1-2. (a) Rofyor pamarenta sya sidwarek ko ido, rosai ḇefnai fa na kokandor ḇa? (b) Rosai na kawos ro farkarkor inenya?

RO 2018, manbaryas ankankinem ḇeḇye sisyadi ro 223.000 sḇarek ro sup-sup fararur koḇena sidwarek ro na. Na kokandor mankenem ḇa. Imnis kofarkor kwar ro farkarkor ḇepon ya, snonkaku Kristen ḇekaku sifawi nari sismai wayam. (2 Tim. 3:12) Inja, ro moḇ sairirya koḇarek ro ya, na kokandor monda ḇa ḇo pamarenta sya sidwarek ko fa kosyom Allah koswar ya, Yahwe I.

² Rofyor pamarenta ro moḇ ḇarek ro ya sidwarek samsyom koḇena ḇe Yahwe ido, imbude na wafuken fakfuken nane, ’Ḇaḇewayam ine fyasnaiḇair Yahwe imarisen inko wer ḇa ke? Ḇaḇedadwarek ine ifrur fa nkosyom ḇe Yahwe I wer ḇa ke? Fandun fa yakrenbur ḇe moḇ na yamkei fa yafarmyan ḇe Allah ke?’ Ro farkarkor ine, na kawos fakfuken anskoine. Na kawos kako moḇsa na kosyom pdef ḇe Yahwe I rai fafisu sidwarek fararur koḇena ma rosai fandun fa kofrur awer na.

3. Raris ḇefas ro 2 Korintus 11:23-27 ya, ḇaḇewayam rosai monda nkur Manwawan Paulus i, ma rosai kofarkor ro fawawar ḇyenane?

³ Fafisu pamarenta sidwarek samsyom koḇena, imbude na kun kakara ḇesasar ḇo koḇe Yahwe imarisen ko wer ḇa. Ḇape koswarepen, rarirya ḇaḇeri. Kokarapan Manwawan Paulus i. Allah imarisen faro i. Ḇyuk syowi ḇeba ḇe Paulus fa fyas syapram ri 14 ḇero Syap Yunani Kristen ma kyur i  ḇe manwawan faro er syakam. Rarirya mboi daksmai wayam ḇemarḇak kako. (Wasya 2 Korintus 11:23-27.) Paulus fawawar ḇyenane nfarkor ko fyorno ido Yahwe ryir ḇaḇewayam fa nkur manfamyan ḇesoasuser ḇyesya.

4. Rosai ḇefnai fa dunya ine sayin ko?

⁴ Yesus ikofenfasnai ḇe ko rosai ḇefnai nari sembroḇ ko. Doḇe sayin ko snar koḇeoser kuker dunya ine ḇa. (Yoh. 15:18, 19) Inja, sewayam ko ido fyasnaiḇair ḇa kosmai barakas ro Yahwe I ḇa. Oroḇa mboi, fyasnaiḇair koisya kofrur roi ḇenapes ya kwar!

5. Snonkaku ḇaken saprop monda na sifrur fa komnai kosyom ḇe Yahwe ke? Fasnaiḇair pan.

⁵ Snonkaku ḇaken saprop monda na sipok ḇa fa sifrur komnai kosyom ḇe Allah Ḇepoik Syadi, Yahwe I. Ḇebor ḇembroḇ konsya sisewar mboi sismai royoḇa. Kokarapan roi ḇeḇesya ro Mamamun Dunya II. Ro fyor ya, ro sup ḇebor pamarenta sewayam kaku Allah kawasa Ḇyesya. Sidwarek kaku fararur ro Saksi Yahwe kwar, Nazi sko ro Jerman monda ḇa mboi pamarenta ḇero Australia, Kanada, ma sup ḇesena kako. Ḇape rosai ḇeḇesya ya? Fafisu mamamun ya irandak ro 1939, ro supswan ḇesiper manḇaryas ri 72.475 sisya. Ḇape, fafisu mamamun imnai ro 1945, sikofenḇair manḇaryas ri 156.299 sisya. Manḇaryas sya dandonek seja seke isof rarwan risuru syadi. Inema barakas ro Yahwe dirya!

6. Ḇaḇewayam na dun roi ḇepyum rosai? Fawar pan.

⁶ Kakuḇae, fafisu ḇaḇewayam ndrama na komkak kero. Mboi ḇaḇewayam dun roi ḇepyum kako. Nane nadif ko fa kofarmyan ḇe Yahwe kuker sne ḇesiper. Imnis raris, imbeswa ḇena inaimkun oso skoḇarek ro sup oso pamarenta ḇero diwa sidwarek samsyom koḇena. Imbeswa suine sumkak ma sususu ḇa, ḇesyaḇo susun ro fararur perintis biasa. Ḇesyadi ya eḇe bin i syae ro fararur ḇyeja. Eḇe snon ya doḇe ḇaḇedadwarek ifrur snonkaku ḇebor siḇe sifawi mansei Saksi Yahwe sya. Bon ya, ipyan syadi fa irandak farkarkor Refo kuker snonkaku sya. Bon ḇepyum ḇeseya wer isya. Penatua oso  ḇero sup ani kako doḇe ḇebor ḇefarmyan ḇe Yahwe wer ḇa kwar sya siso kaḇer fananjur ma ḇaḇeḇaryas ya.

7. (a) Rosai kofarkor ro Imamat 26:36, 37? (b) Fafisu sidwarek kaku ko, rosai nari wafrur ya?

⁷ Fafisu mbroḇ koḇesi sidwarek kaku ko, siḇe sifrur fa komkak ḇo kofarmyan ḇe Yahwe wer ḇa. Imbude sfar pampyam roi ḇekaku ḇa ḇekur ko, siwan ḇeḇarara sya fa sisewar rum koḇena, semankara ko, ḇaido sisun ḇeḇeso ro ko ḇe bui. Skara nari komkake fafisu korower ono sisya sisun si ḇe bui kwar. Komkak faro si ḇaido roi imbe sifrur yoḇ ko na ido, na fawawas kofarmyan ḇe Yahwe I wer ḇa. Komewer komnis snonkaku ḇeḇeḇair ro Imamat 26:36, 37. (Wasya.) Kopok komam monda ḇa makakak nafnai fa koryaḇ wer ḇa ḇaido komnai kofarmyan ḇe Yahwe. Kokyar kaku faro Yahwe, kokaḇaḇaḇ ma koḇor famfnom awer. (Yes. 28:16) Konadi sambraḇ kor Yahwe farkankin Ḇyeja. Kofawi snar Yahwe fafnoḇek Ḇyeja, pamarenta ḇesambraḇ kako na ipok idwarek ko ḇa fa kosyom ḇe Allah koḇedi kuker soasuser.​—Ibr. 13:6.

8-9. (a) Ḇeḇukor ro kina ḇaido snonkaku Kristen oser-oser snemuk rosai fandun fa sun ya? (b) Rosai na ḇefnoḇek snonkaku oso fa dun snemuk ḇepyum?

⁸ Fafisu pamarenta ḇero moḇ Bedi sidwarek samsyom koḇena ido, imbude kwara fandun ke wakrenbur ḇe sup bondi nari wamkei fa wasyom ḇe Yahwe I. Inema roi nari kwinfir ro mankundaw. Snonkaku oso na ifrur pyan ḇe Au ḇa. Wafrur snemuk ḇaime, ipyum ya kwara resari rosai snonkaku Kristen ḇero abad randak sifrur fafisu sismai wayam. Fyor siso Stefanus kuker karui isof imar raposa, manwawan ḇero Yerusalem sya sibur sfamok sup Yudea ḇesiper ma Samaria. Ono sisya sra ḇe Fenisia, Siprus, ma Antiokia. (Mat. 10:23; Farfyar 8:1; 11:19) Imbape, na komam rosai Manwawan Paulus ifrur ya fyor ḇaḇewayam nkur snonkaku Kristen ro abad randak sya. Kyinfir fa ḇyarek pdef ro moḇ fararur ḇaḇeḇaryas sidwarek ro na. Ine bisa dun roi ḇemun ḇe i mboi fyandun ḇa, snar imarisen ḇyaryas ma syambraḇser naek srar ḇero mnu-mnu anna sya.​—Farfyar 14:19-23.

⁹ Farkarkor rosai kun ro farfyar nane? Ḇeḇukor ro kina oser-oser fandun fa sun snemuk ḇekur roi ine. Sifrur snemuk ḇaime, fandun fa senadi ma skara pyum resari kina sesi. Siḇe sra ḇe moḇ ḇese ido, nari nun payamyum ḇe si ke roḇa. Faro roi ine, snonkaku Kristen oser-oser fandun fa ’ikamar kamnam ḇyena’. (Gal. 6:5) Kopok komankara awer snonkaku ḇese faro snemuk sun na.

10. Akurfasnai rosai nari kantor cabang ma penatua sya sḇuk ḇe ko na?

¹⁰ Moḇsa na wafarmyan pdef ḇe Yahwe fafisu sidwarek ko? Kantor cabang nari ḇyuk akurfasnai ma anun ḇepyandam faro penatua sya ḇekur nyan rariso sismai roḇean rur ya rai, moḇsa sifrur fananjur, ma sḇaryas rai. Kantor cabang jadi fa sawos beri kuker penatua sya ḇa ido, nari penatua siso ḇefnoḇek Au ma ḇero sidang sya kam fa sisyom ḇe Yahwe I pdef. Nari sḇuk akurfasnai ḇeknam ro Refo ma roi organisasi fyasos kwar na.​—Mat. 28:19, 20; Farfyar 5:29; Ibr. 10:24, 25.

11. Rosai ḇefnai fa wakyar kaku nari wasmai roi wafandun na fa swambraḇser kakyar Bena, ma rosai na wafrur fa mamwarek Refo ma publikasi ḇesena?

 ¹¹ Yahwe ḇyeasas kwar manfamyan Ḇyesi nari sismai roi sfandun na fa sisambraḇser kakyar sena. (Yes. 65:13, 14; Luk. 12:42-44) Inja, wakyar kaku Yahwe organisasi Ḇyedi nari ifrur sairirya monda fa fyasos roi wafandun na fa swambraḇser kakyar Bena. Ḇape, roi fandun fa wafrur ya isya. Fafisu sidwarek fararur koḇena, swewar moḇ ḇepyum fa wakram Refo Bedi ma publikasi ḇesena, ḇeḇecetak ḇaido ḇeḇe elektronik na. Wasasor Au insama rwir famfnom awer ro moḇ na ḇepyan fa snonkaku sya sisrow na. Ko oser-oser fandun fa kosewar kaku fa kosambraḇser kakyar koḇena.

12. Rariso penatua sya nari sfasos pyum fananjur ya rai?

¹² Fananjur koḇena ro minggu nakam na rariso? Penatua sya nari sfasos pyum insama sifrur pdef fananjur mboi kuker nyan na mbroḇ sya sifawi na ḇa. Sfarkin Au fa waso fananjur ro raryur kasun monda, ma sifadadwer oras ma moḇ sifrur fananjur ya. Na mam mnis payamyum ro naek srar ḇesesya kuker wawos naba awer fyor warama ma wabur ro fananjur ya. Imbude na wasansun Au kuker sansun wasun ro rasras na monda.

13. Rosai kofarkor ro naek srar koḇesi ḇero Uni Soviet ḇepon iwara sya?

¹³ Nyan kofrur fararur ḇaḇeḇaryas ro moḇ oser-oser nari namnis kam ḇa. Ḇape, koswar Yahwe I ma komarisen kofawar Karajan Ḇyedi ḇe ḇesesya, inja na kosmai nyan fa koḇaryas. (Luk. 8:1; Farfyar 4:29) Emily Bruderle Baran, bin ḇefawi sejarah, ikofen ḇekur fararur ḇaḇeḇaryas Saksi Yahwe ḇero Uni Soviet ḇepon iwara, radine, ”Fafisu pamarenta siwan Saksi Yahwe sya fa sḇaryas ḇe ḇesesya awer, Saksi sya sfafyar [kuker] ḇeḇarek fanam kuker si sya, min fararur, ma bati sesi. Roi sifrur nane nafnai fa sisun si ḇe kamp kerja paksa, mboi Saksi sya sisewar fa sḇaryas faro ḇesmai bui ḇesesya.” Sidwarek fararur ḇaḇeḇaryas ro Uni Soviet, mboi naek srar siḇaryas pdef. Pamarenta ḇero moḇ Bedi sidwarek fararur ḇaḇeḇaryas ido, iḇye kada baryas pdef raris si!

14. Swarapepen rosai kosmai ro Mazmur 39:1 ya?

¹⁴ Kosasor ko ro roi imbe kawos ḇe ḇesesya. Rofyor sidwarek ko, fandun fa kofawi fafisu risai na ”kofasise”. (Pkh. 3:7) Fandun fa kokram roi ḇeḇe kankunes, imnis ra naek srar koḇesi sisnosna, moḇ kofanjur ro ya, moḇsa kofrur ḇaḇeḇaryas ya rai, ma rariso kosmai roḇean rur  ya rai. Kopok kokofenḇair awer roi nane ḇe ḇepoik sya ḇaido bati ma karyer koḇesya ḇeḇarek ro sup koḇedi ḇaido sup ḇesena. Kofrur rarirya ḇa ido, nari kofrur susa naek srar koḇansi.​—Wasya Mazmur 39:1.

15. Rosai Setan syewar fa ifrur yoḇ ko, ma rosai fandun fa kofrur ya?

¹⁵ Kopok komam monda awer roi kasun nafnai fa koḇeoser ḇa. Setan ifawi kina oso sḇeoser ḇa ido na sipok ḇa. (Mrk 3:24, 25) Inja, Setan syewar nyan fa ifrur koḇeoser ḇa. Rarirya, kyara nari kombroḇyae ko ḇo kombroḇ i ḇa.

16. Roi ḇepyum rosai Srar Gertrud Poetzinger fyasnai ya?

¹⁶ Snonkaku Kristen ḇefarmyan fyoro kwar kako fandun fa sisasor si ro roi ine. Kwarapan fawawar ro imbesrar risuru ḇesmai ramrem, Gertrud Poetzinger ma Elfriede Löhr. Susmai ro bui fnoḇek imbesrar Kristen ḇesesya ro kamp konsentrasi Nazi. Gertrud imarisen ḇa fafisu Elfriede dun faya ḇesambraḇser imbesrar ḇesesya ḇero bui. Ḇarpur mura, Gertrud imai ma dor Yahwe fa ifnoḇek i. Fyas ḇo doḇe, ”Fandun fa komarisen fyor ḇesesya sismai samambraḇ syadi ḇaido fakamamar ḇeba syadi ro ko.” Moḇsa isawen sneḇaḇir ḇeradirya rai? Gertrud myam monda faro Elfriede rari ma kenem ḇepyum ḇyena. Rarirya, ḇyebati ḇepyum kaḇer kuker Elfriede. Sukame susaebur kamp konsentrasi kuker payamyum ma sufarmyan soasuser ḇe Yahwe isof ro kankenem suḇena ro supwan namnai. Kosewar kaku fa kofrur mnis samswen kuker naek srar koḇesi ido, nari koḇeoser pdef.​—Kol. 3:13, 14.

17. Rosai ḇefnai fandun fa kosouser akurfasnai sḇuk ḇe ko na?

¹⁷ Kosouser akurfasnai sḇuk ḇe ko na. Rofyor kosouser akurfasnai ḇerama ro penatua kokyar sya, nari kobinkwanbur samswen na. (1 Ptr. 5:5) Imnis raris, ro sup oso fararur koḇena sidwarek ro ya, penatua sya sikofenḇair kwar ḇe manḇaryas sya fa sḇuk syap na awer faro snonkaku sisrow ro ḇaḇeḇaryas. Ḇape, naek ḇe perintis oso iso akurfasnai ani ḇa. Rosai bon ya? Fyoro ḇa fafisu sḇaryas ramnai, polisi sya srama sifuken si. Sifawi ḇa mboi ḇeḇarara oso iyomuser si ma myam sirwas syap-syap na kwar. Rosai kofarkor ro fawar ine? Imbude kokara komarisen mankun ḇa faro akurfasnai sḇuk na ḇape fandun fa kosouser na. Yahwe ḇyebarakas ko ḇesyakwar fafisu kosouser penatua ḇefarkin konsya.​—Ibr. 13:7, 17.

18. Rosai ḇefnai fa kofrur sasoser ḇesena awer?

 ¹⁸ Kofrur sasoser ḇesena awer. Rofyor penatua sifrur sasoser ḇesena ido, nari sifrur samswen ḇesesya. Naek Juraj Kaminský fyar roi ḇeḇesya fafisu sidwarek fararur koḇedi ro Cekoslowakia ḇepon iwara, doḇe, ”Rofyor sfor penatua riḇeso ramnai, naek ḇeḇeso ḇefarkin sidang sya sifrur ro mankunsi sasoser ḇesena faro manḇaryas sya, sikofenḇair rosai fandun fa sifrur ma sifrur ḇa na.” Yahwe ḇyuk hak ḇe ko ḇa fa kofrur snemuk faro snonkaku ḇesesya. Snonkaku ḇefrur sasoser faro ḇesesya ima myam payamyum naek srar ḇyesi ḇa. Ḇape, syewar fa ifrur mankundi ḇe tuan faro naek srar kakyar sena.​—2 Kor. 1:24.

19. Imnis ḇefas 2 Tawarikh 32:7, 8, Setan syewar pdef mboi rosai ḇefnai fa na komkak ḇa?

¹⁹ Mbroḇ koḇedi, Setan Ibiris i, syewar pdef fa iwayam manfamyan ḇeosasuser Yahwe Ḇyesya. (1 Ptr. 5:8; Why. 2:10) Setan ma ḇeso i sya na sisewar fa sidwarek samsyom koḇena ḇe Yahwe I. Ḇape, ine nafnai awer ko fa komkak ma kosusu! (Ul. 7:21) Yahwe isya ryous ko, ma nari isaramper ko ḇesya kwar, iba syadi fafisu sidwarek fararur koḇena.​—Wasya 2 Tawarikh 32:7, 8.

20. Rosai snemuk Bedi?

²⁰ Kona wos ḇemuk imnis naek srar koḇesi ḇero abad randak sya. Ro ḇarpon ḇeḇarara ro fafisu ya sikofen, ”Mankun mkokara, rosai ḇenapes ro ḇarpon Allah: koso mkoke roḇa koso syadi faro Allah. Snar nari inkomnai ḇaḇeri fa inkawawos ro roi inko mam ma inko mnaf kwar.”​—Farfyar 4:19, 20.