1-2. (1) Ano mikeceng ko mikowanay to midokoay a demak ita, hano cowa ko kafahkaˈan a demak konini hani? (2) Oniya lalakaw wa milengo to maanan?

ITINI 2017 MIHECA, o makecengay anca pakidemay ko saconged to midokoay demak a kilac, komoden i, 223, 000 ko mitosilay a tamdaw. Makeceng no mikowanay ko demak ita, cowa ko kafahkaˈan, malecad milengoan no ˈayaway a lalakaw, o soˈlinay mihakelongay ci Yisan a tamdaw, o tatahacada to sapalak. (2 Timoti 3:12) Ano icowato ko kitiraan ita, wa fahal saan ko mikowanay a mikeceng to pidoko ita to sidaˈitay a Kawas ci Yihofaan.

² Ano mikeceng ko mikowanay to midokoay a demak ita i, alatek wa saan ko harateng iso: Tahacada to sapalak, o cowato pidama ko Kawas kitaanan han? O sakeceng no mirikecay, wa awato ko pakayraan ita a midoko ci Yihofaan han? Malinah kako tayra i pasalatay a kitakit, ngaˈ ngaˈay midoko to Kawas han? Oniya lalakaw wa pacaˈof toniya salicay. Wa milengoho ano makeceng kita i, sasamaan kita padadotoc a midoko ci Yihofaan, ato aka pidemak to maanan.

3. Mikitini i saka 2 Korinto 11:23-27, tahacadaay ci Pawlo to maanan a sapalak hani?

³ Ano mikeceng ko mikowanay to demak ita i, o cowato kaolah cowa to palemed ko Kawas kitaanan, wa saan ko harateng ita alatek. Kawra cowa ka hatira. Haratengen ko tinakoan no tarokos ci Pawlo, malifokay ningra ko pihayda no  Kawas, mansa ira ko tatodong mitilid to 14 cacudadan no Krisiya Sowal a Fangcalay Cudad, malo tarokosayho padama to kalo kitakit a tamdaw. Kawraan tahacadaay cingra to pakidemay a sapalak. (ˈOsien ko 2 Korinto 11:23-27.) Itini nalifetan ni Pawlo mananamay ita, mihaian no Kawas tahacada to sapalak ko madimadiay midoko Cingranan a tamdaw.

4. Itini nalifetan ni Pawlo mananamay ita ko maanan?

⁴ Mitadtaday ci Yis hano safeliten no tamdaw kita, lalangian i, cowa ko noniya hekal kita, mansa ˈinteh ko hekal tamdaw kitaanan. (Yohani 15:18, 19) Mihaenay tahacada kita to sapalak, cowa ko awaay ko sadama no Kawas kitaanan, ao pakayniay pidemak ita to matatodongay a demak!

5. Hano cowa ko papakaconged ko tamdaw kitaanan midoko ci Yihofaan hani? Tadtaden.

⁵ Cowa ko papakaconged ko tamdaw kitaanan, midoko to taˈangayay ko ˈicel a Kawas ci Yihofaan, mihaenay ko demak a tamdaw saikor pasokiyaway. Tinakoen, itini Saka Tosa Lalood no Hekal, adihayay mikowanay pakidemay ko pipalak to finawlan no Kawas. O demak ita cowa ka itini aca i Towic, makeceng no Naci, ano itinito i Australia, Kanata ato roma kitakit makecengay. Samanayto ko teloc hani? Tiya mifekad ko Saka Tosa Lalood no Hekal i 1939 miheca, 72,475 ko mitosilay. Kawra, tahinito 1945 miheca mahererek ko lalood i, polong no hekal 156,299 ko mitosilay, tosaayto a tingloh ko ˈaloman no mitosilay! Soˈlinayto a palemeden ni Yihofa ko finawlan Ningra!

6. O sapalak mifekaday to maanan ngaˈayay minaroˈan? Patinakoen hena.

⁶ O safelit cowa ko papatalalikor kitaanan, o papakalalok kitaanan matayal saki Yihofaan. Tinakoen, o cecay mararamoday ato mamangayho a wawa, itiniay i makecengay ko midokoay demak a kitakit ko kitiraan. Ikor no masadak ko sakeceng no mikowanay, oniya mararamoday cowa ka talaw a maˈesalto ko pitosil, misatapangay a micerid a misakafah, mihawadanho no fafahi ko ˈakawangay ko lifon a tayal. Sowal noniya faˈinay, o sakeceng fahkaˈay ko ˈalomanay to Misawacayay Tamdaw ni Yihofa, telocto, o makahiay minanam to Fangcalay Cudad a tamdaw, mikikakaay  ko adihay to salakatay. O sakeceng iraay ko ngaˈayay pifiyor to roma tamdaw. O cecay malohemay malitengay nora kitakit sanay, ˈalomanay paselaˈay midoko ci Yihofaan a salikaka, miliyaway a mirienang to saˈopo ato mitosilay.

7. (1) Mikitini i Lifi 26:36, 37, mananamay ita ko maanan? (2) Ano tahacada to sakeceng, samaan ko demak iso hani?

⁷ Mikeceng ko ˈada to midokoay a demak ita, o sapatalawaw kitaanan, ho eca to pidoko ci Yihofaan. Cowa ko pihadak aca to sakeceng, payakayakayho cangra to tatiihay sowal no mita, miocor to dimeng a misolap to lomaˈ ita, pakokot kitaanan tayra i hoing, halo pipalit to salikaka i kapalitan. Harateng nangra maˈaraw ita mapalit ko roma salikaka, wa ciˈangi a talalikor sanay, ano matalaw kita, wa soˈlinto miconged to niyah a midoko to Kawas. Cowa ka olah kita malecad o milengoan no Lifi 26:36, 37 a tamdaw. (ˈOsien.) Cowa ko mamihai kita pakayni i kakokiˈ a miˈesal, anca paselaˈ to midokoay to Kawas a demak, ao mamisarocod a mitadiˈec ci Yihofaan, cowa ko mamarawraw ko falocoˈ. (Isaya 28:16) Wa pasayra kita ci Yihofaan a mitolon, micangacang to sakayat Ningra. Ira ko sapadama ni Yhofa, ano samaanto taˈangay ko ˈicel no mikowanay, cowa ko papakaconged kitaanan a midoko to Kawas ita.—Hipray 13:6.

8-9. (1) O cecacecay Krisciyang wa pakayni i niyah ato paro no lomaˈ misaˈosi to maanan? (2) Samaan ko pidemak ngaˈ o citanengay a saˈosi hani?

⁸ O kitiraan iso a kitakit ano mikecengay ko mikowanay to demak ita, wa miharateng kiso alatek malinah tayra i pasalatay midoko ci Yihofaan a kitakit. Ono niyahan a saˈosi konini, cowa ka ngaˈay ko tao patado tisowanan a misaˈosi. ˈAyaw no misaˈosi, ngaˈayay haratengen ita ko nano demak no saka 1 hahekalan a Krisciyang, tiya tahalifa to sapalak. Itiya, tano fakelohan no tamdaw mipatay ci Stifano, ikorto o nisawawaan i Yirusalim maliwasakay tayra Yutiya ato Samariya, o roma tamdaw tayraay i Foinikiya, Sayprus ato Antiok. (Matay 10:23; Dmak 8:1; 11:19) Kawra, roma pakayraan i sapalak, misaˈosiay ci Pawlo materek i masafelitay ko mitosilay tayal a kilac, misiˈayaw to katalawan padadotoc milasil to ngaˈayay lihaf, halo pakalalok to misiˈayaway to pakidemay sapalak a salikaka.—Dmak 14:19-23.

⁹ Mikitini toniya maˈoningay mananamay ita ko maanan hani? Malinah anca caka linah, o sasinanoten no tawki no lomaˈ a miharateng konini. ˈAyaw no misaˈosi, wa mingitangit a mitolon cingra, miharateng to pakayraan no lomaˈ, miharateng to kangaˈayan ato katatiihan pakayni i paro no lomaˈ. O cecacecay a Krisciyang wa o niyah ko ciˈinorong to misaˈosian. (Kalatiya 6:5) Cowa ka ngaˈay kita milikaf to saˈosi no tao.

10. O Fenpo ato malohemay malitengay wa pafeli kitaanan to maanan a sakayat hani?

¹⁰ Itini i kakecengan a toki, wa samaan kita padadotoc a midoko ci Yihofaan hani? Pakayni sasamaan miala to Fangcalay Cudad ato mitepangan cudad, samaan masaˈopo, samaan mitosil, wa macada no malohemay malitengay ko sakayat ato sapaini no Fenpo. Ano caka linak no Fenpo ko malohemay malitengay, o tatooren no malohemay malitengay ko safalod ato sakayat no mitepangan cudad, padama tisowanan ato salikaka i kasakopang padadotoc a midoko ci Yihofaan.—Matay 28:19, 20; Dmak 5:29; Hipray 10:24, 25.

11. (1) Hano pakasoˈlin kita to, wa micada to kadofahay noˈadingoan a kakaenen no niyah hani? (2) Sasamaan kiso midipot to Fangcalay Cudad ato mitepangan cudad hani?

 ¹¹ Mikiˈokay ci Yihofa, wa kadofah ko noˈadingoan a kakaenen no sikawdan Ningra. (Isaya 65:13, 14; Luka 12:42-44) O likakawa ni Yihofa wa misaˈicel mihadak to misaalian noˈadingoan a sapakalalok, padama kitaanan padadotoc a madimadi. Kawra, ano makeceng ko midokoay a demak i, wa ngaˈay kiso a midemak to pina demak. Mihimed to Fangcalay Cudad ato mitepangan cudad, aka a madolo a mahela no tamdaw koniya kalimlaan a mitepangan, anca i tingnaway lalakaw. Sapidipotaw to pakasoˈlinay falocoˈ, o sasongilaˈen ita a midemak konini.

12. Sakaecaaw ka hapinang no tamdaw, o maamaan ko sasalofen no malohemay malitengay hani?

¹² Sasamaan milimasmas to saˈopo hani? Wa milimasmas ko malohemay malitengay to cowa ka hapinang no tamdaw a pakayraan a masaˈopo. Tano cowa ka ˈaloman a kasakapot mirienang to saˈopo, wa mararid mafalic ko toki anca kitiraan a masaˈopo alatek. Ano tahira anca miliyas to kasaˈopoan i, wa misamadah to ngiha no niyah, ho madipot ko salikaka. O caˈedong ita o kantangay, ho eca ka hapinang no tao.

13. Mikitini i lintad no Suwiay a salikaka, mananamay ita ko maanan?

¹³ Sasamaan milimasmas to mitosilay demak, cowa ka lecalecad ko pakayraan. Maolahay kita ci Yihofaan, maolahay paladaˈ to tamdaw to ngaˈayay lihaf no Hongti Kitakit, mihaenay wa milimasmas to hapakayraan a mitosil. (Luka 8:1; Dmak 4:29) O mitosilay a demak no Misawacayay Tamdaw ni Yihofa i lintad no Suwiay, micekiway to likisi ci Amiri Palan sanay: “Mikecengay ko mikowanay to Misawacayay Tamdaw ni Yihofa a mitosil, misaka dademakan nangra ko kasasowal to fiyaw, cafay matayal, widang a patenak to pihakelongan. Mihaenay ko demak no roma salikaka, hato patayraan i pisakolian, kawra kamayanho padadotoc mitosil to roma mapalitay.” Cowa pisawad a mitosil ko salikaka i Suwiay, ano makeceng ko mitosilay demak i kitakit iso, nanay ira ko malecaday saˈosi no falocoˈ iso!

14. Mikitini i ˈOlic 39:1, cowa ka ngaˈay kita midemak to maanan?

¹⁴ Aka palasak to mahimeday a demak. Ano makeceng i, tatomerep kita nolatekay. (Patnakay 3:7) Cowa ka ngaˈay kita palasak to ngangan no salikaka, kitiraan masaˈopo, pakayraan mitosil, ato samanay malifok ita ko Fangcalay Cudad ato mitepangan cudad. Cowa ko fafanaˈen ita ko mikowanay tamdaw to hatiniay demak, cowa ko papasowal to salawina ato widang, mihaen ho eca ka ira ko katalawan no salikaka.—ˈOsien ko ˈOlic 39:1.

15. Ciharatengay ci Satan to maanan hani? Samaan ko pidemak no mita hani?

 ¹⁵ Aka pakayni mimingay a demak maliwasak. Mafanaˈay ci Satan ano maliwasak o mamapeleng ko masacefangay. (Marko 3:24, 25) Mansa mihalaka ci Satan mifekad to sakaliwasak i kasakopang, mitokel kitaanan misaˈada to salikaka a mapawan to, o cira ko soˈlinay a ˈada ita.

16. Salikaka ci Posinke patirengay to maanan ngaˈayay taˈarawan?

¹⁶ O halafinayto midoko to Kawas a Krisciyang, wa matefad toniya talakal alatek. Nengnengen ita ko nalifetan no tatosaay mapasimalay a Krisciyang. Fafahiyan salikaka ci Kerute Posinke aci Elefurite Loer na kalacafayay to romaroma salikaka mapalit i kapalitan no Towic Naci. Salikaka ci Loer mihadakay to pakalalokay to falocoˈ a kimad, misatapangay ci Posinke a maˈinap cingranan. Ikor, mangodoay ko salikaka ci Posinke, mingitangit ci Yihofaan padama cingranan a misalof. Sanay cingra: “Ano ikaka ko inaneng no tao takowanan i, taˈangay ko ˈinorong, wa minanam kako micada toniya demak.” Samanay ko salikaka ci Posinke a miremo to maˈinapay a falocoˈ hani? Misamacayay cingra i makapahay capeling ato madaˈmaˈay a waywayan ni Loer, ikorto miliyaway ngaˈay ko kalalaˈed nangra. Mikitini kapalitan matedal cangra, padadotocay a madimadi, tahira ka hererekan no ˈorip i fafekang no sera. Mihaenay, ano misaˈicel kita misalof to lacongis i kalalaˈed no salikaka, cowato ko mamipalak to kakelec a maliwasak.—Kolosay 3:13, 14.

17. Hano kalimlaan ko sapidoedoaw ita to sakayat?

¹⁷ Aka maliyang to sakayat. Ano pakasoˈlin kita to sakayat no mikeriday a salikaka, wa maliyas ko pifekad no pasangaray. (1 Pitiro 5:5) Tinakoen, itini i makecengay a kilac, pasowalay ko mikeriday salikaka ano mitosil, hamaan palilam to cudad. O cecay misakafahay salikaka cowa ka pidoedo, samanayto ko teloc? Oniya salikaka ato roma mitosilay maharek to cowa ka hapinang a pakayraan a mitosil i, iraayto ko dimeng a milicay cangranan. ˈArawhan i mihokhokay a mitoor ko dimeng cangranan, miˈafasan to mapalilamay nangra a cudad. O maanan ko mananamay ita hani? Soˈlin ano cowa ka olah kita to pina sakayat, kamayan o hahakelongen. Ano malacecay kita to minilnilan ni Yihofa a salikaka, wa mahemek ci Yihofa.—Hipray 13:7, 17.

18. Hano aka patelas sa kita patireng to coko kalimlaan a sarikec hani?

¹⁸ Aka patelas sa patireng to coko kalimlaan a sarikec. Ano patireng ko malohemay malitengay to adihayay a sarikec, wa matongal ko mitamorongan no salikaka. Salikaka ci Yuray  Kaminski milomalay tiya makecengay mafekaday i Cikel-Slofake kitakit a demak: “Ya malepel ko ciˈinorongay a salikaka ato malohemay malitengay ikor, o roma kasakopang ato kasakilac mikeriday a salikaka, misatapangay cangra patireng to adihayay a sarikec, mirikec to salikaka to o manan ko ngaˈayay demaken, o manan ko cowa ka ngaˈay demaken.” Soˈlin cowa pafeli ci Yihofa kitaanan to fadangalan a patado to tao a misaˈosi. O mikeriday a salikaka, ano patelas sa patireng to coko kalimlaan a sarikec i, cowa ko midipotay to salikaka a pakayraan kora—o miroeroay to pakasoˈlinay falocoˈ no salikaka a waywayan kora.—2 Korinto 1:24.

19. Pakayni i saka 2 Rayray 32:7, 8, hano ngaˈay kita timolo a misiˈayaw to masakenakenaay a sapalak ni Satan hani?

¹⁹ O ˈada ita ci Akoma, cowa ka pisawad cingra mipalak to madimadiay sikawdan ni Yihofa. (1 Pitiro 5:8; Paˈarawan 2:10) Ci Satan ato mikotoday ciraan a tamdaw mihalakaay mikeceng kitaanan midoko ci Yihofaan. Soˈlin matalaw kita, aka misawad to pihakelongan! (Limoˈot 7:21) Padadotocay ci Yihofa a mikapot kitaanan, soˈlin mikeceng ko mikowanay to demak ita, wa padadotoc Cingra a midama kitaanan.—ˈOsien ko 2 Rayray 32:7, 8.

20. Wa seteken iso ko falocoˈ midemak to maanan hani?

²⁰ Itini i saka 1 hahekalan a Krisciyang sanay pasowal to mikowanay: ‘Midofdof tamowanan eca ka pidofdof to Kawas, o moecelay i pinengneng no Kawas hokira, o kamo ko mamisaˈosi. O manengnengay matengilay niyam a demak, cowa ka ngaˈay mihawad a pasowal.’ Nanay ira ko malecaday a saˈosi no falocoˈ ita!—Dmak 4:19, 20.