1-2. (a) Nihintikinela nni akala mabasa ehu anokooddihiwa? (b) Txini enfunihu osekeserha mwari mwa mutoma obu?

 YAKA YA 2018, ehilagiha wi akalawo anamalaleya opitta 223.000 ankala mwilaboni munkooddihiwa obe munimetxiwa mabasa ehu. Eji kahiyo yotikiniha. Ninga musunzilehu na mutoma ovirile, Akristu ebaribari anoziwa wi anele ofwara-fwariwa. (2 Tim. 3:12) Ofwara-fwariwa kunsakula elabo, alamuleli txino anele onikooddiha omwebedha Mulugu wehu wokwela, Yehova.

² Akala alamuleli a elabo enkaliwe anogana wukooddiha omulabela Yehova, txino onovivuza dhahi: ‘Koddi ofwara-fwariwa entapulela wi Mulugu kannitanaala? Okooddihiwa oku onele ogomiha mabasa ehu a omwebedha Yehova? Enokala ddigattawela elabo yina oli ofuru wolaleya?’ Mwari mwa mutoma obu, ninele wona yowakula ya mavuzo aba. Ninele osunza txini enfunihu okosa wila nimwebedhege Yehova, akala mabasa ehu anokooddihiwa vina oziwa mirega dhinfwanyeelihu orabela.

3. Mowiwanana na nivuru na 2 Korinto 11:23-27, ofwara-fwariwa gani ogumanilena murumiwi Paulo, nanda ninsunzavo eni na yotagiha yaye?

³ Mabasa ehu owebedha agakooddihiwaga na alamuleli nindaga wubuwela wi Mulugu oninyanyala. Kobuwela wi, ofwara-fwariwa kuntapulela wila Yehova kanziveliwa na dhinkosihu.  Koona yotagiha ya murumiwi Paulo. Iyene wanroromela wi Mulugu wanziveliwa na mabasaye. Iyene wahikaana gari yoleba makarta 14 a Nipagano Niswa, vina wahisakuliwa wi aalaleye amalabo. Masiki dhawenevi, wahifara-fwariwa vaddiddi. (Kengesa 2 Korinto 11:23-27.) Yotagiha eji ya Paulo ehinisunziha wi Yehova onowattiya emeleli aye ororomeleya ofwara-fwariwa.

4. Sabwaya jani enniddela elabo?

⁴ Yezu ohitapulela sabwaya enfanyeelelihu ojeedhela ofwara-fwariwa. Iyene ohiloga wi nigahiddiwa sabwani kaninkosa mpaddi wa elabo. (Jo. 15:18, 19) Ofwara-fwariwa kahiyo ezinddiyelo yawi Yehova oninyanyala. Ottiya ejuwene, enlagiha wi dhinkosihu sapama!

5. Attu ahikaana kopolo dhogomihana webedhiwa wa Yehova? Katapulela.

⁵ Attu kana kopolo dhogomihana webedhiwa wa Mulugu namawodha-wodha, Yehova. Enjiya ahitagiha mbwenyi kawodhile. Koona epadduwile Mukoddoni Yanawili ya Mulimau. Alamuleli a masakene abale, ahididela ofwara-fwara nlogo na Mulugu. Kali Nazi bahi wa Alemanha wakooddiha mabasa a Anamoona a Yehova mbwenye vina alamuleli o Austrália, o Canadá vina dhilabo dhina dhinkooddiha. Masiki dhawene mabasa ehu kemetxiwe. Yaka ya 1939 eromile koddoya, mwilaboni mwetemwene mwahikala anamalaleya 72.475. Mbwenye yaka ya 1945 egomile koddo, dhovuwiha dhinlagiha wi mwahikala anamalaleya 156.299. Na mareliho a Yehova muttengo wa anamalaleya wahinjiva!

6. Ofwara-fwariwa onwodha onivaha efunelo gani? Kavaha yotagiha.

⁶ Ottiya onitxutxa, ofwara-fwariwa onowodha onivaha efunelo yomulabela Yehova mowakwana. Koona yotagiha ya atelani ana mwanawa mung’ono, akala mwilaboni mwakooddihiwa mabasa ehu. Ottiya ozuzumela wova, awene asakulile okala apionero a mudhidhi wotene. Mwadhiye wahittiya ganyo yaye. Mulobwanaya wahiloga wi okooddihiwa wahakosiha attu otikina sabwa ya Anamoona a Yehova. Nona, wahikaana masunzo menjene a Bibilia. Okooddihiwa  onowakosiha attu ena okana monelo wapama. Munddimuwa dhahi wa mulogo welabo yakakene wahiloga wi attu attiyile omulabela Yehova aroma wona matugumano vina ahiyela wili.

7. (a) Ninsunzamo eni munivuruni na Onamakutta 26:36, 37? (b) Txini enakose weyo akala mabasa ehu anokooddihiwa?

⁷ Amwiddani ehu anfuna wi nittiye omulabela Yehova. Nona ottiya onikooddiha bahi, awene anowaza ottambi, waruma asupayi odhowa mmawani mwehu, onittukulela mmuttegoni obe onifugela mukambura. Awene anjeedhela wi ninele wova sabwa ya onifugela mukambura. Nigarumeela otxutxiwa na awene, murima wehu onowobana na wova vina ninele ‘ottiya’ omulabela Yehova. Kaninfuna okala ninga abale alebiwe munivuruni na Onamakutha 26:36, 37. (Kengesa.) Iyo txipo kaninattiye omulabela Yehova sabwa ya wova. Ninomukuluvela Yehova vina kaninatxutxeye. (Iza. 28:16) Na nlobelo ninele omukumbirha Yehova malago. Iyo ninoziwa wi na nikamihedho na Yehova, masiki alamuleli ovadda kanawodhe onikooddiha omwebedha Mulugu.—Aheb. 13:6.

8-9. (a) Yogana gani enfwanyela mwazambo wa ntakulu obe muttu yeka okosa? (b) Txini enamukamihedhe muttu-muttu osakula yogana yapama?

⁸ Akala elabo yawo enokooddihiwa mabasa ehu, txino onafunege omwalela elabo yina wi omulabelege Yehova na ofuru. Ejo yogana yomwinya. Ena ahisunza na yapadduweli Akristu oroma a nsaka zana, varomilani ofwara-fwariwa. Vapiwe Estevau, anamafwara ahittawa mu Jeruzalemi badhowa o Judeya na o Samariya, vina ahibalaleyela mpaddi wolapela ninga Fenísia, o Sipro na Antiokiya. (Mt. 10:23; Mer. 8:1; 11:19) Musogorhomwa, Akristu abale ahigumana na ofwara-fwariwa wanawili, dila eji murumiwi Paulo kattawile, waganile olaleyavi masiki nofwara-fwariwa. Ottiya ejo, ohika egumi yaye vangovini wila alaleye miselu dhapama vina walibiha abali akala mimburo dhakooddihiwa olaleya.—Mer. 14:19-23.

⁹ Ninsunzavo eni na dhopadduwa esi? Omwalela elabo yina yogana ya mwazambo wa ntakulu. Ahinatti ogana, onofwanyela olobela vina ofwaseyela wang’ana muralaye vina ononelamo oderetu na obure onadhe agamwala. Makani aba, Mukristu mwinyene “onopwathela dhitoteyile na merelo aye.” (Gal. 6:5) Kaninfwanyela wattonga aganile okosa dhilobo dhottiyana na dhehu.

10. Malago gani anavahe asogorheli a filiali obe anddimuwa a mulogo?

¹⁰ Onawodhe dhavi omwebedha Yehova masiki n’okooddihiwa? Asogorheli a filiali anele waligarela anddimuwa a mulogo wila avahe malago na marhe ottambirhana yoja yomuyani vina mukalelo wotugumana wila munattiye webedha na olaleya miselu dhapama. Akala asogorheli a filiali kanawodhe waligarela, anddimuwa a mulogo anele wukamihedhani wila odhowegevi bugatugumana Yehova. Awene anele wuvahani malago andela mBibiliani vina anfwanyeya mmanivuruni mwehu.—Mt. 28:19, 20; Mer. 5:29; Aheb. 10:24, 25.

11. Onfanyeelela nni okuluvela wi onele okana yoja yomuyani, nanda txini enakose weyo wila obarele yoja yomuyani?

¹¹ Yehova wahiroromeliha wi emeleli aye agahikaana yoja yomuyani. (Iza. 65:13, 14;  Lk. 12:42-44) Kakuluvela wila nikuru na Yehova ninele okosa muli mwetemwene wi nuvahe nikamihedho nomuyani ninfanyeeliwe. Txini enfwanyeliwe okosa? Nsaka n’okooddihiwa, otamele mburo wa deretu wi owodhe onvitavo Bibilia na manivuru mena. Okale pasope wi onattiye vego-vegovi—manivuru a makamaka—opidiwa obe a mmuttittoni. Muttu-muttu onofanyela ovisasanyedha wi akalevi oliba omuyani.

12. Anddimuwa a mulogo anawodhe dhavi osasanyedha matugumano amwiddani s’ohiziwa?

¹² Txini enapadduwe na matugumano ehu? Anddimuwa a mulogo anele okosa masasanyedho wila weyo otugumanege amwiddani s’ohiziwa. Awene anele ogawa makuru mang’ono vina egawodheya anelege otxinja mimburo na midhidhi dha matugumanoya. Wila weyo wakamihedhe abali okala obareleya, ologege vati-vati vamatugumanoniva. Egawodheya wabale guwo dhihinlagiha wi ondowa omatugumanoni.

13. Ninsunzavo eni na yotagiha ya abali aali o antiga União Soviética?

¹³ Mwa mpaddi wa mabasa olaleya, dhilobodha dhinottiyana mowiwanana mburoya. Iyo ninomukwela Yehova vina ninoziveliwa wawaddela attu miselu dha Omwene, nona ninele ofwanya marhe olaleya. (Lk. 8:1; Mer. 4:29) Alogaga mwaha wa Anamoona wa Yehova aali o antiga União Soviética, namaleba dhopadduwa Emily B. Baran ohiloga: “Valogile alamuleli wi Anamoona a Yehova attiye olaleya, awene ahiroma walaleya anamwanddamani awa, akwawa omabasani vina amarho awa. Vatxedhiwani, Anamoona a Yehova analaleya afugeliwe ena.” Masiki n’okooddihiwa, abalihu o antiga União Soviética kattiyile olaleya. Akala elabo enkaliwe alamuleliya anokooddiha mabasa ehu olaleya, kafwara yotagiha yawa!

14. Nivuru na Masalmo 39:1 ninnikamihedha orabela murega gani?

¹⁴ Okale pasope na miselu dhinapangiwe attu ena. Mwari mwa okooddihiwa, ninofwanyela oziwa wi ntti “nsaka n’omala.” (Koh. 3:7) Dhikalawo miselu dhinfwanyeelihu okoya, motagiha, mazina a abalihu, mimburo dhehu dhotugumana, mulaleyelo wehu vina mukalelo onttambirhihu dhoja yomuyani. Miselu esi kaninfwanyela wawaddela alamuleli, nne amarho obe amudhihu ankala mwilaboni mwehu obe elabo yina. Sabwani nigamageya na murega obu ninele wawika abalihu vangovini.—Kengesa Masalmo 39:1.

15. Satana onfuna iyo nikose eni, nanda ninawodhe dhavi orabela murega obu?

¹⁵ Kuttiye dhilobo dhing’ono ogawa wiwanana wehu. Satana onoziwa wi numba yogaweya  kinimela. (Mk. 3:24, 25) Iyene onele odhowavi atamelaga ogawa wiwanana wehu. Onjeedhela wi nirome owana-wana muttu na mukwaye ottiya iyo owana na iyene.

16. Yotagiha gani yapama elagihile murogora Gertrud Poetzinger?

¹⁶ Masiki Akristu oliba omuyani anofanyeela okalela mento wi anamageye na murega obu. Koona yotagiha ya arogora eeli ottikitteliwa, aniliwa Gertrud Poetzinger na Elfriede Löhr. Awene na arogora ena ahifugeliwa o Nazi. Elfriede wanalibiha arogora ena akosaga madiskursu, nona Gertrud wahimukanela nrima. Osogorhowa, Gertrud wahikaana manyazo nona wahikumbirha nikamihedho na Yehova. Iyene ohileba dhahi, “Ninofanyela orumela wi attu ena akana ewodhelo obe ettomo opitta yehu.” Iyene owodhile dhavi okwaranya nrima naye? Gertrud wafaseyele wang’ana mikalelo dhapama dha Elfriede vina ofiyedheya waye. Nona, wawunuwiha omarho waye na Elfriede. Oheeli ahiviluwa wutxedhiwani vina ahimulabela Yehova nororomeleya mpaka opuliha egumi yawa velaboni ya vati. Wila nihimageye na murega obu, ninofwanyela orabela owana-wana wehu na abalihu otene.—Kol. 3:13, 14.

17. Ninfwanyelela nni wiwelela malago anvahiwehu?

¹⁷ Kuttiye wiwelela malago. Nigafwara malago anvahiwehu na abali okuluveleya annisogorhela, ninele owodha orabela makattamiho. (1 Ped. 5:5) Motagiha, elabo y’akoddihiwa mabasa ehu, abali aali asogorheli ahivaha malago awi anamalaleya ahipakege manivuru mmabasani olaleya. Mbwenye, mbali wali pionero kafunile ofwara malago aba, ampaka manivuruya. Txini yapadduwile? Mohigonela, iyene akosaga onamoona wa vattaddo na abali ena ahivuziwa na asupayi. Txino, asupayi abale ela wafwara ofiyedha ottukula manivuru otene apakiwe. Ninsunzavo eni na yotagiha eji? Ninofwanyela olabihedha malago avahiwehu masiki nubuwelaga wi kakalile. Yehova onele onireeliha nigalabaga mumodhani na abali attomiliye wi anisogorhele.—Aheb. 13:7, 17.

18. Ninfunela nni orabela wita malago ohifanyeelela?

¹⁸ Kuwite malago ohifanyeelela. Akala anddimuwa a mulogo anowita malago ohifanyeelela, anele wakattamiha abali ena. Mbali Juraj Kaminský onowubuwela nsaka n’akoddihiwa mabasa ehu o antiga Tchecoslováquia: “Vamalile ofugeliwa abali asogorhela na anddimuwa a mulogo enjene, ena ahalile asogorhelaga milogo na mirudda ahiroma walebela anamalaleya awaddelaga  y’afanyeelani okosa vina ohikosa.” Yehova kanivahile ettomo yogana dhilobo dhinfanyeelela okosa attu ena. Muttu onita malago ohifanyeelela kantamela wabarela abali—mbwenyi iyene otamela ovikaliha mwinya ottonga nroromelo nawa.—2 Kor. 1:24.

19. Masiki Satana attidde motto, txini enfwanyelihu okuluvela mowiwanana na 2 Mapadduwo 32:7, 8?

¹⁹ Mwiddani wehu, Satana Ddiabo, kanattiye wafara-fwara emeleli ororomeleya a Yehova. (1 Ped. 5:8; Ovuh. 2:10) Satana na nikuru naye anele otamelavi onikooddiha omwebedha Yehova. Masiki dhawene kaninfwanyela ottiya omulabela Yehova sabwa ya wova! (Olib. 7:21) Yehova oli na iyo vina onelege onikamihedha masiki mabasa ehu akooddihiwege.—Kengesa 2 Mapadduwo 32:7, 8.

20. Txini eganiliwe okosa?

²⁰ Ninofwanyela ogana ninga mwakoseli Akristu a nsaka noroma, aapangile alamuleli dhahi: “Mubuwele nyuwo mwanya, akala japama vamentoni va Mulugu, ourumelani nyuwo opitha iyene. Iyo kaninwodha omàlana dhonilehu, dhiwalehu.”—Mer. 4:19, 20.