1, 2. 1) Diosan arunakap yatiyañajj jarktʼasi ukhajja, ¿kunatsa jan sustjasiñasäki? 2) ¿Kunanakatsa aka yatichäwin yatjjataskañäni?

KHÄ 2018 maranjja, 223.000 jila yatiyirinakaw kawkjanakantï Diosan arunakap yatiyañajj jarkʼatäki, jan ukajj jan walit uñjatäki uka cheqanakan jakasipjjäna. Uk yatisajj janiw sustjasiñasäkiti, kunjamtï pasïr yatichäwin yateqawayktanjja, cheqpach cristianonakajj arknaqataw uñjasiñäni (2 Tim. 3:12). Jakasktan ukansa yaqha cheqanakansa, gobiernonakajj mä akatjamatwa Jehová Diosar serviñ jarktʼapjjaspa.

² Gobiernonakajj Diosan arunakap yatiyañ jarktʼapjjaspa ukhajja, inas akham jisktʼassna: “¿Diosajj yupaychirinakapar jaytanukjjpachïstuti? ¿Wiñayatakit Jehová Diosar serviñajj jarktʼaspachäni? ¿Kawkjantï Diosar serviñajj jan jarkʼatäki uka cheqar sarjjañajat wakisispa?” sasa. Uka jisktʼanakaruw aka yatichäwin qhanañchaskañäni. Diosar serviñajj markasan jarktʼasispa ukhajj kunsa Jehová Diosar serviskakiñatakejj lursna, kunanakatsa amuyasiñasaraki ukanakatwa yatjjataskañäni.

3. 1) Kunjamtï 2 Corintios 11:23-27 qellqatan siskejja, ¿kuna jan walinakansa apóstol Pablojj uñjasïna? 2) ¿Kunsa apóstol Pablon sarnaqäwipajj yatichistu?

³ Diosan arunakap yatiyañajj jarktʼaski ukhajja, ‘Jehová Diosajj jaytanukjjpachïstuwa’ sasaw amuysna. Ukampis janiw ukhamäkiti. Apóstol Pablot parltʼañäni. Juparojja, Diosajj suma jaqetwa uñjäna, ukatwa Griego Arut Qellqatanakat 14 cartanak qellqäna, yaqha markanakan yatiyañapatak khitat apostolorakïnwa. Ukhamäkchïnsa Pablojj arknaqataw uñjasïna (2 Corintios 11:23-27 liytʼañataki). ¿Kunsa Pablon  sarnaqäwipajj yatichistu? Diosan servirinakapajj arknaqat uñjasipki ukhajja, Jupajj janiw jarkʼaqkapuniti.

4. ¿Kunatsa akapachankir jaqenakajj uñisipjjestu?

⁴ Jesusajja, kunatsa arknaqatäñ suyañasa uk qhanañchänwa. Jupajj sänwa: ‘Jumanakajj janiw akapachankirïpktati, ukatwa akapachajj jumanakar uñisipjjtamjja’ sasa (Juan 15:18, 19). Arknaqat uñjastan ukhajja, Diosajj janis munasjjestaspa ukham janiw amuyañasäkiti, jan ukasti, cheqaparjam sarnaqatasatwa ukhaman uñjastanjja.

5. ¿Jaqenakajj Diosar yupaychañ jarktʼapjjaspati? Uk kunatï Segunda Guerra Mundialan paskäna ukamp qhanañchtʼam.

⁵ Diosan markap contra saytʼirinakajj janiw taqe chʼamani Jehová Diosar yupaychañ jarktʼapkaspati. Waljaniw ukham lurañ munapjje, ukampis janiw puedipkiti. Segunda Guerra Mundialajj apaskäna ukhajja, walja markanakanwa gobiernonakajj Diosan servirinakapar jan sinttʼasis arknaqapjjäna. Janiw Alemania markankir nazi partidonkirinakakejj yatiyañ jarktʼapkänti, Australia, Canadá, markanakankir gobiernonakasa, yaqha markanakankir gobiernonakas jarktʼapjjarakïnwa. 1939 maran guerrajj qalltkäna ukhajja, 72.475 yatiyirinakakiw oraqpachan utjäna. Ukampis guerrajj 1945 maran tukuyjjäna ukhajja, Jehová Diosan bendicionapampejj 156.299 yatiyirinakaw utj-jjäna.

6. ¿Arknaqat uñjasiñajj yanaptʼistaspati? Uk mä experienciamp qhanañchtʼam.

⁶ Ajjsarayañat sipansa, arknaqat uñjasiñajj Diosar jukʼamp serviñatakiw yanaptʼistaspa. Mä chacha warmit parltʼañäni. Jupanakajja, gobiernojj yatiyañ jarktʼkäna uka markanwa jiskʼa wawapamp jakasipjjäna. Uka chacha warmejj ajjsarañat sipansa, precursor regularat serviñwa qalltapjjäna. Ukatakejja, kullakajj walja qollqe pagapkäna uka trabajsa jaytänwa. Jilatajj akham siwa: ‘Yatiyañ jarktʼasitap laykojja, waljaniw Testigonakat yatiñ munapjjäna. Ukhamajja, jaqenakar Bibliat yatichañ qalltañajj jukʼamp facilakïnwa’ sasa. Yatiyañ jarktʼasitapajj yaqhanakarus yanaptʼarakïnwa. Uka pachpa markankir mä jilïr irpirejj akham siwa: ‘Diosan markapat jitheqtapkäna ukanakat waljanejja, tantachäwinakarusa predikiris wasitampiw sarjjapjjäna’ sasa.

7. 1) ¿Kunsa Levítico 26:36, 37 qellqatat yateqsna? 2) Yatiyañajj markasan jarktʼasispa ukhajja, ¿kunsa jumajj luräta?

 ⁷ Yatiyañ jarktʼasajja, Diosar serviñ ajjsarayassna ukwa uñisirinakasajj munapjje. Ukatakejj kʼarinakwa jiwasat parlapjjaspa, policianakampiw utas thaqsuyapjjaspa, juezanakaruw apayapjjestaspa, jan ukajj yaqheparojja, carcelaruw jistʼantayapjjaspa. Ukham mä jukʼaniru carcelar jistʼantayasajj ajjsarayañwa munapjjestu. Jiwasatï ajjsarayassnajja, Jehová Diosar janiw yupaychjjsnati. Cheqas janiw Levítico 26:36, 37 (liytʼañataki) qellqatan parlki uka jaqenakjamäñ munktanti. Jehová Diosarojj taqe chuymaw serviskakiñasa, janipuniw ajjsarayasisajj Jupat jitheqtañ munktanti. Diosar taqe chuyma confiyatas laykojja, janipuniw kunäkipansa ajjsarkañäniti (Is. 28:16, NM). Ukatwa Jehová Diosarojj ‘yanaptʼita’ sasin mayistanjja. Yanaptʼapampejja, wali chʼamani gobiernonakan jarkʼatpachas Diosasar serviskakiñäniwa (Heb. 13:6).

8, 9. 1) ¿Kunsa taqenis amtjjañapa? 2) ¿Kunas mä suma amtar puriñatakejj yanaptʼistani?

⁸ Yatiyañajj jarktʼaski ukhajja, ‘¿Diosar serviñajj jan jarkʼatäki uka cheqar sarjjañajat wakisispa?’ sasinwa jisktʼassna. Ukampis sapa mayniw yaqha cheqar sarjjaniti janicha uk amtjjañapa. Yaqheparojja, inas kuntï nayrïr patak maranakan jakasir cristianonakajj lurapkäna uk yatjjatañajj yanaptʼchispa. Uñisirinakajj Estebanar qalamp kʼupjasin jiwayapkäna uka qhepatjja, Jerusalenankir cristianonakajj Judea ukhamarak Samaria uksa toqenakaruw sarjjapjjäna. Yaqhepasti, Fenicia, Chipre, Antioquía uksanakaruw sarjjapjjarakïna (Mat. 10:23; Hech. 8:1; 11:19). Maysa toqetjja, yaqhepajj inas apóstol Pabljam lurañ amtapjjarakchispa. Jupajja, kawkjantï arknaqañajj qalltaskäna uka cheqanwa qheparäna. Jan waltʼayatas uñjasiñapäkchïnjja, Diosan arunakap yatiyañataki, ukhamarak arknaqat uñjasipkäna uka jilat kullakanakar chʼamañchtʼañatakiw uka cheqan qheparäna (Hech. 14:19-23).

⁹ ¿Kunsa taqe ukanakat yateqsna? Sapa familia pʼeqtʼiriw kunsa lurani uk amtjjañapa. Ukampis janïr amtkasajja, Jehová Diosaruw yanaptʼa mayisiñapa. Esposapasa wawanakapas kunjamas jikjjatasipjje, yaqha cheqar sarapjjani ukhajj kunjamas jikjjatasipjjarakini uka toqenakatwa amuykiptʼañapa. Ukhamajj sapa mayniw llakisiñapa (Gál. 6:5). Janipuniw yaqhanakarojj kun lurañ amtapjjatapatsa juzgañasäkiti.

10. ¿Kuna ewjjtʼanaksa sucursalasa jilïr irpirinakas churapjjestani?

¹⁰ Jarkʼat uñjasiñäni ukhajja, ¿kunas Jehová Diosar serviskakiñatakejj yanaptʼistani? Sucursalaw jilïr irpirinakarojj kunjamsa Diosan Arupsa, Bibliat apstʼat qellqatanaksa katoqañäni uk sapjjani. Kunjamsa tantachasiñäni, kunjamsa predicañäni uksa jupanakaw sapjjarakini. Sucursalatï jilïr irpirinakamp jan comunicasiñ puedkani ukhajj ¿kunsa lurañasa? Ukapachanjja, jilïr irpirinakaw kunsa lurañasa uk Bibliarjama, ukhamarak Bibliat apstʼat qellqatanakarjam ewjjtʼapjjestani, ukaw Jehová Diosar serviskakiñatakejj yanaptʼistani (Mat. 28:19, 20; Hech. 5:29; Heb. 10:24, 25).

11. 1) ‘Kunanakatï Jehová Diosar taqe chuyma confiyañatakejj munaski ukanakajj janiw faltkistaniti’ sasin ¿kunatsa confiysna? 2) ¿Kunsa Biblia, ukhamarak Bibliat apstʼat qellqatanak jarkʼaqañatakejj lursna?

¹¹ Jehová Diosajja, kunanakatï Jupar taqe chuyma confiyaskakiñatakejj munaski ukanak jiwasar churañwa arsuwayi (Is. 65:13, 14;  Luc. 12:42-44). Ukhamajj markapajja, kunanakatï Jupat jan jitheqtañatak munaski ukanak churistaniwa. Ukampis ¿kunsa jiwasajj luraraksna? Jehová Diosar serviñajj jarktʼaskani ukapachanjja, Biblia, ukhamarak Bibliat apstʼat qellqatanak kawkjarus imantsna uk sum amuytʼañasawa. Taqe ukanakjja, jan jikjjatañjamäki uka cheqanakaruw imantsna. Jehová Diosar taqe chuyma confiyaskakiñatakis taqeniw chʼamachasiñasa.

12. Jan amuykay tantachasiñatakejja, ¿kunjamsa jilïr irpirinakajj tantachäwinak wakichtʼapjjaspa?

¹² ¿Kunjamas tantachäwinakajj apasini? Jaqenakatak jan amuykayakiw tantachasiñasa, jilïr irpirinakaw ukhamäñapatak wakichtʼapjjani. Ukatakejj inas akham sapjjchistani: ‘Jiskʼa gruponakanwa tantachasiñäni’ sasa. Tantachasiñ lugarasa horasa sapa kutiw mayjtʼayasirakispa. ¿Kunsa jiwasajj tantachasirinakar jan walinakat jarkʼaqañatakejj lursna? Tantachäwir purisasa sarjjasasa, janiw jachʼat parlañasäkiti, janirakiw tantachäwitakjam isthapitas sarañasäkiti.

13. ¿Kunsa Unión Soviética sasin uñtʼatäkäna uka markankir jilat kullakanakat yateqassna?

¹³ ¿Kunjamsa predicañäni? Sapa lugaranwa predicañajj mayj mayjäni. Niyakejjay Jehová Diosar wal munasstanjja, Reinopat parlañas wal gustchistojja, Diosat kunjamatsa parlapuniñäniwa (Luc. 8:1; Hech. 4:29). Testigonakajj kunjamsa Unión Soviética sasin uñtʼatäkäna ukan predicapjjäna uka toqet parlkasajja, sarnaqäwinakat qellqeri Emily Baran sat warmejj akham sänwa: “Gobiernojj predicañ jarktʼäna ukhajja, Testigonakajj vecinonakaparu, trabajir masinakaparu, amigonakaparuw Diosat parlapjjäna. Ukham lurapjjatapat carcelar apayapjjäna ukhasti, carcelankirinakaruw predicapjjarakïna” sasa. Unión Soviética markankir jilat kullakanakasajja, jarkʼatpachas predicasipkakïnwa. Jiwasajj ukhamarakiw Diosar serviñajj kawkjantï jakasktan ukan jarktʼasispa ukhajj predicaskakiñasa.

14. ¿Kunsa Salmo 39:1 qellqatajj ewjjtʼistu?

¹⁴ Amuyumpiw yaqhanakar kuns sañasa. Jehová Diosar serviñajj jarktʼaski ukhajja, kunapachas ‘amuktʼañ horasäspa’ uk amuyañasawa (Ecl. 3:7). Janipuniw kawkjansa tantachastan, kunjamsa Biblsa Bibliat apstʼat qellqatanaksa katoqtan, ni jilat kullakanakan sutinakapsa yaqhanakar yatiyañasäkiti. Janiw autoridadanakarusa, amigonakasarusa, markasankir familiaranakasarusa, ni yaqha markankir familiaranakasarus ukanak yatiyañasäkiti. Yatiysnajja, jilat kullakanakasaruw jan walin uñjasiysna (Salmo 39:1 liytʼañataki).

15. ¿Kun lurañsa Supayajj munistani, ukat kunsa ukar jan purtʼasiñatakejj lurañasa?

¹⁵ Janipun jiskʼa jan waltʼäwinak utjipan  tʼaqjtañäniti. Tʼaqjtat mä familiajj tukusispawa, Supayajj uk sum yati (Mar. 3:24, 25). Ukatwa kunaymanit tʼaqjtayañ munistu, ukhamat jupa contra saytʼasiñat sipansa jiwaskam jan waltʼayasiñasataki.

16. ¿Kunsa Gertrud Poetzinger kullakat yateqsna?

¹⁶ Wali experienciani cristianonakas ukar jan purtʼasiñatakejj chʼamachasipjjañapawa. Gertrud Poetzinger kullakampita Elfriede Löhr kullakampit parltʼañäni. Alajjpachar sarañatak ajllit uka kullakanakajja, yaqha kullakanakamp chikaw campo de concentración nazi ukankapjjäna. Elfriede kullakajj mayni kullakanak nayraqatan suma discursonak arstʼirïnwa, ukatwa Gertrud kullakajj jupar uñisiñ qalltäna. Envidiasitapat amuyasisajja, Gertrud kullakajj Jehová Diosaruw yanaptʼa mayisïna. Jupajj akham sasaw qellqäna: “Yaqhanakajj jiwasat sipansa jukʼamp sumwa kun lurañs yatipjje, jukʼamp luräwinakwa Diosan markapan katoqapjjaraki, ukat jan envidiasiñwa yateqañasa” sasa. Gertrud kullakajja, Elfriede kullakajj kunja suma chuymanisa uk amuyañatakiw chʼamachasïna, ukaw jupamp sum apasiñatakejj yanaptʼäna. Campo de concentración ukan janiw jiwapkänti, jakäwinakapajj aka oraqen tukuyjjäna ukapachkamaw Diosar jan jitheqtas serviwayapjjaraki. Jiwasatï jilat kullakanakasamp sum apasiñatak chʼamachasiñänejja, janiw tʼaqjtañar purtʼaskañäniti (Col. 3:13, 14).

17. ¿Kunatsa ewjjtʼanakar istʼañasapuni?

¹⁷ Ewjjtʼanak istʼapjjapuniñäni. Jiwasatï pʼeqtʼapkistu uka confiykay jilatanakar istʼañänejja, janiw jan walinakar purtʼaskañäniti (1 Ped. 5:5). Mä precursor jilatat parltʼañäni. Yatiyañajj jarkʼatäki uka mä markanjja, akham sasaw jilat kullakanakar ewjjtʼasïna: “Bibliat apstʼat qellqatanak janiw jaqenakar churapjjätati” sasa. Ukampis uka jilatajja, ewjjtʼanakar jan istʼasaw qellqatanak lakiraskakïna. ¿Kuna jan walinsa ukham luratapat uñjasïna? Mä urojja, yaqha jilat kullakanakampiw jaqenakar Bibliat parlasipkäna (predicación informal), tukuyjjapjjäna uka qhepatjja, policianakaw jupanakar wal jisksupjjäna. Amuyatajja, uka policianakajj jilat kullakanakar arktasaw taqpach qellqatanak jaqenakar mayipjjäna. ¿Kunsa ukat yateqsna? Ewjjtʼanakajj jiwasatak janis waljamäkchejja, istʼañasapuniwa. Jiwasatï pʼeqtʼañatak uttʼayatäpki uka jilatanakar istʼapjjapuniñänejja, Jehová Diosajj bendisistaniwa (Heb. 13:7, 17).

18. ¿Kunatsa jan wakiskir leyinak uttʼayañajj jan walïkaspa?

¹⁸ Janipun jan wakiskir leyinak uttʼayañäniti. Jilïr irpirinakatï uk lurapjjaspajja, mä qʼepsa jilat kullakanakar apjjatapkaspa ukhamäspawa.  Jehová Diosar serviñajj Checoslovaquia sasin uñtʼatäkäna uka markan jarktʼaskäna ukhajj kunas pasäna uka toqet parltʼañäni. Juraj Kaminský jilatajj akham sänwa: “Pʼeqtʼir jilatanakampiru walja jilïr irpirinakampir katuntasïna uka qhepatjja, kunsa jilat kullakanakajj lurapjjañapa, kunsa janiraki ukwa jan katuntat jilatanakajj mä listar wakichapjjäna” sasa. Jehová Diosajja, janiw jan wakiskir leyinak uttʼayañatak permiso churkistuti. Leyinak uttʼayirejja, janiw jilat kullakanakarojj jan walinakat jarkʼaqkiti, jan ukasti, jilat kullakanakjjar munañanïpkaspas ukhamwa uñachtʼayi (2 Cor. 1:24).

19. Supayajj walsa jiwasar arknaqañatak chʼamachaskchejja, ¿kunatakis 2 Crónicas 32:7, 8 qellqatajj chʼamañchtʼistu?

¹⁹ Jiwasar uñisiri Supayajja, khitinakatï Jehová Diosar jan jitheqtas servipki ukanakar arknaqaskakiniwa (1 Ped. 5:8; Apoc. 2:10). Supayasa jupa toqet saytʼasirinakasa, Jehová Diosar serviñ jarktʼasipkakiniwa. Ukampis janiw ajjsarayasiñasäkiti (Deut. 7:21). Jehová Diosaw jiwasampïski, yatiyañajj jarkʼatäkani ukhasa yanaptʼaskakistaniwa (2 Crónicas 32:7, 8 liytʼañataki).

20. ¿Kun lurañsa jumajj amtta?

²⁰ Nayrïr patak maranakan jakir cristianonakat yateqasipjjañäni, jupanakajja uka tiempon apnaqapkäna uka jaqenakarojj akham sapjjänwa: “Diosar istʼañat sipansa jumanakar istʼañatejj Dios nayraqatan walïchejja, jumanak amuytʼjjapjjam. Kunanaktï nanakajj uñjapkta, istʼapkarakta ukanakat parlañjja janiw amuktʼapkiristti” sasa (Hech. 4:19, 20).