1, 2. a) Ka uagu moun lubéi lun taweiridun wanigi lau hamahadun gumadimatiña lun wáhuduragun lun Bungiu? b) Kaba waturiahan lidan arütíkulu le?

LIDAN irumu lánina eseriwiduni 2018, añahein hóugiñe 223,000 apurichihatiña awinwanda lidan ageiraü le ñein lubéi hamahadan o le ñein lubéi hararamei gumadimatiña wáhuduragun lun Bungiu. Maweiriduntu wanigi luagu le, kei le aubei warihei lidan arütíkulu le lubaragiñebei le subudi wamuti wagía kristiánugu wéibaahouba lan (2 Tim. 3:12). Meberesenga halía lan wawinwanda, gayaraati hamahadun gumadimatiña sódini lun wáhuduragun lun Heowá ani sin hawisaruniwa.

² Anhein amahada urúei lun weseriwidun lun Bungiu, másiñati wálügüdagun woungua: “Mini lan san éibaahouni féridi wamaali lan lufulesein Bungiu? Lagumuchaguba san éibaahouni lau wáhuduragun lun Heowá? Lunti san náguyun lidoun aban fulasu le ñein lubéi ua lan turobuli lun láhudurawagun lun Bungiu?”. Lóunabuba álügüdahani burí le lidan arütíkulu le. Warihibei giñe ida luba lan wasigirun eseriwida lun Heowá labadinagua wéibaahoun ani ka lan sádara lunbei wóunigiragun woungua tuéi.

3. Kei lariñawagún lidan 2 Korintuna 11:23-27, ka asuseredubei lun apostolu Pábulu, ani ka larufudahabei lani hénpulu woun?

³ Lun hamuga lamahadún lun weseriwidun lun Bungiu, wasaminaruba hamuga san magundan haali lan Bungiu wau? Moun lumuti wasaminarun ítara. Samina wamá luagu apostolu Pábulu. Chóuruti gunda lan meha Heowá lau. Ibiha lumuti lubuidun chansi lun labürühan 14 gárada to tídanboun Abürüdǘni Güriegu Kristiánu ani seriwiti kei apostolu houn néchanigu. Íbini ítara,  súfuriti lanarime éibaahouni (aliiha huméi 2 Korintuna 11:23-27). Arufudahati lani hénpulu woun ígira lan Heowá lun hasufurirun lubúeingu ha úaraguatiña.

4. Ka uagu iyereegu wabéi lun ubóu?

⁴ Afuranguagüda lumuti Hesusu ka lan uagu lunti lubéi wagurabun wéibaahoun. Ariñagati weyereeguduba lan lun ubóu ladüga mama wamá lánigu ubóu (Huan 15:18, 19). Mama ladüga wéibaahoun lun wasaminarun féridi wamaali lan lufulesein Bungiu. Mini lan le wadügüñein lan le buídubei.

5. Gabafutiña san gürigia lun hagumuchun lau áhudurawaguni lun Heowá? Afuranguagüda huméi.

⁵ Siñabei hagumuchun gürigia lau láhuduragun lun Bungiu suntigabafu. Áfaaguaaña saragu láganiñu Heowá lun hagumuchun lau áhuduraguni lun ani siñá hamuti. Samina wamá luagu le asuseredubei lidan Libiaman Wuribu Wéiriti. Éibaaha hamutiña urúeigu burí ha lílana saragu ageiraü lumutuniña Bungiu lau furundei. Mámarügüñanu nasi ha yámanina éibaahabaliña, éibaaha hamutiwa giñe lurúeitegu Australia luma Kanadá adüga hamuti giñe lurúeitegu amu burí ageiraü. Íbini éibaahoua hamá íbirigu aba lasuseredun aban katei le magurabúnti seremei lun Heowá. Lidan irumu 1939, dan le lagumeserunbei wuribu, añahein meha 72,475 apurichihatiña lidan sun ubóu. Según ariñahani lárigiñe lagumuchun wuribu, lidan irumu 1945 aba haganwoundun apurichihatiña, dóbuli wéiyaasu lun: 156,299.

6. Ka katei buiti gayaraabei lasuseredun ladüga éibaahouni? Abahüdaha humá aban sügǘ.

⁶ Lubaragiñe hadügün lun wanufudedun adügarügüti wéibaahoun lúntima weseriwidun lun Heowá. Ariha waméi le asuseredubei houn aban feru maríeitiña ha gasaanibaña aban irahü ñǘraügili ani hawinwanduña meha lidan aban ageiraü le ñein lubéi lamahada urúei lun weseriwidun lun Bungiu. Mígiruntiña íbirigu ha lun lararamuniña anufudei, aba hagumeserun eseriwida kei prekursorugu ha adügübaña 70 oura lidan hati. Ítarameme, aba tígiruni würi tuadigimari le fáyeiti. Aba lariñagun tani weiriei adüga lan éibaahouni lun busén hamá gürigia hasubudirun hawagu Gefentiña. Ligíati ménrengun lubéi houn lun hagumeserun íchiga aturiahani houn gürigia. Ani adügati giñe lamahadún lun apurichihani lun hadügün amu íbirigu asansiruni. Ariñagati aban wéiyaali lidan afiñeni le lídangiñeti ligiaméme ageiraü añahein lan saragu íbirigu ha ígira hamaali heseriwidun lun  Heowá ábaya hagumeserun abasiha adamuridagua luma apurichiha.

7. a) Ka wafurendeirubei lídangiñe Fádirigu 26:36, 37? b) Kaba hamuga hadüga lun hamahadun gumadimatiña lun heseriwidun lun Bungiu?

⁷ Dan le hararamuni wáganiñu weseriwidun lun Heowá busentiña lun wanufudedun lun meseriwidun wamá lun. Másiñati haburuchaguagüdün ariñahani iyeeniti, hóunahan lúrudugu asagarahóun waba, o hafosuruniwa lun woudin agusera luma lun hadaürün wádangiñe. Agurabatiña lun wanufudedagun lau warihin hádarun fiu hádangiñe wíbirigu furisunrugun. Ánhawa ígira lun walouchun, wagía guánarügüba adüga lun buidu lan lidin houn lidan héibaahaniwa. Mabusenruntiwa lun ítara wamá kei gürigia ha uágubaña layanuhóua lidan Fádirigu 26:36, 37 (aliiha huméi). Mígira wamá lun lagañeiruniwa anufudei ni lun wígiruni weseriwidun lun Heowá. Afiñe wamá luagu Heowá sunsuinagubei ani mígiraguagüda wamá woungua lun anufudei (Isa. 28:16). Amuriahatiwa luma Heowá lun ladundehaniwa. Subudi wamuti lau lan lídehan siñabei hadügün urúeigu ha gabafutimabaña lun meseriwidun wamá lun Bungiu lau úaraguni (Ebü. 13:6).

8, 9. a) Ka lunbei hadügüni kada íbirigu o kada hachügüdina iduheñu? b) Kaba íderaguawa lun buidu lan le lunbei wadügüni?

⁸ Lun hamuga hamahadun lúrudugu lun weseriwidun lun Bungiu, másiñati wálügüdagun woungua anhein wáguyuba lubéi lidoun aban ageiraü le ñein lubéi ua lan turobuli lun wáhuduragun lun Bungiu. Aban katei le siñá lubéi ni aban adüga wawagu. Másiñati gayara lan hakutihani fiu íbirigu le hadügübei kristiánugu ha lánina furumiñeti sígulu dan meha le héibaahouña lubéi. Lárigiñe hachamuragun áganiñu dübü luagu Esütéban, aba hanurahan disipulu Herusaléngiñe lidoun saragu fulasu le lani Hudéa luma Samaria, ani ñǘdüntiña giñe Fenisia, Chípüre luma Antiokía (Mat. 10:23; Adü. 8:1; 11:19). Añahein amu lubúeingu Bungiu másiñati teni hamá lun le ladügübei apostolu Pábulu lau lerederun lidan fulasu le ñein lubéi éibaahouni. Áhurera lumuti libagari lun gayara lan lapurichihani uganu buiti luma lun lederebudagüdüni hafiñen íbirigu ha lídanbaña uburugu le ñein lubéi lanarime éibaahouni (Adü. 14:19-23).

⁹ Ka wafurendeirubei lídangiñe abahüdaguni le? Kada aban hádangiñe hachügüdina iduheñu ligíaba ariha anhein lunti lubéi háguyun. Lubaragiñe ladügüni lunti lafurieidun lun Heowá luma lun lakutihani buidu buidu le gádanbaliña liduheñu, ítara kei buiti luma wuribati le lunbei lanügüni háguyun. Lidan kesi le sun kristiánugu “lunti lanügüni lanügün guánarügü” (Gal. 6:5). Moun lumuti wíchugun hadurun wíbirigu luagu le hanúadirubei.

10. Kaba adundehani tíchiga sukursáli hama wéiyaaña lidan afiñeni?

¹⁰ Ida luba wasigirun eseriwida lun Heowá íbini hamahadun gumadimatiña lun wadügüni? Tíchuguba sukursáli adundehani luma kaba lan hadüga wéiyaaña lidan afiñeni luagu ida luba lan heresibiruni ariñahani, ida luba lan hadügüni adamuridaguni luma apurichihani. Ánheinti siñá lubéi heresibirun wéiyaaña adundehani tídangiñe sukursáli? Híchuguba wéiyaaña lidan afiñeni adundehani tídangiñeti Bíbülia luma tídangiñe wani agumeiraguagüdüni lun gayara lan wasigirun eseriwida lun Bungiu (Mat. 28:19, 20; Adü. 5:29; Ebü. 10:24, 25).

11. Ka uagu gayara lubéi wachoururuni ñeinbei lan ariñahani lúmagiñeti Bungiu wama ani ka gayaraabei wadügüni lun wóunigiruni?

¹¹ Füramaseti Heowá hounigirúba lan lubúeingu buidu lidan hamadagua luma (Isa. 65:13, 14; Luk. 12:42-44). Ligíati chouru waméi tadügübei lan lóundarun sun tiyaraati lun tíchuguni  sun le wemegeirubei lun úaragua wamá lun. Gayaraati giñe wadügün somu katei. Danme le hamahadun gumadimatiña lun wapurichihan áluaha wamá aban fulasu le chóuruti lun wareidunu Bíbülia tuma amu burí agumeiraguagüdüni. Duari wamá ani maweiyasun wamá abulieidei waramudunu buidu agumeiraguagüdüni gebegitu to, to tauboun gárada tuma to tídanboun konputadora o gágamuru. Sun wagía mosu warihin kaba lan wadüga lun derebugu lan wamadagua luma Bungiu.

12. Ida luba haransehan wéiyaaña lidan afiñeni lun hadügün lun masaminarun hamá gürigia wadamuridaguña lan?

¹² Kaba asusereda lau adamuridaguni dimaasu-auti? Hadügüba wéiyaaña lidan afiñeni aransehani lun ladügǘn sin híchugun wáganiñu fe. Másiñati hariñaguba wéiyaaña woun lun wóundaragun lidan lirahüñü sétanu, ani gayaraati asansireina luba lan fulasu luma oura le ñeinba lubéi burí ladügǘwa. Kaba wadüga lun chouru lan hasandiragun ha achülürübaña lidoun adamuridaguni ligía? Wayanuhan hámaru dan le wachülürün luma dan le wáfuridun lídangiñe adamuridaguni ani másiñati giñe wadaüraguba lan daüguaü to lunboun masaminarun hamá gürigia wadamuridaguña lan.

13. Ka gayaraabei wafurendeirun hámagiñe wíbirigu ha lídanbaña binadu Unión Sowiétika?

¹³ Ati apurichihani? Ámuñegueinarügübei gádanti lidan amu fulasu. Gama lumoun, hínsiñeti Heowá woun ani hínsiñeti woun wayanuhan luagu Larúeihan, wadariruba chansi lun wapurichihan (Luk. 8:1; Adü. 4:29). Abahüdaguatu Emily Baran luagu dan le sügühalibei luagu hapurichihan gefentiña luagu Heowá lidan binadu Unión Sowiétika: “Dan le hariñagubei gumadimatiña houn lun mayanuhan hamá luagu hafiñen houn amu, aba hagumeserun Gefentiña ayanuha hama habesinanigu, hánigu paaná lidan wadagimanu luma houn hamadagu. Dan le hanügǘnbei lidoun fulasu le ñein lubéi hafosurúa lun hawadigimaridun, aba hapurichihan houn amu burí adaürǘtiña”. Mígirun hamuti wábirigu ha lídanbaña binadu Unión Sowiétika hapurichihan ladügarügü hamahadun gumadimatiña. Lunti giñe gagaburi wamani igaburi le anhein achülüra aban dan lun hamahadun gumadimatiña lun wapurichihan lidan fulasu le ñein lubéi weredera.

14. Kaba sádara idoun méiguadun wamá ánhawa adügei le lariñagubei Sálumu:39:1?

¹⁴ Góunigi waméi le wariñagubei houn amu. Lidan lidaani éibaahouni lunti wasubudiruni “lidaani ámanichuni” (Apur. 3:7). Mosu wóunigiruni ariñahani le mabusenrun wabéi lun lasubudiruniwa, kei burí hiri íbirigu, fulasu le ñein lubéi wadamuridagua, ida liña lan wapurichiha luma ida liña lan weresibirun ariñahani lúmagiñeti Bungiu. Moun lumuti wasubudiragüdüni ariñahani burí le houn gumadimatiña ni lun wabahüdaguni houn wamadagu o houn  waduheñu ha lídanbaña ageiraü le ñein wabéi ni houn ha lídanbaña amu ageiraü. Ánhawa adügei, gayaraabei wíchuguniña wíbirigu lidan denchaü (aliiha huméi Sálumu 39:1).

15 Kaba ladüga Satanási, ani kaba wadüga lun méiguadun wamá tidoun sádara to?

¹⁵ Mígiraguagüda wamá wougua lun ladügün lirahüñü turobuli lun wafanreinragun. Subudi lumuti Satanási siñabei lan hadurarun iduheñu keisi iduheñu ánhaña afanreinragua (Mar. 3:24, 25). Ligíati súnwandan lubéi lálugun lun wafanreinragun. Ligía lálugubei lun wageindagun wámagua lubaragiñe wageindagun luma.

16. Ka hénpulu buiti tíchugubei íbiri Gertrud Poetzinger?

¹⁶ Lunti giñe agagudúañu hamá kristiánugu ha derebuguti hafiñen lun mábürühan hamá tidoun sádara to. Ariha waméi le asuseredubei tun Gertrud Poetzinger luma tun Elfriede Löhr. Bián íbirigu anuadirúaaña ha, lídanñanu meha fulasu le ñein lubéi hafosurúa gürigia lun hawadigimaridun úara hama amu íbirigu. Aba tagumeserun íbiri Gertrud agimugaroun íbiri Elfriede ladüga tíchigadi yanu lánina gurasu houn ha híbiri íbirigu ha lídanbaña fulasu ligía. Dan lárigiñe aba tasandirun íbiri Gertrud busiganu aba tamuriahan luma Heowá lun líderagunün. Ariñagatu: “Mosu wafurendeirun ánhara añahein lan íbirigu gayaraaguatiña houngua ani chubalugutiña sügǘ wau”. Ida liña tígiruni íbiri Gertrud igaburi le? Aba tetenirun lun lubuidun tusan luma tigaburi íbiri Elfriede. Ítara liña tabuiduragüdüni tumadagua tuma. Biángubei hagía furitiña lídangiñe fulasu ligía ani seriwitiña lau úaraguni lun Heowá darí lagumuchun habagari ya Ubouagu. Ánhawa áfaagua lun waransehani waturobulin hama wíbirigu, méiguadunbadiwa tidoun sádara to lánina fánreinguaü (Kol. 3:13, 14).

17. Ka uagu moun lumuti lubéi lun maganbadi wamá lun adundehani?

¹⁷ Gaganbadi wamá lun adundehani. Ánhawa adügei le hariñagubei íbirigu ha anügübalin ubaraü ani afiñewati hawagu, wesefuruba luéi turobuli (1 Fed. 5:5). Ariha wamá aban sügǘ. Lidan aban ageiraü le ñein lubéi máhawa lan lun wapurichiha, aba lichugún adundehani houn íbirigu lun mígirun hamá agumeiraguagüdüni lidan apurichihani. Gama lumoun, saminati aban prekursoru gayara lan lahandilihani sun katei lidan aban igaburi buiti, ítarati, aba madügün lan gasu. Ka asuseredubei? Aban weyu, lárigiñe lapurichiha íbini mama lan tidan burí muna, aba hálügüdaguni lúrudugu ligía hama amu íbirigu. Genegeti añaha lan meha úfisigu asigihaña ani barǘ hamaaru meha sun agumeiraguagüdüni to hígiruboun íbirigu houn gürigia. Ka wafurendeirubei? Lunti lan gaganbadi wamá lun adundehani íbini afiñe wamá gayara lan wadügüni sun katei lidan aban igaburi buiti. Labinirubadiwa Heowá súnwandan ánhawa ídeha hama íbirigu ha anügübalin ubaraü lidan hadundehaniwa (Ebü. 13:7, 17).

18. Ka uagu moun lumuti lubéi lun wíchugun lúrudu le mámagu ligía?

 ¹⁸ Míchiga wamá lúrudu le mama ligía. Anhein hadüga wéiyaaña lidan afiñeni katei le, híchuguña ihürügu houn íbirigu. Afuranguagüda lumuti íbiri Juraj Kaminský le asuseredubei dan le hamahadunbei gumadimatiña lun weseriwidun lun Heowá lidan binadu Checoslovaquia, ariñagati: “Dan le harügüdǘnbei íbirigu ha anügübalin ubaraü ani ragüwa hagía saragu wéiyaaña, añahein hádangiñe ha adundehabalin damuriguaü luma sirkuitu aba hagumeserun íchiga lúrudu libügürü ida luba lan hóuserun íbirigu. Aransetiña aban lísüta luagu katei le lunbei hadügüni íbirigu luma le lunbei madügün hamani”. Míchugunti Heowá üma woun lun wadügüni katei le. Madügünti lúrudu libe le lun hasandiragun íbirigu houngua chóuruñu, hadügüña lun hagía lan laburiña hafiñen (2 Ko. 1:24).

19. Según 2 Krónikasi 32:7, 8, ka uagu gayara lubéi wasandiragun woungua lau ichouruni íbini láfaaguña lan Satanási lun leredehani wapurichiha?

¹⁹ Súnwandan léibaahaniña Satanási, létima wágani, lubúeingu Heowá ha úaraguatiña (1 Fe. 5:8; Aruf. 2:10). Dandu ligía kei ha afalarubalin háluguba heredehani wapurichiha. Gama lumoun, mébunati lun lararamuniwa anufudei (2 Lur. 7:21). Anihein Heowá wama ani lasigiruba íderaguawa íbini hamahadun wáganiñu lun weseriwidun lun Bungiu (aliiha huméi 2 Krónikasi 32:7, 8).

20. Ka un aranseedün lan?

²⁰ Áyeiha waméi lubuidun igaburi le harufudubei wábirigu ha lánina furumiñeti sígulu, ha ariñagubaña houn gumadimatiña: “Samina humá hungua anhein richá lubéi ligibugiñe Bungiu lun ladügǘn le hubeibei, ígira le lubeibei Bungiu. Wagía, siñati wámanichun lau katei le ariha wamaalibei luma le aganba wamaalibei” (Adü. 4:19, 20).