fan nsusun e ngad filed boch e tang nge mit ngodad?

¹⁰ Mu fil boch e tang ni be n’uf Jehovah nge mit ngom mu u mon’. Nap’an ni immoy Paul nge Silas u Filippi ni yow ba kalbus, ma aram mu u ron’ew boch e tang ni yow be n’uf Jehovah riy ni kar filew ke mit ngorow. (Acts 16:25) Ku arrogon pi walagdad ni ur moyed ko pi nam ni immoy u tan e Soviet Union kafram nni kolrad ngan fekrad nga Siberia. Uw rogon ni yag ni ngar pared ni yad ba gel? I yog reb i walagdad nib pin ni ka nog Mariya Fedun ngak ni gaar:  “Gon’ed urngin e tang ni ke mit ngomad ni bay u lan babyoren e tang rodad.” I yog e re walag ney ni pi tang nem e pi’ e athamgil nga lanin’rad me ayuwegrad ni ngar chugurgad ngak Jehovah. Ma yib e athamgil nga lanin’um u nap’an ni ga ra yon’ boch e tang rodad nri ga baadag, fa? Faanra aray rogon, me ere ka chiney e ngam fil e pi tang nem nge mit ngom!​—Mu guy fare kahol ni kenggin e “ Mu Gelnag Lanin’ug Ndab Gu Rus.”

11-12. (a) Mang fan nde rus David nrogon ni bay ko 1 Samuel 17:37, 45-47? (b) Mang reb e ban’en nib ga’ fan ni gad ra fil rok David?

¹¹ Faanra nge yag nim man u fithik’ e togopuluw nra yib ngom, mab t’uf ni nge dab mu rus. Faanra ga be guy ni gur be’ nib mom ni ngam rus, ma mang e rayog ni ngam rin’? Dab mu pagtalin ni faanra nge yag nim par ndab mu rus ma gathi be yan u rogon ga’ngim, ara gelngim, ara tin nrayog rom. Am lemnag e n’en ni rin’ David u nap’an ni yan nga p’eowchen Goliath. Faan yira taarebrogonnag David ko re moon nem nrib pag feni ga’, ma kab gel e achig rok David, ma kab gel e meewar rok, maku dariy e pi talin e cham nib t’uf rok nrayog ni ngar chamgow e re moon nem. Mus nga bangi sayden ma dariy rok David. Yugu aram rogon, ma kari gelnag e lem rok ndabi rus. De rus ni nge mil i yan ko re moon nem nrib pag feni ga’ mab tolangan’ ni ngar chamgow.

¹² Mang fan nde rus David? Rib mich u wan’ ni bay Jehovah rok. (Mu beeg e 1 Samuel 17:37, 45-47.) De par David nga i taarebrogonnag ir ngak Goliath nge rogon feni ga’ Goliath. Ya tiyan’ nga rogon feni achig Goliath ni faanra ngan taarebrogonnag ngak Jehovah. Mang e gad be fil ko re n’ey? Faanra ba pagan’dad ni bay Jehovah rodad ma kub mudugil u wan’dad ni pi toogor rodad e dabi chugur ni nge taareb rogorad ngak Got ni Urngin Ma Rayog Rok, ma aram e n’en nra ayuwegdad ni nge dab da rusgad. (2 Kron. 20:15; Ps. 16:8) Ere uw rogon ni ngad gelnaged lanin’dad e chiney ngad pared ndab da rusgad u m’on ni nge yib e togopuluw ngodad?

13. Uw rogon ni ngad gelnaged lanin’dad ngad pared ndab da rusgad? Mu weliy rogon.

¹³ Rayog ni ngad gelnaged lanin’dad e chiney ngad pared ndab da rusgad ni aram e ngad machibnaged fare thin nib fel’ ni murung’agen Gil’ilungun Got ko girdi’. Mang fan? Bochan ni machib ni gad ma tay e gad ma fil riy rogon ni nge pagan’dad ngak Jehovah ma dab kud rusgad ko girdi’. (Prov. 29:25) Rayog ni nge gel e muscle u dowdad ni faanra ud rin’ed boch ban’en nib chamag ngodad. Ere ku arrogon nrayog ni nge gel lanin’dad ngad pared ndab da rusgad ni faanra ud uned ko machib u mit e tabinaw, nge yungi n’en ni ma muulung e girdi’ ni yoor ngay, ngu fithik’ e sabethin, ngu tagil’ e siyobay. Faan gad ra athamgil ni nge dab da rusgad ni ngad machibgad e chiney, ma aram e rayog ni  ngad ululgad ko machib ngki mada’ ko ngiyal’ ni kan taleg e machib ni gad be tay.​—1 Thess. 2:1, 2.

14-15. Mang boch ban’en nrayog ni ngad filed rok Nancy Yuen nge Valentina Garnovskaya?

¹⁴ Boor ban’en nrayog ni ngad filed rok l’agruw e walag nib pin nra parew ndar rusgow. Nancy Yuen e be’ ni kemus ni sogonap’an lal e fit (1.5 m) n’umngin, machane gathi ir be’ nib mom ni ngan k’aring e marus ngak. * I siyeg ndabi tal i machibnag fare thin nib fel’ ni murung’agen Gil’ilungun Got. Bochan e re n’ey ma aram min kalbusnag u lan 20 e duw u China. Pi girdien e am ni ur fithed boch e deer ngak e rogned ni “aram e cha’ nth’abi gelan’” ni bay ko nam rorad!

¹⁵ Ku arrogon Valentina Garnovskaya ni dalip yay nni kalbusnag u Russia u lan sogonap’an 21 e duw. * Mang fan? Ri dugliy u wan’ ndabi tal ko machib, ma aram me yog girdien e am ni “ir be’ ni ke th’ab e motochiyel ko am nrib gel e kireb rok.” Mang e ayuweg e gali ppin ney ni yow ba yul’yul’ ni ngar parew ndar rusgow? Rib mich u wan’row ni bay Jehovah rorow.

16. Mang e n’en nra ayuwegdad ni ngad pared nri dab da rusgad?

¹⁶ Kad weliyed ni faanra ngad gelnaged lanin’dad ngad pared ndab da rusgad, ma thingar dab da taga’gad nga gelngidad nge tin nrayog rodad. Ya thingari michan’dad ni bay Jehovah rodad ma ir e be cham ni pa’dad. (Deut. 1:29, 30; Zek. 4:6) Aram e n’en nra ayuwegdad ni ngad pared nri dab da rusgad.

17-18. Mang ginang e ke pi’ Jesus ngodad nrogon ni bay ko John 15:18-21? Mu tamilangnag.

¹⁷ Gad baadag ni nga i tay e girdi’ fadad, machane thingar dab da lemnaged ni faanra be dabuy e girdi’ dakendad ma aram e dariy fadad. I gaar Jesus: “Ngam felan’gad ko ngiyal’ nra fanenikaymed e girdi’ riy, ngar chuweged gimed u fithik’rad, mi yad yog e thin nib kireb ngomed, mi yad yog ni gimed ba kireb, ni bochan e en ni Fak e Girdi’!” (Luke 6:22) Mang e be yip’ Jesus fan?

¹⁸ Gathi be yog Jesus ni baadag e piin Kristiano ni ngaun fanenikayrad. Ya be ginangdad u murung’agen e n’en nra buch rodad. Gathi gad bang ko fayleng. Ku gad ma fol ko pi n’en ni fil Jesus maku gad ma machibnag e n’en ni machibnag ko girdi’. Bochan  e re n’ey, ma aram fan ni be fanenikaydad e girdi’ nu fayleng. (Mu beeg e John 15:18-21.) Gad baadag ni ngad rin’ed e tin nib m’agan’ Jehovah ngay. Faanra be fanenikaydad e girdi’ ni bochan e ba t’uf e Chitamangidad rodad, ma aram e yad e magawon rorad, gathi gadad.

19. Uw rogon ni ngad folwokgad rok e pi apostal?

¹⁹ Dariy ba ngiyal’ ni ngam pag ban’en ni be yog ara be rin’ e girdi’ ni nge k’aringem ni ngam tamra’ ni gur bagayad e Pi Mich Rok Jehovah. (Mik. 4:5) Faan gad ra lemnag e n’en ni rin’ e pi apostal u Jerusalem u tomuren ni kan li’ Jesus nge yim’, ma rayog ni nge ayuwegdad e re n’ey ni ngad gelgad ko marus ko girdi’. Yad manang gelngin nri be fanenikayrad e pi tayugang’ ko teliw rok e pi Jew. (Acts 5:17, 18, 27, 28) Yugu aram rogon, ma gubin e rran nra ululgad nga u ranod nga tempel maku yad be dag ni yad boch i gachalpen Jesus ko machib ni ur ted. (Acts 5:42) Dar paged e marus ni nge talegrad. Ku arrogodad nrayog ni ngad gelgad ko marus ko girdi’ ni faanra u dogned ko girdi’ ni gad boch e Pi Mich Rok Jehovah ndemtrug ko ngiyal’ ni gad bay u tabon e maruwel, ara skul, ara gin ni gad ma par riy.​—Acts 4:29; Rom. 1:16.

20. Mang fan nib felfelan’ e pi apostal ni yugu aram rogon ni yibe fanenikayrad?

²⁰ Mang fan nib felfelan’ e pi apostal nem? Ya yad manang fan ni yibe fanenikayrad, maku yad ma sap ngay nre n’em ni yibe gafgownagrad ni bochan e yad be rin’ e n’en nib m’agan’ Jehovah ngay e aram reb e tow’ath. (Luke 6:23; Acts 5:41) Boch nga tomuren me yoloy apostal Peter ni gaar: “Faanra ngam gafgowgad ni fan e gimed be rin’ e tin nib mat’aw, ma ri gimed ra felfelan’!” (1 Pet. 2:19-21; 3:14) Faanra tamilang u wan’dad ni fan ni yibe fanenikaydad e bochan e gad be rin’ e tin nib mat’aw, ma aram e dab da paged e fanenikan ni be tay e girdi’ ngodad ni nge talegdad ko pigpig ni gad be tay ngak Jehovah.

21-22. (a) Mang e kam dugliy ni ngam rin’ e chiney ya nge yag nim fal’eg rogom ko togopuluw ni bay yib ngodad? (b) Mang e gad ra weliy ko bin migid e article?

²¹ Dad nanged e ngiyal’ nra tabab e girdi’ ni ngar togopuluwgad ngodad ara chel e am nge taleg e maruwel rodad. Machane gad manang nrayog ni ngad fal’eged rogodad ni ka chiney ni aram e ngad gelnaged e tha’ u thildad Jehovah, ma gad gelnag lanin’dad ngad pared ndab da rusgad, ma gad guy rogon ni ngad athamgilgad u fithik’ e fanenikan ni be tay e girdi’ ngodad. Faan gad ra fal’eg rogodad e chiney, ma aram e rayog ni ngad pared ni gad ba mudugil boch nga m’on.

²² Machane uw rogon ni faanra ke yog e am ni ngad talgad ko liyor ni gad be tay? Bin migid e article e ra weliy boch i kenggin e motochiyel u Bible nra ayuwegdad ni ngad ululgad ko pigpig ni gad be tay ngak Jehovah ni yugu aram rogon ni ke taleg e am e liyor ni gad be tay.