1-2. (a) Ngaa indi na kita makibot kon dumilian sang gobierno ang aton pagsimba? (b) Ano ang binagbinagon naton sa sini nga artikulo?

SANG 2018, sobra 223,000 ka manugbantala ang nagaistar sa mga lugar nga ginadumilian sang gobierno ang tanan naton nga hilikuton ukon ang pila sini. Indi na kita makibot sa sini. Natun-an naton sa nagligad nga artikulo nga pagahingabuton gid ang matuod nga mga Cristiano. (2 Tim. 3:12) Bisan diin man kita nagaistar, posible nga gulpi lang dumilian sang gobierno ang aton pagsimba sa aton mahigugmaon nga Dios nga si Jehova.

² Kon dumilian sang gobierno sa inyo pungsod ang pagsimba kay Jehova, mahimo nga mamangkot ka: ‘Wala na bala nahamuot ang Dios sa aton kon ginahingabot kita? Indi na bala naton masimba si Jehova kon ginadumilian ini? Dapat bala ako magsaylo sa iban nga lugar nga hilway ako sa pagsimba sa Dios?’ Binagbinagon naton ini nga mga pamangkot sa sini nga artikulo. Binagbinagon man naton kon paano kita makapadayon sa pagsimba kay Jehova kon ginadumilian ini kag kon ano ang indi naton dapat himuon.

3. Suno sa 2 Corinto 11:23-27, ano nga paghingabot ang naeksperiensiahan ni apostol Pablo, kag ano ang matun-an naton sa iya?

³ Kon dumilian sang gobierno ang aton pagsimba, basi magpensar kita nga wala na nahamuot ang Dios sa aton. Pero dapat naton tandaan nga kon ginahingabot kita, indi buot silingon nga naakig si Jehova sa aton. Binagbinaga ang natabo kay apostol Pablo. Sigurado gid nga nahamuot ang Dios sa iya. Gingamit sia sa pagsulat sang 14 ka libro sa Cristianong Griegong Kasulatan, kag isa sia ka apostol nga ginpadala sa mga pungsod. Pero grabe gid ang paghingabot sa iya. (Basaha ang 2 Corinto 11:23-27.) Base sa natabo kay apostol Pablo, matun-an naton nga ginatugutan  ni Jehova nga hingabuton ang iya matutom nga mga alagad.

4. Ngaa ginadumtan kita sang kalibutan?

⁴ Ginpaathag ni Jesus kon ngaa pagahingabuton gid kita. Nagsiling sia nga dumtan kita sang kalibutan bangod indi kita bahin sini. (Juan 15:18, 19) Kon ginahingabot kita, indi buot silingon nga wala na kita ginapakamaayo ni Jehova. Ang matuod, ginapakita sini nga husto ang ginahimo naton!

5. Mapauntat bala sang mga tawo ang pagsimba kay Jehova? Ipaathag.

⁵ Indi gid mapauntat sang mga tawo ang pagsimba sa labing gamhanan nga Dios nga si Jehova. Madamo ang nagtinguha nga himuon ini pero wala sila magmadinalag-on. Binagbinaga ang natabo sang Bug-os Kalibutan nga Inaway II. Ginhingabot gid sadto sang mga gobierno sa madamo nga pungsod ang katawhan sang Dios. Ang hilikuton sang mga Saksi ni Jehova gindumilian sang mga Nazi sa Germany kag sang mga gobierno sa Australia, Canada, kag sa iban pa nga pungsod. Pero ano ang natabo? Sang nagsugod ang inaway sang 1939, may 72,475 ka manugbantala sa bilog nga kalibutan. Sang matapos ang inaway sang 1945, may ara na 156,299 ka manugbantala bangod ginpakamaayo ni Jehova ang iya katawhan. Sobra pa sa doble ang pagdamo sang mga manugbantala!

6. Ano ang posible nga maayo nga mga resulta sang paghingabot? Maghatag sing halimbawa.

⁶ Bangod sang paghingabot, mahimo nga mangin determinado pa gid kita nga mag-alagad kay Jehova imbes nga mahadlok. Halimbawa, isa ka mag-asawa nga may gamay pa nga bata ang nagaistar sa isa ka pungsod nga ginadumilian sang gobierno ang aton pagsimba. Imbes nga mahadlok kag magluya, nagregular payunir ang mag-asawa. Nagatrabaho anay ang asawa kag daku ang iya sueldo, pero nag-untat sia para makapayunir. Nagsiling ang bana nga bangod sang pagdumili, madamo ang nagapamangkot parte sa mga Saksi ni Jehova. Gani madali lang sia makasugod sing mga pagtuon sa Biblia. May maayo man nga epekto sa iban ang pagdumili. Ang isa ka gulang sa sini nga pungsod nagsiling nga nagtambong na ang madamo nga nag-untat sang una sa pag-alagad kay Jehova kag nangin aktibo liwat.

7. (a) Ano ang matun-an naton sa Levitico 26:36, 37? (b) Ano ang himuon mo kon dumilian ang aton pagsimba?

⁷ Kon dumilian sang aton mga kaaway ang  aton pagsimba, gusto nila nga mahadlok kita para indi na kita mag-alagad kay Jehova. Wala labot sa pagdumili, mahimo nga magpalapta man sila sang indi matuod nga mga impormasyon parte sa aton ukon magsugo sang mga opisyal para sudlon kag usisaon ang aton mga balay. Mahimo man nila kita akusahan, ukon basi prisuhon pa nila ang iban sa aton. Ginapensar nila nga mahadlok gid kita kon mapriso nila ang pila naton ka kauturan. Kon mahadlok kita sa ila kag sa puede nila himuon sa aton, basi magluya kita ukon mag-untat pa gani sa pag-alagad kay Jehova. Indi naton gusto nga mangin pareho kita sa ginsambit sa Levitico 26:36, 37. (Basaha.) Indi kita dapat mahadlok para indi kita magluya ukon mag-untat sa pag-alagad. Magasalig gid kita kay Jehova kag indi kita magasalasala. (Isa. 28:16) Magapangamuyo kita kay Jehova nga giyahan niya kita. Bangod ginabuligan niya kita, kabalo kita nga indi gid kita mapauntat bisan sang pinakagamhanan nga gobierno sang tawo sa pagsimba sa aton Dios.—Heb. 13:6.

8-9. (a) Ano nga desisyon ang dapat himuon sang kada Cristiano para sa iya kaugalingon ukon para sa iya pamilya? (b) Ano ang makabulig sa isa para makahimo sia sang maayo nga desisyon?

⁸ Kon dumilian sang gobierno sa inyo pungsod ang aton pagsimba, basi magpalibog ka kon bala masaylo ka sa iban nga pungsod nga hilway ka sa pag-alagad kay Jehova. Ikaw ang dapat magdesisyon sa sini. Pero antes ka magdesisyon, makabulig kon binagbinagon mo ang ginhimo sang mga Cristiano sang unang siglo sang ginhingabot sila. Sa tapos nga ginpatay si Esteban sang mga kaaway, ang mga disipulo sa Jerusalem nagsaylo sa iban nga mga lugar sa bilog nga Judea kag Samaria kag bisan sa Fenicia, Cipre, kag Antioquia. (Mat. 10:23; Binu. 8:1; 11:19) Pero mahimo nga matalupangdan mo man nga sang ginhingabot liwat ang mga Cristiano sang unang siglo, wala naghalin si apostol Pablo sa mga lugar nga ginapamatukan ang pagbantala. Gusto niya ibantala ang maayong balita kag pabakuron ang mga kauturan sa mga siudad nga grabe ang paghingabot bisan pa delikado ini.—Binu. 14:19-23.

⁹ Ano ang matun-an naton sa sini? Ang ulo sang pamilya ang dapat magdesisyon kon bala masaylo sila. Pero antes sia magdesisyon, dapat sia magpangamuyo kag binagbinagon niya sing maayo ang kahimtangan sang iya pamilya. Dapat man niya binagbinagon ang posible nga maayo kag indi maayo nga mga epekto sa iya pamilya kon magsaylo sila. Sa sini nga desisyon, ang kada Cristiano “magadala sang iya kaugalingon nga lulan.” (Gal. 6:5) Indi naton dapat pagpakalainon ang desisyon sang iban.

10. Ano nga mga instruksion ang ihatag sang sanga talatapan kag sang mga gulang?

¹⁰ Paano ka makapadayon sa pagsimba kay Jehova kon ginadumilian ini? Magahatag ang sanga talatapan sa mga gulang sa inyo kongregasyon sing mga instruksion kag mga panugda kon paano makabaton sang espirituwal nga pagkaon, makatipon para sa mga miting, kag makabantala sang maayong balita. Kon indi makontak sang sanga talatapan ang mga gulang, buligan ka sang mga gulang kag ang tanan sa kongregasyon para makapadayon kamo sa pagsimba kay Jehova. Magahatag sila sing direksion nga nabase sa Biblia kag sa aton mga publikasyon.—Mat. 28:19, 20; Binu. 5:29; Heb. 10:24, 25.

11. Ngaa makasalig ka nga mabaton mo ang tanan mo nga kinahanglanon para mangin mabakod ang imo pagtuo, kag ano ang puede mo himuon para maamligan ang imo Biblia kag mga publikasyon?

¹¹ Nagpromisa si Jehova nga mabaton gid sang iya mga alagad ang tanan nila nga kinahanglanon para mangin mabakod ang ila pagtuo.  (Isa. 65:13, 14; Luc. 12:42-44) Gani makasalig ka nga himuon sang iya organisasyon ang bug-os sini nga masarangan nga mahatag ang imo kinahanglanon para makapabilin ka nga matutom. Ano ang puede mo himuon? Kon dumilian ang aton pagsimba, mangita sang lugar nga puede mo taguon ang imo Biblia kag ang iban pa nga mga publikasyon, naimprinta man ini ukon ara sa gadyet. Maghalong gid nga indi mo ini mapabay-an sa lugar nga madali makita sang mga nagapamatok sa aton. Dapat himuon sang kada isa sa aton ang masarangan naton para mangin mabakod ang aton pagtuo.

12. Ano ang himuon sang mga gulang para indi matalupangdan sang iban ang aton mga miting?

¹² Ano ang matabo sa aton mga miting kada semana? Magahimo sang paagi ang mga gulang para makatambong ka sa mga miting nga indi matalupangdan sang mga nagapamatok sa aton. Mahimo nga magahatag sila sing instruksion nga magtipon kamo sa gagmay nga mga grupo, kag posible nga lainlainon nila ang iskedyul kag lugar sang mga miting. Maamligan mo ang imo mga kauturan kon hinayon mo lang ang imo tingog kon nagapakadto ka sa mga miting ukon nagapauli halin sa sini. Maayo man kon simple lang ang imo bayo para indi ka pagsuspetsahan.

13. Ano ang matun-an naton sa aton mga kauturan sa Soviet Union sang una?

¹³ Kon parte naman sa aton pagbantala, lainlain ang kahimtangan depende sa lugar. Pero bangod palangga naton si Jehova kag gusto naton sugiran ang iban parte sa iya Ginharian, mangita gid kita sing paagi nga makabantala. (Luc. 8:1; Binu. 4:29) Parte sa pagbantala sang mga Saksi ni Jehova sa Soviet Union sang una, nagsiling ang isa ka historian nga si Emily B. Baran: “Sang ginsilingan sang gobierno ang mga Saksi nga indi sila dapat magbantala sa iban, gin-istorya nila ang ila mga kaingod, mga kaupod sa trabaho, kag mga abyan. Sang ginpriso ang mga Saksi bangod sini, nagbantala sila sa iban nga mga priso.” Ang aton mga kauturan sa Soviet Union sang una wala mag-untat sa pagbantala bisan pa gindumilian ini. Kon dumilian gid man ang pagbantala sa inyo pungsod, kabay pa nga ilugon mo sila!

14. Ano ang ginapaandam sa aton sang Salmo 39:1?

¹⁴ Maghalong sa imo ginasugid sa iban. Kon ginadumilian ang aton pagsimba, dapat kabalo kita kon san-o ang “tion sa paghipos.” (Man. 3:7) Indi naton dapat isugid ang kompidensial nga mga impormasyon, pareho sang mga ngalan sang aton mga kauturan, mga lugar diin kita nagatipon, kon paano kita nagabantala, kag kon paano kita nagabaton sang espirituwal nga pagkaon. Indi naton ini pag-isugid sa mga nagatrabaho para sa gobierno ukon sa aton mga abyan kag paryente nga nagaistar sa aton pungsod ukon sa iban nga pungsod. Kon isugid naton ini, mangin delikado ang kahimtangan sang aton mga kauturan.—Basaha ang Salmo 39:1.

15. Ano ang tinguhaan ni Satanas nga matabo sa aton, kag ano ang dapat naton himuon?

 ¹⁵ Indi pagtuguti nga maguba ang aton paghiusa bangod sang gagmay nga mga problema. Kabalo si Satanas nga indi malig-on ang isa ka panimalay kon nabahinbahin ini. (Mar. 3:24, 25) Tinguhaan gid niya nga maguba ang aton paghiusa. Gusto niya nga mag-ilinaway kita imbes nga sa iya kita magpakig-away.

16. Ano nga halimbawa ang ginpakita ni Sister Gertrud Poetzinger?

¹⁶ Dapat maghalong sa sini bisan ang hamtong na nga mga Cristiano. Binagbinaga ang natabo sa duha ka hinaplas nga utod nga babayi nga sanday Gertrud Poetzinger kag Elfriede Löhr. Napriso sila kaupod sang iban pa nga mga utod nga babayi sa isa ka prisuhan sang mga Nazi. Sang ginpalig-on ni Elfriede ang mga utod nga babayi sa prisuhan paagi sa mga pamulongpulong, nahisa si Gertrud. Sang ulihi, nahuya si Gertrud sa iya ginbatyag kag nangamuyo sia kay Jehova nga buligan sia. Nagsulat sia: “Dapat naton batunon kon ang iban mas maayo ukon may mas madamo nga responsibilidad sangsa aton.” Ano ang ginhimo niya para madula ang iya kahisa? Ginpamensar ni Gertrud ang maayo nga mga kinaiya ni Elfriede, pati na ang iya pagkamainabyanon. Gani nangin suod sia liwat kay Elfriede. Sang nahilway na sila, padayon sila nga nag-alagad kay Jehova sing matutom asta sa ila kamatayon bilang mga hinaplas. Kon panikasugan gid naton nga masolbar ang mga problema naton sa aton mga kauturan, indi gid maguba ang aton paghiusa.—Col. 3:13, 14.

17. Ngaa dapat naton sundon pirme ang direksion sang organisasyon ni Jehova?

¹⁷ Sunda pirme ang direksion. Kon sundon naton ang direksion sang masaligan nga mga utod nga nagapanguna sa organisasyon, malikawan naton ang mga problema. (1 Ped. 5:5) Halimbawa, sa isa ka pungsod nga ginadumilian ang aton pagsimba, naghatag sing direksion ang nagapanguna nga mga utod nga indi dapat magbilin sing mga publikasyon ang mga kauturan sa mga tawo kon nagabantala sila. Pero wala ini ginsunod sang isa ka payunir nga brother, kay para sa iya, mas nakabalo sia sang sitwasyon. Ano ang natabo? Wala magdugay pagkatapos sia makapanaksi sing indi pormal upod sa iban nga kauturan, gin-usisa sila sang mga pulis. Ginsundan gali sila sang opisyal sang gobierno kag ginpanguha ang ginbilin nila nga mga publikasyon. Ano ang matun-an naton sa sini? Dapat naton sundon ang direksion bisan pa wala kita nagaugyon sa sini. Malipay gid si Jehova kon magkooperar kita sa mga utod nga gintangdo niya nga magpanguna sa aton.—Heb. 13:7, 17.

18. Ngaa indi kita dapat maghimo sang mga pagsulundan nga indi kinahanglanon?

¹⁸ Indi maghimo sang mga pagsulundan nga indi kinahanglanon. Kon maghimo ang mga gulang  sang mga pagsulundan nga indi kinahanglanon, magaresulta ini sa mga problema. Amo ini ang ginsiling ni Brother Juraj Kaminský nga natabo sang gindumilian ang aton pagsimba sa Czechoslovakia sang una: “Sang ginpangdakop ang madamo nga gulang, ang pila sa wala madakpan nga mga utod nga nagapanguna sa mga kongregasyon kag mga sirkito naghimo sing mga pagsulundan para sa mga manugbantala kon ano ang dapat kag indi dapat himuon.” Wala kita ginhatagan ni Jehova sing awtoridad nga magdesisyon para sa iban. Ang nagahimo sing mga pagsulundan nga indi kinahanglanon wala nagaamlig sa iya utod. Sa baylo, ginahimo niya ang iya kaugalingon nga agalon sang pagtuo sang iya utod.—2 Cor. 1:24.

19. Suno sa 2 Cronica 32:7, 8, ngaa puede kita mangin maisog bisan ano pa ang ginahimo ni Satanas?

¹⁹ Indi magauntat si Satanas nga Yawa, ang aton panguna nga kaaway, sa paghingabot sa matutom nga mga alagad ni Jehova. (1 Ped. 5:8; Bug. 2:10) Tinguhaan ni Satanas kag sang mga nagasunod sa iya nga dumilian ang aton pagsimba kay Jehova. Pero bisan pa nahadlok kita, indi gid kita magauntat sa pag-alagad kay Jehova! (Deut. 7:21) Kaupod naton si Jehova, kag padayon niya kita nga buligan bisan pa dumilian ang aton pagsimba.—Basaha ang 2 Cronica 32:7, 8.

20. Ano ang determinado mo nga himuon?

²⁰ Kabay pa nga mangin determinado man kita pareho sang aton mga kauturan sang unang siglo nga nagsiling sa mga manuggahom sang una: “Kon sa banta ninyo ginakabig nga matarong sang Dios nga magpamati sa inyo sa baylo nga magpamati sa Dios, yara ina sa inyo. Apang para sa amon, indi kami mag-untat sa paghambal tuhoy sa mga butang nga amon nakita kag nabatian.”—Binu. 4:19, 20.