1-2. (a) Mase lang pala tarsonggot hita sanggah ilarang pamarentah horja parambilanonta? (b) Bani artikel on, aha ma na laho iulas hita?

BANI tahun 2018, lobih humbani 223.000 hasomanta tading i nagori na manlarang atap pe mambatasi horja parambilanonta. Tontu lang tarsonggot hita manangar ai. Bani artikel na salpu, domma iulas hita ganup halak Kristen maningon iparburu. (2 Tim. 3:12) Halani ai, ija pe hita tading, boi do sompong ilarang pamarentah hita manombah Jahowa, Naibatanta na parholong in.

² Sanggah ilarang pamarentah horja parambilanonta, ra do sungkun-sungkun ibagas uhurta, ‘Ai na lang iharosuhkon Jahowa do hita ase masa sisonai? Gabe maronti do hita mangidangi Jahowa halani ai? Maningon pindah do ahu ase boi bebas mangidangi Jahowa?’ Bani artikel on iulas hita ma balos ni sungkun-sungkun ai. Iulas hita ma homa sonaha hita boi totap mangidangi Jahowa hassi pe iparburu, janah aha do na lang boi ihorjahon hita bani panorang ai.

3. (a) Domu bani 2 Korint 11:23-27, sonaha si Paulus iparburu? (b) Aha do na boi iparlajari hita humbani pangalaman ni si Paulus?

³ Sanggah iparburu, ra do iagan hita lang marosuh be Jahowa mangidah hita. Tapi sedo halani ai ase hita iparburu. Dingat ma apostel Paulus hinan. Malas tumang do  uhur ni Jahowa mangidahsi. Isuruh do ia manuratkon 14 buku ibagas Kitab-Kitab Yunani Kristen. Gabe apostel do homa ia bani bangsa na legan. Hassi pe sonai, hona parburu do ia. (Basa 2 Korint 11:23-27.) Humbani pangalaman ni si Paulus, ibotoh hita ma ipaturut Jahowa do juakjuak-Ni iparburu.

4. Mase dunia on sogam hubanta?

⁴ Ipatorang Jesus do mase hita iparburu. Ia mangkatahon halani seng humbani dunia on, gabe ihasogamkon halak ma hita. (Joh. 15:18, 19) Jadi anggo iparburu, on lang patuduhkon na so ipasu-pasu Jahowa be hita. Tapi on patuduhkon sintong do na ihorjahon hita!

5. Ai boi do ilanglangi halak hita manombah Jahowa? Patorang.

⁵ Tongtong do marusaha halak mambahen hita lang be manombah Jahowa. Tapi soya-soya do ganupan ai. Pardiateihon ma aha na masa sadokah Porang Dunia  II. Bani panorang ai iparburu do juakjuak ni Naibata i piga-piga nagori. Umpamani, i Jerman ilarang Nazi do hita manombah Jahowa. Iparburu do homa hita i Australia, i Kanada, ampa i nagori-nagori na legan. Tapi pardiateihon ma sonaha ujungni. Bani tahun 1939, sanggah mulai porang ai dong 72.475 Saksi-Saksi Jahowa i sab dunia on. Tapi bani tahun 1945, dobkonsi salosei porang ai gabe 156.299 ma bilangan ni Saksi Jahowa. Tontu halani ipasu-pasu Jahowa do ase dua hali lompit tambah bilanganta.

6. Sanggah iparburu hita, hasil na dear aha ma na boi idapot? Bere ma contoh.

⁶ Sanggah iparburu hita, boi do on mambahen hita lambin ringgas mangidangi Jahowa. Umpamani, dong suami istri pakon boruni tading i nagori na manlarang horja parambilanonta. Hassi pe sonai lang mabiar sidea. Gabe perintis biasa do sidea. Istrini pe maronti hun parhorjaan. Suamini mangkatahon gabe bahat do halak na sihol mambotoh ise do Saksi Jahowa ai. Ujungni bahat ma sidea na ra marlajar Bibel. Jadi bahat do hasil na dear na idapot hita sanggah iparburu. Dong sada sintua na tading i nagori ai mangkatahon bahat do homa  Saksi Jahowa na domma dokah lang martumpu, gabe roh use martumpu janah dihut homa marbarita.

7. (a) Aha do na boi iparlajari hita humbani 3 Musa 26:36, 37? (b) Aha do na laho bahenonmu sanggah iparburu?

⁷ Sihol do munsuhta mambahen hita mabiar. Jadi ipararat sidea ma barita na lang tongon pasal hita. Ra, isuruh sidea petugas roh hu rumahta janah mamboan hita hu pangadilan ase ipenjarahon hita. Nini uhur ni sidea gabe mabiar do holi hita anggo dong hasomanta na ipenjarahon. Tapi anggo mabiar hita, boi do ai mambahen hita galek. Ujungni lang be hita ra mangidangi Jahowa. Tontu lang ra hita isarupahon pakon halak na ipatugah bani 3 Musa 26:36, 37. (Basa.) Jadi ulang paturut hita biar bani jolma mambahen hita lang be manombah Jahowa. (Ps. 27:1) Martonggo ma mangindo panogu-noguan. Pos ma uhurta, anggo marpangunsandeian hita bani Jahowa, lang dong pamarentah na ija pe na boi manlanglangi hita mangidangi-Si.​—Heb. 13:6.

8-9. (a) Haputusan aha ma na porlu ibahen ganup halak Kristen? (b) Aha do na mangurupi sidea ase boi mambahen haputusan na madear?

⁸ Porini ilarang pamarentah horja parambilanon i iananmu, ra do nini uhurmu sihol pindah ham hunjai ase boi bebas mangidangi Jahowa. Nasiam sandiri do na mambahen haputusan ai. Tapi paima mambahen haputusan sisonai, dong sanina botou na mampardiateihon aha na masa bani halak Kristen abad na parlobei sanggah sidea iparburu. Umpamani dobkonsi si Stepanus ipargijig bani batu ronsi matei, bahat do susian na i Jerusalem pindah hu Judea, Samaria, anjaha dong homa na pindah hu Penesia, Pulou Kiprus, pakon Antiokia. (Mat. 10:23; Lah. 8:1; 11:19) Tapi dong homa na mampardiateihon aha na ibahen si Paulus dobkonsi iparburu ia. Lang ra ia pindah hunjai. Hassi pe marbahaya, totap do ia tading ijai halani sihol marbarita anjaha patoguhkon uhur ni hasoman sahaporsayaon.​—Lah. 14:19-23.

⁹ Parlajaran aha ma na dapot hita hunjai? Ganup kopala kaluarga maningon mambahen haputusan porlu do sidea pindah atap lang. Tapi paima mambahen haputusan, martonggo ma lobei. Dob ai, asok ma pingkirhon situasi ni kaluarga, anjaha aha do pengaruhni ai bani sidea. Halani ganup halak Kristen ‘dong bei do siporsanonni’, ulang ma iuhumi hita haputusan na ibahen sidea.​—Gal. 6:5

10. Tugah-tugah aha do na laho ibere kantor cabang ampa sintua?

¹⁰ Sonaha nasiam boi totap manombah Jahowa hassi pe iparburu? Ibere kantor cabang do holi tugah-tugah bani sintua i kuria pasal sonaha nasiam boi mandapot publikasi, ampa sonaha nasiam boi totap martumpu janah marbarita. Anggo kantor cabang lang boi manghubungi sintua, totap do iurupi sintua ganup halak i kuria laho manombah Jahowa. Iihutkon sidea do podah hun Bibel ampa publikasinta sanggah mambere tugah-tugah.​—Mat. 28:19, 20; Lah. 5:29; Heb. 10:24, 25.

11. (a) Mase boi pos uhurta anggo haporsayaonta boi totap toguh? (b) Sonaha bahenonmu ase aman Bibel ampa publikasimu?

¹¹ Marjanji do Jahowa laho pasirsirhon ganup na ihaporluhon hita ase haporsayaonta  totap toguh. (Jes. 65:13, 14; Luk. 12:42-44) Jadi pos ma uhurmu ibere organisasi do aha pe na ihaporluhon ase hita boi setia. Sanggah iparburu, dear ma ponopkon Bibel ampa publikasimu. Jaga ma ase ulang asal ipeakkon nasiam publikasi, age na isetak atap bani tablet ase ulang urah idapot halak. Sanggah ilarang horja parambilanonta, ganup hita maningon marusaha patoguhkon haporsayaonta.

12. Pangaturan aha ma na ibahen sintua pasal partumpuanta?

¹² Sonaha pasal partumpuanta? Ibahen sintua do holi pangaturan sonaha hita boi totap martumpu ase lang ibotoh munsuhta. Ra, ibagi sintua ma nasiam ibagas kalompok-kalompok na etek. Janah gati do iubah sidea panorang ampa ianan partumpuanta. Sanggah ai, nanget ma bahen soramu sanggah marsahap-sahapi. On ma sada cara na boi ibahen nasiam laho manlinggomi sanina botounta. Boi do homa ipakei nasiam pakeian na lang mambahen halak curiga.

13. Aha ma na boi iparlajari hita humbani sanina botou i Uni Soviet hinan?

¹³ Tongon, lang sarupa situasi bani ganup ianan. Tapi halani holong bani Jahowa janah sihol patugahkon pasal Harajaon-Ni bani na legan, sai dong do cara na boi ibahen hita laho marbarita. (Luk. 8:1; Lah. 4:29) Sahalak sejarawan na margoran si Emily B. Baran mansaritahon pasal horja parambilanon ni Saksi Jahowa i Uni Soviet hinan. Ia mangkatahon, “Sanggah ilarang pamarentah sidea marbarita, marusaha do sidea laho marsahap-sahapi hubani hasomanni, tetangga, ampa hasoman i parhorjaan. Sanggah ipenjarahon pe totap do sidea marbarita ijai.” Jadi age pe ilarang, totap do sanina botou i Uni Soviet hinan marbarita. Porini ilarang nasiam marbarita bani iananmu, tiru nasiam ma sidea.

14. Sipasingat aha do na ibere Psalmen 39:2 hubanta?

¹⁴ Jaga ma sanggah patugahkon hatorangan bani na legan. Sanggah ilarang, maningon ibotoh hita ma adong do “panorang sipsip”. (Par. 3:7) Jadi maningon jaga ma hita sanggah mambere hatorangan bani pamarentah. Ulang ma patugah goran ni sanina botou, ija partumpuan ibahen, sonaha hita marambilan ampa mandapot publikasi. Ulang homa ipatugah hita hatorangan sisonai bani hasoman ampa kaluarga atap ija pe sidea tading. Anggo ipatugah hita ai, ra do on parohkon mara bani sanina botou.​—Basa Psalmen 39:2.

15. Aha do na tongtong ibahen Sibolis, janah aha do na maningon ibahen hita?

 ¹⁵ Ulang ma parsalisihan mambahen hita lang marsada. Ibotoh Sibolis do seng boi totap rumah tangga anggo marsalisih. (Mrk. 3:24, 25) Halani ai marusaha do ia tongtong mambahen hita lang marsada. Marosuh do ia anggo hita marsalisih samah hita.

16. Aha ma na boi iparlajari hita humbani si Gertrud Poetzinger?

¹⁶ Gari halak Kristen na marpangalaman pe boi do masuk hubagas tirangkap sisonai. Pardiateihon ma contoh humbani dua hasomanta naboru, ai ma si Gertrud Poetzinger pakon si Elfriede Löhr. Halak na iminaki do sidea. Jadi ipenjarahon ma sidea rap pakon hasomanta naboru na legan. Jadi simburu ma si Gertrud halani si Elfriede padaskon ambilan na boi patoguhkon hasoman-hasoman na legan. Tapi ujungni isolsoli si Gertrud ma ai, janah martonggo ma ia ase iurupi Jahowa. Nini do, “Maningon marusaha ma hita marmalas ni uhur anggo dong hasomanta mandapot tanggung jawab lobih bahat marimbangkon hita.” Aha do na mangurupi ia ase ulang be simburu? Marusaha do ia mangindahi na madear humbani si Elfriede. Ujungni bebas ma sidea haduasi, janah totap do sidea setia mangidangi Jahowa ronsi matei. Jadi, anggo marusaha hita pasaloseihon parsoalan na dong samah hita, tontu marsada ma hita tongtong.​—Kol. 3:13, 14.

17. Mase maningon unduk hita bani tugah-tugah na ibahen organisasi?

¹⁷ Ulang ma margijang ni uhur. Bahat do gunani anggo ra hita mangihutkon tugah-tugah humbani sidea na ibere tanggung jawab ibagas kuria. (1 Ptr. 5:5) Umpamani, i sada nagori na manlarang horja parambilanonta, ibahen ma pangaturan ase sanina botou lang manadingkon publikasi sanggah marbarita. Tapi dong ma sahalak parintis na lang mandalankon aturan ai. Sonaha ma ujungni? Dob salosei ia pakon hasomanni marbarita, roh ma polisi manungkuni sidea. Ra, domma ipardiateihon polisi ai sidea. Jadi ibuat polisi ai ma publikasi na dob ibere sidea bani halak. Jadi aha ma parlajaranni? Maningon iihutkon hita ma tugah-tugah hassi pe lang setuju hita. Sai ipasu-pasu Jahowa do hita anggo ra mandalankon pangaturan na ibahen sidea na mambobahon hita.​—Heb. 13:7, 17.

18. Mase lang boi hita mambahen aturan na lang porlu?

 ¹⁸ Ulang mambahen aturan na lang porlu. Anggo ibahen sintua aturan na lang porlu, boi do on mambahen sunsah na legan. Hasomanta si Juraj Kaminský patorangkon aha na masa sanggah hita iparburu i Cekoslovakia hinan. Ia mangkatahon, “Dob bahat sintua ampa sanina na mambobahon itangkap, piga-piga sintua na ibere tanggung jawab i kuria ampa i ianan ai mambahen aturan sandiri hubani sanina botou. Ibahen sidea ma daptar aturan pasal na boi ampa na lang boi ihorjahon.” Sasintongni lang ibere Jahowa hak hubanta laho mambahen haputusan bani na legan. Jadi sanggah ibahen sidea aturan na lang porlu, sasintongni na laho manrajai haporsayaon ni hasomanni do sidea ijai.​—2 Kor. 1:24.

19. Domu bani 2 Kronika 32:7, 8, mase hita boi totap barani lang soal aha pe na ibahen Sibolis?

¹⁹ Marusaha do Sibolis ase iparburu juakjuak ni Jahowa. Marosuh do ia ampa ganup na mangirikkonsi mambahen hita ilarang manombah Jahowa. (1 Ptr. 5:8; Pangk. 2:10) Tapi, age pe mabiar hita, totap ma hita mangidangi Jahowa. (5 Mus. 7:21) Sai ihasomani Ia do hita janah urupan-Ni do hita hassi pe iparburu.​—Basa 2 Kronika 32:7, 8.

20. Aha do na laho bahenonmu?

²⁰ Andohar ma itiru hita halak Kristen bani abad na parlobei. Sanggah sidea ilarang marbarita, ihatahon sidea do, “Nasiam ma manimbangi, atap na pintor ma ai i lobei ni Naibata, anggo balosan hanami bani nasiam ase bani Naibata. Ai seng tarbahen hanami lang mangkatahon na dob ididah ampa ibogei hanami.”​—Lah. 4:19, 20.