1-2. (a) Boasa ndang longang be rohanta molo diorai pamarenta ulaonta manomba Jahowa? (b) Aha do na laho taulas di parsiajaran on?

DI TAON 2018, adong lobi sian 223.000 Sitindangi na tinggal di negara na mangorai manang na mambatasi ulaonta. Tontu, ndang longang be rohanta disi. Songon na taulas di parsiajaran naung salpu, ingkon dianiaya do halak Kristen. (2 Tim. 3:12) Alani i, didia pe hita tinggal, ra boi do tompu diorai pamarenta ulaonta manomba Jahowa.

² Molo diorai pamarenta ulaonta manomba Jahowa di ingananmuna, ra olo do sungkun-sungkun rohamuna, ‘Na so lomo be roha ni Jahowa tu hita umbahen na diorai pamarenta hita? Na so boi be hita manomba Jahowa? Ingkon pinda do ahu tu luat na asing asa boi bebas manomba Jahowa?’ Di parsiajaran on, taulas ma angka sungkun-sungkun on. Jala taulas ma muse songon dia hita boi tongtong manomba Jahowa tingki diorai jala aha do na so boi taulahon.

3. Hombar tu 2 Korint 11:23-27, angka aha do hasusaan na dihilala si Paulus jala aha do na boi taparsiajari sian pengalamanna?

³ Molo diorai pamarenta ulaonta manomba Jahowa, ra olo do didok rohanta na so lomo be roha ni Debata tu hita. Alai ingot ma, ndang na so lomo roha ni Jahowa tu hita umbahen na dipaloas hita dianiaya. Umpamana songon apostel Paulus. Las do roha ni Debata tu ibana. Disurat ibana do 14 angka buku Junani Kristen jala gabe apostel tu angka bangso na asing do ibana. Alai nang pe songon i, godang do hasusaan na dihilala si Paulus. (Jaha 2 Korint 11:23-27.) Sian pengalaman ni si Paulus taboto  ma, dipaloas Jahowa do naposo na dianiaya.

4. Boasa dihasogohon portibi on hita?

⁴ Dipaboa Jesus do boasa masa i tu hita. Didok ibana, dihasogohon portibi on do hita ala ndang sian portibi on hita. (Joh. 15:18, 19) Tingki dianiaya, on ndang patuduhon na so dipasu-pasu Jahowa hita. Alai on patuduhon, na taulahon do na sintong!

5. Marhasil do angka jolma mangorai hita asa unang manomba Jahowa? Patorang ma.

⁵ Marsitutu do angka jolma mangorai hita asa unang manomba Jahowa. Alai ndang marhasil nasida. Pingkirhon ma na masa saleleng Porang Dunia II. Tingki i, angka pamarenta di godang negara mambahen susa angka naposo ni Debata. Ndang holan Nazi di Jerman na mangorai ulaon ni Sitindangi Ni Jahowa, dohot do pamarenta di Australia, Kanada, dohot di inganan na asing. Alai parrohahon ma na masa. Tingki dimulai porang i taon 1939, adong 72.475 Sitindangi di liat portibi on. Alai ala dipasu-pasu Jahowa, dung sae porang i di taon 1945, adong 156.299 Sitindangi. Dua hali lompit do Sitindangi na tamba di tingki i!

6. Nang pe diorai ulaonta, aha do hasil na denggan na boi masa? Paboa ma contohna.

⁶ Nang pe diorai ulaonta, boi do i mambahen hita gabe lam marsitutu manomba Jahowa jala ndang pola mabiar. Umpamana, adong sada keluarga na tinggal di negara na mangorai ulaonta jala adong sada ianakkonna na metmet dope. Alai ndang gabe mabiar nasida alani i, gariada gabe merintis biasa do nasida. Asa boi istrina dohot merintis, kaluar ma istrina i sian parkarejoan na godang gajina. Didok suamina, ala diorai ulaonta, godang do halak na gabe sungkun-sungkun rohana taringot Sitindangi Ni Jahowa. Hasilna, gabe lam godang do na olo marsiajar Bibel. Asing ni i, adong muse hasil na denggan. Sahalak sintua na tinggal di negara na sarupa mandok, godang Sitindangi na so aktif gabe ro muse marpungu jala dohot marbarita.

7. (a) Sian 3 Musa 26:36, 37, aha do na boi taparsiajari? (b) Aha do na laho diulahon hamu tingki diorai ulaonta?

⁷ Tingki diorai angka musu ulaonta, lomo roha ni nasida mambahen hita  asa mabiar laho manomba Jahowa. Ra, didok nasida do angka na so sintong taringot hita. Olo do disuru polisi ro tu jabunta jala dipaksa hita diboan tu pengadilan. Manang adong do piga-piga donganta na dipenjara. Didok roha ni nasida molo adong donganta na di penjara, on mambahen hita gabe mabiar. Alai molo mabiar hita, boi do gabe gale hita manang ndang be manomba Jahowa. Tontu, ndang olo hita gabe songon halak na didok di 3 Musa 26:36, 37. (Jaha.) Unang ma tapaloas biar ni roha mambahen hita gabe ndang manomba Jahowa. Pos ma rohanta tu Jahowa jala unang mabiar. (Jes. 28:16) Martangiang ma hita mangido tudu-tudu sian Jahowa. Pos ma rohanta, ndang adong manang ise pe na boi mangambati hita manomba Jahowa.​—Heb. 13:6.

8-9. (a) Aha do keputusan na ingkon dibahen sasahalak manang kepala keluarga? (b) Aha do na boi mangurupi sasahalak mambahen keputusan?

⁸ Molo diorai pamarenta ulaonta di ingananmuna, ra didok rohamuna tumagon ma hamu pinda tu negara na asing asa boi bebas manomba Jahowa. Hamu sandiri do na mambahen keputusan taringot i. Alai andorang so mambahen keputusan, manat ma parsiajari hamu taringot na diulahon halak Kristen di abad na parjolo tingki dianiaya. Dung mate si Stepanus, pinda do angka sisean na di Jerusalem tu Judea dohot tu Samaria jala adong do na pinda tu Penisia, Siprus, dohot tu Antiokia. (Mat. 10:23; Ul. 8:1; 11:19) Alai parrohahon ma muse na masa di tingki na asing. Tingki dianiaya jala diorai halak Kristen di abad na parjolo, ndang olo si Paulus pinda sian luat i. Nang pe berbahaya, tongtong do ibana marbarita di luat i jala patoguhon roha ni angka dongan na marsak ala dianiaya.​—Ul. 14:19-23.

⁹ Sian contoh i, aha do na boi taparsiajari? Ganup kepala keluarga do na mambahen keputusan ingkon pinda do nasida manang na ndang. Andorang so mambahen keputusan, ingkon martangiang jala manat ma dipingkirhon ibana taringot situasi ni keluargana. Jala ingkon dipingkirhon do muse aha na boi masa molo pinda nasida. Di tingki sisongon on, ganup halak ingkon “martanggung jawab tu na niulahonna be”. (Gal. 6:5) Alani i, unang ma tauhumi keputusan na dibahen halak na asing.

10. Aha do tudu-tudu na laho dilehon kantor cabang dohot angka sintua?

¹⁰ Songon dia do asa boi hamu tongtong manomba Jahowa tingki diorai? Lehonon ni kantor cabang do tudu-tudu tu angka sintua di huriamuna. Paboaon ni nasida do songon dia carana asa boi dapotmuna angka publikasi, songon dia asa boi marpungu dohot marbarita. Molo ndang boi dihubungi kantor cabang angka sintua, angka sintua i do na mangurupi hamu dohot sude angka na di huria asa boi tongtong manomba Jahowa. Lehonon ni nasida do tudu-tudu tu hamu sian Bibel dohot sian publikasi.​—Mat. 28:19, 20; Ul. 5:29; Heb. 10:24, 25.

11. Boasa pos rohamuna sai dapotmuna do sude na dihaporluhon asa tongtong togu haporseaonmuna, jala aha do na boi diulahon hamu asa tongtong adong Bibel dohot publikasi di hamu?

¹¹ Marjanji do Jahowa, sai dapot ni naposona  do sude na dihaporluhon asa tongtong togu haporseaon ni nasida. (Jes. 65:13, 14; Luk. 12:42-44) Alani i, pos ma rohamuna bahenon ni organisasi do godang cara laho mangalehon angka na porlu di hamu asa tongtong setia. Alai aha do na boi ulahononmuna? Tingki diorai ulaonta, lului ma inganan na denggan laho manabunihon Bibel dohot angka publikasi na adong di hamu. Manat ma hamu asa unang asal dipeakhon hamu angka publikasi na dicetak manang elektronik di inganan na mura tarida. Sude hita, ingkon marsitutu do asa boi tongtong togu haporseaonta.

12. Songon dia do angka sintua mambahen pengaturan asa boi marpungu jala ndang mambahen halak curiga?

¹² Songon dia do taringot parpunguanta? Bahenon ni angka sintua do pengaturan asa boi marpungu jala ndang mambahen halak curiga. Ra, bahenon ni angka sintua do parpunguan i gabe piga-piga kelompok na gelleng, jala jotjot do paubaon ni nasida tingki dohot ingananna. Nanget-nanget ma soaramuna mangkatai tingki ro manang tingki mulak sian parpunguan. On sada cara laho manjaga angka dongan di huria. Jala boi do dipangke hamu pangkean na so mambahen angka halak curiga.

13. Aha do na boi taparsiajari sian angka donganta di Rusia?

¹³ Ndang sai sarupa situasi di sude inganan taringot ulaon marbarita. Alai ala holong rohanta tu Jahowa jala las rohanta paboahon taringot Harajaonna, sai adong do cara laho marbarita. (Luk. 8:1; Ul. 4:29) Sahalak sejarawan di Rusia na margoar si Emily B. Baran paboahon taringot angka Sitindangi di Rusia. Didok ibana, “Tingki diorai pamarenta ulaon marbarita, tongtong do angka Sitindangi marbarita tu tetangga, dongan sakarejo, dohot tu halak na asing. Tingki dipenjarahon nasida alani i, tongtong do nasida marbarita tu angka halak na adong di penjara.” Nang pe diorai ulaon marbarita di Rusia, tongtong do marbarita angka donganta na tinggal disi. Alani i, molo diorai ulaon marbarita di ingananmuna, tiru hamu ma nasida!

14. Aha do sipasingot na adong di Psalmen 39:2?

¹⁴ Manat ma taringot paboahon informasi. Tingki diorai ulaonta, ingkon taboto do adong do ‘tingkina hohom’. (Pjm. 3:7, Bibel siganup ari) Ingkon manat do hita asa unang paboahon angka informasi songon goar ni angka donganta, didia hita marpungu, songon dia hita marbarita, jala songon dia hita mandapot angka na diparade organisasi. Unang ma tapaboa i tu pamarenta, tu dongan manang tu  sisolhotta na adong di negaranta manang di negara na asing. Molo taulahon i, boi do i mambahen jea tu angka donganta.​—Jaha Psalmen 39:2.

15. Aha do na dihalomohon Sibolis masa tu hita, jala aha do na ingkon tapasiding?

¹⁵ Unang ma tapaloas masalah na gelleng mambahen hita ndang marsada. Diboto Sibolis do, molo marbadai sada keluarga ndang boi hot keluarga i. (Mrk. 3:24, 25) Alani i, sai marsitutu do ibana asa unang marsada hita. Jala lomo rohana asa marbadai hita dohot angka donganta.

16. Aha do na boi taparsiajari sian donganta si Gertrud Poetzinger?

¹⁶ Halak Kristen na togu parale-aleonna tu Jahowa pe, ingkon manat do taringot tu jorat on. Pingkirhon ma contoh ni dua donganta borua na miniahan, i ma si Gertrud Poetzinger dohot si Elfriede Löhr. Dipenjara do nasida rap dohot donganta borua na asing di kamp konsentrasi Nazi. Mangiburu do si Gertrud ala si Elfriede na pasahathon angka hata na patoguhon tu angka dongan di kamp. Alai ujungna, disolsoli si Gertrud do i jala martangiang do ibana tu Jahowa asa diurupi. Didok ibana di suratna, “Molo ummalo manang gumodang tanggung jawab na dapot ni donganta sian hita, ingkon las do rohanta disi.” Aha do na mambahen si Gertrud ndang be mangiburu? Marsitutu do ibana mangida angka na denggan sian si Elfriede. Ujungna boi do nasida rap kaluar sian kamp konsentrasi jala tongtong setia sahat tu na mate. Alani i, molo adong parsoalanta dohot donganta jala marsitutu hita pasaehon i, boi ma hita tongtong marsada.​—Kol. 3:13, 14.

17. Boasa ingkon tongtong taihuthon tudu-tudu sian organisasi ni Jahowa?

¹⁷ Tongtong ma ihuthon tudu-tudu. Tadapot do laba molo mangihuthon tudu-tudu sian angka dongan na martanggung jawab di organisasi. (1 Ptr. 5:5) Umpamana, tingki diorai ulaonta di sada negara, dilehon angka dongan na martanggung jawab disi do tudu-tudu asa unang dilehon be publikasi na tercetak tingki marbarita. Alai sahalak donganta baoa perintis, ndang mangihuthon tudu-tudu i. Aha do akibatna? Dung sae ibana dohot donganna kesaksian tidak resmi, adong ma polisi na ro manungkuni nasida. Hape, nunga adong sahalak na karejo di pamarenta na mangihut-ihuthon nasida jala dibuat ma angka publikasi naung dilehon nasida i. Aha do na boi taparsiajari sian pengalaman on? Ingkon tongtong ma taihuthon tudu-tudu nang pe sipata ndang setuju hita tu tudu-tudu i. Sai dipasu-pasu  Jahowa do hita molo taoloi angka dongan na dipillit Jahowa laho manguluhon hita.​—Heb. 13:7, 17.

18. Boasa ndang boi hita mambahen peraturan na so porlu?

¹⁸ Unang ma bahen peraturan na so porlu. Molo dibahen angka sintua peraturan na so porlu, boi do i mambahen susa dongan na asing. Donganta si Juraj Kaminský paboahon aha na masa tingki diorai ulaonta di Cekoslovakia najolo. Didok ibana, “Dung dipenjarahon godang sintua dohot angka dongan na martanggung jawab, piga-piga donganta na so dipenjarahon gabe manguluhon huria dohot wilayah. Dibahen nasida do peraturan sandiri tu angka dongan na asing. Jala dipaboa nasida do aha na boi dohot na so boi diulahon.” Sasintongna, ndang dilehon Jahowa tu hita hak laho mangatur dongan na asing. Molo adong sasahalak na mangulahon i, boi do on gabe mambahen jea tu donganna. Jala gabe songon tuan na mangarajai haporseaon ni donganna do ibana disi.​—2 Kor. 1:24.

19. Hombar tu 2 Kronika 32:7, 8, boasa boi barani hita ndang soal aha na diulahon Sibolis?

¹⁹ Marsitutu do musunta Sibolis asa dianiaya angka naposo ni Jahowa. (1 Ptr. 5:8; Pgk. 2:10) Lomo do roha ni Sibolis dohot sude na mangihuthon ibana asa diorai ulaonta manomba Jahowa. Alai, unang ma mabiar hita! (5 Mus. 7:21) Didongani Jahowa do hita jala sai urupanna do hita nang pe diorai ulaonta.​—Jaha 2 Kronika 32:7, 8.

20. Aha do na ingkon taulahon?

²⁰ Anggiat ma hita songon halak Kristen di abad na parjolo. Didok nasida tu pamarenta di tingki i, “Hamu sandiri ma na manontuhon, dia do na sintong di adopan ni Debata, manangihon hamu do manang manangihon Debata? Alai ndang tarbahen hami so mangkatahon taringot tu na niida dohot na binegenami.”​—Ul. 4:19, 20.