1-2. (a) Pine nemene matre tha sesëkötre kö së, e traqa ju la itre mus wathebone la huliwa i Akötresie? (b) Nemene la hne së hna troa ce wang ngöne la tane mekun celë?

AME lo 2018, hna sasaithe la 223 000 lao trejin ka cainöj ngöne la itre nöj hna wathebon. Tha sesëkötre kö së ke, hne së hna ce wang ngöne lo tane mekun hnapan laka, kola troa icilekeu me axösisine la itre Keresiano. (2 Tim. 3:12) Eje hi, atre hë së laka, tro la itre mus a wathebone la huliwa i Iehova, Akötresi së ka tru ihnimin.

² E traqa ju la itre mus wathebone la huliwa i Akötresie, maine jë, tro sa isa hnying, ka hape: ‘Ma tha madrine hë Iehova koi së? Tro kö lai a sewe së troa nyihlue i Iehova? Tro kö ni a fek kowe la ketre nöj tha hna wathebone kö?’ Itre hnyinge lai hna troa sa ngöne la tane mekun celë. Tro fe sa ce wang la nyine troa kuca, matre troa catre huliwa i Iehova ngacama hna sewe së.

3. Tune la hna qaja ngöne 2 Korinito 11:23-27, nemene la hna melën hnei Paulo aposetolo, nge nemene la ini koi së?

³ Maine jë tro sa mekun laka, tha madrine kö Akötresie. Celë hi matre itre mus a wathebone la huliwa ne cainöj. Ngo tha tro kö sa mekun tune lai. Hanawang la tulu i Paulo aposetolo. Madrine catre Akötresieti koi nyidrë. Hnei Paulo hna cinyihane la 14 lao tusi ne la Tusi Hmitrötr, hnine la Itre Hna Cinyihan Qene Geres. Ketre, hna upe nyidrëti troa cainöj kowe la itre xaa nöj. Ngacama ka  tru nyidrëti koi Akötresie, ngo hna hane fe icilekeu me nyidrë. (E jë la 2 Korinito 11:23-27.) Hetre ini hne së hna xome qa ngöne la tulu i Paulo aposetolo. Iehova a nue troa icilekeu memine la itre hlue i Nyidrë.

4. Pine nemene matre kola methinë së?

⁴ Hnei Iesu hna qaja la kepin, matre kola icilekeu me easë. Öni nyidrë ka hape, troa methinë së ke, tha hane fe kö së sine la fen. (Ioane 15:18, 19) Ame ngöne la kola icilekeu, tha kolo kö lai a hape, tha Iehova kö a amanathithi së. Kolo pe a amamane laka, easa kuca la loi!

5. Hapeu, atreine kö la itre atr troa sawa me wathebone la huliwa i Iehova? Qejepengöne jë.

⁵ Thatreine kö la itre atr troa sawa me wathebone la huliwa i Iehova, Akötresieti Kapucatinasë. Nyimutre la itre ka thele troa thë la nyipi hmi, ngo tha hune kö angatr. Hanawang la ka traqa ekö ngöne lo Hnaaluene Isi Atraqatr. Ame ngöne la itre xaa nöj, hnene la itre mus hna icilekeu me akötrëne la nöje i Iehova. Hnene la itre Nazi hna wathebone la huliwa ne la Itretre Anyipici Iehova e Alema, Australie, Canada, me itre xaa nöje ju kö. Ame lo kola nyiqane la isi lo 1939, hna e la 72 475 lao trejin ka cainöj e cailo fen. Ngo ame hë la kola nyipune la isi lo 1945, hetrenyi la 156 299 lao trejin ka cainöj. Hnei Iehova hna amanathithine la nöje i Nyidrë. Easa haine la aqane kökötre la nöje i Iehova!

6. Nemene la thangane la kola wathebone la huliwa i Iehova? Qaja jë la ketre ceitun.

⁶ Ame ngöne la ijine icilekeu, kola acatrene la aja së troa nyihlue i Iehova. Pëkö xou the së. Hanawang la ceitune la lue trefën ka mele ngöne la ketre nöj hna wathebon. Pëkö xou thei nyidro troa xome la huliwa ne pionie lapa. Hnene la föe hna nue la huliwa hna nyithupene hnyawa, matre troa pionie. Önine la trahmany ka hape, nyimutre la itre atr ka hnyingë pengöne la Itretre Anyipici Iehova. Tha jole hë koi nyidrë troa nyiqaane ini tusi me angatr. Hetre eloine la kola wathebone la huliwa ne cainöj. Önine la ketre qatre thup ka hape, kolo  hmaca a sine la itre icasikeu me cainöj hnene la itre trejin ka nanazij.

7. (a) Nemene la ini hne së hna xom qa ngöne Levitiko 26:36, 37? (b) Nemene la nyine tro sa kuca ngöne la kola icilekeu?

⁷ Ame la itre ka wathebone la hmi së ke, angatr a thele troa axouenyi së, matre tha tro hmaca kö sa nyihlue i Iehova. Angatre fe a silitrengathoi së, me iutisai, me upe la polis troa ithel e hnine la itre hnalapa së, me akalabusi së. Aja i angatr troa axouenyi së. Ngo maine tro sa xoue angatr me xouene la itre hnei angatr hna troa kuca, tro hë së lai a nanazij me nuetriji Iehova. Tha aja së kö troa tune la itre atr hna qaja ngöne Levitiko 26:36, 37. (E jë.) Tha tro pi kö sa nue la xoue atr troa ananazijë së me upi së troa nuetrije la huliwa i Iehova. Tro pe sa catre mejiune koi Nyidrë me triji xou. (Is. 28:16) Loi e tro sa thithi koi Iehova. Tro kö Nyidrëti a xatua së me ceme easë. Haawe, xecie hnyawa koi së laka, pëkö musi ka tru ka atreine troa sewe së troa nyihlue i Iehova.—Heb. 13:6.

8-9. (a) Nemene la nyine tro sa isa iën thatraqai së me hnepe lapa së? (b) Nemene la ka troa xatua së troa axecië mekune hnyawa?

⁸ Pane mekune jë laka, easa mele ngöne la ketre nöj hna wathebon. Maine jë, easa mekun troa fek kowe la ketre nöj tha hna wathebone kö. Eje hi laka, isa qanyi së kö mekun. Ngo qëmekene troa axecië mekun, loi e tro sa pane wang lo hna kuca hnene la itre pane Keresiano, ngöne la kola icilekeu. Thupene la hna humuthi Setefano, hnene la itre Keresiano ne Ierusalema hna kötr a tro Iudra me Samaria, me Foinike, me Kupero, me Anetioka. (Mat. 10:23; Itre hu. 8:1; 11:19) Loi e tro fe sa wang lo hna kuca hnei Paulo, ngöne la kola icilekeu. Ngacama ijije hi troa lepi nyidrë me akötrë nyidrë, ngo ame pe, hnei Paulo hna lapa ngöne la itre nöje ne la itre ka icilekeu. Ame la aja i Paulo, tre, troa cainöjëne la itre maca ka loi, me acatrene la lapaune ne la itre trejin.—Itre hu. 14:19-23.

⁹ Nemene la ini hne së hna xom qa ngöne la itre ceitune celë? Itre hene la hnepe lapa la ka iën troa lapa maine fek kowe la ketre nöj. Qëmekene troa axecië mekun, loi e tro angatr a pane thith me lapa mekun la pengöne la fami, memine la thangan e tro angatr a fek. Eje hi, “tro kö së a isa thu ehnefen.” (Gal. 6:5) Tha tro kö sa qaja angazone la aqane axecië mekun ne la itre xan.

10. Nemene la itre hna amekötin hna troa hamëne hnei filial kowe la itre qatre thup?

¹⁰ Nemene la nyine tro sa kuca, matre tro palahi sa nyihlue i Iehova, ngacama hna wathebon? Tro la filial a hamëne kowe la itre qatre thup, la itre hna amekötin göne la aqane troa acatrene la lapaune së me kuca la itre icasikeu, me aqane troa cainöj. Maine thatreine kö la filial troa hë angatr, itre qatre thup pë hë la ka troa xatua së troa catre nyihlue i Iehova. Angatr a troa xatua së jëne la Tusi Hmitrötr me itre itusi së.—Mat. 28:19, 20; Itre hu. 5:29; Heb. 10:24, 25.

11. Pine nemene matre tha tro kö sa luelu laka, tro palahi sa hetrenyi la ka ijij, matre troa acatrene la lapaune së, nge nemene la nyine troa kuca matre tro palahi a hetre Tusi Hmitrötr me itre xaa itus?

¹¹ Hnei Iehova hna thingehnaean ka  hape, tro kö sa hetrenyi la ka ijij matre troa acatrene la lapaune së. (Is. 65:13, 14; Luka 12:42-44) Tha tro pi kö sa luelu laka, tro la organizasio i Iehova a xatua së troa catre mele nyipici. Nemene la nyine tro sa kuca? Loi e troa thele götran hnë troa juetrëne la Tusi Hmitrötr me itre xaa itus. Tro sa thupën, matre tha tro kö sa amë amamane la itre itus me itre mobilis me tablet. Loi e tro palahi sa thele troa acatrene la lapaune së.

12. Nemene la aqane troa hnëkë hnene la itre qatre thup, matre troa kuca juetrëne la itre icasikeu?

¹² Nemene la ka troa traqa kowe la itre icasikeu? Tro la itre qatre thup a hnëkën, matre troa kuca juetrëne la itre icasikeu. Maine jë, tro angatr a iupi troa icasikeu ngöne itre neköi gurup, me saze la itre hawa me itre hnë icasikeu. Tha tro pi kö sa iahlë menu. Loi e tro sa ithanata hmidra qëmeken me thupene la icasikeu, wanga hetre ethane jë kowe la itre trejin. Maine jë, tro sa heetr tune ngöne la hnalapa.

13. Nemene la tulu hna hamën hnene itre trejin e Union Soviétique me ngöne la itre nöj xötreith?

¹³ Tha ceitune kö la aqane tro fë la maca ka loi ngöne la itre nöj. Pine laka, tru la ihnimi së koi Iehova, matre easa madrine troa qaja kowe la itre xan la Baselaia i Nyidrë. Ngo nyipiewekë troa thele jëne la aqane tro sa cainöj. (Luka 8:1; Itre hu. 4:29) Hanawang la ka traqa kowe la Itretre Anyipici Iehova e Union Soviétique (Russie), me ngöne la itre nöj xötreith. Öni Emily Bruderle Baran, ketre ka ithel: “Ngacama itre mus a wathebone la huliwa ne cainöj, ngo angatr palahi a catre tro fë la maca. Hnei angatre fe hna cainöj e hnine la kalabus.” Eje hi, pëkö ka atreine troa sawa la itre trejin troa cainöj. Haawe, catre pi së nyitipu angatr, e traqa ju wathebone la huliwa ne cainöj ngöne la nöje së!

14. Nemene la aqane hmekë së hnene la tusi Salamo 39:1?

¹⁴ Tro sa thupëne la itre hne së hna qaja. Ame ngöne la icilekeu, tha tro kö sa thëthëhmine laka, hetre “ijine lapa thaup.” (Ate cai. 3:7) Tha tro kö sa qaja la itre xaa ithuemacany, tune la ëjene la itre trejin, me hnë icasikeu, me aqane cainöje së, me aqane kapa së la itre itus. Tha tro kö sa qaja la itre ithuemacany cili kowe la itre mus, maine kowe la itre sinee së ka lapa ngöne la nöje së, maine ngöne la itre xaa nöj. Maine tha hmekëne kö së, tro ha hetre ethane kowe la itre trejin.—E jë la Salamo 39:1.

15. Nemene la hnei Satana hna thele lapan, nge nemene la nyine tro sa kuca?

 ¹⁵ Tha tro kö sa nue la itre hnepe jol troa thë la caasi së. Atre hi Satana laka, tha tro kö a cile hut la hnepe lapa, e ka isa mele la itre atren. (Mar. 3:24, 25) Celë hi matre, angeice palahi a thele troa thë la caasi së. Ame la aja i angeic, tre, tro sa iwesitrë me isi. Ngo tha tro kö sa thëthëhmine laka, Satana la ithupëjia me easë.

16. Nemene la tulu ka lolo hna amamane hnei Gertrud Poetzinger?

¹⁶ Ngacama ka hekö hë së ngöne la nyipici, ngo loi e tro palahi sa hmek. Hanawang la tulu i Gertrud Poetzinger me Elfriede Löhr, lue trejine föe hna iën. Hna akalabusi nyidro me itre xaa trejin e hnine la uma ne iaxösisi Nazi. Hnei Gertrud hna elëhni me zalu pine la hnëqa hna hamën koi Elfriede. Elfriede la ka cile fë cainöj kowe la itre trejine föe e cili. Ngo ame e thupen, hna hmahma hnei Gertrud, matre hnei eahlo hna sipo ixatua koi Iehova. Öni eahlo: “Loi e tro sa hetre hni ne ipië me wangatrehmekun laka, itre ka thatreine së. Loi e tro sa kapa e kola athipi hnëqane la itre xaa trejin.” Nemene la ka xatua Gertrud troa xometrije la itre mekun ka ngazo? Hnei eahlo hna lapa mekun la itre thiina ka lolo i Elfriede. Lolo hmaca ha la aqane imelekeu i nyidro. Tha meci ju kö nyidroti e hnine la uma ne iaxösisi Nazi. Hnei nyidroti hna mele nyipici koi Iehova, utihë la pune la mele i nyidroti e celë fen. Maine tro sa canga iloi memine la itre trejin, tha tro kö sa nue Satana troa thë la aqane imelekeu së.—Kol. 3:13, 14.

17. Pine nemene matre nyipiewekë troa trongëne la itre hna amekötin hnene la organizasio i Iehova?

¹⁷ Tro palahi sa trongëne la itre hna amekötin. Maine tro sa trongëne la itre hna amekötin hnene la itre trejin ka elemeken la ekalesia, tro hë sa neëne la itre jol ka tru. (1 Pet. 5:5) Drei la ketre ceitun. Ame ngöne la ketre nöj hna wathebon, itre qatre thup a qaja kowe la itre trejin ka hape, tha tro kö a tro fë itus. Ngo tha trongëne kö la ketre pionie la hna amekötin celë. Nemene hë la pun? Hna ihnyingë pin hnei polis. Hnei polis hna xötrethenge angeic me itre xaa trejin ka tha idrei, me xome la itre itus. Nemene la ini koi së? Ngacama tha kapa kö së, ngo nyipiewekë tro sa drengethenge la itre hna amekötin. Madrine catre Iehova la easa ce huliwa memine la itre trejin hnei Nyidrëti hna iën, matre troa elemeken la ekalesia.—Heb. 13:7, 17.

18. Pine nemene matre tha tro kö sa acili wathebo menu?

 ¹⁸ Tha tro kö a acili wathebo menu. Maine tro la itre qatre thup a acili wathebo menu, tro ha ajolëne la itre trejin. Hnei Juraj Kaminský hna qaja la ka traqa ngöne lo kola wathebone la huliwa i Iehova e Tchécoslovaquie. Öni nyidrë: “Thupene la hna akalabusine la itre trejin ka elemeken la ekalesia me itre qatre thup, hnene la itre xaa trejin trahmany hna sipu acili wathebo. Hnei angatr hna qaja kowe la itre trejin la itre nyine tro angatr a kuca me tha kuca.” Tha hnei Iehova kö hna nue së troa axecië mekun koi itre xan. Tha easë kö lai a hnim me metrötrëne la itre trejin. Easë pe a ajolë angatr, me musinëne la lapaune i angatr.—2 Kor. 1:24.

19. Thenge la hna qaja ngöne 2 Aqane lapa ite Joxu 32:7, 8, pine nemene matre ijije hi tro sa catr, ngacama kola akötrë së hnei Satana?

¹⁹ Tro palahi Satana a thele troa akötrëne la itre hlue i Iehova. (1 Pet. 5:8; Hna ama. 2:10) Tro Satana me itre sine xöle i angeic a thele jëne troa sawa la huliwa i Iehova. Tha tro pi kö sa xou troa catre huliwa i Iehova! (Deu. 7:21) Tro kö Iehova a ceme easë me xatua së, ngacama kola sawa la huliwa i Nyidrë.—E jë la 2 Aqane lapa ite Joxu 32:7, 8.

20. Nemene la hne së hna troa kuca?

²⁰ Epi tro sa catr tune la itre pane Keresiano ekö. Öni angatr kowe la itre hene ka tru: “Maine meköti qëmeke i Akötresie troa drei nyipunie hui Akötresie, qanyi nyipunieti kö. Ngo ame pë hë nyio, thatreine kö nyio cipane la itre ewekë hnei nyio hna öhne me dreng.”—Itre hu. 4:19, 20.