1-2. (a) Saide wi á mu foondoo efu lanti tapu a wooko a pe wi e tan? (b) San wi o luku aini a artikel ya?

AINI 2018, a moo enke 223.000 peleikiman be e tan a peesi pe lanti be tapu a wooko anga peesi pe lanti be e meke a taanga gi den fu dini Yehofa. A sani ya nai foondoo wi, bika aini a artikel a fesi u be si kaba taki tesi o miti ala tuu Kelesten (2 Tim. 3:12). A ná abi toobi pe wi e tan, lanti sa tapu a wooko fu u wanboowanboo.

² Efu lanti tapu a wooko na a pisi pe yu e tan, kande yu e akisi iseefi den sani ya: ’A lobi Yehofa á lobi u moo? Wi o poi dini Yehofa ete? Mi mu foloisi go tan a wan kondee pe lanti á tapu a wooko?’ Aini a artikel ya wi o luku den akisi ya. Wi o luku tu fa u sa tan dini Yehofa go doo winsi lanti tapu a wooko. Wi o luku tu san wi á mu du efu a sani ya pasa.

3. Enke fa 2 Korentesama 11:23-27 e soi, da sowtu tesi be miti apostel Pawlesi? San a toli fi en e leli u?

³ Efu lanti tapu a wooko a pe wi e tan, kande wi o denki taki a lobi Yehofa á lobi u moo, ma a sani ya a ná tuu. Luku a toli fu apostel Pawlesi. Yehofa be e piisii anga en. A be abi a gaandi fu sikiifi 14 fu den Kelesten Giiki buku fu Beibel. Boiti dati, en a be wan apostel fu den taa kondee sama. Tokuso a omen tesi be miti apostel Pawlesi. (Leisi 2 Korentesama 11:23-27.) A toli fu Pawlesi e leli u taki Yehofa e gi pasi fu tesi miti den sama di e dini en anga den hii ati.

4. Saide meke a goontapu ya e buuse u?

 ⁴ Yesesi be taigi u saide wi á mu foondoo te den sani ya e miti u. A be taki sama be o buuse u, bika wi a ná wan pisi fu a goontapu ya (Yoh. 15:18, 19). Te tesi e miti u, a sani ya á wani taki Yehofa nai piisii anga u moo, ma ai soi taki wi e du sani enke fa Yehofa wani.

5. Libisama poi tapu a dini di sama e dini Yehofa?

⁵ Libisama á poi tapu a dini di sama e dini Yehofa, a Moo Gaan Gadu. A omen sama puubei fu tapu a wooko aini a ten di pasa, ma den á be poi. Luku san be pasa na a ten fu a du fu Tu Goontapu Feti. A ten de, lanti be e du ogii anga den sama di be e dini Gadu aini omen kondee. A ná Doisilikondee wawan lanti be tapu a wooko fu Yehofa Kotoigi, ma den be tapu a wooko a Australiya, Kanada, anga taa kondee tu. Ma san a be a bakapisi? Di a feti bigin aini 1939 a 72.475 peleikiman be de a hii goontapu. Ondoosuku e soi taki aini a yali 1945, di a feti kaba, a wan sani fu 156.299 peleikiman be de. Dati a tu toon moo den peleikiman di be de fosi a feti bigin.

6. Sowtu bakapisi a sa abi te sama e du ogii anga u fu di wi e dini Gadu? Gi wan ondoofenitoli.

⁶ Te sama e du ogii anga u fu di den wani u tapu anga a dini di wi e dini Yehofa, a sani ya sa moo taanga a biibi fu u. Luku a toli fu wan toowpaa di be abi wan yonkuu pikin. Den be e tan aini wan kondee pe lanti tapu a wooko. A toowpaa ya á feele san sama be sa du anga den, ma den bigin du a kowownu pioniliwooko. A sisa fika en wooko di be e pai bun fu man pionili. A man taki di lanti tapu a wooko, a omen sama be wani sabi moo fu Yehofa Kotoigi. A sani ya meke a be moo makiliki fu bigin Beibelsutudi. A tapu di lanti be tapu a wooko aini a kondee ya be abi taa bun bakapisi tu. Wan owluman taki a omen sama di á be e dini Yehofa moo bigin kon a den komakandaa baka. Den be bigin peleiki baka tu.

7. (a) San Lefitikesi 26:36, 37 e leli u? (b) San yu o du te sama tapu a wooko a pe yu e tan?

⁷ Te den feyanti fu u tapu a wooko, a wani den e wani u feele te da u tapu anga  a dini di wi e dini Yehofa. Neen meke te den tapu a wooko, son leisi den e paati lei toli fu a olikanisâsi, efuso meke sikowtu kon daai wi osu tapu. Son leisi den e tyai u go a kuutu, den e sooto son wan fu u tu. Den wani a sooto di den fende wantu fu u sooto meke u feele. Efu wi e feele san den sa du anga wi, a sani ya sa meke u gwe fika Yehofa. Wi á wani de enke den sama aini Lefitikesi 26:36, 37. (Leisi en.) U ná o meke a feele di wi e feele san sama sa du anga wi efuso san den du anga u kaba tapu u fu dini Yehofa enke fa a wani. Wi e biibi taki Yehofa o yeepi u, neen meke u nai buuya (Yes. 28:16). Wi e begi Yehofa fu a yeepi u. U sabi taki te Yehofa e holibaka gi u, winsi na a moo taanga tiimakiti seefi, a ná o poi tapu u fu dini en anga u hii ati.​—Heb. 13:6.

8-9. (a) Sowtu bosoloiti ala Kelesten efuso osufamii edeman o abi fu teke? (b) San o yeepi wan sama fu du sani anga koni?

⁸ Efu lanti tapu a wooko a pe yu e tan, kande yu e akisi iseefi efi i mu foloisi go a wan kondee pe a wooko á tapu. A sani ya a wan bosoloiti di iseefi mu teke, taawan á poi taigi i san i mu du. Ma fosi i du wan sani, a be o bun fu luku san den Kelesten fu fositen be du di a sani ya be miti den. Baka di feyanti naki Sitefanesi kii anga siton, den disipel aini Yelusalem be foloisi go a Yudeya anga Samaliya. Taawan be foloisi go te a Fenisiya, Siprus anga Antiyokiya (Mat. 10:23; Toli 8:1; 11:19). Ma wan taa leisi baka di sama be e du ogii anga den Kelesten fu fositen, apostel Pawlesi á be foloisi go a wan taa kondee. A be e paati a bun nyunsu go doo a pe sama be e suku fu du ogii anga den. A be e gi den baala anga sisa di be e tan a den foto de taanga-sikin tu.​—Toli 14:19-23.

⁹ San den toli ya e leli u? Ala osufamii edeman abi a faantiwowtu fu luku san en osufamii o du te den sani ya pasa. Fosi a teke wan bosoloiti, a mu begi da a luku san o moo bun gi en osufamii. A mu luku den wini di en osufamii sa fende efu den foloisi, ma a mu luku sowtu takuu bakapisi a sa abi tu. Te a abi fu du anga a toli ya, na ala Kelesten mu „tyai en faantiwowtu” (Gal. 6:5). Nawan sama mu kuutu wan taawan fu san a o du aini a toli ya.

10. Fa a beikantoo anga den owluman o yeepi u fu dini Yehofa te sama tapu a wooko?

¹⁰ Fa wi o dini Yehofa efu lanti tapu a wooko a pe wi e tan? A beikantoo o soi den owluman fu den kemeente fa wi o go e fende leli, fa wi o go e miti fu holi komakandaa anga fa wi o go e peleiki. Ma efu a beikantoo á poi doo a den owluman, da a den owluman seefi o yeepi u fu dini Yehofa go doo. Den o koboloiki den leli fu Beibel anga den taa sani di a olikanisâsi meke fu soi u san u mu du.​—Mat. 28:19, 20; Toli 5:29; Heb. 10:24, 25.

11. Saide u sa biibi taki ala yuu wi o abi den sani di wi abi fanowdu fu taanga u biibi? San i sa du fu sama á fende i Beibel anga den taa sani fu a olikanisâsi teke, te lanti tapu a wooko?

¹¹ Yehofa paamisi u taki ala yuu a o gi a foluku fi en san den abi fanowdu fu taanga den biibi (Yes. 65:13, 14; Luk. 12:42-44). Neen meke u sa biibi taki en  olikanisâsi o du ala san den poi fu u fende a taanga-sikin di wi abi fanowdu fu holidoo. Ma san iseefi sa du? Te lanti tapu a wooko, i mu suku wan bun peesi fu kibii i Beibel anga den taa sani fu a olikanisâsi. I mu luku bun fi yu a fika den sani ya a peesi pe sama sa fende den makiliki, winsi aini i telefon den de. Ala u mu du san u poi fu u biibi á kon swaki.

12. Fa den owluman sa seeka sani fu u holi komakandaa a wan fasi di nai hali sama pakisei?

¹² Fa a de anga den komakandaa fu u? Den owluman o seeka sani fu u sa holi komakandaa a wan fasi di nai hali sama pakisei. Kande aini pikin kulu wi o go e holi komakandaa. Kande a peesi anga a yuu fu a komakandaa o go e kengi ala yuu. Te yu e kon a den komakandaa efuso te yu e gwe, a be o bun fi i nai taki taanga fu sama poti pakisei a wi, a so yu o kibii i baala anga sisa. Kande yu o abi fu wei koosi a wan fasi di nai hali sama pakisei tu.

13. San wi e leli fu den baala anga sisa fu Soviyet Unie?

¹³ A fasi fa wi o go e du a peleikiwooko ná o de aseefi na ala peesi. Ma u lobi Yehofa, u lobi taigi taa sama san a Kownukondee fi en o du tu, neen meke winsi san e pasa wi o fende wan fasi fu peleiki namo (Luk. 8:1; Toli 4:29). Emily Baran, a wan uman di e ondoosuku sani fu fositen. A uman ya be taki san be pasa di lanti be tapu a peleikiwooko aini Soviyet Unie. A taki: „Di lanti taigi den Kotoigi taki den a be mu peleiki moo, neen den bigin peleiki gi den sama a den wookope, den sama di be e tan koosube fu den anga den mati fu den. Di lanti poti den a sitaafuman kampu fu a sani ya ede, den Kotoigi bigin peleiki gi den taa sitaafuman.” Winsi fa lanti be tapu a wooko aini Soviyet Unie, den baala anga sisa fu wi á be tapu anga a peleikiwooko. Meke u du ala san u poi fu abi deki-ati enke den efu lanti tapu a wooko a pe wi e tan.

14. San Psalm 39:1 o yeepi u fu du?

¹⁴ Luku bun anga san yu e taigi taawan. Te a wooko tapu a wan peesi, u mu sabi on ten u mu ’taki anga on ten u mu de pii’ (Peleik. 3:7). Wi á mu meke sama sabi sani enke den nen fu taa baala anga sisa, pe wi e holi komakandaa, fa wi e peleiki anga fa den baala e gi u leli. Wi á mu taigi sama di e wooko gi lanti efuso famii anga mati den sani ya. Winsi a wan taa kondee den famii efuso mati fu wi e tan, tokuso wi á mu taigi den den sani ya. Efu u be o du a sani ya, ogii sa miti u baala anga sisa.​—Leisi Psalm 39:1.

15. San Saatan o meke moiti fu du? San u mu du efu wi á wani a kisi u?

 ¹⁵ Wi á mu meke pikinpikin sani paati u. Saatan sabi taki sani ná o waka bun aini wan osufamii di nai libi na a wan (Malik. 3:24, 25). Neen meke ala yuu a o meke moiti fu tyai toobi kon a u mindii. A wani u feti anga useefi, pe fu u wooko makandii fu toto futu gi en.

16. San a toli fu sisa Gertrud Poetzinger e leli u?

¹⁶ Kelesten di abi ondoofeni seefi mu luku bun anga a sani ya. Luku a toli fu sisa Gertrud Poetzinger anga Elfriede Löhr. Den sisa ya a be salufu Kelesten. Den be sooto den tu sisa ya makandii anga taa Kelesten sisa a wan Nazi sitaafuman kampu. Sisa Gertrud be bigin dyalusu di a luku a fasi fa sisa Elfriede be e taki anga den taa sisa fu gi den taanga-sikin. Bakaten sen kisi a sisa ya fu a fasi fa a be e denki, neen meke a begi Yehofa fu a yeepi en. A taki: „Wi á mu fii wan fasi te taawan sabi du son sani moo wi efuso te den abi faantiwowtu moo wi.” San be yeepi a sisa ya fu a á dyalusu moo? Sisa Gertrud be bigin poti pakisei a den bun manii fu sisa Elfriede. A be si tu taki a wan sisa di lobi taki anga sama. Na a sani ya meke en anga sisa Elfriede be toon bun mati baka. Bakaten den puu den tu sisa ya na a sitaafuman kampu. Den dini Yehofa anga den hii ati te enke a wooko fu den a goontapu ya kaba. Efu wi e meke moiti ala yuu fu meke en bun anga taawan, sani ná o poli wi anga u baala anga sisa.​—Kol. 3:13, 14.

17. Saide u mu luku bun fu wi á du san useefi wani?

¹⁷ Luku bun fu wi á du san useefi wani. Te wi e wooko anga san den baala di e teke fesi taki, sani o waka bun (1 Peit. 5:5). Luku san be pasa aini wan kondee pe lanti tapu a wooko. Den baala di e teke fesi be taigi den peleikiman taki den á mu fika buku anga taa sani gi den sama di den e miti. Tokuso wan pionili baala á be wani wooko anga a sani di den baala taki, neen meke a paati buku gi sama. San a be a bakapisi? A á langa baka di en anga wantu taa Kotoigi kaba peleiki a wan peesi, neen sikowtu kisi den. Den sikowtu ya be e waka a den baka, a so den kon fende den buku di a baala ya be gi den sama di a be peleiki gi. San a toli ya e leli u? Ai soi taki winsi u nai kaba fusutan saide den baala taki u mu du wan sani, toku u mu wooko anga san den taigi u. Yehofa e piisii te a si taki wi e meke moiti fu wooko anga den sani di den  baala di a poti fu teke fesi e leli u.​—Heb. 13:7, 17.

18. Saide u mu luku bun fu u nai poti weiti di á de fanowdu gi taawan?

¹⁸ Ná poti weiti di á de fanowdu gi i baala anga sisa. Efu owluman e meke weiti di á de fanowdu, den o meke a moo taanga gi taawan fu holidoo. Baala Juraj Kaminský e membee san be pasa a pisiten di lanti be tapu a wooko a Tyeko-Slowakiya. A taki: „Baka di den sooto omen owluman, neen son wan fu den baala di be e teke fesi bigin poti weiti gi den peleikiman. Den be e taigi den san den mu du anga san den á mu du.” Yehofa á gi wi a leti fu taigi taawan san den mu du anga san den á mu du. Wan sama nai yeepi en baala te ai poti weiti gi en di á de fanowdu. Sowan sama e wani toon basi fu a biibi fi en baala.​—2 Kor. 1:24.

19. Winsi fa Saatan e meke moiti fu tapu a wooko, sowtu taanga-sikin 2 Koloniki 32:7, 8 e gi u?

¹⁹ Ala yuu a feyanti fu u di den e kai Saatan Didibii o meke moiti fu du ogii anga den sama di e dini Yehofa (1 Peit. 5:8; Openb. 2:10). Saatan anga den bakaman fi en o du ala san den poi fu tapu u fu dini Yehofa. Winsi fa u sabi a sani ya, u ná o feele te da u tapu anga a dini di wi e dini Yehofa (Deit. 7:21). U sabi taki Yehofa e holibaka gi u. Noiti a o gwe fika u, winsi lanti tapu a wooko a pe wi e tan.​—Leisi 2 Koloniki 32:7, 8.

20. San i de kabakaba fu du?

²⁰ U mu meke moiti fu abi aseefi biibi fu den Kelesten fu fositen. Den be taigi den lanti fu a ten de taki: „A useefi mu luku efu Gadu fende en bun taki wi aliki u pe fu wi aliki en. Ma wi á poi tapu fu taki fu den sani di u si anga den sani di u yee.”​—Toli 4:19, 20.