1-2. a) Poukwa fò pa sa étoné-nou lè on gouvènman ka entèwdi aktivité an nou ? b) Ka nou ké vwè adan awtik-lasa ?

AN 2018, pliski 223 000 pwoklamatè a bon nouvèl-la té ka rété dé koté yo ka entèwdi tout aktivité èspirityèl an nou oben on bon pati adan yo. Sa pa ka étoné-nou. Kon nou vwè adan awtik a simenn pasé, sé vré krétyen-la sav kè yo ké pèwsékité-yo (2 Tim. 3:12). Kèlkèswa koté-la nou ka rété la, adan on ti moman é san yo avèti-nou, sé gouvènman-la pé entèwdi-nou sèvi Jéova, Dyé an nou ki plen lanmou.

² Si la ou ka rété la, gouvènman-la ka désidé entèwdi-nou adoré Dyé an nou, pétèt ou ké pozé-w sé kèsyon-lasa : « Si yo ka pèwsékité-nou, ès sa vlé di Bondyé pa enmé-nou ankò ? Difètkè yo ka entèwdi-nou sèvi Jéova, ès sa vlé di kè nou pé’é pé sèvi-y ankò ? Ès fò-mwen ké alé on koté yo pa ka anpéché-nou sèvi Jéova ? » Nou ké réponn a sé kèsyon-lasa adan awtik-lasa. Nou ké vwè osi kijan nou pé kontinyé adoré Jéova menm lè yo ka entèwdi aktivité an nou é ki pyèj pou nou évité.

3. Sèlon sa 2 Korentyen 11:23-27 ka di, ki pèwsékisyon lapòt Pòl sibi, é ka ègzanp a-y ka aprann-nou ?

³ Si on gouvènman ka entèwdi-nou adoré Dyé an nou, nou pé rivé a kwè kè Bondyé pa èvè nou ankò. Men pa oubliyé : lè yo ka pèwsékité-nou, sa pa vlé di Jéova kòlè èvè nou. Pa ègzanp, sonjé lapòt Pòl. Bondyé té kontan dè-y.  Pa ni pon dout asi sa. Jéova fè-y on gran lonnè piskè i bay maké 14 lèt a sé Ékriti grèk la, é i té « apòt a sé nasyon-la ». Magrésa, i jwenn gwo pèwsékisyon toubònman (li 2 Korentyen 11:23-27). Sa Pòl travèsé ka anségné-nou kè Jéova ka pèwmèt kè yo pèwsékité sèwvitè fidèl a-y.

4. Poukwa yo hay-nou adan mond-lasa ?

⁴ Jézi èspliké poukwa fò pa sa étoné-nou si ni moun ka mèt baton an wou an nou. I di kè yo té’é hay-nou padavwa nou pa’a fè pati a mond-la (Jan 15:18, 19). Si yo ka pèwsékité-nou, sa pa vlé di kè Jéova pa kontan-nou ankò. Byen okontrè, savédi kè nou ka fè sa ki byen !

5. Ès dé moun enpawfè kon nou pé fè-nou arété adoré Jéova ? Bay on ti èsplikasyon.

⁵ A pa dé moun enpawfè kon nou ki ké pé fè-nou arété adoré Jéova, Dyé Toupuisan la. Onlo moun éséyé, men yo pa réyisi. Sonjé sa ki pasé pannan Dézyèm Lagè mondyal la. Gouvènman a onlo péyi pèwsékité sèwvitè a Bondyé on mannyè ki rèd toubònman. Sé Nazi-la entèwdi aktivité a Témwen a Jéova an Almagn, é anplisdisa, gouvènman a Lòstrali, ta Kanada é ta dòt péyi ankò fè menm biten-la. Magrésa, gadé sa ki rivé. An 1939, lè lagè-la koumansé, té ni 72 475 pwoklamatè asi latè. Men grasa bénédisyon a Jéova, an 1945, lè lagè-la fin, té ni 156 299 pwoklamatè. Té ni dé fwa plis pwoklamatè !

6. Lè yo ka mèt baton an wou an nou, olyé sa fè-nou pè, ka sa ka pousé-nou a fè ? Bay on ègzanp.

⁶ Lè yo ka mèt baton an wou an nou, olyé sa fè-nou pè, sa pé pousé-nou a sèvi Jéova plis ankò. Mi ègzanp a on frè é madanm a-y ki té ni on jenn tigason é ki té ka viv on koté yo entèwdi aktivité an nou. Olyé yo rété sézi pas lafrous pran-yo, yo koumansé sèwvis pyonyé pèwmanan. Pou fè sa, sè-la jous lésé travay a-y magré i té ka gangné vi a-y byen. Frè-la èspliké kè lè yo entèwdi aktivité an nou, onlo moun té vlé konnèt plis biten asi Témwen a Jéova. I té ka touvé kè sa té pli fasil dè koumansé étid biblik a moman-lasa. Lè yo entèwdi aktivité an nou, sa bay ondòt bon rézilta. Adan menm péyi-la, on ansyen di kè onlo moun ki té arété sèvi Jéova rikoumansé vin réinyon é yo rikoumansé préché.

7. a) Ka Lévitik 26:36, 37 ka anségné-nou ? b) Ka ou ké fè lè yo ké entèwdi aktivité an nou koté-la ou ka rété la ?

 ⁷ Lè lènmi an nou ka entèwdi-nou sèvi Jéova, yo vlé fè-nou pè pou nou pa sèvi Jéova ankò. Dépawfwa, non sèlman yo ka entèwdi aktivité an nou, men yo ka simé manti anlè nou, yo ka voyé lalwa fouyé kaz an nou, yo ka menné-nou douvan tribinal oben yo ka mèt déotwa adan nou lajòl. Yo bizwen fè lafrous pran-nou padavwa yo rivé mèt déotwa adan nou lajòl. Si nou pè-yo é si nou pè sa yo pé rivé a fè-nou, nou pé jous arété sèvi Jéova noumenm an nou. Men nou pa vlé sanm sé moun-la ki adan Lévitik 26:36, 37 (li). Nou pé ké lésé lafrous pran lanmen asi nou pou fè-nou moli asi sèwvis an nou oben pou fè-nou arété. Nou ka fè Jéova konfyans a san pou san é nou pa ka lésé lafrous fè-nou pèd lakat (Iz. 28:16). Nou ka priyé pou ni dirèksyon a-y. Nou sav kè, si i ka soutyenn-nou, menm gouvènman-la ki pli puisan la pé pa fè-nou arété sèvi-y (Ébr. 13:6).

8-9. a) Ki désizyon pèwsonèl chak chèf a fanmi, oben chak krétyen, dwèt pran ? b) Ka ki ké édé on krétyen a pran on bon désizyon ?

⁸ Si la ou ka rété la, gouvènman-la entèwdi-nou sèvi Jéova, pétèt ou ka mandé-w si fò-w ké ay rété adan on péyi yo pa entèwdi aktivité an nou. Sé chak moun ki ka vwè ka pou i fè é ponmoun pé pa désidé an plas a-w. Avan i pran on désizyon, on moun pé étidyé sa sé krétyen-la fè o prèmyé syèk lè yo té ka pèwsékité-yo. Apré yo lapidé Étyèn, disip ki té ka rété Jérizalèm ay rété Jidé, Samari é jous Fénisi, Chipr, é Antyòch (Mat. 10:23 ; Akt 8:1 ; 11:19). Men dòt moun ké rété réfléchi asi ègzanp a Pòl. O prèmyé syèk, yo woupèwsékité sé krétyen-la ankò, men Pòl désidé rété la té ni opozisyon. I té préféré rété la menmsi sa té’é pé danjéré pou-y. I fè sa pas i té vlé fè moun konnèt bon nouvèl-la é pou fòwtifyé frè a-y dé koté pèwsékisyon-la té rèd toubònman (Akt 14:19-23).

⁹ Ka sé ègzanp-lasa ka aprann-nou ? Fò chak chèf a fanmi désidé si li é fanmi a-y ké rété la yo yé la oben si yo ké pati ondòt koté. Avan i pran on désizyon, fò i priyé é fò i réfléchi byen asi sitiyasyon a fanmi a-y. Fò i éséyé vwè osi ki jan dè konsékans chanjman-lasa pé ni asi yo. Adan domenn-lasa, chak krétyen dwèt ‘pòté pwòp chaj a-y’ (Gal. 6:5). Nou pa ni a jijé désizyon a lézòt.

10. Ki enstriksyon Bétèl-la é sé ansyen-la ké ban-nou ?

¹⁰ Kijan ou ké pé kontinyé sèvi Jéova lè yo ké entèwdi aktivité an nou adan péyi a-w ? Bétèl-la ké ba sé ansyen-la enstriksyon é konsèy ki itil. I ké di-yo kijan pou zò prokiré-zòt nouriti èspirityèl la, kijan pou zò réini-zòt é kijan pou zò préché. Si Bétèl-la pa ka rivé antré an kontak èvè sé ansyen-la, sé ansyen-la ké édé, ki vou, ki sélézòt frè é sè a lasanblé-la, pou zò kontinyé sèvi Jéova. Pou gidé-zòt, yo ké sèvi èvè sa Pawòl a Bondyé é sa piblikasyon an nou ka di (Mat. 28:19, 20 ; Akt 5:29 ; Ébr. 10:24, 25).

11. a) Poukwa ou pé sèten kè ou ké kontinyé ni nouriti èspirityèl é ka ou pé fè pou pé sa pwotéjé nouriti èspirityèl a-w ?

¹¹ Jéova pwomèt sèwvitè a-y kè yo ké toujou ni tousa yo bizwen pou fwa a yo  rété solid (Iz. 65:13, 14 ; Lik 12:42-44). Donk, ou pé sèten kè òwganizasyon a-y ké fè lèmaksimòm pou pwokiré-w sé ankourajman èspirityèl la ou ké bizwen la. Ka ou pé fè dè koté a-w ? Lè yo ka entèwdi aktivité an nou, touvé on koté pou séré bib a-w é dòt piblikasyon. Nouriti-lasa ni on gran valè, ki sé asi papyé i yé, ki sé anlè entèwnèt ou pran-y. Alò, fè atansyon pou-w pa jen lésé sé piblikasyon-la on koté yo té’é pé touvé-yo fasilman. Fò-nouchak pran dé disposizyon pou nou rété solid èspirityèlman.

12. Kijan sé ansyen-la pé òwganizé réinyon san ponmoun suiv ayen ?

¹² Ka nou pé di asi réinyon an nou ? Sé ansyen-la ké pran dispozisyon pou ou pé sa pran réinyon a-w san ponmoun suiv ayen. Pétèt yo ké mandé-w ay èvè on piti gwoup é pétèt yo ké chanjé lè a sé réinyon-la souvan é koté-la yo ka fèt la osi. Lè ou ké rivé koté-la réinyon-la ka fèt la é lè ou ké pati, si ou palé toupiti, sa pé pwotéjé frè é sè a-w. Pétèt, fò-w ké abiyé-w kon ou ka abiyé touléjou.

13. Ka ègzanp a sé frè é sè la, an tan a Linyon sovyétik, ka aprann-nou ?

¹³ Ki biten nou pé di anrapò èvè prédikasyon-la ? Sitiyasyon-la pa oblijé menmjan la toupatou. Men pas nou enmé Jéova é pas nou enmé palé dè wayòm a-y, nou ké touvé on mwayen pou nou préché (Lik 8:1 ; Akt 4:29). On èspésyalis a listwa, non a-y sé Emily Baran, palé dè prédikasyon a Témwen a Jéova an tan a Linyon sovyétik. Mi sa i èspliké : « Lè gouvènman-la entèwdi Témwen a Jéova préché, sé Témwen-la chèché a palé èvè vwazen a yo, èvè kolèg-travay a yo é èvè zanmi a yo. Kifè, lè yo mété-yo lajòl, sé Témwen-la préché ba dòt prizonyé. » É magré yo entèwdi-yo préché, frè é sè an nou ki té ka viv adan sé péyi-lasa pa arété préché. Si on jou yo ka entèwdi prédikasyon-la koté-la ou ka rété la, fò-w byen désidé a imité ègzanp a sé frè-lasa.

14. Ki pyèj nou pé évité grasa sa Sòm 39:1 ka di ?

¹⁴ Fò-w véyatif : a pa tout enfòwmasyon ou pé ba moun. Labib ka di kè ni « on tan pou pé » (Ékl. 3:7). Lè yo ka entèwdi aktivité an nou, fò-nou chèché a vwè a ki moman pou nou pa di ayen. Ni désèwten enfòwmasyon fò pa moun sav, kon pa ègzanp non a frè é sè an nou, sé koté-la nou ka réini la, mannyè prédikasyon-la òwganizé é kijan nou ka risivwè nouriti èspirityèl la. Nou pé ké ba sé gouvènman-la sé enfòwmasyon-lasa. Nou pé ké ba zanmi an nou ni fanmi an nou sé enfòwmasyon-lasa nonplis, ki yo ka rété an menm péyi ki nou, ki yo ka rété adan on dòt péyi. Pas  si nou fè sa, sa ké mèt frè é sè an nou an danjé (li Sòm 39:1).

15. Ka Satan ké éséyé fè é kijan pou nou pa tonbé an pyèj-lasa ?

¹⁵ Pa lésé dé kèsyon ki pa ni enpòwtans divizé-nou. Satan sav kè lè ni dézòd adan on fanmi, fanmi-la pé pa rété doubout (Mawk 3:24, 25). I toujou ké chèché divizé-nou. Sa i vlé, sé kè yonn goumé èvè lòt olyé nou goumé èvè-y.

16. Ki bèl ègzanp sè Gertrud Poetzinger lésé ban nou ?

¹⁶ Menm on krétyen ki mi dwèt fè atansyon pou i pa tonbé an pyèj-lasa. An-nou gadé ègzanp a Gertrud Poetzinger é Elfriede Löhr, dé sè ki wen. Yo té lajòl èvè dòt sè adan on kan nazi. Gertrud vin jalou Elfriede pas i té ka prézanté dé bon sijé byen ankourajan douvan sélézòt sè-la ki té an kan-la. Plita, limenm a-y té hont, kifè i mèt jounou atè pou mandé Jéova édé-y. Mi sa i maké : « On biten fò-w aprann asèpté, sé kè dòt moun ni plis kapasité oben kè yo ni plis rèsponsabilité ki-w. » Kijan i fè pou i pa lésé jalouzi pran lanmen asi-y ? Gertrud konsantré-y asi bèl kalité a Elfriede é asi bèl pèwsonalité a-y osi. Sé konsa i wouvin byen èvè Elfriede. Yo ponyonn pa mò pannan yo té adan kan nazi la é yo toulédé kontinyé sèvi Jéova èvè onlo fwa jiskatan yo fin kous a yo asi latè. Si nou ka fè tousa nou pé pou pasé asi pwoblèm nou pé ka jwenn èvè frè é sè an nou, nou pé ké pèwmèt ayen divizé-nou (Kol. 3:13, 14).

17. Poukwa fò-nou toujou suiv dirèksyon-la yo ka ban-nou la ?

¹⁷ Toujou suiv dirèksyon-la yo ka ba-w la. Nou pé fè sé frè-la ki ka dirijé-nou la konfyans. Si nou ka suiv dirèksyon-la yo ka ban-nou la, nou ké évité onlo pwoblèm (1 Pyè 5:5). Pa ègzanp, adan on péyi yo entèwdi-nou préché, sé frè-la ki té ka okipé-yo dè prédikasyon-la an péyi-la di sé pwoklamatè-la pa distribiyé piblikasyon lè yo ka préché. Men on pyonyé pa suiv dirèksyon-la sé frè-la té bay la é i ba moun piblikasyon. Ki rézilta sa bay ? On jou, li èvè dòt pwoklamatè préché ba moun yo té ka kontré. Alòskè yo té fin préché, lalwa koumansé pozé-yo kèsyon. I ka sanm sa té ja ni on moman yo té ka maché dèyè yo é yo réyisi mèt lanmen asi sé piblikasyon-la yo té ba sé moun-la. Ka sa ka aprann-nou ? Fò-nou suiv sé enstriksyon-la nou ka risivwè la, menmsi nou pa dakò èvè yo. Jéova toujou ka béni-nou lè nou ka kolaboré èvè sé frè-la i mèt la pou dirijé-nou la (Ébr. 13:7, 17).

18. Poukwa sa enpòwtan kè nou pa mèt règ ki initil ?

 ¹⁸ Pa mèt règ ki initil. Si sé ansyen-la ka mèt dé règ ki initil anplas, sa ké vin pli rèd ba sé frè é sè la. Frè Juraj Kaminský rakonté sa ki pasé pannan yo té entèwdi aktivité an nou adan on péyi yo té ka kriyé Tchékòslovaki avan. Mi sa i di : « Apré yo arété sé frè-la ki té rèsponsab a aktivité an nou é onlo ansyen, déotwa frè ki té ka okipé-yo dè on lasanblé oben dè on siwkonskripsyon koumansé ba sé pwoklamatè-la enpé règ pou di-yo kijan pou yo konpòwté-yo. Yo koumansé fè on lis a sa pou yo fè é a sa pou yo pa fè. » Jéova pa ban-nou dwa pran désizyon an plas a moun. On moun ki ka mèt règ ki initil pa ka pwotéjé frè a-y ; okontrè, i plito ka chèché a kontwolé fwa a yo (2 Kor. 1:24).

19. Sèlon 2 Kronik 32:7, 8, poukwa fò pa nou pè kèlkèswa sa Satan ka fè-nou ?

¹⁹ Satan, Dyab-la, ki sé prensipal lènmi an nou, ké kontinyé fè tousa i pé pou i pèwsékité sèwvitè a Jéova ki fidèl (1 Pyè 5:8 ; Rév. 2:10). Satan é sa ki èvè-y ké éséyé anpéché-nou adoré Jéova. Men menmsi nou pè, nou pé’é jen arété sèvi Jéova ! (Dét. 7:21). Jéova èvè nou, é i ké kontinyé soutyenn-nou, menmsi yo ka entèwdi aktivité an nou (li 2 Kronik 32:7, 8).

20. Ki biten ou byen désidé a fè ?

²⁰ Nou vlé vin kon sé frè a prèmyé syèk-la ki té byen désidé. Mi sa yo té di sé chèf-la ki té ka dirijé-yo la : « Sé zòt pou jijé si, pou Bondyé, sa jis kè nou kouté-zòt olyé nou kouté Bondyé. Men nou, nou pé pa arété palé dè sé biten-la nou vwè la é dè sé biten-la nou tann la » (Akt 4:19, 20).